អាមេរិក-កម្ពុជា បង្ហាញក្ដីរីករាយចំពោះកិច្ចព្រមព្រៀងទិញ-លក់យន្តហោះចំនួន ១០គ្រឿង

ទំនាក់ទំនងទ្វេភាគីរវាងកម្ពុជា និងសហរដ្ឋអាមេរិកាន់ឈានដល់ចំណុចដ៏ល្អប្រសើរ! សហរដ្ឋអាមេរិក បានបង្ហាញក្តីសោមនស្សរីករាយជាមួយកម្ពុជា លើកិច្ចព្រមព្រៀងជាប្រវត្តិសាស្ត្រ ដែលមានតម្លៃជាង ៣ ពាន់លានដុល្លារ ក្នុងការទិញយន្តហោះប្រភេទ Boeing 737 MAX ចំនួន ១០គ្រឿង និងជម្រើសទិញបន្ថែមចំនួន ១០គ្រឿង។

យោងតាមស្ថានទូរអាមេរិកប្រចាំនៅប្រទេសកម្ពុជា នៅថ្ងៃសៅរិ៍ទី២១ ខែកុម្ភៈ ឆ្នាំ២០២៦ នេះបានបង្ហាញថា សហរដ្ឋអាមេរិក មានការវាយតម្លៃខ្ពស់ចំពោះទំនាក់ទំនង ដែលកំពុងរីកចម្រើនជាមួយកម្ពុជា ក្នុងភាពជាដៃគូទ្វេភាគី ដែលបានផ្ដល់អត្ថប្រយោជន៍ដល់ប្រជាជននៃប្រទេសទាំងពីរ និងការរួមចំណែកដល់សន្តិភាព វិបុលភាព និងស្ថិរភាពកាន់តែទូលំទូលាយនៅក្នុងតំបន់អាស៊ីអាគ្នេយ៍។ ព្រមទាំងបង្ហាញការស្វាគមន៍យ៉ាងកក់ក្ដៅចំពោះកម្ពុជា ក្នុងនាមជាសមាជិកស្ថាបនិកនៃក្រុមប្រឹក្សាសន្តិភាព។

ដោយផ្អែកលើការយកចិត្តទុកដាក់របស់រដ្ឋបាលយើងទៅលើកិច្ចការទូតសេដ្ឋកិច្ច និងពាណិជ្ជកម្ម យើងខ្ញុំមានសេចក្តីសោមនស្សរីករាយ ក្នុងការលើកឡើងអំពីកិច្ចព្រមព្រៀងជាប្រវត្តិសាស្ត្រដែលមានតម្លៃប្រមាណ ៣,២៤ ពាន់លានដុល្លារ រវាងក្រុមហ៊ុន Boeing និងក្រុមហ៊ុនអាកាសចរណ៍ Air Cambodia សម្រាប់ការទិញយន្តហោះប្រភេទ 737 MAX ចំនួន ១០ គ្រឿង ជាមួយនឹងជម្រើសក្នុងការទិញបន្ថែមចំនួន ១០ គ្រឿងទៀត។

ទន្ទឹមនឹងនេះ ស្ថានទូតអាមេរិកបានគូសបញ្ជាក់ថា កិច្ចព្រមព្រៀងនេះ បានផ្ដល់ឱ្យដៃគូរបស់យើងនូវឧត្តមភាពរបស់អាមេរិកផ្នែក នវានុវត្តន៍អាកាសចរណ៍ ព្រមទាំងជួយគាំទ្រដល់ការបង្កើតការងារដែលមានគុណភាពខ្ពស់ប្រមាណជាង ១២,០០០ កន្លែង សម្រាប់កម្មករនិយោជិតអាមេរិក៕