បរទេស៖ អារ៉ាប៊ីសាអូឌីត គឺជាប្រទេសមួយដែលកាន់សាសនាអ៊ីស្លាមដ៏តឹងរឹង ការបើកហាងស្រាដំបូងរបស់ខ្លួននៅក្នុងទីក្រុងរីយ៉ាដ គឺផ្តល់ជូនតែអ្នកការទូត និងជនបរទេសណាដែលមិនមែនជាមូស្លីមប៉ុណ្ណោះ។

យោងតាម BBC កាលពីថ្ងៃទី២៤ ខែមករា ឆ្នាំ២០២៤ បានចុះផ្សាយថា ហាងភេសជ្ជៈដែលមានជាតិអាល់កុលដំបូងបង្អស់របស់អារ៉ាប៊ីសាអូឌីតនឹងបើកនៅក្នុងតំបន់ Diplomatic Corps នៃរដ្ឋធានី Riyadh ដែលជាផ្នែកមួយនៃផែនការ Vision ២០៣០ ដើម្បីកសាងសេដ្ឋកិច្ចបន្ថែម។ ប្រភពដដែលបានឱ្យដឹងទៀតថា ហាងស្រានេះនឹងបើក្នុងរយៈពេលប៉ុន្មានសប្តាហ៍ខាងមុខ។

ដូច្នេះ មុននឹងអាចទិញគ្រឿងស្រវឹងក្នុងបរិមាណមានកំណត់រៀងរាល់ខែ អតិថិជនត្រូវតែចុះឈ្មោះជាសមាជិកតាមរយៈកម្មវិធីទូរស័ព្ទ និងទទួលបានលេខកូដបញ្ជាក់ពីក្រសួងការបរទេសអារ៉ាប៊ីសាអូឌីត ក៏ដូចជាមានអាជ្ញាប័ណ្ណត្រឹមត្រូវទើបអតិថិជនអាចទិញគ្រឿងស្រវឹងនៅទីនេះបាន។ ទោះជាយ៉ាងណាក៏ដោយ យោងតាមសេចក្តីថ្លែងការណ៍បាននិយាយថា អតិថិជនដែលចង់ផឹកស្រាត្រូវតែមានអាយុ ២១ ឆ្នាំឡើង ហើយសម្រាប់ការថតរូបនៅក្នុងហាងគឺត្រូវបានហាមឃាត់យ៉ាងតឹងរ៉ឹង រីឯការស្លៀកពាក់វិញក៏ត្រូវបានគេពិនិត្យយ៉ាងល្អិតល្អន់ផងដែរ។

មន្ត្រីអារ៉ាប៊ីសាអូឌីតបាននិយាយថាហាងនេះជាដំណោះស្រាយចំពោះបញ្ហា«ការជួញដូរគ្រឿងស្រវឹងខុសច្បាប់»។ អស់រយៈពេលជាច្រើនឆ្នាំ អ្នកការទូតដែលធ្វើការនៅប្រទេសអារ៉ាប៊ីសាអូឌីតអាចកាន់តែគ្រឿងស្រវឹងនៅក្នុងថង់ការទូតបិទជិតប៉ុណ្ណោះ។

អារ៉ាប៊ីសាអូឌីត គឺជាប្រទេសដែលបានអនុវត្តច្បាប់គ្រឿងស្រវឹងយ៉ាងតឹងរឹងបំផុតចាប់តាំងពីឆ្នាំ ១៩៥២ មកបម្លេះបន្ទាប់ពីកូនប្រុសរបស់ស្តេច Abdulaziz ស្រវឹងហើយបានបាញ់សម្លាប់អ្នកការទូតអង់គ្លេសម្នាក់។ ហេតុនេះហើយ អ្នកដែលបំពានលើការហាមប្រាមគ្រឿងស្រវឹងអាចត្រូវបានពិន័យ និរទេស ឬដាក់គុក។

