ប្រទេសថៃ ៖ កាលពីថ្ងៃទី២៨ ខែមីនា ឆ្នាំ២០២៤ សារព័ត៌មានថៃរាយការណ៍ថា រដ្ឋសភាបានអនុម័តឱ្យមាន កាស៊ី.ណូ ស្របច្បាប់នៅលើទឹកដីថៃ និងរង់ចាំការពិចារណាពីគណៈរដ្ឋមន្ត្រី ។ ទោះយ៉ាងណា សមាជិកសភាតំណាងរាស្ត្រមកពីមណ្ឌលផ្សេងៗបានបញ្ចេញមតិខុសៗគ្នា ហើយពួកគេបានសំណូមឱ្យរដ្ឋសភាពិចារណាពីផលប៉ះពាល់ផ្សេងៗ ក្រោយពីមាន កាស៊ី.ណូ ស្របច្បាប់នៅលើទឹកដីថៃ។

លោក Somchat Techathaworncharoen សមាជិកសភាតំណាងរាស្ត្រមកពីគណបក្សកាវក្លៃ បានយល់ស្របនឹងការប្រមូលប្រាក់ចំណូលចូលជាតិដើម្បីជួយដល់ពលរដ្ឋ ។ ប៉ុន្តែលោកបារម្ភថា របាយការណ៍នេះអាចត្រឹមតែជាឯកសារ ដែលមិនបានបញ្ចូលក្នុងសេចក្តីព្រាងច្បាប់ ហើយធ្វើឱ្យខាតបង់ពេលវេលា និងឱកាសដើម្បីសិក្សាលើករណីនេះ ។

លោក Somchat Techathaworncharoen បានស្នើថា គួរតែមានការសិក្សាបន្ថែមទៀតអំពីភាពគ្រប់គ្រាន់របស់មូលនិធិ ដើម្បីទប់ស្កាត់អ្នកញៀនល្បែង ហើយប្រទេសថៃពុំបានសិក្សាពីចំនួនអ្នកញៀនល្បែងនៅឡើយទេ ។ លើសពីនេះ ថៃមិនបានសិក្សាពីផលប៉ះពាល់រយៈពេលវែងរបស់អ្នកញៀនល្បែងទេ ហើយករណីនេះ វាដូចគ្នានឹង«ចោរប្លន់ផ្ទះ១០ដង មិនស្មើនឹងភ្លើងឆេះផ្ទះតែម្តង ហើយភ្លើងឆេះផ្ទះ១០ដង មិនស្មើនឹងការលេងល្បែង» ។

ចំណែកលោក Chulphan Amornwiwat ប្រធានគណៈកម្មការនិយាយថា នឹងពិភាក្សាពីចំណុចលម្អិតជាច្រើនទៀត ពីព្រោះការសិក្សារបស់គណៈកម្មការមានរយៈពេលត្រឹមតែ៤ខែប៉ុណ្ណោះ ។ ប្រសិនបើវាដំណើរការទៅមុខ រដ្ឋាភិបាលគួរតែសិក្សាករណីនេះឱ្យបានស៊ីជម្រៅម្តងទៀត ហើយការពិភាក្សាគ្នានាពេលនេះ គឺផ្តោតទៅលើការទប់ស្កាត់ផលប៉ះពាល់ផ្សេងៗ ។

លោក Natchanon Srikokuea សមាជិកសភាតំណាងរាស្ត្រមកពីគណបក្សភូមិចៃថៃ និយាយថា ក្នុងរបាយការណ៍នេះខ្វះការយល់ដឹងអំពីផ្នែកសង្គមថា គោលដៅមិនមែនធ្វើតែកាស៊ីណូទេ ប៉ុន្តែនៅមានកន្លែងកម្សាន្តជាច្រើនទៀត ដើម្បីបង្កើតប្រាក់ចំណូលចូលជាតិ ហើយវាអាចធ្វើឱ្យសង្គមមើលទៅគណៈកម្មការក្នុងផ្លូវអវិជ្ជមាន ដូចជា ៖ ផ្តោតតែលើកាស៊ីណូ, បំផ្លាញសង្គម និងផ្តល់សេវាសម្រាប់វិនិយោគិនបរទេស ។ ហេតុនេះ គួរតែដោះស្រាយ និងស្វែងរកគោលដៅពាក់ព័ន្ធនឹងការធ្វើកន្លែងកម្សាន្ត ។

