បរទេស៖ អាជ្ញាធរឥណ្ឌូណេស៊ីបានបញ្ជាឱ្យជម្លៀសមនុស្សជាង ២,០០០ នាក់ចេញពីភ្នំភ្លើង Lewotobi Laki-Laki បន្ទាប់ពីវាបានផ្ទុះឡើងម្តងទៀត និងបានបញ្ចេញផេះភ្នំភ្លើងយ៉ាងច្រើន។

យោងតាមប្រភពព័ត៌មាន The Jakarta Post ដែលបានចុះផ្សាយនៅថ្ងៃទី២ ខែមករាថា អាជ្ញាធរឥណ្ឌូណេស៊ីបានបញ្ជាឱ្យជម្លៀសមនុស្សជាង ២,០០០ នាក់ទៅកាន់ទីជម្រកដែលមានសុវត្ថិភាពបណ្តោះអាសន្ន បន្ទាប់ពីភ្នំភ្លើង Levotobi Laki-Laki ដែលជាភ្នំភ្លើងស្ថិតនៅក្នុងខេត្ត Nusa ភាគខាងកើត Tenggara បានផ្ទុះឡើងកាលពីសប្តាហ៍មុន ហើយបានបញ្ចេញផេះភ្នំភ្លើងយ៉ាងច្រើន ដែលកើនឡើង ១,៥ គីឡូម៉ែត្រពីចំណុចខ្ពស់បំផុត។

ភ្នំភ្លើង Lewotobi Laki-Laki បានផ្ទុះឡើងជាច្រើនដងក្នុងប៉ុន្មានសប្តាហ៍ថ្មីៗនេះ ដែលធ្វើឱ្យប៉ះពាល់ដល់សង្កាត់ចំនួនពីរនៅជិតភ្នំ Lewotobi Laki-Laki រួមទាំងប៉ះពាល់ដល់អាកាសយានដ្ឋាន Franzavier Seda ផងដែរ។ ដូច្នេះអាជ្ញាធរបានជំរុញឱ្យអ្នកស្រុកជាង ២,២០០ ជម្លៀសទៅកាន់ទីជម្រកសុវត្ថិភាពបណ្តោះអាសន្នដែលបង្កើតឡើងដោយរដ្ឋាភិបាលក្នុងតំបន់។

គួរបញ្ជាក់ដែរថា បច្ចុប្បន្នក្រុមមន្ត្រីបានប្រកាសអាសន្នអំពីស្ថានភាពភ្នំភ្លើងដល់កម្រិតខ្ពស់បំផុតទីពីរនៃកម្រិតប្រកាសអាសន្នបួនកម្រិតរបស់ប្រទេសឥណ្ឌូនេស៊ី ហើយបានពង្រីកតំបន់បន់ហាមចូលពី ២ គីឡូម៉ែត្រទៅ ៤ គីឡូម៉ែត្រនៅជុំវិញមាត់រណ្ដៅរបស់វា។

ទោះជាយ៉ាងណាក៏ដោយ ប្រទេសឥណ្ឌូណេស៊ី ស្ថិតនៅលើក្រវ៉ាត់ភ្លើងប៉ាស៊ីហ្វិក ដែលជាតំបន់មានសកម្មភាពភ្នំភ្លើង និងរញ្ជួយដីខ្លាំង។ កាលពីខែមុន ភ្នំម៉ារ៉ាពីនៅកោះស៊ូម៉ាត្រាបានផ្ទុះឡើង ហើយមនុស្ស ២៣ នាក់បានស្លាប់ ដោយប្រទេសនេះមានភ្នំភ្លើងសកម្មជិត ១៣០ ឯណោះ៕

