មេដឹកនាំកំពូលកូរ៉េខាងជើង លោក Kim Jong Un កាលពីថ្ងៃទី២៩ ខែមីនា ឆ្នាំ២០២៦ បានត្រួតពិនិត្យមើលការសាកល្បងកម្លាំងមីស៊ីលប្រភេទថ្មីមានសមត្ថភាពបា.ញ់ឆ្ងាយរហូតដល់ទឹកដីអាមេរិក ដែលនេះជាផែនការពង្រឹងយុទ្ធសាស្ត្ររយៈពេល៥ឆ្នាំរបស់ប្រទេសកូរ៉េខាងជើង និងត្រូវបានចាត់ទុកជាការធ្វើឱ្យប្រសើរឡើងនូវសមត្ថភាពការវាយប្រ.ហារ ។ ប៉ុន្តែគ្មានសេចក្តីរាយការណ៍ពីពេលវេលា និងទីតាំងច្បាស់លាស់នៃការសាកល្បងកម្លាំងមីស៊ីលថ្មីទេ ។

សារព័ត៌មានកណ្តាលកូរ៉េ (KCNA) រាយការណ៍ថា មេដឹកនាំកំពូលកូរ៉េខាងជើង លោក Kim Jong Un បានចុះពិនិត្យមើលការសាកល្បងកម្លាំងមីស៊ីលថ្មីមានកម្លាំងខ្លាំងបង្កើតឡើងដោយសម្ភារៈកាបូន ។ មីស៊ីលថ្មីនេះត្រូវបានផលិតឡើងសម្រាប់ប្រើប្រាស់ជាមួយការបាញ់មីស៊ីលឆ្លងទ្វីប (Hwasong-20) ដែលកូរ៉េខាងជើងកំពុងតែអភិវឌ្ឍន៍ ។

ជាមួយគ្នានេះ មេដឹកនាំកូរ៉េខាងជើង ក៏បានចុះពិនិត្យមើលការសាកល្បងប្រព័ន្ធការពាររថក្រោះផងដែរ ដែលអាចស្ទាក់ចាប់អាវុធបាញ់រថក្រោះពីទិសដៅផ្សេងគ្នា ហើយការសាកល្បងប្រព័ន្ធការពាររថក្រោះសម្រេចបានជោគជ័យ១០០% ។

ការសាកល្បងកម្លាំងមីស៊ីលថ្មី គឺជាផ្នែកមួយនៃផែនការអភិវឌ្ឍវិស័យការពារជាតិរយៈពេល៥ឆ្នាំ ក្នុងគោលបំណងពង្រឹងសមត្ថភាពជាបន្តបន្ទាប់នៃការវាយប្រហារជាយុទ្ធសាស្ត្រ ខណៈលោក Kim Jong Un ថា សមត្ថភាពកងទ័ពកូរ៉េខាងជើងពេលនេះ បានឈានដល់ការផ្លាស់ប្តូរដ៏សំខាន់មួយក្នុងការបង្កើតកម្លាំងយុទ្ធសាស្ត្រ ។ មីស៊ីលថ្មីអាចបង្កើតកម្លាំងរុញច្រានអតិបរមាបាន២,៥០០គីឡូញូតុន (Kilonewtons) និងជាការសាកល្បងលើកដំបូង បើគិតតាំងពីខែកញ្ញា ឆ្នាំ២០២៥ ដែលពេលនោះ សមត្ថភាពបាញ់ម៉ាស៊ីនមានចម្ងាយត្រឹមតែ១,៩៧១គីឡូញូតុន ។

ទោះយ៉ាងណា អ្នកជំនាញបរទេសថា កូរ៉េខាងខាងជើងនៅតែប្រឈមនឹងឧបសគ្គផ្នែកបច្ចេកវិទ្យាក្នុងការផលិតមីស៊ីលបាញ់ចម្ងាយឆ្ងាយពិតប្រាកដ ដូចជា ៖ ធ្វើឱ្យក្បាលមីស៊ីលធន់នឹងស្ថានភាពដ៏អាក្រក់ពេលស្ថិតនៅលើអាកាស ខណៈអ្នកជំនាញខ្លះជំទាស់នឹងការលើកឡើងនេះថា កូរ៉េខាងជើងបានអភិវឌ្ឍន៍កម្មវិធីនុយក្លេអ៊ែរ និងមីស៊ីលជាច្រើនឆ្នាំមកហើយ ។