រីឯលោក Witthaya Kaewparadai សមាជិកសភាតំណាងរាស្ត្រមកពីគណបក្សរួមថៃសាងឆាតិ និយាយថា បច្ចុប្បន្ន ប្រទេសថៃមានកន្លែងលេងល្បែងជាច្រើន រហូតធ្វើឱ្យកើតបញ្ហាជម្លោះពាក់ព័ន្ធនឹងសមត្ថកិច្ច ។ កន្លងមក សមត្ថកិច្ចថៃមានតួនាទីខ្ពស់ម្នាក់ត្រូវគេចោទប្រកាន់ថា ពាក់ព័ន្ធនឹងការភ្នាល់អនឡាញ ។ ហេតុនេះ ពេលប្រទេសថៃបើកកន្លែងកម្សាន្ត និងបើកកាស៊ីណូស្របច្បាប់ ចុះបើមានជនណាម្នាក់លួចបើកកន្លែងលេងល្បែងដោយគ្មានការអនុញ្ញាត តើអ្នកណាជាអ្នកដោះស្រាយបញ្ហានេះ?

ក្រៅពីនេះ លោក Witthaya Kaewparadai បានស្នើឱ្យមានការបែងចែកប្រាក់ចំណូល៥០% ទៅឱ្យពលរដ្ឋអាយុច្រើននៅប្រទេសថៃ និងត្រូវផ្តល់ឱ្យពួកគេជាប្រចាំខែផងដែរ ។ លោកសង្ឃឹមថា ការផ្តល់ប្រាក់ចំនួន៦០០បាតក្នុង១ខែសម្រាប់មនុស្សចាស់ នឹងកើនឡើងរហូតដល់៥.០០០បាតក្នុង១ខែ ។

រីឯលោក Yodchai Phuengphon សមាជិកសភាតំណាងរាស្ត្រមកពីគណបក្សកាវក្លៃ បានសំណូមពរឱ្យគណៈកម្មការសិក្សាករណីនេះឱ្យបានលម្អិត និងគ្រប់ជ្រុងជ្រោយផងដែរ ដូចជា ៖ កំណត់លក្ខខណ្ឌសម្រាប់ពលរដ្ឋចូលលេងល្បែងនៅកាស៊ីណូ ឬអ្នកគ្មានសិទ្ធិចូលកាស៊ីណូ ជាដើម ។

គួរបញ្ជាក់ថា ការប្រជុំរបស់រដ្ឋសភាថៃមានសមាជិកសភាតំណាងរាស្ត្រមកចូលរួមប្រជុំ ចំនួន២៥០នាក់ ហើយប្រធានអង្គប្រជុំបានឱ្យសមាជិកទាំងអស់បោះឆ្នោតអនុម័តលើរបាយការណ៍បើកកាស៊ីណូស្របច្បាប់ដើម្បីបញ្ជូនទៅគណៈរដ្ឋមន្ត្រីពិចារណា ក្នុងនោះ សមាជិកសភាតំណាងរាស្ត្រ២រូបពុំបានបោះឆ្នោត និង២រូបទៀតពុំបានផ្តល់ពិន្ទុ ៕

បរទេស៖ រថភ្លើងដឹកអ្នកដំណើរដើរដោយថាមពលអ៊ីដ្រូសែន ដែលផលិតដោយក្រុមហ៊ុនស្វីស Stadler បានបង្កើតកំណត់ត្រាពិភពលោក Guinness World Record (GWR) ថ្មី បន្ទាប់ពីវាបានធ្វើដំណើរឥតឈប់ឈររយៈពេល ៤៦ ម៉ោងជាមួយចម្ងាយ ២,៨០៣ គីឡូម៉ែត្រដោយមិនចាំបាច់ចាក់ប្រេង ឬបញ្ចូលថ្មឡើយ នេះបើយោងតាម Interesting Engineering ដែលបានចុះផ្សាយនៅថ្ងៃទី២៧ ខែមីនា ឆ្នាំ២០២៤។

