បរទេស៖ កាលពីថ្ងៃទី២៨ ខែមករា ឆ្នាំ២០២៤ អ្នកនយោបាយនៅក្នុងសភាម៉ាល់ឌីវ បានវាយគ្នាទៅវិញទៅមក បន្ទាប់ពីគណបក្សនយោបាយពីរបានប៉ះទង្គិចគ្នាក្នុងកិច្ចប្រជុំ ខណៈសមាជិកសភាបក្សប្រឆាំងជំទាស់ការបោះឆ្នោតអនុម័តរដ្ឋមន្ត្រីបួនរូបឱ្យចូលរួមជាមួយរដ្ឋាភិបាលរបស់ប្រធានាធិបតីបច្ចុប្បន្នលោក Mohamed Mouizzou រហូតឈានដល់ការឈ្លោះប្រកែកគ្នា និងភាពវឹកវរខ្លាំង។

ការប៉ះទង្គិចគ្នាបានកើតឡើងរវាងសមាជិកសភានៃសភាជាតិប្រជាជន (PNC) និងគណបក្សជឿនលឿនម៉ាល់ឌីវ (PPM) ដែលជាសម្ព័ន្ធភាពកំពុងកាន់អំណាច និងគណបក្សប្រឆាំងម៉ាល់ឌីវប្រជាធិបតេយ្យ (MDP)។ យោងតាមវីដេអូតាមអ៊ីនធឺណិត បានបង្ហាញថា ភាពចលាចលនេះកើតឡើងនៅក្នុងសភានៃកិច្ចប្រជុំមួយ ខណៈដែលសមាជិកសភា ៤,៥ នាក់បានវាយដំគ្នា ដោយសារលោក Abdullah Shaheem មកពីគណបក្ស PNC ដែលកាន់អំណាច មិនឱ្យសមាជិកសភាបក្សប្រឆាំងចូលរួមក្នុងកិច្ចប្រជុំ។

ក្នុងនោះគេឃើញថា អ្នកនយោបាយអាវសបានចាប់ជើង ហើយធ្វើឱ្យអ្នកនយោបាយអាវខៀវដួល។ នៅពេលដែលអ្នកនយោបាយអាវខៀវដួល លោកក៏បានទាញអ្នកនយោបាយម្នាក់ទៀតចូលរួម បន្ទាប់មកក៏មានអ្នកនយោបាយផ្សេងៗចូលរួមវាយដំគ្នាផងដែរ។ ក្រោយពីមានភាពចលាចលទើបគេរាយការណ៍មកថា អ្នកនយោបាយខ្លះត្រូវបញ្ជូនទៅមន្ទីរពេទ្យ ក្រោយរងរបួសក្នុងជម្លោះ។

នេះបើយោងតាមភ្នាក់ងារព័ត៌មានក្នុងស្រុកបានរាយការណ៍ថា ការចាប់ផ្តើមនៃភាពចលាចលនេះកើតឡើងតាំងពី សមាជិកសភាបក្សប្រឆាំងជំទាស់ការបោះឆ្នោតអនុម័តរដ្ឋមន្ត្រីបួនរូបឱ្យចូលរួមជាមួយរដ្ឋាភិបាលរបស់ប្រធានាធិបតីបច្ចុប្បន្នលោក Mohamed Mouizzou រហូតឈានដល់ការឈ្លោះប្រកែកគ្នា និងភាពវឹកវរក្នុងឃ្លីប ដែលទីប្រឹក្សារបស់លោក Mouizzou បានលើកឡើងថាជាទង្វើអ្នកនយោបាយទាំងនេះគឺមិនអាចឱ្យចូលរួមក្នុងកិច្ចប្រជុំនោះទេ។

គួរបញ្ជាក់ដែរថា សាធារណរដ្ឋម៉ាល់ឌីវ គឺជាប្រទេស និងជារដ្ឋប្រជុំកោះនៅអាស៊ីខាងត្បូង ក្នុងមហាសមុទ្រឥណ្ឌា។ ម៉ាល់ឌីវ ត្រូវបានដាក់ឈ្មោះតាមកោះសំខាន់ និងរាជធានីរបស់ម៉ាឡេ មានន័យថា “កោះម៉ាល់” ៕

