អ្នកគាំទ្រមានការភ្ញាក់យ៉ាងខ្លាំងបន្ទាប់ពីក្រុមហ៊ុនគ្រប់គ្រងតារាចម្រៀង Park Bo Ram បានចេញសេចក្តីប្រកាសថាតារាចម្រៀងរូបនេះបានទទួលមរ.ណភាពក្នុងវ័យ៣០ឆ្នាំ។ របាយការណ៍របស់ប៉ូលិសបានប្រាប់ប្រព័ន្ធផ្សព្វផ្សាយថា Park Bo Ram បានដួលក្នុងបន្ទប់ទឹក ខណៈកំពុងផឹកស៊ីជាមួយមិត្តភ័ក្តិពីរនាក់នៅផ្ទះមួយ។
យោងតាមរបាយការណ៍ដែលដាក់ដោយមន្រ្តីពីស្ថានីយ៍ប៉ូលិស Namyangju នៅថ្ងៃទី ១២ ខែមេសា តារាចម្រៀង Park Bo Ram អាយុ៣០ឆ្នាំ បាននៅឯការជួបជុំផឹកស៊ីជាលក្ខណៈឯកជនជាមួយមិត្តភក្តិ ២ នាក់ទៀតនៅយប់នៃការស្លាប់របស់នាង។ ក្នុងការជួបជុំគ្នាដែលកើតឡើងនៅផ្ទះមិត្តភ័ក្ដិ Park Bo Ram ហើយនាងបានទៅបន្ទប់សម្រាកនៅម៉ោងប្រហែល ៩ និង ៥៥ នាទីយប់។ លុះពេលត្រឡប់មកវិញមិនបានប៉ុន្មានផង ស្រាប់តែមានជនម្នាក់ដែលមានវត្តមាននៅទីនោះបានទៅពិនិត្យមើលនាងស្រាប់តែឃើញនាងដេកដួលក្នុងបន្ទប់ទឹកសន្លប់បាត់ស្មារតី។ អ្នកនៅទីនោះបានទូរស័ព្ទទៅលេខ ១១៩ ភ្លាមៗ ហើយព្យាយាមធ្វើ CPR លើ Park Bo Ram ។
ភ្លាមៗនោះ អ្នកសង្គ្រោះបន្ទាន់បានមកដល់កន្លែងកើតហេតុ ហើយបានដឹក Park Bo Ram ទៅកាន់មន្ទីរពេទ្យ Hanyang University Guri ប៉ុន្តែនាងមិនអាចជួយសង្គ្រោះបានហើយត្រូវបានគេប្រកាសថាបានស្លាប់នៅម៉ោង ១១ និង ១៧ នាទីយប់ម៉ោងនៅប្រទេសកូរ៉េ។ ប៉ូលិសមានបំណងធ្វើការស៊ើបអង្កេតបន្ថែមអំពីមូលហេតុនៃការស្លាប់ ដោយស្នើសុំធ្វើកោសល្យវិច័យជាមួយសេវាកោសល្យវិច្ច័យជាតិ ។
នៅលើវេទិកា និងទំព័រហ្វេកប៊ុកក្នុងទ្វីបអាស៊ី អ្នកគាំទ្រជាច្រើនបាននិយាយថា ពួកគេមានការភ្ញាក់ផ្អើលជាខ្លាំងនៅពេលដែលបានឮដំណឹងអាក្រក់អំពីតារាចម្រៀងរូបនេះ។ ព័ត៌មាននៃការស្លាប់របស់នាងបានក្លាយជាប្រធានបទពេញនិយមបំផុតនៅលើ Weibo (ប្រទេសចិន) ។
Park Bo Ram កើតនៅឆ្នាំ ១៩៩៤បានចូលរួមក្នុងកម្មវិធីទេពកោសល្យរបស់ Mnet ហើយត្រូវបានគេកោតសរសើរយ៉ាងខ្លាំងចំពោះសម្លេងរបស់នាង។ ក្នុងឆ្នាំ២០១៤ Bo Ram បានឈ្នះពានរង្វាន់សិល្បករថ្មីល្អបំផុតនៅ MAMA, Melon Music Awards ។ តារាចម្រៀងរូបនេះគឺជាម្ចាស់សំឡេងក្នុងរឿង «Reply 1988»៕