ដោយសង្កេតឃើញថា បច្ចុប្បន្ននេះនៅទូទាំងពិភពលោក មិនថានៅអាស៊ី ឬអឺរ៉ុបទេ កម្តៅផែនដីបានកើនឡើងឆាប់រហ័សនិងខ្លាំងទៅៗពីមួយឆ្នាំទៅមួយឆ្នាំ។ ហើយបើយោងតាមប្រភពសារព័ត៌មានថៃបានលើកឡើងថា សីតុណ្ហភាពប្រទេសខ្លួនក៏ដូចជាប្រទេសក្បែរខាងរួមទាំងកម្ពុជា នៅក្នុងខែមេសានេះ អាចនឹងឡើងកម្តៅដល់ចន្លោះ ៤៣-៤៥ អង្សាសេ។

ជាមួយគ្នានេះ យោងតាមគេហទំព័រ Charity Digital កាលពីពេលថ្មីៗគឺបានគូសបញ្ជាក់អំពីមូលហេតុចម្បងៗនៃការឡើងកម្តៅផែនដីប្រចាំឆ្នាំ ២០២៤។ តាមការសិក្សាស្រាវជ្រាវបានបង្ហាញថា ការប្រែប្រួលអាកាសធាតុនេះ គឺវាទាក់ទងទៅនឹងការបំភាយកាបូន ការបំផ្លិចបំផ្លាញជីវចម្រុះ សត្វព្រៃ និងព្រៃឈើ ការរលាយដុំទឹកកកតំបន់ប៉ូល ការកើនឡើងកម្រិតទឹកសមុទ្រ និងការដួលរលំនៃចរន្តទឹកសមុទ្រសំខាន់ៗ។

ចាប់តាំងពីពាក់កណ្តាលទសវត្សរ៍ឆ្នាំ ១៨០០ មក មនុស្សគឺជាកត្តាមួយចម្បងក្នុងការបញ្ចេញឧស្ម័នផ្ទះកញ្ចក់(កាបូនឌីអុកស៊ីត) ទៅក្នុងខ្យល់ ភាគច្រើនតាមរយៈការប្រើប្រាស់ប្រេង ឧស្ម័ន និងធ្យូងថ្មសម្រាប់ផ្ទះ រោងចក្រ និងការដឹកជញ្ជូន ក៏ដូចជាតាមរយៈវិធីសាស្រ្តកសិកម្មទំនើប និងការកាប់បំផ្លាញព្រៃឈើជាដើម ដែលជាហេតុបណ្តាលឱ្យសីតុណ្ហភាពកើនឡើង។

ផែនដីបានបំបែកកំណត់ត្រាក្តៅខ្លាំងបំផុតកាលពីឆ្នាំ ២០២៣ ដែលចំពោះសហភាពអឺរ៉ុបបានរកឃើញថាកម្រិត ១.៤៨°C ក្តៅជាងមធ្យមភាគមុនឧស្សាហកម្ម។ សីតុណ្ហភាពពិភពលោកកាន់តែក្តៅក្នុងឆ្នាំ ២០២៣ បាននាំមកនូវព្រឹត្តិការណ៍ និងគ្រោះមហន្តរាយនៅទូទាំងពិភពលោក រួមមាន រលកកម្តៅដ៏សាហាវនៅក្នុងរដូវក្តៅនៃអឌ្ឍគោលខាងជើង ការបំផ្លិចបំផ្លាញដោយភ្លើងឆេះព្រៃនៅក្នុងប្រទេសកាណាដា និងកោះហាវ៉ៃ និងភ្លៀងធ្លាក់ខ្លាំងបំផុតនៅកន្លែងជាច្រើនរួមទាំងប្រទេសកូរ៉េ អាហ្វ្រិកខាងត្បូង និងប្រទេសចិន។

