ប្រទេសឥណ្ឌា ៖ កាលពីថ្ងៃទី២១ ខែមេសា ឆ្នាំ២០២៤ សារព័ត៌មានបរទេសរាយការណ៍ថា មហាសេដ្ឋីដ៏ល្បីឈ្មោះម្នាក់នៅប្រទេសឥណ្ឌាបានសម្រេចចិត្តលះបង់ទ្រព្យសម្បត្តិ និងមាសប្រាក់យ៉ាងច្រើនសន្ធឹកសន្ធាប់របស់ខ្លួនឱ្យអ្នកភូមិនៅតាមផ្លូវ មុនពេលលោក និងភរិយារៀបចំពិធីបួស ។ បើស្តាប់ពីមូលហេតុនៃការលះបង់ទ្រព្យសម្បត្តិរបស់មហាសេដ្ឋីរូបនេះ ធ្វើឱ្យមហាជននាំគ្នាអនុមោទនាបុណ្យកុសលគ្រប់ៗគ្នា ។

វាបានក្លាយជាព័ត៌មានមួយល្បីល្បាញនៅលើពិភពលោកនាពេលបច្ចុប្បន្ននេះ ពេលសារព័ត៌មានរាយការណ៍ថា មហាសេដ្ឋីឥណ្ឌាម្នាក់ គឺលោក Phavej Pantharee ព្រមទាំងសាច់ញាតិចំនួន៣៥នាក់ បានឡើងជិះរថយន្តនៅតាមផ្លូវមានចម្ងាយជាង៤គីឡូម៉ែត្រ ហើយបាចប្រាក់ ព្រមទាំងដាក់ទានទ្រព្យសម្បត្តិ និងមាសប្រាក់ទាំងអស់ឱ្យអ្នកភូមិ ។

លើសពីនេះ មហាសេដ្ឋីខាងលើថែមទាំងបានប្រគល់ទូរស័ព្ទដៃ និងម៉ាស៊ីនត្រជាក់ឱ្យអ្នកភូមិដែលមកចូលរួមក្នុងក្បួនដង្ហែរទៀតផង ។ មហាសេដ្ឋីឥណ្ឌា និងភរិយាបានលះបង់អ្វីៗគ្រប់យ៉ាងក្នុងផ្លូវលោក ដើម្បីទៅបួសជាព្រះសង្ឃ និងដូនជីតាមសាសនាជេន ។

បើតាមសេចក្តីរាយការណ៍បញ្ជាក់ថា ដើម្បីបង្ហាញនូវការប្តេជ្ញាចិត្តជាមួយសាសនានេះ លោក Phavej Pantharee ជាអ្នកជំនួញផ្នែកសំណង់នៅទីក្រុង Ahmedabad ប្រទេសឥណ្ឌា បានសម្រេចចិត្តលះបង់ទ្រព្យសម្បត្តិទាំងអស់ ដែលលោក និងភរិយារកបានក្នុងជីវិត ស្មើជាង២.០០០លានរូពីមកចែកឱ្យអ្នកភូមិ មុនពេលលោកបួសជាព្រះសង្ឃ ។

លោក Phavej Pantharee និងភរិយាបានរៀបចំពិធីសាសនាយ៉ាងអធិកអធមម្តងហើយកាលពីខែកុម្ភៈ ឆ្នាំ២០២៤ ហើយលោកក៏បានរៀបចំពិធីបួសតាមសាសនាជាផ្លូវការ នៅថ្ងៃទី២២ ខែមេសា ។

ចំណែកមូលហេតុដែលលោក និងភរិយាសម្រេចចិត្តលះបង់ទ្រព្យសម្បត្តិទាំងអស់បែបនេះ ដោយសារកាលពីឆ្នាំ២០២២ កូនស្រីរបស់លោក អាយុ១៩ឆ្នាំ និងកូនប្រុសអាយុ១៦ឆ្នាំ បានសម្រេចចិត្តដើរតាមផ្លូវធម៌របស់សាសនាជេនរួចហើយ ទើបធ្វើឱ្យគូស្វាមី-ភរិយានេះមានជំនឿលើសាសនាជេន ។ ដូច្នេះ ពួកគេក៏សម្រេចចិត្តលះបង់សេចក្តីសុខផ្លូវលោក និងលះបង់ទ្រព្យសម្បត្តិផ្លូវកាយ ដើម្បីស្វែងរកសេចក្តីស្ងប់ផ្លូវចិត្ត ។

