បវរកញ្ញា លក្ខណ៍ មុនីអានីតា បាននិយាយប្តេជ្ញាចិត្តរបស់ខ្លួនប្រឹងប្រែងឱ្យអស់ពីសមត្ថភាពដើម្បីមុខមាត់ប្រទេសការប្រកួត Miss Global 2023 ដែលកម្ពុជាធ្វើជាម្ចាស់ផ្ទះក្នុងការប្រកួតឈុតតំណាងជាតិ និងថ្ងៃផ្តាច់ព្រ័ត្រ។ ទោះជាយ៉ាងណា អានីតា ក៏បានបន្ថែមថាទោះបីជាការប្រកួតនេះទទួលបានលទ្ធផលបែបណានាងក៏ទទួលយកដូចគ្នា។

អំឡុងពេលប្រកួតបឋមកម្មវិធី Miss Global 2023 ប្រព្រឹត្តទៅនៅលើទឹកដីវៀតណាម លក្ខណ៍ មុនីអានីតា ធ្វើឱ្យអ្នកគាំទ្រសរសើរពីសមត្ថភាពរបស់នាងដែលធ្វើបានយ៉ាងល្អក្នុងការប្រកួតដែលមានការចូលរួមពីបេក្ខភាពជាច្រើនរូប។ មិនថាសម្រស់ ការដើរ និងការប្រើប្រាស់ភាសា លក្ខណ៍ មុនីអានីតា ធ្វើបានយ៉ាងល្អប្រកបដោយភាពជឿជាក់។ បន្ទាប់ពីឆ្លងកាត់ការប្រកួតបឋមនៅលើទឹកដីវៀតណាម ការប្រកួតឈុតតំណាងជាតិបានធ្វើឡើងនៅប្រទេសកម្ពុជាកាលពីយប់ថ្ងៃទៅ១៦ មករា ២០២៤ ដោយបេក្ខភាព៦៩ប្រទេសបានបញ្ចប់ភារៈកិច្ចរបស់ខ្លួន នឹងត្រៀមខ្លួនប្រកួតផ្តាច់ព្រ័ត្រនាថ្ងៃទី១៨ មករា ខាងមុខនេះ។

ក្នុងវគ្គប្រកួតឈុតតំណាងជាតិ លក្ខណ៍ មុនីអានីតា បានបង្ហាញឈុតប្រទីបព្រះសីនៃក្រុងធិបតី ដែលធ្វើឱ្យមានសំឡេងគាំទ្រយ៉ាងខ្លាំងពីទស្សនិកជនស្របពេលបវរកញ្ញា អ៊ិន លក្ខណា ក៏បានទៅចូលរួមលើកទឹកចិត្តដោយផ្ទាល់ផងដែរ។

នៅថ្ងៃទី១៧ មករា នេះ លក្ខណ៍ មុនីអានីតា Miss Global Cambodia 2023 បាន Live ជជែកកម្សាន្តជាមួយអ្នកគាំទ្រ ព្រមទាំងនិយាយបេ្តជ្ញាចិត្តរបស់ខ្លួនទៅកាន់ប្រជាជនខ្មែរ នាងនឹងប្រឹងប្រែងឱ្យអស់ពីសមត្ថភាពក្នុងការប្រកួតនេះដើម្បីមុខមាត់ប្រទេសកម្ពុជា។ ទន្ទឹមនឹងការប្តេជ្ញាចិត្តរបស់ខ្លួន បវរកញ្ញារូបនេះក៏បានលើកឡើងដែរថា បើការប្រកួតនេះមានលទ្ធផលបែបណានាងក៏ទទួលយកដូចគ្នា។