ប្រទេសអង់គ្លេស ៖ រឿងរ៉ាវនេះបានទាក់ទាញចំណាប់អារម្មណ៍អ្នកលេងបណ្តាញសង្គមយ៉ាងខ្លាំង នៅពេលនារីម្នាក់ឈ្មោះ Carla Bellucc អាយុ៤១ឆ្នាំ រស់នៅប្រទេសអង់គ្លេស បានត្រៀមកាដូដ៏ពិសេសមួយសម្រាប់កូនស្រីរបស់ខ្លួន ។ នាងបានដាក់ប្រាក់រាប់សែនដុល្លារអាមេរិកនៅក្នុងកាដូនេះ ដើម្បីឱ្យកូនស្រីចាកចេញពីផ្ទះ ។

អ្នកនាង Carla មានកូនស្រីម្នាក់ឈ្មោះ Tanisha ដែលនឹងមានអាយុគ្រប់១៩ឆ្នាំ នៅខែកុម្ភៈ ឆ្នាំ២០២៤ ។ អ្នកនាង Carla បានត្រៀមប្រាក់ដ៏ច្រើនដាក់ក្នុងកាដូដើម្បីធ្វើជារង្វាន់ថ្ងៃកំណើតឱ្យកូនស្រី ហើយនាងបានដាក់លក្ខខណ្ឌថា កូនរបស់នាងត្រូវយកប្រាក់ទាំងអស់នេះទៅកសាងជីវិតថ្មីនៅកន្លែងផ្សេង ។ អ្នកនាងជឿថា ក្មេងៗគួរតែសម្លឹងរកឱកាសដើម្បីទៅរស់នៅក្រៅផ្ទះ នៅពេលពួកគេមានអាយុ១៨ឆ្នាំ ។ នាងក៏បានរិះគន់ឪពុក-ម្តាយផ្សេងទៀត ដែលមិនព្រមបណ្តោយឱ្យកូនៗរស់នៅដោយខ្លួនឯង ។ ដូច្នេះ ការផ្តល់ប្រាក់ទាំងនេះនឹងជាប្រយោជន៍ដល់ពួកគេ ។

ចំណែកកូនស្រីរបស់នាង Carla ក៏មានទស្សនៈស្រដៀងគ្នាជាមួយម្តាយរបស់នាងដែរ គឺនាងចង់មានកន្លែងរស់នៅផ្ទាល់ខ្លួន ។ បើតាមច្បាប់ក្នុងគ្រួសាររបស់នាង គឺមិនអនុញ្ញាតឱ្យអ្នកដទៃមកសម្រាក ឬមកជប់លៀងក្នុងផ្ទះទេ ដោយសារកូនស្រីពៅគេក្នុងគ្រួសារ គឺជាទារិកានៅឡើយ ។ ហេតុនេះ គេមិនអាចនិយាយសំឡេងខ្លាំងៗរំខានទារកបានទេ ។

អ្នកនាង Carla និយាយថា ៖ «ខ្ញុំបានចាកចេញពីផ្ទះពេលអាយុ១៦ឆ្នាំ ហើយខ្ញុំអាចរស់រហូតមកដល់សព្វថ្ងៃបាន ។ តើឪពុក-ម្តាយទាំងនេះរស់នៅដូចម្តេច? អ្នកមិនអាចមានពេលវេលាគ្រប់គ្រាន់ជាមួយស្វាមី ឬគូស្នេហ៍របស់អ្នកបានទេ ដោយសារអ្នកមានកូននៅជាមួយគ្រប់ពេលវេលា ។ កូនស្រីខ្ញុំជាមនុស្សល្អ ប៉ុន្តែនាងធំគ្រប់គ្រាន់ដើម្បីចាកចេញទៅរស់នៅខាងក្រៅ» ។