ប្រទេសថៃ ៖ កាលពីថ្ងៃទី២ ខែមករា ឆ្នាំ២០២៤ សារព័ត៌មានថៃផ្សាយថា មានអ្នករត់ម៉ូតូឌុបថៃចំនួន២នាក់បានព្រួតគ្នាវាយភ្ញៀវទេសចរបរទេសនៅកណ្តាលទីក្រុងប៉ាតាយ៉ា ។ ក្រោយហេតុការណ៍នេះ ពួកគេត្រូវបានសមត្ថកិច្ចឃាត់ខ្លួនបញ្ជូនមកកាន់ស្ថានីយប៉ូលិស និងពិន័យជាប្រាក់ម្នាក់១ពាន់បាត ប៉ុន្តែអ្នករត់ម៉ូតូឌុបទាំងនេះប្រាប់សមត្ថកិច្ចថា ពួកគេវាយភ្ញៀវទេសចរបរទេស ដោយសារការពារខ្លួនប៉ុណ្ណោះ ។

បើតាមវីដេអូបង្ហាញថា អ្នករត់ម៉ូតូឌុបថៃបាននាំគ្នាដាល់ផ្ទៃមុខ និងទាត់ភ្ញៀវទេសចរបរទេសដែលមានតែម្នាក់ឯង ក្នុងកណ្តាលចំណោមអ្នករត់ម៉ូតូឌុបផ្សេងទៀត និងពលរដ្ឋថៃនៅពាសពេញបរិវេណនេះ ។ អ្នកឃើញហេតុការណ៍ស្រែកថា ៖ «ឈប់វាយទៅ បើមិនឈប់ទេ នឹងប្តឹងសមត្ថកិច្ចឱ្យចាប់ខ្លួនហើយ» ។ ហេតុការណ៍នេះបានកើតឡើងនៅបរិវេណចំណតម៉ូតូឌុប នៅមាត់ផ្លូវ «ប៉ាតាយ៉ា សាយសង» ខាងមុខហាងលក់ទំនិញមួយកន្លែងក្នុងខេត្តឈុនបុរី ។

អ្នកឃើញហេតុការណ៍បានថតវីដេអូវាយតប់គ្នាបង្ហោះក្នុងបណ្តាញសង្គម និងសរសេរថា ៖ «វាយភ្ញៀវទេសចរអស់មួយទំហឹងហើយ ពួកម៉ូតូឌុបប៉ាតាយ៉ា នៅថ្ងៃ Countdown ប៉ាតាយ៉ា» ដែលធ្វើឱ្យអ្នកលេងបណ្តាញសង្គមរិះគន់យ៉ាងខ្លាំងពីទង្វើរបស់ពួកគេ ។ អ្នកលេងបណ្តាញសង្គមខ្លះនិយាយថា ការវាយតប់ភ្ញៀវទេសចរបែបនេះ នឹងប៉ះពាល់ដល់វិស័យទេសចរណ៍ប្រទេសថៃមិនខាន ព្រោះបើមើលក្នុងវីដេអូឃើញថា អ្នករត់ម៉ូតូឌុបថៃមានគ្នាដល់ទៅ២នាក់បានវាយតប់មកលើភ្ញៀវទេសចរតែម្នាក់ឯង រហូតភ្ញៀវទេសចររូបនោះទ្រាំលែងបាន ។

ក្រោយមក សមត្ថកិច្ចប្រចាំក្រុងប៉ាតាយ៉ាបានឃាត់ខ្លួនអ្នករត់ម៉ូតូឌុបទាំង២នាក់ ដែលវាយតប់ជាមួយភ្ញៀវទេសចរមកសួរចម្លើយ ។ អ្នករត់ម៉ូតូឌុបទាំង២នាក់សារភាពថា ក្នុងវីដេអូនេះ គឺជាពួកគេពិតមែន និងបានសូមទោសសង្គម ។ ចំពោះមូលហេតុដែលពួកគេនាំគ្នាវាយភ្ញៀវទេសចរបែបនេះ ដោយសារមុនពេលកើតហេតុ ភ្ញៀវទេសចររូបនេះបានយកម៉ូតូមកចតនៅចំណតម៉ូតូឌុបពួកគេ ។ បន្ទាប់មក ភ្ញៀវទេសចរបានរុញដើមទ្រូងពួកគេរហូតដល់ដួល ទើបពួកគេទ្រាំលែងបាន ក៏មានជម្លោះវាយតប់តែម្តង ។

