ក្រុមហ៊ុន OpenAI បានបង្ហាញនូវគំរូបញ្ញាសិប្បនិម្មិត (Sora) គឺជាបច្ចេកវិទ្យា AI ថ្មីចុងក្រោយបង្អស់ ដែលវាអាចផ្លាស់ប្តូរពីអត្ថបទខ្លីៗឱ្យក្លាយជាវីដេអូមានគុណភាពខ្ពស់ (Text to Video) មានរយៈពេល១នាទី ។ វីដេអូបង្កើតឡើងដោយបច្ចេកវិទ្យាថ្មីនេះ គឺមានលក្ខណៈស្រដៀងគ្នានឹងវីដេអូដែលបង្កើតដោយមនុស្សដែរ ។ នេះបើតាមការចេញផ្សាយរបស់សារព័ត៌មានបរទេស កាលពីពាក់កណ្តាលខែកុម្ភៈ ឆ្នាំ២០២៤ ។

នៅពីក្រោយការប្រែក្លាយអត្ថបទទៅជាវីដេអូខ្លីនេះ គឺកើតចេញពីសមត្ថភាពរបស់គំរូបញ្ញាសិប្បនិម្មិត (Sora) ដែលវាអាចយល់ពីភាសា និងតួនាទីរបស់វត្ថុបានយ៉ាងល្អ ។ លើសពីនេះ បច្ចេកវិទ្យានេះក៏អាចយល់ពីបរិយាកាសនៅជុំវិញខ្លួន និងទីកន្លែងផ្សេងៗផងដែរ ទើបធ្វើឱ្យការធ្វើចលនានៅក្នុងវីដេអូដូចគ្នានឹងស្ថានការណ៍ពិតប្រាកដគ្រប់មុំនៃរូបភាព និងស្រមោល ។

វីដេអូដែលក្រុមហ៊ុន OpenAI បង្ហាញនេះ គឺគ្រាន់តែជាលទ្ធផលការងារមួយផ្នែកប៉ុណ្ណោះ ហើយក្រុមហ៊ុនកំពុងស្ថិតក្នុងដំណាក់កាលស្រាវជ្រាវ និងអភិវឌ្ឍន៍បន្ថែមទៀត ។ បច្ចុប្បន្ន ក្រុមហ៊ុនបានផ្តល់សិទ្ធិការប្រើប្រាស់បច្ចេកវិទ្យានេះសម្រាប់តែក្រុមសិល្បករ, អ្នករចនាម៉ូដ និងចាងហ្វាយផលិតកម្មភាពយន្តមួយចំនួនប៉ុណ្ណោះ ដើម្បីប្រមូលព័ត៌មានពីការប្រើប្រាស់សម្រាប់ការអភិវឌ្ឍគំរូបញ្ញាសិប្បនិម្មិតបន្ថែមទៀត ។

ក្រៅពីនេះ ក្រុមការងារកំពុងដោះស្រាយបញ្ហាចំណុចខ្វះខាតរបស់គំរូបញ្ញាសិប្បនិម្មិត (Sora) ដូចជា ៖ គំរូ Physics ដ៏ស្មុគស្មាញ, ការបង្ហាញទឹកមុខ និងក្រសែភ្នែករបស់មនុស្ស ដើម្បីប្រាប់ពីស្ថានការណ៍នានា ដែលគំរូបញ្ញាសិប្បនិម្មិតពុំទាន់អាចធ្វើចំណុចទាំងអស់នេះបានត្រឹមត្រូវទេ ។ ហេតុនេះ គំរូបញ្ញាសិប្បនិម្មិត (Sora) នឹងត្រូវរៀនសូត្របន្ថែមទៀតដើម្បីឱ្យវាកាន់តែឆ្លាតជាងមុន ។