លោក Ansgar Brockmeyer អ្នកតំណាងក្រុមហ៊ុន Stadler បាននិយាយថា នេះគឺជាកំណត់ត្រាពិភពលោកថ្មីមួយសម្រាប់ចម្ងាយឆ្ងាយបំផុតដែលគ្របដណ្តប់ដោយរថភ្លើងដឹកអ្នកដំណើរដើរដោយថាមពលអ៊ីដ្រូសែនដោយមិនចាំបាច់ចាក់ប្រេង ឬបញ្ចូលថ្មនោះទេ។ Ansgar បានបន្តទៀតថា កិច្ចខិតខំប្រឹងប្រែងនេះគឺដើម្បីជំនួសរថភ្លើងឥន្ធនៈហ្វូស៊ីលកំពុងបន្ត ខណៈដែលបណ្តាប្រទេសនានាវិនិយោគយ៉ាងច្រើនក្នុងការពង្រឹងបណ្តាញផ្លូវដែកជុំវិញពិភពលោក ក៏ដូចជាការដាក់ពង្រាយរថភ្លើងដើរដោយថាមពលថ្មដូចជា FLXDrive, Blues និង Flirt Akku ជាដើម។

ទោះជាយ៉ាងណា នេះមិនមែនជាលើកទីមួយទេដែលក្រុមហ៊ុនស្វីស Stadler បានបង្កើតកំណត់ត្រាពិភពលោក។ កាលពីឆ្នាំ២០២១ ក្រុមហ៊ុនក៏បានបង្កើតកំណត់ត្រាពិភពលោកហ្គីណេស សម្រាប់ការធ្វើដំណើរដោយថាមពលថ្មដ៏វែងបំផុតលើការសាកថ្មតែមួយ ២២៤ គីឡូម៉ែត្រនៅលើផ្លូវរវាងទីក្រុងប៊ែកឡាំង និង Warnemünde ក្នុងរដូវរងារនៃតំបន់ត្រជាក់។ ក្រុមហ៊ុនបានឱ្យដឹងទៀតថា ដើមឡើយរថភ្លើងដើរដោយថាមពលអ៊ីដ្រូសែនដំបូងត្រូវបានសាងសង់ឡើងសម្រាប់អាជ្ញាធរដឹកជញ្ជូនខោនធី San Bernardino ក្នុងរដ្ឋកាលីហ្វ័រញ៉ា San Bernardino មានល្បឿនអតិបរមាត្រឹមតែ ១២៧ គីឡូម៉ែត្រក្នុងមួយម៉ោង និងចម្ងាយ ៤៦០ គីឡូម៉ែត្រក្នុងមួយស្ថានីយ៍ប្រេងឥន្ធនៈ។

ទោះជាយ៉ាងណាក៏ដោយ ការបញ្ជាក់ជួរនោះត្រូវបានខូចនៅឯការសាកល្បង ENSCO នៅ Pueblo ដោយក្រុមហ៊ុន Stadler ក៏ចាប់ផ្តើមសាកល្បងពិសេសមួយក្នុងរដ្ឋ Colorado ក្នុងសហរដ្ឋអាមេរិកវិញ ហើយនៅក្នុងសាកល្បងនោះរថភ្លើងគឺរត់បានឆ្ងាយបំផុតមិនធ្លាប់មាន ដែលធ្វើឱ្យវាបានជាប់ក្នុងកំណត់ត្រាពិភពលោក Guinness World Record រយៈពេល ៤៦ ម៉ោងជាមួយចម្ងាយ ២,៨០៣ គីឡូម៉ែត្រជាលើកដំបូង៕

ប្រទេសថៃ ៖ ស្ថានីយប្រេងឥន្ធនៈនៅប្រទេសថៃឈ្មោះ Bangchak បានប្រកាសថា ក្នុងអំឡុងពេលបុណ្យចូលឆ្នាំថ្មី ឆ្នាំ២០២៤ ស្ថានីយនឹងមិនដំឡើងថ្លៃប្រេងឥន្ធនៈរយៈពេល៦ថ្ងៃ គឺចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៤ ហើយស្ថានីយនេះនឹងបញ្ចុះតម្លៃប្រេងតាមទីផ្សារពិភពលោកផងដែរ ។

