យើងបានជ្រាបហើយថា បច្ចុប្បន្ន អាកាសធាតុកាន់តែក្តៅខ្លាំងពីមួយថ្ងៃទៅមួយថ្ងៃ រហូតធ្វើឱ្យមនុស្សជាច្រើនប្រឈមនឹងការដាច់សរសៃឈាមខួរក្បាល ។ អាកាសធាតុក្តៅខ្លាំងបានបណ្តាលឱ្យប៉ះពាល់សុខភាព និងជីវិតមនុស្សយ៉ាងខ្លាំង ហើយមនុស្សភាគច្រើនពុំជ្រាបថា ការជ្រើសរើសសម្លៀកបំពាក់ជារឿងសំខាន់ ជាពិសេស ការជ្រើសរើសពណ៌អាវ ដែលអាចជួយការពារគ្រោះថ្នាក់ពីអាកាសធាតុក្តៅ ។

លោក Toshiaki Ichinose ជាអ្នកស្រាវជ្រាវមកពីវិទ្យាស្ថានជាតិការស្រាវជ្រាវបរិស្ថានប្រទេសជប៉ុន បានយកអាវចំនួន៩ មកសាកល្បងជាមួយកំដៅថ្ងៃ ដែលអាវទាំងនេះផលិតពីសាច់ក្រណាត់ដូចគ្នា ប៉ុន្តែមានពណ៌ខុសគ្នា ។ លោក Toshiaki Ichinose ចង់ដឹងថា តើអាវមានពណ៌ខុសៗគ្នានេះ នឹងផ្ទុកកំដៅកម្រិតណា? ដូច្នេះ លោកបានយកអាវទាំង៩ពណ៌ មកតម្រៀបនៅកណ្តាលថ្ងៃ ចំនួន៥នាទី ក្នុងសីតុណ្ហភាព ៣០អង្សារសេ ។

លោក Toshiaki Ichinose បានយកអាវមានពណ៌ផ្សេងៗគ្នាមកសាកល្បង ដូចជា ៖ ពណ៌ក្រហម, ស, ខៀវ, បៃតងចាស់, ប្រផេះ, ខ្មៅ, ស្វាយ, លឿង និងបៃតងខ្ចី ។ រីឯលទ្ធផលការសាកល្បងរកឃើញថា សីតុណ្ហភាពរបស់ផ្ទៃអាវបានផ្លាស់ប្តូរ ដូចជា ៖

-ពណ៌អាវដែលមានសីតុណ្ហភាពទាបបំផុត គឺពណ៌ស និងលឿង (មានសីតុណ្ហភាព ចាប់ពី៣០អង្សារសេ ទៅ៣៤អង្សារសេ)
-អាវមានសីតុណ្ហភាពខ្ពស់ជាងនេះបន្តិច គឺពណ៌ប្រផេះ, ក្រហម, ស្វាយ និងខៀវ
-អាវមានសីតុណ្ហភាពខ្ពស់ គឺពណ៌បៃតងស្រាល និងបៃតងចាស់
-អាវមានសីតុណ្ហភាពខ្ពស់បំផុត គឺពណ៌ខ្មៅ (មានសីតុណ្ហភាពរហូតដល់៥០អង្សារសេ)

ហេតុនេះ អាវពណ៌ស និងពណ៌លឿង នឹងស្រូបយកកំដៅថ្ងៃតិចជាងពណ៌ផ្សេងៗ ទើបធ្វើឱ្យអ្នកពាក់អាវពណ៌ស និងពណ៌លឿង មានអារម្មណ៌ត្រជាក់ស្រួល ។ រីឯអាវពណ៌ខ្មៅ ពុំគួរពាក់នៅពេលអាកាសធាតុក្តៅខ្លាំងទេ ពីព្រោះពណ៌ខ្មៅបានស្រូបយកកំដៅខ្ពស់ ហើយវាអាចធ្វើឱ្យយើងប្រឈមនឹងការដាច់សរសៃឈាមខួរក្បាលទៀតផង ៕

អង្គការសហប្រជាជាតិបានព្រមានថា រលកកំដៅទ្រង់ទ្រាយធំនៅទូទាំងអាស៊ីបូព៌ា និងអាស៊ីប៉ាស៊ីហ្វិក អាចធ្វើឱ្យកុមាររាប់រយលាននាក់ប្រឈមនឹងហានិភ័យនៃជំងឺទាក់ទងនឹងកំដៅ។ នេះបើយោងតាមមូលនិធិកុមាររបស់អង្គការសហប្រជាជាតិ (UNICEF) កុមារជាង ២៤៣ លាននាក់នៅទូទាំងអាស៊ីបូព៌ា និងប៉ាស៊ីហ្វិកកំពុងប្រឈមនឹងហានិភ័យនៃជំងឺទាក់ទងនឹងកំដៅ និងការស្លាប់ ខណៈដែលតំបន់នេះត្រៀមសម្រាប់រដូវក្តៅនៃសីតុណ្ហភាពខ្ពស់ក្នុងប៉ុន្មានខែខាងមុខនេះ។