សុវត្ថិភាពនៃការប្រើប្រាស់គំរូបញ្ញាសិប្បនិម្មិត (Sora) គឺជាអ្វីដែលក្រុមការងារអភិវឌ្ឍន៍ផ្តល់ភាពសំខាន់ជាចម្បង ដើម្បីការពារកុំឱ្យជនខិលខូចយកបច្ចេកវិទ្យាថ្មីនេះទៅប្រើប្រាស់ក្នុងផ្លូវខុស ដូចជា ៖ ការផលិតវីដេអូបោកប្រាស់, ការបង្កើតព័ត៌មានក្លែងក្លាយ, ការជំរុញអំពើហិង្សា និងការគំរាមកំហែង ឬបំពានផ្លូវភេទ ដើម្បីបង្កើតការស្អប់ខ្ពើម ឬមានគោលបំណងផ្សេងទៀត ។ ក្រៅពីនេះ ក្រុមហ៊ុនក៏បានសហការយ៉ាងជិតស្និទ្ធជាមួយអ្នកជំនាញ, និស្សិត និងអ្នកច្បាប់ ។

កាលពីចុងឆ្នាំ២០២២ ក្រុមហ៊ុន OpenAI ធ្លាប់បានបង្ហាញសេវាកម្ម ChatGPT ដែលបញ្ជាក់ពីសមត្ថភាពរបស់បញ្ញាសិប្បនិម្មិតលើសមុខងារជាច្រើន ដូចជា ៖ វាអាចសរសេរអ៊ីម៉ែល, សរសេរកូដកម្មវិធី និងកំណាព្យ ។ ហេតុនេះ ការបង្ហាញគំរូបញ្ញាសិប្បនិម្មិត (Sora) ដែលអាចបង្កើតវីដេអូមានគុណភាពខ្ពស់នេះ គឺជាការអភិវឌ្ឍបច្ចេកវិទ្យាដ៏សំខាន់របស់ក្រុមហ៊ុន ៕

ប្រទេសថៃ ៖ ប្រទេសថៃនៅតែជួបវិបត្តិបន្តទៀតពាក់ព័ន្ធនឹងបញ្ហាធូលីពុល ហើយបច្ចុប្បន្ន តំបន់ជាច្រើននៅប្រទេសថៃស្ថិតក្នុងស្ថានភាពធ្ងន់ធ្ងរ ។ ជាក់ស្តែង នៅទីក្រុងបាងកក និងខេត្តឈៀងម៉ៃ មានគុណភាពខ្យល់ជាប់ចំណាត់ថ្នាក់ក្នុងចំណោមប្រទេសមានការបំពុលខ្លាំងបំផុតលើពិភពលោក ។ នេះបើតាមការចុះផ្សាយរបស់សារព័ត៌មានថៃឈ្មោះ Nation កាលពីថ្ងៃទី១៦ ខែកុម្ភៈ ឆ្នាំ២០២៤ ។

លើសពីនេះ ស្ថានការណ៍នេះកាន់តែគួរឱ្យបារម្ភខ្លាំងឡើង នៅពេលមជ្ឈមណ្ឌលទំនាក់ទំនងការដោះស្រាយបញ្ហាបំពុលបរិយាកាស និងនាយកដ្ឋានគ្រប់គ្រងការបំពុលបរិយាកាសលើកឡើងថា ចាប់ពីថ្ងៃទី១៦ ខែកុម្ភៈ ដល់ថ្ងៃទី២២ ខែកុម្ភៈ ឆ្នាំ២០២៤ នៅគ្រប់តំបន់របស់ប្រទេសថៃ លើកលែងតែខេត្តភាគខាងត្បូង នឹងមានធូលីពុលកើនឡើង ។

