ប្រជាកសិករថៃកំពុងបង្ហាញការមិនសប្បាយចិត្ត ស្របពេលដែលស្វាយកែវមៀតខ្មែរកំពុងមានទីផ្សារក្នុងប្រទេសថៃ ដែលបណ្តាលឲ្យតម្លៃស្វាយស្រុកថៃមានការធ្លាក់ចុះជាគំហុក។

កាលពីពេលថ្មីៗនេះ យោងតាមការចុះផ្សាយរបស់សារព័ត៌មានថៃ Thai PBS បានរាយការណ៍ថា នារដូវក្តៅនេះជាពេលដែលផ្លែស្វាយថៃលេចចេញជាបណ្តើរៗនៅលើទីផ្សារ។ ទន្ទឹមនឹងនេះក៏មានស្វាយប្រទេសជិតខាងគឺកម្ពុជា ជាពិសេសស្វាយកែវរមៀត ចូលមកក្នុងទីផ្សារប្រទេសថៃផងដែរ ដែលជាហេតុបណ្តាលឲ្យតម្លៃផ្លែស្វាយស្រុកឮថៃធ្លាក់ចុះខ្លាំង។

ប្រភពដដែលបានបញ្ជាក់ទៀតថា តម្លៃផ្លែស្វាយរបស់ស្រុកថៃ ពូជខ្លះទទួលបាន មួយគីឡូក្រាមត្រឹមតែ ២-៣បាតប៉ុណ្ណោះ ខណៈផ្លែស្វាយខ្មែរនៅក្នុងប្រទេសថៃ ១គីឡូក្រាមលក់បានចន្លោះពី ១០ដល់១៥បាត ហើយក៏ជាការពេញនិយមក្នុងចំណោមប្រជាជនថៃចោមរោមទិញស្ទើរគ្រប់ៗគ្នា។ ដូច្នេះហើយទើបប្រជាកសិករថៃសំណូមពរដល់រដ្ឋាភិបាលនិងស្ថាប័ពាក់ព័ន្ធចូលខ្លួនមកដោះស្រាយនិងរកទីផ្សារតម្លៃឲ្យបានសមស្របវិញផងដែរ។

ក្រឡេកមើលផ្លែស្វាយកែវរមៀតខ្មែរវិញ ដូចដែលយើងគ្រប់គ្នាបានជ្រាបមកហើយថា ជាពូជស្វាយដែលមានរសជាតិផ្អែម ឆ្ងាញ់ពិសារ សម្បូរសាច់ហូប ហើយគ្រាន់តែឃើញសំបកក៏ស្រកទឹកមាត់ដែរ។ ម្យ៉ាងវិញទៀតទៀត ស្វាយខ្មែរមួយប្រភេទនេះក៏អាចយកទៅច្នៃធ្វើជាភេសជ្ជៈ បង្អែម ដំណាប់ជាដើម បានយ៉ាងមានឱជារសឈ្ងុយឆ្ងាញ់។

គួរបញ្ជាក់ថា កាលពីពេលថ្មីៗនេះ ការកែច្នៃផ្លែស្វាយយកមកធ្វើជាភេសជ្ជៈផ្សេងៗ ជាពិសេសស្វាយគ្រីម គឺកំពុងក្លាយជាទីពេញនិយមបំផុតក្នុងចំណោមទាំងយុវវ័យនិងប្រជាពលរដ្ឋខ្មែរ។ ជាមួយនឹងគំនិតច្នៃប្រឌិតនេះ គឺពិតជាបានលើកកម្ពស់ទីផ្សារផ្លែឈើក្នុងស្រុកមួយផ្នែក ក៏ដូចជាបានក្លាយជាប្រភពចំណូលដល់កាក់កបដល់ប្រជាកសិករខ្មែរ អ្នកលក់ទាំងក្នុងនិងក្រៅស្រុកផងដែរ៕

