នៅថ្ងៃទី១៣ ខែមករា ឆ្នាំ២០២៦ ក្រសួងការបរទេសអាមេរិកបានចេញសេចក្តីប្រកាសឱ្យពលរដ្ឋខ្លួនដែលស្នាក់នៅប្រទេសអ៊ីរ៉ង់ ប្រញាប់ធ្វើដំណើរចាកចេញជាបន្ទាន់ ដោយពុំចាំបាច់រង់ចាំជំនួយពីរដ្ឋាភិបាលអាមេរិក ដោយសារភាពចលាចល និងស្ថានការណ៍អសន្តិសុខកាន់តែខ្លាំង ដែលបណ្តាលមកពីការធ្វើបាតុក.ម្មប្រឆាំងរដ្ឋាភិបាលអ៊ីរ៉ង់ ។ បាតុក.ម្មបានរីករាលដាលនៅទូទាំងប្រទេសតាំងពីថ្ងៃទី២៨ ខែធ្នូ ឆ្នាំ២០២៥ ដែលធ្វើឱ្យបាតុករស្លា.ប់ដោយសារការបង្ក្រាបកើនឡើងដល់៦៤៨នាក់ និងបាតុករជាង១ម៉ឺននាក់ត្រូវចា.ប់ខ្លួន ។

ស្ថានទូតអាមេរិកនៅទីក្រុងតេហេរ៉ង់ បានដាស់តឿនឱ្យពលរដ្ឋអាមេរិកទាំងអស់ប៉ាន់ស្មានហានិភ័យ និងចាកចេញពីអ៊ីរ៉ង់ដោយខ្លួនឯង ពុំចាំបាច់រង់ចាំឱ្យរដ្ឋាភិបាលអាមេរិកជួយជម្លៀស ដោយឱ្យធ្វើដំណើរទៅប្រទេសតួកគី ឬអាមេនី ដោយសារក្រុមហ៊ុនអាកាសចរណ៍នានានៅអ៊ីរ៉ង់ចាប់ផ្តើមផ្អាកជើងហោះហើរ រហូតដល់ថ្ងៃទី១៦ ខែមករា ។ ស្ថានទូតអាមេរិកបញ្ជាក់ថា ពលរដ្ឋអាមេរិកស្នាក់នៅអ៊ីរ៉ង់ គឺប្រឈមនឹងការហៅមកសួរចម្លើយ ចាប់ខ្លួន ឬឃុំឃាំងដោយគ្មានមូលហេតុច្បាស់លាស់ ។

ចំណែកពលរដ្ឋអាមេរិកដែលមិនអាចចាកចេញពីអ៊ីរ៉ង់ដោយខ្លួនឯងបាន ស្ថានទូតអាមេរិកណែនាំឱ្យស្វែងរកកន្លែងស្នាក់នៅមានសុវត្ថិភាព និងត្រៀមចំណីអាហារ ទឹក និងថ្នាំពេទ្យឱ្យបានគ្រប់គ្រាន់សម្រាប់គ្រាអាសន្ន ។

គួរបញ្ជាក់ថា អាមេរិកប្រកាសឱ្យពលរដ្ឋខ្លួនចាកចេញពីអ៊ីរ៉ង់ជាបន្ទាន់ បន្ទាប់ពីអ៊ីរ៉ង់ប្រកាសសង្គ្រាមជាមួយអាមេរិក បើហ៊ានលូកដៃរឿងបាតុកម្ម អ៊ីរ៉ង់បានត្រៀមកម្លាំងទ័ពរួចស្រេចហើយ ។ លោក Abbas Araghchi
រដ្ឋមន្ត្រីក្រសួងការបរទេសអ៊ីរ៉ង់ថា នឹងធ្វើសង្គ្រាម បើអាមេរិកចង់សាកល្បង ប៉ុន្តែអ៊ីរ៉ង់សង្ឃឹមអាមេរិកជ្រើសរើសការចរចាជាវិធីឆ្លាត រីឯក្រុមបាតុករអ៊ីរ៉ង់ដែលស្លាប់ដោយសារការបង្ក្រាបបានកើនឡើងដល់ ៦៤៨នាក់ ។

