បរទេស៖ ការផ្ទុះភ្នំភ្លើងនៅអ៊ីស្លង់បានធ្វើឱ្យផ្ទះជាច្រើនខ្នងឆេះខ្ទិចខ្ទីនៅលើឧបទ្វីប Reykjanes នៃទីក្រុង Grindavik ខណៈដែលប្រជាជនរាប់ពាន់នាក់ក្នុងទីក្រុងនេះត្រូវបានជម្លៀសចេញ។

កាលពីថ្ងៃទី១៤ ខែមករា ឆ្នាំ២០២៤ ការផ្ទុះលើកដំបូងបានកើតឡើងនៅម៉ោង ៨:០០ ព្រឹក នៅពេលដែលមានស្នាមប្រេះមួយបានលេចឡើងនៅក្នុងដីនៅជាប់នឹងទីក្រុង Grindavik នៅភាគនិរតីនៃប្រទេសអ៊ីស្លង់ ដោយកម្អែភ្នំភ្លើងបានហូរឆ្ពោះទៅទីក្រុង ធ្វើឱ្យអ្នកស្រុកនៅតំបន់នោះចាកចេញពីទីក្រុងនេសាទ Grindavik យ៉ាងលឿនបំផុត។

យោងតាមប្រធានាធិបតីអ៊ីស្លង់លោក Gudni Johannesson បាននិយាយថា បច្ចុប្បន្នប្រទេសនេះកំពុងប្រយុទ្ធជាមួយ “កម្លាំងធម្មជាតិដ៏គ្រោះថ្នាក់មួយ” បន្ទាប់ពីកម្អែររលាយចេញពីភ្នំភ្លើងនៅភាគនិរតីរបស់កោះនេះបានលេបត្របាក់ផ្ទះជាច្រើននៅក្នុងទីក្រុង Grindavik ដែលត្រូវបានជម្លៀសចេញ។ ប្រធានាធីតីរូបនេះបានបន្តទៀតថា អ្វីដែលយើងទាំងអស់គ្នាសង្ឃឹមថានឹងមិនកើតឡើងនោះទីបំផុតបានមកដល់ហើយ។ ភ្នំភ្លើង Lava កំពុងហូរចូលទៅក្នុងទីក្រុង Grindavik ដែលជាសហគមន៍ប្រកបដោយសុខដុមរមនា និងជាកន្លែងមនុស្សបានកសាងជីវិត ធ្វើការនេសាទ និងការងារផ្សេងទៀត។

ទោះជាយ៉ាងណាក៏ដោយ គ្មានអ្នកស្រុកណាម្នាក់មានគ្រោះថ្នាក់ទេ ខណៈដែលទីក្រុងទាំងមូលត្រូវបានជម្លៀសចេញកាលពីមួយថ្ងៃមុន។ នេះគឺជាការផ្ទុះភ្នំភ្លើងលើកទីពីរនៅលើឧបទ្វីប Reykjanes ក្នុងរយៈពេលតិចជាងមួយខែ ដោយអ្នកជំនាញភូគព្ភសាស្ត្រ Magnus Tumi Gudmundsson បាននិយាយថា ការផ្ទុះភ្នំភ្លើងបាន “ថយចុះគួរឱ្យកត់សម្គាល់” ពេញមួយយប់ ប៉ុន្តែមិនអាចនិយាយបានថា តើវានឹងបញ្ចប់នៅពេលណានោះទេ។

គួរបញ្ជាក់ដែរថា អ៊ីស្លង់ គឺជាប្រទេសដែលស្ថិតនៅពីលើចំណុចក្តៅនៃភ្នំភ្លើងនៅអាត្លង់ទិកខាងជើង ជាមធ្យមមានការផ្ទុះមួយរៀងរាល់ ៤ ទៅ ៥ ឆ្នាំម្តង។ ការរំខានបំផុតក្នុងរយៈពេលថ្មីៗនេះគឺការផ្ទុះភ្នំភ្លើង Eyjafjallajokull ដែលបានបញ្ចេញពពកផេះចូលទៅក្នុងបរិយាកាស និងរំខានដល់ការធ្វើដំណើរតាមផ្លូវអាកាសឆ្លងកាត់អាត្លង់ទិកអស់រយៈពេលជាច្រើនខែ៕

