ថ្មីៗនេះនៅលើបណ្តាញសង្គមមានការចាប់អារម្មណ៍យ៉ាងខ្លាំងទៅលើជនបរទេសម្នាក់មកលេងកម្សាន្តនៅប្រទេសកម្ពុជាបានបាត់លិខិតឆ្លងដែន( Passport) នៅខេត្តសៀមរាប។ ជាមួយគ្នានេះអ្នកលេងបណ្តាញសង្គមកម្ពុជាស្វះស្វែងប្រកាសនៅលើបណ្តាញសង្គមដើម្បីឱ្យអ្នកដទៃទៀតបានដឹងដំណឹងនិងឆាប់រកឃើញ។ តាមការប្រកាសនៅលើបណ្តាញសង្គមឃើញថាប្រជាពលរដ្ឋបាននាំគ្នាជួយចែករំលែករាប់ពាន់នាក់ ទីបំផុតលិខិតឆ្លងដែនរបស់ជនបរទេសនោះក៏រកឃើញតែផលដែលទទួលបានគឺត្រូវជនបរទេសនេះប្រកាសនៅលើបណ្តាញសង្គមរបស់ខ្លួនឈប់មកកម្ពុជាហើយទៅទីក្រុងបាងកកប្រទេសថៃវិញ។

កាលពីថ្ងៃទី២០ ខែមីនា គណនីហ្វេកប៊ុកមួយឈ្មោះថា Joo Ming បានបង្ហោះរូបពឹងបងប្អូននៅលើបណ្តាញសង្គមជួយចែករំលែកឱ្យកាន់តែទូលំទូលាយព្រោះតែជនបរទេសម្នាក់បាត់លិខិតឆ្លងដែននៅខេត្តសៀមរាប។ គណនី នេះបានសរសេរថា «សូមជួយស៊ែរផងអ្នកទាំងអស់គ្នា គាត់បានបាត់ passport នៅខេត្តសៀមរាបបើអ្នកណារើសបានអាចទាក់ទងមកខ្ញុំបានគាត់នឹងមានសាគុណជូន»។

តាមការបង្ហោះនេះអ្នកលេងបណ្តាញសង្គមជាច្រើនបាននាំគ្នាចែករំលែករាប់ពាន់នាក់ ស្វះស្វែងជួយគ្នាដើម្បីឱ្យភ្ញៀវទេសឆាប់រកឃើញលិខិតឆ្លងដែនរបស់ខ្លួនបានវិញ ខណៈគណនីនេះក៏បានអាប់ដេត ព័ត៌មានបន្ថែមដែរថា ជនបរទេសនេះបានរកឃើញលិខិតឆ្លងដែនរបស់គាត់ហើយ។
តែអ្វីដែលប្រជាពលរដ្ឋខ្មែរនឹកស្មានមិនដល់ និងជនបរទេសនេះនៅពេលបានលិខិតឆ្លងដែនហើយបែរជាបង្ហោះនៅលើគណនី Instagram របស់ខ្លួន បង្ហាញអារម្មណ៍ដោយសារខឹងសម្បារនិងមិនមានបំណងត្រលប់មកកម្ពុជាវិញនោះទេ។ ជនបរទេសនេះបានបង្ហាញថារូបគេមិនស្អប់ប្រទេសកម្ពុជានោះទេប៉ុន្តែរូបគេស្អប់នឹងស្ថានការណ៍ដែលខ្លួនជួបប្រទះ។ ក្នុងខ្លឹមសារមួយទៀតដែលជនបរទេសរូបនេះបង្ហោះនោះគឺ ការបាត់លិខិតឆ្លងដែននេះបានធ្វើឱ្យលោកខកខានជើងហោះហើរ ជាលើកទី១សម្រាប់មកប្រទេសកម្ពុជាហើយក៏ជាលើកចុងក្រោយដូចគ្នា ព្រមទាំងបង្ហាញថាលោកនឹងទៅបាងកកប្រទេសថៃ។

ឃើញទង្វើរបស់ជនបរទេសធ្វើដូចនេះអ្នកលេងបណ្តាញសង្គមសម្តែងក្តីហួសចិត្តយ៉ាងខ្លាំង ផលដែលពលរដ្ឋកម្ពុជាជួយគ្នារកលិខិតឆ្លងដែនឱ្យជនបរទេសនោះបានមកវិញ បែរជាទទួលបានហួសស្មាន។