ការព្រមានអំពីរលកកំដៅកាន់តែញឹកញាប់ និងខ្លាំងក្នុងរដូវក្តៅនេះ គឺជាការព្រួយបារម្ភជាពិសេសនៅក្នុងតំបន់អាស៊ីបូព៌ា និងប៉ាស៊ីហ្វិក ដោយសារសំណើមខ្ពស់ធ្វើឱ្យរាងកាយពិបាកត្រជាក់តាមធម្មជាតិ។ យោងតាមមូលនិធិកុមាររបស់អង្គការសហប្រជាជាតិ ដោយសារតែកុមារមានលទ្ធភាពគ្រប់គ្រងសីតុណ្ហភាពរាងកាយតិចជាងមនុស្សពេញវ័យ ពួកគេងាយនឹងកើតជំងឺដែលទាក់ទងនឹងកំដៅ ដូចជាជំងឺផ្លូវដង្ហើមរ៉ាំរ៉ៃ ជំងឺហឺត និងជំងឺសរសៃឈាមបេះដូង។

លោកស្រី Debora Comini នាយកការិយាល័យប្រចាំតំបន់អាស៊ីបូព៌ា និងប៉ាស៊ីហ្វិករបស់ UNICEF បាននិយាយនៅក្នុងសេចក្តីថ្លែងការណ៍មួយកាលពីថ្ងៃទី១១ ខែមេសាថា “កុមារងាយរងគ្រោះជាងមនុស្សពេញវ័យចំពោះផលប៉ះពាល់នៃការប្រែប្រួលអាកាសធាតុ និងសីតុណ្ហភាពខ្ពស់ពេក គឺជាការគំរាមកំហែងដល់អាយុជីវិតរបស់ពួកគេ។ ដូច្នេះឪពុកម្តាយត្រូវប្រុងប្រយ័ត្នបន្ថែមក្នុងរដូវក្តៅនេះ ដើម្បីការពារកុមារ និងសហគមន៍ដែលងាយរងគ្រោះពីរលកកម្ដៅកាន់តែអាក្រក់ និងការវាយប្រហារដ៏សាហាវ។

ការព្រមានរបស់អង្គការសហប្រជាជាតិក៏បានឱ្យដឹងទៀតថា រដ្ឋាភិបាល អ្នកដឹកនាំធុរកិច្ច និងធនាគារអភិវឌ្ឍន៍ទាំងអស់ទូទាំងពិភពលោក មានពេលតែពីរឆ្នាំទៀតប៉ុណ្ណោះ ដើម្បីធ្វើសកម្មភាពបញ្ឈប់ការប្រែប្រួលអាកាសធាតុ កុំឱ្យកាន់តែអាក្រក់ទៅៗ។ ការព្រមានរបស់អង្គការសហប្រជាជាតិកើតឡើងចំពេលមានរបាយការណ៍ដែលថាខែមីនាគឺជាខែដ៏ក្តៅគគុកទី ១០ ជាប់ៗគ្នា ដែលធ្វើឱ្យប្រជាជននៅតំបន់ភាគច្រើននៃអឌ្ឍគោលខាងជើង និងខាងត្បូងប្រឈមនឹងសីតុណ្ហភាពដែលលើសពីគោលដៅអាកាសធាតុ។

នៅអាស៊ីអាគ្នេយ៍ ការព្រួយបារម្ភអំពីកំដៅខ្លាំងបានជំរុញឱ្យអាជ្ញាធរចេញសេចក្តីណែនាំ ឬចាត់វិធានការ។ ក្រសួងសុខាភិបាលសាធារណៈរបស់ប្រទេសថៃបានជំរុញឱ្យប្រជាជនបង្កើនការប្រុងប្រយ័ត្នប្រឆាំងនឹងជំងឺដាច់សរសៃឈាមក្នុងខ្លួន បន្ទាប់ពីមានអ្នកស្លាប់ពីរនាក់ត្រូវបានគេរាយការណ៍ក្នុងសប្តាហ៍នេះ។ រីឯប្រទេសហ្វីលីពីនវិញបានផ្អាកថ្នាក់រៀនផ្ទាល់នៅក្នុងទីក្រុងជាច្រើននៅទូទាំងប្រទេសកាលពីសប្តាហ៍មុន ហើយបានប្តូរទៅរៀនពីចម្ងាយដោយសារតែកំដៅ។

ហេតុនេះហើយ អង្គការសហប្រជាជាតិបាននិយាយថា ឪពុកម្តាយ និងអ្នកថែទាំត្រូវបានលើកទឹកចិត្តឱ្យបង្កើតកន្លែងត្រជាក់ជាងមុនសម្រាប់ក្មេងៗលេងនៅផ្ទះ និងសាលារៀន ដូច្នេះពួកគេអាចជៀសវាងការនៅខាងក្រៅ ហើយធានាថាកុមារស្លៀកសម្លៀកបំពាក់ដែលមានខ្យល់ចេញចូលល្អដើម្បីជួយសម្រួលសីតុណ្ហភាពរាងកាយ។ អង្គការបានបន្ថែមថា កុមារដែលបង្ហាញរោគសញ្ញានៃជំងឺដាច់សរសៃឈាមក្នុងខ្លួនត្រូវតែចូលមន្ទីរពេទ្យជាបន្ទាន់៕

ប្រទេសអាល្លឺម៉ង់ ៖ សារព័ត៌មានបរទេសបានរាយការណ៍កាលពីថ្ងៃទី១០ ខែមេសា ឆ្នាំ២០២៤ ថា មានឪពុកចិត្ត សាហា.វឃោ.រឃៅ ម្នាក់បានរួមគំនិតជាមួយសង្សារថ្មី ចាប់កូនស្រីរបស់ខ្លួនអាយុត្រឹម១ឆ្នាំ ចាក់បារ៉តកម្រិតខ្លាំងចំនួន២ម្ជុល ដើម្បី សងសឹ.ក ដោយសារអតីតភរិយាបានសុំលែងលះ ។

