សង្គ្រា.មពាក្យសម្តីទៅលើសិល្បករឧកញ៉ា ខេមរៈ សិរីមន្ត និងអ្នកចម្រៀងរ៉េប ខ្មែរមួយជីវិត បានធ្វើឱ្យអ្នកលេងបណ្តាញសង្គមឡើងកម្តៅមិនធម្មតាព្រមទាំងអ្នកក្នុងចង្កោមសិល្បៈចេញមកនិយាយជាហូរហែ។ តួយ៉ាង លោក ខាំ ភូរិ ដែលជាអ្នកនិពន្ធនិងជាផលិតករឆ្នើមមួយរូបបានលើកឡើងសរសើរចំៗទៅកាន់ វណ្ណដា ជាតារារ៉េបដែលបានផ្លាស់ប្តូររសនិយមលើវិស័យចម្រៀងនេះ ខណៈលោកបានផ្តាំផ្ញើទៅកាន់ ខ្មែរមួយជីវិត ថាហ៊ានលើកយកឈ្មោះគេមកនិយាយជាសាធារណៈ ប៉ះពាល់ដល់សិទ្ធិ និងអារម្មណ៍ជាលក្ខណ:បុគ្គល គួរហ៊ានសុំទោសមិនគួរតបតបន្ថែមដោយខ្វះការទទួលខុសត្រូវទេ។

នៅលើបណ្តាញសង្គមរបស់ លោក ខាំ ភូរិ ដែលកំពុងស្វិតស្វាញផលិតខ្សែភាពយន្ត ក្រយាស្នេហ៍ ជារឿងបុរាណខ្មែរ បានបញ្ចេញមតិយោបល់សង្រ្គាមពាក្យសម្តីរបស់តារាចម្រៀងឧកញ៉ា ខេមរៈ សិរីមន្ត និង ខ្មែរមួយជីវិត ព្រមទាំងលើកឈ្មោះតារារ៉េប វណ្ណដា កាលពីថ្ងៃទី១៤ មករា ថា «និយាយតាមត្រង់ទៅ ពីមុនខ្ញុំមិនចេះស្តាប់បទចម្រៀងប្រភេទបែប រ៉េប ទេ ព្រោះខ្ញុំជាមនុស្សបុរាណនិយមបន្តិច។ ពេលខ្លះក៏បានឮបទចម្រៀងជេរគ្នាដូចពួកបាតសង្គម តែក៏បានដឹងដែរថានេះជាទម្រង់នៃបទប្រភេទនេះ ក៏បើកចិត្តទទួលយកបន្តិច។
សារភាពទៅខ្ញុំបានទទួលយក និងចាប់ផ្តើមស្តាប់បទបែបនេះ នៅពេលដែលមានវត្តមានបទចម្រៀង វណ្ណដា ច្រៀងបទ Jo+2 ហើយក៏បានលួចសរសើរពីស្នាដៃល្អឥតខ្ចោះនៃការតែងនិពន្ធ។ ខ្ញុំក៏បានទៅឆែកមើលបទផ្សេងៗទៀតដែលគាត់បានផលិតឡើង ក៏ចាប់ផ្តើមទទួលយករសជាតិមួយនេះរហូតមក»។

លោក ខាំ ភូរិ បន្តថា «វណ្ណដា បានផ្លាស់ប្តូររសនិយមនៃការស្តាប់ចម្រៀងក្នុងយុគសម័យនេះ ក្នុងប្រទេសកម្ពុជាទាំងមូល។ មិនថាវ័យប្រហែលខ្ញុំ ឬលើសខ្ញុំបន្តិចបានចាប់ផ្តើមទទួលយកចម្រៀងបែបរ៉េបនេះផងដែរ នេះជាអ្វីដែលយើងត្រូវហ៊ានទទួលស្គាល់ការពិតក្នុងយុគចម្រៀងសម័យទំនើប»។