ទោះយ៉ាងណា គណនីដែលជួយបង្ហោះស្វែងរកលិខិតឆ្លងដែនឱ្យជនបរទេសនោះក៏មានការអន់ចិត្តដូចគ្នាដែលជនបរទេសរូបនេះធ្វើដូចនេះ ប៉ុន្តែក៏សំណូមពរទៅអ្នកលេងបណ្តាញសង្គមឈប់វាយប្រហារគាត់តទៅទៀតព្រោះប្រជាជនកម្ពុជាតែងតែផ្សព្វផ្សាយសេចក្ដីស្រឡាញ់លើសពីការស្អប់។ ចំណែកឯគេនឹងរក្សាការបង្ហោះជួយរកលិខិតឆ្លងដែននេះទុកជាភស្តុតាងថាប្រជាជនកម្ពុជារីករាយនឹងជួយ ដោយសង្ឃឹមថាជនបរទេសនេះនឹងរៀនពីកំហុសរបស់ខ្លួនលើកនេះ៕

ថ្មីៗនេះស្រីស្អាត ឡូរីន និង វណ្ណដា បានប្រារព្ធពិធីអបអរខួបកំណើតជាមួយគ្នាយ៉ាងមានក្តីសុខធ្វើឱ្យហ្វេនៗរំភើបចិត្តចំពោះទំនាក់ទំនងអ្នកទាំងពីរជាខ្លាំងចង់ឃើញដំណឹងល្អឆាប់ៗ។ ក្នុងឱកាសចម្រើនវ័យ ២១ឆ្នាំ ឡូរីន សង្សារ វណ្ណដា ក៏បានលើកឡើង៣ចំណុចដែលធ្វើឱ្យការរស់នៅប្រចាំថ្ងៃមានភាពរីករាយក្នុងជីវិតផងដែរ។

សង្សារតារារ៉េប វណ្ណដា មិនត្រឹមតែមានសម្រស់ស្រស់ស្អាតប៉ុណ្ណោះទេប៉ុន្តែរូបនាក៏ចេះគិតគូរបានវែងឆ្ងាយមានគំនិតចាស់ទុំគួរឱ្យសរសើរ។ ដ្បិតតែជាកូនស្រីរស់នៅក្នុងជីវភាពធូរធារក្តីប៉ុន្តែក៏ចំណាប់ធ្វើម្ហូបដូចគ្នា។ ឡូរីន បានធ្វើឱ្យមនុស្សមិនតិចនាក់នោះទេដែលប៉ងប្រាថ្នាចង់បានជីវិតដូចជានាង មានជីវិតដ៏ស្រស់បំព្រងមានទាំងមានភាពស្រស់ស្អាត ថែមទាំងមានសង្សារលំដាប់ប្រទេសទៀត។

ក្នុងឱកាសខួបកំណើតរបស់ ឡូរីន ក្នុងវ័យ២១ឆ្នាំ នាងនិង វណ្ណដា ក៏បានទៅអបអរជាមួយគ្នាយ៉ាងមានក្តីសុខ។ លើសពីនេះខួបកំណើតឆ្នាំនេះរបស់ខ្លួន ឡូរីន ក៏បានលើក ៣ចំណុចជាគន្លឹះនាំឱ្យការរស់នៅប្រចាំថ្ងៃមានភាពរីករាយ។ ឡូរីន លើកឡើងថា «ឆ្នាំនេះ២១ហើយ… ពី១ឆ្នាំទៅ១ឆ្នាំខ្ញុំផ្លាស់ប្តូរច្រើនណាស់ ធំ១ឆ្នាំមានអារម្មណ៍ដូចចាស់ណាស់ចឹង អ្វីៗអាចប្រែប្រួលទៅតាមពេលវេលា តែអ្វីដែលមិនអាចប្រែប្រួលបាន គឺជាការបង្កើតក្តីស្រលាញ់ ការគិតវិជ្ជមាន គិតល្អៗអត់ប្រែប្រួលហើយខ្ញុំហ្នឹងបន្ថែមវាតាមដែលអាចធ្វើទៅបាន»។