ទន្លេមេគង្គ គឺជាទន្លេវែងជាងគេលំដាប់លេខ ១២ នៅក្នុងពិភពលោក។ ទន្លេនេះមានប្រវែងប្រហែល ៤២០០ គីឡូម៉ែត្រ ឆ្លងកាត់ប្រទេសចំនួន ៦ គឺប្រទេសកម្ពុជា ចិន ភូមា ថៃ ឡាវ វៀតណាម និងហូរចាក់ចូលក្នុងសមុទ្រចិនខាងត្បូង។ ទន្លេមេគង្គគឺជាសរសៃឈាមរបស់ប្រទេសកម្ពុជា ដែលវាហូរកាត់ខេត្តដូចជា ស្ទឹងត្រែង ក្រចេះ កំពង់ចាម ព្រៃវែង និងរាជធានីភ្នំពេញ។ ទន្ទឹមនឹងនេះ វាក៏ជាជម្រកនៃប្រភេទត្រីចំនួន ១,១៤៨ ត្រូវបានទទួលស្គាល់ ក៏ដូចជាមានមនុស្សរាប់លាននាក់ពឹងផ្អែកលើទន្លេសម្រាប់ចិញ្ចឹមជីវិតរបស់ពួកគេផងដែរ។

ទោះបីជាយ៉ាងណាក៏ដោយ បើយោងតាមរបាយការណ៍ថ្មីពីសម្ព័ន្ធនៃក្រុមបរិស្ថានក្នុងតំបន់ និងអន្តរជាតិ បានឱ្យដឹងថា ២០% នៃប្រភេទត្រីនៅក្នុងទន្លេមេគង្គបច្ចុប្បន្នកំពុងប្រឈមមុខនឹងហានិភ័យនៃការផុតពូជ។ បើតាមសកម្មជនបរិស្ថាន ទន្លេមេគង្គត្រូវបានគំរាមកំហែងយ៉ាងធ្ងន់ធ្ងររាប់មិនអស់ រួមទាំងការសាងសង់ទំនប់ ការជីកយករ៉ែខ្សាច់ ការគ្រប់គ្រងធនធានជលផលមិនល្អ ការបាត់បង់ទីជម្រក និងការដាក់បញ្ចូលប្រភេទសត្វចម្លែក ដែលបណ្តាលឱ្យចំនួនត្រីក្នុងទន្លេមេគង្គថយចុះ នឹងប៉ះពាល់ដល់មនុស្សរាប់លាននាក់ដែលជីវភាពរស់នៅពឹងផ្អែកលើទន្លេ។

លោក Lan Mercado នាយកអង្គការ WWF ប្រចាំតំបន់អាស៊ីប៉ាស៊ីហ្វិក បានមានប្រសាសន៍ថា៖ «ការធ្លាក់ចុះគួរឱ្យព្រួយបារម្ភនៃចំនួនត្រីនៅក្នុងទន្លេមេគង្គគឺជាការដាស់តឿនមួយ ដើម្បីចាត់វិធានការជាបន្ទាន់។ យើងត្រូវតែធ្វើសកម្មភាពឥឡូវនេះ ដើម្បីផ្លាស់ប្តូរនិន្នាការមហន្តរាយនេះ ពីព្រោះសហគមន៍មេគង្គ និងប្រទេសនានា មិនអាចមានលទ្ធភាពក្នុងការបាត់បង់ពួកគេឡើយ»។ របាយការណ៍ពីក្រុមស្រាវជ្រាវក្នុងតំបន់ និងអន្តរជាតិចំនួន ២៥ បានពិនិត្យលើផលប៉ះពាល់លើផ្នែកផ្សេងៗនៃទន្លេប្រវែង ៤,៩០០ គីឡូម៉ែត្រដែលជាទន្លេវែងជាងគេនៅអាស៊ីអាគ្នេយ៍ រួមទាំងបឹងទន្លេសាបនៃប្រទេសកម្ពុជាផងដែរដែលពួកគេបាននិយាយថាចំនួនត្រីបានធ្លាក់ចុះ ៨៨% រវាងឆ្នាំ ២០១៩ ដល់ឆ្នាំ ២០២៣។

អ្នកនិពន្ធការសិក្សាបានបញ្ជាក់ថា ប្រភេទត្រីចំនួន ៧៤ ត្រូវបានវាយតម្លៃថា “ជិតផុតពូជ” នៅក្នុងបញ្ជីក្រហមរបស់សហភាពអន្តរជាតិសម្រាប់ការអភិរក្សធម្មជាតិនៃប្រភេទសត្វដែលរងការគំរាមកំហែង។ របាយការណ៍បាននិយាយជាផ្លូវការថា “នេះមានន័យថា ប្រហែល ២០% នៃប្រភេទត្រីដែលគេស្គាល់នៅក្នុងទន្លេមេគង្គត្រូវបានគំរាមកំហែង” ។ ការបាត់បង់ត្រីអាចធ្វើឱ្យការកាប់បំផ្លាញព្រៃឈើក្នុងតំបន់កាន់តែអាក្រក់ទៅៗ ខណៈដែលមនុស្សរាប់លាននាក់ដែលពីមុនពឹងផ្អែកលើទន្លេសម្រាប់ចិញ្ចឹមជីវិតរបស់ពួកគេត្រូវបានបង្ខំឱ្យធ្វើស្រែចម្ការវិញ។