គួរបញ្ជាក់ថា ពលរដ្ឋឥណ្ឌាណាដែលចង់បួសជាព្រះសង្ឃ និងដូនជីក្នុងសាសនាជេន ពួកគេត្រូវតែកាច់ផ្តាច់ពីជីវិតក្នុងផ្លូវលោក និងលះបង់ទ្រព្យសម្បត្តិរបស់ខ្លួនទាំងអស់ ។ បន្ទាប់មក ពួកគេនឹងរស់នៅក្នុងជីវិតសាមញ្ញ និងគ្មានទ្រព្យសម្បត្តិ ឬមាសប្រាក់នៅជាប់ខ្លួន ។

ក្រោយពីមហាសេដ្ឋីឥណ្ឌា និងភរិយាបានធ្វើពិធីបួសជាព្រះសង្ឃ និងដូនជីរួចហើយ អ្នកទាំងពីរត្រូវតែស្លៀកពាក់ស និងដើរបិណ្ឌបាត្រអាហារដោយដោះស្បែកជើងផងដែរ ។ ក្រៅពីនេះ អ្នកទាំងពីរត្រូវកាន់អំបោសសម្រាប់បោសសម្អាតនៅតាមផ្លូវ ដើម្បីកុំឱ្យដើរជាន់សត្វល្អិតមានជីវិត ៕

ប្រទេសឥណ្ឌូណេស៊ី ៖ អាជ្ញាធរឥណ្ឌូណេស៊ីប្រចាំកោះបាលីបានដាស់តឿនឱ្យភ្ញៀវទេសចរបរទេស ក៏ដូចជាពលរដ្ឋឥណ្ឌូណេស៊ីទាំងអស់ប្រុងប្រយ័ត្ន និងការពារខ្លួនពីការឆ្លងរាតត្បាតនៃជំងឺគ្រុនឈាម ក្រោយពីចំនួនអ្នកជំងឺគ្រុនឈាមក្នុងខេត្ត និងក្នុងប្រទេសឥណ្ឌូណេស៊ីទាំងមូលកើនឡើងជាបន្តបន្ទាប់ ។

សារព័ត៌មាន AFP បានរាយការណ៍ពីទីក្រុងហ្សាកាតា ប្រទេសឥណ្ឌូណេស៊ី នៅថ្ងៃទី២២ ខែមេសា ឆ្នាំ២០២៤ ថា អាជ្ញាធរប្រចាំតំបន់បានស្នើឱ្យភ្ញៀវទេសចរបរទេសទាំងអស់ដែលមកកម្សាន្តនៅកោះបាលី ត្រូវបង្កើនការប្រុងប្រយ័ត្នឱ្យបានខ្ពស់ និងការពារខ្លួនពីការឆ្លងជំងឺគ្រុនឈាម ក្រោយពីចំនួនអ្នកជំងឺគ្រុនឈាមនៅឥណ្ឌូណេស៊ីកើនឡើង ។

លោកស្រី Kusti Ayu Raka Susanti មន្ត្រីនាយកដ្ឋានបង្ការ និងគ្រប់គ្រងជំងឺប្រចាំទីភ្នាក់ងារសុខភាពសាធារណៈនៅកោះបាលី ប្រទេសឥណ្ឌូណេស៊ី និយាយថា នាពេលបច្ចុប្បន្ន នៅពុំទាន់មានការបង្ខំឱ្យមនុស្សគ្រប់គ្នាចាក់ថ្នាំបង្ការជំងឺគ្រុនឈាមនៅឡើយទេ ។

ទោះយ៉ាងណា មន្ត្រីសុខាភិបាលបានណែនាំឱ្យភ្ញៀវទេសចរបរទេសចាក់ថ្នាំបង្ការជំងឺនេះ ដើម្បីឱ្យពួកគេមានសុខភាពរឹងមាំក្នុងអំឡុងពេលធ្វើដំណើរមកកាន់កោះបាលី ជាពិសេស នៅពេលភ្ញៀវទេសចរបរទេសស្ថិតនៅតំបន់ឆ្លងជំងឺនេះ ។ លោកស្រី Kusti Ayu និយាយថា ៖ «ការណែនាំនេះ ពុំបានផ្តោតទៅលើតែភ្ញៀវទេសចរបរទេសប៉ុណ្ណោះទេ ប៉ុន្តែរួមទាំងជនជាតិឥណ្ឌូណេស៊ីគ្រប់រូបដែលរស់នៅលើកោះបាលីផងដែរ» ។