ស្រីស្អាតរូបនេះបន្តទៀតថា «ទីមួយវាធ្វើឱ្យខ្ញុំមានផ្លូវចិត្តស្ងប់ កាលណាមានភាពស្រស់ស្អាតពីខាងក្នុងវាធ្វើឱ្យយើងកាន់តែស្អាត។ ទីពីរ គឺរំលងរឿងអវិជ្ជមាន គឺមិនអុជខ្លួនឯងឱ្យឆេះដោយសារតែគេគិតផ្សេងពីយើង មិនបាច់ខឹងព្រោះគេមិនស្គាល់យើងច្បាស់ហើយមានទស្សនៈខុសពីយើង។ ទីបី គឺការពិត និងស្មោះត្រង់ មនុស្សខ្ញុំគឺទទួលការពិតគ្រប់បែបយ៉ាងឱ្យតែជាការពិត ធ្វើអ្វីដែលមិនបោកបញ្ឆោតខ្លួនឯង រឺដើម្បីតែល្អមើលខាងក្រៅ… ហើយមិនថាទំនាក់ទំនងអីក៏ដោយទោះខ្ញុំដឹងថាខ្ញុំមិនល្អឥតខ្ចោះតែខ្ញុំដឹងថាខ្ញុំស្មោះត្រង់»។

សង្សារ វណ្ណដា ថា ប៉ុន្មានឆ្នាំនេះនាងមានអ្វីល្អៗជុំវិញខ្លួនក៏ដោយសារតែនាងធ្វើល្អដូចគ្នា ហើយការចែករំលែកមួយនេះគឺគោលបំណងចង់ឱ្យអ្នកអានចង់បានជីវិតដែលខ្លួនឯងប៉ងប្រាថ្នាមកដូចគ្នា ការនិយាយស្តី ការសប្បាយអបអរជូនអ្នកដទៃឬសន្ទនាណាមួយសុទ្ធតែជាការប៉ងប្រាថ្នាទាំងអស់ ព្រោះសកម្មភាពទាំងអស់គឺយើងហ្នឹងបានមកវិញក្នុងថ្ងៃណាមួយប៉ុន្តែមិនមែនធ្វើល្អចង់បានការតបស្នង នេះជារបៀបរស់នៅប្រចាំថ្ងៃដែលយើងត្រូវធ្វើ៕

តាមគោលការណ៍ហុងស៊ុយ គេជឿថាការទុកដាក់វត្ថុទាំង ៤ នេះនៅលើក្បាលគ្រែ អាចប៉ះពាល់ដល់ដំណេក សុខភាព និងសំណាងរបស់ម្ចាស់ផ្ទះ ហើយក៏ត្រូវបានគេជឿថាប៉ះពាល់ដល់សំណាងរបស់គ្រួសារទាំងមូលផងដែរ។ ដូច្នេះហើយកន្លែងសម្រាកមិនគួររៀបចំដោយធ្វេសប្រហែសផ្តេសផ្តាស់ឡើយ ព្រោះបើកាលណាអ្នកទុកដាក់របស់របរទាំងនេះនៅលើក្បាលដំណេក ច្បាស់ណាស់វានឹងអាចធ្វើឱ្យអ្នកមានបញ្ហាមិនល្អក្នុងជីវិត។

១.រូបព្រះពុទ្ធ៖ ការដាក់រូបព្រះពុទ្ធនៅលើក្បាលដំណេកគឺមិនល្អឡើយ បើមើលតាមទស្សនៈសាសនា គេចាត់ទុកថាមិនគោរពចំពោះវត្ថុពិសិដ្ឋ។ បើយោងទៅតាមគោលការណ៍ហុងស៊ុយវិញ ការតម្កល់ព្រះពុទ្ធរូបនៅក្បាលគ្រែ វាមានន័យថារារាំងសំណាង ដែលកត្តានេះនឹងធ្វើឱ្យម្ចាស់ផ្ទះជួបឧបសគ្គក្នុងការងារ។

២.កាំបិត ឬវត្ថុមុតស្រួច៖ វត្ថុដែលមុតស្រួច ដូចជាកាំបិត និងដាវ មិនគួរដាក់នៅក្បាលដំណេកទេ។ យោងទៅតាមគោលការណ៍ហុងស៊ុយ វត្ថុទាំងនេះមានថាមពលខ្លាំង មិនស័ក្តិសមសម្រាប់បន្ទប់គេងដែលទាមទារភាពស្ងប់ស្ងាត់សម្រាប់ការសម្រាក ដោយវត្ថុទាំងនេះនឹងដាក់សម្ពាធលើជីវិត ធ្វើឱ្យអ្នកមានអារម្មណ៍ថាមិនមានសុវត្ថិភាព ហើយបើអ្នកបុកវាដោយចៃដន្យ អ្នកអាចនឹងមានរបួសជាដើម។