កម្មវិធី Miss Global បានបង្កើតឡើងក្នុងឆ្នាំ២០១៣ ហើយកម្ពុជាបានបញ្ជូនបេក្ខនារីដំបូងទៅប្រកួតក្នុងឆ្នាំ២០១៥ ដោយបានជាប់លំដាប់រងទី១ ឆ្នាំ២០១៦ ជាប់ TOP20 ឆ្នាំ២០១៧ ជាប់TOP10 ឆ្នាំ២០១៨ TOP10 ឆ្នាំ២០១៩មិនបានចូលTOP ឆ្នាំ២០២១ មិនបានបញ្ជូនបវរកញ្ញាទៅប្រកួត៕

ប្រទេសឥណ្ឌា៖ ឥណ្ឌាត្រូវបានគេរំពឹងថានឹងរក្សាជំហររបស់ខ្លួនជាប្រទេសសេដ្ឋកិច្ចធំបំផុតនៅអាស៊ីបន្ទាប់ពីចិនដែលមានកំណើនលឿនបំផុតរបស់ពិភពលោកនៅឆ្នាំនេះ។
កាលពីថ្ងៃទី១៧ ខែមករា ឆ្នាំ២០២៤ យោងតាមធនាគារពិភពលោក (WB) និងអ្នកសេដ្ឋកិច្ចជាច្រើនបាននិយាយថា ឥណ្ឌានឹងរក្សាជំហររបស់ខ្លួនជាប្រទេសសេដ្ឋកិច្ចធំបន្ទាប់ពីចិន ដែលមានកំណើនលឿនបំផុតរបស់ពិភពលោកនៅឆ្នាំនេះ ដោយសារកាលពីឆ្នាំមុនឥណ្ឌាបានរួមចំណែកច្រើនជាង ៣/៤ នៃកំណើនអាស៊ីខាងត្បូង ដែលលឿនបំផុតក្នុងចំណោមតំបន់សេដ្ឋកិច្ចដែលកំពុងរីកចម្រើន និងកំពុងអភិវឌ្ឍ។ កត្តាជាច្រើននេះបានរួមចំណែកដល់កំណើន រួមទាំងការកើនឡើងនៃការចំណាយរបស់រដ្ឋាភិបាល និងវិស័យសេវាកម្មដ៏រស់រវើក។

ទោះជាយ៉ាងណាក៏ដោយ អតិផរណានៅតែជាក្តីបារម្ភសម្រាប់ម្ចាស់អាជីវកម្មនៅក្នុងប្រទេសដែលមានប្រជាជនច្រើនជាងគេលើពិភពលោកនេះ។ ខណៈពេលដែលម្ចាស់អាជីវកម្មសប្បាយចិត្តដែលសេដ្ឋកិច្ចឥណ្ឌាកំពុងកើនឡើងម្តងទៀត ពួកគេក៏ព្រួយបារម្ភអំពីអតិផរណាផងដែរ ដោយសារសន្ទស្សន៍តម្លៃទំនិញប្រើប្រាស់ (CPI) របស់ឥណ្ឌាឡើងខ្ពស់ជាង ៤.២៥% ក្នុងឆ្នាំ ២០២៣។

ប្រទេសឥណ្ឌាគឺជាសេដ្ឋកិច្ចផ្អែកលើការប្រើប្រាស់ ហើយទោះបីជាវាកំពុងទទួលបានអត្ថប្រយោជន៍ពីការកើនឡើងនៃប្រាក់ចំណូលក៏ដោយ ធនាគារពិភពលោកបានព្រមានថាការចំណាយរបស់អ្នកប្រើប្រាស់អាចធ្លាក់ចុះជាបណ្តើរៗ នៅពេលដែលតម្រូវការកើនឡើង បន្ទាប់ពីជំងឺរាតត្បាតក៏ធ្លាក់ចុះផងដែរ ដោយសារអតិផរណាស្បៀងនៅតែខ្ពស់ ការចំណាយរបស់គ្រួសារ ជាពិសេសគ្រួសារដែលមានចំណូលទាប ទំនងជាត្រូវបានរឹតបន្តឹង។ ដូច្នេះហើយ យោងតាមអ្នកសេដ្ឋកិច្ច អតិផរណាត្រូវបានគេរំពឹងថានឹងនៅតែលើសពី ៤% រហូតដល់ខែមីនាឆ្នាំនេះ ហើយឈានដល់ជាមធ្យម ៤.៨% ចាប់ពីខែមេសាតទៅ៕

