បេក្ខជនលេចធ្លោមួយរូបនៅក្នុងកម្មវិធី The Voice Cambodia រដូវកាលទី៣ នាង សម្បតិ្ត កូនក្រុមរបស់គ្រូបង្វឹក ណុប បាយ៉ារិទ្ធិ បានលេចមុខចូលរួមប្រកួតក្នុងកម្មវិធី Road 2thestar រដូលកាលទី៣ បន្ទាប់ពីបរាជ័យការប្រកួតមុន។ ការចូលប្រកួតម្តងទៀតនេះបានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងទៅលើ នាង សម្បត្តិ ខណៈបេក្ខជនរូបនេះបានទម្លាយខ្ទេចគ្មានសល់ពីការសម្រេចចិត្តរបស់គេចូលរួមប្រកួតលើកនេះ។
នៅយប់ថ្ងៃទី២០ ខែមីនា ឆ្នាំ២០២៤ កម្មវិធីប្រកួត Road 2thestar ដែលមានគណៈកម្មការ លោក នីកូ ភីសេន និងកញ្ញា ស៊ីន យូប៊ីន បានចាប់ផ្តើមចាក់ផ្សាយជាផ្លូវការហើយដោយមានបេក្ខជនចូលរួមជាច្រើនមានទាំងអ្នកជោគជ័យនិងបរាជ័យ។ រដូវកាលទី៣ នៃកម្មវិធីនេះអ្នកគាំទ្រក៏បានចាប់អារម្មណ៍ទៅលើបេក្ខជន នាង សម្បត្តិ ដូចគ្នាដោយសារតែរូបគេគឺជាបេក្ខជនលេចធ្លោម្នាក់នៅក្នុងការប្រកួត The Voice Cambodia រដូវកាលទី៣ ជាកូនក្រុមរបស់គ្រូបង្វឹក ណុប បាយ៉ារិទ្ធិ។
ការប្រកួត Road 2 the star វគ្គ First Gate នាង សម្បត្តិ បានប្រកួតក្នុងវិញ្ញាសាច្រៀង ដោយជ្រើសរើសបទចម្រៀងមានចំណងជើងថា «ចង់ប្រាប់ថា I love you » សំនៀងដើមរបស់ ម៉ូថេ ។ ការចូលរួមប្រកួតរបស់ នាង សម្បត្តិ ក៏បានធ្វើឱ្យគណៈកម្មការ នីកូ ចាប់អារម្មណ៍ដូចគ្នាដោយសារតែគេជាតារាចម្រៀងស្រាប់ហើយថែមទាំងអាចនិពន្ធបទខ្លួនឯងបានទៀត មានទាំងហ្វេន មានទាំងបទចម្រៀងផ្ទាល់ខ្លួនល្បី បែរជាមកប្រកួត។
នាង សម្បត្តិ បានឆ្លើយតបថា ការសម្រេចចិត្តបោះជំហានចូលក្នុងកម្មវិធី Road 2 the star នេះគឺលោកចង់ស្វែងរកខ្លួនឯងបន្ថែមទៀត ដោយរាល់ថ្ងៃនេះរូបគេចេះច្រើនទៅលើការច្រៀង ប៉ុន្តែការសម្តែង ដើរម៉ូត និងចំណុចជាច្រើនផ្សេងៗគេនៅមិនទាន់ចេះឡើយ។ 
ជាមួយគ្នានេះដែរ គណៈកម្មការ នីកូ ក៏បានលើកឡើងដែរថា ប្រសិនជា សម្បត្តិ អាចឆ្លងផុត លោកនឹងបង្ហាញថាភាពជាតារាមិនត្រឹមមានតែសំឡេងមួយមុខប៉ុណ្ណោះទេប៉ុន្តែមានចំណុចផ្សេងទៀត។ ជាលទ្ធផល នាង សម្បត្តិ អាចឆ្លងផុតវគ្គនេះទទួលបានឱកាសបន្តទៅវគ្គក្រោយបាន៕