នៅខែមេសា ឆ្នាំ២០២៤ ប្រទេសឥណ្ឌូណេស៊ីព្រួយបារម្ភអំពីការឆ្លងរាតត្បាតនៃជំងឺគ្រុនឈាមក្នុងតំបន់មួយចំនួន ក្រោយពីចំនួនអ្នកឆ្លងជំងឺនេះនៅទូទាំងប្រទេសឥណ្ឌូណេស៊ីកើនឡើងជាបន្តបន្ទាប់ ។

ទោះយ៉ាងណា អាជ្ញាធរឥណ្ឌូណេស៊ីប្រចាំតំបន់ពុំទាន់មានទិន្នន័យបញ្ជាក់ពីចំនួនភ្ញៀវទេសចរនៅកោះបាលីឆ្លងជំងឺគ្រុនឈាមទេ ប៉ុន្តែអត្រាឆ្លងជំងឺគ្រុនឈាមសរុបក្នុងខេត្តមានកម្រិតខ្ពស់ ។ បើគិតចាប់ពីមីនា ដល់ខែមេសា ឆ្នាំ២០២៤ អ្នកជំងឺគ្រុនឈាមនៅកោះបាលី ស្មើរហូតដល់៤.១៧៧នាក់ និងមានអ្នកស្លាប់ដោយសារជំងឺនេះ ចំនួន៥នាក់ ៕

វៀតណាម៖ ប្រទេសវៀតណាមស្ថិតក្នុងក្រុមប្រទេសដែលមានអត្រាខ្ពស់នៃជំងឺដាច់សរសៃឈាមខួរក្បាលដោយសារផលវិបាកនៃជំងឺលើសឈាម ដោយមនុស្សភាគច្រើនមិនដឹងថាពួកគេមានជំងឺលើសឈាមនោះទេ ខណៈជំងឺនេះអាចវិវត្តទៅជាជំងឺដាច់សរសៃឈាមខួរក្បាល នេះបើយោងតាម Vnexpress ដែលបានចុះផ្សាយនៅថ្ងៃទី២២ ខែមេសា ឆ្នាំ២០២៤។
លោកសាស្ត្រាចារ្យវេជ្ជបណ្ឌិត Huynh Van Minh ប្រធានសមាគមជំងឺបេះដូងវៀតណាមបាននិយាយនៅក្នុងសន្និសីទវិទ្យាសាស្ត្ររបស់មន្ទីរពេទ្យ FV ថា “វៀតណាមស្ថិតនៅក្នុងតំបន់ដែលមានអត្រាខ្ពស់នៃជំងឺដាច់សរសៃឈាមខួរក្បាល”។ ទន្ទឹមនឹងនេះដែរ នៅក្នុងប្រទេសជាច្រើន ផលវិបាកនៃជំងឺនេះគឺដោយសារតែជំងឺលើសឈាមមានអត្រាខ្ពស់។

យោងតាមស្ថិតិរបស់អង្គការសុខភាពពិភពលោក អត្រានៃជំងឺលើសឈាមក្នុងពិភពលោកមានចាប់ពី ២៣ ទៅ ៣៧% មានន័យថាមនុស្សម្នាក់ក្នុងចំណោមមនុស្សពី ៣ ទៅ ៤ នាក់សុទ្ធតែមានជំងឺនេះ។ ជំងឺលើសឈាមគឺជាស្ថានភាពមួយដែលកើតឡើងនៅពេលដែលសម្ពាធឈាមស៊ីស្តូលិកលើសពី ១៤០ ហើយសម្ពាធឈាម diastolic លើសពី 90 mmHg។ ដូច្នេះសមាមាត្រនៃអ្នកដែលមានជំងឺលើសឈាមបានកើនឡើងពី ៦៤៨ លាននាក់ក្នុងឆ្នាំ ១៩៩០ ដល់ ១.២៨ ពាន់លាននាក់ក្នុងឆ្នាំ ២០១៩។ ហេតុនេះហើយប្រទេសដែលមានចំណូលទាប និងមធ្យម ដូចជាប្រទេសវៀតណាម មានចំនួនអ្នកលើសឈាមច្រើនជាងគេ។