អ៊ីរ៉ង់ប្រកាសសង្គ្រាមជាមួយអាមេរិក បន្ទាប់ពីប្រធានាធិបតីអាមេរិក លោក Donald Trump ព្រមានលូកដៃរឿងបាតុកម្មដោយប្រើប្រាស់កម្លាំងទ័ព ពីព្រោះចំនួនបាតុករអ៊ីរ៉ង់ស្លាប់ដោយសារការបង្ក្រាបកើនឡើងរាប់រយនាក់ ។ តាមការសន្និដ្ឋាន បាតុករស្លាប់ច្រើនជាងនេះ ប៉ុន្តែរដ្ឋាភិបាលអ៊ីរ៉ង់លាក់បាំងចំនួនពិតប្រាកដ ថែមទាំងស្តីបន្ទោសការបង្ហូរឈាមកើតឡើងដោយសារអាមេរិកជ្រៀតជ្រែក ហើយចោទប្រកាន់អាមេរិក និងអ៊ីស្រាអែល គាំទ្រក្រុមបាតុករ ។

មុននេះ លោកប្រធានាធិបតី Trump បានប្រកាសពីអាមេរិកកំពុងពិចារណាលូកដៃរឿងបាតុកម្មនៅអ៊ីរ៉ង់ បើមេដឹកនាំអ៊ីរ៉ង់នៅតែបញ្ជាឱ្យសម្លាប់បាតុកររាប់រយនាក់ ។ អាមេរិកអាចជួបជជែកជាមួយមន្ត្រីរដ្ឋាភិបាលអ៊ីរ៉ង់ និងទាក់ទងទៅក្រុមបាតុករ ស្របពេលអាមេរិកកំពុងពិចារណារកវិធីជួយអន្តរាគមន៍ រួមទាំងប្រើប្រាស់កម្លាំងទ័ព ខណៈការធ្វើបាតុកម្មនេះមានទ្រង់ទ្រាយធំបំផុតនៅអ៊ីរ៉ង់ តាំងពីបដិវត្តន៍អ៊ីស្លាមកាលពីឆ្នាំ១៩៧៩ ៕

តាមការលើកឡើងរបស់អ្នកនាំពាក្យក្រសួងការបរទេសចិនកាលពីថ្ងៃទី១២ ខែមករា ឆ្នាំ២០២៦ អាមេរិកមិនគួរយកចិន និងរុស្ស៊ី មកធ្វើជាមូលហេតុដើម្បីគ្រប់គ្រងកោះហ្គ្រីនឡែនទេ ព្រោះអាមេរិកមានគោលបំណងស្វែងរកផលប្រយោជន៍ពីកោះនេះ សកម្មភាពផ្សេងៗរបស់ចិននៅតំបន់អាកទិកជាការគោរពតាមច្បាប់អន្តរជាតិ ។ ការលើកឡើងរបស់ចិនក្រោយពីប្រធានាធិបតីអាមេរិកប្រកាសគ្រប់គ្រងកោះហ្គ្រីនឡែន ដើម្បីការពារមិនឱ្យចិន និងរុស្ស៊ី គ្រប់គ្រងនាថ្ងៃអនាគត ។

អ្នកនាំពាក្យក្រសួងការបរទេសចិន អ្នកស្រី Mao Ning បានឆ្លើយសំណួររបស់អ្នកសារព័ត៌មានពេលធ្វើសន្និសីទសារព័ត៌មានប្រចាំថ្ងៃ បន្ទាប់ពីលោកប្រធានាធិបតី Trump ចង់ធ្វើកិច្ចព្រមព្រៀងទិញកោះហ្គ្រីនឡែន គឺជាដែនដីស្ថិតក្រោមការគ្រប់គ្រងរបស់ដាណឺម៉ាក ដែលជាសម្ព័ន្ធមិត្តរបស់អង្គការសន្ធិសញ្ញាអាត្លង់ទិកខាងជើង (NATO) ដើម្បីការពារកុំឱ្យចិន និងរុស្ស៊ី គ្រប់គ្រងកោះនាថ្ងៃអនាគត ។

