ការធ្វើដំណើរលើយន្តហោះ គឺជាបទពិសោធន៍ដ៏អស្ចារ្យមួយក្នុងជីវិត។ សម្រាប់អ្នកដែលមិនទាន់បានជិះ ឬអ្នកដែលទើបតែជិះយន្តហោះលើកដំបូង ដាច់ខាតគួរចៀសវាងកុំធ្វើរឿងមួយចំនួននេះ ប្រសិនបើអ្នកមិនចង់ជួបរឿងស៊យ និងអាម៉ាស។ ដូចនេះតើគួរប្រុងប្រៀបខ្លួនបែបណា ដើម្បីឱ្យពេលវេលាពិសេសនេះពោរពេញទៅដោយអត្ថន័យល្អ?

១.កុំដោះស្រោមជើងចេញពេលនៅក្នុងយន្តហោះ៖ ការដោះស្រោមជើងចេញពេលស្ថិតក្នុងយន្តហោះ គឺជារឿងមួយដែលអ្នកមិនគួរធ្វើឡើយ អ្នកខ្លះមិនសូវជាទម្លាប់ក្នុងការពាក់ស្រោមជើងទេ ប៉ុន្តែទោះជាយ៉ាងណា យើងក៏មិនគួរដោះចេញ នៅលើយន្តហោះស្របពេលមានមនុស្សជាច្រើនទៀតធ្វើដំណើរជាមួយឡើយ ព្រោះវាអាចបង្កឱ្យមានក្លិនមិនល្អ ឬទើសភ្នែកអ្នកដទៃជាដើម។

២.កុំរើខ្លាំងពេក ឬនៅមិនស្ងៀមពេលកំពុងជិះយន្តហោះ៖ ពេលណាដែលអ្នករើចុះឡើង វាពិតជាធ្វើឱ្យអ្នកនៅជិតយើងមិនស្រណុកចិត្តដូចគ្នា ដូច្នេះអ្នកគួររក្សាសណ្ដាប់ធ្នាប់ និងស្ងៀមស្ងាត់ជាជាងធ្វើឱ្យអ្នកជិតខាងទើសទាល់។

៣.កុំលេង ឬសារ៉េកៅអីចុះឡើងអំឡុងពេលញ៉ាំអាហារ៖ វាក៏ជារឿងដ៏សំខាន់មួយ ដែលអ្នកគួរតែដឹង ត្បិតការសារ៉េកៅអី វាជារឿងធម្មតា ប៉ុន្តែលើកលែងអំឡុងពេលញ៉ាំអាហារ គួរកុំលេងអី ព្រោះវាអាចប៉ះពាល់ដល់អ្នកដំណើរផ្សេងទៀតដែលអង្គុយជិតយើង។

៤.កុំរពឹសដៃចុចប៊ូតុងហៅអ្នកបម្រើការលើយន្តហោះពេលត្រូវការអ្វីមួយ៖ រឿងសំខាន់ចម្បងរបស់អ្នកបម្រើការលើយន្តហោះ គឺរក្សាសុវត្ថិភាពអ្នក មិនមែនបានន័យថាត្រូវបំពេញរាល់តម្រូវការគ្រប់យ៉ាងរបស់អ្នកដំណើរឡើយ។ បើក្នុងករណីអ្នកត្រូវការអ្វីមួយ អ្នកគួរតែងើបឈរ ឬលើកដៃជាសញ្ញាជាជាងការចុចប៊ូតុង ដើម្បីចៀសវាងការរំខាន។

៥.កុំយកអាហារណាដែលមានក្លិនខ្លាំងមកញ៉ាំលើយន្តហោះ៖ ទោះបីវាជាសិទ្ធិបុគ្គល ប៉ុន្តែគួរណាមានការគិតគូរដល់អ្នករួមដំណើររបស់យើងដែលនៅជិតៗគ្នា ព្រោះអាហារមួយចំនួន វាពិតជាមានក្លិនខ្លាំងនៅពេលដែលអ្នកដកចេញមក តួយ៉ាងដូចជា សាំងវ៉ិចត្រីធូណា និងចំណីដែលមានខ្ទឹមបារាំងជាដើម…។