យោងតាមសាស្រ្តាចារ្យ Minh ក៏បានឱ្យដឹងទៀតថា នៅប្រទេសវៀតណាម ស្ថិតិបង្ហាញថា ២៥% នៃបុរស និង ២១.៦% នៃស្ត្រីសុទ្ធតែមានជំងឺនេះ។ កត្តាដែលធ្វើឱ្យពិបាកក្នុងការគ្រប់គ្រងសម្ពាធឈាម គឺដោយសារអ្នកជំងឺជាច្រើនមានជីវភាពក្រីក្រ មិនមានការធានារ៉ាប់រងសុខភាព និងខ្វះចំណេះដឹងអំពីជំងឺ ខណៈសម្ពាធឈាមខ្ពស់ជារឿយៗវិវត្តទៅដោយស្ងៀមស្ងាត់ ហើយមនុស្សភាគច្រើនមិនដឹងថាខ្លួនមានជំងឺនោះទេ។ សាស្រ្តាចារ្យ Minh បានបន្ថែមថា អ្នកដែលត្រូវបានគេធ្វើរោគវិនិច្ឆ័យថាមានជំងឺនេះជារឿយៗមិនគោរពតាមការព្យាបាល ប្រើថ្នាំមិនគ្រប់គ្រាន់ និងមិនផ្លាស់ប្តូររបៀបរស់នៅយ៉ាងសកម្មដូចដែលបានណែនាំ។

ទោះជាយ៉ាងណាក៏ដោយសាស្ត្រាចារ្យ Minh ក៏បានផ្តល់អនុសាសន៍ថា ដើម្បីកាត់បន្ថយកំណើននៃជំងឺដាច់សរសៃឈាមខួរក្បាល អ្នកជំងឺត្រូវអនុវត្តតាមការព្យាបាល និងតាមដានសម្ពាធឈាមរបស់ពួកគេនៅផ្ទះជាប្រចាំ ក៏ដូចជាអនុវត្តតាមរបបអាហារដែលមានសុខភាពល្អ កាត់បន្ថយអំបិល និងកំណត់អាហារប្រៃ។ បង្កើនការទទួលទានប៉ូតាស្យូម ញ៉ាំផ្លែឈើ បន្លែ គ្រាប់ធញ្ញជាតិ ផលិតផលទឹកដោះគោមានជាតិខ្លាញ់ទាប និងកាត់បន្ថយជាតិខ្លាញ់ឆ្អែត ក៏ដូចជាកាត់បន្ថយការទទួលទានគ្រឿងស្រវឹង ឬភេសជ្ជៈជាតិផ្អែម រួមទាំងផ្តល់អាទិភាពដល់ការធ្វើលំហាត់ប្រាណឱ្យបានទៀតទាត់៕

មហោស្រពខ្សាច់ ដែលគេហៅថា ពិធីបុណ្យ Haeundae តែងប្រារព្ធឡើងជារៀងរាល់ឆ្នាំនៅលើឆ្នេរខ្សាច់ ទីក្រុងជាប់មាត់សមុទ្រមួយកន្លែងនៃប្រទេសកូរ៉េខាងត្បូង ដែលនឹងមានដាក់តាំងបង្ហាញរូបចម្លាក់ខ្សាច់របស់បុគ្គលល្បីៗនិងសំណង់អច្ឆរិយៈនានាទូទាំងពិភពលោក ក្នុងនោះក៏មានប្រាសាទអង្គរវត្តរបស់ខ្មែរផងដែរ។ ចំពោះឆ្នាំ២០២៤នេះ ពិធីបុណ្យខ្សាច់ Haeundae នឹងប្រារព្ធឡើងនៅថ្ងៃទី ២៤ ដល់២៧ ខែឧសភាឆាប់ៗនេះ។

ពិធីបុណ្យខ្សាច់ Haeundae Sand Festival ដែលមានទីតាំងនៅតាមបណ្តោយឆ្នេរ Haeundae ទីក្រុង Busan ប្រទេសកូរ៉េខាងត្បូង។ ពិធីបុណ្យនេះ ត្រូវបានគេប្រារព្ធឡើងតាំងពីឆ្នាំ ២០០៣មកម្លេះ ហើយឥឡូវនេះត្រូវបានគេចាត់ទុកថាជាពិធីបុណ្យខ្សាច់ដ៏ធំបំផុតមួយរបស់ពិភពលោក។ វាគឺជាព្រឹត្តិការណ៍ដ៏ពិសេសមួយ មិនគួរមើលរំលងចំពោះអ្នកដែលស្រលាញ់ខាងសិល្បៈ ការតាំងពិព័ណ៍ មាត់សមុទ្រ និងឆ្នេរខ្សាច់។