ទំនាក់ទំនងរវាងរដ្ឋាភិបាលក្រុងវ៉ាស៊ីនតោនជាមួយដាណឺម៉ាក និងកោះហ្គ្រីនឡែន កាន់តែតានតឹងខ្លាំងនៅខែមករានេះ ដោយសារលោកប្រធានាធិបតី Trump និងរដ្ឋាភិបាលអាមេរិកចង់គ្រប់គ្រងកោះហ្គ្រីនឡែន ហើយសេតវិមានកំពុងពិចារណារកវិធីផ្សេងៗ រួមទាំងប្រើប្រាស់កម្លាំងទ័ពគ្រប់គ្រងកោះនៅតំបន់អាកទិកដែលសម្បូរធនធានធម្មជាតិ ។

លោកស្រី Mette Frederiksen នាយករដ្ឋមន្ត្រីដាណឺម៉ាកថា អាមេរិកដណ្តើមយកកោះហ្គ្រីនឡែន មានន័យថា ជាការបញ្ចប់តួនាទីអង្គការ NATO ខណៈលោក Jens-Frederik Nielsen នាយករដ្ឋមន្ត្រីហ្គ្រីនឡែន និងប្រធានគណបក្សនយោបាយចំនួន៤ បានចេញសេចក្តីថ្លែងការណ៍រួមបញ្ជាក់ថា អនាគតកោះហ្គ្រីនឡែនស្ថិតលើការសម្រេចចិត្តរបស់ពលរដ្ឋហ្គ្រីនឡែន ។

ថ្មីៗនេះ លោកប្រធានាធិបតី Trump ថា អាមេរិកចាំបាច់ត្រូវគ្រប់គ្រងកោះហ្គ្រីនឡែន បើមិនដូច្នោះទេ កោះមួយនេះអាចត្រូវគ្រប់គ្រងដោយចិន និងរុស្ស៊ី ។ ពេលផ្តល់សម្ភាសន៍ជាមួយសារព័ត៌មាននៅលើយន្តហោះកាលពីថ្ងៃទី១១ ខែមករា លោកចង់ធ្វើកិច្ចព្រមព្រៀងទិញយកកោះនេះច្រើនជាងប្រើប្រាស់វិធីផ្សេងៗ ។

ឆ្លើយនឹងសំណួររបស់សារព័ត៌មានកាលពីថ្ងៃទី១២ ខែមករា ដែលសួរពាក់ព័ន្ធនឹងអាមេរិកចង់គ្រប់គ្រងកោះហ្គ្រីនឡែនដើម្បីការពារមិនឱ្យចិន និងរុស្ស៊ី គ្រប់គ្រងនាថ្ងៃអនាគត អ្នកនាំពាក្យក្រសួងការបរទេសចិន អ្នកស្រី Mao Ning ថា សកម្មភាពផ្សេងៗរបស់ចិននៅតំបន់អាកទិក មានគោលដៅជំរុញសន្តិភាព ស្ថិរភាព និងការអភិវឌ្ឍយូរអង្វែងក្នុងតំបន់ ព្រមទាំងស្របច្បាប់អន្តរជាតិ ប៉ុន្តែអ្នកស្រីមិនបាននិយាយលម្អិតពីសកម្មភាពចិននៅតំបន់អាកទិកទេ ។

អ្នកស្រីបន្តថា ប្រទេសទាំងអស់មានសិទ្ធិ និងសេរីភាពធ្វើសកម្មភាពនៅតំបន់អាកទិកដោយស្របច្បាប់ ។ អាមេរិកមិនគួរស្វែងរកផលប្រយោជន៍ខ្លួនឯងលើកោះហ្គ្រីនឡែន ដោយយកប្រទេសផ្សេងៗមកធ្វើជាលេស បញ្ហាទាក់ទងនឹងតំបន់អាកទិក គឺជាផលប្រយោជន៍រួមរបស់សហគមន៍អន្តរជាតិ ។