ចំណែកមូលហេតុបណ្តាលឱ្យកើតធូលីនៅលើបរិយាកាសនោះ ក្រៅពីអាកាសធាតុតាមរដូវកាល គឺវាកើតឡើងដោយសារការដុតតាមធម្មជាតិ ជាពិសេស ការដុតភ្លើងរបស់មនុស្ស ។ បើតាមការត្រួតពិនិត្យក្នុងផ្កាយរណបបង្ហាញថា តំបន់របស់ប្រទេសថៃ និងប្រទេសជិតខាង មានចំណុចក្តៅកើតឡើងជាច្រើនកន្លែង ។ កត្តាទាំងនេះបានធ្វើឱ្យប្រទេសថៃមានបញ្ហាធូលីយ៉ាងខ្លាំង រហូតធ្វើឱ្យមតិនានាសួរថា តើពេលណាទើបប្រទេសថៃ និងប្រទេសជិតខាងសហការគ្នាដោះស្រាយបញ្ហាធូលី និងផ្សែងឆ្លងព្រំដែន?

ថ្មីៗនេះ មជ្ឈមណ្ឌលប្រឆាំងព័ត៌មានក្លែងក្លាយប្រទេសថៃលើកឡើងថា យោងតាមទិន្នន័យពីក្រសួងការបរទេសថៃឱ្យដឹងថា ក្រសួងការបរទេសថៃ និងកម្ពុជា នឹងសហការគ្នាបង្កើត Hotline ដើម្បីដោះស្រាយបញ្ហាធូលី និងផ្សែងឆ្លងព្រំដែន ។

លោក Srettha Thavisin នាយករដ្ឋមន្ត្រីថៃ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានពិភាក្សាគ្នាអំពីការដោះស្រាយបញ្ហាធូលី និងផ្សែង ក្នុងអំឡុងពេលនាយករដ្ឋមន្ត្រីកម្ពុជាធ្វើដំណើរទស្សនកិច្ចមកប្រទេសថៃ កាលពីថ្ងៃទី៧ ខែកុម្ភៈ ឆ្នាំ២០២៤ ។ ភាគីទាំងពីរបានយល់ព្រមសហការគ្នាដោះស្រាយបញ្ហាធូលី PM2.5 ព្រមទាំងផ្តល់ភាពសំខាន់ដល់បរិស្ថាន និងខ្យល់អាកាសបរិសុទ្ធប្រកបដោយនិរន្តរភាព ។

លើសពីនេះ ប្រទេសថៃ និងកម្ពុជា នឹងសហការគ្នាបង្កើត Hotline និងក្រុមការងារចម្រុះរវាងក្រសួងធនធានធម្មជាតិ និងបរិស្ថានរបស់ថៃ ជាមួយក្រសួងបរិស្ថានរបស់កម្ពុជា ដើម្បីដោះស្រាយបញ្ហាបរិស្ថានដែលប៉ះពាល់ដល់សុខភាពពលរដ្ឋ តាមការស្នើឡើងរបស់ភាគីថៃ ។

ក្រៅពីនេះ ក្រសួងការបរទេសនឹងជំរុញកិច្ចសហការផ្សេងៗ ដូចជា ៖ ការផ្លាស់ប្តូរព័ត៌មានតំបន់ក្តៅ និងការអភិវឌ្ឍសក្តានុពលឧបករណ៍, ការពន្លត់ភ្លើង និងការគ្រប់គ្រងផ្នែកកសិកម្ម រួមទាំងការផ្លាស់ប្តូរចំណេះដឹង និងព័ត៌មាន Hotspot ផ្សេងៗ បន្ទាប់ពីការសន្ទនាពីចម្ងាយ ។ រីឯភាគីកម្ពុជាបានឯកភាពលើសារៈសំខាន់នៃការផ្លាស់ប្តូរព័ត៌មាន ព្រមទាំងត្រៀមខ្លួនចែករំលែកព័ត៌មានប្រចាំថ្ងៃ និងតែងតាំងមន្ត្រីសម្របសម្រួលបញ្ហានេះ ។