តាមរយៈព្រឹត្តិការណ៍នេះជារៀងរាល់ឆ្នាំ គឺបានទាក់ទាញភ្ញៀវទេសចររាប់លាននាក់ ព្រោះតែវាជាទិដ្ឋភាពដ៏ពិសេសមួយកម្របានឃើញនិងអមជាមួយនឹងឆ្នេរខ្សាច់ដ៏ស្រស់ស្អាតនិងទឹកសមុទ្រដ៏ខៀវស្រងាត់ថ្លាឆ្វង់របស់ប្រទេស។ ជាមួយគ្នានេះ វិចិត្រករល្បីៗជាច្រើនប្រទេសនឹងមកបង្ហាញខ្លួនបញ្ចេញស្នាដៃឆ្លាក់រូបចម្លាក់ដ៏ពិបាកនិងគួរឲ្យស្ងើចសរសើរនៅលើវាលខ្សាច់ Haeundae នេះ ។ រូបចម្លាក់ទាំងនោះទៀតសោតជារឿយៗគឺមានទំហំធំ និងមានកំពស់រាប់សិបម៉ែត្រ ហើយចំណាយពេលជាច្រើនថ្ងៃដើម្បីបញ្ចប់។

ក្រៅតែពីការដាក់បង្ហាញនូវចម្លាក់ប្រណិតៗលើឆ្នេរខ្សាច់ហើយ អ្វីដែលជាការទាក់ទាញសម្រាប់ពិធីបុណ្យមួយនេះគឺនឹងការប្រគុំតន្រ្តីនិងការសម្តែងនានា ដែលមានការអញ្ជើញចូលរួមពីសិល្បៈករ សិល្បៈការនីមកពីទូទាំងពិភពលោកផងដែរ ដើម្បីញាំងឲ្យបរិយាកាសកាន់តែមានភាពសប្បាយរីករាយ។ បន្ថែមពីនេះ ក៏រួមមាននូវសកម្មភាពសប្បាយៗជាច្រើនទៀតដូចជាការពិព័ណ៌អាហារគ្រប់មុខទាំងម្ហូបប្រពៃណីកូរ៉េនិងម្ហូបអន្តរជាតិ ហាងស្រានិងភេសជ្ជៈ និងការប្រឡងប្រជែងនានាផងដែរ៕

បរទេស៖ ភ្នំភ្លើងខ្ពស់ជាងគេបំផុតមួយរបស់ពិភពលោកនៅអង់តាក់ទិកបានធ្វើឱ្យអ្នកវិទ្យាសាស្ត្រមានការងឿងឆ្ងល់ជាយូរណាស់មកហើយ ដោយសារភ្នំភ្លើងនេះបានបញ្ចេញធូលីមាសដ៏មានតម្លៃ និងឧស្ម័នជាច្រើនប្រភេទជារៀងរាល់ថ្ងៃ នេះបើយោងតាមរបាយការណ៍របស់ New York Post ដែលបានចុះផ្សាយនៅថ្ងៃទី២២ ខែមេសា ឆ្នាំ២០២៤។
ភ្នំភ្លើង Erebus កម្ពស់ ៣,៧៩៤ ម៉ែត្រដែលជាភ្នំភ្លើងសកម្មមួយក្នុងចំណោមភ្នំភ្លើងសកម្មចំនួន ១៣៨ របស់អង់តាក់ទិក ត្រូវបានគេស្គាល់ថាជាភ្នំភ្លើងបញ្ចេញឧស្ម័នដែលមានផ្ទុកមាសគ្រីស្តាល់ប្រហែល ៨០ ក្រាមក្នុងមួយថ្ងៃ មានតម្លៃជិត ៦,០០០ ដុល្លារអាមេរិក។

បើយោងតាមអ្នកជំនាញនៅ New Mexico Institute of Mining and Technology បានពន្យល់ថា មាសអាចមានប្រភពមកពីថ្មភ្នំភ្លើង នៅពេលដែលកម្អែភ្នំភ្លើងកម្ពស់ ៣,៧៩៤ ម៉ែត្របានបញ្ចេញឧស្ម័នក្តៅ ដោយដឹកធូលីមាសចូលទៅក្នុងអាកាស។ ដូច្នេះភ្នំភ្លើង Erebus ត្រូវបានគេគិតថាជាភ្នំភ្លើងសកម្មបំផុតនៅភាគខាងត្បូងរបស់ពិភពលោក។ ទោះជាយ៉ាងណាធូលីមាសនេះគ្រាន់តែជាវត្ថុដ៏មានតម្លៃមួយក្នុងចំណោមវត្ថុជាច្រើនដែលកំពុងត្រូវបានបញ្ចេញចេញពីភ្នំភ្លើង Erebus ។