៦.កុំនៅសំងំស្ងៀម បើមានអារម្មណ៍មិនស្រួលក្នុងខ្លួន ឬឈឺ៖ ប្រសិនអ្នកមានអារម្មណ៍ដូចជាមិនស្រួលត្រង់ណា អ្នកគួរលើកដៃជាសញ្ញាប្រាប់ទៅក្រុមការងារលើយន្តហោះឱ្យជួយ មុនពេលអាការៈរបស់អ្នកកាន់តែធ្ងន់។

៧.កុំព្រងើយនឹងការប្រកាសពីការបង្ការគ្រោះអាសន្ន៖ វាពិតជារឿងសំខាន់ណាស់គ្រប់ពេលអ្នកជិះយន្តហោះ អាចនិយាយបានថា ស្ដាប់ទៅវាគួរឱ្យធុញបន្តិចមែន ប៉ុន្តែវាក៏សំខាន់ណាស់ដែរ សម្រាប់អ្នកដំណើរទាំងអស់ក្នុងការដឹងព័ត៌មានផ្សេងៗនៃការធ្វើដំណើររបស់យើង និងអាចប្រុងប្រយ័ត្នបានមុន៕

បរទេស៖ ការរញ្ជួយដីដ៏ខ្លាំងក្លាមួយកម្រិត ៧.៥ រ៉ិចទ័របានកើតឡើងនៅព្រឹកនេះថ្ងៃទី៣ ខែមេសា ឆ្នាំ២០២៤ នៅឆ្នេរសមុទ្រនៃកោះតៃវ៉ាន់ បណ្តាលឱ្យអគារនានាក្នុងទីក្រុងភាគខាងត្បូងដួលរលំបាក់បែក និងបង្កើតជារលកយក្សស៊ូណាមិ ដែលនឹងបោកបក់មកលើកោះជប៉ុនក្នុងពេលឆាប់ៗ ធ្វើឱ្យប្រទេសជប៉ុន និងហ្វីលីពីនបានចេញសេចក្តីប្រកាសជាបន្ទាន់អំពីរលកយក្សស៊ូណាមិ។

បើយោងតាម ABC News បានឱ្យដឹងទៀតថា កាលពីពេលថ្មីៗនេះ ការរញ្ជួយដីបានកើតឡើងនៅម៉ោង ៧:៥៨ នាទីព្រឹកថ្ងៃទី៣ ខែមេសា ឆ្នាំ២០២៤ ដោយចំណុចកណ្តាលស្ថិតនៅភាគខាងកើតនៃកោះតៃវ៉ាន់ ក្នុងជម្រៅ ១៥.៥ គីឡូម៉ែត្រ។ អាជ្ញាធរតៃវ៉ាន់បាននិយាយថា ការរញ្ជួយដីមានកម្រិត ៧.២ រ៉ិចទ័រ ខណៈពេលដែលការស្ទង់មតិភូមិសាស្ត្រអាមេរិកបាននិយាយថា ការរញ្ជួយមានកម្រិត ៧.៥ រ៉ិចទ័រ។