កាលពីឆ្នាំ ២០២៣ នេះទៀតសោត កម្រិតទឹកក្តៅបំផុតក៏បានលេចឡើងនៅក្នុងកំណត់ត្រាមហាសមុទ្រពិភពលោកផងដែរ ដែលជាង ៩០% នៃកម្តៅបានមកពីការឡើងកម្តៅផែនដីដែលជាហេតុបណ្តាលឲ្យឡើងកម្តៅមហាសមុទ្រពិភពលោក។ ម៉្យាងវិញទៀត សីតុណ្ហភាពមហាសមុទ្រគឺជាសូចនាករច្បាស់លាស់ដែលបង្ហាញថាភពផែនដីយើងឡើងកម្តៅពីមួយឆ្នាំទៅមួយឆ្នាំ។ ជាមួយគ្នានោះ វិសាលភាពនៃទឹកកកសមុទ្រនៅក្នុងតំបន់ប៉ូលរបស់ផែនដី គឺធ្លាក់ដល់ទាបបំផុតក្នុងប្រវត្តិសាស្រ្តកាលពីពេលថ្មីៗនេះ។

សម្រាប់ឆ្នាំ ២០២៤នេះ តាមការសិក្សាបានបង្ហាញថា វានឹងបន្ថែមកម្រិតសីតុណ្ហភាពសកលជាមធ្យមលើសពី ១.៥°C លើសកម្រិតមុនឧស្សាហកម្ម ដែលនឹងបង្កគ្រោះថ្នាក់មួយកម្រិតបន្ថែមទៀតដល់មនុស្សជាតិលើពិភពលោកទាំងមូលផងដែរ៕

ប្រទេសចិន ៖ សារព័ត៌មានបរទេសរាយការណ៍ថា ក្នុងអំឡុងពេលភ្ញៀវទេសចរដើរកម្សាន្តនៅឆ្នេរសមុទ្រសុខៗ ស្រាប់តែនារីៗបះសក់ត្រង់ឡើងលើដោយពុំដឹងមូលហេតុ ។ នៅពេលឃើញស្ថានការណ៍មិនស្រួល ពួកគេក៏ប្រញាប់នាំគ្នាឡើងជិះរថយន្តចេញពីឆ្នេរសមុទ្រនេះភ្លាមៗ ព្រោះខ្លាចមានហេតុការណ៍ អាក្រ.ក់ កើតឡើង ។ ប៉ុន្តែអ្នកជំនាញនិយាយថា បើជួបហេតុការណ៍បែបនេះ កុំអាលប្រញាប់រត់ ។

គេហទំព័រ Sohu រាយការណ៍ថា កាលពីឆ្នាំ២០២៣ មានភ្ញៀវទេសចរប្រុស-ស្រីមួយក្រុមបានជិះរថយន្តមកលេងនៅឆ្នេរសមុទ្រទីក្រុង Turpan តំបន់ស្វយ័ត Xinjiang Uyghur ប្រទេសចិន ។ ពេលមកដល់ឆ្នេរនេះ ស្រាប់តែនារីៗបះសក់ឡើងលើ ហើយពួកគេក៏ថតរូបភាពបង្ហោះក្នុងបណ្តាញសង្គម ធ្វើឱ្យអ្នកលេងបណ្តាញសង្គមចែកចាយរូបភាពទាំងនេះជាច្រើន ។

អ្វីដែលគួរឱ្យចម្លែកចិត្តនោះ គឺពួកនាងៗបានបះសក់ឡើងលើក្នុងពេលដំណាលគ្នាពេលឈរនៅទីវាល ។ ហេតុនេះ ពួកនាងក៏សម្រេចចិត្តជិះរថយន្តចេញពីឆ្នេរនេះយ៉ាងប្រញាប់ ប៉ុន្តែបន្ទាប់ពីរថយន្តបើកចេញពីឆ្នេរប្រមាណ៣គីឡូម៉ែត្រ សក់របស់ពួកនាងក៏មានសភាពធម្មតាវិញ ។