សារព័ត៌មាន The Mirror រាយការណ៍ថា ជម្លោះក្នុងគ្រួសារដ៏ក្តៅគគុកនេះបានកើតឡើងនៅប្រទេសអាល្លឺម៉ង់ ហើយជនល្មើស គឺលោក Alexander K អាយុ៣០ឆ្នាំ បានចោទប្រកាន់អ្នកស្រី Kathrin K ជាអតីតភរិយា ថា បានបោះបង់ចោលលោកកាលពីឆ្នាំ២០២៣ គឺក្នុងអំឡុងពេលកូនស្រីរបស់ពួកគេកើតបានត្រឹមតែ៤ថ្ងៃប៉ុណ្ណោះ ។ ហេតុនេះ ធ្វើឱ្យលោកប្រឈមនឹងបញ្ហាយ៉ាងខ្លាំង និងមានរោគសញ្ញាផ្លូវចិត្តធ្ងន់ធ្ងរ ទើបលោកមានគំនិតសងសឹកអតីតភរិយា ។

កាលពីខែកក្កដា ឆ្នាំ២០២៣ លោក Alexander K ជាគិលានុបដ្ឋាយិកាបានប្រព្រឹត្តបទល្មើសជាមួយសង្សារថ្មីរបស់ខ្លួន ដែលជាគិលានុបដ្ឋាយិកាដូចគ្នា គឺអ្នកទាំងពីរបាននាំគ្នាទៅលួចយកកូនស្រីអាយុ១ឆ្នាំ ពីអតីតភរិយា ។ បន្ទាប់មក ពួកគេក៏ចាប់ផ្តើមធ្វើសកម្មភាព ដោយម្នាក់ជាអ្នកចាប់ក្មេង និងម្នាក់ទៀតជាអ្នកចាក់បារ៉ត ចំនួន២ម្ជុល ដើម្បីសម្លាប់ក្មេង ។

ក្រោយពីជនល្មើសទាំង២រូបចាប់ក្មេងស្រីចាក់បារ៉តរួចហើយ ក្មេងស្រីមានអាការៈឈឺចុកចាប់ភ្លាមៗ ប៉ុន្តែសំណាងល្អ អ្នកស្រី Kathrin K ជាម្តាយបានរកឃើញភាពខុសប្រក្រតីរបស់កូនស្រីទាន់ពេលវេលា ហើយអ្នកស្រីក៏ប្រញាប់បញ្ជូនកូនស្រីទៅកាន់មន្ទីរពេទ្យដើម្បីសង្គ្រោះបន្ទាន់ ។ បន្ទាប់ពីសង្គ្រោះបន្ទាន់រួច លោកវេជ្ជបណ្ឌិតបញ្ជាក់ថា ជាតិបារ៉តធ្វើទុក្ខខ្លាំង ។

ក្នុងអំឡុងពេលព្យាបាលកូនស្រី អ្នកស្រី Kathrin K ក៏បានទំនាក់ទំនង និងដាក់ពាក្យបណ្តឹងទៅសមត្ថកិច្ច ដោយអ្នកស្រីនិយាយថា ៖ «ប្រសិនបើគ្រូពេទ្យពុំបានជួយសង្គ្រោះជីវិតកូនស្រីខ្ញុំទាន់ពេលវេលាទេនោះ ជាតិបារ៉តក្នុងរាងកាយនឹងសម្លាប់ទារកមិនខាន» ។

ក្រោយមក សមត្ថកិច្ចក៏បានចាប់ខ្លួនឪពុកឈ្មោះ Alexander K និងសង្សារថ្មី ព្រមទាំងចោទប្រកាន់ថា ជនល្មើសទាំង២នាក់ ព្យាយាមសម្លាប់ទារក ។ ក្នុងអំឡុងពេលសួរចម្លើយ លោក Alexander K សារភាពថា ៖ «ខ្ញុំធ្វើបែបនេះ ដោយសារចង់បំផ្លាញអតីតភរិយា ដើម្បីឱ្យនាងមានអារម្មណ៍ឈឺចាប់» ។ ក្រោយពីព័ត៌មាននេះបានចុះផ្សាយធ្វើឱ្យមហាជននៅប្រទេសអាល្លឺម៉ង់ភ្ញាក់ផ្អើលយ៉ាងខ្លាំង និងខឹងសម្បារជាមួយទង្វើដ៏ឃោរឃៅរបស់បុរសជាឪពុក ៕

ធ្លាប់តែឮថា រន្ទះ.បា.ញ់តែងកើតមាននៅរដូវវរស្សាព្រោះតែមានភ្លៀងធ្លាក់ជាញឹកញាប់ ប៉ុន្តែ សម្រាប់រដូវប្រាំងក្តៅហួតហែងវិញ បែរជាកើតមានរន្ទះបាញ់ជារឿយៗដែរ ខណៈក៏បានលេចឡើងនូវចម្ងល់ និងបង្កនូវភាពភ័យខ្លា.ចក្នុងចំណោមមនុស្សទូទាំងពិភពលោក។ ទោះជាយ៉ាងណា កាលពីថ្ងៃទី ៩ ខែមេសា ឆ្នាំ២០២៤ថ្មីៗនេះ យោងតាមការចុះផ្សាយមួយ បានលេចឡើងនូវករណីស្រ្តីវ័យ ៤៣ ឆ្នាំម្នាក់ត្រូវបានរ.ន្ទះបាញ់.ស្លា.ប់នៅខេត្តសៀមរាបផងដែរ។