គួរបញ្ជាក់ដែរថា ហាងស្រាដំបូងនេះនឹងក្លាយជាព្រឹត្តិការណ៍ដ៏សំខាន់មួយសម្រាប់អារ៉ាប៊ីសាអូឌីតក្នុងកិច្ចខិតខំប្រឹងប្រែងរបស់ខ្លួនក្នុងការបើកវិស័យទេសចរណ៍ និងអាជីវកម្មដែលដឹកនាំដោយព្រះអង្គម្ចាស់ Mohammed bin Salman ។ អារ៉ាប៊ីសាអូឌីត បានបន្ធូរបន្ថយច្បាប់សង្គមដ៏តឹងរ៉ឹងរបស់ខ្លួនក្នុងប៉ុន្មានឆ្នាំថ្មីៗនេះ ដោយអនុញ្ញាតឱ្យមានការធ្វើដំណើរមិនប្រកាន់សាសនា ការប្រគុំតន្ត្រី ការបើករោងកុន និងអនុញ្ញាតឱ្យស្ត្រីបើកបរ។ ផែនការ Vision ២០៣០ ក៏ផ្តោតលើការអភិវឌ្ឍន៍ឧស្សាហកម្ម និងមជ្ឈមណ្ឌលភ័ស្តុភារក្នុងស្រុកផងដែរ៕

ប្រទេសចិន ៖ សាលារៀនពេលយប់កាន់តែទទួលបានការចាប់អារម្មណ៍ខ្លាំងឡើងពីសំណាក់យុវវ័យចិន ហើយមូលហេតុចម្បងមួយដែលធ្វើឱ្យពួកគេពេញនិយមនោះ ដោយសារតម្លៃសិក្សាធូរថ្លៃ គឺត្រឹមតែ៥០យាន់ (ឬស្មើប្រមាណ២ម៉ឺន៥ពាន់រៀល) ប៉ុណ្ណោះក្នុង១វគ្គ ។ និស្សិតមករៀននៅសាលារៀនពេលយប់ ពួកគេបានរៀនសូត្រអំពីបច្ចេកទេស Bartender, ការរៀបចំផ្កា, វិធីឆុងកាហ្វេ និងរៀនពីសិប្បកម្មផ្នែកបេតិកភណ្ឌវប្បធម៌អរូបិ ។

តម្លៃសិក្សាសម្រាប់វគ្គសិក្សារយៈពេល១០ម៉ោង គឺស្មើប្រមាណ៥០០យាន់ ហើយវាជាតម្លៃទូទៅសម្រាប់សាលារៀនពេលយប់នៅទីក្រុងប៉េកាំង ។ ជាក់ស្តែង គ្រូបង្រៀនម្នាក់ឈ្មោះ តូជឺ បង្រៀននៅសាលារៀនពេលយប់មួយកន្លែងឈ្មោះ «តាវ៉ានភៀនអ៊ី» លើកឡើងថា ចាប់តាំងពីបើកវគ្គបណ្តុះបណ្តាលនិស្សិត កាលពីដើមខែធ្នូ ឆ្នាំ២០២៣ ឃើញថា ចំនួនមុខវិជ្ជាសិក្សាបានកើនឡើងរហូតដល់៦០មុខវិជ្ជានាពេលបច្ចុប្បន្ន ខណៈពេលមុន មុខវិជ្ជាសិក្សាមានចំនួនតិចតួចប៉ុណ្ណោះ ។

គ្រូបង្រៀនរូបនេះបន្តថា និស្សិតទាំងឡាយបានសិក្សាអំពីការសរសេរអក្សរ, ការរាំរបាំ, គូរគំនូរ, វិធីឆុងកាហ្វេ, Bartender, ផ្នែកសិប្បកម្មបេតិកភណ្ឌវប្បធម៌អរូបិ, កីឡា និងជំនាញនិយាយ ជាដើម ។ និស្សិតភាគច្រើនដែលមកសិក្សានៅទីនេះ គឺជាយុវវ័យមានអាយុចាប់ពី២៣ឆ្នាំ ដល់៣៥ឆ្នាំ ។

ហេតុអ្វីបានជាយុវវ័យចិនមកចុះឈ្មោះចូលរៀននៅសាលារៀនពេលយប់កាន់តែច្រើន? គ្រូបង្រៀនឈ្មោះ តូជឺ បង្រៀននៅសាលារៀន «តាវ៉ានភៀនអ៊ី» ក្នុងទីក្រុងប៉េកាំង និយាយថា សាលារៀនពេលយប់មានវគ្គសិក្សាជាក់ស្តែងជាច្រើន ដូចជា ៖ ការផាត់មុខ, ថតរូបដោយទូរស័ព្ទដៃ និងហែលទឹក ។ វាជាការបង្រៀនពីបច្ចេកទេស ហើយនិស្សិតអាចអនុវត្តមុខវិជ្ជាទាំងនេះក្នុងជីវិតប្រចាំថ្ងៃ ។