ស្ត្រីជាម្តាយបន្តថា ៖ «កូនស្រីខ្ញុំប្រាប់ថា អ្នករស់នៅក្នុងភូមិជាមួយគ្នាមានអាយុ២៤ឆ្នាំហើយ ប៉ុន្តែពួកគេរស់នៅផ្ទះជាមួយឪពុក-ម្តាយដដែល ។ ពេលខ្ញុំអាយុស្មើពួកគេ ខ្ញុំរៀបការរួចហើយ រួចនេះជាអ្វីទៅ? ទើបពួកគេរស់នៅក្នុងផ្ទះជាមួយឪពុក-ម្តាយបន្តទៀត? ខ្ញុំគិតថា វាដូចជាឆ្កួតបន្តិចហើយ ដែលឪពុក-ម្តាយទាំងនេះនៅតែចិញ្ចឹមកូនរហូតដល់ធំ» ។

នាងបញ្ជាក់ថា នៅពេលក្មេងៗអាយុ១៨ឆ្នាំ ពួកគេត្រូវការកន្លែងរស់នៅផ្ទាល់ខ្លួន ហើយបើយើងមិនបណ្តោយឱ្យពួកគេរស់នៅដោយខ្លួនឯងទេ វាដូចជាការដកហូតសិទ្ធិរបស់កូនអីចឹង ។ ពួកគេចាំបាច់ត្រូវចេញទៅរស់នៅក្នុងជីវិតពិតប្រាកដ ហើយចូរឈប់ភ័យខ្លាចទៅ ។

ប្រាក់ដែលនាង Carla ផ្តល់ឱ្យនេះ នឹងធ្វើឱ្យកូនស្រីនាងអាចយកទៅកក់កន្លែងស្នាក់នៅ, ទិញសម្ភារៈប្រើប្រាស់ និងចំណាយថ្លៃឈ្នួលនៅខែដំបូង ប៉ុន្តែបន្ទាប់ពីនេះ កូនស្រីត្រូវទទួលខុសត្រូវការចាយវាយដោយខ្លួនឯង ។ ហេតុនេះ វាមិនមែនជាបញ្ហាធំទេសម្រាប់កូនស្រី ព្រោះនាងបានធ្វើការ និងមានប្រាក់ចំណូលជារបស់ខ្លួន ហើយនាងបានត្រៀមខ្លួនរស់នៅដោយខ្លួនឯងរួចរាល់ហើយ ៕

ប្រទេសថៃ ៖ កាលពីល្ងាចថ្ងៃទី២៨ ខែមករា ឆ្នាំ២០២៤ លោកមេភូមិ ឈ្មោះ ម៉ាក់កាន់ អិនចាន់ បានទទួលដំណឹងពីពលរដ្ឋថា មានរថយន្តតូច១គ្រឿងជាប់នៅកណ្តាលស្ពានយោល ដែលតភ្ជាប់រវាងភូមិ២ និងភូមិ៩ ស្ថិតនៅឃុំវៀងថង ស្រុកស៊ូងម៉េន ខេត្ត Phrae ប្រទេសថៃ ។ ហេតុនេះ លោកមេភូមិក៏បានទំនាក់ទំនងទៅកាន់អាជ្ញាធរពាក់ព័ន្ធចុះមកត្រួតពិនិត្យ និងជួយអន្តរាគមន៍ ។

នៅចំណុចកើតហេតុ គឺជាស្ពានយោលបុរាណមានប្រវែងប្រមាណ១២០ម៉ែត្រ ដែលតភ្ជាប់រវាងភូមិ២ និងភូមិ៩ ស្ថិតនៅឃុំវៀងថង ស្រុកស៊ូងម៉េន ខេត្ត Phrae ហើយនៅភូមិ៩ គឺស្ថិតនៅឆ្ងាយពីសសរស្ពានប្រមាណ១៥ម៉ែត្រ ។ រថយន្តដែលជាប់នៅលើស្ពានយោលនេះ គឺជារថយន្តតូចពណ៌ស និងមានស្លាករថយន្ត ខេត្តឈៀងរ៉ាយ ។

