ពិធីករប្រចាំទូរទស្សន៍បាយ័នលោក ជា វណ្ណារិទ្ធ មិនត្រឹមតែជាអ្នកសិល្បៈមានឈ្មោះបោះសំឡេងប៉ុណ្ណោះទេប៉ុន្តែ បានធ្វើឱ្យអ្នកក្នុងចង្កោមសិល្បៈមហាជនកោតសរសើរពីទំនួលខុសត្រូវ ភាពសាមញ្ញារបស់លោកទោះស្ថិតនៅចំណុចណានៅតែឆ្លៀតជួយការងារភរិយា ដឹកជញ្ជូនអីវ៉ាន់។ ឃើញដូចនេះបានធ្វើឱ្យកវីនិពន្ធ សុខ ជំនោរ និងតារាចម្រៀងល្បីឈ្មោះ អ៊ីវ៉ា ចេញមកសរសើរតារាប្រុសរូបនេះចំៗតែម្តង។
នៅលើបណ្តាញសង្គមរបស់លោក សុខ ជំនោរ ថ្ងៃទី២១ ខែមីនា ឆ្នាំ២០២៤ នេះបានលើកឡើងថា «គំរូដ៏ប្រពៃ ស័ក្តិសមដែលអ្នកគាំទ្រគាត់ អាចហៅគាត់ថា idol ព្រោះភាពជាគំរូត្រូវតែជាសកម្មភាពដែលគួរឱ្យសរសើរនិងយកតម្រាប់ មិនត្រឹមតែភាពឆើតឆាយលើឆាក ។ តារារះក្នុងភាពថ្លៃថ្នូរ»។
ងាកទៅកាន់តារាចម្រៀងល្បីឈ្មោះប្រចាំផលិតកម្មសាន់ដេ កញ្ញា អ៊ីវ៉ា វិញ បានលើកឡើងដូច្នេះថា «ភាពអស្ចារ្យរបស់មនុស្ស ទោះបី ស្ថិតក្នុងមុខមាត់ប៉ុណ្ណា ឋានៈអ្វី មានលុយ មានការងារមុខរបរល្អប៉ុណ្ណា ក៏នៅតែខំប្រឹង ឧស្សាហ៍ ព្យាយាម ធ្វើនេះធ្វើនោះនៅមិនចេះស្ងៀម នេះគេហៅថាមនុស្សដែលពូកែនិងមានទំនួលខុសត្រូវខ្ពស់។ ខ្ញុំតែងតែលួចសរសើរគាត់»។
មិនតែលោក សុខ ជំនោរ និងកញ្ញា អ៊ីវ៉ា ប៉ុណ្ណោះទេដែលបានកោតសរសើរទៅកាន់ពិធីករ ជា វណ្ណារិទ្ធ សិល្បករ សិល្បការិនី ទស្សនិកជនជាច្រើន ក៏បានចូលទៅកោតសរសើរលោកដូចគ្នាជាបុរសគំរូ។
តារាសម្តែង និងជាពិធិករ ជា វណ្ណារិទ្ធ និងអ្នកនាង សុភាព ម៉ូល្យ៉ា បានរៀបអាពាហ៍ពិពាហ៍កាលពីថ្ងៃទី១៨ ខែមករា ឆ្នាំ២០១៣ ហើយបច្ចុប្បន្នអ្នកទាំងពីរមានកូនប្រុស២នាក់។ ក្រៅពីបំពេញការងារសិល្បៈលោកតែងតែឆ្លៀតជួយការងារភរិយា ថែមទាំងខំប្រឹងរកស៊ីយ៉ាងខ្លាំងទោះបីជាពាក់កណ្តាលយប់ហើយក្តីនៅតែឆ្លាក់បន្តោងសោរជូនទៅកាន់អតិថិជនផងដែរ។
ពិធិកររូបនេះតែងតែផ្តល់ភាពកក់ក្តៅនៅក្នុងគ្រួសារមើលថែទាំកូនៗ ភរិយា រស់នៅជាមួយគ្នាយ៉ាងមានសុភមង្គលពុំដែលមានរឿងអាស្រូវល្អក់កករណាមួយឡើយ៕