ពេលឃើញរូបទាំងនេះ មហាជនណែនាំថា បើកើតហេតុការណ៍បែបនេះ ត្រូវតែប្រញាប់រត់ចេញពីកន្លែងនោះឱ្យបានឆាប់បំផុត ពីព្រោះវាអាចជាសញ្ញាគ្រោះថ្នាក់ប្រាប់ថា នឹងមានរន្ទះបាញ់កើតឡើង ។ ប៉ុន្តែអ្នកជំនាញនិយាយថា ពេលខ្លះ ការរត់គេចមិនមែនជាជម្រើសល្អសម្រាប់អ្នកដែលស្ថិតក្នុងហេតុការណ៍ខាងលើទេ ។

លោក Feng Minxue នាយកមជ្ឈមណ្ឌលការពាររន្ទះបាញ់ប្រចាំខេត្ត Jiangsu លើកឡើងថា ល្បឿនរបស់រន្ទះបាញ់លឿនខ្លាំងណាស់ ហើយការរត់គេច មិនមែនជាវិធីល្អបំផុតទេ ។ ផ្ទុយទៅវិញ វាអាចនឹងជំរុញចរន្តអគ្គិសនីឱ្យកាន់តែខ្លាំងថែមទៀត រហូតដល់មានគ្រោះថ្នាក់បាន ។

ចំណែកវិធីការពារខ្លួនពីរន្ទះបាញ់ រួមមាន ៖ បម្លាស់ទីពីកន្លែងខ្ពស់ភ្លាមៗ ដូចជា ៖ កំពូលភ្នំ, ជម្រាលភ្នំ ឬដំបូលអគារ ។ ក្រៅពីនេះ ត្រូវនៅឆ្ងាយពីកន្លែងល្ហល្ហេវ, កុំដេកលើឥដ្ឋ, កុំជ្រកក្រោមដើមឈើ និងកុំនៅក្នុងរណ្តៅរាក់ ៕

សហរដ្ឋអាមេរិក៖ ក្រុមហ៊ុន Apple បានប្រកាសកាលពីពេលថ្មីៗនេះថា iPhone 6 និង iPhone 6 Plus របស់ខ្លួនលែងប្រើហើយនៅទូទាំងពិភពលោក មានន័យថាជាឧបករណ៍ហួសសម័យ ដោយសារគ្រឿងបន្លាស់របស់ផលិតផលនេះអស់ស្តុក និងមិនមានការបញ្ជាទិញ ឬការជួសជុលទៀតឡើយ ហើយក្រុមហ៊ុនក៏មិនធានាសម្រាប់ផលិតផលនេះទៀតដែរ។

បើយោងតាម MacRumors ដែលបានចុះផ្សាយនៅថ្ងៃទី១ ខែមេសា ឆ្នាំ២០២៤ ក៏បានឱ្យដឹងទៀតថា ក្រុមហ៊ុន Apple បានប្រមូលឧបករណ៍ចាស់ៗមួយចំនួនរបស់ខ្លួន ចូលទៅក្នុងបញ្ជីផលិតផលហួសសម័យ ដោយក្នុងនោះក៏មាន iPad Mini 4, iPhone 6 និង iPhone 6 Plus ផងដែរ។ Apple បាននិយាយថា ផលិតផលណាដែលប្រើអស់រយៈពេល ៧ ឆ្នាំគឺគិតចាប់ពីការចេញលក់រហូតមកដល់ពេលនេះ ត្រូវបានចាត់ទុកថាជាឧបករណ៍ហួសសម័យ។