-ហេតុអ្វីបានជារន្ទះបាញ់និងផ្គររន្ទះ បែរជាកើតមាននៅក្នុងរដូវប្រាំង?
តាមការសិក្សាស្រាវជ្រាវបានឲ្យដឹងថា ដោយសារតែការកើនឡើងនៃសីតុណ្ហភាពក្តៅខ្លាំងនិងសំណើមខ្ពស់ នឹងបង្កើតបានជារន្ទះបាញ់ ឬព្យុះផ្គររន្ទះ ដែលកើតមានញឹកញាប់នៅក្នុងរដូវវស្សា និងសូម្បីតែនៅរដូវក្តៅ ជាពិសេសនៅតំបន់ដែលសើមខ្លាំង។ សំណើមខ្ពស់ រួមជាមួយនឹងសីតុណ្ហភាពក្តៅ បង្កើតបានជាម៉ាសខ្យល់ក្តៅ និងសំណើមកើនឡើងទៅក្នុងបរិយាកាស។

-សង្កេតអំពីភាពមិនទៀងទាត់នៃខ្យល់ ដែលជាដើមហេតុនៃការបង្កឲ្យមានឲ្យរន្ទះបាញ់
រន្ទះបាញ់ នឹងកើតមាននៅពេលបរិយាកាសផ្លាស់ប្តូរយ៉ាងឆាប់រហ័សភ្លាមៗ។ ភាពមិនទៀងទាត់នៃខ្យល់គឺ កើតឡើងនៅពេលដែលខ្យល់កាន់តែក្តៅខ្លាំងនៅលើផ្ទៃខាងលើនៃបរិយាកាស ស្របពេលដែលវាចុះត្រជាក់វិញ ក៏បង្រួមបង្កើតបានជាពពក។ ភាពខុសគ្នានៃសីតុណ្ហភាពកាន់តែច្រើនរវាងផ្ទៃខាងលើ និងបរិយាកាសខាងលើនេះហើយ នឹងមានឥទ្ធិពលកាន់តែខ្លាំងក្នុងការបង្កើតបានជាផ្គររន្ទះផងដែរ។

យោងតាមការសិក្សាស្រាវជ្រាវមួយទៀតបានឲ្យដឹងថា បុរសគឺប្រឈមនឹងរន្ទះបាញ់ច្រើនជាងស្ត្រី។ ឱកាសនៃការវាយប្រហារដោយរន្ទះអាចនឹងកើតមានទៅលើមនុស្សម្នាក់ក្នុងចំណោមមនុស្សប្រមាណ ១៣,៥០០នាក់។ ក្នុងនោះ បុរសគឺកើតមាន ៤ ដងច្រើនជាងស្ត្រីដែលត្រូវបានវាយប្រហារ និងស្លាប់ដោយរន្ទះ។ នេះគឺដោយសារតែបុរសចូលរួមក្នុងសកម្មភាពដែលធ្វើឱ្យពួកគេប្រឈមមុខនឹងហានិភ័យខ្ពស់។ ការងារដែលគ្រប់គ្រងដោយបុរសដូចជា សំណង់ ការធ្វើស្រែចំការ ការផ្សាដែកលើដំបូលនិងម៉ូដពាណិជ្ជកម្មផ្សេងៗ គឺរួមចំណែកដល់ចំនួនអ្នកស្លាប់ដោយសាររន្ទះ។ ដូច្នេះហើយជាទូទៅ បុរសមានប្រថុយប្រថានច្រើន ដែលនាំឱ្យមានឱកាសខ្ពស់ក្នុងការត្រូវរន្ទះបាញ់ច្រើនជាងស្រ្តី។

មិនត្រឹមតែប៉ុណ្ណោះ រន្ទះបាញ់ក៏អាចបណ្តាលឱ្យមានភ្លើងឆេះព្រៃផងដែរ ទោះជាយ៉ាងណា ក៏មានចំនួនតិចជាង ព្រោះថាភ្លើងឆេះព្រៃភាគច្រើនគឺបណ្តាលមកពីមនុស្ស ប្រមាណនឹង ៨៩% បើយោងតាមការស្ទង់មតិជាមធ្យម ឆ្នាំ២០១៨ដល់២០២២៕

ព្រំដែនរបស់ប្រទេសនីមួយៗជុំវិញពិភពលោកសុទ្ធតែមានប្រវែងឆ្ងាយៗជាឧទាហរណ៍បើយើងគិតពីព្រំដែនរវាងកម្ពុជា-ថៃមានប្រវែងរហូតដល់ ៨១៧ គីឡូម៉ែត្រឯណោះ ដោយឡែកព្រំដែនរវាងប្រទេសអេស្ប៉ាញ និងប្រទេសម៉ារ៉ុកវិញមានប្រវែងត្រឹមតែ ៨៥ ម៉ែត្រប៉ុណ្ណោះ ត្រូវបានចាត់ទុកថាជាប្រទេសដែលមានព្រំដែនខ្លីបំផុតនៅលើពិភពលោក។
Peñón de Vélez គឺឧបទ្វីបដែលមានទីតាំងនៅភាគខាងជើងនៃទ្វីបអាហ្រ្វិក ជាកម្មសិទ្ធិរបស់ប្រទេសអេស្ប៉ាញ។ ឧបទ្វីបនេះក៏ត្រូវបានភ្ជាប់ទៅនឹងដីគោកនៃប្រទេសម៉ារ៉ុកដោយបន្ទះខ្សាច់តូចមួយដែលមានប្រវែង ៨៥ ម៉ែត្រ។ នេះគឺជាព្រំប្រទល់ដីតូចបំផុតនៅលើភពផែនដីដែលត្រូវបានសម្គាល់ដោយបំណែកតូចមួយនៃខ្សែពណ៌ខៀវលាតសន្ធឹង។