លោក Herman Wanningen នាយកប្រតិបត្តិនៃអង្គការទេសន្តរប្រវេសន៍ត្រីពិភពលោកបាននិយាយថា “វាច្បាស់ណាស់ថាយើងកំពុងប្រថុយនឹងបង្កឱ្យមានវិបត្តិជីវចម្រុះថ្មីសម្រាប់អាងទន្លេមេគង្គ។ ប៉ុន្តែវាមិនយឺតពេលទេនៅក្នុងអនុសាសន៍របស់ខ្លួន របាយការណ៍នេះបានអំពាវនាវឱ្យប្រទេសមេគង្គប្តេជ្ញាអនុវត្តការប្រឈមមុខនឹងទឹកសាប ក៏ដូចជាការការពារ និងការស្តារប្រព័ន្ធអេកូឡូស៊ីទន្លេឡើងវិញ រួមទាំងការបង្កើនលំហូរធម្មជាតិរបស់ទន្លេ ការកែលម្អគុណភាពទឹក ការការពារទីជម្រក និងប្រភេទសត្វសំខាន់ៗ ក៏ដូចជាការលុបបំបាត់របាំងទន្លេហួសសម័យជាដើម ដែលនេះគឺជាសសរស្តម្ភទាំងប្រាំមួយដែលត្រូវបានណែនាំដើម្បីជួយស្ដារទន្លេមេគង្គ៕

សហរដ្ឋអាមេរិក ៖ អ្នកនាង Jennifer Granholm រដ្ឋមន្ត្រីក្រសួងថាមពលអាមេរិកបានថ្លែង កាលពីថ្ងៃទី៦ ខែមីនា ឆ្នាំ២០២៤ ថា ប្រទេសចិនអាចធ្វើឱ្យទីផ្សាររថយន្តអាមេរិកសម្បូរដោយរថយន្តអគ្គិសនីតម្លៃថោកៗ ។ រដ្ឋមន្ត្រីក្រសួងថាមពលបានលើកឡើងបែបនេះ ក្រោយពីលោកប្រធានាធិបតីអាមេរិក ចូ បៃដិន បានបង្ហាញការបារម្ភពីរថយន្តអគ្គិសនីចិន ប្រមាណ១សប្តាហ៍មុននេះ ។

អ្នកនាង Jennifer Granholm រដ្ឋមន្ត្រីក្រសួងថាមពលអាមេរិក បានថ្លែងក្នុងអំឡុងពេលពិភាក្សាអំពីគេហទំព័រព័ត៌មានមួយឈ្មោះ Axios ថា ៖ «យើងបារម្ភយ៉ាងខ្លាំងថា ចិននឹងមានឥទ្ធិពលខ្លាំងលើឧស្សាហកម្មយានយន្តរបស់អាមេរិក បើទោះជាបច្ចុប្បន្ននេះ យើងនឹងបង្កើតហេដ្ឋារចនាសម័្ធន្ធសំខាន់សម្រាប់ផលិតកម្មរថយន្តក្តី» ។

អ្នកនាង Jennifer Granholm បន្តថា ៖ «យើងបានឃើញស្ថានការណ៍ស្រដៀងគ្នានេះ កើតឡើងក្នុងផ្នែកឧស្សាហកម្មថាមពលពន្លឺព្រះអាទិត្យផងដែរ ដែលមានផលិតផលហូរចូលមកទីផ្សារពេញទាំងអស់» ។

ចំណែកសារព័ត៌មាន CNBC រាយការណ៍ថា គេមើលឃើញថា ប្រទេសចិនបានគំរាមកំហែងដល់ឧស្សាហកម្មយានយន្តរបស់អាមេរិក ដោយសារចំនួនការនាំចេញរថយន្តរបស់អាមេរិកបានធ្លាក់ចុះជាបន្តបន្ទាប់ ។ រីឯក្រុមហ៊ុនផលិតរថយន្តផ្សេងៗ ដូចជា ៖ General Motors ក៏បានកាត់បន្ថយទំហំប្រតិបត្តិការនៅក្រៅប្រទេសផងដែរ ។