គួរបញ្ជាក់ថា ការសាកល្បងកម្លាំងមីស៊ីលបានកើតឡើងមិនប៉ុន្មានថ្ងៃ បន្ទាប់ពីមេដឹកនាំកំពូលកូរ៉េខាងជើងថ្លែងសុន្ទរកថាទៅកាន់រដ្ឋសភា ដោយសន្យាធ្វើឱ្យកូរ៉េខាងជើងក្លាយជាប្រទេសមហាអំណាចនុយក្លេអ៊ែរលើពិភពលោក និងចោទប្រកាន់អាមេរិកកំពុងតែឈ្លានពានប្រទេសដទៃ (​ប្រទេសនៅមជ្ឈិមបូព៌ា) ៕

កាលពីវេលាម៉ោង៦ល្ងាច ថ្ងៃទី២៨ ខែមីនា ឆ្នាំ២០២៦ ខ្យល់ព្យុះដ៏កំណា.ចបានវាយប្រ.ហារខេត្តស៊ីសាកេត និងខេត្តបឹងកាន ប្រទេសថៃ បណ្តាលឱ្យខូចខាតផ្លូវ បង្គោលភ្លើង ផលដំណាំ ផ្ទះសម្បែង និងអគារជាច្រើន ហើយអ្វីគួរឱ្យកត់សម្គាល់ គឺខ្លោងទ្វារតាមផ្លូវដែលដាក់តាំងព្រះឆាយាលក្ខណ៍ព្រះមហាក្សត្រថៃនៅខេត្តស៊ីសាកេត បានបាក់ដួលរលំ ។ បន្ទាប់ពីខ្យល់ព្យុះស្ងប់ស្ងាត់ អាជ្ញាធរក៏ចុះមកពិនិត្យមើលតំបន់រងផលប៉ះពាល់វាយតម្លៃការខូចខាត និងផ្តាំផ្ញើពលរដ្ឋបង្កើនការប្រុងប្រយ័ត្ន ពីព្រោះខ្យល់ព្យុះនឹងវាយប្រ.ហារប្រទេសថៃបន្តបន្ទាប់ទៀត ។

តាមការចុះផ្សាយរបស់សារព័ត៌មាន Khaosod កាលពីថ្ងៃទី២៨ ខែមីនា ខ្យល់ព្យុះរដូវក្តៅបានវាយប្រហារយ៉ាងខ្លាំងមកលើស្រុកឃុខាន់ ខេត្តស៊ីសាកេត បណ្តាលឱ្យផ្លូវ ផ្ទះសម្បែងពលរដ្ឋ និងអគារផ្សេងៗខូចខាតយ៉ាងខ្លាំង ជាពិសេស នៅមុខផ្សារទីរួមស្រុកដែលជាទីប្រជុំជន ។ អ្វីគួរឱ្យភ្ញាក់ផ្អើលបំផុត គឺខ្លោងទ្វារតាមផ្លូវដែលដាក់តាំងព្រះឆាយាលក្ខណ៍ព្រះមហាក្សត្រថៃបានដួលរលំបែកបាក់ភ្លាមៗ ដែលធ្វើឱ្យពលរដ្ឋកំពុងដើរទិញអីវ៉ាន់ក្នុងផ្សារភ្ញាក់ផ្អើលកើតចលាចលយ៉ាងខ្លាំងរត់ទៅកន្លែងសុវត្ថិភាព ខណៈអាជីវករលក់ដូរប្រមូលអីវ៉ាន់ទុកដាក់យ៉ាងរហ័សដើម្បីកុំឱ្យខូចខាតច្រើនជាងនេះ ។