Peñón de Vélez គឺជាទឹកដីរបស់អេស្ប៉ាញតាំងពីឆ្នាំ ១៥៦៤ បន្ទាប់ពីត្រូវបានសញ្ជ័យដោយឧត្តមនាវីឯក Pedro de Estopiñán។ ទោះបីជាប្រទេសម៉ារ៉ុកបានស្នើសុំម្តងហើយម្តងទៀតដើម្បីទាមទារយកទឹកដីនេះមកវិញក៏ដោយ អេស្ប៉ាញមិនដែលយល់ព្រមប្រគល់វាមកវិញទេ ហើយបានបញ្ជូនកងទ័ពទៅឈរជើងដើម្បីអនុវត្តការគ្រប់គ្រងរបស់ខ្លួន។ មុនឆ្នាំ ១៩៣០ តំបន់នេះគឺជាកោះថ្ម ប៉ុន្តែការរញ្ជួយដីបានបង្កើតកោះតូចមួយដែលប្រែ Peñón de Vélez ទៅជាឧបទ្វីប។

ឧបទ្វីបនេះស្ថិតនៅលើឆ្នេរសមុទ្ររវាង Ceuta និង Melilla ដែលជាទឹកដីអេស្ប៉ាញពីរផ្សេងទៀតនៅអាហ្វ្រិក។ បច្ចុប្បន្ននេះមានតែយោធាប៉ុណ្ណោះដែលរស់នៅលើឧបទ្វីប Peñón de Vélez ។ គ្រឿងបរិក្ខារនៅទីនេះមានលក្ខណៈសាមញ្ញ ដោយគ្មានទឹក ឬអគ្គិសនី ហើយត្រូវតែពឹងផ្អែកលើនាវាកងទ័ពជើងទឹកអេស្ប៉ាញ ដើម្បីផ្តល់ការផ្គត់ផ្គង់ចាំបាច់។ នៅលើកោះនេះមិនមានដើមឈើទេ លើកលែងតែដើមឧទុម្ពរពីរបីដើមប៉ុណ្ណោះ។ Peñón de Vélez ក៏ជាតំបន់ដែលនៅជិតបំផុតរបស់អេស្ប៉ាញដែលមិនធ្លាប់ត្រូវបានឈ្លានពានឡើយ។

សព្វថ្ងៃនេះ តំបន់នេះគឺជាកន្លែងទាក់ទាញភ្ញៀវទេសចរ ដោយសារកេរ្តិ៍ឈ្មោះរបស់វាថាមានព្រំដែនខ្លីបំផុតរបស់ពិភពលោក និងប្រវត្តិសាស្រ្តគួរឱ្យចាប់អារម្មណ៍។ នៅលើបន្ទះខ្សាច់តូចមួយដែលតភ្ជាប់ប្រទេសទាំងពីរ អ្នកទេសចរតែងតែប្រមូលផ្តុំគ្នាទៅកាយ៉ាក ហាលថ្ងៃ និងហែលទឹក។ បើយោងតាម Tripadvisor អ្នកទស្សនាផ្តល់នូវបទពិសោធន៍នៃការទស្សនាកោះ ៤.៥ ក្នុងចំណោមផ្កាយ ៥។ អ្នកទេសចរម្នាក់ដែលបានទៅលេងបានបន្សល់ទុកការអត្ថាធិប្បាយថា៖ «ទឹកដីដ៏តូចមួយដ៏ស្រស់ស្អាតរបស់អេស្ប៉ាញ»៕

ប្រទេសសិង្ហបុរី ៖ នៅថ្ងៃទី១២ ខែមេសា ឆ្នាំ២០២៤ សារព័ត៌មានបរទេសរាយការណ៍ថា តួលេខផលិតផលក្នុងស្រុកសរុប (GDP) នៅត្រីមាសទី១ ឆ្នាំ២០២៤ របស់ប្រទេសសិង្ហបុរី បានកើនឡើងតិចជាងការរំពឹងទុក បើទោះជាសិង្ហបុរីបានជំរុញសេដ្ឋកិច្ចតាមរយៈការរៀបចំកម្មវិធីជាច្រើន រួមទាំងការប្រគំតន្ត្រីរបស់តារាចម្រៀងអាមេរិកដ៏ល្បីល្បាញលំដាប់ពិភពលោក ឈ្មោះ Taylor Swift ក្តី ។

