បន្ទាប់ពីឌីជេ ណាណា បានបង្ហោះសំណេរមួយនៅលើបណ្តាញសង្គមទៅលើយុវជនមួយចំនួនដែលចំណាយពេលច្រើនក្នុងការចុចទូរសព្ទ ម៉ោង៨ព្រឹកមិនទាន់បានផឹកកាហ្វេនៅឡើយបានធ្វើឱ្យមានមតិវែកញែករួមទាំងហ្វេនចំនួនរបស់ឌីជេ ណាណា ផងបង្ហាញការមិនពេញចិត្តសំណេររបស់អ្នកនាងឡើយ។ ទោះយ៉ាងណា ទន្ទឹមនឹងមានមតិប្រតិកម្មនោះអ្នកមួយចំនួនក៏ពេញចិត្តនិងគាំទ្រសម្តីរបស់ពិធីការិនី និងអ្នកបង្កើតមាតិការូបនេះព្រោះសំណេរនេះបានដាស់តឿនស្មារតីយុវជនហើយពាក្យពិតរែងស្លែង ស្រកៀរត្រចៀកបន្តិចហើយ។
គេចាំបានថា កាលពីយប់ថ្ងៃទី២៨ ខែកុម្ភៈ ឆ្នាំ២០២៤ ឌីជេ ណាណា បានបង្ហោះសំណេរមួយថា « បំបៅកូនបណ្តើរ ទាញទូរសព្ទមកបង្ហោះសារបណ្តើរ នឹកសរសើរបុណ្យក្មេងៗយុវវ័យមួយចំនួនក្នុងសម័យបច្ចុប្បន្ន។ ខ្ញុំម៉ោងជាង១០យប់ហើយ បន្ទាប់ពីកូនបៅដេកលក់ស្កប់បន្តិចទៀតនេះ ត្រូវបន្តបង្ហើយការងារ ដល់ស្អែកឡើងត្រូវងើបម៉ោង ៥:០០ ទៅធ្វើការរកលុយ។ ក្មេងៗមួយចំនួន ចុចទូរសព្ទរំលងអធ្រាត្រ ព្រឹកឡើងម៉ោង ៨:០០ នៅរកកាហ្វេផឹកមិនទាន់បាននៅឡើយ ចេះតែរស់បានដែរ ហេតុតែបុណ្យគេដល់។ បើខ្ញុំចឹងវិញ បែបដាច់បាយម៉ាផ្ទះហើយ»។
សំណេរនេះបានធ្វើឱ្យមានមតិប្រតិកម្មចម្រុះដោយអ្នកចំនួនបង្ហាញការគាំទ្រ ចំណែកឯមួយផ្នែកធំមិនពេញចិត្តសំណេររបស់ឌីជេ ណាណា នោះទេ។ ទោះយ៉ាងណា តាមរយៈគណនីហ្វេកប៊ុកមួយឈ្មោះថា« Narabodia» បានសម្រាយពាក្យពេចន៍របស់ ឌីជេ ណាណា មិនមានចេតនាអ្វី ដែលមិនល្អនោះទេគឺចង់ដាស់តឿនស្មារតីរបស់យុវជនមួយចំនួនប៉ុណ្ណោះ។
គណនីនេះបានរៀបរាប់ថា «គ្រាន់តែពាក្យដាស់តឿន ដែលស្តាប់ទៅរាងស្រគៀត្រចៀកបន្តិចប៉ុណ្ណឹងសោះ មួយៗបែរជានាំគ្នាប្រតិកម្ម។ យុវជន ដែលឌីជេ ណាណា លើកឡើងនេះគឺសំដៅយុវវ័យមួយចំនួន ប៉ុន្តែអ្នកខ្លះមិនមែនក្មេងផងចេញមកប្រតិកម្មធ្វើអី?
ចុចទូរសព្ទ ៖ចង់សំដៅរឿងចុចអត់ប្រយោជន៍ លេងហ្គេម…..បើយើងអ្នកចុចមានប្រយោជន៍ទៅតបតធ្វើអី? _ ម៉ោង៨មិនទាន់បានកាហ្វេផឹក៖ មានន័យថា ដេកមិនទាន់ងើប កុំថាឡើយកាហ្វេ តែបាយព្រឹកក៏មិនទាន់ញ៉ាំផង។ -រស់បានដែរ ៖ គឺរស់បាន តែអាចរស់មិនបានយូរ ដេកមិនងើប បាយព្រឹកមិនញុំា ហាត់ប្រាណក៏មិនហាត់ ខូចក្រពះ ជាពិសេសអ្នកផឹក Energy drinks លើសលប់ ក្មេងៗខូចតម្រងនោម លាងឈាម …កើតច្រើន»។
គណនី Narabodia បានសម្រាយពាក្យពេចន៍របស់ ឌីជេ ណាណា ទៀតថា «ហេតុតែបុណ្យគេដល់ចង់សំដៅលើកូនៗដែលនៅមានម៉ែឪជាអ្នករ៉ាប់រងរចំណូល ផ្គត់ផ្គង់ការចំណាយ ហើយពួកគេដឹងតែចាយលុយស្រួលៗ ប៉ុន្តែកាន់តែគ្រោះថ្នាក់នោះ ក្មេងខ្លះដែលម៉ែឪក្រទេ តែធ្វើឬកបែបនេះ។ ដាច់បាយម៉ាផ្ទះ ៖ គឺគាត់ប្រកាសហើយតាស ប្តីប្រពន្ធគាត់ជួយគ្នាទៅវិញទៅមក ហើយគាត់តែងតែប្រាប់ត្រង់ៗតាំងពីដើមហើយថា គាត់រវល់ចេញរកចំណូល ចឹងភាគច្រើនប្តីគាត់អ្នកមើលកូននិងរ៉ាប់រងការងារផ្ទះហើយបើគាត់ជាអ្នករ៉ាប់រងរកចំណូលមិនខំ ពិតហើយអ្នកផ្ទះពិតជាដាច់បាយ»។
ខ្លឹមសារនេះ ត្រូវបានឌីជេ ណាណា បានចូលទៅអរគុណនូវការលើកឡើងរបស់គណនី Narabodia ព្រមទាំងភ្ជាប់មកជាមួយប្រយោគថា ពេលសរសេរ ខ្លួនអ្នកនាងមិននឹកស្មានថាវាទៅជាចឹងសោះ គិតថាសរសេរដាស់តឿនធម្មតាៗ៕
