នៅថ្ងៃទី២០ ខែកុម្ភៈ ផលិតករនៃរឿងភាគទូរទស្សន៍ចិន «The Rebirth of the Malicious Empress of Military Lineage» បានប្រកាសពីតួសម្តែងជាផ្លូវការដោយមាន Dylan Wang និង Meng Ziyi ជាតួសម្តែងសំខាន់ពីររូប។ នេះគឺជាការផលិតរួមគ្នាដោយ Tencent Video, Xinli TV និង Yue Wen Film and Television Company។ កន្លងមកការប្រកាសឈ្មោះតារាសម្តែងទាំងពីររូបនឹងសហការគ្នាបង្កឱ្យមានភាពចម្រូងចម្រាសយ៉ាងខ្លាំង។
.png)
ខ្សែភាពយន្តនេះត្រូវបានដកស្រង់ចេញពីប្រលោមលោកមួយ ដែលត្រូវបានចាត់ថ្នាក់ក្នុងចំណោមប្រលោមលោករ៉ូមែនទិកបុរាណដ៏អស្ចារ្យទាំងបួនដែលពេញនិយមបំផុតនៅក្នុងប្រទេសចិន។ ដូច្នេះហើយរឿងនេះក៏ត្រូវបានគេរំពឹងទុកយ៉ាងខ្លាំងផងដែរ។ រឿងភាគបុរាណនេះរៀបរាប់ពីរឿងរ៉ាវរបស់ Shen Miao សម្តែងដោយ Meng Ziyi ដែលជាមហេសីដែលត្រូវបានទម្លាក់ចេញពីតំណែង ដែលបានស្លាប់ដោយអយុត្តិធម៌នៅក្នុងព្រះបរមរាជវាំង ហើយបានកើតជាថ្មីដោយមិននឹកស្មានដល់ជាក្មេងស្រីម្នាក់។ បន្ទាប់ពីបានឃើញពីចរិតបោកប្រាស់របស់អ្នកនៅជុំវិញខ្លួន នាងបានប្តេជ្ញាចិត្តសងសឹក និងផ្លាស់ប្តូរជោគវាសនាដ៏សោកសៅរបស់គ្រួសារសិន។
ក្នុងការស្វែងរកការសងសឹករបស់នាង នាងបានជួបជាមួយតួឯកប្រុសដែលមើលទៅហាក់ដូចជាគ្មានកង្វល់ និងហ៊ឺហារ ប៉ុន្តែតាមពិតមានទេពកោសល្យនិងមានចិត្តគំនិតដ៏ប៉ិនប្រសប់ និងមិនអាចទាយទុកជាមុនបាន។ ពីការសង្ស័យដំបូង និងការកេងប្រវ័ញ្ចគ្នាទៅវិញទៅមក អ្នកទាំងពីរបានក្លាយជាសម្ព័ន្ធមិត្ត និងជាមិត្តជិតស្និទ្ធបន្តិចម្តងៗ ដោយប្រយុទ្ធប្រឆាំងនឹងកម្លាំងផ្សេងៗ និងនាំមកនូវសន្តិភាពដល់ដែនដី។
ដំណឹងដែលថា Dylan Wang និង Meng Ziyi នឹងសម្តែងក្នុងរឿងខាងលើនេះបានបង្កឲ្យមានការចាប់អារម្មណ៍យ៉ាងខ្លាំងនៅលើបណ្ដាញសង្គម ដោយបានគ្របដណ្ដប់លើពាក្យគន្លឹះដែលកំពុងពេញនិយមបំផុតនៅលើវេទិកា Weibo ។ អ្នកទស្សនាបានជជែកវែកញែកយ៉ាងក្តៅគគុកអំពីការសម្ដែងតួអង្គ រូបរាងរបស់តារាសម្តែងទាំងពីរនៅក្នុងផ្ទាំងរូបភាព និងចំណាត់ថ្នាក់តំណែងរវាង Dylan Wang និង Meng Ziyi។
មុនពេលគម្រោងនេះប្រកាសពីតួឯកប្រុសស្រីរបស់ខ្លួន អ្នកទស្សនាភាគច្រើនសន្មតថារឿងនេះគឺជាគម្រោង «ផ្តោតលើស្ត្រី» ដោយផ្តោតលើតួអង្គ Shen Miao ដូច្នេះតួឯកស្រីទំនងជាត្រូវបានចុះបញ្ជីមុនគេនៅក្នុងបញ្ជីតួសម្តែង។ ទោះជាយ៉ាងណាក៏ដោយ នៅក្នុងការប្រកាសអំពីតួសម្តែងឈ្មោះរបស់ Dylan Wang ត្រូវបានចុះបញ្ជីមុនឈ្មោះរបស់ Meng Ziyi។ នេះបាននាំឱ្យអ្នកគាំទ្រប្រលោមលោកដើមមានការព្រួយបារម្ភថាខ្សែភាពយន្តនេះនឹងត្រូវបានកែសម្រួលដើម្បីផ្តោតសំខាន់លើតួឯកប្រុស ដែលអាចប៉ះពាល់ដល់សាច់រឿង៕