៣.កញ្ចក់៖ កញ្ចក់គឺជារបស់ដែលម្ចាស់ផ្ទះមិនគួរដាក់នៅលើក្បាលដំណេកទេ ឬទល់មុខគ្រែ ព្រោះវានឹងធ្វើឱ្យអ្នកមានអារម្មណ៍ថប់បារម្ភ និងមិនមានសុវត្ថិភាព។ ការដាក់កញ្ចក់ទល់មុខគ្រែ ធ្វើឱ្យមនុស្សជាច្រើនមានអារម្មណ៍ភ័យខ្លាច ហើយវាមានអារម្មណ៍ដូចជាយើងកំពុងស្ថិតនៅក្នុងសុបិនអាក្រក់មួយ។ ជាពិសេសនៅពេលដែលអ្នកទើបតែភ្ញាក់ពីគេងនៅកណ្តាលយប់ ហើយនៅពេលអ្នកងាកមើលកញ្ចក់ ឃើញរូបភាពមិនច្បាស់នៅក្នុងកញ្ចក់ អ្វីៗទាំងអស់នេះនឹងប៉ះពាល់ដល់ស្មារតី សុខភាពរបស់យើងបាន។

៤.រូបថតរបស់អ្នកស្លាប់៖ ពិតណាស់ នៅពេលបាត់បង់មនុស្សជាទីស្រឡាញ់ មនុស្សភាគច្រើនប្រាកដជាតម្កល់រូបថតទាំងនោះនៅលើក្បាលដំណេក ប៉ុន្តែការដាក់រូបថតរបស់អ្នកស្លាប់បែបនេះគឺមិនល្អទេ ទោះស្រលាញ់ និងនឹកអ្នកស្លាប់ប៉ុណ្ណាក៏ដោយ ក៏អ្នកគួរចៀសវាងដាក់រូបភាពគាត់នៅក្បាលគ្រែ ដោយរូបភាពគួររក្សាទុកក្នុងកន្លែងពិសិដ្ឋ និងស្អាត ជាការប្រសើរក្នុងការចងចាំ និងបង្ហាញការគោរពចំពោះអ្នកស្លាប់៕

ប្រាសាទព្រះវិហារ បានបង្ហាញនូវភាពលេចធ្លោរបស់ខ្លួន ស្ទើរតែមិនមានអ្នកដឹងទេថា ជារៀងរាល់ឆ្នាំ ព្រឹត្តិការណ៍សមរាត្រីក៏តែងមានទំនាក់ទំនងជាមួយប្រាសាទនេះដែរ។

ថ្ងៃទី ២០ ២១ ២២ ខែមីនានេះ ភ្ញៀវទេសចរទាំងជាតិនិងអន្តរជាតិរាប់ម៉ឺននាក់ផ្អើលភ្លុកទឹកភ្លុកដីទៅទស្សនាព្រឹត្តិការណ៍សមរាត្រី ឬព្រឹត្តិការណ៍ថ្ងៃរះចំកំពូលកណ្តាល នៃប្រាសាទអង្គវត្ត នៅលើទឹកដីនៃខេត្តសៀមរាប ដែលព្រឹត្តការណ៍នេះគឺកម្រខ្លាំងបំផុត ព្រោះមួយឆ្នាំមានតែ២ដងប៉ុណ្ណោះ។

ក្រឡេកមកមើល ប្រាសាទបុរាណខ្មែរដ៏ល្បីរន្ទឺរមួយទៀត គឺប្រាសាទព្រះវិហារ កាលពីថ្ងៃទី២២ ខែមីនានេះ យោងតាមការបង្ហោះដោយគណនីហ្វេសបុក Oeur Sopheap Preah Vihear បានបង្ហាញពីរូបភាពមហោសច្ចារ្យប៉ុន្មានសន្លឹក ដែលបង្ហាញឲ្យឃើញថា កម្ពុជាមិនមែនមានតែប្រាសាទអង្គរវត្តទេដែលកើតមានព្រឹត្តិការណ៍សមរាត្រី។ ជាមួយគ្នានេះ នៅឯប្រាសាទព្រះវិហារវិញក៏កើតមានព្រឹត្តិការណ៍នេះដូចគ្នាដែរ ដែលពន្លឺព្រះអាទិត្យរះចាំងជះចំកណ្តាលទ្វារប្រាង្គប្រាសាទស្រីសិខារីស្វរៈ (ប្រាសាទព្រះវិហារ) ដ៏វិសេសវិសាលបំផុត។