លោក Conor Bacon អ្នកស្រាវជ្រាវនៅឯ Earth Observatory នៃសកលវិទ្យាល័យ Columbia ក្នុងទីក្រុងញូវយ៉ក បាននិយាយថា “Erebus… បាននិងកំពុងផ្ទុះជាបន្តបន្ទាប់ចាប់តាំងពីឆ្នាំ ១៩៧២ មកម្លេះ” ដោយលោកបានបន្ថែមថា Erebus មានបឹងកម្អែភ្នំភ្លើងមួយនៅលើកំពូលភ្នំរបស់វា។ បឹងកម្អែបែបនេះពិតជាកម្រណាស់ ដោយសារលក្ខខណ្ឌពិសេសចាំបាច់ដើម្បីធានាថាផ្ទៃខាងលើមិនត្រជាក់។

Bacon ប៉ាន់ស្មានថា ការរកឃើញធូលីមាសរបស់ភ្នំភ្លើង Erebus ដែលបានបញ្ចេញជារៀងរាល់ថ្ងៃនៅអង់តាក់ទិក គឺបានប្រើប្រាស់ឧបករណ៍ត្រួតពិនិត្យអចិន្ត្រៃយ៍មួយចំនួនប៉ុណ្ណោះ ដែលភាគច្រើនរួមមានឧបករណ៍វាស់ស្ទង់រញ្ជួយ ដើម្បីរកមើលសកម្មភាពរញ្ជួយដែលទាក់ទងនឹងភ្នំភ្លើង។ ហើយពេលខ្លះទៀត អ្នកស្រាវជ្រាវក៏បានដាក់ពង្រាយបណ្តាញឧបករណ៍យ៉ាងទូលំទូលាយបន្ថែមទៀតដើម្បីធ្វើការសិក្សាឱ្យបានជាក់លាក់ ហើយបានដឹងថាធូលីមាសត្រូវបានគេរកឃើញនៅក្នុងអាកាសជុំវិញតំបន់ភ្នំភ្លើងចម្ងាយប្រហែល ១,០០០ គីឡូម៉ែត្រពីភ្នំ៕

វិនិយោគទុនអចលនទ្រព្យ របស់ប្រទេសកាតា និងចិន បាននឹងកំពុងពិភាក្សាសាងសង់អគារខ្ពស់បំផុត នៅលើពិភពលោក ក្នុងប្រទេសថៃ។

យោងតាមការសែត Bangkok Post បានឱ្យដឹងថា៖”លោក Srettha Thavisin បានជួបជាមួយក្រុមហ៊ុនវិនិយោគមកពីមជ្ឈិមបូព៌ា និងចិនដូចជាក្រុមហ៊ុនEmaar Group, ក្រុមហ៊ុន Broad Group និងក្រុមហ៊ុន Vatone Group ហើយបានពិភាក្សាពីគម្រោងសាងសង់អគារខ្ពស់ជាងគេបំផុតនៅលើលោក”។

បច្ចុប្បន្ន អគារខ្ពស់ជាងគេស្ថិតនៅទីក្រុងឌូបៃ នៃសហព័ន្ធអារ៉ាប់រួម ដែលមានឈ្មោះថា Burj Khalifa មានកម្ពស់ ៨២៨ម៉ែត្រ ខណៈអគារខ្ពស់ជាងគេនៅក្នុងប្រទេសថៃមានឈ្មោះថា Magnolias Waterfront Residences Iconsiam មានកម្ពស់ត្រឹម ៣១៨ម៉ែត្រប៉ុណ្ណោះ។

នាយករដ្ឋមន្ត្រីថៃ លោក Srettha Thavisin សង្ឃឹមខ្ពស់ថា គម្រោងសាងសង់អគារនេះ នឹងកើតឡើងឆាប់ៗខាងមុខនេះ ដោយវានឹងក្លាយជាទិសដៅទេសចរណ៍ថ្មី ដែលជំរុញឱ្យភ្ញៀវទេសចរ សម្រុកនាំគ្នាមកកម្សាន្តប្រទេសថៃ។

តែយ៉ាងណាមិញ ជុំវិញ គម្រោងសាងសង់អគារខ្ពស់ជាងគេនៅក្នុងប្រទេសថៃនេះ មិនទាន់ត្រួវបានបញ្ជាក់លម្អិតថានឹងចាប់ផ្តើមសាងសង់ និងចំណាយថវិការអស់ប៉ុន្មាននៅឡើយនោះទេ៕