កន្លងមក លោកប្រធានាធិបតី Trump ថា បើអាមេរិកមិនគ្រប់គ្រងកោះទេ ចិន និងរុស្ស៊ី នឹងគ្រប់គ្រងមិនខាន យើងមិនយល់ព្រមឱ្យប្រទេសទាំងពីរមកធ្វើជាប្រទេសជិតខាងរបស់អាមេរិកទេ ។ លោកបានពិភាក្សាជាមួយមន្ត្រីសេតវិមានរកគ្រប់វិធីគ្រប់គ្រងកោះជាដែនដីគ្រប់គ្រងដោយខ្លួនឯងផង និងគ្រប់គ្រងដោយដាណឺម៉ាកផង ដែលមានពលរដ្ឋរស់នៅប្រមាណ ៥ម៉ឺន ៧ពាន់នាក់ ។ អាមេរិកអាចប្រើប្រាស់កម្លាំងទ័ពបញ្ចូលកោះក្នុងទឹកដីអាមេរិក និងផ្តល់ប្រាក់យ៉ាងច្រើនឱ្យពលរដ្ឋហ្គ្រីនឡែន ចាប់ពី១ម៉ឺនដុល្លារ ទៅ១០ម៉ឺនដុល្លារក្នុងម្នាក់ ដើម្បីបញ្ចុះបញ្ចូលពួកគេផ្តាច់ខ្លួនពីដាណឺម៉ាក ៕

ប្រទេសថៃ៖ សភាពាណិជ្ជកម្មភាគខាងត្បូងប្រទេសថៃបានបង្ហាញថា ភ្ញៀវទេសចរបរទេសជាបន្តបន្ទាប់បានលុបចោលដំណើរកម្សាន្តរបស់ពួកគេមកកាន់ភាគខាងត្បូងប្រទេសថៃ បន្ទាប់ពីការបំផ្ទុះគ្រាប់បែ.កនៅក្នុងខេត្តចំនួន 3។ នេះបើតាមការចុះផ្សាយរបស់កាសែត Khaosod ថ្ងៃទី១២ មករា ឆ្នាំ២០២៦។

លោក Natthanon Pongthanyawiriya ប្រធានសភាពាណិជ្ជកម្ម នៅខេត្ត Pattani បានបង្ហាញថា ការបំផ្ទុះគ្រាប់បែ.ក និងការដុតស្ថានីយប្រេងឥន្ធនៈចំនួន 11 ទីតាំងនៅក្នុងខេត្ត Yala, Narathiwat និង Pattani បានប៉ះពាល់ដល់ទំនុកចិត្តលើពាណិជ្ជកម្ម ការវិនិយោគ និងទេសចរណ៍នៅក្នុងខេត្តព្រំដែនភាគខាងត្បូងយ៉ាងតំណម។

ឧប្បត្តិហេតុទាំងនេះបានធ្វើឲ្យខូចទំនុកចិត្តផ្នែកសន្តិសុខ ដែលនាំឱ្យភ្ញៀវទេសចរទាំងក្នុង និងក្រៅប្រទេស មានការព្រួយបារម្ភហើយលុបចោលដំណើរកម្សាន្តទៅកាន់ខេត្តទាំងបី, លុបចោលការកក់កន្លែងស្នាក់នៅ និងចូលរួមក្នុងកម្មវិធីកម្សាន្តផ្សេងៗ ចំពេលដែលខេត្ត Pattani កំពុងរៀបចំសម្រាប់ពិធីបុណ្យ Lim Ko Niao Shrine ដ៏ធំបំផុតនៅភាគខាងត្បូង ហើយរំពឹងថានឹងទាក់ទាញអ្នកទេសចរបានយ៉ាងច្រើន។ ប៉ុន្តែផ្ទុយទៅវិញ បើយោងតាមស្ថានការណ៍នាពេលបច្ចុប្បន្ននេះ វាបានបណ្តាលឱ្យខូចខាតយ៉ាងធ្ងន់ធ្ងរដល់អាជីវកម្ម វិស័យទេសចរណ៍ និងទេសចរណ៍ទាំងមូលនៅក្នុងខេត្ត។