លោក Wu Chien-fu នាយកមជ្ឈមណ្ឌលរញ្ជួយដីតៃវ៉ាន់ បាននិយាយថា នេះគឺជាការរញ្ជួយដីដ៏ខ្លាំងបំផុតនៅលើកោះនេះក្នុងរយៈពេល ២៥ ឆ្នាំចុងក្រោយនេះ បន្ទាប់ពីគ្រោះរញ្ជួយដីកម្រិត ៧.៦ រិចទ័រ ដែលបានសម្លាប់មនុស្ស ២,៤០០ នាក់ក្នុងឆ្នាំ ១៩៩៩ បានកើតឡើងនៅជិតដីគោក ហើយចំណុចកណ្តាលគឺរាក់នៅទូទាំងកោះតៃវ៉ាន់ និងកោះឈូងសមុទ្រ។ លោក Wu បានបន្តទៀតថា តៃវ៉ាន់បានចេញការព្រមានអំពីរលកយក្សស៊ូណាមិ ដោយឱ្យប្រជាជនទូទាំងកោះត្រៀមខ្លួនសម្រាប់គ្រោះដ៏ធំនេះ ប្រព័ន្ធរថភ្លើងក្រោមដីនៅទីក្រុងតៃប៉ិ តាជុង និងកៅសុងត្រូវបានបិទ ហើយការផ្អាកនេះត្រូវបានគេរំពឹងថានឹងមានរយៈពេល ៤០-៦០ នាទី។

មិនយូរប៉ុន្មានបន្ទាប់ពីមានគ្រោះរញ្ជួយដីនៅតៃវ៉ាន់ប្រហែល ១៥ នាទី ប្រទេសជប៉ុនក៏បានចេញសេចក្តីប្រកាសអាសន្នអំពីរលកយក្សស៊ូណាមិ និងបានកត់ត្រារលកកម្ពស់ ៣០ សង់ទីម៉ែត្រនៅលើឆ្នេរសមុទ្រនៃកោះ Yonaguni ភាគខាងត្បូងនៃប្រទេសនេះ។ ទីភ្នាក់ងារឧតុនិយមជប៉ុនក៏បានព្យាករណ៍ផងដែរថា រលកយក្សស៊ូណាមិនឹងមានកម្ពស់រហូតដល់ ៣ ម៉ែត្រដោយវាយប្រហារប្រជុំកោះ Okinawa ភាគខាងត្បូងប្រទេសជប៉ុន ហើយរលកយក្សស៊ូណាមិក៏នឹងកើតឡើងនៅកោះ Miyako និង Yaeyama ផងដែរ។

ប្រទេសហ្វីលីពីន ដែលជាប្រទេសមួយស្ថិតនៅភាគខាងត្បូងនៃកោះតៃវ៉ាន់ ក៏បានចេញសេចក្តីប្រកាសអាសន្នអំពីរលកយក្សស៊ូណាមិផងដែរ ដោយវិទ្យាស្ថានភូគព្ភសាស្ត្រហ្វីលីពីនបាននិយាយថា “ប្រជាជននៅតំបន់ឆ្នេរនៃខេត្តចំនួន ២៣ នឹងត្រូវបានជម្លៀសភ្លាមៗទៅកាន់ទីទួលខ្ពស់ ឬផ្លាស់ទីទៅលើដីបន្ថែមទៀត”៕

ប្រទេសថៃ ៖ ក.ញ្ឆា សេរីបានក្លាយជាប្រធានបទមួយដែលប្រទេសថៃលើកយកមកជជែកគ្នាឡើងវិញ ក្រោយពីលោក Srettha Thavisin នាយករដ្ឋមន្ត្រីថៃ និងជារដ្ឋមន្ត្រីក្រសួងហិរញ្ញវត្ថុ ផ្តល់បទសម្ភាសន៍ពិសេសទៅកាន់សារព័ត៌មាន FRANCE 24 របស់បារាំង ។ លោកនាយករដ្ឋមន្ត្រីបានលើកឡើងអំពីគោលនយោបាយរបស់រដ្ឋាភិបាល ដើម្បីយក ក.ញ្ឆា ដាក់ក្នុងបញ្ជី ថ្នាំញៀ.ន ផងដែរ ។

*សារព័ត៌មាន FRANCE 24 សួរថា បានទទួលព័ត៌មានថា រដ្ឋមន្ត្រីក្រសួងសុខាភិបាលរបស់ថៃនឹងប្រកាសឱ្យកញ្ឆាត្រឡប់មកខុសច្បាប់ម្តងទៀត ប៉ុន្តែវាអាចប៉ះពាល់ដល់សេដកិច្ច តើលោកនាយករដ្ឋមន្ត្រីនឹងកំណត់គោលនយោបាយនេះបែបណា ដើម្បីកុំឱ្យប៉ះពាល់ដល់សេដ្ឋកិច្ច?