អ្នករត់ម៉ូតូឌុបម្នាក់និយាយប្រាប់សមត្ថកិច្ចថា ៖ «ខ្ញុំហាមគេមិនឱ្យចតម៉ូតូនៅចំណតម៉ូតូឌុបទេ តែគេមិនស្តាប់ខ្ញុំ ហើយនៅតែចតដដែល ។ ក្រោយមក ខ្ញុំក៏បានអូសម៉ូតូគេចេញពីចំណតម៉ូតូឌុប ស្រាប់តែគេមកបង្ករឿងជាមួយខ្ញុំមុន ។ ប៉ុន្តែអ្នកថតវីដេអូពុំបានថតពីសកម្មភាពដំបូងទេ តែមកថតពេលកំពុងវាយគ្នា» ។

សមត្ថកិច្ចបានចោទប្រកាន់អ្នករត់ម៉ូតូទាំង២នាក់ពីបទបង្កោះជម្លោះ និងពិន័យពួកគេក្នុងម្នាក់១ពាន់បាត ។ សមត្ថកិច្ចបានដាស់តឿនពួកគេ មុនពេលដោះលែងឱ្យត្រឡប់ទៅផ្ទះវិញ ។ រីឯជនបរទេសដែលត្រូវបានអ្នករត់ម៉ូតូឌុបថៃវាយតប់នោះ ពុំទាន់បានមកដាក់ពាក្យបណ្តឹងនៅស្ថានីយប៉ូលិសទេ ៕

បរទេស៖ តុលាការបង់ក្លាដែសបានកាត់ទោសលោក Muhammad Yunus ដែលជាអ្នកឈ្នះពានរង្វាន់ណូបែលសន្តិភាពឆ្នាំ ២០០៦ ឱ្យជាប់ពន្ធនាគាររយៈពេល ៦ ខែពីបទរំលោភច្បាប់ការងារ។

យោងតាមគេហទំព័រអន្តរជាតិ BBC ដែលបានចុះផ្សាយនៅថ្ងៃទី២ ខែមករាថា លោក Muhammad Yunus និងសហការីបីនាក់នៅក្រុមហ៊ុន Grameen Telecom របស់គាត់ត្រូវបានចោទប្រកាន់ពីបទបំពានច្បាប់ការងារចំពោះការមិនបង្កើតមូលនិធិសុខុមាលភាពសម្រាប់បុគ្គលិក។ ដូច្នេះតុលាការការងារនៃទីក្រុង Dhaka ប្រទេសបង់ក្លាដែស បានសម្រេចកាត់ទោសជនជាប់ចោទ ៤ នាក់ឱ្យជាប់ពន្ធនាគាររយៈពេល ៦ ខែ ប៉ុន្តែជនជាប់ចោទទាំងបួននាក់នោះត្រូវបានដោះលែងឱ្យនៅក្រៅឃុំ ហើយអាចប្តឹងឧទ្ធរណ៍ក្នុងរយៈពេលមួយខែ។

ទោះជាយ៉ាងណាក៏ដោយ ក្រុមចុងចោទបានបដិសេធការចោទប្រកាន់នេះ ដោយលោក Yunus អាយុ ៨៣ ឆ្នាំបាននិយាយថា៖ «ខ្ញុំត្រូវបានដាក់ទោសចំពោះបទឧក្រិដ្ឋដែលខ្ញុំមិនបានប្រព្រឹត្ត។ យោងតាមលោក Yunus សាលក្រមប្រឆាំងនឹងគាត់គឺផ្ទុយពីគំរូច្បាប់ និងតក្កវិជ្ជាទាំងអស់។ លោកក៏បានអំពាវនាវឱ្យប្រជាជនបង់ក្លាដែស «និយាយប្រឆាំងនឹងភាពអយុត្តិធម៌ និងគាំទ្រលទ្ធិប្រជាធិបតេយ្យ និងសិទ្ធិមនុស្ស»។

