បរទេស៖ ក្រុមហ៊ុន Toyota Motor គ្រោងនឹងផលិតរថយន្តប្រហែល ១០.៣ លានគ្រឿងនៅទូទាំងពិភពលោកក្នុងឆ្នាំ ២០២៤ ដែលជាការដំឡើងផលិតកម្មប្រចាំឆ្នាំរបស់ខ្លួនរយៈពេលពីរឆ្នាំជាប់ៗគ្នា។ នេះបើយោងតាមសារព័ត៌មាន Nikkei ដែលបានរាយការណ៍កាលពីទី១៥ ខែមករា ឆ្នាំ២០២៤។ក្រុមហ៊ុន Toyota កំពុងរៀបចំបង្កើនផលិតកម្ម ដោយសារការលក់រថយន្ត Hybrid ដាច់ខ្លាំង ក៏ដូចជាកង្វះខាតនៃ semiconductors យានយន្ត និងសមាសធាតុផ្សេងទៀតក៏កំពុងធូរស្រាលផងដែរ។

របាយការណ៍នេះបាននិយាយថា សម្រាប់ផែនការរយៈពេលមួយឆ្នាំដែលបញ្ចប់នៅដំណាច់ខែធ្នូ ឆ្នាំ២០២៤ ក្រុមហ៊ុនផលិតរថយន្តដ៏ធំបំផុតរបស់ពិភពលោកមានគោលបំណងផលិតរថយន្តចំនួន ៣.៤ លានគ្រឿងនៅក្នុងប្រទេសជប៉ុន និង ៦.៩ លានគ្រឿងនៅក្រៅប្រទេស ដែលតួលេខនេះក៏មានម៉ាក Lexus ប្រណីតរបស់ខ្លួនផងដែរ។

យោងតាម Nikkei បានឱ្យដឹងទៀតថា Toyota នឹងកំណត់គោលដៅទិន្នផលប្រចាំឆ្នាំជាង ១០.៥ លានគ្រឿង។ ដោយក្រុមហ៊ុនក៏បានកំណត់កម្រិតផលិតកម្មរថយន្តអគ្គិសនីនៅប្រហែល ២៥០,០០០ គ្រឿងក្នុងឆ្នាំ ២០២៤ និង ៦០០,០០០ គ្រឿងក្នុងឆ្នាំ ២០២៥។

គួរបញ្ជាក់ដែរថា ក្រុមហ៊ុនតូយ៉ូតាបានផលិតរថយន្តចំនួន ៩.២ លានគ្រឿងក្នុងអំឡុងពេល ១១ ខែដំបូងនៃឆ្នាំ ២០២៣ និងប្រហែលមួយភាគបីនៃរថយន្តដែលលក់នៅទូទាំងពិភពលោក ដោយរថយន្ត hybrid (សាំង-អគ្គិសនី) គឺលក់ដាច់បំផុតកាលពីឆ្នាំមុន៕

ប្រទេសថៃ ៖ ពលរដ្ឋរស់នៅស្រុកឆាឡឺមព្រះកៀត ខេត្តបុរីរាំ ប្រទេសថៃ នាំគ្នាហួសចិត្តពីទង្វើរបស់បុរសម្នាក់ មិនលើកលែងសូម្បីតែមេជ្រូកផើមក្នុងទ្រុង ខណៈម្ចាស់ជ្រូកបានមកដាក់ពាក្យបណ្តឹងនៅស្ថានីយប៉ូលិស ករណីបុរសរូបនេះចូលមកធ្វើបាបមេជ្រូកផើមរបស់ខ្លួនដែលជិតដល់ថ្ងៃកើតកូនទៅហើយ រួចហើយក៏គេចខ្លួនបាត់ស្រមោល ។ ហេតុការណ៍នេះបានកើតឡើងនៅវេលាម៉ោង១០យប់ ថ្ងៃទី១៣ ខែមករា ឆ្នាំ២០២៤ ។