លោក Srettha Thavisin នាយករដ្ឋមន្ត្រីឆ្លើយតបថា លោកនឹងយកកញ្ឆាដាក់ក្នុងបញ្ជី ថ្នាំញៀ.ន ព្រោះលោកមិនឯកភាពនឹងការប្រើប្រាស់កញ្ឆាសេរីនាពេលបច្ចុប្បន្នទេ ។ រីឯពាក្យថា ធ្វើឱ្យខូចខាតដល់សេដ្ឋកិច្ចនោះ ស្តាប់ទៅ គឺជាពាក្យធ្ងន់ធ្ងរ ហើយលោកមិនគិតថា វានឹងធ្វើឱ្យប៉ះពាល់ដល់សេដ្ឋកិច្ចទេ ។ ប៉ុន្តែការប្រកាសឱ្យកញ្ឆាស្របច្បាប់ទៅវិញទេ គឺជាការធ្វើឱ្យប៉ះពាល់ដល់សេដ្ឋកិច្ច ហើយរដ្ឋមន្ត្រីក្រសួងសុខាភិបាលថៃប្រកាសបែបនេះត្រឹមត្រូវហើយ ។

*សារព័ត៌មាន FRANCE 24 សួរបន្តថា តើលោកគិតថា អ្នកគ្រប់គ្រងកញ្ឆាគួរតែទទួលទោសតាមច្បាប់ដែរឬទេ? តើប្រទេសថៃមានទោសដាក់ពន្ធនាគារដែរទេ?

លោក Srettha Thavisin ឆ្លើយថា វាអាស្រ័យនៅលើបរិមាណ និងពេលវេលាផ្លាស់ប្តូរ ពីព្រោះនឹងមានពេលវេលាកញ្ឆាខុសច្បាប់, កញ្ឆាស្របច្បាប់ និងកញ្ឆាត្រឡប់មកខុសច្បាប់ ។ ដូច្នេះ យើងត្រូវតែផ្តល់ភាពយុត្តិធម៌ដល់អ្នកគ្រប់គ្រងកញ្ឆាផងដែរ ។

*សារព័ត៌មាន FRANCE 24 សួរបន្តទៀតថា បើកញ្ឆាត្រឡប់ទៅខុសច្បាប់វិញ តើលោកមិនគិតថា វានឹងប៉ះពាល់យ៉ាងខ្លាំងដល់អាជីវកម្មកញ្ឆាធំៗទេឬ?

លោក Srettha Thavisin ឆ្លើយថា លោកមិនគិតថា វាជាអាជីវកម្មធំទេ ហើយលោកគិតថា ផលប៉ះពាល់យ៉ាងខ្លាំង គឺដោយសារធ្វើឱ្យកញ្ឆាស្របច្បាប់ច្រើនជាង ។ វានឹងប៉ះពាល់យ៉ាងខ្លាំងដល់ពលរដ្ឋថៃ ។

លោកនាយករដ្ឋមន្ត្រីបានផ្តល់សម្ភាសន៍ជាមួយសារព័ត៌មានបរទេសពាក់ព័ន្ធនឹងគោលនយោបាយបន្ទាន់ និងគោលនយោបាយសេដ្ឋកិច្ចរបស់រដ្ឋាភិបាល ។ លោកបានថ្លែងពីគោលនយោបាយយកកញ្ឆាដាក់ក្នុងបញ្ជីថ្នាំញៀនថា កន្លងមក ការប្រកាសឱ្យកញ្ឆាស្របច្បាប់នៅប្រទេសថៃ បានធ្វើឱ្យប៉ះពាល់យ៉ាងខ្លាំងដល់ពលរដ្ឋ និងច្រើនជាងផ្តល់លទ្ធផលល្អដល់សេដ្ឋកិច្ច ។