នៅក្នុងហេតុការណ៍នោះ មនុស្សរាប់សិបនាក់ក៏បានធ្វើបាតុកម្មគាំទ្រលោក Yunus នៅខាងក្រៅតុលាការផងដែរ។ ដោយមេធាវីរបស់ Yunus លោក Abdullah Al Mamun បាននិយាយថាពួកគេនឹងប្តឹងឧទ្ធរណ៍ ហើយលោកក៏ចាត់ទុកបណ្តឹងនេះថាមានហេតុផលនយោបាយក្នុងគោលបំណងយាយីកូនក្តីរបស់លោក។ អ្នកគាំទ្ររបស់ Yunus ជឿថារដ្ឋាភិបាលបង់ក្លាដែសចង់បង្ខូចកេរ្តិ៍ឈ្មោះគាត់ ពីព្រោះអ្នកឈ្នះរង្វាន់ណូបែលសន្តិភាពធ្លាប់បានពិចារណាបង្កើតគណបក្សប្រឆាំងទៅនឹងសម្ព័ន្ធ Awami របស់លោកស្រី Hasina ។

លោកស្រី Hasina មានបំណងសម្រាប់អាណត្តិទី៥ ជានាយករដ្ឋមន្ត្រី និងអាណត្តិទី៤ ជាប់ៗគ្នាក្នុងការបោះឆ្នោត ដែលធ្វើឡើងនៅថ្ងៃទី៧ ខែមករា ដោយគណបក្សប្រឆាំងបង់ក្លាដែសបានប្រកាសធ្វើពហិការការបោះឆ្នោតនេះ។

ទោះជាយ៉ាងណាក៏ដោយ នាយករដ្ឋមន្ត្រីបង់ក្លាដែស Hasina ក៏បានចោទលោក Yunus ថាបានជញ្ជក់ឈាមអ្នកក្រ ហើយម្ចាស់ពានរង្វាន់រូបនេះក៏ប្រឈមនឹងការចោទប្រកាន់ជាង ១០០ ករណីផ្សេងទៀតពីបទរំលោភច្បាប់ការងារ និងអំពើពុករលួយផងដែរ។

កាលពីខែធ្នូ លោក Yunus បាននិយាយថា គាត់មិនបានចំណេញពីក្រុមហ៊ុនជាង ៥០ ដែលគាត់បានបង្កើតនៅក្នុងប្រទេសបង់ក្លាដែសនោះទេ។ Yunus និងក្រុមហ៊ុនមីក្រូហិរញ្ញវត្ថុ Grameen Bank របស់គាត់បានទទួលពានរង្វាន់ណូបែលសន្តិភាពក្នុងឆ្នាំ ២០០៦ សម្រាប់ការជួយមនុស្សរាប់លាននាក់ឱ្យរួចផុតពីភាពក្រីក្រតាមរយៈប្រាក់កម្ចីតិចជាង ១០០ ដុល្លារនៅជនបទនៃប្រទេសបង់ក្លាដែស៕

ប្រទេសថៃ ៖ កាលពីថ្ងៃទី២ ខែមករា ឆ្នាំ២០២៤ សារព័ត៌មានថៃរាយការណ៍ថា រថភ្លើងអាកាសពណ៌លឿងបានរបូតកង់ធ្លាក់សង្កត់លើរថយន្តតាក់ស៊ី១គ្រឿង ដែលចតនៅខាងក្រោម និងបណ្តាលឱ្យខូចខាតផ្នែកខាងមុខរបស់រថយន្ត ។ បន្ទាប់មក សមត្ថកិច្ចប្រចាំតំបន់បានមកកាន់កន្លែងកើតហេតុដើម្បីត្រួតពិនិត្យការខូចខាត និងរកមូលហេតុដែលបណ្តាលឱ្យរថភ្លើងអាកាសរបូតកង់ ។ ហេតុការណ៍នេះបានកើតឡើងនៅលើផ្លូវថេផារ៉ាក់ ជិតស្ថានីយរថភ្លើងស្រ៊ីថេផា ក្នុងខេត្តសមុទ្រប្រាកាន ។