បរទេស៖ នៅថ្ងៃទី១៥ ខែមករា ឆ្នាំ២០២៤ រដ្ឋមន្ត្រីអន្តោប្រវេសន៍របស់ប្រទេសកាណាដាលោក Marc Miller បានប្រកាសថារដ្ឋាភិបាលកំពុងពិចារណាកំណត់ចំនួននិស្សិតអន្តរជាតិនៅក្នុងប្រទេស ដើម្បីជួយដោះស្រាយវិបត្តិកង្វះលំនៅដ្ឋាន ដែលធ្វើឱ្យតម្លៃផ្ទះកើនឡើងខ្លាំង និងភាពគ្មានការងារធ្វើ។

យោងតាមរដ្ឋមន្ត្រីបានឱ្យដឹងទៀតថា បច្ចុប្បន្នលំហូរចូលដ៏លើសលប់នៃនិស្សិតអន្តរជាតិ បានធ្វើឱ្យតម្លៃផ្ទះកាន់តែកើនឡើងខ្ពស់ ដែលធ្វើឱ្យនិស្សិតអន្តរជាតិខ្វះខាតហិរញ្ញវត្ថុ និងពិបាករកការងារធ្វើ ក៏ដូចជាប្រឈមនឹងបញ្ហាខ្វះខាតលំនៅឋានផងដែរ។

ដូច្នេះ ដើម្បីដោះស្រាយបញ្ហានេះ រដ្ឋាភិបាលកំពុងពិចារណាលើការកំណត់ចំនួននិស្សិតអន្តរជាតិនៅក្នុងត្រីមាសទី ១ និងទី ២ នៃឆ្នាំនេះ ដោយកំណត់ទស្សនៈរបស់ខ្លួនលើការវាយតម្លៃសមត្ថភាពហិរញ្ញវត្ថុរបស់សិស្ស និងភាពត្រឹមត្រូវនៃសំបុត្រផ្តល់ជូនរបស់ពួកគេ។ ជាងនេះទៅទៀត រដ្ឋាភិបាលមានចំណាប់អារម្មណ៍លើការស៊ើបអង្កេតពីផលប៉ះពាល់នៃបរិមាណនិស្សិតយ៉ាងច្រើន ទៅលើការខ្វះខាតលំនៅឋានដែលកំពុងរីករាលដាល។

វិបត្តិលំនៅដ្ឋានត្រូវបានស្តីបន្ទោសលើការកើនឡើងនៃជនចំណាកស្រុក និងនិស្សិតអន្តរជាតិដែលបង្កើនតម្រូវការលំនៅដ្ឋាន ខណៈដែលអតិផរណាធ្វើឱ្យការសាងសង់ផ្ទះថ្មីមានភាពយឺតយ៉ាវ។ នេះបើយោងតាមទិន្នន័យពីសមាគមអចលនទ្រព្យកាណាដា (CREA) តម្លៃជាមធ្យមនៃផ្ទះធម្មតាគឺ ៧៣៥,៥០០ ដុល្លារកាណាដា ដោយអ្នកជំនាញប៉ាន់ប្រមាណថា តម្លៃផ្ទះក្នុងប្រទេសនេះអាចនឹងកើនឡើងទ្វេដងទៀត។

ទោះជាយ៉ាងណាក៏ដោយ រដ្ឋាភិបាលនៅតែមានគោលបំណងនាំយកជនអន្តោប្រវេសន៍ ៤៨៥,០០០ នាក់នៅឆ្នាំនេះ ដោយមានគោលបំណងបង្កើនចំនួននេះដល់ ៥០០,០០០ នាក់នៅឆ្នាំ ២០២៥ និង ២០២៦ ដោយសារតែកម្លាំងចំនួនជនអន្តោប្រវេសន៍ និងនិស្សិតអន្តរជាតិត្រូវបានគេនិយាយថាបានរួមចំណែកច្រើនជាង ២២.៣ ពាន់លានដុល្លារអាមេរិកក្នុងម្នាក់ៗដល់សេដ្ឋកិច្ចកាណាដា៕