កាលពីថ្ងៃទី២៨ ខែមីនា ឆ្នាំ២០២៤ លោក សេរី អនុផាន់ណាន់ អនុប្រធានប្រតិបត្តិក្រុមអាជីវកម្មទីផ្សារមកពីក្រុមហ៊ុន Bangchak លើកឡើងថា ក្នុងអំឡុងពេលចូលឆ្នាំថ្មីខាងមុខនេះ ក្រុមហ៊ុន Bangchak នឹងមិនដំឡើងថ្លៃប្រេងទេ គិតចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៤ បើទោះជាតម្លៃប្រេងនៅលើទីផ្សារពិភពលោកកើនឡើងក្តី ។ ប៉ុន្តែបើតម្លៃប្រេងនៅលើទីផ្សារពិភពលោកធ្លាក់ចុះ ក្រុមហ៊ុន Bangchak នឹងបញ្ចុះតម្លៃប្រេងតាមដែរ ។

ក្រៅពីនេះ ស្ថានីយប្រេងឥន្ធនៈ Bangchak បានរៀបចំសេវាកម្មក្នុងស្ថានីយប្រេង ដើម្បីស្វាគមន៍ និងចូលរួមថែរក្សារាល់ការធ្វើដំណើរទាំងអស់របស់ពលរដ្ឋថៃ ដែលធ្វើដំណើរត្រឡប់ទៅសួរសុខទុក្ខសាច់ញាតិនៅស្រុកកំណើត និងធ្វើដំណើរកម្សាន្ត ។ ស្ថានីយប្រេង Bangchak បានផ្តល់នូវប្រេងមានគុណភាពខ្ពស់ និងមានបន្ទប់ទឹកស្អាតផងដែរ ដើម្បីបំពេញគ្រប់តម្រូវការអតិថិជន និងបំពេញសេចក្តីសុខដល់មនុស្សគ្រប់វ័យ ស្របតាមគំនិត «Greenovative Destination for Intergeneration» ដូចជា ៖

-លក់ប្រេងមានគុណភាពខ្ពស់ និងស្តង់ដារឱ្យអតិថិជន
-បន្ថែមភាពសប្បាយរីករាយ
-បន្ថែមសុភមង្គលក្នុងរដូវកាលទេសចរណ៍
-បន្ថែមភាពកក់ក្តៅជាមួយការធានារ៉ាប់រងសុខភាព ករណីកើតគ្រោះថ្នាក់ក្នុងអំឡុងពេលចូលឆ្នាំថ្មី និង
-បង្កើនថាមពលដល់ការធ្វើដំណើរ

ក្រៅពីនេះ ស្ថានីយប្រេងឥន្ធនៈ Bangchak នឹងបង្កើនចំនួនបុគ្គលិកបន្ថែមទៀត ដើម្បីថែរក្សាសណ្តាប់ធ្នាប់ចរាចរណ៍ និងផ្តល់ភាពងាយស្រួលផ្សេងៗ ដូចជា ៖ ហាងលក់អាហារក្នុងស្ថានីយប្រេងឥន្ធនៈ, ទូរ ATM សម្រាប់ផ្តល់សេវាដកប្រាក់ រហូតដល់ការត្រៀមបន្ទប់ទឹកស្អាតមានអនាម័យ, សុវត្ថិភាព និងមានបន្ទប់ទឹកគ្រប់គ្រាន់ ។ លើសពីនេះ ស្ថានីយប្រេងឥន្ធនៈ ក៏បានត្រៀមស្តុកទុកប្រេង និងបង្កើនចំនួនរថយន្តដឹកប្រេងនៅគ្រប់តំបន់ ។

លោក សេរី អនុផាន់ណាន់ អនុប្រធានប្រតិបត្តិក្រុមអាជីវកម្មទីផ្សារ និយាយថា ៖ «ការធ្វើដំណើរក្នុងអំឡុងពេលចូលឆ្នាំថ្មីនេះ ស្ថានីយប្រេងឥន្ធនៈ Bangchak សូមឱ្យអតិថិជនគ្រប់រូបឈប់សម្រាកពីការងារបាត់នឿយហត់ និងនាំគ្នាមកចាក់ប្រេងនៅស្ថានីយ Bangchak គ្រប់សាខានៅទូទាំងប្រទេស ដើម្បីបង្កើនកម្លាំងធ្វើដំណើរបន្តទៀត ។ យើងនឹងទទួលអ្នកដំណើរគ្រប់វ័យ និងសូមឱ្យអ្នកដំណើរគ្រប់គ្នាធ្វើដំណើរត្រឡប់ទៅស្រុកកំណើត និងដើរកម្សាន្តប្រកបដោយសុវត្ថិភាព» ៕