កាលពីថ្ងៃទី១៦ ខែកុម្ភៈ ឆ្នាំ២០២៤ ភ្នាក់ងារអភិវឌ្ឍន៍បច្ចេកវិទ្យាអវកាសបានបង្ហាញទិន្នន័យទទួលបានពីផ្កាយរណប (Suomi NPP) និងទិន្នន័យបានពីផ្កាយរណបជាច្រើនទៀតកាលពីថ្ងៃទី១៥ ខែកុម្ភៈ បង្ហាញថា ប្រទេសថៃមានតំបន់ក្តៅ រហូតដល់១.៨៧០តំបន់ ។

ទិន្នន័យពីផ្កាយរណបបញ្ជាក់ទៀតថា ចំណែកប្រទេសជិតខាង គឺប្រទេសកម្ពុជាមានតំបន់ក្តៅច្រើនជាងគេ ស្មើនឹង២.៣៤៨តំបន់, មីយ៉ាន់ម៉ា ១.៣៩៥តំបន់, ឡាវ ១.០៦៤តំបន់ និងវៀតណាម ៥៧៥តំបន់ ៕

ប្រទេសកូរ៉េខាងជើង ៖ អ្នកនាង គីម យ៉ូជុង គឺជាប្អូនស្រីរបស់លោក គីម ជុងអ៊ុន មេដឹកនាំប្រទេសកូរ៉េខាងជើង បានចេញសេចក្តីថ្លែងការណ៍មួយតាមរយៈទីភ្នាក់ងារព័ត៌មានកណ្តាលរបស់រដ្ឋាភិបាលកូរ៉េខាងជើង កាលពីថ្ងៃទី១៦ ខែកុម្ភៈ ឆ្នាំ២០២៤ ថា កូរ៉េខាងជើងនឹងបើកចំហក្នុងការពង្រឹងទំនាក់ទំនងជាមួយជប៉ុន ព្រមទាំងអញ្ជើញនាយករដ្ឋមន្ត្រីជប៉ុនមកទស្សនកិច្ចនៅកូរ៉េខាងជើងផងដែរ ។

អ្នកនាង គីម យ៉ូជុង ប្អូនស្រីរបស់មេដឹកនាំកូរ៉េខាងជើង បានបញ្ជាក់ក្នុងសេចក្តីថ្លែងការណ៍ថា គ្មានហេតុផលណាមួយដែលធ្វើឱ្យប្រទេសកូរ៉េខាងជើង និងជប៉ុន មិនអាចបង្កើតទំនាក់ទំនងជាមួយគ្នាបានទេ ដរាបណា ជប៉ុនមិនលើកឡើងពីបញ្ហាឧបសគ្គក្នុងការទំនាក់ទំនងរវាងប្រទេសទាំងពីរ ។ ជាក់ស្តែង បញ្ហាចោទប្រកាន់កូរ៉េខាងជើង រឿងការចាប់ខ្លួនជនជាតិជប៉ុន ។

ប្អូនស្រីមេដឹកនាំកូរ៉េខាងជើងសង្ឃឹមថា នៅថ្ងៃណាមួយ មេដឹកនាំប្រទេសជប៉ុននឹងធ្វើដំណើរមកទស្សនកិច្ចនៅកូរ៉េខាងជើង ប៉ុន្តែបច្ចុប្បន្ននេះ កូរ៉េខាងជើងពុំទាន់មានគម្រោងនៅឡើយទេ ក្នុងការពង្រឹងទំនាក់ទំនងជាមួយជប៉ុន ។ ហេតុនេះ កូរ៉េខាងជើងនឹងរង់ចាំមើលការតាំងចិត្តពិតប្រាកដរបស់លោក Fumio Kishida នាយករដ្ឋមន្ត្រីជប៉ុន ជាមុនសិន ។