ផលិតករឆ្នើមរូបនេះបន្ថែមថា «លូកចូលក្នុងសង្គ្រាមពាក្យសម្តីរវាងតារារ៉េបមួយរូប និងកំពូលតារាចម្រៀងប្រចាំប្រទេស ខ្ញុំសុំឈរកណ្តាល តែទាញចំណាប់អារម្មណ៍ប្អូនដែលបានទាញយកឈ្មោះ សិល្បកររៀមច្បង មកវាយតម្លៃថាបែបនេះឬបែបនោះ វាជារឿងគួរឱ្យសោកស្តាយ ហោចណាស់ក៏ត្រូវហ៊ានទទួលស្គាល់ពីសមត្ថភាពពួកគាត់ដែលបានឈរជើងជាងម្ភៃឆ្នាំលើវិស័យមួយនេះរួចទៅហើយ ហើយការវាយតម្លៃបែបណានោះទស្សនិកជន ក៏បានដាក់ពិន្ទុរួចហើយដែរ»។

លោក ខាំ ភូរិ សង្កត់ធ្ងន់ថា « ប្អូនហ៊ានលើកយកឈ្មោះគេមកនិយាយជាសាធារណៈ ប៉ះពាល់ដល់សិទ្ធិ និងអារម្មណ៍ជាលក្ខណ:បុគ្គលគេ គួរហ៊ានសុំទោស មិនគួរតបតបន្ថែមដោយខ្វះការទទួលខុសត្រូវទេ។ ដោយក្តីគោរព។»។

ទោះបីជាសំណេររបស់លោក ខាំ ភូរិ មិនសរសេរចំឈ្មោះក្តីប៉ុន្តែដូចមមហាជនដឹងស្រាប់ថាសំណេរនេះគឺសម្តៅទៅលោក ឡេង សុវណ្ណតារា ហៅ ខ្មែរមួយជីវិត និងឧកញ៉ា ខេមរៈ សិរីមន្ត ដែលផ្លោងពាក្យសម្តីដាក់គ្នាយ៉ាងក្តៅគគុក៕

ក្រោយពីមានរឿងអាស្រូវបែកបាក់គូដណ្តឹងដោយសារតែជនទី៣ តារាចម្រៀង ពេជ្រ សោភា និង លោក ឆឹម សក្កដា បានបណ្តើរគ្នាយ៉ាងផ្អែមល្ហែមចូលរួមកម្មវិធីមង្គលការ កែវ សុបញ្ញា នាំឱ្យទស្សនិកជនស្រឡាំងកាំងខ្លាំង។ រឿងនេះអ្នកនាង ពេជ្រ សោភា បានចេញមក Live ថាខ្លួននិងគូដណ្តឹងមិនបានឈ្លោះគ្នាហើយនាងមិនដែលប្រកាសថាបែកគ្នាម្តងណាទេទស្សនិកជននិងផេកមួយចំនួនជាអ្នកយល់ច្រលំដោយខ្លួនឯងប៉ុណ្ណោះ។

ពេលរឿងកាន់តែរីករាលដាលធ្វើឱ្យអ្នកគាំទ្រខ្លះមិនដឹងថាអ្វីជាការពិត អ្វីមិនពិតទេដោយកាលពីខែធ្នូ ឆ្នាំ២០២៣ អ្នកនាង ពេជ្រ សោភា បានចេញមក Live និងបានដាក់ចំណងជើងថា «ពួកយើងបែកគ្នាហើយ» រួមទាំងសារខូចចិត្តជាច្រើនទៀត នៅលើបណ្តាញសង្គមក្លាយទៅជាប្រធានជាច្រើន។ ទន្ទឹមនឹងផ្ទុះរឿងអាស្រូវបែកគ្នានេះមហាជនក៏សម្រុកចូលទៅជេរលោក ឆឹម សក្កដា ស្របពេលតារាចម្រៀង ពេជ្រ សោភា បន្តនៅតែបង្ហាញការដ្រាមារបស់ខ្លួនជាបន្តបន្ទាប់ដូចជារុញទូកបណ្តោយទឹក។