អភិបាលស្រុកឃុខាន់ លោក សុវណ្ណ ណេតនេទិគុន បានឱ្យកងកម្លាំងស្រុកចុះពិនិត្យមើលការខូចខាត និងជួយសង្គ្រោះអ្នករងផលប៉ះពាល់ជាបន្ទាន់ ។ តាមការត្រួតពិនិត្យបឋម គឺតំបន់ជាច្រើនខូចខាតដោយសារខ្យល់ព្យុះ រួមទាំងខូចខាតផ្ទះ ហាងលក់ដូរ អគារ បង្គោលភ្លើង និងផ្ទាំងផ្សព្វផ្សាយពាណិជ្ជកម្មជាច្រើនកន្លែង ហើយកងកម្លាំងស្រុកនឹងវាយតម្លៃការខូចខាតលម្អិតឡើងវិញដើម្បីការពារជីវិតពលរដ្ឋ និងការខូចខាតទ្រព្យសម្បត្តិដោយសារសំណង់មិនរឹងមាំ ។

គ្រោះធម្មជាតិបណ្តាលឱ្យពលរដ្ឋថៃម្នាក់ស្លាប់ពេលកំពុងដេកឈឺក្នុងផ្ទះ ប៉ុន្តែគ្មានមនុស្សរងរបួស និងខូចខាតយានជំនិះទេ ។ សាលាស្រុកឃុខាន់ បានចេញសេចក្តីប្រកាសទៅកាន់ឃុំទាំងអស់ពន្លឿនការត្រួតពិនិត្យការខូចខាតបន្ថែមយ៉ាងលម្អិត និងរាយការណ៍មកមជ្ឈមណ្ឌលបញ្ជាការស្រុកដើម្បីជួយសង្គ្រោះពលរដ្ឋរងផលប៉ះពាល់ ដូចជា ៖ ជួសជុលផ្ទះ ផ្តល់ប្រាក់សំណងខូចខាត និងស្វែងរកជម្រកបណ្តោះអាសន្នករណីផ្ទះខូចខាតខ្លាំងដោយសារខ្យល់ព្យុះ ។

ជាមួយគ្នានេះ អាជ្ញាធរប្រាប់ឱ្យពលរដ្ឋបង្កើនការប្រុងប្រយ័ត្នឱ្យបានខ្ពស់ ដោយសារប្រទេសថៃនឹងរងការវាយប្រហារពីខ្យល់ព្យុះជាបន្តបន្ទាប់ទៀត ជាពិសេស ពេលផ្លាស់ប្តូររដូវកាល តែងតែមានខ្យល់កន្ត្រាក់ ផ្គររន្ទះ និងធ្លាក់ទឹកកកនៅតំបន់ខ្លះ ។ អាជ្ញាធរក៏បានណែនាំពលរដ្ឋពិនិត្យមើលតើផ្ទះសាងសង់រឹងមាំដែរឬទេ និងចៀសវាងនៅក្បែរសំណង់អគារដែលកំពុងសាងសង់ ។

ចំណែកនៅស្រុកជាច្រើនក្នុងខេត្តបឹងកាន កាលពីល្ងាចថ្ងៃទី២៨ ខែមីនា ក៏រងការវាយប្រហារពីខ្យល់ព្យុះកំណាចដែរ ថែមទាំងមានភ្លៀងធ្លាក់លាយឡំជាមួយទឹកកកប្រមាណ១៥នាទី បណ្តាលឱ្យផ្ទះ ផលដំណាំ ដើមឈើ និងបង្គោលភ្លើងខូចខាតយ៉ាងច្រើន ។ ពលរដ្ឋប្រាប់ថា ពួកគេពុំធ្លាប់ជួបប្រទះខ្យល់ព្យុះខ្លាំងក្លាបែបនេះពីមុនទេ នៅឆ្នាំ២០២៦ ប្រទេសថៃមានខ្យល់ព្យុះធ្ងន់ធ្ងរបំផុតពុំធ្លាប់កើតឡើង ៕

នារសៀលថ្ងៃទី៣០ ខែមីនា ឆ្នាំ២០២៦ កងទ័ពថៃភូមិភាគ២ បានស្នើសុំការសហការពីពលរដ្ឋទាំងអស់កុំថតរូបភាព និងចែកចាយពីការចល័តសព្វាវុ.ធរបស់កងទ័ពដាច់ខាត ក្រោមហេតុផលដើម្បីសុវត្ថិភាពកងទ័ព និងពលរដ្ឋគ្រប់រូប ។ ក្រៅពីនេះ កងទ័ពថៃបានប្រកាសអនុវត្តតាមគោលការណ៍ «OPSEC» គឺការពារខ្លួន និងឱ្យពលរដ្ឋអនុវត្តគោលការណ៍នេះដែរ មិនត្រូវចែកចាយរូបភាពការចល័តកម្លាំងទ័ព ។