រីឯមូលហេតុមួយទៀត គឺយុវវ័យចិនមិនបានគិតពីរាងកាយអស់កម្លាំងទេ ហើយពេលចេញពីធ្វើការ ពួកគេបានមកចូលរៀននៅសាលាពេលយប់ទៀតដើម្បីបន្ថែមជំនាញក្នុងជីវិត និងកាត់បន្ថយសម្ពាធពីការងារ ។ កម្មវិធីសិក្សាពេញនិយមនៅសាលារៀនពេលយប់ មានដូចជា ៖ ការតុបតែងមុខ, សន្ទនាភាសាអង់គ្លេស, ការលេង Tennis និង Bartender ខណៈតម្លៃសិក្សាលើមុខវិជ្ជាទាំងនេះថោកខ្លាំង ហើយសាលាមិនទាមទារលក្ខខណ្ឌច្រើនទេក្នុងការចុះឈ្មោះចូលរៀន ។ នេះជាមូលហេតុសំខាន់ដែលធ្វើឱ្យយុវវ័យចង់សាកល្បងនូវអ្វីថ្មីៗ ។

តាំងពីពាក់កណ្តាលឆ្នាំ២០២៣ រហូតមកដល់ដើមឆ្នាំ២០២៤ សាលារៀនពេលយប់បានបង្ហាញខ្លួននៅប្រទេសចិនម្តងទៀត ក្រោយពីពេលវេលាកន្លងផុតទៅអស់៣០ឆ្នាំ ។ បើគេក្រឡេកទៅមើលចុងសតវត្សទី២០ ឃើញថា ដោយសារតម្រូវការបណ្តុះបណ្តាលជំនាញវិជ្ជាជីវៈ បានធ្វើឱ្យសាលារៀនពេលយប់ចាប់ផ្តើមបើកវគ្គសិក្សានៅតាមទីក្រុងផ្សេងៗក្នុងប្រទេសចិន ។

ទោះយ៉ាងណា សម្រាប់ពលរដ្ឋចិននៅសម័យបច្ចុប្បន្ននេះ ពួកគេបានបំពេញការងារនឿយហត់ពេញ១ថ្ងៃ ហើយម៉ោងសិក្សានៅសាលារៀនពេលយប់ គឺអាចប្រៀបធៀបនឹង «Gap Night» ឬយកពេលទំនេររបស់ពួកគេមករៀនបន្ថែមពេលយប់ ខណៈពួកគេគ្មានពេលទំនេរច្រើនទេ ៕

សហរដ្ឋអាមេរិក ៖ កាលពីថ្ងៃទី២៤ ខែមករា ឆ្នាំ២០២៤ សារព័ត៌មានបរទេសរាយការណ៍ថា សមត្ថកិច្ចអាមេរិកបាននាំគ្នាជួយសង្គ្រោះជីវិតក្មេងប្រុសម្នាក់ ដែលធ្លាក់ទៅក្នុងបឹងទឹកកកដ៏ត្រជាក់បំផុត និងមិនអាចឡើងពីបឹងដោយខ្លួនឯងបាន ។ ហេតុការណ៍នេះបានកើតឡើងនៅទីក្រុងចូបូរ៉ូ រដ្ឋអាខាន់សល សហរដ្ឋអាមេរិក ។

សមត្ថកិច្ចបានប្រញាប់រត់ទៅកាន់បឹងមួយកន្លែង ដែលមានផ្ទៃទឹកទាំងមូលបានក្លាយទៅជាទឹកកក នៅពេលឮសំឡេងក្មេងម្នាក់ស្រែកឱ្យគេជួយ ។ ក្រោយមក សមត្ថកិច្ចបានព្យាយាមរំកិលខ្លួននៅលើផ្ទាំងទឹកកកទាំងលំបាក ដោយសារតែទឹកកករអិលខ្លាំង ។ ចុងក្រោយ សមត្ថកិច្ចក៏អាចទាញក្មេងនេះចេញពីបឹងទឹកកកបានសម្រេច ។