ស្ត្រីឈ្មោះ កុង អាយុ៤០ឆ្នាំ ជាម្ចាស់ជ្រូក និយាយថា គាត់បានឃើញបុរសម្នាក់កំពុងតែដេកជាមួយមេជ្រូកក្នុងទ្រុងពីចម្ងាយ ហើយគាត់មិនហ៊ានទៅក្បែរទ្រុងជ្រូកទេ ។ ហេតុនេះ គាត់ក៏ស្រែកខ្លាំងៗឱ្យបុរសនេះឮ ប៉ុន្តែគាត់ និងអ្នកភូមិផ្សេងទៀតបារម្ភថា បុរសនេះអាចនឹងធ្វើបាបស្រីៗក្នុងភូមិនៅថ្ងៃក្រោយ ។

ម្ចាស់ជ្រូកបន្តថា ទ្រុងជ្រូកនេះនៅឆ្ងាយពីផ្ទះរបស់គាត់ប្រមាណ២០ម៉ែត្រ ហើយក្នុងទ្រុងមានជ្រូកចំនួន៣ក្បាល ។ រីឯជ្រូកដែលបុរសខាងលើចូលមកធ្វើបាបនោះ គឺជា ជ្រូកញី មានអាយុប្រមាណ៩ខែ ហើយវាផើមជិតដល់ថ្ងៃកើតកូនហើយ ។

ម្ចាស់ជ្រូកបន្ថែមថា យប់នោះ គាត់បានសម្រាកក្នុងផ្ទះ និងមើលវីដេអូពីវិធីបង្កើតកូនជ្រូកដោយខ្លួនឯង ដើម្បីត្រៀមខ្លួនទុកជាមុន ។ ពេលគាត់កំពុងតែមើលវីដេអូ គាត់ក៏បានឮសូរមេជ្រូកស្រែកខុសពីធម្មតា ទើបបើកបង្អួចផ្ទះមើល ស្រាប់តែឃើញបុរសម្នាក់កំពុងដេកជាមួយជ្រូក ប៉ុន្តែគាត់មិនហ៊ានទៅក្បែរទេ ដោយសារគាត់ជាស្ត្រី ទើបស្រែកខ្លាំងៗឱ្យបុរសនោះឮ និងរត់គេច ។

ម្ចាស់ជ្រូកនិយាយថា ៖ «ខ្ញុំកំពុងស្វែងរកវិធីបង្កើតកូនជ្រូកដោយខ្លួនឯង ពីព្រោះខ្ញុំមិនអាចឱ្យគេជួយបង្កើតកូនជ្រូកបានទេ បើវាឈឺពោះកើតកូនពេលយប់ ។ ក្រោយមក ខ្ញុំក៏បានឮសំឡេងជ្រូកស្រែក ខ្ញុំគិតថា ជ្រូកឈឺពោះកើតកូន ហើយខ្ញុំបានងាកមើលទៅទ្រុងជ្រូក និងឃើញបុរសរោគចិត្តម្នាក់កំពុងដេកជាមួយជ្រូក ដោយគ្មានសម្លៀកបំពាក់» ។

គេសន្និដ្ឋានថា បុរសនេះអាចយកបាយមកឱ្យជ្រូកស៊ី មុននឹងធ្វើសកម្មភាព ដោយសារមានគ្រាប់បាយជ្រុះនៅក្បែរនោះ ។ ក្រោយកើតហេតុបែបនេះ ធ្វើឱ្យអ្នកភូមិ ជាពិសេស នារីៗមានការភ័យខ្លាច ដោយសារគេពុំដឹងថា បុរសនេះមកពីកន្លែងណាទេ ។ ចុងក្រោយ អ្នកភូមិបានសំណូមពរឱ្យសមត្ថកិច្ចចាប់ខ្លួនបុរសធ្វើបាបជ្រូកមកដាក់ទោស ៕

អេប៉ុងលាងចានភាគច្រើនត្រូវបានគេដាក់វាក្នុងឡាបូលាងចានជាប្រចាំនៅផ្ទះបាយ និងសើមគ្រប់ពេលវេលា ។ ហេតុនេះ វាបានក្លាយជាកន្លែងប្រមូលផ្តុំនូវបាក់តេរីជាច្រើនប្រភេទ ដែលធ្វើឱ្យប៉ះពាល់ដល់សុខភាពអ្នកប្រើប្រាស់ ។ តើជឿឬទេថា អេប៉ុងលាងចានមានសំណើមនៅលាយឡំជាមួយកាកសំណល់អាហារ វាមានភាពកខ្វក់លើសពីលាមករបស់យើង ។