Betavolt ដែលជាក្រុមហ៊ុនផលិតថាមពលបច្ចេកវិទ្យាទំនើបនៅប្រទេសចិន បានបង្កើតថ្មថ្មីស្រឡាងមួយ “ថ្មនុយក្លេអ៊ែរ” ដែលមានសមត្ថភាពខ្ពស់ក្នុងការផលិតថាមពលឬចរន្តអគ្គិសនីបានដល់ទៅ៥០ឆ្នាំ ដោយមិនចាំបាច់បញ្ចូលថ្ម ឬថែទាំអ្វីឡើយ។

ថ្មនេះគឺត្រូវបានគេដាក់ឈ្មោះឲ្យថា “ថ្មនុយក្លេអ៊ែរ” ផលិតឡើងដោយការដាក់បញ្ចូល«អ៊ីសូតូបនុយក្លេអ៊ែរ»ចំនួន៦៣គ្រាប់ចូលទៅក្នុងដុំមួយ ដែលស្ទើរតែតូចជាងកាក់មួយផង ។

ក្នុងដំណើរការនៃការផលិតថាមពល ថ្មនុយក្លេអ៊ែរនឹងបំប្លែងថាមពលវិទ្យុសកម្មអ៊ីសូតូបទៅជាថាមពលអគ្គិសនី ដែលវាពិតជាមានគុណសម្បត្តិច្រើនជាងថ្មប្រភេទផ្សេងទៀតរាប់រយដង ព្រោះតែដង់ស៊ីតេថាមពលរបស់ថ្មីអគ្គីសនីនេះមានកម្រិតខ្ពស់ជាង។

ក្រុមហ៊ុន Betavolt របស់ចិននេះបានអះអាងថា វាគឺជាថ្មដំបូងគេរបស់ពិភពលោកដែលសម្រេចបាននូវការផលិតថាមពលអាតូមិច (ជាដំណើរការបំបែកវិទ្យុសកម្ម) ខ្នាតតូច ដោយពិតជាមានសមត្ថភាពក្នុងការប្រកួតប្រជែងនឹងជាមួយបច្ចេកវិទ្យានុយក្លេអ៊ែរដទៃទៀត។

ក្រុមហ៊ុនបាននិយាយទៀតថា ការបង្កើតថ្មជំនាន់ថ្មីគឺកំពុងស្ថិតនៅក្នុងដំណាក់កាលនៃការសាកល្បងហើយ។ ថ្មនុយក្លេអ៊ែរដំបូងរបស់ខ្លួនអាចផ្តល់ថាមពលរហូតដល់ទៅ ១០០ មីក្រូវ៉ាត់ និងវ៉ុល ៣V ខណៈដែលមានទំហំ ១៥x១៥x៥ មីលីម៉ែត្រគូប។ ថ្មនេះទៀតសោត គឺអាចដំណើរការបាននៅក្នុងសីតុណ្ហភាពត្រជាក់ខ្លាំងចាប់ពី -៦០អង្សាសេ ដល់ កម្រិតសីតុណ្ហភាពក្តៅខ្លាំងជាងទឹកពុះ ១២០ អង្សាសេ។
កាន់តែអស្ចារ្យជាងនេះទៅទៀត ថ្មនុយក្លេអ៊ែរនេះគឺមានលក្ខណៈពិសេស ដែលបានផលិតឡើងធន់នឹងភ្លើង ព្រមទំាងការពារការកន្ត្រាក់ ដោយធានាបាននូវសុវត្ថិភាពខ្ពស់នៅពេលដែលកំពុងប្រើប្រាស់ថ្មនេះនឹងផ្ទុះឆេះនោះទេ បើទោះបីជាមានកម្លាំងចលករខាងក្រៅកើតឡើងដោយអចេតនាប៉ះទៅលើឧបករណ៍ដែលកំពុងដំណើរការដោយថ្មនុយក្លេអ៊ែរនេះក៏ដោយ។

