មនុស្សភាគច្រើនតែងស្ងួតក, ខ្វះជាតិទឹក និងខ្វះថាមពលនៅក្នុងខ្លួននារដូវក្តៅ ដែលវាជាសញ្ញាប្រាប់ថា ពួកគេកំពុងតែទទួលផលប៉ះពាល់ដោយសារអាកាសធាតុក្តៅខ្លាំង ។ ហេតុនេះ យើងចាំបាច់ត្រូវថែទាំសុខភាពឱ្យបានល្អនៅរដូវក្តៅ តាមរយៈការបរិភោគអាហារឱ្យបានត្រឹមត្រូវ និងផ្លាស់ប្តូរទម្លាប់រស់នៅមួយចំនួន ទើបយើងអាចយកឈ្នះ និងការពារខ្លួនពីផលប៉ះពាល់ ឬគ្រោះថ្នាក់ដោយសារអាកាសធាតុក្តៅខ្លាំង ។
យើងគួរបរិភោគអាហារ៧មុខនេះ ដើម្បីជួយកាត់បន្ថយកំដៅក្នុងរាងកាយ ៖
១-ទឹកដូង ៖ ភេសជ្ជៈល្អបំផុតសម្រាប់រដូវក្តៅ គឺទឹកដូង ដោយសារវាមានគុណសម្បត្តិជួយបញ្ចេញកំដៅតាមធម្មជាតិ និងអាចទប់ទល់នឹងអាកាសធាតុក្តៅខ្លាំងបាន ។ ទឹកដូងអាចជួយផ្តល់សំណើមដល់រាងកាយ និងជួយឱ្យមានតុល្យភាពអេឡិចត្រូលីត ដែលអាចគ្រប់គ្រងសីតុណ្ហភាពធម្មជាតិក្នុងខ្លួន ។
២-ឪឡឹក ៖ ផ្លែឈើដែលគេនិយមទទួលទាននៅរដូវក្តៅ ក្រៅពីផ្លែស្វាយ និងម្នាស់ គឺឪឡឹក ។ វាជាផ្លែឈើមួយទៀតដែលគេនិយមទទួលទាននៅរដូវក្តៅ ដូចជា ៖ ការហាន់ឪឡឹកដាក់ក្លាស្សេឱ្យត្រជាក់ ឬភេសជ្ជៈផលិតពីឪឡឹក ។ ជាទូទៅ បរិមាណជាតិទឹកក្នុងឪឡឹក ស្មើរហូតដល់៩២% ឯណោះ ទើបវាអាចជួយការពារការខ្វះជាតិទឹក និងធ្វើឱ្យរាងកាយត្រជាក់ ។ បើយើងទទួលទានឪឡឹកជាប្រចាំនោះ វានឹងជួយគ្រប់គ្រងកំដៅក្នុងខ្លួនបាន ។
៣-តាសក់ ៖ ផ្លែតាសក់ ក៏មានបរិមាណជាតិទឹកច្រើនដូចគ្នាដែរ ហើយវាសម្បូរទៅដោយជាតិសរសៃ ដែលអាចជួយបំបាត់ការទល់លាមកបាន ខណៈការទល់លាមក ជាបញ្ហាមួយកើតឡើងជាញឹកញាប់នៅរដូវក្តៅ ឬពេលកំដៅក្នុងរាងកាយកើនឡើង ។
តាសក់ មិនត្រឹមតែសម្រាប់ទទួលទានជាអាហារសុខភាពប៉ុណ្ណោះទេ ប៉ុន្តែគេបានប្រើប្រាស់វាសម្រាប់ព្យាបាលស្បែកមុខ ឬបិតនៅបរិវេណភ្នែក ដើម្បីផ្តល់សំណើមដល់ស្បែក ។ ក្រៅពីតាសក់បានផ្ទុកជាតិទឹករហូតដល់៩៥% វាក៏បានជួយកាត់បន្ថយកាឡូរីក្នុងខ្លួន ហើយក៏ជាអាហារគួរតែទទួលទាននៅរដូវក្តៅ មិនអាចខ្វះបាន ។
៤-ម្ទេស ៖ បើទោះជាម្ទេសមានរសជាតិហឹរក្តី ប៉ុន្តែម្ទេសអាចជួយកាត់បន្ថយសីតុណ្ហភាពរាងកាយបាន ពីព្រោះសារធាតុ Capsaicin ជាសារធាតុសកម្មនៅក្នុងផ្លែម្ទេស ។ ពេលទទួលទានម្ទេសរួចហើយ វានឹងទំនាក់ទំនងទៅកាន់ខួរក្បាលដើម្បីឱ្យដឹងថា រាងកាយក្តៅខ្លាំងពេក ហើយរាងកាយនឹងបែកញើសច្រើនជាងពេលធម្មតា ។ ហេតុនេះ ពេលយើងបែកញើសចេញមកក្រៅ វានឹងធ្វើឱ្យរាងកាយត្រជាក់ ឬកាត់បន្ថយកំដៅក្នុងរាងកាយ ។
៥-ទឹកក្រូចឆ្មារ ៖ ផ្លែក្រូចឆ្មារ សម្បូរទៅដោយវីតាមីន C ដែលអាចជួយកាត់បន្ថយកំដៅក្នុងរាងកាយ និងផ្តល់នូវសំណើមដល់រាងកាយផងដែរ ដោយវាជួយបង្កើនថាមពល និងធ្វើឱ្យយើងមានអារម្មណ៍ស្រស់ថ្លានៅរដូវក្តៅ ។ លើសពីនេះ ក្រូចឆ្មារ ក៏បានដើរតួនាទីយ៉ាងសំខាន់ក្នុងការបន្ថែមអេឡិចត្រូលីតដល់រាងកាយទៀតផង ។
៦-ខ្ទឹមបារាំង ៖ គេចាត់ទុកថា ខ្ទឹមបារាំង គឺជាអាហារត្រជាក់ និងសម្បូរទៅដោយសារធាតុ Quercetin ដែលសារធាតុនេះមានតួនាទីប្រឆាំងនឹងអាឡែស៊ី ។ ក្រៅពីនេះ ការបរិភោគខ្ទឹមបារាំង នឹងអាចការពារយើងពីជំងឺដាច់សរសៃឈាមខួរក្បាលផងដែរ ។
៧-ឃឺនឆាយ ៖ ឃឺនឆាយ បានផ្ទុកនូវជាតិទឹករហូតដល់៩០% និងផ្ទុកសារធាតុចិញ្ចឹមសំខាន់ៗ ហើយពេលបរិភោគឃឺនឆាយ នឹងធ្វើឱ្យរាងកាយយើងត្រជាក់នៅរដូវក្តៅ ។ ក្រៅពីនេះ ឃឺនឆាយ ផ្ទុកទៅដោយជាតិសូដ្យូម, ប៉ូតាស្យូម, ជាតិដែក, ម៉ាញ៉េស្យូម និងកាល់ស្យូម ដែលសុទ្ធតែជាសារធាតុរ៉ែសំខាន់ក្នុងរាងកាយ ៕