តាមការសិក្សាមួយបង្ហាញថា បាក់តេរីដែលប្រមូលផ្តុំក្នុងអេប៉ុងលាងចាន មិនមែនជាបាក់តេរីដែលបង្កគ្រោះថ្នាក់ធ្ងន់ធ្ងរដូចបាក់តេរី Salmonella, EColi, និង Campylobacter ដែលធ្វើឱ្យយើងមិនស្រួលខ្លួន, ឈឺពោះ, ឈឺក្បាល និងក្អួតចង្អោរនោះទេ ។ ប៉ុន្តែទោះយ៉ាងណា យើងកុំប្រមាថឱ្យសោះ ប៉ុន្តែត្រូវសម្អាតអេប៉ុងលាងចានជាប្រចាំ ។

ជាធម្មតា គេបានផលិតអេប៉ុងលាងចានបែងចែកជា២ផ្នែក គឺផ្នែកសម្រាប់លាងចាន និងផ្នែកសម្រាប់ដុសខាត់ ។ ផ្នែកសម្រាប់លាងចាន តែងតែប្រមូលផ្តុំនូវកាកសំណល់អាហារជាប់ក្នុងនោះ ហើយផ្នែកនេះនឹងរក្សាសំណើមជានិច្ច បន្ទាប់ពីប្រើប្រាស់រួចរាល់ ។ ហេតុនេះ នៅពេលសំណើមនៅលាយឡំជាមួយកាកសំណល់អាហារ វានឹងបង្កើតជាបាក់តេរីផ្សេងៗកាន់តែច្រើន រហូតដល់វាមានភាពកខ្វក់លើសពីលាមករបស់យើងទៅទៀត ។

ចំណុចសំខាន់ បើពុំបានសម្អាតវា ឬហាលថ្ងៃឱ្យងា.ប់មេរោគទេ យើងនឹងងាយឆ្លងមេរោគផ្សេងៗ រហូតដល់កើតជំងឺរលាកខួរក្បាល ។ លើសពីនេះ បើយើងលាងចានក្នុងចានដែក ឬធុងទឹក វានឹងធ្វើឱ្យកើតបាក់តេរីកាន់តែច្រើន ។ បាក់តេរីនៅក្នុងទឹកលាងចានដែលយើងពុំបានចាក់ចោល វានឹងនៅជាប់ជាមួយចាន ឬឆ្នាំងរហូតដល់២៤ម៉ោងឯណោះ ហើយបើទោះជាយើងបានជូតចាន ឬហាលចានឱ្យស្ងួតក្តី ក៏នៅតែពុំអាចកម្ចា.ត់បាក់តេរីបាន ហើយចុងក្រោយ បាក់តេរីទាំងនេះនឹងឆ្លងមកម្ហូបអាហារ ។

ខាងក្រោមនេះ គឺជាវិធីកម្ចាត់បាក់តេរីនៅក្នុងអេប៉ុងលាងចាន ៖
១-ពេលប្រើប្រាស់អេប៉ុងលាងចានរួចរាល់ ត្រូវលាងវាឱ្យស្អាត បន្ទាប់មក ហាលថ្ងៃឱ្យស្ងួត
២-បែងចែកអេប៉ុងលាងចាន និងអេប៉ុងលាងកែវទឹក ឱ្យនៅដាច់ដោយឡែកពីគ្នា
៣-យកអេប៉ុងលាងចានទៅសម្លា.ប់មេរោគក្នុងមីក្រូវ៉េវ ចាប់ពី១នាទី ទៅ២នាទី ដើម្បីជួយកាត់បន្ថយបរិមាណបាក់តេរីឱ្យបាន៩០%
៤-ពេលអេប៉ុងលាងចានខូចទ្រង់ទ្រាយ គួរតែផ្លាស់ប្តូរអេប៉ុងថ្មី ៕