លោក Natthanon បានទទូចថា រដ្ឋាភិបាលត្រូវតែដោះស្រាយភាពចលាចលនេះជាបន្ទាន់ ដើម្បីស្តារទំនុកចិត្តឡើងវិញនៅក្នុងវិស័យអាជីវកម្ម ពាណិជ្ជកម្ម វិនិយោគ និងទេសចរណ៍នៅក្នុងខេត្តព្រំដែនភាគខាងត្បូងទាំងបីឡើងវិញ។ លោកបានប៉ាន់ប្រមាណថា វានឹងចំណាយពេលយ៉ាងហោចណាស់ប្រាំពីរខែដើម្បីទទួលបានទំនុកចិត្តមកវិញ។

ដោយឡែក បើតាមលោកស្រី Siriporn Lauhakul, ប្រធានសភាពាណិជ្ជកម្មខេត្តណារ៉ាធីវ៉ាត ក៏បានត្អូញត្អែដែរថា ចាប់តាំងពីមានគ្រោះទឹកជំនន់នៅស្រុកហាតយ៉ៃ សេដ្ឋកិច្ចនៃខេត្តជាប់ព្រំដែនភាគខាងត្បូងទាំងបីបានរងផលប៉ះពាល់យ៉ាងខ្លាំង ដែលធ្វើឱ្យអ្នកទេសចរស្ទាក់ស្ទើរក្នុងការធ្វើដំណើរទៅកាន់តំបន់នោះ។

លោកស្រីបានកត់សម្គាល់ឃើញថា ក្រោយមកវិស័យទេសចរណ៍នៅក្នុងខេត្តទាំងបីនោះចាប់ផ្ដើមប្រសើរឡើងវិញខ្លះទៅហើយ ប៉ុន្តែឥឡូវនេះបញ្ហាថ្មីបានកើតឡើងបន្ថែមទៀត ដែលធ្វើឱ្យសេដ្ឋកិច្ចនៅក្នុងខេត្តភាគខាងត្បូងទាំងនេះកាន់តែដុនដាប និងស្ងាត់ភ្ញៀវទេសចរកាន់ខ្លាំង៕

សហរដ្ឋអាមេរិក ៖ កាលពីថ្ងៃទី១២ ខែមករា ឆ្នាំ២០២៦ ប្រធានាធិបតីអាមេរិក លោក Donald Trump បានប្រកាសយកពន្ធទំនិញប្រទេសទាំងឡាយណាដែលធ្វើពាណិជ្ជកម្មជាមួយអ៊ីរ៉ង់ ស្មើ២៥% ដើម្បីប្រឆាំងនឹងមេដឹកនាំផ្តាច់ការអ៊ីរ៉ង់ ហើយអត្រាពន្ធនឹងអនុវត្តភ្លាមៗ ។ ការប្រកាសនេះកើតឡើងបន្ទាប់ពីអាមេរិកគំ.រាមវាយប្រ.ហារអ៊ីរ៉ង់ដែលសម្លា.ប់ក្រុមបាតុករកើនឡើងរហូតដល់ជាង៥០០នាក់ លោក Trump ថ្លែងថា អាមេរិកត្រៀមខ្លួនជាស្រេចក្នុងការជួយអន្តរាគមន៍ ។