កាលពីពេលថ្មីៗនេះ មនុស្សម្នាជាច្រើនគឺកំពុងតែមានការចាប់អារម្មណ៍យ៉ាងខ្លាំងទៅលើការបោះជំរុំបែបថ្មីប្លែក ចម្លែកអារម្មណ៍មួយ គឺការបោះតង់លើលំហរអាកាស ដែលបានចាត់ទុកថាវាជាការបោះតង់មួយស្រដៀងទៅនឹងការបោះតង់បែបប្រពៃណីនៅតាមជើងភ្នំដែរ។

យោងទៅតាមការបង្ហោះមួយ ដែលមានប្រភពមកពីប្រទេសចិនបានបង្ហាញឲ្យឃើញពីទិដ្ឋភាពនៃការបោះជំរុំ សម្រាកលំហែរកាយយ៉ាងសប្បាយរីករាយនៅតាមលំហរអាកាស ពោលគឺនៅលើមេឃ។ ភ្នំមួយនៅក្នុងទីក្រុងសៀងហៃនៃប្រទេសចិន គឺជាកន្លែងសម្រាប់អ្នកដែលចង់បោះតង់ មើលឃើញនូវជ្រលងភ្នំខ្ពស់ៗ ភាពចុះអភ៌ត្រជាក់ និងទទួលបានអារម្មណ៍ធម្មជាតិពិតៗគឺអាចមកសាកល្បងនៅទីនោះបាន។

ការបោះជំរុំនៅលើអាកាស គឺស្រដៀងគ្នាទៅនឹងការបោះតង់តាមជ្រលងភ្នំដែលយើងចំណាំតែប្រទះឃើញជាទូទៅដែរ។ ដោយហេតុថាការបោះតង់ធម្មតាតាមដងភ្នំ គឺគេសង់តង់ឡើងនៅលើដី និងចងភ្ជាប់ជាមួយដើមឈើឬមានអ្វីកល់ដើម្បីទប់លំនឹងតង់ជាដើម។ ប៉ុន្តែ ការបោះតង់លើអាកាសនេះវិញ គឺគេធ្វើឡើងដោយចងភ្ជាប់អង្រឹងជាមួយនឹងខ្សែររូតឬខ្សែរព្យួរនៅលើអាកាស ដែលគេបានរៀបចំឲ្យរួចជាស្រេច។

ការបោះតង់លំហរអាកាសនេះទៀតសោតគឺតម្រូវឲ្យអ្នកមានស្មារតីនឹងនរ ការប្រុងប្រយ័ត្នខ្ពស់ រាងកាយមាំមួន ក៏ដូចជាមានបទពិសោធន៍នូវក្នុងការឡើងភ្នំ ជំនាញក្នុងការប្រើប្រាស់ខ្សែររូត និងមានឧបករណ៍សុវត្ថិភាពត្រឹមត្រូវផងដែរ។

យ៉ាងណាមិញ ការបោះជំរុំលើលំហរអាកាសនេះ មិនមែនសម្រាប់មនុស្សគ្រប់គ្នាសុទ្ធអាចសាកល្បងបាននោះទេ ព្រោះថាវាប្រឈមនឹងហានិភ័យខ្ពស់ ប្រសិនបើអ្នកគ្មានបទពិសោធន៍និងវិធានការសុវត្ថិភាពត្រឹមត្រូវ។ ប៉ុន្តែសម្រាប់អ្នកដែលមានជំនាញនិងហ៊ានវិញ រឿងទាំងនេះគឺពិតជាប្លែកនិងគួរឲ្យចង់សាកល្បងបំផុតក្នុងមួយឆាកជីវិតរបស់ពួកគេ៕