ប្រទេសថៃ ៖ មហាជនថៃបានសរសើរពីទឹកចិត្តរបស់សន្តិសុខម្នាក់ថា បើទោះជាគាត់មានជីវភាពលំបាកក្តី តែគាត់ជាមនុស្សស្មោះត្រង់ និងប្រគល់ប្រាក់ដែលគាត់រើសបានជាង១លានបាតទៅឱ្យម្ចាស់វិញ ។ សន្តិសុខបានរកឃើញប្រាក់នេះនៅអគារមួយកន្លែងស្ថិតនៅតាមផ្លូវតាកស៊ិន ទីក្រុងបាងកក បន្ទាប់មក គាត់ក៏បានទំនាក់ទំនងទៅសមត្ថកិច្ចឱ្យជួយអន្តរាគមន៍ស្វែងរកម្ចាស់ប្រាក់ ។

លោក ឆាវណាហ៊ី អាយុ៥៦ឆ្នាំ ជាសន្តិសុខរើសបានប្រាក់និយាយថា កាលពីថ្ងៃទី១៤ ខែមករា ឆ្នាំ២០២៤ គាត់បានដើរត្រួតពិនិត្យនៅតាមបរិវេណផ្សេងៗក្នុងអគារ ស្រាប់តែប្រទះឃើញឡាំងក្រដាសមួយនៅក្បែរធុងសំរាមរបស់អគារជាន់ទី២ ។ នៅពេលបើកមើលឡាំងក្រដាសនោះ គាត់បានឃើញប្រាក់ចំនួន១លាន២សែនបាត ។ ដូច្នេះ គាត់ក៏បានជូនដំណឹងទៅកាន់ប្រធានសន្តិសុខ២រូបទៀតឱ្យមកជួយត្រួតពិនិត្យមើលប្រាក់ទាំងអស់ និងប្តឹងទៅសមត្ថកិច្ចដើម្បីស្វែងរកម្ចាស់ប្រាក់ ។

កន្លងមក មាននារីម្នាក់បានដាក់ពាក្យបណ្តឹងនៅស្ថានីយប៉ូលិស អំពីករណីបាត់ប្រាក់ចំនួន១លាន២សែនបាត ក្នុងអំឡុងពេលនាងជញ្ជូនសម្ភារៈ និងកាបូបជាច្រើននៅអគារ «បូដ-វង្សវៀនយ៉ៃ» ស្ថិតនៅតាមផ្លូវតាកស៊ិន ទីក្រុងបាងកក ។ ក្រោយពីទទួលដំណឹងថា សន្តិសុខយកប្រាក់នេះមកប្រគល់ឱ្យសមត្ថកិច្ច ម្ចាស់ប្រាក់ក៏បានប្រមូលភស្តុតាងការបើកប្រាក់ពីធនាគារ និងទាក់ទងមកសមត្ថកិច្ចដើម្បីទទួលប្រាក់ ។

អ្នកនាង និផាផាន់ ឆ័យសេន ជាម្ចាស់ប្រាក់ប្រាប់ថា នាងសប្បាយចិត្តណាស់ដែលបានទទួលប្រាក់នេះវិញ ហើយនាងក៏បានប្រគល់ប្រាក់ខ្លះទៅឱ្យសន្តិសុខដែលរើសបានប្រាក់របស់នាង ដើម្បីបង្ហាញពីការដឹងគុណចំពោះគាត់ ។

រឿងនេះបានធ្វើឱ្យមហាជនជាច្រើនចាប់អារម្មណ៍ និងសរសើរពីទឹកចិត្តរបស់សន្តិសុខថា គាត់មានភាពស្មោះត្រង់, មិនចេះចង់បានទ្រព្យសម្បត្តិអ្នកដទៃ ក្រៅពីកម្លាំងញឺសឈាមខ្លួនឯង ។ អ្នកលេងបណ្តាញសង្គមម្នាក់និយាយថា ៖ «គាត់គួរតែទទួលបានការកោតសរសើរ ពីព្រោះគាត់ជាមនុស្សគំរូនៅក្នុងសង្គម» ។ អ្នកខ្លះទៀតថា ៖ «គាត់ល្អខ្លាំងណាស់ ហើយមនុស្សបែបនេះ រកមិនបានទេ» ។