ក្រៅពីនេះ លោកនាយករដ្ឋមន្ត្រី ក៏បានលើកឡើងអំពីប្រធានបទពាក់ព័ន្ធនឹងនយោបាយនៅប្រទេសថៃផងដែរ ពីព្រោះលោកមកពីគណបក្សភឿថៃ តែងតែរងនូវការរិះគន់មួយចំនួន ។ លោកនាយករដ្ឋមន្ត្រីបញ្ជាក់ថា លោកមិនបារម្ភពីអ្វីដែលមិនអាចគ្រប់គ្រងបានទេ ប៉ុន្តែលោកនឹងផ្តល់ភាពសំខាន់ទៅលើអ្វីដែលអាចគ្រប់គ្រងបាន ព្រមទាំងរៀនសូត្រពីកំហុសឆ្គងរបស់រដ្ឋាភិបាលអាណត្តិមុន ។

លោកនាយករដ្ឋមន្ត្រីបន្ថែមថា រដ្ឋាភិបាលអាណត្តិថ្មីមានគោលដៅច្បាស់លាស់ថា យើងនឹងធ្វើឱ្យជីវភាពរស់នៅរបស់ពលរដ្ឋថៃល្អប្រសើរឡើង និងមានទំនុកចិត្តថា អនាគតរបស់ប្រទេសថៃនឹងមានប្រជាធិបតេយ្យកាន់តែខ្លាំង ។ បើមិនដូច្នេះទេ លោកប្រហែលជាមិនមកអង្គុយនៅចំណុចនេះទេ ៕

ដោយសង្កេតឃើញថា បច្ចុប្បន្ននេះនៅទូទាំងពិភពលោក មិនថានៅអាស៊ី ឬអឺរ៉ុបទេ កម្តៅផែនដីបានកើនឡើងឆាប់រហ័សនិងខ្លាំងទៅៗពីមួយឆ្នាំទៅមួយឆ្នាំ។ ហើយបើយោងតាមប្រភពសារព័ត៌មានថៃបានលើកឡើងថា សីតុណ្ហភាពប្រទេសខ្លួនក៏ដូចជាប្រទេសក្បែរខាងរួមទាំងកម្ពុជា នៅក្នុងខែមេសានេះ អាចនឹងឡើងកម្តៅដល់ចន្លោះ ៤៣-៤៥ អង្សាសេ។

ជាមួយគ្នានេះ យោងតាមគេហទំព័រ Charity Digital កាលពីពេលថ្មីៗគឺបានគូសបញ្ជាក់អំពីមូលហេតុចម្បងៗនៃការឡើងកម្តៅផែនដីប្រចាំឆ្នាំ ២០២៤។ តាមការសិក្សាស្រាវជ្រាវបានបង្ហាញថា ការប្រែប្រួលអាកាសធាតុនេះ គឺវាទាក់ទងទៅនឹងការបំភាយកាបូន ការបំផ្លិចបំផ្លាញជីវចម្រុះ សត្វព្រៃ និងព្រៃឈើ ការរលាយដុំទឹកកកតំបន់ប៉ូល ការកើនឡើងកម្រិតទឹកសមុទ្រ និងការដួលរលំនៃចរន្តទឹកសមុទ្រសំខាន់ៗ។

ចាប់តាំងពីពាក់កណ្តាលទសវត្សរ៍ឆ្នាំ ១៨០០ មក មនុស្សគឺជាកត្តាមួយចម្បងក្នុងការបញ្ចេញឧស្ម័នផ្ទះកញ្ចក់(កាបូនឌីអុកស៊ីត) ទៅក្នុងខ្យល់ ភាគច្រើនតាមរយៈការប្រើប្រាស់ប្រេង ឧស្ម័ន និងធ្យូងថ្មសម្រាប់ផ្ទះ រោងចក្រ និងការដឹកជញ្ជូន ក៏ដូចជាតាមរយៈវិធីសាស្រ្តកសិកម្មទំនើប និងការកាប់បំផ្លាញព្រៃឈើជាដើម ដែលជាហេតុបណ្តាលឱ្យសីតុណ្ហភាពកើនឡើង។