គួរបញ្ជាក់ផងដែរថា ការច្នៃប្រឌិតថាមពលថ្មីនេះនឹងជំរុញឱ្យប្រទេសចិនទទួលបានភាពជោគជ័យមួយ និងឈានមុខគេក្នុងបដិវត្តន៍បច្ចេកវិទ្យា AI ។ ថ្មនុយក្លេអ៊ែរថ្មីរបស់ក្រុមហ៊ុនចិននេះ នឹងបំពេញតម្រូវការដល់មនុស្សគ្រប់រូប ព្រោះថាវាអាចផ្គត់ផ្គង់ថាមពលប្រើប្រាស់បានរយៈពេលយូរ ចំណេញពេលវេលា និងប្រើបានគ្រប់កាលៈទេសៈទាំងអស់រាប់ចាប់ពីការបញ្ចូលថ្មទូរស័ព្ទ បរិក្ខារប្រើប្រាស់ប្រចាំថ្ងៃ បរិក្ខារពេទ្យ និងមិនថានៅលើលំហអាកាស ធ្វើជាឧបករណ៍ចាប់សញ្ញាកម្រិតខ្ពស់ និងបញ្ជាលើត្រូនផ្សេងៗផងដែរ៕

ប្រទេសឡាវ៖ រដ្ឋធានីបុរាណហ្លួងព្រះបាងរបស់ប្រទេសឡាវ អាចនឹងត្រូវបានដកចេញពីបញ្ជីបេតិកភណ្ឌពិភពលោករបស់អង្គការយូណេស្កូ ដោយសាររដ្ឋធានីនេះមានការអភិវឌ្ឍសំណង់ថ្មីៗហួសហេតុដែលធ្វើឱ្យបាត់បង់ផ្ទះបុរាណ និងបំផ្លាញវប្បធម៌ប្រពៃណីមួយចំនួន។ នេះបើយោងតាមគេហទំព័រអន្តរជាតិ Nikkei Asia ដែលបានចុះផ្សាយកាលពីថ្ងៃទី១៤ ខែមករាកន្លងទៅ។

ហ្លួងព្រះបាងគឺជាគោលដៅដ៏ស្រស់ស្អាតដែលរួមបញ្ចូលសម្រស់ធម្មជាតិ និងស្ថាបត្យកម្មឡាវ-បារាំងដ៏ទាក់ទាញ។ រដ្ឋធានីបុរាណនេះស្ថិតនៅចន្លោះទន្លេមេគង្គ និងទន្លេ Nam Khan គឺជាតំបន់បេតិកភណ្ឌពិភពលោករបស់អង្គការយូណេស្កូក្នុងឆ្នាំ ១៩៩៥។ ទីតាំងនេះក៏ជាមជ្ឈមណ្ឌលវប្បធម៌ព្រះពុទ្ធសាសនាដ៏សំខាន់នៅក្នុងប្រទេសឡាវផងដែរ។ ភ្ញៀវដែលមកទីនេះអាចឃើញព្រះសង្ឃស្លៀកស្បង់ពណ៌ទឹកក្រូចភ្លឺចែងចាំង និមន្តឆ្លងកាត់ផ្លូវជាជួរៗជារៀងរាល់ព្រឹក និងមានទូកឈើកន្ទុយវែងដែលកំពុងរត់តាមដងទន្លេដែលហ៊ុព័ទ្ធដោយភ្នំដើមឈើត្រូពិចទៀតផង។