យ៉ាងណាមិញជុំវិញស្នេហាអ្នកទាំងពីរអូសបន្លាយតាំងពីចុងខែធ្នូ ២០២៣ ដល់ពាក់កណ្តាលខែមករា ឆ្នាំ២០២៤ នេះគ្រប់យ៉ាងគឺជាការយល់ខុសទាំងស្រុងរបស់ទស្សនិកជនប៉ុណ្ណោះ បន្ទាប់ពីអ្នកនាង ពេជ្រ សោភា បណ្តើរលោក ឆឹម សក្កដា ទៅចូលរួមពិធីមង្គលការព្រមទាំងមានការ Live បកស្រាយថាអ្នកទាំងពីរមិនបានឈ្លោះគ្នាបែកគ្នាទេ ហើយមហាជនជាអ្នកយល់ច្រលំដោយខ្លួនឯងប៉ុណ្ណោះ។ ស្របពេលបកស្រាយថាមិនបានបែកគ្នា តារាចម្រៀង ពេជ្រ សោភា ថែមទាំងបង្ហោះរូបភាពផ្អែមល្ហែមនិងអត្ថន័យស៊ីជម្រៅទៀត។
តាមសម្តីរបស់អ្នកនាង ពេជ្រ សោភា នៅក្នុងការLive ថានាងជាអ្នកចម្រៀងមួយរូបក៏មានកិត្តិយសដែរ ខ្លួនមិនចង់បំពុលសង្គមជាដាច់ខាតព្រោះនៅលើហ្វ៊េកប៊ុកពុលស្រាប់ទៅហើយ នាងនិងគូដណ្តឹងមិនមែនជាអ្នកបំពុលសង្គមដោយសារតែរឿងស្នេហានោះទេ។ ហើយការដែលខ្លួននិយាយក្នុងការLive កាលពីថ្ងៃទី២៣ ខែធ្នូ ឆ្នាំ២០២៣ គ្រាន់តែនិយាយ ឧទាហរណ៍ដោយលើកឈ្មោះ ឆឹម សក្កដា ប្រៀបធៀបទៅនឹងបទចម្រៀងប៉ុណ្ណោះហើយបណ្តាញសារព័ត៌មានចុះដោយខ្លួនឯង។

តារាចម្រៀងវ័យ៤០ឆ្នាំរូបនេះលើកឡើងថា ខ្លួននិងគូដណ្តឹងមិនចង់បកស្រាយច្រើននោះទេពេលមានការចុះផ្សាយពីការបែកគ្នា ដោយលោក ឆឹម សក្កដា ថាមិនបាច់បកស្រាយអ្វីនោះទេឱ្យគេថាអ្វីថាចុះ ស្របពេល ពេជ្រ សោភា ក៏ចេញបទថ្មីដែរ។ អ្នកនាងថា ខ្លួនមិនបានឈ្លោះគ្នា និងប្រកាសបែកគ្នាទេ គ្រាន់តែជាសិល្បៈនៃការដ្រាមាប៉ុណ្ណោះទៅលើបទចម្រៀងថ្មី។

ទន្ទឹមនឹងនេះ អ្នកនាង ពេជ្រ សោភា បានលើកឡើងថា លោក ឆឹម សក្កដា ដើរចូលមកក្នុងជីវិតនាងជាពេលដែលកំពុងឈឺចាប់បំផុតហើយស្ទើរតែសម្លាប់ខ្លួន។ ពេជ្រ សោភា ថាតារាសម្តែង ឆឹម សក្កដា មិនធ្វើឱ្យមនុស្សស្រីដទៃមើលងាយខ្លួន ដោយបង្ហាញភាពស្មោះ មិនចង់ឃើញនាងយំ មិនចង់ឃើញនាងគ្មានអារម្មណ៍ធ្វើការ តែងបារម្ភពីផ្លូវចិត្តនាងមិនចង់ឱ្យខ្លួនឈឺចាប់ជួបរឿងដូចមុនក្នុងអតីតកាល៕