ផែនដីបានបំបែកកំណត់ត្រាក្តៅខ្លាំងបំផុតកាលពីឆ្នាំ ២០២៣ ដែលចំពោះសហភាពអឺរ៉ុបបានរកឃើញថាកម្រិត ១.៤៨°C ក្តៅជាងមធ្យមភាគមុនឧស្សាហកម្ម។ សីតុណ្ហភាពពិភពលោកកាន់តែក្តៅក្នុងឆ្នាំ ២០២៣ បាននាំមកនូវព្រឹត្តិការណ៍ និងគ្រោះមហន្តរាយនៅទូទាំងពិភពលោក រួមមាន រលកកម្តៅដ៏សាហាវនៅក្នុងរដូវក្តៅនៃអឌ្ឍគោលខាងជើង ការបំផ្លិចបំផ្លាញដោយភ្លើងឆេះព្រៃនៅក្នុងប្រទេសកាណាដា និងកោះហាវ៉ៃ និងភ្លៀងធ្លាក់ខ្លាំងបំផុតនៅកន្លែងជាច្រើនរួមទាំងប្រទេសកូរ៉េ អាហ្វ្រិកខាងត្បូង និងប្រទេសចិន។

កាលពីឆ្នាំ ២០២៣ នេះទៀតសោត កម្រិតទឹកក្តៅបំផុតក៏បានលេចឡើងនៅក្នុងកំណត់ត្រាមហាសមុទ្រពិភពលោកផងដែរ ដែលជាង ៩០% នៃកម្តៅបានមកពីការឡើងកម្តៅផែនដីដែលជាហេតុបណ្តាលឲ្យឡើងកម្តៅមហាសមុទ្រពិភពលោក។ ម៉្យាងវិញទៀត សីតុណ្ហភាពមហាសមុទ្រគឺជាសូចនាករច្បាស់លាស់ដែលបង្ហាញថាភពផែនដីយើងឡើងកម្តៅពីមួយឆ្នាំទៅមួយឆ្នាំ។ ជាមួយគ្នានោះ វិសាលភាពនៃទឹកកកសមុទ្រនៅក្នុងតំបន់ប៉ូលរបស់ផែនដី គឺធ្លាក់ដល់ទាបបំផុតក្នុងប្រវត្តិសាស្រ្តកាលពីពេលថ្មីៗនេះ។

សម្រាប់ឆ្នាំ ២០២៤នេះ តាមការសិក្សាបានបង្ហាញថា វានឹងបន្ថែមកម្រិតសីតុណ្ហភាពសកលជាមធ្យមលើសពី ១.៥°C លើសកម្រិតមុនឧស្សាហកម្ម ដែលនឹងបង្កគ្រោះថ្នាក់មួយកម្រិតបន្ថែមទៀតដល់មនុស្សជាតិលើពិភពលោកទាំងមូលផងដែរ៕

ប្រទេសចិន ៖ សារព័ត៌មានបរទេសរាយការណ៍ថា ក្នុងអំឡុងពេលភ្ញៀវទេសចរដើរកម្សាន្តនៅឆ្នេរសមុទ្រសុខៗ ស្រាប់តែនារីៗបះសក់ត្រង់ឡើងលើដោយពុំដឹងមូលហេតុ ។ នៅពេលឃើញស្ថានការណ៍មិនស្រួល ពួកគេក៏ប្រញាប់នាំគ្នាឡើងជិះរថយន្តចេញពីឆ្នេរសមុទ្រនេះភ្លាមៗ ព្រោះខ្លាចមានហេតុការណ៍ អាក្រ.ក់ កើតឡើង ។ ប៉ុន្តែអ្នកជំនាញនិយាយថា បើជួបហេតុការណ៍បែបនេះ កុំអាលប្រញាប់រត់ ។