បើតាមទិន្នន័យរបស់សមាគមផលិតរថយន្តចិនបញ្ជាក់ថា ចិនបាននាំចេញរថយន្តជិតស្មើ៥លានគ្រឿងនៅឆ្នាំ២០២៣ ហើយចិនបានវ៉ាដាច់ជប៉ុន ។ ហេតុនេះ ចិនបានក្លាយជាប្រទេសនាំចេញរថយន្តដ៏ច្រើនបំផុតនៅលើពិភពលោក កាលពីឆ្នាំ២០២៣ ។ Fitch Ratings បានរាយការណ៍កាលពីខែធ្នូ ឆ្នាំ២០២៣ ថា បណ្តាក្រុមហ៊ុនផលិតរថយន្តអគ្គិសនីចិនបានបង្ហាញរថយន្តថ្មីៗ ហើយទស្សនវិស័យរបស់ក្រុមហ៊ុនទាំងនេះនៅតែមានស្ថិរភាព បើទោះជាមានកំណើនការប្រកួតប្រជែងក្តី ។

អ្នកនាង Jennifer Granholm បន្ថែមថា ៖ «ចិនកំពុងបណ្តាក់ទុនស្មើទឹកប្រាក់ដ៏ច្រើនមហាសាល ក្នុងគោលបំណងពង្រីកអាជីវកម្មដើម្បីគ្រប់គ្រងទីផ្សារពិភពលោក ។ហេតុនេះ យើងត្រូវយល់ថា វាជាចំណុចសំខាន់គួរឱ្យពិចារណាសម្រាប់អតិថិជនចង់ទិញរថយន្តមានតម្លៃថោក ។ ប៉ុន្តែយើងអាចធ្វើបាន ហើយអាចរក្សាស្ថិរភាពទីផ្សារអាមេរិកបាន» ។

កាលពីខែកុម្ភៈ ឆ្នាំ២០២៤ សេតវិមានអាមេរិកប្រកាសថា អាមេរិកនឹងស៊ើបអង្កេតថា តើការនាំចូលរថយន្តចិននឹងគំរាមកំហែងដល់សន្តិសុខអាមេរិកដែរឬទេ? ដោយសារអាមេរិកបារម្ភថា យានជំនិះទាំងនេះអាចប្រមូលទិន្នន័យលម្អិតពាក់ព័ន្ធនឹងពលរដ្ឋអាមេរិក និងហេដ្ឋារចនាសម្ព័ន្ធ ហើយបញ្ជូនទិន្នន័យទៅឱ្យប្រទេសចិន ៕

បរទេស៖ កាលពីពេលថ្មីៗនេះ ទីភ្នាក់ងារសុវត្ថិភាពចំណីអាហារកូរ៉េបានបញ្ឈប់ការនាំចូលសំណាកស្ករគ្រាប់ពីប្រទេសជប៉ុនបន្ទាប់ពីរកឃើញបរិមាណសារធាតុ Cesium ដែលជាប្រភេទសារធាតុវិទ្យុសកម្ម នៅក្នុងផលិតផលស្ករគ្រាប់របស់ប្រទេសជប៉ុន ដែលគ្រោងនឹងនាំចូលទៅប្រទេសកូរ៉េ ប៉ុន្តែត្រូវបានមន្ត្រីកូរ៉េរកឃើញ និងលុបចោលផែនការនាំចូលស្ករគ្រាប់គ្រប់ប្រភេទពីប្រទេសជប៉ុន។

នេះបើយោងតាម Korea Joongang Daily ដែលបានរាយការណ៍នៅថ្ងៃទី១០ ខែមីនា ឆ្នាំ២០២៤ ថាក្នុងអំឡុងពេលត្រួតពិនិត្យផលិតផលនាំចូលពីប្រទេសជប៉ុន ស្រាប់តែមន្ត្រីកូរ៉េបានរកឃើញសារធាតុ Cesium នៅក្នុងគំរូស្ករគ្រាប់ដែលផលិតនៅក្នុងខេត្ត Shizuoka ប្រទេសជប៉ុនចំនួនក្នុងមួយគីឡូក្រាម។ ភ្លាមនោះក្រុមហ៊ុនដែលមានបំណងនាំចូលស្កគ្រាប់ ១២២ គីឡូក្រាមនៃផលិតផលដែលរងផលប៉ះពាល់បានលុបចោលផែនការនាំចូលរបស់ខ្លួនជាការឆ្លើយតបទៅនឹងការរកឃើញនេះ។