តាមការបង្ហោះក្នុងហ្វេសប៊ុកផេករបស់កងទ័ពថៃភូមិភាគ២ នាវេលាម៉ោងជាង១រសៀល ថ្ងៃទី៣០ ខែមីនា បញ្ជាក់ថា កងទ័ពថៃស្នើសុំការសហការពីពលរដ្ឋកុំថតរូបភាព និងផ្សព្វផ្សាយពីការចល័តសព្វាវុធរបស់កងទ័ពក្នុងបណ្តាញសង្គម ដើម្បីសុវត្ថិភាពកងទ័ព និងសន្តិសុខជាតិ ។ កងទ័ពថៃប្រកាន់យកនូវគោលការណ៍ «OPSEC» គឺការពារជីវិតកងទ័ព! បើពលរដ្ឋឃើញការចល័តកម្លាំង ពុំគួរថតរូបភាព ពលរដ្ឋដឹងព័ត៌មានបាន ប៉ុន្តែហាមចែកចាយ ។

កន្លងមក មជ្ឈមណ្ឌលទំនាក់ទំនងសាធារណៈនៃកងទ័ពថៃភូមិភាគទី២៨ បានលើកឡើងពីគោលការណ៍ «OPSEC» ថា ពលរដ្ឋគ្រប់លំដាប់ថ្នាក់ត្រូវតែគោរពគោលការណ៍ «OPSEC» មកពីពាក្យ «Operations Security» យ៉ាងម៉ឺងម៉ាត់ ។ ពលរដ្ឋមិនត្រូវបង្ហាញព័ត៌មានសព្វាវុធកងទ័ព, ផែនការកងទ័ព, ការអនុវត្ត និងចល័តកម្លាំង ព្រមទាំងហាមថតរូបភាពទីតាំង GPS ឬរូបភាពបង្ហាញពីកន្លែងដាក់សព្វាវុធ ។

ទោះជាព័ត៌មានមួយចំនួនមិនមែនជារឿងសម្ងាត់ ប៉ុន្តែប្រសិនបើរួមបញ្ចូលវាជាមួយព័ត៌មានផ្សេងទៀត វាអាចក្លាយជាទិដ្ឋភាពរួមនៃយុទ្ធសាស្ត្រដែលសត្រូវអាចប្រើប្រាស់ដើម្បីចរចា ឬវាយប្រហារភ្លាមៗ ។ នេះជាមូលហេតុដែលកងទ័ពនៅទូទាំងពិភពលោក រួមទាំងកងទ័ពថៃ ផ្តល់ភាពសំខាន់បំផុតចំពោះគោលការណ៍ «OPSEC» និងជាតួនាទីរបស់គ្រប់គ្នាទាំងកងទ័ព និងពលរដ្ឋត្រូវការពារប្រទេសលើសង្គ្រាមព័ត៌មាន ។

គួរបញ្ជាក់ថា កាលពីថ្ងៃទី២៩ ខែមីនា ថៃយកលើកឡើងពីហេតុផលមិនសមទំនងថា ការដាក់ទូរកុងទឺន័រ និងបន្លាលួសនៅតាមព្រំដែនដើម្បីកាត់បន្ថយជម្លោះ ក្រោយកម្ពុជាដឹកនាំមន្ត្រីទូតអន្តរជាតិមកពីច្រើនប្រទេសទៅពិនិត្យមើលផ្ទាល់ភ្នែកលើទីតាំងដែលកងទ័ពថៃដាក់ទូរកុងទឺន័រ និងរាយបន្លាលួសព័ទ្ធយកដីកម្ពុជាដោយខុសច្បាប់នៅតំបន់ថ្មដា ។ អ្នកនាំពាក្យកងទ័ពថៃយកលេសថា ការធ្វើបែបនេះក្នុងគោលបំណងកាត់បន្ថយភាពតានតឹង និងទប់ស្កាត់ជម្លោះ មិនមែនជាការរំលោភអធិបតេយ្យកម្ពុជាទេ ៕