ក្នុងសេចក្តីថ្លែងការណ៍របស់សមត្ថកិច្ចប្រចាំទីក្រុងចូបូរ៉ូ រដ្ឋអាខាន់សល បញ្ជាក់ថា ពួកគេបានបញ្ជូនក្មេងប្រុសខាងលើទៅកាន់មន្ទីរពេទ្យហើយ ដើម្បីត្រួតពិនិត្យថា តើមានរងរបួសនៅលើរាងកាយដែរឬទេ នៅពេលធ្លាក់ចូលក្នុងបឹងទឹកកកដែលមានអាកាសធាតុត្រជាក់ខ្លាំង ។

ហេតុការណ៍ក្មេង ឬសត្វធ្លាក់ចូលក្នុងបឹងទឹកកកបែបនេះ បានកើតឡើងជាញឹកញាប់នៅសហរដ្ឋអាមេរិក ក្នុងពេលអាកាសធាតុត្រជាក់ខ្លាំង ។ ជាក់ស្តែង កាលពីពេលថ្មីៗនេះ នៅរដ្ឋបួម៉ុន សហរដ្ឋអាមេរិក មានក្មេងម្នាក់ទៀតអាយុ៨ឆ្នាំ បានធ្លាក់ទៅក្នុងបឹងទឹកកកដូចគ្នាដែរ និងទទួលបានការជួយសង្គ្រោះឱ្យរួចផុតពីគ្រោះថ្នាក់៕

បើទោះបីជារថយន្ត និងយន្តហោះ គឺបានបែកចែកផ្លូវគ្នាយ៉ាងដាច់ស្រឡាស់ហើយ ពោលគឺមួយនៅលើដីនិងមួយទៀតនៅលើអាកាស ប៉ុន្តែតាមរយៈការចែករំលែកមួយនេះក៏អាចបណ្តាលឲ្យមានគ្រោះថ្នាក់បុករវាងយាន្តទាំងពីរនេះដោយចៃដន្យបានដែរ។

កាលពីព្រឹកថ្ងៃទី២២ ខែមករា ហេតុការណ៍មួយបានបង្កឲ្យមានការភ្ញាក់ផ្អើលយ៉ាងខ្លាំងនៅឯអាកាសយានដ្ឋានស៊ីដនី ប្រទេសអូស្ត្រាលី។ រថយន្តម៉ាក់ភីកអាប់ Mitsubishi Triton បានបុកជាមួយយន្តហោះ Airbus A320 ដែលកំពុងតែចតចោល ដោយជាសំណាងល្អគឺមិនមានអ្នករងរបួសធ្ងន់ធ្ងរទេ ខណៈជើងហោះហើរជាច្រើនត្រូវលុបចោល។

ទោះជាយ៉ាងណា ហេតុការណ៍នេះគឺគេពុំដឹងអំពីមូលហេតុនៅឡើយនោះទេ។ គេដឹងត្រឹមតែឡានដឹកទំនិញមួយគ្រឿងនេះគឺជារបស់អាកាសយានដ្ឋាន បើកបរដោយបុគ្គលិករបស់អ្នកម៉ៅការសន្តិសុខម្នាក់។

យោងតាមប្រភពសារព័ត៌មាន Sky News បានឲ្យដឹងថា អ្នកបើកបររថយន្ត Mitsubishi ត្រូវបាន បញ្ជូនទៅកាន់មន្ទីរពេទ្យ ដោយគាត់មានការប៉ះទង្គិចបន្តិចបន្តួច។ អ្នកនាំពាក្យអាកាសយានដ្ឋានស៊ីដនីបានបញ្ជាក់ថា ហេតុការណ៍នេះគឺមិនមានអ្នករងរបួសទេ ព្រោះគ្មានអ្នកដំណើរនៅលើយន្តហោះនោះទេ។

តាមរយៈរូបថតគឺបង្ហាញអំពីកញ្ចក់របស់រថយន្តបានបែកខ្ទេចខ្ទី និងខូចកាប៊ីនផ្នែកខាងមុខ ព្រោះត្រូវបានសង្កត់ដោយតួផ្នែកខាងស្តាំរបស់យន្តហោះ។ តួយន្តហោះហាក់ដូចធ្ងន់ខ្លាំងណាស់រហូតធ្វើឲ្យសំបកកងខាងមុខរបស់រថយន្តសំប៉ែត។

