លោក ពេជ្រមុន្នី ស្វាមីរបស់ដួងចន្ទ យាយតយបានប្រាប់ KBN News តាមសារអេឡិចត្រូនិចថា រូបភាពកាត់តមួយសន្លឹកដែលដាក់រូបយាយតយ ទៅលើរូបសំណាក «សេះសមុទ្រ»ស្ថិតនៅខេត្តកំពតគឺជាស្នាដៃហ្វេនខម្មិនលើផេកប៉ុណ្ណោះ មិនមែនភរិយារបស់ខ្លួនជាអ្នកកាត់តនោះទេ។ លោកបានអះអាងទៀតថា រូបភាពកាត់តដែលបង្ហោះនៅលើផេក ដួងចន្ទ យាយតយ អ្នកកាន់ផេកជាអ្នកបង្ហោះដោយក្នុងន័យឆ្ងល់ គ្មានចេតនាប្រមាថមើលងាយអ្វីនោះឡើយហើយរឿងនេះលោកបានបញ្ជាក់ទៅកាន់ស្នងការដ្ឋាននគរបាលខេត្តកំពតរួចហើយ។
នៅថ្ងៃទី១០ ខែមេសា នៅលើបណ្តាញសង្គមរបស់ ស្នងការដ្ឋាននគរបាលខេត្តកំពត ដែលកាន់កាប់ដោយឧត្តមសេនីយ៍ទោ ម៉ៅ ច័ន្ទមធុរិទ្ធ បានបង្ហោះរូបភាព Screen Shot បង្ហាញពី គណនីមួយឈ្មោះថា ដួងចន្ទយាយតយ ដោយភ្ជាប់មកជាមួយខ្លឹមសារថា «ហេតុអ្វីប្រជាពលរដ្ឋយើងមួយចំនួនតូចមិនឱ្យ តំលៃចំពោះអ្វីដែលជាសមិទ្ធផលរបស់ប្រទេសខ្លួន។ នេះគឺជាការប្រមាថយ៉ាងធ្ងន់ធ្ងរចំពោះការខិតខំប្រឹងប្រែងរបស់ ឯកឧត្តម អភិបាលខេត្តកំពត»។ រូបភាពនេះឧត្តមសេនីយ៍ទោ ថាជាការប្រមាថដែលមិនអាចទទួលយកបាន។ ចំណែកឯមានមតិប្រជាពលរដ្ឋជាច្រើនបានបញ្ចេញមតិយោបល់ឱ្យស្នងការហៅយាយតយមកអប់រំ។ .png)
ប្រតិកម្មរបស់ស្នងការដ្ឋាននគរបាលខេត្តកំពតនេះ KBN News បានចុះផ្សាយជាចំណងជើងថា «ស្នងការដ្ឋាននគរបាលខេត្តកំពតចាត់ទុកការកាត់តរូបភាពរបស់ ដួងចន្ទហៅយាយតយ ជាការប្រមា.ថធ្ង.ន់ធ្ង.រ» ប៉ុន្តែស្វាមីរបស់យាយតយបានបញ្ជាក់និងអះអាងមកវិញថារូបភាពកាត់តនោះជាស្នាដៃហ្វេនខម្មិនចូលផេកប៉ុណ្ណោះមិនមែនភរិយាខ្លួនជាអ្នកកាត់ទេ។.png)
លោក ពេជ្រមុន្នី ស្វាមីរបស់យាយតយបានប្រាប់សារព័ត៌មាន KBN News នាល្ងាចថ្ងៃទី១១ ខែមេសា តាមសារអេឡិចត្រូនិចថា រឿងនេះគ្រាន់តែជាការយល់ច្រលំដោយលោកបានបញ្ជាក់ទៅកាន់ស្នងការដ្ឋាននគរបាលខេត្តកំពតរួចហើយ។ លោកបានបញ្ជាក់ទៀតថា រូបភាពកាត់តនេះមិនមែនយាយតយជាភរិយាខ្លួនកាត់តនោះទេ ជាស្នាដៃហ្វេនបានយករូបភាពកាត់តនោះមកខម្មិនលើផេកហើយបុគ្គលិកកាន់ផេកអ្នកឆ្លើយតបផេកបានយករូបភាពកាត់តនោះមកបង្ហោះក្នុងន័យឆ្ងល់គ្មានចេតនាប្រមាថមើលងាយអ្វីឡើយ។
ស្វាមីយាយតយបានឱ្យដឹងទៀតថា បើយោងទៅលើផេកស្នងការដ្ឋាននគរបាលខេត្តកំពត ក៏លោកមិនបានសរសេរឈ្មោះឬចោទប្រពន្ធលោកនោះដែរគាត់គ្រាន់តែស៊ែរផេកតែការកាត់តរូប មិនមែនប្រពន្ធលោកជាអ្នកធ្វើនោះដែរ។
គួរបញ្ជាក់ថា រូបសំណាក «សេះសមុទ្រ» បាញ់ទឹក នៅខេត្តកំពតដែលមានកម្ពស់ ៨ម៉ែត្រ នៅមុខសាលាខេត្តចាស់ កំពុងទទួលបានការចាប់អារម្មណ៍យ៉ាងខ្លាំងចំពោះសមិទ្ធផលថ្មីនេះប្រចាំខេត្តកំពតដោយបានទាក់ទាញចំណាប់អារម្មណ៍ទេសចរជាច្រើន៕