កាយវិការដ៏កម្ររបស់កូរ៉េខាងជើង ដែលចង់ចងសម្ព័ន្ធភាពជាមួយជប៉ុនលើកនេះ បានកើតឡើងក្រោយពីជប៉ុនបង្ហាញនូវចំណុចសំខាន់ៗចំនួន២ គឺចំណុចទី១ លោក Fumio Kishida នាយករដ្ឋមន្ត្រីជប៉ុន ទើបតែបានលើកឡើងកាលពីដើមខែកុម្ភៈ ឆ្នាំ២០២៤ ថា លោកមានអារម្មណ៍ថា វាមានភាពចាំបាច់យ៉ាងខ្លាំងដែលត្រូវផ្លាស់ប្តូរទំនាក់ទំនងរវាងជប៉ុន និងកូរ៉េខាងជើង នាពេលបច្ចុប្បន្ន ។ លើសពីនេះ លោកនាយករដ្ឋមន្ត្រីជប៉ុនបានចាប់ផ្តើមធ្វើសកម្មភាពមួយចំនួនដែលពាក់ព័ន្ធនឹងគំនិតនេះផងដែរ ។

ចំណែកចំណុចទី២ សារព័ត៌មានជប៉ុនបានរាយការណ៍នៅខែកុម្ភៈ ឆ្នាំ២០២៤ ថា លោក Fumio Kishida នាយករដ្ឋមន្ត្រីជប៉ុន គ្រោងធ្វើដំណើរទស្សនកិច្ចទៅប្រទេសកូរ៉េខាងត្បូង នៅចុងខែមីនា ឆ្នាំ២០២៤ ហើយលោកនឹងចូលរួមកិច្ចប្រជុំកំពូលជាមួយប្រធានាធិបតីកូរ៉េខាងត្បូង លោក Yoon Suk Yeol ។ វាជាការធ្វើដំណើរមកកាន់ប្រទេសកូរ៉េខាងត្បូង លើកទី២ របស់លោក Fumio Kishida ៕

បរទេស៖ ក្រិកគឺជាប្រទេសដែលមានប្រជាជនភាគច្រើនកាន់សាសនាគ្រិស្ត ជាទូទៅយោងតាមព្រះគម្ពីររបស់សាសនាគ្រិស្តបានប្រកាសថា សកម្មភាពនៃការស្រឡាញ់ភេទដូចគ្នាគឺជាអំពើបាប។ ទោះជាយ៉ាងណា កាលពីពេលថ្មីៗនេះសភាក្រិកបានអនុម័តច្បាប់អនុញ្ញាតឱ្យរៀបការភេទដូចគ្នាដោយស្របច្បាប់ ដែលនេះនឹងធ្វើឱ្យប្រទេសក្រិចក្លាយទៅជាប្រទេសគ្រិស្តអូស្សូដក់(សាខានៃសាសនាគ្រិស្ត)ដំបូងបង្អស់របស់ពិភពលោក។សេចក្តីព្រាងច្បាប់នេះ ត្រូវបានអនុម័តកាលពីថ្ងៃទី១៥ ខែកុម្ភៈ ឆ្នាំ២០២៤ ដោយសមាជិកសភាចំនួន ១៧៦រូប បានបោះឆ្នោតគាំទ្រ ៧៦សំឡេង ខណៈ ២រូបមិនបានបោះឆ្នោត និងមិនបោះឆ្នោតគាំទ្រ ៤៦សំឡេង។ ដូច្នេះច្បាប់នេះនឹងក្លាយជាច្បាប់បន្ទាប់ពីត្រូវបានចុះផ្សាយក្នុងសារាចរផ្លូវការ។ នេះជាលទ្ធផលនៃការធ្វើយុទ្ធនាការរាប់ទសវត្សរ៍សម្រាប់សិទ្ធិអាពាហ៍ពិពាហ៍ភេទដូចគ្នានៃសហគមន៍ LGBT ក្នុងប្រទេសក្រិក។