ទោះបីជាកម្រិតវិទ្យុសកម្មដែលបានរកឃើញធ្លាក់ក្រោមកម្រិតសុវត្ថិភាពនៃ 100 bequerel ក្នុងមួយគីឡូក្រាមក៏ដោយ ក៏ក្រសួងចំណីអាហារតម្រូវឱ្យអ្នកនាំចូលធ្វើការសាកល្បងបន្ថែមទៀតសម្រាប់នុយក្លេអ៊ែរវិទ្យុសកម្មផ្សេងទៀត។ យោងតាមក្រសួងបានឱ្យដឹងទៀតថា កាលពីឆ្នាំមុន ដាននៃសារធាតុ Cesium ត្រូវបានរកឃើញនៅក្នុងផលិតផលជប៉ុនចំនួន ៤ ដង ដែលជំរុញឱ្យក្រុមហ៊ុនទាំងអស់បង្ខំលុបចោលកិច្ចសន្យានាំចូលសម្រាប់ការត្រួតពិនិត្យ។

គួរបញ្ជាក់ដែថា កាលពីខែមីនា ឆ្នាំ២០១១ ប្រទេសជប៉ុនបានទទួលរងនូវគ្រោះមហន្តរាយពីរដងនៃការរញ្ជួយដី និងរលកយក្សស៊ូណាមិ ដែលប៉ះពាល់ដល់រោងចក្រថាមពលនុយក្លេអ៊ែរ Fukushima ធ្វើឱ្យស្នូលរ៉េអាក់ទ័របីបានរលាយ បញ្ចេញវិទ្យុសកម្មយ៉ាងច្រើនទៅក្នុងបរិយាកាសជុំវិញ។ បន្ទាប់មករដ្ឋាភិបាលក៏បានសម្រេចបញ្ចេញទឹកសំណល់ដែលបានព្យាបាលរួចពីរោងចក្រនុយក្លេអ៊ែរ Fukushima ចូលទៅក្នុងសមុទ្រ ចាប់ពីឆ្នាំ ២០២១ ដែលបណ្តាលឱ្យសារធាតុទាំងនេះបានរលាយចូលទៅក្នុងផលិតផលផ្សេងៗនៅក្នុងប្រទេសជប៉ុន។

ហេតុនេះបច្ចុប្បន្ន កូរ៉េខាងត្បូងនៅតែដាក់បម្រាមលើការនាំចូលអាហាររបស់ជប៉ុនពីតំបន់ជុំវិញរោងចក្រនុយក្លេអ៊ែរហ្វូគូស៊ីម៉ា។ ក្នុងឆ្នាំ ២០១១ បន្ទាប់ពីគ្រោះមហន្តរាយនៅ Fukushima ក្រុមហ៊ុនផលិតទឹកដោះគោក្នុងប្រទេសជប៉ុនត្រូវប្រមូលផលិតផលចំនួន ៤០០,០០០ មកវិញ ដោយសារដាននៃសារធាតុ Cesium ត្រូវបានរកឃើញ៕

ប្រទេសឥណ្ឌូណេស៊ី ៖ កាលពីថ្ងៃទី៩ ខែមីនា ឆ្នាំ២០២៤ សារព័ត៌មាន AFP រាយការណ៍ថា ក្រសួងគមនាគមន៍ឥណ្ឌូណេស៊ីជូនដំណឹងថា នឹងស៊ើបអង្កេតបន្ថែមទៀតករណីអាកាសយានិក២រូប របស់ក្រុមហ៊ុនអាកាសចរណ៍ Batik Air ស្ថិតក្រោមការគ្រប់គ្រងរបស់ក្រុមហ៊ុន Lion Air Group នៅប្រទេសឥណ្ឌូណេស៊ី បានដេកលក់ក្នុងអំឡុងពេលពួកគេកំពុងបើកយន្តហោះចេញពីខេត្ត Sulawesi នៅភាគអាគ្នេយ៍ ទៅកាន់ទីក្រុងហ្សាកាតា កាលពីថ្ងៃទី២៥ ខែមករា ឆ្នាំ២០២៤ ។