សារព័ត៌មានបរទេសបានរាយការណ៍ពីប្រទេសសិង្ហបុរី នៅថ្ងៃទី១២ ខែមេសា ឆ្នាំ២០២៤ ថា ព័ត៌មានបឋមរបស់ក្រសួងពាណិជ្ជកម្មសិង្ហបុរីបង្ហាញថា ផលិតផលក្នុងស្រុកសរុប (GDP) នៅត្រីមាសទី១ ឆ្នាំ២០២៤ បានកើនឡើង២,៧% ។ ប៉ុន្តែវាបានកើនឡើងត្រឹមតែ០,១% ប៉ុណ្ណោះ បើធៀបនឹងត្រីមាសទី៤ ឆ្នាំ២០២៣ ហើយកំណើននេះទាបជាងការរំពឹងទុករបស់អ្នកវិភាគសិង្ហបុរី និងអ្នកវិភាគក្រៅប្រទេសថា សេដ្ឋកិច្ចសិង្ហបុរីនឹងកើនឡើងរហូតដល់៣% នៅត្រីមាសទី១ ឆ្នាំ២០២៤ ។

ទន្ទឹមនឹងនេះ វិស័យផលិតកម្មរបស់សិង្ហបុរីបានកើនឡើង០,៨% នៅត្រីមាសទី១ ឆ្នាំ២០២៤ ក្រោយពីវាធ្លាក់ចុះ២,៩% ចាប់ពីខែតុលា ដល់ខែធ្នូ ឆ្នាំ២០២៣ ឬនៅត្រីមាសទី៤ ឆ្នាំ២០២៣ ។ រីឯវិស័យសេវាកម្ម រួមទាំងកន្លែងស្នាក់នៅ និងម្ហូបអាហារ បានកើនឡើង២,៩% នៅត្រីមាសទី១ ឆ្នាំ២០២៤ ។

បណ្តាអ្នកវិភាគនិយាយថា ប្រទេសសិង្ហបុរីបានរៀបចំការប្រគំតន្ត្រីលំដាប់ពិភពលោក ដែលមានការចូលរួមពីតារាចម្រៀងដ៏ល្បីរបស់អាមេរិកឈ្មោះ Taylor Swift កាលពីដើមឆ្នាំ២០២៤ ព្រមទាំងកម្មវិធីមួយទៀតឈ្មោះ «Singapore Air Show» ដែលបានរៀបចំឡើងជារៀងរាល់ឆ្នាំ នឹងអាចជំរុញសេដ្ឋកិច្ចសិង្ហបុរីបាន ប៉ុន្តែពុំវាជំរុញពុំខ្លាំងក្លាដូចការរំពឹងទុករបស់រដ្ឋាភិបាលទេ ។

ទោះយ៉ាងណា គេចាត់ទុកថា ស្ថិតិដែលបានចេញផ្សាយនេះ គឺជាសញ្ញានៃការងើបឡើងវិញរបស់សេដ្ឋកិច្ចសិង្ហបុរីជាបន្តបន្ទាប់ ក្រោយពីសិង្ហបុរីបានឆ្លងកាត់វិបត្តិសេដ្ឋកិច្ច ដោយសារការឆ្លងរាតត្បាតនៃជំងឺកូវីដ-១៩ នាពេលកន្លងមក ៕

នៅពេលសម្អាតផ្ទះ មនុស្សភាគច្រើនតែងតែយកចិត្តទុកដាក់លើកន្លែងដូចជា បង្គន់ បន្ទប់ទឹក និងផ្ទះបាយប៉ុណ្ណោះ… ទោះជាយ៉ាងណាក៏ដោយ មានកន្លែងកខ្វក់ជាច្រើនទៀតដែលមនុស្សតិចណាស់នឹងដឹងអំពីការលាងសម្អាត ដោយកន្លែងទាំងនេះបានបង្កើតឱកាសសម្រាប់បាក់តេរី និងផ្សិតដើម្បីលូតលាស់។ នេះអាចបណ្តាលឱ្យមានជំងឺឆ្លង ដែលមានគ្រោះថ្នាក់ជាពិសេសចំពោះអ្នកដែលមានភាពស៊ាំទន់ខ្សោយ។

ដូច្នេះហើយបើយោងតាមលោកវេជ្ជបណ្ឌិត Neha Vyas នៃសកលវិទ្យាល័យ North Carolina បានឱ្យដឹងថា ផ្ទះបាយ និងបន្ទប់ទឹកគឺជាកន្លែងផ្ទុកបាក់តេរីជាច្រើន ប៉ុន្តែក្រៅពីកន្លែងទាំងពីរនេះ នៅមានកន្លែងផ្សេងទៀតក៏ផ្ទុកបាក់តេរីខ្លាំងដែរ ដោយអ្នកជំនាញបានចង្អុលបង្ហាញ ៨ កន្លែងដែលអ្នកត្រូវយកចិត្តទុកដាក់នៅពេលសម្អាតផ្ទះរបស់អ្នកក្នុងរដូវកាលនេះ៖

១.ផ្ទៃខាងលើចង្ក្រាន៖ ទឹកឆ្អិនឬចំហុយអាហារអាចនាំឱ្យមានជាតិសំណើមលើផ្ទៃខាងលើចង្ក្រាន នេះអាចជាកន្លែងបង្កាត់ពូជផ្សិត បង្កឱ្យមានអាឡែស៊ី ឬជំងឺហឺត ព្រមទាំងបញ្ហាសុខភាពផ្សេងទៀត ។

២.ផ្ទៃខាងក្នុងទូទឹកកក៖ បន្លែ ផ្លែឈើ សាច់ ឬភេសជ្ជៈផ្សេងៗ តែងតែមានសំណើមកកកុញ ដែលធ្វើឱ្យវាក្លាយជាបរិយាកាសទាក់ទាញសម្រាប់ផ្សិតដុះ ដូច្នេះអ្នកគួរតែសម្អាតកន្លែងទាំងនេះឱ្យបានស្អាត។