បន្ទាប់ពីការអនុម័តរបស់ខ្លួន ក្រុមអ្នកសង្កេតការណ៍សភាបានអបអរសាទរចំពោះការគាំទ្រច្បាប់នេះ ហើយមនុស្សរាប់សិបនាក់ក៏បានប្រមូលផ្តុំគ្នានៅតាមដងផ្លូវនៃទីក្រុងអាថែន ដើម្បីអបអរសាទរផងដែរ។ នាយករដ្ឋមន្ត្រី Kyriakos Mitsotakis បាននិយាយថា “ក្រិកមានមោទនភាពក្នុងការក្លាយជាប្រទេស EU ទី ១៦ ក្នុងការធ្វើឱ្យស្របច្បាប់អាពាហ៍ពិពាហ៍ភេទដូចគ្នា។

ច្បាប់នេះបានធ្វើឱ្យប្រទេសក្រិច ក្លាយជាប្រទេសគ្រិស្តអូស្សូដក់ដំបូងគេ (សាខានៃសាសនាគ្រិស្ត) ដើម្បីអនុញ្ញាតឱ្យមានអាពាហ៍ពិពាហ៍ភេទដូចគ្នា ប៉ុន្តែក៏ត្រូវបានជំទាស់យ៉ាងខ្លាំងដោយវិហារគ្រិស្តអូស្សូដក់ផងដែរ។ នេះបើយោងតាម Reuters បានឱ្យដឹងថា លទ្ធផលនៃការស្ទង់មតិថ្មីៗនេះបានបង្ហាញថាជនជាតិក្រិកកំពុងបែកបាក់គ្នាដោយសារបញ្ហានេះ។

គណបក្សស្តាំនិយម Spartans បាននិយាយថា ច្បាប់ថ្មីនេះគឺជា “អំពើបាប និងថោកទាបបំផុត”។ រីឯគណបក្សដំណោះស្រាយក្រិកក៏បាននិយាយដែរថាសេចក្តីព្រាងច្បាប់នេះគឺជាការ «ប្រឆាំងនឹងគ្រិស្តសាសនាទាំងស្រុង» និងបំផ្លាញផលប្រយោជន៍ជាតិ។ ទន្ទឹមនឹងនេះ មនុស្សជាច្រើនមកពីសហគមន៍អ្នកស្រឡាញ់ភេទដូចគ្នានិយាយថា សេចក្តីព្រាងច្បាប់នេះគឺ “មិនស៊ីជម្រៅគ្រប់គ្រាន់ទេ”។ ទោះជាយ៉ាងណា គូស្វាមីភរិយាស្រឡាញ់ភេទដូចគ្នា បច្ចុប្បន្នកំពុងប្រឈមមុខនឹងឧបសគ្គជាច្រើននៅពេលប្រើវិធីបន្តពូជជំនួយ ហើយមនុស្សទាំងនេះក៏មិនត្រូវអនុញ្ញាតឱ្យសុំពពោះជំនួសដែរ៕

បរទេស៖ ក្រុមហ៊ុនផលិតរថយន្តធំៗរបស់សហរដ្ឋអាមេរិក និងអឺរ៉ុបកំពុងព្យាយាមកាត់បន្ថយតម្លៃរថយន្តអគ្គិសនីរបស់ខ្លួន ក្នុងគោលបំណងដើម្បីប្រកួតប្រជែងជាមួយក្រុមហ៊ុនផលិតរថយន្តអគ្គិសនីរបស់ចិន។
កាលពីថ្ងៃទី១៦ ខែកុម្ភៈ ឆ្នាំ២០២៤ យោងតាម US News បានឱ្យដឹងថា ក្រុមហ៊ុន Stellantis និង Renault របស់អឺរ៉ុបកំពុងព្យាយាមអភិវឌ្ឍរថយន្ត EV ឱ្យមានតម្លៃសមរម្យជាងមុន ខណៈដែលក្រុមហ៊ុនយក្សរបស់សហរដ្ឋអាមេរិក General Motors និង Ford ក៏កំពុងខិតខំកាត់បន្ថយថ្លៃដើមនៃរថយន្តអគ្គិសនីរបស់ខ្លួនផងដែរ។