ប្រទេសថៃ ៖ ការិយាល័យឧតុនិយមថៃបានប្រកាសថា ប្រទេសថៃនឹងមានអាកាសធាតុក្តៅខ្លាំង និងមានសីតុណ្ហភាពកើនឡើងខ្ពស់រហូតដល់៤៣អង្សារសេ ។ ហេតុនេះ ការិយាល័យឧតុនិយមបានសំណូមពរឱ្យពលរដ្ឋទាំងអស់ចៀសវាងការធ្វើការនៅក្រោមកំដៅថ្ងៃរយៈពេលយូរ និងប្រយ័ត្នខ្លួនពីគ្រោះថ្នាក់ផ្សេងៗដែលបណ្តាលមកពីភ្លៀង ផ្គររន្ទះ និងខ្យល់កន្ត្រាក់នៅតំបន់មួយចំនួន ។

ការិយាល័យឧតុនិយមថៃបានប្រកាសកាលពីថ្ងៃទី២១ ខែមេសា ឆ្នាំ២០២៤ ថា ក្នុងរយៈពេល៧ថ្ងៃ គិតចាប់ពីថ្ងៃទី២១ ដល់ថ្ងៃទី២៧ ខែមេសា អាកាសធាតុក្តៅខ្លាំងនឹងគ្របដណ្តប់លើតំបន់ភាគខាងជើងប្រទេសថៃ ។ ហេតុនេះ វាធ្វើឱ្យប្រទេសថៃទាំងមូលមានអាកាសធាតុក្តៅខ្លាំង និងចុះអ័ព្ទនាពេលថ្ងៃ ។ លើសពីនេះ នឹងមានខ្យល់ពីទិសនិរតី និងខ្យល់ពីទិសខាងត្បូងបក់មកគ្របដណ្តប់លើផ្នែកខាងជើងប្រទេសថៃ ដែលធ្វើឱ្យតំបន់នេះមានភ្លៀង ផ្គររន្ទះ និងខ្យល់កន្ត្រាក់ខ្លាំង ។

ចំណែកខេត្តភាគខាងត្បូងប្រទេសថៃ ចាប់ពីថ្ងៃទី២១ ដល់ថ្ងៃទី២៣ ខែមេសា នឹងមានខ្យល់ពីទិសខាងលិច និងខ្យល់ពីទិសពាយ័ព្យបក់មកគ្របដណ្តប់លើសមុទ្រ Andama និងតំបន់ភាគខាងត្បូង ខណៈខ្យល់ពីទិសខាងកើត និងអាគ្នេយ៍បក់មកគ្របដណ្តប់លើឈូងសមុទ្រថៃ និងតំបន់ភាគខាងត្បូង ។ ហេតុនេះ វានឹងធ្វើឱ្យតំបន់ភាគខាងត្បូងមានភ្លៀងធ្លាក់បន្ថែមទៀត និងភ្លៀងធ្លាក់ខ្លាំងក្នុងតំបន់មួយចំនួន ។

រីឯចាប់ពីថ្ងៃទី២៤ ដល់ថ្ងៃទី២៧ ខែមេសា ខ្យល់នៅទិសខាងកើត និងទិសអាគ្នេយ៍បានបក់មកគ្របលើឈូងសមុទ្រថៃ, តំបន់ភាគខាងត្បូង និងសមុទ្រ Andama ។ ហេតុនេះ វានឹងធ្វើឱ្យតំបន់មួយចំនួននៅខេត្តភាគខាងត្បូងប្រទេសថៃ មានភ្លៀងធ្លាក់ និងផ្គររន្ទះ ។

ការិយាល័យឧតុនិយមបានសំណូមពរឱ្យពលរដ្ឋដែលរស់នៅខេត្តភាគខាងជើងថែទាំសុខភាពរបស់ខ្លួន ដោយសារប្រទេសថៃមានអាកាសធាតុក្តៅខ្លាំង ហើយពលរដ្ឋគួរតែជៀសវាងការធ្វើការ ឬធ្វើអ្វីមួយនៅក្រោមកំដៅថ្ងៃខ្លាំងរយៈពេលយូរ ។ ក្រៅពីនេះ ពលរដ្ឋត្រូវប្រុងប្រយ័ត្នចំពោះគ្រោះថ្នាក់ដែលកើតឡើងពីភ្លៀង ផ្គររន្ទះ និងខ្យល់កន្ត្រាក់នៅតំបន់មួយចំនួនផងដែរ ៕