iPhone 6 និង iPhone 6 Plus បានចេញលក់ដំបូងក្នុងខែកញ្ញា ឆ្នាំ ២០១៤ ជាមួយនឹងមុខងារសំខាន់ៗ រួមមានអេក្រង់ធំជាងម៉ូដែលមុន និងជំនួយ Apple Pay ។ ក្នុងខែកញ្ញា ឆ្នាំ ២០១៦ ផលិតផលនេះត្រូវបានក្រុមហ៊ុនឈប់ផលិតប៉ុន្តែនៅតែអាចរកឃើញបានតាមហាងតូចៗនៅក្នុងបណ្តាប្រទេសមួយចំនួន។ iPhone 6 និង iPhone 6 Plus គឺជាខ្សែទូរស័ព្ទ iPhone ដែលលក់ដាច់បំផុតក្នុងប្រវត្តិសាស្ត្ររបស់ Apple។ យោងតាមទិន្នន័យ ស្មាតហ្វូនទាំងពីរនេះ លក់បានច្រើនជាង ២២០ លានគ្រឿង ចាប់តាំងពីការបង្ហាញខ្លួនរបស់ពួកគេនៅក្នុងខែកញ្ញា ២០១៤។

ខណៈពេលដែលអ្នកប្រើប្រាស់មួយចំនួននៅតែកំពុងប្រើប្រាស់វា អ្នកប្រើប្រាស់ iPhone 6 ភាគច្រើនបានដំឡើងកំណែទៅម៉ូដែលថ្មីជាងនេះតាមពេលវេលា។ ទោះជាយ៉ាងណា iPhone 6 Plus ក៏មិនអាចអាប់ដេតទៅកំណែ iOS ណាមួយដែលខ្ពស់ជាង iOS 12 ចាប់តាំងពីឆ្នាំ ២០១៨ មកដែរ ដោយសារកម្មវិធីមួយចំនួនបានឈប់គាំទ្រកំណែ iOS ចាស់នេះ។ ដូច្នេះហើយ យល់ល្អអ្នកមិនគួរទិញផលិតនេះទៀតទេ ព្រោះវាជាឧបករណ៍ហួសសម័យមិនមានគ្រឿងបន្លាស់ម្រាប់ផ្លាស់ប្តូរ ក៏ដូចជាមិនមានការធានាដូចមុនឡើយ។

គួរបញ្ជាក់ដែរថា ថ្មីៗនេះក្រុមហ៊ុន Apple ក៏បានបន្ថែមស្មាតហ្វូនរបស់ខ្លួនគឺ iPhone 8 និង iPhone 8 Plus ចូលទៅក្នុងបញ្ជីផលិតផលហួសសម័យដែរ ប៉ុន្តែមិនទាន់ផ្លូវការនោះទេ ដូច្នេះឧបករណ៍នេះនៅតែអាចប្រើប្រាស់បានធម្មតា លើកលែងតែ iPhone 6 និង iPhone 6 Plus ដែលគេចាត់ទុកជាផលិតផលហួសសម័យ៕

សហរដ្ឋអាមេរិក ៖ ស្ត្រីជនជាតិអាមេរិកម្នាក់ឈ្មោះ ឡិចស៊ី អាល់ហ្វត បានទទួលជោគជ័យក្នុងការបើករថយន្តអគ្គិសនីធ្វើដំណើរជុំវិញពិភពលោកដំបូងគេ ។ នៅឆ្នាំ២០២៤នេះ អ្នកស្រីមានអាយុត្រឹមតែ២៥ឆ្នាំប៉ុណ្ណោះ បានបើករថយន្តអគ្គិសនីក្នុងចម្ងាយផ្លូវជាង៣ម៉ឺនគីឡូម៉ែត្រ ទៅកាន់២៧ប្រទេស និងឆ្លងកាត់ទ្វីបចំនួន៦ ហើយកាលពីថ្ងៃទី២៦ ខែមីនា ឆ្នាំ២០២៤ អ្នកស្រីក៏បានបើករថយន្តមកដល់ចំណុចគោលដៅនៅទីក្រុងនីស ប្រទេសបារាំង ។