អ្នកផ្សេងទៀតថា ៖ «ម្ចាស់ប្រាក់គួរតែឱ្យប្រាក់គាត់ឱ្យសមរម្យ មិនមែនដូចករណីមុន មានក្មេងម្នាក់រើសប្រាក់បានចំនួន៥ម៉ឺនបាត តែម្ចាស់ប្រាក់ឱ្យតែ២០បាតប៉ុណ្ណោះ» ។ អ្នកខ្លះទៀតនិយាយថា ៖ «បើទោះគាត់ធ្វើសន្តិសុខ តែគាត់ជាមនុស្សស្មោះត្រង់ មិនដូចមនុស្សមួយចំនួនរើសបានប្រាក់របស់គេហើយ មិនព្រមប្រគល់ឱ្យម្ចាស់ដើមវិញ បើទោះជាម្ចាស់មានភស្តុតាងបង្ហាញក្តី» ៕

បរទេស៖ Lionel Messi បានឈ្នះពានរង្វាន់កីឡាករបុរសល្អបំផុតប្រចាំឆ្នាំ ២០២៣ ក្នុងកម្មវិធី FIFA’s The Best Awards សម្រាប់ឆ្នាំទីពីរជាប់ៗគ្នា ដោយបានផ្តួល Kylian Mbappe និង Erling Haaland ដើម្បីឈ្នះពានរង្វាន់កំពូល។

កាលពីថ្ងៃទី១៥ ខែមករា ឆ្នាំ២០២៤ ខ្សែប្រយុទ្ធអាហ្សង់ទីនវ័យ ៣៦ ឆ្នាំរូបនេះបានជាប់ជាកីឡាករបុរសល្អបំផុតរបស់ពិភពលោកសម្រាប់ឆ្នាំ២០២៣ ក្នុងពិធីប្រគល់ពានរង្វាន់នៅទីក្រុងឡុងដ៍ដោយបានយកឈ្នះតារាឆ្នើមពីរនាក់ទៀតក្នុងដំណើរការ។

ទោះជាយ៉ាងណាក៏ដោយ យោងតាមលទ្ធផលដែលបានប្រកាសនៅក្នុងពិធីប្រគល់ពានរង្វាន់នៅទីក្រុងឡុងដ៍ Messi និង Haaland ទទួលបានពិន្ទុសរុបដូចគ្នាគឺ ៤៨។ ប៉ុន្តែ Messi បានឈ្នះដោយសារមានការបោះឆ្នោតច្រើនពីប្រធានក្រុមបុរស ខណៈដែល Mbappe បានបញ្ចប់ក្នុងចំណាត់ថ្នាក់លេខ ៣ ដោយមាន ៣៥ ពិន្ទុ។

ដូច្នេះហើយ គិតមកទល់នឹងពេលនេះ ខ្សែប្រយុទ្ធវ័យ ៣៦ ឆ្នាំរូបនេះបានឈ្នះពានរង្វាន់ The Best សរុបចំនួន ៨ ដង ដែលច្រើនជាងកីឡាករផ្សេងទៀត ដោយត្រូវបានទទួលស្គាល់នៅឆ្នាំ ២០១៩, ២០២២ និង ២០២៣។ បន្ទាប់ពីបានឈ្នះ Ballon d’Or លើកទីប្រាំបីរបស់គាត់នៅឆ្នាំ ២០២៣ និង FIFA World Cup ឆ្នាំ ២០២២ កីឡាករអាហ្សង់ទីនរូបនេះក៏បានជាប់ជាកីឡាករល្អបំផុតនៅលើពិភពលោកដោយ FIFA ផងដែរ។

គួរបញ្ជាក់ដែរថា Messi រួមជាមួយ Mbappe និង Haaland មិនបានចូលរួមក្នុងពិធីនេះទេ។ ដោយសារកីឡាករអាហ្សង់ទីនបានស្នាក់នៅក្នុងទីក្រុង Miami ដើម្បីហ្វឹកហាត់ជាមួយក្រុម Herons សម្រាប់ការប្រកួតដំបូងរបស់ពួកគេក្នុងយុទ្ធនាការឆ្នាំ ២០២៤៕