បរទេស៖ កាលពីពេលថ្មីៗនេះ ក្នុងដំណើរទស្សនកិច្ចការងារនៅឥណ្ឌូនេស៊ីរបស់រដ្ឋមន្ត្រីការបរទេសចិន លោក Wang Yi បាននិយាយថា ឥណ្ឌូនេស៊ី និងចិនបានកំពុងពិភាក្សាគ្នាពង្រីកផ្លូវរថភ្លើងល្បឿនលឿនដំបូងគេនៅអាស៊ីអាគ្នេយ៍ ដើម្បីជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ។
នៅថ្ងៃទី១៩ ខែមេសា ឆ្នាំ២០២៤ រដ្ឋមន្ត្រីសម្របសម្រួលកិច្ចការសមុទ្រ និងវិនិយោគឥណ្ឌូនេស៊ីលោក Luhut Binsar Pandjaitan បានឱ្យដឹងថា ក្នុងកិច្ចសន្ទនាកម្រិតខ្ពស់ ឥណ្ឌូនេស៊ី-ចិន លើកទី៤ ដែលប្រព្រឹត្តទៅនៅទីក្រុង Labuan Bajo ប្រទេសឥណ្ឌូនេស៊ី ភាគីទាំងពីរបានឯកភាពជំរុញកិច្ចសហប្រតិបត្តិការសេដ្ឋកិច្ចទ្វេភាគីដែលមានផលប្រយោជន៍ទៅវិញទៅមក ធានាបាននូវការកើនឡើង និងសមតុល្យពាណិជ្ជកម្មកាន់តែមានតុល្យភាពរវាងភាគីទាំងពីរ។

រដ្ឋមន្ត្រី Luhut Binsar Pandjaitan និងរដ្ឋមន្ត្រីការបរទេសចិនលោក Wang Yi បានផ្តោតការពិភាក្សាលើការជំរុញការពង្រីកខ្សែរថភ្លើងល្បឿនលឿន Jakarta-Bandung ដែលចាត់ទុកថាជាខ្សែរថភ្លើងល្បឿនលឿនដំបូងគេនៅអាស៊ីអាគ្នេយ៍។ ផ្លូវនេះស្ថិតក្នុងក្របខ័ណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវរបស់ចិន (BRI) ដែលត្រូវបានសម្ពោធក្នុងខែតុលា ឆ្នាំ២០២៣ ជាមួយនឹងការវិនិយោគជាង ៧ ពាន់លានដុល្លារ។ យោងតាមការពិភាក្សារវាងប្រទេសឥណ្ឌូណេស៊ី និងចិន ខ្សែរថភ្លើងល្បឿនលឿនពីហ្សាកាតា ទៅបានឌុង អាចនឹងពង្រីកដល់ទីក្រុងស៊ូរ៉ាបាយ៉ា ក្នុងខេត្តជ្វាខាងកើតនៃប្រទេសឥណ្ឌូនេស៊ី។

បើយោងតាមអ្នកជំនាញមួយចំនួន ចម្ងាយបច្ចុប្បន្ននៃខ្សែរថភ្លើងល្បឿនលឿនពីហ្សាកាតា ទៅបានឌុងគឺ ១៤២ គីឡូម៉ែត្រ ដែលជាចម្ងាយខ្លីអាចទាក់ទងគ្នាដើម្បីបង្កើនប្រាក់ចំណេញ ខណៈពេលដែលចម្ងាយពីហ្សាកាតាទៅស៊ូរ៉ាបាយ៉ាមានជាង ៧០០ គីឡូម៉ែត្រ ដែលវាអាចបើកឱកាសសេដ្ឋកិច្ចកាន់តែច្រើន។

គួរបញ្ជាក់ដែរថា បច្ចុប្បន្នប្រទេសចិនគឺជាអ្នកវិនិយោគដ៏ធំមួយនៅក្នុងប្រទេសឥណ្ឌូនេស៊ី ជាមួយនឹងការវិនិយោគសរុបប្រហែល ៧.៤ ពាន់លានដុល្លារក្នុងឆ្នាំ ២០២៣។ បើយោងតាមក្រុមអ្នកសង្កេតការណ៍បាននិយាយថា សព្វថ្ងៃប្រទេសចិនក៏មានបំណងចង់ជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគជាមួយបណ្តាប្រទេសអាស៊ីអាគ្នេយ៍មួយចំនួនទៀត រួមទាំងគម្រោងក្រោមគំនិតផ្តួចផ្តើម BRI បន្ទាប់ពីសហរដ្ឋអាមេរិកបានលើកកម្ពស់យន្តការកិច្ចសហប្រតិបត្តិការគំរូ “ពហុភាគី” ក្នុងតំបន់ថ្មីដោយរៀបចំកិច្ចប្រជុំកំពូលលើកដំបូងរវាង សហរដ្ឋអាមេរិក ជប៉ុន និងហ្វីលីពីន នៅពាក់កណ្តាលខែមេសា ឆ្នាំ២០២៤៕