ក្រោយទទួលលិខិតបញ្ជាក់ការធ្វើដំណើររបស់ខ្លួនពីស្ថាប័ន Record Setter ដែលស្រដៀងគ្នានឹង Guinness World Records អ្នកស្រី ឡិចស៊ី អាល់ហ្វត និយាយថា ៖ «ខ្ញុំនិយាយមិនចេញទេ ហើយខ្ញុំមានអារម្មណ៍ថា មានកិត្តិយសខ្លាំងណាស់ ។ វាជាឥទ្ធិពលយ៉ាងពិសេសក្នុងជីវិតរបស់ខ្ញុំ ដែលបានធ្វើដំណើរជុំវិញពិភពលោកតាមរថយន្តអគ្គិសនី ហើយរយៈពេល២០០ថ្ងៃកន្លងមកនេះ ខ្ញុំហត់នឿយខ្លាំងនៅតាមផ្លូវ» ។

ភារកិច្ចការធ្វើដំណើរជុំវិញពិភពលោក និងត្រូវសាកថ្មរថយន្តអគ្គិសនីជាបន្តបន្ទាប់នឡ បានចាប់ផ្តើមឡើងកាលពីថ្ងៃទី៨ ខែកញ្ញា ឆ្នាំ២០២៣ ។ រីឯការធ្វើដំណើរនៅតាមផ្លូវ អ្នកស្រី ឡិចស៊ី អាល់ហ្វត ត្រូវប្រឈមនឹងបញ្ហាជាច្រើន ដូចជា ៖ អាកាសធាតុត្រជាក់ខ្លាំង, ដាច់ចរន្តអគ្គិសនីនៅអាហ្វ្រិក, ខ្វះខាតកន្លែងសាកថ្មរថយន្តអគ្គិសនីនៅសមុទ្រខ្សាច់ប្រទេសឈីលី មុនពេលអ្នកស្រីបានបើករថយន្តមកដល់ចំណុចចាប់ផ្តើមនៃការធ្វើដំណើរលើកនេះ នៅទីក្រុងនីស ស្ថិតនៅភាគខាងត្បូង ប្រទេសបារាំង ។

បើតាមទិន្នន័យរបស់ក្រុមហ៊ុន Ford Motor បញ្ជាក់ថា រថយន្តអគ្គិសនីដែលអ្នកស្រី ឡិចស៊ី អាល់ហ្វត បើកធ្វើដំណើរជុំវិញពិភពលោកលើកនេះ អាចបើកបរក្នុងចម្ងាយផ្លូវជាង៦០០គីឡូម៉ែត្រ សម្រាប់ការសាកថ្មរថយន្តម្តង ។ ក្នុងការធ្វើដំណើររយៈពេល៦ខែ អ្នកស្រី ឡិចស៊ី អាល់ហ្វត បានសាកថ្មរថយន្តអគ្គិសនីជាច្រើនវិធី ដូចជា ៖ ការសាកថ្មរហ័ស, សាកនៅតាមលំនៅឋាន, សាកតាមបន្ទះសូឡា និងសាកថ្មដាក់តាមខ្លួន ជាដើម ។ អ្នកស្រី ឡិចស៊ី អាល់ហ្វត ប្រាប់ថា ការធ្វើដំណើរនេះនឹងធ្វើឱ្យមនុស្សគ្រប់គ្នាឃើញថា យើងអាចបើកបររថយន្តអគ្គិសនីបានជារៀងរាល់ថ្ងៃ ។

ចំណែកនាយកគ្រប់គ្រងទូទៅរបស់ក្រុមហ៊ុន Ford Motor នៅអឺរ៉ុបបញ្ជាក់ថា វាជាការគម្រប់ខួប១០០ឆ្នាំ របស់អ្នកស្រី អាឡូហា វ៉ាន់ដឺវើល គឺជាស្ត្រីដំបូងគេដែលធ្វើដំណើរជុំវិញពិភពលោកតាមរថយន្ត ហើយនៅឆ្នាំ២០២៤នេះ អ្នកស្រី ឡិចស៊ី អាល់ហ្វត ក៏បានធ្វើដំណើរជុំវិញពិភពលោកតាមរថយន្តដូចគ្នាដែរ ។