បរទេស៖ ការផ្ទុះភ្នំភ្លើងនៅអ៊ីស្លង់បានធ្វើឱ្យផ្ទះជាច្រើនខ្នងឆេះខ្ទិចខ្ទីនៅលើឧបទ្វីប Reykjanes នៃទីក្រុង Grindavik ខណៈដែលប្រជាជនរាប់ពាន់នាក់ក្នុងទីក្រុងនេះត្រូវបានជម្លៀសចេញ។

កាលពីថ្ងៃទី១៤ ខែមករា ឆ្នាំ២០២៤ ការផ្ទុះលើកដំបូងបានកើតឡើងនៅម៉ោង ៨:០០ ព្រឹក នៅពេលដែលមានស្នាមប្រេះមួយបានលេចឡើងនៅក្នុងដីនៅជាប់នឹងទីក្រុង Grindavik នៅភាគនិរតីនៃប្រទេសអ៊ីស្លង់ ដោយកម្អែភ្នំភ្លើងបានហូរឆ្ពោះទៅទីក្រុង ធ្វើឱ្យអ្នកស្រុកនៅតំបន់នោះចាកចេញពីទីក្រុងនេសាទ Grindavik យ៉ាងលឿនបំផុត។

យោងតាមប្រធានាធិបតីអ៊ីស្លង់លោក Gudni Johannesson បាននិយាយថា បច្ចុប្បន្នប្រទេសនេះកំពុងប្រយុទ្ធជាមួយ “កម្លាំងធម្មជាតិដ៏គ្រោះថ្នាក់មួយ” បន្ទាប់ពីកម្អែររលាយចេញពីភ្នំភ្លើងនៅភាគនិរតីរបស់កោះនេះបានលេបត្របាក់ផ្ទះជាច្រើននៅក្នុងទីក្រុង Grindavik ដែលត្រូវបានជម្លៀសចេញ។ ប្រធានាធីតីរូបនេះបានបន្តទៀតថា អ្វីដែលយើងទាំងអស់គ្នាសង្ឃឹមថានឹងមិនកើតឡើងនោះទីបំផុតបានមកដល់ហើយ។ ភ្នំភ្លើង Lava កំពុងហូរចូលទៅក្នុងទីក្រុង Grindavik ដែលជាសហគមន៍ប្រកបដោយសុខដុមរមនា និងជាកន្លែងមនុស្សបានកសាងជីវិត ធ្វើការនេសាទ និងការងារផ្សេងទៀត។

ទោះជាយ៉ាងណាក៏ដោយ គ្មានអ្នកស្រុកណាម្នាក់មានគ្រោះថ្នាក់ទេ ខណៈដែលទីក្រុងទាំងមូលត្រូវបានជម្លៀសចេញកាលពីមួយថ្ងៃមុន។ នេះគឺជាការផ្ទុះភ្នំភ្លើងលើកទីពីរនៅលើឧបទ្វីប Reykjanes ក្នុងរយៈពេលតិចជាងមួយខែ ដោយអ្នកជំនាញភូគព្ភសាស្ត្រ Magnus Tumi Gudmundsson បាននិយាយថា ការផ្ទុះភ្នំភ្លើងបាន “ថយចុះគួរឱ្យកត់សម្គាល់” ពេញមួយយប់ ប៉ុន្តែមិនអាចនិយាយបានថា តើវានឹងបញ្ចប់នៅពេលណានោះទេ។

គួរបញ្ជាក់ដែរថា អ៊ីស្លង់ គឺជាប្រទេសដែលស្ថិតនៅពីលើចំណុចក្តៅនៃភ្នំភ្លើងនៅអាត្លង់ទិកខាងជើង ជាមធ្យមមានការផ្ទុះមួយរៀងរាល់ ៤ ទៅ ៥ ឆ្នាំម្តង។ ការរំខានបំផុតក្នុងរយៈពេលថ្មីៗនេះគឺការផ្ទុះភ្នំភ្លើង Eyjafjallajokull ដែលបានបញ្ចេញពពកផេះចូលទៅក្នុងបរិយាកាស និងរំខានដល់ការធ្វើដំណើរតាមផ្លូវអាកាសឆ្លងកាត់អាត្លង់ទិកអស់រយៈពេលជាច្រើនខែ៕