កញ្ញា ពេជ្រ វត្តីសារ៉ាវឌ្ឍី Miss Grand Cambodia 2022 បាននិយាយលើកទឹកចិត្តទៅដល់មនុស្សស្រីគ្រប់រូបដែលស្រលាញ់វិស័យបវរកញ្ញាឱ្យក្លាហានហ៊ានដាក់ពាក្យចូលរួមប្រកួតស្វែងរកអនាគតខ្លួនឯងនៅក្នុងវិស័យនេះ ខណៈបច្ចុប្បន្នវិស័យបវរកញ្ញាមានការគាំទ្រខ្លាំងក្លាទោះបីជាប្រកួតបានលេខប៉ុន្មានក៏ល្បីដែរ។

បើកទ្វារប្រវត្តិសាស្រ្តកម្ពុជាដំបូងគេជាប់លំដាប់រងទី៥កម្មវិធីប្រកួត Miss Grand International 2022 ពេជ្រ វត្តីសារ៉ាវឌ្ឍី ទទួលបានផ្លែផ្កាយ៉ាងច្រើនពីវិស័យនេះមានទាំងការងារក្នុងស្រុកនិងក្រៅច្រើនរាប់មិនអស់សឹងតែរកពេលសម្រាកគ្មាន។ ស្របពេលការប្រកួតកម្មវិធី Miss Grand Cambodia ចាប់ផ្តើមប្រកួតថ្នាក់រាជធានីខេត្តជាបណ្តើរៗបវរកញ្ញារូបនេះបានជំរុញលើកទឹកចិត្តស្រីៗដែលស្រលាញ់លើវិស័យបវរកញ្ញាដាក់ពាក្យប្រកួតក្លាហានកុំចុះចាញ់ពាក្យសម្តីរបស់អ្នកដទៃ។

តាមរយៈវីដេអូមួយ ពេជ្រ វត្តីសារ៉ាវឌ្ឍី បាននិយាយថា កម្មវិធីបវរកញ្ញាអីឡូវល្បីណាស់ អ្នកណាប្រកួតបានលេខប៉ុន្មានក៏ល្បីដែរដោយសារកម្មវិធីនេះមានអ្នកគាំទ្រច្រើន។ ពេជ្រ វត្តីសារ៉ាវឌ្ឍី ថានាងចង់ឱ្យមនុស្សស្រីគ្រប់រូបក្លាហានប្រសិនជាស្រលាញ់ចូលមកប្រកួតកុំខ្លាចយើងមកស្វែងរកអនាគតខ្លួនឯងនៅក្នុងការប្រកួតបើសិនជាយើងស្រលាញ់លើវិស័យនេះ។

Miss Grand Cambodia 2022 រូបនេះលើកឡើងទៀតថា សូមកុំគិតថាអ្នកណាស៊ូជាងអ្នកណានោះទេអ្នកចូលមកច្រើនដងបានស៊ូនោះទេ អ្នកចូលមកប្រកួតគឺស៊ូទាំងអស់គ្នា អ្នកដែលមិនទាន់មានអ្នកស្គាល់ស៊ូជាងអ្នកដែលគេស្គាល់ទៅទៀត ហើយការតស៊ូនេះមិនស្គាល់ទៅលើអ្នកមានបទពិសោធច្រើនទើបមកប្រកួតនោះទេ។ ការប្រកួតដំបូងរបស់មនុស្សស្រីដែលស្រលាញ់លើវិស័យនេះពិតជាមានការតស៊ូណាស់ ព្រោះពេលខ្លះក៏រងនូវពាក្យសម្តីមួយចំនួនដែលបំបាក់ទឹកចិត្តយើងជាដើម ដូច្នេះយើងត្រូវតែតស៊ូពាក្យសម្តីទាំងអស់នេះហើយបោះជំហានសាងអនាគតសម្រេចក្តីសុបិនរបស់ខ្លួន។