ប្រទេសចិន៖ កាលពីល្ងាចថ្ងៃទី២៨ ខែមីនា ឆ្នាំ២០២៤ Xiaomi ដែលជាក្រុមហ៊ុនស្មាតហ្វូនយក្សរបស់ពិភពលោក បានដាក់បង្ហាញរថយន្តអគ្គិសនីដំបូងបង្អស់របស់ខ្លួនគឺម៉ូដែល Xiaomi SU7 ជាផ្លូវការនៅក្នុងប្រទេសចិន ជាមួយតម្លៃត្រឹមតែ ២៩,៩០០ ដុល្លារអាមេរិកប៉ុណ្ណោះ ក្នុងគោលបំណងដើម្បីប្រកួតប្រជែងជាមួយ Tesla Model 3 ក្នុងតម្លៃ ៣៤,០០០ ដុល្លារ។ ដូច្នេះសម្រាប់តម្លៃរបស់រថយន្តអគ្គិសនីចិនគឺទាបខ្លាំងណាស់ ដែលធ្វើឱ្យវាទទួលបានការបញ្ជាទិញរហូតដល់ ៥០,០០០ គ្រឿងក្នុងរយៈពេលត្រឹមតែ ២៧ នាទីប៉ុណ្ណោះ។

លោក Lei Jun នាយកប្រតិបត្តិរបស់ក្រុមហ៊ុន Xiaomi បាននិយាយថា គាត់បានត្រៀមខ្លួនជាស្រេចសម្រាប់ការដាក់តាំងបង្ហាញរថយន្តអគ្គិសនី SU7 នៅក្នុងទីក្រុងចំនួន ៣៩ ទូទាំងទីផ្សារប្រទេសចិនជាមួយនឹងការដាក់លក់នៅក្នុងហាងចំនួន ២១១ របស់ក្រុមហ៊ុន។ ទោះជាយ៉ាងណា ក្រុមហ៊ុនមិនបាននិយាយពីគម្រោងលក់រថយន្តអគ្គិសនីនៅបរទេសទេ។ SU7 គឺជារថយន្តអគ្គិសនីដំបូងបង្អស់របស់ក្រុមហ៊ុនស្មាតហ្វូន Xiaomi ដែលវាមាន ៣ ម៉ូដែលគឺ SU7, SU7 Pro និង SU7 Max។

រថយន្តអគ្គិសនី Xiaomi SU7 ត្រូវបានបំពាក់ដោយថ្ម Blade របស់ BYD ដែលមានសមត្ថភាព ៧៣.៦ kWh អាចបង្កើនល្បឿនពី ០-១០០ គីឡូម៉ែត្រក្នុងមួយម៉ោងរយៈពេល ៥.២ វិនាទី និងឈានដល់ល្បឿនអតិបរមា ២១០ គីឡូម៉ែត្រក្នុងមួយម៉ោង ជាមួយតម្លៃត្រឹមតែ ២៩,៩០០ ដុល្លារអាមេរិកប៉ុណ្ណោះ។ រីឯ Xiaomi SU7 Pro វិញប្រើប្រាស់ថាមពលថ្ម ៩៤.៣ kWh ដែលមានចម្ងាយ ៨៣០ គីឡូម៉ែត្រ និងប្រើស្ថាបត្យកម្មសាក ៨០០V ។ កំណែនេះមានតម្លៃប្រហែល ៣៤,០២៦ ដុល្លារអាមេរិក ដែលស្មើនឹង Tesla Model 3 នៅក្នុងប្រទេសចិន។