តាមការស៊ើបអង្កេតជំហានដំបូងរបស់គណៈកម្មការសុវត្ថិភាពដឹកជញ្ជូនជាតិបង្ហាញថា អាកាសយានិក និងជំនួយការអាកាសយានិកបានដេកលក់ដំណាលគ្នាប្រមាណ២៨នាទី ក្នុងអំឡុងពេលពួកគេបើកយន្តហោះនៅលើអាកាស ។ ហេតុនេះ វាបានធ្វើឱ្យយន្តហោះធ្វើដំណើរខុសគោលដៅ រហូតដល់ពួកគេភ្ញាក់ដឹងខ្លួន និងបញ្ជាឱ្យយន្តហោះធ្វើដំណើរទៅកាន់គោលដៅឡើងវិញ ។

ទោះយ៉ាងណា អ្នកដំណើរនៅយន្តហោះចំនួន១៥៣នាក់ រួមទាំងបុគ្គលិកបម្រើការលើយន្តហោះ៤នាក់ទៀតគ្មានគ្រោះថ្នាក់ទេ សម្រាប់ការធ្វើដំណើរតាមយន្តហោះនេះ ដែលមានរយៈពេល២ម៉ោងនិង៣៥នាទី ។

បើតាមរបាយការណ៍ដំបូងរបស់គណៈកម្មការសុវត្ថិភាពដឹកជញ្ជូនជាតិបញ្ជាក់ថា ជំនួយការអាកាសយានិកពុំបានសម្រាកគ្រប់គ្រាន់ទេ នៅយប់មុនពេលបើកយន្តហោះ ដោយសារជំនួយការអាកាសយានិករូបនេះមានកូនភ្លោះអាយុ១ខែ ហើយរូបគេបានជួយមើលកូនជាមួយភរិយានៅផ្ទះ ។

បន្ទាប់ពីយន្តហោះធ្វើដំណើរបានប្រមាណកន្លះម៉ោង អាកាសយានិកក៏បានប្រាប់ទៅជំនួយការថា សុំសម្រាកបន្តិច ហើយជំនួយការអាកាសយានិកក៏យល់ព្រមជួយបើកយន្តហោះបន្ត ។ ចំណែកភ្នាក់ងារគ្រប់គ្រងតំបន់ប្រចាំទីក្រុងហ្សាកាតា បានព្យាយាមទាក់ទងទៅកាន់អាកាសយានិកទាំង២រូប ប៉ុន្តែពុំទទួលបានការឆ្លើយតបទេ ។

ពេលវេលាបានកន្លងផុតទៅ២៨នាទី អាកាសយានិកក៏បានភ្ញាក់ដឹងខ្លួនឡើងវិញ និងដឹងថា ជំនួយការអាកាសយានិកដេកលក់ដែរ ហើយធ្វើឱ្យយន្តហោះធ្វើដំណើរខុសគោលដៅ ។ ហេតុនេះ អាកាសយានិកក៏បានដាស់មិត្តរួមការងារឱ្យភ្ញាក់ និងឆ្លើយតបទូរស័ព្ទពីទីក្រុងហ្សាកាតា ដែលបានព្យាយាមទំនាក់ទំនងមកពួកគេជាច្រើនលើក ។ ភ្លាមនោះ ពួកគេក៏បានជួយដោះស្រាយឱ្យយន្តហោះធ្វើដំណើរត្រឹមត្រូវតាមគោលដៅវិញ នៅទីបំផុត យន្តហោះនេះក៏បានចុះចតដោយសុវត្ថិភាព ។

ភ្នាក់ងារស៊ើបអង្កេតពុំបានបង្ហាញពីអត្តសញ្ញាណអាកាសយានិកទេ គ្រាន់តែបញ្ជាក់ថា អាកាសយានិកទាំង២រូប គឺជាជនជាតិឥណ្ឌូណេស៊ី ក្នុងនោះម្នាក់អាយុ៣២ឆ្នាំ និងម្នាក់ទៀតអាយុ២៨ឆ្នាំ ។ បច្ចុប្បន្ន អាកាសយានិកទាំង២រូប ត្រូវបានគេបញ្ជាឱ្យសម្រាកពីការងារជាបណ្តោះអាសន្ន ។