គួរបញ្ជាក់ថា ចាប់តាំងពី ពេជ្រ វត្តីសារ៉ាវឌ្ឍី ទទួលបានផ្លែផ្កានៅលើឆាកអន្តរជាតិបវរកញ្ញារូបនេះកាន់តែមានប្រជាប្រិយភាពខ្លាំងមានអ្នកគាំទ្រទាំងក្នុងនិងក្រៅប្រទេសមានការងារសម្រុកចូលទប់មិនឈ្នះ។ ប្រជាប្រិយភាពរបស់ ពេជ្រ វត្តីសារ៉ាវឌ្ឍី បានជំរុញឱ្យអ្នកគាំទ្រដល់ថ្នាក់សាក់ឈ្មោះនាងនៅលើដៃទៀតផង៕

ពិធីភ្ជាប់ពាក្យរបស់អ្នកនាង ភិន សុដាលីស និងកូនកំលោះលោក ហ៊ីន លាងហេង បានធ្វើឱ្យអ្នកគាំទ្រនិងអ្នកសិល្បៈច្រើនរូបចូលរួមអបអរសាទរយ៉ាងផុសផុលចំពោះអ្ននទាំងពីរ។ ទម្រាំឈានដល់ដំណាក់កាលដឹកដៃគ្នាភ្ជាប់ពាក្យតាមប្រពៃណីនេះ ភិន សុដាលីស និងគូដណ្តឹងបានតស៊ូជាមួយគ្នាណាស់ស្រលាញ់តាំងពីនៅរៀន ឈ្លោះបែកៗជាមួយគ្នាច្រើនដងតែទីបំផុតនៅតែវិលត្រលប់មកជួបគ្នាវិញ។កាលពីថ្ងៃទី១៤ ខែមករា ឆ្នាំ២០២៤ អ្នកមេម៉ាយ ភិន សុដាលីស បានសម្រេចចិត្តដឹកដៃគូស្នេហ៍ដែលបណ្តើរគ្នានាពេលកន្លងភ្ជាប់ពាក្យពោរពេញដោយសុភមង្គល មានការចូលរួមពីតារានិង influencer ល្បីៗជាច្រើនរូបទៅអបអរអ្នកទាំងពីរប្រកបដោយក្តីរីករាយព្រោះទិដ្ឋភាពនេះពួកគេចង់ឃើញជាយូរមកហើយក្រោយពី ភិន សុដាលីស ស្ពាយឈ្មោះមេម៉ាយកូន១ជាច្រើនឆ្នាំបន្ទាប់ពីបែកបាក់ជាមួយពិធីករ ប៉ែន ចំរ៉ុង។

តាមការបង្ហោះនូវវីដេអូមួយបានបង្ហើបថាទីបំផុត ភិន សុដាលីស បានភ្ជាប់ជាមួយលោក ហ៊ីន លាងហេង ហៅ Jin ជាមនុស្សដែលខ្លួនស្រលាញ់ហើយអ្នកទាំងពីរតស៊ូជាមួយគ្នាច្រើនឆ្នាំមកហើយ។ ដាលីស និង គូដណ្តឹង គឺជាសង្សារនឹងគ្នាតាំងពីនៅរៀនបន្ទាប់មកក៏បែកគ្នា បន្ទាប់មកអ្នកទាំងបានជួបគ្នានិងស្រលាញ់គ្នាម្តងទៀត ហើយក៏បែកគ្នាទៀត ។ គណនីដដែលបានលើកឡើងទៀតថា មួយគូនេះឈ្លោះបែកៗស្នេហាប្រៀបដូចឆ្មាកណ្តុរ ប៉ុន្តែនៅទីបំផុតពួកគេជំនះរាល់ឧបសគ្គទាំងអស់ហើយឈានដល់ថ្ងៃភ្ជាប់ពាក្យជាមួយគ្នា។