គេហទំព័រ Sohu រាយការណ៍ថា កាលពីឆ្នាំ២០២៣ មានភ្ញៀវទេសចរប្រុស-ស្រីមួយក្រុមបានជិះរថយន្តមកលេងនៅឆ្នេរសមុទ្រទីក្រុង Turpan តំបន់ស្វយ័ត Xinjiang Uyghur ប្រទេសចិន ។ ពេលមកដល់ឆ្នេរនេះ ស្រាប់តែនារីៗបះសក់ឡើងលើ ហើយពួកគេក៏ថតរូបភាពបង្ហោះក្នុងបណ្តាញសង្គម ធ្វើឱ្យអ្នកលេងបណ្តាញសង្គមចែកចាយរូបភាពទាំងនេះជាច្រើន ។

អ្វីដែលគួរឱ្យចម្លែកចិត្តនោះ គឺពួកនាងៗបានបះសក់ឡើងលើក្នុងពេលដំណាលគ្នាពេលឈរនៅទីវាល ។ ហេតុនេះ ពួកនាងក៏សម្រេចចិត្តជិះរថយន្តចេញពីឆ្នេរនេះយ៉ាងប្រញាប់ ប៉ុន្តែបន្ទាប់ពីរថយន្តបើកចេញពីឆ្នេរប្រមាណ៣គីឡូម៉ែត្រ សក់របស់ពួកនាងក៏មានសភាពធម្មតាវិញ ។

ពេលឃើញរូបទាំងនេះ មហាជនណែនាំថា បើកើតហេតុការណ៍បែបនេះ ត្រូវតែប្រញាប់រត់ចេញពីកន្លែងនោះឱ្យបានឆាប់បំផុត ពីព្រោះវាអាចជាសញ្ញាគ្រោះថ្នាក់ប្រាប់ថា នឹងមានរន្ទះបាញ់កើតឡើង ។ ប៉ុន្តែអ្នកជំនាញនិយាយថា ពេលខ្លះ ការរត់គេចមិនមែនជាជម្រើសល្អសម្រាប់អ្នកដែលស្ថិតក្នុងហេតុការណ៍ខាងលើទេ ។

លោក Feng Minxue នាយកមជ្ឈមណ្ឌលការពាររន្ទះបាញ់ប្រចាំខេត្ត Jiangsu លើកឡើងថា ល្បឿនរបស់រន្ទះបាញ់លឿនខ្លាំងណាស់ ហើយការរត់គេច មិនមែនជាវិធីល្អបំផុតទេ ។ ផ្ទុយទៅវិញ វាអាចនឹងជំរុញចរន្តអគ្គិសនីឱ្យកាន់តែខ្លាំងថែមទៀត រហូតដល់មានគ្រោះថ្នាក់បាន ។

ចំណែកវិធីការពារខ្លួនពីរន្ទះបាញ់ រួមមាន ៖ បម្លាស់ទីពីកន្លែងខ្ពស់ភ្លាមៗ ដូចជា ៖ កំពូលភ្នំ, ជម្រាលភ្នំ ឬដំបូលអគារ ។ ក្រៅពីនេះ ត្រូវនៅឆ្ងាយពីកន្លែងល្ហល្ហេវ, កុំដេកលើឥដ្ឋ, កុំជ្រកក្រោមដើមឈើ និងកុំនៅក្នុងរណ្តៅរាក់ ៕

សហរដ្ឋអាមេរិក៖ ក្រុមហ៊ុន Apple បានប្រកាសកាលពីពេលថ្មីៗនេះថា iPhone 6 និង iPhone 6 Plus របស់ខ្លួនលែងប្រើហើយនៅទូទាំងពិភពលោក មានន័យថាជាឧបករណ៍ហួសសម័យ ដោយសារគ្រឿងបន្លាស់របស់ផលិតផលនេះអស់ស្តុក និងមិនមានការបញ្ជាទិញ ឬការជួសជុលទៀតឡើយ ហើយក្រុមហ៊ុនក៏មិនធានាសម្រាប់ផលិតផលនេះទៀតដែរ។