ព្រឹត្តិការណ៍ ដែលជាទូទៅគេស្គាល់ថា «សមរាត្រី ឬ Equinox» គឺកើតមានតែ២ដងទេក្នុង១ឆ្នាំ។ សមរាត្រីនេះគឺមានន័យថា «ថ្ងៃនិងយប់មានរយៈពេលស្មើគ្នា» ដែលមានតែក្នុងខែមីនា និងកញ្ញាប៉ុណ្ណោះ។ ក្រៅពីនេះ ខែខ្លះថ្ងៃមានរយៈពេលវែងជាងយប់ ឬយប់មានរយៈពេលវែងជាងថ្ងៃជាដើម។

កាលដែល ប្រាសាទខ្មែរមួយចំនួនបង្ហាញពីភាពអស្ចារ្យរបស់ខ្លួនដែលផ្សារភ្ជាប់ជាមួយនឹងព្រឹត្តិការណ៍សមរាត្រីនេះបាន ពោលគឺប្រាសាទអង្គរវត្តនិងព្រះវិហារ ព្រោះថា ស្ថាបត្យកម្មខ្មែរទាំងនោះសុទ្ធតែបានស្ថាបនាឡើង និងគិតគូរយ៉ាងល្អិតល្អន់អំពី រូបមន្តគណិតវិទ្យា និងតារាសាស្រ្ត ដែលមានទំនាក់ទំនងយ៉ាងជិតស្និតជាមួយនឹងធម្មជាតិ ភពផែនដី និងព្រះអាទិត្យ។

គួរបញ្ជាក់ថា តាមសិលាចារឹកប្រាសាទព្រះវិហារឈ្មោះតាមលិង្គ ដែលតម្កល់ទុកនៅទីនោះមានឈ្មោះថា ប្រាសាទស្រីសិខារិស្វរៈ ដែលមានន័យថាម្ចាស់នៃកំពូលភ្នំ។ ប្រាសាទព្រះវិហារជាប្រាសាទរបស់សាសនាហិណ្ឌូ ដែលបានសាងសង់ឡើងជាបន្តបន្ទាប់ចាប់ពីសតវត្សទី៩-១២ ដោយព្រះមហាក្សត្រខ្មែរជាច្រើនអង្គ។ ក្នុងនោះព្រះមហាក្សត្រដែលមានភាពលេចធ្លោជាងគេនៃការស្ថាបនាប្រាសាទព្រះវិហារនេះគឺ ព្រះបាទយសោវរ្ម័នទី១ ព្រះបាទសូរ្យវរ្ម័នទី១ និងព្រះបាទសូរ្យវរ្ម័នទី២៕

កម្លាំងជំនាញនៃមន្ទីរប្រឆាំងគ្រឿងញៀន បានបង្ក្រាបករណីដឹកជញ្ជូនគ្រឿងញៀន នៅចំណុចខុនដូរហ្សង់អេលីហ្សេ បន្ទប់លេខ ៨០៣ ជាន់ទី៨ សង្កាត់ចតុមុខ ខណ្ឌដូនពេញ និងចំណុចខុនដូរផ្លាទីនីនបេ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ដោយឃាត់ខ្លួនជនល្មើសចំនួន ២នាក់ ឈ្មោះ NGUYEN HOAN DINH ភេទប្រុស ជនជាតិវៀតណាម អាយុ៤៥ឆ្នាំ និងឈ្មោះ DUONG TIEN ភេទប្រុស ជនជាតិវៀតណាម អាយុ១៧ឆ្នាំ។

នៅក្នុងប្រតិបត្តការនេះ កម្លាំងជំនាញនៃមន្ទីរប្រឆាំងគ្រឿងញៀន រកឃើញមាន មេតំហ្វេតាមីន (ICE) ទម្ងន់ ៥៩៤ ៨១២ក្រាម (ជិត៦០០គីឡូក្រាម), អ៊ិចស្ត្រាស៊ី (MDMA) ទម្ងន់ ៤៨ ៩១៩.០១ក្រាម (ជិត៥០គីឡូក្រាម), កេតាមីន (KETAMINE) ទម្ងន់ ៧ ៩៩០.០៤ក្រាម (ជិត៨គីឡូក្រាម), កញ្ឆា (MARIJUANA) ទម្ងន់ ១៧,០០០ ក្រាម (១៧គីឡូក្រាម), សារធាតុមិនច្បាស់ទម្ងន់ ៨៧៦ក្រាម។

ក្រោយការចាប់ខ្លួន ជនល្មើសទាំង២នាក់ ត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ និងបន្តស្រាវជ្រាវតាមរកមេខ្លោង និងអ្នកពាក់ព័ន្ធផ្សេងទៀត មកផ្តន្ទាទោសតាមច្បាប់៕