បរទេស៖ នៅថ្ងៃទី១៥ ខែមករា ឆ្នាំ២០២៤ រដ្ឋមន្ត្រីអន្តោប្រវេសន៍របស់ប្រទេសកាណាដាលោក Marc Miller បានប្រកាសថារដ្ឋាភិបាលកំពុងពិចារណាកំណត់ចំនួននិស្សិតអន្តរជាតិនៅក្នុងប្រទេស ដើម្បីជួយដោះស្រាយវិបត្តិកង្វះលំនៅដ្ឋាន ដែលធ្វើឱ្យតម្លៃផ្ទះកើនឡើងខ្លាំង និងភាពគ្មានការងារធ្វើ។

យោងតាមរដ្ឋមន្ត្រីបានឱ្យដឹងទៀតថា បច្ចុប្បន្នលំហូរចូលដ៏លើសលប់នៃនិស្សិតអន្តរជាតិ បានធ្វើឱ្យតម្លៃផ្ទះកាន់តែកើនឡើងខ្ពស់ ដែលធ្វើឱ្យនិស្សិតអន្តរជាតិខ្វះខាតហិរញ្ញវត្ថុ និងពិបាករកការងារធ្វើ ក៏ដូចជាប្រឈមនឹងបញ្ហាខ្វះខាតលំនៅឋានផងដែរ។

ដូច្នេះ ដើម្បីដោះស្រាយបញ្ហានេះ រដ្ឋាភិបាលកំពុងពិចារណាលើការកំណត់ចំនួននិស្សិតអន្តរជាតិនៅក្នុងត្រីមាសទី ១ និងទី ២ នៃឆ្នាំនេះ ដោយកំណត់ទស្សនៈរបស់ខ្លួនលើការវាយតម្លៃសមត្ថភាពហិរញ្ញវត្ថុរបស់សិស្ស និងភាពត្រឹមត្រូវនៃសំបុត្រផ្តល់ជូនរបស់ពួកគេ។ ជាងនេះទៅទៀត រដ្ឋាភិបាលមានចំណាប់អារម្មណ៍លើការស៊ើបអង្កេតពីផលប៉ះពាល់នៃបរិមាណនិស្សិតយ៉ាងច្រើន ទៅលើការខ្វះខាតលំនៅឋានដែលកំពុងរីករាលដាល។

វិបត្តិលំនៅដ្ឋានត្រូវបានស្តីបន្ទោសលើការកើនឡើងនៃជនចំណាកស្រុក និងនិស្សិតអន្តរជាតិដែលបង្កើនតម្រូវការលំនៅដ្ឋាន ខណៈដែលអតិផរណាធ្វើឱ្យការសាងសង់ផ្ទះថ្មីមានភាពយឺតយ៉ាវ។ នេះបើយោងតាមទិន្នន័យពីសមាគមអចលនទ្រព្យកាណាដា (CREA) តម្លៃជាមធ្យមនៃផ្ទះធម្មតាគឺ ៧៣៥,៥០០ ដុល្លារកាណាដា ដោយអ្នកជំនាញប៉ាន់ប្រមាណថា តម្លៃផ្ទះក្នុងប្រទេសនេះអាចនឹងកើនឡើងទ្វេដងទៀត។

ទោះជាយ៉ាងណាក៏ដោយ រដ្ឋាភិបាលនៅតែមានគោលបំណងនាំយកជនអន្តោប្រវេសន៍ ៤៨៥,០០០ នាក់នៅឆ្នាំនេះ ដោយមានគោលបំណងបង្កើនចំនួននេះដល់ ៥០០,០០០ នាក់នៅឆ្នាំ ២០២៥ និង ២០២៦ ដោយសារតែកម្លាំងចំនួនជនអន្តោប្រវេសន៍ និងនិស្សិតអន្តរជាតិត្រូវបានគេនិយាយថាបានរួមចំណែកច្រើនជាង ២២.៣ ពាន់លានដុល្លារអាមេរិកក្នុងម្នាក់ៗដល់សេដ្ឋកិច្ចកាណាដា៕