នៅកន្លែងកើតហេតុ គេបានឃើញកង់របស់រថភ្លើងអាកាសពណ៌លឿងបានធ្លាក់ចុះមកក្រោមត្រង់បរិវេណផ្លូវថ្មើរជើង ហើយបណ្តាលឱ្យរថយន្តតាក់ស៊ី១គ្រឿងខូចខាតផ្នែកខាងមុខ ខណៈម្ចាស់រថយន្តតាក់ស៊ីឈររង់ចាំឱ្យនាយកស្ថានីយរថភ្លើងមកដោះស្រាយនៅកន្លែងកើតហេតុ ។ រីឯរថភ្លើងដែលរបូតកង់នោះបានធ្វើដំណើរទៅកាន់ស្ថានីយឡាតប្រាវ ទីក្រុងបាងកក ។

បើតាមការសាកសួរអ្នកបើកបររថយន្តតាក់ស៊ីឱ្យដឹងថា លោកបានបើករថយន្តចេញពីស្រុកសាំរ៉ូង ជាមួយអ្នកដំណើរម្នាក់ទៀត ហើយពេលមកដល់ចំណុចកើតហេតុ ស្រាប់តែឃើញកង់រថភ្លើងអាកាសពណ៌លឿងធ្លាក់មកលើផ្នែកខាងមុខនៃរថយន្តរបស់លោក បណ្តាលឱ្យរថយន្តញ័រយ៉ាងខ្លាំង ។ ចំណែករូបលោក និងអ្នកដំណើរមិនរងរបួសអ្វីទេ ប៉ុន្តែអ្នកដំណើរបានសុំលោកចុះពីរថយន្ត ។

រីឯក្រុមហ៊ុន Stern Bangkok Monorail ជាក្រុមហ៊ុនដំណើរការគម្រោងរថភ្លើងអាកាសពណ៌លឿង ដែលចេញដំណើរពីឡាតប្រាវ ទៅកាន់ស្រុកសាំរ៉ូង ឱ្យដឹងថា ក្រុមហ៊ុនបានទទួលរបាយការណ៍ថា រថភ្លើងអាកាសពណ៌លឿងរបូតកង់ធ្លាក់សង្កត់លើរថយន្តតាក់ស៊ីនៅត្រង់ផ្លូវថេផារ៉ាក់ ។ ចំណុចនេះស្ថិតនៅចន្លោះស្ថានីយ YL22 និងស្ថានីយ YL21 ប៉ុន្តែគ្មានអ្នករងរបួសក្នុងហេតុការណ៍នេះទេ ។

បើតាមការត្រួតពិនិត្យរកមូលហេតុដំបូងបង្ហាញថា រថភ្លើងអាកាសពណ៌លឿងដែលរបូតកង់នេះ គឺជារថភ្លើងថ្មីទើបដំណើរការ ហើយក្រុមហ៊ុនបានត្រួតពិនិត្យ និងថែទាំវាយ៉ាងទៀងទាត់ ។ ក្រៅពីនេះ ក្រុមហ៊ុនរថភ្លើងអាកាសពណ៌លឿងបានសូមទោសអ្នករងផលប៉ះពាល់ដោយសារហេតុការណ៍នេះ ហើយសន្យាថា ក្រុមហ៊ុននឹងចាត់វិធានការទប់ស្កាត់គ្រោះថ្នាក់ និងពិភាក្សាជាមួយស្ថាប័នពាក់ព័ន្ធដើម្បីរកមូលហេតុ និងវិធីការពារមិនឱ្យហេតុការណ៍បែបនេះកើតឡើងទៀត ៕

បរទេស៖ មន្ត្រីនៃទីក្រុង Venice របស់ប្រទេសអ៊ីតាលី បានកំណត់ក្រុមអ្នកទស្សនាដែលចូលមកលេងតំបន់នេះមិនលើសពី ២៥ នាក់ ដោយហាមប្រាមការប្រើប្រាស់ឧបករណ៍បំពងសំឡេង និងហាមអ្នកទស្សនាមិនឱ្យឈប់នៅលើផ្លូវតូចចង្អៀត និងនៅលើស្ពាន ក្នុងគោលបំណងលើកកម្ពស់ទេសចរណ៍ប្រកបដោយនិរន្តរភាព និងធានាសុវត្ថិភាព ក៏ដូចជាការពារទីក្រុងពីសំឡេងរំខាននានា។