៣.ធុងសំរាមនៅក្នុងផ្ទះ៖ ធុងសំរាមក្នុងផ្ទះមានផ្ទុកមេរោគជាច្រើន ហេតុនេះធុងសំរាមនីមួយៗត្រូវតែសម្អាតឱ្យបានហ្មត់ចត់ទាំងខាងក្នុង និងខាងក្រៅ។

៤.ផ្នែកណាមួយនៅក្នុងបន្ទប់ទឹក ឬផ្ទះបាយ៖ ផ្នែកណាមួយនៅក្នុងបន្ទប់ទឹក ឬផ្ទះបាយដូចជាវាំងនន កម្រាលព្រំ ឬសាឡុង ក្រណាត់ជូនជើង និងផ្ទៃកៅអី…សុទ្ធតែអាចប្រមូលផ្តុំមេរោគគ្រប់ពេលវេលា ដូច្នេះអ្នកគប្បីជូនសម្អាតកន្លែងទាំងនេះជាប្រចាំ។

៥.ផ្ទៃដែលប៉ះញឹកញាប់៖ ផ្ទៃដែលប៉ះញឹកញាប់ដូចជាកុងតាក់ពន្លឺ កូនសោទ្វារ ឡាបូ ក្បាលម៉ាស៊ីនទឹកបង្គន់ និងផ្ទៃដែលប៉ះញឹកញាប់ជាច្រើនទៀត ចាំបាច់ត្រូវសម្អាតឱ្យបានហ្មត់ចត់។

៦.ជំហាននៃច្រកចូលទាំងអស់៖ ទ្វារនៅក្នុងបន្ទប់រួម បន្ទប់ទឹក ឬកន្លែងផ្សេងទៀតដែលមនុស្សចេញចូលច្រើននឹងពោរពេញទៅដោយមេរោគពីខាងក្រៅផ្ទះ ហេតុនេះគួរជូតសម្អាតឱ្យបានទៀងទាត់។

៧.លូ៖ មិនថានៅក្នុងផ្ទះបាយ ឬបន្ទប់ទឹក បំពង់បង្ហូរទឹកក្នុងផ្ទះត្រូវបានប៉ះពាល់នឹងបាក់តេរីជាច្រើន ដូចនេះគួរឧស្សាហ៍បូមលូ។

៨.ម៉ាស៊ីនបន្សុទ្ធខ្យល់៖ ម៉ាស៊ីនទាំងនេះអាចប្រមូលធូលី និងលំអង ជាពិសេសនៅនិទាឃរដូវ ហេតុនេះគួរតែសម្អាតឱ្យបានល្អ។

គួរបញ្ជាក់ដែរថា មុនសម្អាតអ្នកគួរតែពាក់ស្រោមដៃនៅពេលធ្វើការជាមួយសារធាតុគីមីខ្លាំង ដើម្បីជៀសវាងការជ្រាបចូលទៅក្នុងស្បែក និងបណ្តាលឱ្យរលាក។ ចំពោះកង្ហារបង្វិលមិនគួរបើកនៅជិតផ្ទៃដែលកំពុងសម្អាតឡើយ ដើម្បីជៀសវាងហានិភ័យនៃការរីករាលដាលមេរោគទៅកន្លែងផ្សេងទៀតនៃផ្ទះ។ ប្រសិនបើមានទារក ឬអ្នកដែលមានភាពស៊ាំទន់ខ្សោយ ឬមនុស្សចាស់រស់នៅក្នុងផ្ទះ សូមសម្អាតឱ្យបានស្អាតនៅពេលដែលពួកគាត់មិននៅ ព្រោះបាក់តេរី និងផ្សិតអាចបង្កគ្រោះថ្នាក់ ប្រសិនបើស្រូបចូល ឬលេបចូល៕

តើឪពុក-ម្តាយគួរធ្វើបែបណា ដើម្បីស្រឡាញ់កូនឱ្យបានស្មើៗគ្នា? ឪពុក-ម្តាយគួរតែចាប់ផ្តើមស្វែងរកគុណសម្បត្តិរបស់កូនជាមុន វាប្រសើរជាងការចាប់កំហុសកូន ពីព្រោះកូនម្នាក់ៗតែងមានគុណសម្បត្តិរៀងៗខ្លួន ប្រសិនបើឪពុក-ម្តាយសង្កេតឱ្យបានល្អិតល្អន់ តាមរយៈការជជែកលេង ឬអង្គុយជាមួយកូន ។ ជឿចុះ កូនៗនឹងមានអារម្មណ៍ល្អ បើបានឪពុក-ម្តាយមកអង្គុយក្បែរ ។

កូនៗខ្លះមានអារម្មណ៍ថា ឪពុក-ម្តាយរបស់ខ្លួនពុំបានស្រឡាញ់កូនស្មើគ្នាទេ ហើយឪពុក-ម្តាយតែងតែកាន់ជើងកូនសំណព្វជានិច្ច និងចូលចិត្តស្តីបន្ទោសកូនផ្សេងទៀត ។ ហេតុនេះ ពួកគេនឹងមានអារម្មណ៍មួយតូចចិត្ត ហើយចង់ឱ្យឪពុក-ម្តាយផ្តល់ភាពយុត្តិធម៌ចំពោះពួកគេ ។ បើតាមលទ្ធផលការស្រាវជ្រាវមួយចំនួន ក៏បានលើកឡើងដូចគ្នាដែរថា ឪពុក-ម្តាយភាគច្រើនស្រឡាញ់កូនពុំស្មើគ្នាទេ ហើយតែងលម្អៀងទៅរកកូនសំណព្វជានិច្ច ។