គួរបញ្ជាក់ថា នេះមិនមែនជាការបំបែកកំណត់ត្រាលើកដំបូងលើពិភពលោករបស់អ្នកស្រី ឡិចស៊ី អាល់ហ្វត ទេ ពីព្រោះកាលពីអ្នកស្រីមានអាយុ២១ឆ្នាំ Guinness World Records បានចុះក្នុងកំណត់ត្រាថា អ្នកស្រីជាបុគ្គលមានអាយុតិចបំផុត និងជាស្ត្រីមានអាយុតិចបំផុត ដែលបានធ្វើដំណើរទៅគ្រប់ប្រទេសអធិបតេយ្យ ៕

ប្រទេសម៉ិកស៊ិក ៖ សារព័ត៌មានបរទេសបានចុះផ្សាយពីហេតុការណ៍គួរឱ្យភ័យខ្លាចមួយ គឺយុវជនមួយក្រុមបានបបួលគ្នាទៅបោះតង់សម្រាកនៅឆ្នេរសមុទ្រ ប៉ុន្តែនៅសុខៗ ស្រាប់តែមានរឿងនឹកស្មានពុំដល់កើតឡើង ។ យុវជនទាំងនេះបានបោះតង់សម្រាកនៅក្បែរៗគ្នា ក្រោយពីសម្រាកលក់បានបន្តិច យុវជនម្នាក់ក៏ភ្ញាក់ដឹងខ្លួន និងឃើញក្រពើដ៏ធំ១ក្បាលដេកនៅក្បែរមិត្ត ប៉ុន្តែរូបគេពុំហ៊ានដាស់មិត្តទេ ព្រោះខ្លាចក្រពើខាំ ។

ហេតុការណ៍នេះបានកើតឡើងនៅឆ្នេរសមុទ្រទីក្រុង Jalisco ប្រទេសម៉ិកស៊ិក ដោយក្នុងវីដេអូបង្ហាញថា យុវជនទាំងនេះបាននាំគ្នាមកដេកហាលថ្ងៃ និងបោះតង់សម្រាកនៅឆ្នេរសមុទ្រ ។ នៅពេលយុវជនម្នាក់ឃើញក្រពើ រូបគេពុំហ៊ានដាស់មិត្តឱ្យភ្ញាក់ទេ ពីព្រោះខ្លាចមិត្តភ្ញាក់ផ្អើល ហើយស្រែកខ្លាំងៗ ។ ដូច្នេះ វានឹងធ្វើឱ្យក្រពើងាកទៅស៊ីមិត្តរបស់ខ្លួន ប៉ុន្តែសំណាងល្អ គ្មានអ្នកណាម្នាក់មានគ្រោះថ្នាក់ដោយសារក្រពើខាំទេ ។

អាជ្ញាធរប្រចាំឆ្នេរសមុទ្រទីក្រុង Jalisco បានដាស់តឿនឱ្យភ្ញៀវទេសចរទាំងអស់ប្រុងប្រយ័ត្នខ្លួន នៅពេលពួកគេបោះតង់សម្រាកនៅឆ្នេរសមុទ្រនេះ ដោយសារអាជ្ញាធរព្រួយបារម្ភពីសុវត្ថិភាពរបស់ភ្ញៀវទេសចរ ហើយពួកគេអាចមិនជួបសំណាងល្អដូចហេតុការណ៍នេះទេ ។