រីឯកង់មុខខាងឆ្វេងរបស់រថយន្តបានធ្លាក់ទៅក្នុងប្រហោងស្ពានបាក់ ទើបបណ្តាលឱ្យរថយន្តនេះជាប់នៅមួយកន្លែង និងបើកទៅមុខអត់រួច ។ ជំហានដំបូង គេដឹងថា ស្ត្រីអ្នកបើកបររថយន្តនេះ មានអាយុ៣៨ឆ្នាំ គឺជាពលរដ្ឋមកពីស្រុកផ្សេង និងមិនធ្លាប់បើកបរនៅទីនេះពីមុនទេ ។ នាងបានចុះពីរថយន្ត ហើយមកសុំឱ្យអ្នកស្រុកជួយអន្តរាគមន៍ ។

តាមរយៈការសាកសួរស្ត្រីម្ចាស់រថយន្តឱ្យដឹងថា នាងមកពីស្រុកណងមួងខៃ ខេត្ត Phrae ហើយនាងមកកាន់ឃុំវៀងថង ស្រុកស៊ូងម៉េន ជាលើកដំបូង ដើម្បីមករកមិត្តភក្តិ ដែលមានផ្ទះនៅម្តុំក្បាលស្ពានវៀងថង ។ ហេតុនេះ នាងក៏បានបើកបររថយន្តតាម GPS ដោយសារវាបញ្ជាក់ថា បើនាងបើកឆ្លងកាត់ស្ពានយោលនេះ នាងនឹងមកដល់គោលដៅហើយ ។

នាងក៏បានបើករថយន្តឆ្លងកាត់ស្ពានយោលតាម GPS ប្រាប់ ប៉ុន្តែនៅពេលបើករថយន្តមកដល់ឃើញថា វាជាតំបន់ព្រៃ និងគ្មានផ្លូវបើកបន្តទៀតទេ ។ ដូច្នេះ នាងក៏បានបត់រថយន្តនៅត្រង់ក្បាលស្ពានដើម្បីមកចំណុចដើមវិញ ហើយពេលនាងបើករថយន្តបាន១៥ម៉ែត្រ ស្រាប់តែឈើនៅលើស្ពានយោលបាក់ ទើបកង់រថយន្តធ្លាក់នៅត្រង់ប្រហោងស្ពាន ។

នាងបន្តថា នាងរវល់តែមើល GPS និងពុំបានសង្កេតថា គ្មានស្ពានស៊ីម៉ងត៍នៅអមស្ពានយោលទេ ។ នៅពេលនាងបើករថយន្តឆ្លងកាត់ស្ពានឃើញថា វាមានសភាពរឹងមាំ ហើយគិតថា ស្ពាននេះមានមនុស្សឆ្លងកាត់ធម្មតា ។ ប៉ុន្តែនៅពេលរថយន្តនាងជាប់នៅលើស្ពាន ទើបនាងតក់ស្លុត ព្រោះចំណុចកើតហេតុនេះស្ថិតនៅចំណុចកណ្តាល នាងខ្លាចរថយន្តធ្លាក់ក្នុងទឹក ទើបចុះពីរថយន្តមកសុំឱ្យអ្នកស្រុកជួយសង្គ្រោះ ។

នាងបន្ថែមថា នាងមកពីស្រុកឆ្ងាយ ហើយមិនស្គាល់ផ្លូវទេ ។ នាងមិនដឹងថា មានស្ពានថ្មីនៅក្បែរនេះ ហើយក៏មិនដឹងថា គេហាមមិនឱ្យរថយន្តបើកបរឆ្លងកាត់ស្ពាននេះ ។ ដូច្នេះ នាងបានសំណូមពរមានការសរសេរស្លាកប្រកាស «ហាមចូល» ព្រោះខ្លាចអ្នកផ្សេងទៀតបើកបរឆ្លងកាត់ស្ពានដូចនាងដែរ ។ ក្រោយមក អាជ្ញាធរក្នុងតំបន់បាននាំគ្នាមកជួយអន្តរាគមន៍អូសរថយន្តរបស់នាងចេញពីស្ពានបានសម្រេច និងចំណាយពេលរហូតដល់២ម៉ោង ខណៈមានមនុស្សម្នាឈរមើលជាច្រើននាក់ ។