ស្នេហារបស់អ្នកនាង ភិន ដាលីស និងគូដណ្តឹងក៏ឆ្លុះបញ្ចាំងទៅកាន់គូស្នេហ៍ឯទៀតដែរថា ឱ្យតែមានភាពតស៊ូជាមួយគ្នាទៅលើស្នេហាផ្តល់ឱ្យគ្នា អត់ធ្មត់ទៅដៃគូម្ខាងទៀតនោះយើងនឹងទទួលបានមនុស្សម្នាក់ដែលព្រមកាន់ដៃយើងអស់មួយជីវិត។ អ្វីៗត្រូវការភាពអត់ធ្មត់ការឱ្យតម្លៃទៅវិញទៅមកព្រមទទួលយកចំណុចខ្សោយរបស់ដៃគូម្ខាងទៀតព្រោះគ្មានស្នេហាណាដែលល្អឥតខ្ចោះទេ។ ក្រោយពីឃើញពិធីមង្គលអតីតតារាសម្តែង ភិន សុដាលីស មហាជននិងអ្នកក្នុងសិល្បៈក៏បានចូលរួមអបអរអ្នកទាំងពីរផងដែរ។

គួរបញ្ជាក់ថា អ្នកនាង ភិន សុដាលីស ជាស្រ្តីមេម៉ាយកូន១ មានដំណក់ឈាមរបស់លោក ប៉ែន ចំរ៉ុង ដោយអ្នកទាំងពីរបានបានបញ្ចប់ឈ្មោះជាប្តីប្រពន្ធ មានអេតាស៊ីវិលតែមិនបានរៀបការក្នុងឆ្នាំ២០១៦ ដោយសាររស់នៅមិនចុះសម្រុងបន្ទាប់ពីរស់នៅជាមួយគ្នាជាង១ឆ្នាំ៕

ដូចមហាជនជ្រាបមកហើយថាជុំវិញសង្រា្គ.មពាក្យសម្តីរបស់តារាចម្រៀងឧកញ៉ា ខេមរៈ សិរីមន្ត និង ខ្មែរមួយជីវិត បានធ្វើឱ្យផ្ទុះកក្រើកយ៉ាងខ្លាំង ខណៈរឿងនេះជំរុញឱ្យតារាចម្រៀង Original Song ចេន បានលូកមាត់ប៉ុន្មានម៉ាត់ថែមទាំងត្រូវបានឧកញ៉ារូបនេះសរសើរចំៗថា ចេនមានចិត្តទូលាយ។

តារាចម្រៀង ចេន ដែលជាតារាចម្រៀងមួយដួងដ៏មានប្រជាប្រិយសាងភាពល្បីល្បាញតាមរយៈបទមនោសញ្ចេតនាជាច្រើនបទដូចជាបទ អាក្របី , ពងទា , ទទួលយកការពិត ស្រដៀងនឹងសង្សារ រួមទាំងបទចម្រៀងជាច្រើនទៀត។ ស្របពេលនៅលើបណ្តាញសង្គមផ្ទុះកក្រើកខ្លាំងរវាងឧកញ៉ា ខេមរៈ សិរីមន្ត និង ខ្មែរមួយជីវិត ក្នុងនាមជាអ្នកសិល្បៈមួយរូបលើកឡើងថាវិស័យរ៉េបមានសញ្ញារីកចម្រើនយើងគួរគប្បីខិតខំតទៅមុខទៀតនឹងភ្ជាប់ក្តីស្រលាញ់ជាមួយវិស័យផ្សេងៗរួបរួមគ្នា សូមកុំបែងចែករើសអើងរឺមោទនភាពនៅផ្នែករបស់ខ្លួនឯងខ្លាំងពេក ហើយសូមកុំនិយាយប៉ះពាល់នរណាម្នាក់។