ប្រទេសឥណ្ឌា ៖ សារព័ត៌មានបរទេសរាយការណ៍ថា បុរសអ្នកដំណើរម្នាក់បានរត់មកវាយអ្នកបើកយន្តហោះ ខណៈអ្នកបើកយន្តហោះកំពុងឈរប្រកាសពីមូលហេតុដែលយន្តហោះត្រូវពន្យារពេលហោះហើររយៈពេល១០ម៉ោង ។ ក្រោយកើតហេតុការណ៍នេះធ្វើឱ្យយន្តហោះត្រូវពន្យារពេលការហោះហើរ៣ម៉ោងបន្ថែមទៀត ហើយត្រូវផ្លាស់ប្តូរអ្នកបើកយន្តហោះផងដែរ ។

ហេតុការណ៍ច្របូកច្របល់នេះបានកើតឡើងចំពោះក្រុមហ៊ុនអាកាសចរណ៍ IndiGo ជើងហោះហើរ 6E-2175 ដែលធ្វើដំណើរចាកចេញពីទីក្រុងញូវដែលី ទៅកាន់រដ្ឋ Goa ប្រទេសឥណ្ឌា ដោយយន្តហោះត្រូវពន្យារពេលហោះហើរជាច្រើនម៉ោង ព្រោះអាកាសធាតុមិនអំណោយផល ។ ហេតុនេះ ធ្វើឱ្យអ្នកដំណើរម្នាក់មិនពេញចិត្តដោយសារការរង់ចាំយូរ ទើបរូបគេរត់ទៅដាល់អ្នកបើកយន្តហោះមួយទំហឹង បន្ទាប់មក ក៏មានការឈ្លោះប្រកែកគ្នាជាមួយបុគ្គលិកធ្វើការលើយន្តហោះទៀតផង ។ វាបានធ្វើឱ្យអ្នកដំណើរនៅលើយន្តហោះភ្ញាក់ផ្អើលយ៉ាងខ្លាំង ។

សារព័ត៌មានរាយការណ៍ថា យន្តហោះនេះបានពន្យារពេលការហោះហើររហូតដល់ជាង១០ម៉ោង ហើយអ្នកបើកយន្តហោះបានប្រកាសទៅកាន់អ្នកដំណើរទាំងអស់ឱ្យជ្រាបពីមូលហេតុនៃការយឺតយ៉ាវ ។ ប៉ុន្តែនៅសុខៗ ស្រាប់តែអ្នកដំណើរម្នាក់បានរត់មកវាយអ្នកបើកយន្តហោះដែលកំពុងតែឈរប្រកាសពុំទាន់ចប់នៅឡើយ ។

តារាសម្តែងម្នាក់ជនជាតិរុស្ស៊ីកាត់ឥណ្ឌា ដែលនាងបានជិះយន្តហោះនេះដែរ បានបង្ហោះវីដេអូចូលក្នុងបណ្តាញសង្គម និងសរសេរថា ៖ «ក្រុមរបស់ខ្ញុំបានរង់ចាំជិះយន្តហោះរហូតដល់១០ម៉ោង តែមានបុរសម្នាក់ខឹងស្រឡោត ក៏ទៅដាល់អ្នកបើកយន្តហោះ ទើបខ្ញុំត្រូវរង់ចាំយូរជាងនេះទៀត ។ សមត្ថកិច្ចបាននាំបុរសម្នាក់នេះទៅ ហើយគេត្រូវផ្លាស់ប្តូរអ្នកបើកយន្តហោះ» ។

ហេតុការណ៍នេះធ្វើឱ្យមានមតិរិះគន់យ៉ាងច្រើនក្នុងបណ្តាញសង្គមនៅប្រទេសឥណ្ឌា ហើយពួកគេបានថ្កោលទោសចំពោះទង្វើរបស់អ្នកដំណើរខាងលើថា គាត់មិនចេះយោគយល់ពីការពន្យារពេលហោះហើរ ខណៈខាងយន្តហោះប្រកាសថា ការពន្យារពេលហោះហើរកើតឡើងដោយសារអាកាសធាតុអាក្រក់ខ្លាំង ។ ដូច្នេះ ពួកគេពុំអាចទទួលយកនូវទង្វើនេះបានទេ ៕