ការប្រកាសរបស់ប្រធានាធិបតីអាមេរិកជាការដាក់សម្ពាធអ៊ីរ៉ង់ ខណៈពលរដ្ឋអ៊ីរ៉ង់បានធ្វើបាតុកម្មប្រឆាំងរដ្ឋាភិបាលអស់រយៈពេលជាង២សប្តាហ៍ ដោយសារប្រាក់អ៊ីរ៉ង់ធ្លាក់ចុះយ៉ាងខ្លាំង និងស្ថានភាពសេដ្ឋកិច្ចកាន់តែអាក្រក់ ។ លោកប្រធានាធិបតី Trump បានបង្ហោះសារក្នុងបណ្តាញសង្គមថា ប្រទេសណាក៏ដោយដែលធ្វើពាណិជ្ជកម្មជាមួយអ៊ីរ៉ង់ អាមេរិកនឹងយកពន្ធ២៥% សម្រាប់គ្រប់មុខទំនិញនាំចូលអាមេរិក អត្រាពន្ធនឹងអនុវត្តភ្លាមៗ ប៉ុន្តែលោកមិនបាននិយាយលម្អិតពាក់ព័ន្ធនឹងការធ្វើពាណិជ្ជកម្មជាមួយអ៊ីរ៉ង់ទេ ។

អាមេរិកយកពន្ធក្នុងគោលដៅដាក់សម្ពាធប្រទេសមួយចំនួនដែលជាដៃគូពាណិជ្ជកម្មជាមួយអ៊ីរ៉ង់ រួមមាន ៖ ចិន អ៊ីរ៉ាក់ អេមីរ៉ាត់អារ៉ាប់រួម (UAE) តួកគី និងឥណ្ឌា ។ លោកប្រធានាធិបតី Trump ធ្លាប់ព្រមានប្រើប្រាស់កម្លាំងទ័ព បើមេដឹកនាំអ៊ីរ៉ង់នៅតែសម្លាប់ក្រុមបាតុករ ដោយអ្នកនាំពាក្យសេតវិមាន អ្នកស្រី Karoline Leavitt និយាយថា រដ្ឋាភិបាលអាមេរិកកំពុងពិចារណាបញ្ជូនកងទ័ពទៅវាយប្រហារអ៊ីរ៉ង់តាមផ្លូវអាកាស ។

ការធ្វើបាតុកម្មនៅអ៊ីរ៉ង់ចាប់ផ្តើមតាំងពីចុងខែធ្នូ ឆ្នាំ២០២៥ ដោយសារក្រុមបាតុករខឹងសម្បារប្រាក់អ៊ីរ៉ង់ធ្លាក់ចុះយ៉ាងឆាប់រហ័ស ហើយការធ្វើបាតុកម្មបានរីករាលដាលកាន់តែច្រើនកន្លែងប្រឆាំងនឹងមេដឹកនាំអ៊ីរ៉ង់ លោក Ayatollah Ali Khamenei ។ កាលពីថ្ងៃទី២៨ ខែធ្នូ អាជីវករនៅទីក្រុងតេហេរ៉ង់ បានប្រមូលគ្នាតវ៉ាប្រឆាំងមេដឹកនាំ ដោយសារប្រាក់អ៊ីរ៉ង់ធ្លាក់ចុះខ្លាំងក្នុងប្រវត្តិសាស្ត្រ បើធៀបនឹងប្រាក់ដុល្លារអាមេរិក ខណៈអតិផរណាកើនឡើងជាង៤០% ដែលធ្វើឱ្យតម្លៃទំនិញប្រើប្រាស់ប្រចាំថ្ងៃកើនឡើង ដូចជា ៖ ប្រេងសណ្តែក និងសាច់សត្វ ។