ចេន បានលើកឡើងនៅលើបណ្តាញសង្គមនៅថ្ងៃទី១៤ មករា ថា«ពួកយើងម្នាក់ៗសុទ្ធសឹងតែខំតស៊ូនៅវិស័យដែលខ្លួនស្រលាញ់ពេញចិត្តរៀងៗខ្លួនបានលះបង់ពេញមួយជីវិតដើម្បីមុខមាត់ខ្លួនយើងក៏ដូចជាប្រទេសជាតិរបស់យើងទាំងមូល។ ដូច្នេះពេលដែលវិស័យនោះមានសញ្ញារីកចម្រើនយើងគួរគប្បីខិតខំតទៅមុខទៀតនិងភ្ជាប់ក្តីស្រលាញ់ជាមួយវិស័យផ្សេងៗរួបរួមគ្នា។ សូមកុំបែងចែករើសអើងរឺមោទនភាពនៅផ្នែករបស់ខ្លួនឯងខ្លាំងពេក ហើយសូមកុំនិយាយប៉ះពាល់នរណាម្នាក់វាអាចធ្វើឱ្យវិស័យយើងធ្លាក់ខ្លះដែរព្រោះយើងនិយាយតែម្នាក់អ្នកផ្សេងទៀតដែលកំពុងខិតខំដែរគ្នាអត់ដឹងអីទេ»។

ម្ចាស់បទ«សម្បថនិស្ស័យ» រូបនេះលើកឡើងទៀតថា « យើងល្អប៉ុណ្ណាក៏ដោយយើងមានឈ្មោះប៉ុណ្ណាក៏ដោយបើយើងមិនប៉ះពាល់អ្នកដទៃនោះយើងជោគជ័យមួយដ៏ធំហើយ។ ក្នុងនាមខ្ញុំជាអ្នកគាំទ្រម្នាក់ សូមសំណូមពរឱ្យមានភាពជាអាជីពឱ្យបានឋិតឋេរឱ្យអ្នកគាំទ្រស្រលាញ់យើងមិនត្រឹមបទចម្រៀងឱ្យពួកគាត់ស្រលាញ់នៅអត្តចរិតយើងដូចគ្នា សាងស្នាដៃបន្តទៀតឱ្យបរទេសបានស្គាល់ពួកយើងជាកូនខ្មែរទើបជារឿងល្អ»។

ពាក្យពេចន៍របស់ ចេន ខាងលើនេះត្រូវបានតារាចម្រៀងឧកញ៉ា ខេមរៈ សិរីមន្ត ពោលសរសើរថា «បើសិល្បៈខ្មែរយើងមានចិត្តទូលំទូលាយដូចប្អូនប្រុសទាំងអស់គ្នាសិល្បៈខ្មែរយើងនឹងរីកចំរើនទៅមុខលឿនជាក់ជាមិនខាន»។

សូមបញ្ជាក់ថាដើមច្បងនៃរឿងនេះបានកើតឡើងបន្ទាប់ពី ខ្មែរមួយជីវិត បានចូលរួមក្នុងកម្មវិធីផតខាសមួយដោយលើកឡើងពីឈ្មោះរៀមច្បងឧកញ៉ា ព្រាប សុវត្ថិ និង ឧកញ៉ា ខេមរៈ សិរីមន្ត ដោយចង់ឱ្យរៀមច្បងទាំងពីរផលិតបទតាមបែបផែនរបស់ខ្លួនដើម្បីលើកតម្កើកសមនឹងកិត្តិយសជាជាងដេញតាមសម័យកាលហ៊ីបហប។ ពាក្យសម្តីរបស់ខ្មែរមួយជីវិតដែលលើកយកឈ្មោះរបស់ខ្លួនចំៗធ្វើឱ្យឧកញ៉ា ខេមរៈ សិរីមន្ត ប្រតិកម្មបង្ហាញការពេញចិត្តឡើយ៕