វីដេអូនេះត្រូវបានគេចែកចាយក្នុងបណ្តាញសង្គម និងធ្វើឱ្យមហាជនភ្ញាក់ផ្អើលដោយសារឃើញរូបភាពនេះ ។ មនុស្សមួយចំនួននិយាយថា បើជួបហេតុការណ៍នេះវិញ
ពួកគេនឹងមិនរួចខ្លួនទេ ខណៈអ្នកខ្លះទៀតនិយាយថា អ្នកថតវីដេអូនេះកំពុងតែរង់ចាំឱ្យក្រពើខាំមិត្តរបស់ខ្លួន ។ រីឯអ្នកខ្លះទៀតថា អ្នកថតវីដេអូអាចលេងសើចជាមួយមិត្តភក្តិក៏ថាបាន ពីព្រោះមើលទៅក្រពើនោះ គ្មានជីវិតទេ ។

គេជឿថា សត្វក្រពើបានផ្លាស់ទីលំនៅមកកាន់ឆ្នេរសមុទ្រ Boca de Iguanas ដែលស្ថិតនៅភាគខាងលិចប្រទេសម៉ិកស៊ិក ដោយសារតែនៅទីនេះ សម្បូរចំណីអាហារ និងកាកសំណល់ផ្សេងៗ ដែលគេបោះចោលនៅក្បែរកន្លែងបោះតង់ ។

ក្រោយកើតហេតុការណ៍នេះ រដ្ឋាភិបាលម៉ិកស៊ិកបានប្រកាសទៅកាន់ភ្ញៀវទេសចរថា ពេលមកកម្សាន្តនៅឆ្នេរសមុទ្រ ភ្ញៀវទេសចរម្នាក់ៗត្រូវទុកដាក់កាកសំណល់អាហារឱ្យបានត្រឹមត្រូវ និងទុកឱ្យឆ្ងាយពីប្រភពទឹក ។ បើមិនធ្វើបែបនេះទេ សត្វសាហាវផ្សេងៗនឹងមករកកាកសំណល់ទាំងនេះ ហើយវាអាចបណ្តាលឱ្យភ្ញៀវទេសចរមានគ្រោះថ្នាក់ដល់ជីវិត ៕

បរទេស៖ អាឡឺម៉ង់បានក្លាយជាប្រទេសសហភាពអឺរ៉ុបដ៏ធំបំផុតក្នុងការធ្វើឱ្យស្របច្បាប់នូវកញ្ឆាកម្សាន្ត ទោះបីជាមានការប្រឆាំងពីអ្នកនយោបាយបក្សប្រឆាំង និងសមាគមវេជ្ជសាស្ត្រក៏ដោយ។
កាលពីថ្ងៃទី១ ខែមេសា ឆ្នាំ២០២៤ បើយោងតាម CNN បានឱ្យដឹងថា ប្រទេសអាល្លឺម៉ង់បានចេញច្បាប់ថ្មីដោយអនុញ្ញាតឱ្យមនុស្សដែលមានអាយុលើសពី ១៨ ឆ្នាំកាន់កញ្ឆា ២៥ ក្រាម និងដាំដើមកញ្ឆារហូតដល់បីនៅផ្ទះ។ ការផ្លាស់ប្តូរនេះធ្វើឱ្យប្រទេសអាឡឺម៉ង់ក្លាយជាប្រទេសមួយដែលមានច្បាប់កញ្ឆាសេរីបំផុតនៅអឺរ៉ុប បន្ទាប់ពីប្រទេសម៉ាល់តា និងលុចសំបួ ដែលបានធ្វើឱ្យស្របច្បាប់នូវកញ្ឆានៅឆ្នាំ ២០២១ និង ២០២៣ រៀងគ្នា។