ខាងក្រោមនេះ គឺជាលទ្ធផលការស្រាវជ្រាវរបស់អ្នកស្រាវជ្រាវអាមេរិក និងអង់គ្លេស អំពីការស្រឡាញ់របស់ឪពុក-ម្តាយចំពោះកូនៗ ៖

១-ឪពុក-ម្តាយ ស្មើនឹង៧០% តែងតែមានកូនសំណព្វចិត្ត ៖
យោងតាមលទ្ធផលស្រាវជ្រាវរបស់អ្នកស្រាវជ្រាវអាមេរិកមកពីសាកលវិទ្យាល័យ California បង្ហាញថា ឪពុក-ម្តាយ ស្មើនឹង៧០% តែងតែស្រឡាញ់កូនណាម្នាក់ខ្លាំងជាងកូនផ្សេងទៀត ហើយអ្នកស្រាវជ្រវជឿថា ជាទូទៅ ឪពុក-ម្តាយភាគច្រើនបានស្រឡាញ់កូនរបស់ខ្លួនពុំស្មើគ្នាទេ ហើយការបង្ហាញក្តីស្រឡាញ់វិញ ក៏ខុសៗគ្នាដែរ ។

២-បើគ្រួសារមានកូន២នាក់ ឪពុក-ម្តាយនឹងស្រឡាញ់កូនច្បងច្រើនជាងកូនពៅ ៖
លទ្ធផលស្រាវជ្រាវរបស់អ្នកស្រាវជ្រាវអង់គ្លេសមកពីសាកលវិទ្យាល័យ Bristol ឱ្យដឹងថា គ្រួសារណាមានកូន២នាក់ គឺឪពុក-ម្តាយតែងស្រឡាញ់កូនច្បងច្រើនជាងកូនពៅ ដោយសង្កេតតាមរយៈទង្វើមួយចំនួន ដូចជា ៖ យកចិត្តទុកដាក់យ៉ាងខ្លាំងជាមួយកូនច្បង និងផ្តល់អំណោយផ្សេងៗឱ្យកូនច្បង ។ ហេតុនេះ កូនច្បងមាន IQ ខ្ពស់ជាងកូនពៅ ដោយសារកូនច្បងបានទទួលចំណីអាហារល្អៗជាញឹកញាប់ ។

៣-ឪពុក-ម្តាយនៅទូទាំងពិភពលោក ស្រឡាញ់កូនពុំស្មើគ្នា និងស្រឡាញ់កូនមានអត្តចរិតដូចខ្លួន ៖
យោងតាមសៀវភៅដែលបានលក់ដាច់ជាងគេ ស្មើនឹង៩៥% បង្ហាញថា ឪពុក-ម្តាយនៅទូទាំងពិភពលោក ស្រឡាញ់កូនពុំស្មើគ្នាទេ ហើយចាត់ទុកកូនណាម្នាក់ជាកូនសំណព្វចិត្ត ។ រីឯឪពុក-ម្តាយ៥% ទៀត តែងតែនិយាយកុហកខ្លួនឯង និងពុំព្រមទទួលស្គាល់ការពិតថា ស្រឡាញ់កូនពុំស្មើគ្នា ។

បើតាមការស្រាវជ្រាវទិន្នន័យស៊ីជម្រៅបង្ហាញថា កូនប្រុសច្បង នឹងក្លាយជាកូនសំណព្វចិត្តរបស់ម្តាយពីកំណើត រីឯកូនស្រីពៅ នឹងទទួលសេចក្តីស្រឡាញ់ពីឪពុក ។ ក្រៅពីនេះ ការស្រាវជ្រាវបង្ហាញទៀតថា ឪពុក-ម្តាយតែងស្រឡាញ់កូនដែលមានអត្តចរិតដូចខ្លួនច្រើនជាងកូនផ្សេងទៀត ដោយសារកូនមានចរិតដូចឪពុក-ម្តាយ នឹងធ្វើឱ្យពួកគាត់នឹកឃើញពីវ័យកុមារ ។

៤-ឪពុក-ម្តាយភាគច្រើនតែងស្រឡាញ់កូនច្បងច្រើនជាងកូនផ្សេងទៀត ៖
លទ្ធផលការស្រាវជ្រាវរបស់សាស្ត្រាចារ្យ Catherine Tu មកពីសាកលវិទ្យាល័យ California បង្ហាញថា ឪពុក-ម្តាយភាគច្រើននឹងផ្តល់ក្តីស្រឡាញ់ដល់កូនច្បងច្រើនជាងគេ ។ រីឯការស្ទង់មតិជាមួយយុវវ័យបង្ហាញថា ពួកគេមានអារម្មណ៍ថា ទទួលក្តីស្រឡាញ់ពីឪពុក-ម្តាយពុំស្មើគ្នា ហើយវាមិនយុត្តិធម៌ទេ ដែលឪពុក-ម្តាយស្រឡាញ់កូនលើសខ្វះគ្នាបែបនេះ ៕