លោក Kritsati Endah Murni មន្ត្រីនាយកដ្ឋានដឹកជញ្ជូនផ្លូវអាកាសឥណ្ឌូណេស៊ីលើកឡើងថា ក្រសួងគមនាគមន៍បានថ្កោលទោសក្រុមហ៊ុនអាកាសចរណ៍ Batik Air យ៉ាងខ្លាំងចំពោះហេតុការណ៍នេះ និងអំពាវនាវឱ្យក្រុមហ៊ុនអាកាសចរណ៍ផ្សេងទៀតយកចិត្តទុកដាក់លើពេលសម្រាករបស់បុគ្គលិកហោះហើរឱ្យបានច្រើន ។

មន្ត្រីក្រសួងគមនាគមន៍លើកឡើងថា ពួកគេនឹងបន្តការស៊ើបអង្កេត និងពិនិត្យឡើងវិញសម្រាប់ជើងហោះហើរពេលយប់របស់ក្រុមហ៊ុន Batik Air រួមទាំងក្រុមហ៊ុនអាកាសចរណ៍ទាំងអស់នៅប្រទេសឥណ្ឌូណេស៊ី ៕

ប្រទេសម៉ាឡេស៊ី ៖ កាលពីឆ្នាំ២០២៣ មានភ្ញៀវទេសចរបរទេសបានធ្វើដំណើរមកប្រទេសម៉ាឡេស៊ី ជិតស្មើ២៩លាននាក់ ហើយធ្វើឱ្យម៉ាឡេស៊ីក្លាយជាប្រទេសគោលដៅទេសចរណ៍ដ៏ពេញនិយម ស្ថិតក្នុងលំដាប់ទី១ នៅតំបន់អាស៊ីអាគ្នេយ៍ និងវ៉ាដាច់ប្រទេសថៃផងដែរ ។ នេះបើតាមការចុះផ្សាយរបស់សារព័ត៌មានថៃ ឈ្មោះ AEC Connect កាលពីថ្ងៃទី២ ខែមីនា ឆ្នាំ២០២៤ ។

យោងតាមគេហទំព័រឈ្មោះ Focus Malaysia បញ្ជាក់ថា ពលរដ្ឋសិង្ហបុរីបានធ្វើដំណើរមកកាន់ប្រទេសម៉ាឡេស៊ីច្រើនបំផុត គឺស្មើនឹង៨លាន៣សែននាក់ បន្ទាប់មក គឺពលរដ្ឋឥណ្ឌូណេស៊ី, ថៃ, ចិន និងព្រុយណេ ។

ចំណែកប្រទេសថៃ គឺជាគោលដៅទេសចរណ៍ពេញនិយម ស្ថិតក្នុងលំដាប់ទី២ និងទទួលបានភ្ញៀវទេសចរសរុបចំនួន២៨លាននាក់ ។ ចំណែកប្រទេសសិង្ហបុរី ជាប់លំដាប់ទី៣ ដែលទទួលបានភ្ញៀវទេសចរសរុបចំនួន១៣លាន៦សែននាក់ ។

ប្រទេសនានានៅតំបន់អាស៊ីអាគ្នេយ៍បានប្រឹងប្រែងទាក់ទាញភ្ញៀវទេសចរបរទេស ដោយបានកំណត់វិធានការផ្សេងៗតាំងពីចុងឆ្នាំ២០២៣ ដូចជា ៖ កាលពីថ្ងៃទី១ ខែធ្នូ ឆ្នាំ២០២៣ ប្រទេសម៉ាឡេស៊ីបានអនុញ្ញាតឱ្យភ្ញៀវទេសចរចិន និងឥណ្ឌា អាចចូលមកម៉ាឡេស៊ី និងស្នាក់នៅរយៈពេល៣០ថ្ងៃ ដោយពុំចាំបាច់ស្នើសុំទិដ្ឋាការ ។ វាជាវិធានការស្រដៀងគ្នាជាមួយប្រទេសថៃដែរ ។

ចំណែកប្រទេសវៀតណាម គិតចាប់ពីពាក់កណ្តាលខែសីហា ឆ្នាំ២០២៣ បានអនុម័តទិដ្ឋាការទេសចរណ៍រយៈពេល៣ខែ សម្រាប់ភ្ញៀវទេសចរគ្រប់ប្រទេស ។ វៀតណាមបានបង្កើនរយៈពេលស្នាក់នៅក្នុងប្រទេសរយៈពេល៤៥ថ្ងៃ សម្រាប់ភ្ញៀវទេសចរមកពី១៣ប្រទេស ដែលទទួលបានការលើកលែងទិដ្ឋាការពីវៀតណាមតែម្ខាង ។