ចំណែកឯ Xiaomi SU7 Max ដែលជារថយន្តអគ្គិសនីស៊េរីទំនើបបំផុតមានសមត្ថភាពបង្កើនល្បឿនពី ០-១០០ គីឡូម៉ែត្រក្នុងមួយម៉ោងរយៈពេល ២.៨ វិនាទីជាមួយនឹងល្បឿនអតិបរមា ២៦៥ គីឡូម៉ែត្រក្នុងមួយម៉ោង ដែលមានថាមពលថ្ម ១០១ kWh Qilin ផ្តល់ចម្ងាយ ៨០០ គីឡូម៉ែត្រក្នុងពេលសាកម្តង។ ចំណុចគួរឱ្យចាប់អារម្មណ៍គឺវាអាចដំណើរការបានចម្ងាយដល់ទៅ ៥១០ គីឡូម៉ែត្របន្ទាប់ពីសាកថ្មត្រឹមតែ ១៥ នាទីប៉ុណ្ណោះ។ រថយន្តនេះប្រើប្រព័ន្ធបើកបរ ៤ កង់ កម្លាំងម៉ាស៊ីនភ្លោះគឺ ៤៩៥ kW រួមទាំងកម្លាំងបង្វិល ៨៣៨ Nm និងមានតម្លៃរហូតដល់ ៦៩,០០០ ដុល្លារអាមេរិក៕

ទេសថៃ ៖ ក្រុមហ៊ុនផលិតរថយន្តអគ្គិសនីរបស់វៀតណាម VinFast បានប្រកាសថា ក្រុមហ៊ុនមានគម្រោងពង្រីកទីផ្សាររថយន្តអគ្គិសនីនៅប្រទេសថៃ នាពេលឆាប់ៗនេះ ។ ជំហានដំបូង ក្រុមហ៊ុនបានចុះកិច្ចព្រមព្រៀងជាមួយក្រុមហ៊ុនតំណាងចែកចាយរថយន្តចំនួន១៥កន្លែង ដើម្បីបើកមជ្ឈមណ្ឌលលក់រថយន្ត VinFast នៅប្រទេសថៃ ។

ក្រុមហ៊ុន VinFast និង Dealer នឹងសហការគ្នាយ៉ាងពេញទំហឹង ដើម្បីបើកទីតាំង Showroom ឱ្យបានចំនួន២២កន្លែង ដោយផ្តោតទៅលើទីតាំងស្ថិតនៅតាមបណ្តោយផ្លូវធំៗក្នុងទីក្រុងបាងកក និងតំបន់ជុំវិញ ។ បន្ទាប់មក ក្រុមហ៊ុនទាំងពីរនឹងពង្រីកទីតាំង Showroom ទៅកាន់បណ្តាខេត្ត-ក្រុងធំៗផ្សេងទៀត ដូចជា ៖ ខេត្តឈៀងម៉ៃ, ខនកែន, អ៊ូប៊ុនរ៉ាជថានី, អយុធ្យា និងឈុនបុរី ។

Wu Dang Yen Hang គឺជា CEO របស់ក្រុមហ៊ុន VinFast ប្រចាំប្រទេសថៃ លើកឡើងថា ក្រុមហ៊ុនបានកំណត់គោលដៅថា នឹងចាប់ផ្តើមពង្រីកទីផ្សាររថយន្តអគ្គិសនីម៉ាក VF e34, VF 5, VF 6 និង VF 7 ព្រមទាំងកង់អាគុយផងដែរ ក្នុងរយៈពេល២ខែខាងមុខទៀត ឬនៅត្រីមាសទី៣ នៃឆ្នាំ២០២៤ ។ ក្រុមហ៊ុននឹងផ្សព្វផ្សាយឱ្យបានលម្អិតពាក់ព័ន្ធនឹងតម្លៃរថយន្តទាំងនេះ នាពេលក្រោយ ។

ទីផ្សាររថយន្តអគ្គិសនីនៅប្រទេសថៃ បើទោះជាមានទំហំតូចក្តី ប៉ុន្តែវាបានកើនឡើងយ៉ាងឆាប់រហ័ស ដោយសារវិធានការគាំទ្រផ្សេងៗរបស់រដ្ឋាភិបាលថៃ ។ ហេតុនេះ ក្រុមហ៊ុនមានគម្រោងថា នឹងផលិតរថយន្តអគ្គិសនីឱ្យបានរហូតដល់៣០% របស់បរិមាណការផលិតរថយន្តសរុប ចំនួន២លាន៥សែនគ្រឿងក្នុង១ឆ្នាំ ។