យោងតាមការបញ្ជាក់របស់អាកាសយាន្តដ្ឋានបានឲ្យដឹងថា យន្តហោះនេះក៏ទទួលរងនូវការខូចខាតដែរ ដោយបានប៉ាន់ប្រមាណថាជួសជុលយន្តហោះនេះអាចនឹងតម្លៃជាង ៣៣០ ០០០ ដុល្លារអាមេរិក ឬច្រើនជាងនេះផងដែរ៕

កូរ៉េខាងត្បូង៖ ក្រុមហ៊ុន Google ដែលមានទីស្នាក់ការនៅប្រទេសកូរ៉េខាងត្បូង បានប្រឈមមុខនឹងការលំបាកនៅពេលដែលបុគ្គលិកមិនព្រមឈប់ពីការងារ ខណៈដែលក្រុមហ៊ុនចង់កាត់បន្ថយបុគ្គលិកមួយចំនួនចេញដោយសារវិបត្តិហិរញ្ញវត្ថុ និងការរៀបចំរចនាសម្ព័ន្ធឡើងវិញ។កាលពីថ្ងៃទី២៤ ខែមករា ឆ្នាំ២០២៤ ក្រុមហ៊ុនបច្ចេកវិទ្យាយក្សនេះមានបុគ្គលិកពេញម៉ោងប្រហែល ៨០០ នាក់នៅក្នុងប្រទេសកូរ៉េខាងត្បូង។ កាសែត The Korea JoongAng Daily បានរាយការណ៍ថា ទោះបីជាព្យាយាមកាត់បន្ថយកម្លាំងការងារតាំងពីឆ្នាំមុនក៏ដោយ បុគ្គលិកមួយចំនួននៅតែបដិសេធអនុសាសន៍របស់ក្រុមហ៊ុនក្នុងការលាលែងពីតំណែង។

ទោះជាយ៉ាងណា របាយការណ៍បាននិយាយថាមានបុគ្គលិក Google ប្រហែល ១០ នាក់មកពីការិយាល័យរបស់ខ្លួននៅទីក្រុងសេអ៊ូលបានទទួលយកសំណើរបស់ក្រុមហ៊ុនដើម្បីលាលែងពីតំណែង។ ប៉ុន្តែក្រុមហ៊ុនច្បាប់ការងារកូរ៉េ KangNam បាននិយាយថា ជាទូទៅច្បាប់ការងារកូរ៉េមិនអនុញ្ញាតឱ្យនិយោជកដែលមានកម្មករពីប្រាំនាក់ឬច្រើននាក់បណ្តេញចេញដោយគ្មានមូលហេតុនោះទេ។

លោក Bongsoo Jung នាយកគ្រប់គ្រងរបស់ KangNam បាននិយាយថា “ការលាលែងពីតំណែងដែលបានណែនាំកើតឡើងនៅពេលដែលនិយោជិតលាលែងតាមសំណើរបស់និយោជក។ ក្នុងករណីភាគច្រើន និយោជិតនឹងបដិសេធមិនព្រមលាលែងពីតំណែង ព្រោះពួកគេមិនចង់ប្រឈមមុខនឹងភាពមិនច្បាស់លាស់ និងការលំបាកក្នុងការស្វែងរកការងារថ្មី”។

យោងតាម Businss Insider បានឱ្យដឹងទៀតថា បុគ្គលិក Google ជនជាតិកូរ៉េប្រហែល ១០០ នាក់បានបង្កើតសហជីពមួយកាលពីឆ្នាំមុនដោយសារតែការព្រួយបារម្ភអំពីការបញ្ឈប់ការងារ។ លោក Kim Jong-sub ប្រធានសហជីព Google Korea បាននិយាយថា “ការកាត់បន្ថយការងារដែលកំពុងបន្តនៅក្នុងឧស្សាហកម្មបច្ចេកវិទ្យារបស់សហរដ្ឋអាមេរិក បានធ្វើឱ្យបុគ្គលិកនៅក្នុងប្រទេសកូរ៉េព្រួយបារម្ភអំពីអនាគតរបស់ពួកគេយ៉ាងខ្លាំង នោះហើយជាមូលហេតុដែលសហជីពត្រូវបានបង្កើតឡើង” ។