នៅពេលប្រទេសនីមួយៗប្រកួតប្រជែងគ្នាទាក់ទាញភ្ញៀវទេសចរបរទេសមកកម្សាន្តក្នុងប្រទេសរបស់ខ្លួន បានធ្វើឱ្យលោក Pham Minh Chinh នាយករដ្ឋមន្ត្រីវៀតណាម បញ្ជាទៅក្រសួងនានាឱ្យពិចារណាលើវិធានការលើកលែងទិដ្ឋាការសម្រាប់ភ្ញៀវទេសចរមកពីប្រទេសមួយចំនួន ដើម្បីឱ្យសមស្របនឹងកិច្ចសហការទ្វេភាគី ។

ខាងក្រោមនេះ គឺជាចំណាត់ថ្នាក់ចំនួនភ្ញៀវទេសចរធ្វើដំណើរមកកាន់ប្រទេសមួយចំនួនក្នុងតំបន់អាស៊ាន រួមមាន ៖
១-ម៉ាឡេស៊ី ទទួលបានភ្ញៀវទេសចរ ២៩លាននាក់
២-ថៃ ទទួលបានភ្ញៀវទេសចរ ២៨លាននាក់
៣-សិង្ហបុរី ទទួលបានភ្ញៀវទេសចរ ១៣លាន៦សែននាក់
៤-វៀតណាម ទទួលបានភ្ញៀវទេសចរ ១២លាន៦សែននាក់ និង
៥-ឥណ្ឌូណេស៊ី ទទួលបានភ្ញៀវទេសចរ ១១លាន៧សែននាក់ ៕

Heat stroke គឺជាជំងឺដែលទាក់ទងនឹងកម្រិតកម្តៅឡើងខ្ពស់ខ្លាំងបំផុត។ វាកើតឡើងនៅពេលដែលរាងកាយរបស់យើងមិនអាចសម្របខ្លួនទៅនឹងសីតុណ្ហភាពបរិយាកាសបាន ដែលនឹងធ្វើឲ្យសីតុណ្ហភាពរាងកាយកើនឡើងយ៉ាងឆាប់រហ័ស និងឲ្យបណ្តាលបែកញើសខ្លាំង រលាកស្បែក ក្រៅក្រហល់ក្រហាយ ដែលអាចបណ្តាលឲ្យសន្លប់បាត់បង់ស្មារតីឬស្លាប់ភ្លាមៗប្រសិនបើមិនទទួលបានការសង្គ្រោះបន្ទាន់។ នៅពេលដែលជំងឺ Heat stroke កើតឡើង សីតុណ្ហភាពរាងកាយអ្នកអាចឡើងដល់ 106°F ឬខ្ពស់ជាងនេះក្នុងរយៈពេល ១០ ទៅ ១៥ នាទី។

រោគសញ្ញាផ្សេងៗនៃ Heat stroke រួមមាន៖ ភាពច្របូកច្របល់ផ្លូវចិត្ត, ជីបចរដើរលឿន ,ចំពោះស្បែកវិញឡើងក្តៅ ស្ងួត ឬបែកញើសខ្លាំង, ខ្សោះជាតិទឹក, ឈឺក្បាល វិលមុខ ដួលសន្លប់ ប្រកាច់ភ្លាមៗ, សីតុណ្ហភាពរាងកាយឡើងខ្ពស់ខ្លាំងជាដើម។

ដើម្បីការពារនិងជៀសផុតពី Heat stroke មានដូចជា ៖
-ហាមបរិភោគភេសជ្ជៈមានជាតិអាល់កុល
-ផឹកទឹកឲ្យបានច្រើន
-មិនចាំបាច់កុំចេញក្រៅ ឬចេញក្រៅត្រូវពាក់សម្លៀកបំពាក់ជិតៗ ឬលាបលេការពារកម្តៅថ្ងៃជាដើម
-ប្រសិនបើប្រទះឃើញនរណាម្នាក់ជួបប្រទះជាមួយនឹងបញ្ហាដែលបានរៀបរាប់ខាងលើនេះគឺគួរតែមានការសង្គ្រោះបឋមផ្សេងៗឬបញ្ជូនទៅកាន់មន្ទីរពេទ្យជាបន្ទាន់ផងដែរ៕