រីឯអ្នកឃើញហេតុការណ៍ប្រាប់ថា បានឃើញរថយន្តនេះបើកបរឡើងលើស្ពាន និងមិនខ្លាចគ្រោះថ្នាក់ ហើយពួកគេចង់ប្រាប់ដែរ តែប្រាប់មិនទាន់ ព្រោះនាងបានបើករថយន្តមកដល់ពាក់កណ្តាលស្ពានហើយ ។ ពេលនោះ អ្នកភូមិចង់ជិះម៉ូតូទៅប្រាប់ថា កុំឱ្យនាងបើករថយន្តត្រឡប់ក្រោយ ក៏មិនប្រាប់មិនទាន់ទៀត រហូតដល់កង់រថយន្តធ្លាក់ក្នុងប្រហោងស្ពានបែបនេះ ។

អ្នកភូមិបន្តថា តាមធម្មតា ស្ពានយោលមួយកន្លែងនេះ គ្មានអ្នកឆ្លងកាត់ញឹកញាប់ទេ ព្រោះវាសាងសង់ឡើងជិត៤០ឆ្នាំហើយ និងមានតែម៉ូតូកង់៣ ប៉ុណ្ណោះ ដែលបើកឆ្លងកាត់ស្ពាន ។ ប៉ុន្តែពេលឃើញរថយន្តតូចឆ្លងកាត់ធ្វើឱ្យអ្នកភូមិភ័យ ប៉ុន្តែសំណាងល្អ វាមិនបណ្តាលឱ្យបាត់បង់ដល់អាយុជីវិតអ្នកបើកបរ ។

ហេតុនេះ ពួកគេនឹងទំនាក់ទំនងទៅអាជ្ញាធរដើម្បីធ្វើស្លាកបិទប្រកាសថា «ហាមឆ្លងកាត់ស្ពាននេះ» ដោយសារជឿថា មានអ្នកផ្សេងទៀតដែលរស់នៅស្រុកផ្សេង នឹងបើកឡើងលើស្ពាននេះទៀត ដោយសារការមើល GPS ៕

Icon of the Seas គឺជាកប៉ាល់កម្សាន្តខ្នាតយក្សដែលមានទំហំធំបំផុតនៅលើពិភពលោក បានបង្ហាញខ្លួន និងផ្តល់សេវាកម្មដល់ភ្ញៀវទេសចរហើយ ។ កប៉ាល់នេះមានតម្លៃរហូតដល់២ពាន់លានដុល្លារអាមេរិក, មានទម្ងន់ប្រមាណ២សែន៥ម៉ឺន៨រយតោន និងមានប្រវែង៣៥០ម៉ែត្រ គឺវែងជាង Eiffel Tower របស់ប្រទេសបារាំងទៅទៀត ។

កប៉ាល់កម្សាន្តខ្នាតយក្ស Icon of the Seas គឺជារបស់ក្រុមហ៊ុន Royal Caribbean បានធ្វើដំណើរជាលើកដំបូងនៅទីក្រុងអៃអាមី រដ្ឋផ្លររីដា សហរដ្ឋអាមេរិក កាលពីថ្ងៃទី២៧ ខែមករា ឆ្នាំ២០២៤ ។ រីឯសំបុត្រជិះកប៉ាល់បានលក់ដាច់អស់គ្មានសល់ទៅឱ្យអតិថិជន តាំងពីថ្ងៃកក់សំបុត្រលើកដំបូងមកម៉្លេះ ។ វាជាកប៉ាល់កម្សាន្តដ៏ធំបំផុតនៅលើពិភពលោក ដែលគេបានចំណាយពេលផលិតអស់៩០០ថ្ងៃ នៅកន្លែងផលិតកប៉ាល់ក្នុងទីក្រុង Turku ប្រទេសហ្វាំងឡង់ ។