យោងតាមប្រភពព័ត៌មាន dw.com ដែលបានចុះផ្សាយនៅថ្ងៃទី២ ខែមករាថា ទីក្រុង Venice បានប្រកាសបទប្បញ្ញត្តិថ្មីដែលនឹងចូលជាធរមានចាប់ពីខែមិថុនាឆ្នាំ ២០២៤ ដើម្បីកំណត់សកម្មភាពទេសចរណ៍បន្ថែមទៀតនៅក្នុងទីក្រុងដែលមានមនុស្សច្រើនលើសលប់នេះ។ ដូច្នេះទីតាំងដែលបទប្បញ្ញត្តិថ្មីអនុវត្តគឺកណ្តាលទីក្រុង កោះ Murano, Burano និង Torcello ។

នៅក្នុងសេចក្តីថ្លែងការណ៍បាននិយាយថា ក្រុមភ្ញៀវទេសចរដែលមកទស្សនាទីក្រុង Venice មិនត្រូវលើសពី ២៥ នាក់ឡើយ ដោយសារមន្ទីរ Venice បានកំណត់ក្រុមអ្នកទស្សនាតិចជាង ២៥ នាក់ក្នុងពេលតែមួយ។ ច្បាប់នេះក៏បានហាមឃាត់ឧបករណ៍បំពងសំឡេងដែលអាច “បង្កើតភាពច្របូកច្របល់ និងការរំខាន” នៅក្នុងដំណើរទេសចរណ៍ផងដែរ។ លើសពីនេះក្រុមអ្នកទេសចរក៏មិនត្រូវបានអនុញ្ញាតឱ្យឈប់នៅលើផ្លូវតូចចង្អៀត លើស្ពាន ឬនៅលើផ្លូវដើរដែរ។

លោក Simone Venturini ទីប្រឹក្សានៃក្រុមប្រឹក្សាទេសចរណ៍បាននិយាយថា បច្ចុប្បន្នការផ្លាស់ប្តូរនេះគឺជាផ្នែកមួយនៃក្របខណ្ឌកិច្ចអន្តរាគមន៍ដ៏ទូលំទូលាយដែលមានគោលបំណងធ្វើឱ្យប្រសើរឡើងនូវការគ្រប់គ្រងទេសចរណ៍នៅទីក្រុង Venice ដោយបង្កើតតុល្យភាពកាន់តែប្រសើរឡើងរវាងតម្រូវការរបស់អ្នករស់នៅនិងអ្នកធ្វើដំណើរ។

ទីក្រុង Venice គឺជាទិសដៅដ៏ល្បីល្បាញមួយក្នុងប្រទេសអ៊ីតាលី នឹងជារាជធានីនៃតំបន់ Veneto។ បន្ថែមពីលើព្រែកជីកដ៏ល្បីល្បាញ ទីក្រុង Venice ក៏ទាក់ទាញអ្នកទេសចរជាមួយនឹងព្រះវិហារបុរាណរាប់រយ ប៉មជួង និងវិមានផងដែរ។ មុនពេលមានការរាតត្បាត ជារៀងរាល់ឆ្នាំទីក្រុងនេះបានស្វាគមន៍ភ្ញៀវទេសចរជាង ២៥ លាននាក់ ហើយតែងតែផ្ទុកលើសទម្ងន់ផងដែរ៕

ភ្នំពេញ៖ ទំនាក់ទំនងអាជីវកម្ម ការនាំចេញរបស់កម្ពុជាទៅកាន់ប្រទេសឥណ្ឌូណេស៊ី ក្នុងរយៈពេល ១១ខែដំបូងនៃឆ្នាំ២០២៣ បានកើនឡើងទ្វេដង ដែលទំហំតម្លៃពាណិជ្ជកម្មរវាងប្រទេសទាំងពីរ ឈានដល់ជិត ១ពាន់លានដុល្លារអាមេរិក។