ទីភ្នាក់ងារព័ត៌មានសិទ្ធិមនុស្ស (HRANA) បានបង្ហាញចំនួនក្រុមបាតុករស្លាប់កើនឡើងដល់ជាង៥០០នាក់ និងសន្តិសុខស្លាប់ ៤៨នាក់ ខណៈប្រភពព័ត៌មានផ្សេងទៀតថា ក្រុមបាតុករស្លាប់ដោយសារការបង្ក្រាបពីរដ្ឋាភិបាលកើនឡើងខ្ពស់ជាងនេះ និងមានក្រុមបាតុកររាប់ពាន់នាក់ត្រូវចាប់ខ្លួន ។ ការផ្តាច់សេវាអ៊ីនធើរណេតតាំងពីថ្ងៃទី៨ ខែមករា ដែលធ្វើឱ្យពិបាកត្រួតពិនិត្យចំនួនមនុស្សស្លាប់ពិតប្រាកដ ហើយសារព័ត៌មានបរទេសជាច្រើនមិនអាចរាយការណ៍ព័ត៌មានចេញពីប្រទេសអ៊ីរ៉ង់បានទេ ។

លោកប្រធានាធិបតី Trump និយាយជាញឹកញាប់អាមេរិកនឹងជួយអន្តរាគមន៍ភ្លាមៗបើមានការសម្លាប់បាតុករបន្ថែម ដោយលោកបង្ហោះសារក្នុងបណ្តាញសង្គម Truth Social ថា ពលរដ្ឋអ៊ីរ៉ង់កំពុងស្វែងរកសន្តិភាព ការតវ៉ាប្រឆាំងអាចនឹងខ្លាំងក្លាជាងពេលណាៗទាំងអស់ដែលធ្លាប់កើតឡើងនៅអ៊ីរ៉ង់ ។ អាមេរិកកំពុងពិចារណាវាយប្រហារផ្លូវអាកាសលើទីតាំងនុយក្លេអ៊ែរ និងគោលដៅផ្សេងៗនៅទីក្រុងតេហេរ៉ង់ ដើម្បីដាក់សម្ពាធរដ្ឋាភិបាលលោក Khamenei ៕

ប្រទេសជប៉ុន ៖ សារព័ត៌មាន Reuters បានរាយការណ៍កាលពីថ្ងៃទី១១ ខែមករា ឆ្នាំ២០២៦ ថា លោកស្រី Sanae Takaichi នាយករដ្ឋមន្ត្រីជប៉ុនអាចនឹងសម្រេចចិត្តរំលាយសភា និងរៀបចំការបោះឆ្នោតសកលមុនពេលកំណត់ ខណៈសារព័ត៌មានជប៉ុនចុះផ្សាយពីបោះឆ្នោតនៅជប៉ុនអាចនឹងធ្វើឡើងនៅខែកុម្ភៈ ឆ្នាំ២០២៦ ។ ប៉ុន្តែលោកស្រីមិនបាននិយាយលម្អិតពីការសម្រេចចិត្តនេះទេ និងថា ផ្តោតសំខាន់លើការអនុម័តថវិកាដើម្បីឱ្យវិធានការជំរុញសេដ្ឋកិច្ចអាចជួយកាត់បន្ថយផលប៉ះពាល់ដោយសារអតិផរណាទាន់ពេលវេលា ។

លោក Hirofumi Yoshimura ប្រធានគណបក្សជប៉ុនច្នៃប្រឌិតដែលបានចូលរួមបង្កើតរដ្ឋាភិបាល និយាយមកកាន់ស្ថានីយទូរទស្សន៍ NHK កាលពីថ្ងៃទី១១ ខែមករា ថា លោកបានជួបជាមួយលោកស្រី Takaichi នាយករដ្ឋមន្ត្រីជប៉ុន កាលពីថ្ងៃទី៩ ខែមករា គឺគោលជំហរចំពោះពេលវេលារៀបចំការបោះឆ្នោតរបស់លោកស្រីបានផ្លាស់ប្តូរយ៉ាងខ្លាំង វាមិនចម្លែកទេ បើលោកស្រីបោះឆ្នោតមុនពេលកំណត់ដូចការចុះផ្សាយរបស់សារព័ត៌មាន ។