វាអាចផ្ទុកអ្នកដំណើរបានរហូតដល់៧.៦០០នាក់ ព្រមទាំងបុគ្គលិកបម្រើការនៅលើកប៉ាល់ ចំនួន២.៣៥០នាក់ទៀត ។ ហេតុនេះ វាអាចផ្ទុកមនុស្សស្មើនឹងចំនួនពលរដ្ឋដែលរស់នៅតាមទីក្រុងតូចៗដែរ ។

កប៉ាល់កម្សាន្តនេះមានប្រវែងរហូតដល់៣៥០ម៉ែត្រ គឺវែងជាង Eiffel Tower របស់ប្រទេសបារាំង ដែលមានកម្ពស់ត្រឹមតែ៣០០ម៉ែត្រ ។ វាមានកម្ពស់ស្មើនឹងអគារ២០ជាន់, មានបន្ទប់សម្រាកចំនួន២.៨០៥បន្ទប់, មានអាងហែលទឹកចំនួន៧ ដែលអាចផ្ទុកទឹកបានរហូតដល់៤ម៉ឺនលីត្រ គឺស្មើនឹងទឹកក្នុងបឹងមួយ ។ លើសពីនេះ នៅក្នុងកប៉ាល់មានភោជនីយដ្ឋាន និងក្លិបរាត្រីជាង៤០កន្លែង ដែលមានមុខម្ហូបជាច្រើនសម្រាប់អ្នកជិះកប៉ាល់កម្សាន្ត ថែមទាំងមានតារាចម្រៀង និងតារាកំប្លែង ចំនួន៥០នាក់ ។

ការធ្វើដំណើរជាលើកដំបូងរបស់កប៉ាល់កម្សាន្ត Icon of the Seas គឺមានគោលដៅទៅកាន់តំបន់ការ៉ាបៀនភាគខាងកើត ដោយត្រូវចំណាយពេលវេលាធ្វើដំណើរចំនួន៧ថ្ងៃ ។ គេបានចំណាយប្រាក់ចំនួន២ពាន់លានដុល្លារអាមេរិកដើម្បីផលិតកប៉ាល់នេះឡើង តាមរយៈការប្រើប្រាស់បច្ចេកវិទ្យាទំនើបចុងក្រោយ ។

បុគ្គលិកក្រុមហ៊ុន Royal Caribbean លើកឡើងថា កប៉ាល់ Icon of the Seas មិនប៉ះពាល់បរិស្ថានទេ ។ ក្រៅពីនេះ វាមានប្រព័ន្ធ Pyrolysis ដែលប្រើប្រាស់មីក្រូវ៉េវ ដើម្បីជួយបំលែងកាកសំណល់ទៅជាឧស្ម័នសម្រាប់ផលិតថាមពល រួមទាំងប្រព័ន្ធ Reverse Osmosis ជាប្រព័ន្ធបន្សុតទឹកស្អាតសម្រាប់ផ្គត់ផ្គង់ទឹកសាបស្ទើរទាំងអស់ក្នុងកប៉ាល់ ។

អ្នកនាំពាក្យក្រុមហ៊ុន Royal Caribbean ប្រាប់ថា កប៉ាល់នេះបានសន្សំសំចៃថាមពលច្រើនជាងកប៉ាល់ផលិតនាពេលបច្ចុប្បន្ន រហូតដល់២០% ។ លើសពីនេះ ក្រុមហ៊ុនបានដាក់ផែនការបង្ហាញកប៉ាល់បញ្ចេញកាបូនស្មើសូន្យ នៅឆ្នាំ២០៣៥ ផងដែរ ។ ទោះយ៉ាងណា អ្នកបរិស្ថាននានាបានបង្ហាញក្តីបារម្ភអំពីការប្រើប្រាស់ឧស្ម័នធម្មជាតិរាវជាឥន្ធនៈ ពីព្រោះវានឹងបញ្ចេញឧស្ម័នមេតានប៉ះពាល់ដល់បរិស្ថាន ៕