នៅឆ្នាំ២០២៤ ក្រុមហ៊ុន VinFast បានកំណត់គោលដៅថា នឹងពង្រីកទីផ្សារយ៉ាងហោចណាស់៥០ប្រទេស ដែលបន្ថែមពីលើទីផ្សារនបង្កើតរួចហើយ ដូចជា ៖ សហរដ្ឋអាមេរិក, កាណាដា និងអឺរ៉ុប ។ បច្ចុប្បន្ននេះ ក្រុមហ៊ុន VinFast បានផ្តោតគោលដៅទៅលើទីផ្សារប្រទេសជិតខាងក្នុងតំបន់អាស៊ី ដូចជា ៖ ប្រទេសឥណ្ឌា, ឥណ្ឌូណេស៊ី, ថៃ និងហ្វីលីពីន ព្រមទាំងក្រុមប្រទេសនៅមជ្ឈិមបូព៌ា និងអាហ្វ្រិកផងដែរ ៕

ប្រទេសវៀតណាម ៖ ប្រទេសវៀតណាមបានប្រឈមនឹងហានិភ័យខ្ពស់ ខណៈការឆ្លងជំងឺពីសត្វទៅមនុស្សកើនឡើងជាបន្តបន្ទាប់ ហើយបើគិតចាប់តាំងពីដើមឆ្នាំ២០២៤នេះ មានពលរដ្ឋវៀតណាមបាន ស្លា.ប់ ដោយសារជំងឺឆ្កែ ឆ្កួ.ត យ៉ាងហោចចំនួន២៧នាក់ និង ស្លា.ប់ ដោយសារជំងឺផ្តាសាយបក្សី ចំនួនម្នាក់ ។ នេះបើយោងតាមការចុះផ្សាយរបស់សារព័ត៌មានបរទេស កាលពីថ្ងៃទី២៨ ខែមីនា ឆ្នាំ២០២៤ ។

សារព័ត៌មានស៊ិនហួរបានរាយការណ៍ពីទីក្រុងហាណូយ ប្រទេសវៀតណាម កាលពីថ្ងៃទី២៨ ខែមីនា ឆ្នាំ២០២៤ ថា លោក Phung Duc Tien ជាអនុរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម បានលើកឡើងក្នុងកិច្ចប្រជុំ ស្តីពី «ការពង្រឹងការការពារ និងទប់ស្កាត់ជំងឺឆ្លងពីសត្វមកមនុស្ស» ថា ស្ថានការណ៍នេះបានបង្ហាញពីការវិវឌ្ឍដ៏ស្មុគស្មាញរបស់ជំងឺ ដែលកំពុងតែកើតឡើងនៅប្រទេសវៀតណាម នាពេលបច្ចុប្បន្ន ។ លោកបន្តថា ការឆ្លងជំងឺនៅតាមព្រំដែន និងអាកាសធាតុក្តៅខ្លាំង គឺជាកត្តាចម្បងដែលបណ្តាលឱ្យមានការឆ្លងជំងឺពីសត្វមកមនុស្ស ។

បើតាមទិន្នន័យរបស់ក្រសួងសុខាភិបាលវៀតណាមបញ្ជាក់ថា ប្រទេសវៀតណាមបានរកឃើញមេរោគផ្តាសាយបក្សីលើមនុស្ស យ៉ាងហោចណាស់២នាក់ បើគិតចាប់ពីឆ្នាំ២០២២ មក និងមានអ្នកស្លាប់យ៉ាងហោចណាស់ម្នាក់ នៅខែមីនា ឆ្នាំ២០២៤ ។

ជាមួយគ្នានេះ អ្នកកើតជំងឺឆ្កែឆ្កួត ភាគច្រើនអាចប្រឈមនឹងការស្លាប់ ហើយកាលពីឆ្នាំ២០២៣ នៅប្រទេសវៀតណាមមានពលរដ្ឋស្លាប់ដោយសារជំងឺឆ្កែឆ្កួត ចំនួន៨២នាក់ ។ រីឯរយៈពេល៣ខែដំបូងនៃឆ្នាំ២០២៤ (គឺចាប់ពីខែមករា រហូតដល់ខែមីនា) មានពលរដ្ឋវៀតណាមស្លាប់ដោយសារជំងឺឆ្កែឆ្កួត ចំនួន២៧នាក់ និងមានអ្នកឆ្លងជំងឺនេះកាន់តែច្រើន ជាពិសេស នៅតំបន់ខ្ពង់រាបកណ្តាល ៕