បើយោងតាម MacRumors ដែលបានចុះផ្សាយនៅថ្ងៃទី១ ខែមេសា ឆ្នាំ២០២៤ ក៏បានឱ្យដឹងទៀតថា ក្រុមហ៊ុន Apple បានប្រមូលឧបករណ៍ចាស់ៗមួយចំនួនរបស់ខ្លួន ចូលទៅក្នុងបញ្ជីផលិតផលហួសសម័យ ដោយក្នុងនោះក៏មាន iPad Mini 4, iPhone 6 និង iPhone 6 Plus ផងដែរ។ Apple បាននិយាយថា ផលិតផលណាដែលប្រើអស់រយៈពេល ៧ ឆ្នាំគឺគិតចាប់ពីការចេញលក់រហូតមកដល់ពេលនេះ ត្រូវបានចាត់ទុកថាជាឧបករណ៍ហួសសម័យ។

iPhone 6 និង iPhone 6 Plus បានចេញលក់ដំបូងក្នុងខែកញ្ញា ឆ្នាំ ២០១៤ ជាមួយនឹងមុខងារសំខាន់ៗ រួមមានអេក្រង់ធំជាងម៉ូដែលមុន និងជំនួយ Apple Pay ។ ក្នុងខែកញ្ញា ឆ្នាំ ២០១៦ ផលិតផលនេះត្រូវបានក្រុមហ៊ុនឈប់ផលិតប៉ុន្តែនៅតែអាចរកឃើញបានតាមហាងតូចៗនៅក្នុងបណ្តាប្រទេសមួយចំនួន។ iPhone 6 និង iPhone 6 Plus គឺជាខ្សែទូរស័ព្ទ iPhone ដែលលក់ដាច់បំផុតក្នុងប្រវត្តិសាស្ត្ររបស់ Apple។ យោងតាមទិន្នន័យ ស្មាតហ្វូនទាំងពីរនេះ លក់បានច្រើនជាង ២២០ លានគ្រឿង ចាប់តាំងពីការបង្ហាញខ្លួនរបស់ពួកគេនៅក្នុងខែកញ្ញា ២០១៤។

ខណៈពេលដែលអ្នកប្រើប្រាស់មួយចំនួននៅតែកំពុងប្រើប្រាស់វា អ្នកប្រើប្រាស់ iPhone 6 ភាគច្រើនបានដំឡើងកំណែទៅម៉ូដែលថ្មីជាងនេះតាមពេលវេលា។ ទោះជាយ៉ាងណា iPhone 6 Plus ក៏មិនអាចអាប់ដេតទៅកំណែ iOS ណាមួយដែលខ្ពស់ជាង iOS 12 ចាប់តាំងពីឆ្នាំ ២០១៨ មកដែរ ដោយសារកម្មវិធីមួយចំនួនបានឈប់គាំទ្រកំណែ iOS ចាស់នេះ។ ដូច្នេះហើយ យល់ល្អអ្នកមិនគួរទិញផលិតនេះទៀតទេ ព្រោះវាជាឧបករណ៍ហួសសម័យមិនមានគ្រឿងបន្លាស់ម្រាប់ផ្លាស់ប្តូរ ក៏ដូចជាមិនមានការធានាដូចមុនឡើយ។

គួរបញ្ជាក់ដែរថា ថ្មីៗនេះក្រុមហ៊ុន Apple ក៏បានបន្ថែមស្មាតហ្វូនរបស់ខ្លួនគឺ iPhone 8 និង iPhone 8 Plus ចូលទៅក្នុងបញ្ជីផលិតផលហួសសម័យដែរ ប៉ុន្តែមិនទាន់ផ្លូវការនោះទេ ដូច្នេះឧបករណ៍នេះនៅតែអាចប្រើប្រាស់បានធម្មតា លើកលែងតែ iPhone 6 និង iPhone 6 Plus ដែលគេចាត់ទុកជាផលិតផលហួសសម័យ៕