នៅពេលដែលច្បាប់ថ្មីចូលជាធរមាននៅពាក់កណ្តាលអធ្រាត្រ មនុស្សរាប់ពាន់នាក់បានអបអរសាទរនៅពីមុខ Brandenbrug Gate ដែលជាកន្លែងសម្គាល់ទីក្រុងប៊ែកឡាំង ដោយមានមនុស្សជាច្រើនជក់កញ្ឆាដើម្បីអបអរ។ Niyazi អាយុ ២៥ ឆ្នាំបាននិយាយដោយសប្បាយរីករាយថានេះគឺជា “សេរីភាពបន្តិច” សម្រាប់ពួកគេ។ ជំហានបន្ទាប់នៅក្នុងច្បាប់កញ្ឆាថ្មីរបស់ប្រទេសអាឡឺម៉ង់ ដែលចូលជាធរមាននៅថ្ងៃទី១ ខែកក្កដាខាងមុខ នឹងអនុញ្ញាតឱ្យទិញកញ្ឆាស្របច្បាប់នៅ “ក្លឹបកញ្ឆា” មិនរកប្រាក់ចំណេញនៅទូទាំងប្រទេស។

ក្លឹបទាំងនេះត្រូវបានគ្រប់គ្រងដោយមន្ត្រីនិងអនុញ្ញាតឱ្យមានសមាជិករហូតដល់ ៥០០ នាក់ ក៏ដូចជាអាចចែកចាយបានរហូតដល់ ៥០ ក្រាមនៃកញ្ឆាក្នុងមនុស្សម្នាក់ក្នុងមួយខែ។ ទោះជាយ៉ាងណា ផែនការដំបូងរបស់រដ្ឋាភិបាលអាល្លឺម៉ង់ក្នុងការលក់កញ្ឆានៅក្នុងក្លឹបដែលមានអាជ្ញាប័ណ្ណត្រូវបានលុបចោលដោយសារតែការប្រឆាំងពីសហភាពអឺរ៉ុប ( EU )។ ប៉ុន្តែបច្ចុប្បន្នប្រទេសនេះកំពុងស្នើច្បាប់មួយផ្សេងទៀតដើម្បីសាកល្បងការលក់កញ្ឆានៅក្នុងហាងសាកល្បងមួយចំនួន។

រដ្ឋាភិបាលរបស់នាយករដ្ឋមន្ត្រី Olaf Scholz អះអាងថា ការធ្វើស្របច្បាប់នូវកញ្ឆានឹងរារាំងទីផ្សារងងឹតនៃកញ្ឆាពីការរីកលូតលាស់។ ទោះជាយ៉ាងណាក៏ដោយ ក្រុមវេជ្ជសាស្ត្របារម្ភថា ការធ្វើឱ្យកញ្ឆាស្របច្បាប់អាចនាំឱ្យមានការកើនឡើងនៃការប្រើប្រាស់សារធាតុក្នុងចំនោមមនុស្សវ័យក្មេង ដែលជាហេតុនាំឱ្យមានគ្រោះថ្នាក់ដល់សុខភាព។ រដ្ឋមន្ត្រីក្រសួងសុខាភិបាលលោក Karl Lauterbach ដែលជាវេជ្ជបណ្ឌិតក៏បានព្រមានផងដែរថា ការប្រើប្រាស់កញ្ឆាអាចមានគ្រោះថ្នាក់ ជាពិសេសសម្រាប់មនុស្សវ័យក្មេង។

រដ្ឋាភិបាលអាឡឺម៉ង់បានប្តេជ្ញាចិត្តក្នុងយុទ្ធនាការព័ត៌មានមួយ ដើម្បីបង្កើនការយល់ដឹងអំពីហានិភ័យនៃការប្រើប្រាស់កញ្ឆា ទន្ទឹមនឹងការពង្រឹងកម្មវិធីគាំទ្រផងដែរ។ រដ្ឋាភិបាលក៏បានសង្កត់ធ្ងន់ថា វានៅតែត្រូវបានហាមឃាត់សម្រាប់មនុស្សដែលមានអាយុក្រោម ១៨ ឆ្នាំក្នុងការប្រើកញ្ឆា ក៏ដូចជាហាមឃាត់មិនឱ្យសារធាតុនេះលេចឡើងក្នុងចម្ងាយ ១០០ ម៉ែត្រពីសាលារៀន មត្តេយ្យ និងសួនកម្សាន្ត៕