ទោះជាយ៉ាងណាក៏ដោយ យោងតាមរបាយការណ៍ថ្មីមួយរបស់អង្គការយូណេស្កូបានបង្ហាញពីបញ្ហាគួរឱ្យព្រួយបារម្ភមួយចំនួន ប្រសិនបើមិនត្រូវបានដោះស្រាយឆាប់ៗនេះទេ ហ្លួងព្រះបាងអាចនឹងបាត់បង់ឋានៈជាបេតិកភណ្ឌពិភពលោក។ បញ្ហារួមមានការអភិវឌ្ឍសំណង់ដែលធ្វើឱ្យបាត់បង់ផ្ទះបុរាណ និងរចនាសម្ព័ន្ធប្រពៃណីមួយចំនួន ក៏ដូចជាការព្រួយបារម្ភទាក់ទងនឹងទេសចរណ៍ហួសប្រមាណ និងការបាត់បង់ជីវិតវប្បធម៌។ ជាពិសេស មានការបារម្ភអំពីការសាងសង់ស្ពានតាមដងទន្លេណាំខាន់ ដែលនឹងជំនួសស្ពានឬស្សី ហើយទំនប់ទីពីរដែលត្រូវសាងសង់នៅតំបន់នាពេលខាងមុខនឹងប៉ះពាល់ដល់តម្លៃនៃរដ្ឋធានីបុរាណឡាវ។

លោក Minja Yang អតីតនាយករងនៃមជ្ឈមណ្ឌលបេតិកភណ្ឌពិភពលោករបស់អង្គការយូណេស្កូ បាននិយាយថា “ប្រសិនបើទំនប់ទីពីរត្រូវបានសាងសង់ វានឹងក្លាយជាហេតុផលចម្បងដែលហ្លួងព្រះបាងត្រូវបានដកចេញពីបញ្ជីបេតិកភណ្ឌពិភពលោក”។ លោក Yang បានបន្តទៀតថា “អង្គការយូណេស្កូបានផ្តល់ឱ្យយើងនូវច្បាប់ជាច្រើនដើម្បីអនុវត្តតាម ប៉ុន្តែឥឡូវនេះយើងបានអនុវត្តផ្ទុយ” ។

បច្ចុប្បន្ន ទីក្រុងបុរាណនេះមានអគារជាង ៦០០ និងតំបន់ដីសើមចំនួន ១៨៣ ត្រូវបានការពារក្រោមលក្ខខណ្ឌនៃកិច្ចព្រមព្រៀងរបស់អង្គការយូណេស្កូ។ កម្រិតជីវភាពរបស់ប្រជាជនកាន់តែកើនឡើង ទីប្រជុំជនក៏មានភាពរស់រវើកជាបណ្តើរៗ ដោយសារយុវជនដែលធ្វើការក្នុងឧស្សាហកម្មទេសចរណ៍មកទីនេះ។ ការមកដល់របស់ភ្ញៀវទេសចរទៅកាន់ទីក្រុងបានកើនឡើងដប់ដងក្នុងរយៈពេល ២ ទសវត្សរ៍ចុងក្រោយនេះ ជាមួយនឹងភ្ញៀវទេសចរបរទេសជិត ៨០០,០០០ នាក់នៅក្នុងត្រីមាសដំបូងនៃឆ្នាំ ២០២៣ ។

តម្លៃអចលនទ្រព្យបានកើនឡើង ប្រជាជនក្នុងតំបន់ជាច្រើនបានជ្រើសរើសលក់ ឬជួលផ្ទះរបស់ពួកគេ ហើយរើចេញពីទីក្រុង។ ប្រជាជនជនជាតិដើមភាគតិចថយចុះ វត្តអារាមត្រូវរួមតូច។ ដូច្នេះហើយ វិស័យទេសចរណ៍នៅក្នុងទីក្រុងនេះកំពុងមានការកើនឡើង ក្លាយជាកន្លែងទាក់ទាញរបស់អ្នកវិនិយោគចិនជាច្រើន ដែលនេះគឺជាបញ្ហាដ៏ធំមួយសម្រាប់រដ្ឋធានីហ្លួងព្រះបាងក្នុងដកចេញពីបញ្ជីបេតិកភណ្ឌពិភពលោករបស់អង្គការយូណេស្កូ៕