នៅពេលដែលអាកាសធាតុក្ដៅហួតហែងខ្លាំងពេក មានតែម៉ាស៊ីនត្រជាក់ប៉ុណ្ណោះដែលអាចជួយបាន ប៉ុន្តែការប្រើម៉ាស៊ីនត្រជាក់ច្រើនច្បាស់ជាធ្វើឱ្យថ្លៃភ្លើងប្រចាំខែអស់ច្រើនលើសពីធម្មតាដោយសារវាប្រើប្រាស់ថាមពលភ្លើងច្រើន។ ទោះជាយ៉ាងណា វិធី ៤ យ៉ាងខាងក្រោមនេះនឹងជួយសន្សំសំចៃថវិកាបានមួយកម្រិតពេលប្រើម៉ាស៊ីនត្រជាក់នារដូវក្ដៅបែបនេះ៖

១.កុំកំណត់សីតុណ្ហភាពទាបពេក៖ បើយោងតាមវិទ្យាស្ថានស្រាវជា្រវ The Energy and Resources Institute របស់ឥណ្ឌាបានបង្ហាញថាបើសិនជាប្ដូរពីការកំណត់សីតុណ្ហភាព ១៨-២១ អង្សាសេ មកដល់ ២៤ អង្សាសេ អាចជួយសន្សំសំចៃថវិកាបានជិត ៥៣ដុល្លារក្នុងមួយឆ្នាំ ហើយការប្ដូរពី ១៨-២១ អង្សាសេ មកដល់ ២៧ អង្សាសេ អាចសន្សំសំចៃបាន ៨៦ដុល្លារ។ នេះបង្ហាញថាការកំណត់កម្រិតសីតុណ្ហភាពរបស់ម៉ាស៊ីនត្រជាក់គឺអាចឱ្យអ្នកសន្សំសំចៃថវិកាបាន។

២.កំណត់ឱ្យបិទស្វ័យប្រវត្តិ៖ តាមរយៈតេឡេម៉ាស៊ីនត្រជាក់ អ្នកអាចកំណត់ឱ្យម៉ាស៊ីនត្រជាក់បិទស្វ័យប្រវត្តិនៅពេលទៀបភ្លឺ ដែលជាពេលសីតុណ្ហភាពខាងក្រៅចាប់ផ្ដើមចុះត្រជាក់ ហើយអ្នកអាចពឹងផ្អែកលើកង្ហារតែឯងបាន។

៣.ប្រើកង្ហារបន្ថែម៖ ម៉ាស៊ីនត្រជាក់ និងកង្ហារអាចផ្ដល់នូវប្រសិទ្ធភាពខ្ពស់បំផុតពេលដំណើរការជាមួយគ្នា។ កង្ហារអាចបាញ់ខ្យល់ត្រជាក់ដែលចេញពីម៉ាស៊ីនត្រជាក់ចំទីតាំងដែលអ្នកចង់បាន ហើយវាអាចជួយឱ្យញើសលើខ្លួនឆាប់ស្ងួត បង្កើតជាភាពត្រជាក់លើស្បែកបានយ៉ាងមានប្រសិទ្ធភាព និងលឿនបំផុត។

៤.សម្អាតតម្រងម៉ាស៊ីនត្រជាក់៖ ប្រសិនបើចង់សន្សំសំចៃឱ្យបានច្រើនមែននោះ ការលាងសម្អាតតម្រងម៉ាស៊ីនត្រជាក់ជាប្រចាំនឹងអាចជួយបាន។ តម្រងម៉ាស៊ីនត្រជាក់ដែលមានកកស្ទះដោយកម្ទេចធូលីច្រើន នឹងធ្វើឱ្យម៉ាស៊ីនត្រជាក់ខំធ្វើការរឹតតែខ្លាំងដើម្បីបញ្ចេញខ្យល់ត្រជាក់ ដែលចំណាយថាមពលច្រើន។ ការសម្អាតតម្រងខ្យល់នេះដែរគឺងាយស្រួលបំផុត ដែលអ្នកអាចធ្វើបានដោយខ្លួនឯង និងមិនពឹងពាក់អ្នកសម្អាតនោះទេ៕