យោងតាមអគ្គនាយកដ្ឋានគយ និងរដ្ឋាករ (GDCE) បានឱ្យដឹងថា បច្ចុប្បន្នប្រទេសឥណ្ឌូនេស៊ី គឺជាដៃគូពាណិជ្ជកម្មធំជាងគេទី ៦ របស់កម្ពុជា។ ជាមួយគ្នានេះ ស្ថិតិពាណិជ្ជកម្មទំនិញអន្តរជាតិរបស់នាយកដ្ឋានបង្ហាញថា ទំហំពាណិជ្ជកម្មសរុបរវាងប្រទេសទាំងពីរក្នុងអំឡុងពេលនេះឈានដល់ ៩៦៥.២៤ លានដុល្លារអាមេរិក គឺកើនឡើង ១៦.៣% បើធៀបទៅនឹងរយៈពេលដូចគ្នានៃឆ្នាំ ២០២២កន្លងមក ដែលទំហំពាណិជ្ជកម្មសរុបរវាងប្រទេសទាំងពីរគឺមានត្រឹមតែ ៨៣០.២៤ លានដុល្លារ។

នៅចន្លោះខែមករាដល់ខែវិច្ឆិកាឆ្នាំ ២០២៣ ការនាំចេញរបស់កម្ពុជាទៅកាន់ប្រទេសឥណ្ឌូនេស៊ីមានចំនួន ៧០.៥៦ លានដុល្លារ កើនឡើង ១១១.៧% បើធៀបទៅនឹងរយៈពេលដូចគ្នាក្នុងឆ្នាំ ២០២២ គឺបានត្រឹមតែ ៣៣.៣៣ លានដុល្លារប៉ុណ្ណោះ។ រីឯការនាំចូលរបស់កម្ពុជាពីប្រទេសឥណ្ឌូនេស៊ីវិញមានចំនួន ៨៩៤.៦៨ លានដុល្លារ ដែលបានកើនឡើង ១២.៣% ពី ៧៩៦.៩១ លានដុល្លារ កាលពីឆ្នាំមុន ។

លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបាននិយាយកាលពីថ្ងៃទី៣១ ខែធ្នូថា ការកើនឡើងជាលំដាប់នៃបរិមាណនៃការនាំចេញ និងនាំចូលរវាងប្រទេសទាំងពីរយើងនេះ គឺបណ្តាលមកពីទំនាក់ទំនងទ្វេភាគីរឹងមាំ និងការចូលរួមពីវិស័យឯកជន។

លោកបានបន្ថែមថា “ដោយសារប្រទេសឥណ្ឌូណេស៊ីជាប្រទេសដែលមានប្រជាជនច្រើន តម្រូវការអាហារដូចជាអង្ករ និងផលិតផលកសិកម្មអាចមានកម្រិតខ្ពស់ ដែលបង្ហាញពីឱកាសរបស់កម្ពុជាក្នុងការជំរុញផលិតកម្មក្នុងស្រុកសម្រាប់នាំចេញទៅកាន់ទីផ្សារអន្តរជាតិ រួមទាំងប្រទេសឥណ្ឌូនេស៊ី”។

លើសពីនេះ ប្រទេសឥណ្ឌូនេស៊ីក៏បានប្រកាសគាំទ្រហេដ្ឋារចនាសម្ព័ន្ធសន្តិសុខស្បៀងរបស់កម្ពុជា តាមរយៈការផ្តល់ជី និងការបណ្តុះបណ្តាលដល់ប្រជាកសិករ ដើម្បីឲ្យកម្ពុជារីកចម្រើនលើវិស័យកសិកម្មកាន់តែខ្លាំងផងដែរ៕