Luca de Meo នាយកប្រតិបត្តិនៃក្រុមហ៊ុន Renault បាននិយាយថា មូលហេតុនៃការកាត់បន្ថយតម្លៃគឺដោយសារកំណើននៃការលក់រថយន្តអគ្គិសនីរបស់អឺរ៉ុប និងអាមេរិកធ្លាក់ចុះខ្លាំង។ Luca de Meo ក៏បានបន្តទៀតថា ការកាត់បន្ថយតម្លៃរថយន្តនឹងកាន់តែងាយស្រួលជាមួយរថយន្តតូចៗ ដោយសារតែក្រុមហ៊ុននានាអាចកាត់បន្ថយទំហំនៃកញ្ចប់ថ្ម ដែលមានសារៈសំខាន់ប្រហែល ៤០% នៃតម្លៃរថយន្តអគ្គិសនី។ ជាមួយគ្នានេះដែរ ក្រុមហ៊ុន Ford ក៏កំពុងវាយតម្លៃយុទ្ធសាស្ត្រថ្មរបស់វា និងរៀបចំការរចនារថយន្តអគ្គិសនីឱ្យមានតម្លៃទាប ដើម្បីអាចប្រកួតប្រជែងជាមួយ BYD។

ទោះជាយ៉ាងណា ទាំងក្រុមហ៊ុនផលិតរថយន្តអាមេរិក និងអឺរ៉ុបបច្ចុប្បន្នកំពុងស្ថិតក្រោមសម្ពាធពីដៃគូប្រកួតប្រជែងរបស់ចិន។ ការលេចឡើងនៃរថយន្តអគ្គិសនីរបស់ចិនតម្លៃទាប បានជះឥទ្ធិពលដ៏ខ្លាំងក្លាលើកិច្ចខិតខំប្រឹងប្រែងរបស់ម៉ាកយីហោអឺរ៉ុបក្នុងការអភិវឌ្ឍន៍ផលិតផលដែលមានតម្លៃសមរម្យជាងមុន។ BYD កំពុងពន្លឿនការនាំចេញរថយន្តទៅកាន់អឺរ៉ុប និងតំបន់ផ្សេងទៀត ខណៈពេលដែលក្រុមហ៊ុនផលិតរថយន្តអាមេរិកមានការព្រួយបារម្ភថាក្រុមហ៊ុននេះនឹងបង្កើតរោងចក្រនៅក្នុងប្រទេសម៉ិកស៊ិក ដើម្បីនាំយករថយន្តអគ្គិសនីទៅកាន់ទីផ្សារអាមេរិក។

គួរបញ្ជាក់ដែថា ក្រុមហ៊ុន Ford និង GM កំពុងប្រឈមមុខនឹងសម្ពាធពីអ្នកវិនិយោគនៅពេលចំណាយលើរថយន្តអគ្គិសនី។ ក្រុមហ៊ុន Ford ប៉ាន់ប្រមាណការខាតបង់ពី ៥ ទៅ ៥.៥ ពាន់លានដុល្លារអាមេរិកនៅឆ្នាំនេះនៅលើខ្សែរថយន្ត។ ទន្ទឹមនឹងនេះ នៅក្នុងខែតុលា ឆ្នាំ ២០២៣ ម៉ាករង Citroen របស់ក្រុមហ៊ុនអឺរ៉ុប បានណែនាំរថយន្ត SUV អគ្គិសនីថ្មី e-C3 ដែលជាម៉ូដែលតម្លៃទាបចាប់ពី ២៥,១០០ ដុល្លារអាមេរិក ផ្តោតលើដៃគូប្រកួតប្រជែងរបស់ចិន ប៉ុន្តែទោះជាយ៉ាងណាម៉ូដែលរថយន្តតម្លៃទាបនេះ នៅតែមានតម្លៃខ្ពស់គួរសមបើធៀបនឹងរថយន្តចិន៕