ក្នុងឱកាសបុណ្យចូលឆ្នាំថ្មី ក្រុមគ្រួសារភាគច្រើនតែងតែរៀបចំផ្កា ផ្លែឈើ ស្ករគ្រាប់ ភេសជ្ជៈ និងអាហារនានា ក៏ដូចជាអុជធូប ដើម្បីឧទ្ទិសកុសលផលបុណ្យដល់បុព្វការីជន ដោយសង្ឃឹមថា នឹងទទួលបានប្រសិទ្ធិពរជ័យជូនដល់កូនចៅ ឱ្យមានសុខភាពល្អ សុខសប្បាយ រកទទួលទានមានបានជាដើម។ ទោះជាយ៉ាងណា ផ្កាដែលដាក់សែនទេវតា ត្រូវតែជាផ្កា ៥ ប្រភេទដូចខាងក្រោមនេះ ដើម្បីទទួលបានហុងស៊ុយល្អពេញមួយឆ្នាំ។

១.ផ្កាឈូក៖ ផ្កាឈូក គឺជាផ្កាដែលមានក្លិនក្រអូបប្រណិត និងត្រូវបានចាត់ទុកថាមានបុគ្គលិកលក្ខណៈថ្លៃថ្នូរ បរិសុទ្ធ ច្បាស់លាស់។ តាមហុងស៊ុយ ផ្កានេះមានន័យថានាំសំណាង និងជោគជ័យ។

២.ផ្កាហ្សឺបេរ៉ា៖ ផ្កា Gerbera ក៏ជាផ្កាដែលមនុស្សជាច្រើនជ្រើសរើសថ្វាយនៅលើអាសនៈផងដែរ។ ផ្កានេះតាមហុងស៊ុយ មានអត្ថន័យនាំសំណាង និងភាពរុងរឿងដល់ម្ចាស់ផ្ទះ លើសពីនេះ ផ្កា gerbera ក៏បញ្ជាក់ពីសុខភាព និងភាពជាប់បានយូរផងដែរ។

៣.ផ្កាគ្រីសាន៖ ផ្កាគ្រីសាន តាមហុងស៊ុយមានន័យថានាំសំណាង និងជោគជ័យ។ ផ្កានេះគឺគេនិយមប្រើបំផុតក្នុងឱកាសបុណ្យចូលឆ្នាំថ្មី ដោយសារតែវាមានពណ៌លឿងភ្លឺ និងទាក់ភ្នែកជាមួយអត្ថន័យផ្សេងៗដូចជាភាពស្មោះ សុភមង្គលក្នុងជីវិត និងគង់វង្សយូរអង្វែង ។

៤.ផ្កាលីលីពណ៌ស៖ តាំងពីយូរយារណាស់មកហើយ ផ្កាលីលីពណ៌សត្រូវបានជ្រើសរើសជាផ្កាសម្រាប់តង្វាយអាសនៈ ព្រោះផ្កានេះតំណាងឱ្យភាពបរិសុទ្ធ ភាពពេញលេញ និងវិបុលភាព។

៥.ផ្កាកុលាបក្រហម៖ ជានិមិត្តរូបនៃក្ដីស្រឡាញ់ និងភាពរីករាយ។ នៅក្នុងក្បួនហុងស៊ុយ ពណ៌ក្រហមតំណាងឱ្យសំណាងល្អ ដូច្នេះការជ្រើសរើសផ្កាកុលាបមកតុបតែងប្រៀបដូចជាការទទួលពរជ័យពីព្រះ និងទ្រព្យហូរហៀរចូលផ្ទះផងដែរ។

ទោះជាយ៉ាងណា ចំនួនផ្កាគួរតែត្រូវបានដាក់នៅលើអាសនៈតាមហុងស៊ុយដូចគ្នានឹងចំនួនធូបដែរ ការរៀបចំផ្កាសម្រាប់អាសនៈគួរប្រើលេខសេសដូចជា ១,៣,៥,៧,៩,… ព្រោះលេខសេសនាំថាមពលវិជ្ជមានជានិមិត្តរូបនៃសំណាង។ ម្យ៉ាងទៀត ពេលថ្វាយតង្វាយលើអាសនៈ មិនត្រូវប្រើផ្កាក្រៀម ឬក្លែងក្លាយឡើយ ព្រោះនឹងនាំមកនូវសំណាងអាក្រក់ និងមិនបរិសុទ្ធ៕