ប្រទេសជប៉ុន ៖ កាលពីថ្ងៃទី១ ខែមករា ឆ្នាំ២០២៤ ប្រទេសជប៉ុនបានជួបហេតុការណ៍គ្រោះរញ្ជួយដី ចាប់ពីកម្រិត៧.៤វិកទ័រ ទៅ៧.៦វិកទ័រ នៅតំបន់ Notojo ខេត្ត Ishikawa ស្ថិតនៅភាគកណ្តាលប្រទេស ដែលបណ្តាលឱ្យមនុស្សស្លា.ប់យ៉ាងហោចណាស់ ៤៨នាក់ ព្រមទាំងខូចខាតអគារ និងផ្ទះសម្បែងអស់ជាច្រើនខ្នង ។ ក្រោយហេតុការណ៍គ្រោះរញ្ជួយដីនេះ អ្នកលេងបណ្តាញសង្គមនៅជប៉ុនបានចាប់អារម្មណ៍នឹងវីដេអូមួយ ដែលគេថតបានសត្វស្លាបរាប់ម៉ឺនក្បាលហើរពេញមេឃក្នុងតំបន់មួយចំនួន ។

កាលពីថ្ងៃទី៣០ ខែធ្នូ ឆ្នាំ២០២៣ ឬរយៈពេល២ថ្ងៃ មុនកើតហេតុការណ៍គ្រោះរញ្ជួយដីនៅប្រទេសជប៉ុន មានជនជាតិជប៉ុនម្នាក់បានថតវីដេអូមួយបង្ហោះក្នុងបណ្តាញសង្គម ដោយក្នុងវីដេអូបង្ហាញថា នៅសុខៗ ស្រាប់តែមានហ្វូងសត្វស្លាបរាប់ម៉ឺនក្បាលហើរប្រសាចនៅលើមេឃក្នុងតំបន់ជាច្រើនរបស់ជប៉ុន ។ ប៉ុន្តែគេពុំដឹងថា តើពួកវាហើរមកពីកន្លែងណាទេ ។

បើតាមវីដេអូដែលគេចែកចាយក្នុងបណ្តាញសង្គមបង្ហាញថា សត្វស្លាបទាំងនេះបានហើរមកប្រមូលផ្តុំគ្នានៅលើមេឃ ហើយពួកវាមិនព្រមហើរទៅកន្លែងផ្សេងសោះ ។ លើសពីនេះ ពួកវាស្រែកមិនឈប់ ក្រោយមក ផ្ទៃមេឃប្រែជាងងឹត និងគ្របដណ្តប់ទៅដោយពពកខ្មៅ ។ ចំណែករូបភាពសត្វស្លាបដែលគេបានឃើញនោះ គឺនៅស្ថានីយ Fukuoka និង Nagano ។

រីឯអ្នកវិទ្យាសាស្ត្រពុំទាន់រកឃើញពីភាពខុសប្រក្រតីរបស់សត្វស្លាបពាក់ព័ន្ធជាមួយគ្រោះរញ្ជួយដីទេ ដោយពួកគេនិយាយថា គ្រោះរញ្ជួយដីបានធ្វើឱ្យប៉ះពាល់ដល់ស្រទាប់បរិយាកាស ហើយវាបានប៉ះពាល់ដល់ដែនម៉ាញ៉េទិចរបស់ផែនដីផងដែរ ។ ហេតុនេះ មុនពេលកើតគ្រោះរញ្ជួយដី សត្វមានជីវិតជាច្រើនក្បាលនៅលើពិភពលោកនេះអាចបង្ហាញទម្លាប់ខុសធម្មតា ។

ការិយាល័យឧតុនិយមជប៉ុនឱ្យដឹងថា គ្រោះរញ្ជួយដីកើតឡើងនៅប្រទេសជប៉ុនលើកនេះ គឺជាគ្រោះរញ្ជួយដីខ្លាំងក្លាបំផុតនៅឧបទ្វីបណូតូ បើគិតចាប់ពីឆ្នាំ១៨៨៥ មក ។ ក្រៅពីនេះ ប្រទេសជប៉ុនបានជួបហេតុការណ៍រំញ័រជាង១៤០លើក កាលពីពេលកន្លងមក ៕