លោក Kim Jong-sub បានបន្តទៀតថា និយោជិតទាំងអស់មានតួនាទីក្នុងការចរចាជាមួយ Google ឆ្ពោះទៅរកកិច្ចព្រមព្រៀងដែលធានាថា “បន្តការឈប់សម្រាកដោយស្ម័គ្រចិត្ត” ជំនួសឱ្យការបង្ខំឱ្យលាលែងតាមតម្រូវការ។ ដូច្នេះការឈប់សម្រាកដោយស្ម័គ្រចិត្តមានន័យថាកម្មករនៅតែអាចទទួលបានសំណង។
គួរបញ្ជាក់ដែរថា កាលពីឆ្នាំមុន Google បានបញ្ឈប់ បុគ្គលិករបស់ខ្លួនចំនួន ៦% ស្មើនឹង ១២,០០០ នាក់ ដោយនៅឆ្នាំនេះ នាយកប្រតិបត្តិ Sundar Pichai បានប្រកាសថា ការកាត់បន្ថយថ្មី នឹងបន្តនៅឆ្នាំ ២០២៤ បន្ថែមទៀត៕

ប្រទេសចិន ៖ ខ្សែភាពយន្តចិនរឿង «Blossoms Shanghai» ដែលដឹកនាំការថតដោយលោក Wang Jiawei គឺជាអ្នកដឹកនាំរឿងដ៏ល្បីល្បាញម្នាក់ បានចាប់ផ្តើមបញ្ចាំងតាមអ៊ីនធើរណេតនៅប្រទេសចិន និងទទួលបានការពេញនិយមយ៉ាងខ្លាំងពីសំណាក់ទស្សនិកជន ។ លើសពីនេះ ក្រោយពីខ្សែភាពយន្តនេះចាប់ផ្តើមល្បីល្បាញ បានធ្វើឱ្យអាជីវកម្មនានានៅទីក្រុងសៀងហៃ មានសន្ទុះងើបឡើងក្នុងពេលជាមួយគ្នា ។

សាច់រឿងក្នុងខ្សែភាពយន្ត «Blossoms Shanghai» បានបង្ហាញពីរឿងរ៉ាវដែលកើតឡើងនៅទីក្រុងសៀងហៃ កាលពីឆ្នាំ១៩៩០ ។ ក្នុងអំឡុងឆ្នាំនោះ សៀងហៃ គឺជាទីក្រុងមួយរីកចម្រើន និងជាទីប្រជុំជនផងដែរ ។ រីឯទីកន្លែងថតវីដេអូ និងម្ហូបអាហារនៅក្នុងរឿងនេះ បានទាក់ទាញភ្ញៀវទេសចរជាច្រើននាក់មកកម្សាន្តនៅទីនេះ ក្រោយពីពួកគេបានមើលរឿងនេះចប់ ។

ផ្លូវមួយនៅទីក្រុងសៀងហៃ ឈ្មោះ ហួងហឺ គឺជាទីកន្លែងថតវីដេអូដ៏សំខាន់របស់រឿង «Blossoms Shanghai» ។ ហេតុនេះ វាបានក្លាយជាផ្លូវមួយទាក់ទាញយ៉ាងខ្លាំងសម្រាប់អ្នកទស្សនាខ្សែភាពយន្ត ។ លើសពីនេះ នៅតាមចំណុចភ្លើងស្តុបនានា និងភោជនីយដ្ឋាននៅតាមផ្លូវហួងហឺ បានក្លាយជាទីកន្លែងថតរូបរបស់ភ្ញៀវទេសចរផងដែរ ។

បើគេធ្វើដំណើរទៅឆ្ងាយពីផ្លូវហួងហឺ ប្រមាណ២គីឡូម៉ែត្រ គេនឹងបានឃើញភោជនីយដ្ឋានមួយដែលមានមុខម្ហូបឆ្អឹងជំនីជ្រូក និងបាយដំណើប ។ វាជាអាហារដ៏ល្បីល្បាញនៅទីក្រុងសៀងហៃ និងល្បីល្បាញក្នុងសាច់រឿង «Blossoms Shanghai» ។

ក្នុង១ថ្ងៃៗ ភោជនីយដ្ឋាននេះបានទទួលអតិថិជនជាច្រើននាក់ ហើយចាប់តាំងពីខ្សែភាពយន្តរឿង «Blossoms Shanghai» ចាប់ផ្តើមបញ្ចាំងនៅថ្ងៃដំបូងឃើញថា ចំនួនការស្វែងរក និងការលក់ម្ហូបអាហាររបស់ភោជនីយដ្ឋានបានកើនឡើងរហូតដល់៣០០% ៕