កាសែតជប៉ុនបានចុះផ្សាយដោយដកស្រង់ប្រភពពីរដ្ឋាភិបាលថា នាយករដ្ឋមន្ត្រីជប៉ុនកំពុងពិចារណាពីការរៀបចំបោះឆ្នោតជាបន្ទាន់ នៅថ្ងៃទី៨ ឬថ្ងៃទី១៥ ខែកុម្ភៈ ឆ្នាំ២០២៦ ប៉ុន្តែលោក Yoshimura ប្រធានគណបក្សជប៉ុនច្នៃប្រឌិត មិនបានពិភាក្សាពីថ្ងៃបោះឆ្នោតច្បាស់លាស់ជាមួយលោកស្រី Takaichi ទេ ។

លោកស្រី Takaichi ជានាយករដ្ឋមន្ត្រីស្រីដំបូងរបស់ជប៉ុន ដែលមានគោលនយោបាយអភិរក្សនិយមយ៉ាងខ្លាំងបានបដិសេធប្រាប់កាលបរិច្ឆេទច្បាស់លាស់ពីការរំលាយសភា ក្នុងពេលផ្តល់សម្ភាសន៍ជាមួយស្ថានីយទូរទស្សន៍ NHK ។ លោកស្រីគ្រាន់តែថ្លែងថា ពេលនេះ ផ្តោតសំខាន់លើការអនុម័តថវិកាដើម្បីឱ្យវិធានការជំរុញសេដ្ឋកិច្ចអាចជួយកាត់បន្ថយផលប៉ះពាល់ដោយសារអតិផរណាទាន់ពេលវេលា ។

ចំណែកគណបក្សប្រឆាំងបានបង្ហាញក្តីបារម្ភរបស់ខ្លួន ប្រសិនបើមានការបោះឆ្នោតនៅខែកុម្ភៈខាងមុខ នឹងធ្វើឱ្យការអនុម័តថវិកានៅចុងខែមីនា មិនអាចទៅរួច ។ លោក Tetsuo Saito ប្រធានគណបក្សប្រឆាំងថា គួរឱ្យភ្ញាក់ផ្អើលណាស់ដែលនាយករដ្ឋមន្ត្រីជប៉ុនគ្រោងរំលាយសភាពេលរដ្ឋសភាបើកកិច្ចប្រជុំនៅថ្ងៃទី២៣ ខែមករា ស្របពេលសេដ្ឋកិច្ចជប៉ុនស្ថិតក្នុងដំណាក់កាលសំខាន់ ។

តាមការលើកឡើងរបស់អ្នកវិភាគ ការបោះឆ្នោតមុនពេលកំណត់នៅប្រទេសជប៉ុនធ្វើឱ្យស្មុគស្មាញដល់ផែនការចំណាយថវិកា ចំនួន ៧៨ម៉ឺន ៣ពាន់លានដុល្លារអាមេរិក ដែលជាថវិកាដំបូងរបស់លោកស្រី Takaichi ក្នុងឋានៈជានាយករដ្ឋមន្ត្រី និងអាចបង្ខំឱ្យរដ្ឋាភិបាលជប៉ុនត្រូវចំណាយថវិកាបណ្តោះអាសន្ន បើមិនអាចអនុម័តថវិកាទាន់ពេលវេលា ។

ទន្ទឹមនឹងនេះ ភាពតានតឹងផ្នែកពាណិជ្ជកម្មរវាងជប៉ុន និងចិន នៅតែបង្កហានិភ័យដល់សេដ្ឋកិច្ចជប៉ុន បន្ទាប់ពីលោកស្រី Takaichi បាននិយាយកាលពីខែវិច្ឆិកា ឆ្នាំ២០២៥ ថា បើចិនវាយប្រហារតៃវ៉ាន់ គឺជាការគំរាមកំហែងជប៉ុន ។ ការលើកឡើងបែបនេះធ្វើឱ្យរដ្ឋាភិបាលចិនឆ្លើយតបវិញដោយការចាត់វិធានការជាច្រើន រួមទាំងរឹតបន្តឹងការនាំចេញទំនិញមួយចំនួនមកជប៉ុន ៕