ឆ្នាំ២០២២ គឺជាឆ្នាំនៃការចាប់ផ្តើមនៃការនាំចេញផ្លែទុរេនជាផ្លូវការពីវៀតណាមទៅកាន់ប្រទេសចិន។ គិតមកទល់ពេលនេះ មានប្រមាណនឹង ៣០ជើងហើយ ដែលចិនបានបញ្ជូនផ្លែទុរេនត្រឡប់ទៅឲ្យវៀតណាមវិញ ដោយភាគីខាងចិនបានលើកឡើងថា ទុរេនទាំងនោះគឺមានផ្ទុកពុលសារធាតុកាដមីញ៉ូម លើសកម្រិតកំណត់។

កាដមីញ៉ូម គឺជាសារធាតុដែលមិនងាយរលួយ ដែលភាគច្រើនត្រូវបានប្រើដើម្បីផលិតផលិតថ្ម សារធាតុពណ៌ ថ្នាំកូតដែក និងផ្លាស្ទិច។ សាធាតុកាដមីញ៉ូមក៏ត្រូវបានគេរកឃើញជាទូទៅនៅក្នុងផ្សែងបារី និងចំពោះអាហារប្រភេទខ្លះបានផ្ទុកនូវសារធាតុនេះ។ ចំពោះផលប៉ះពាល់នឹងសារធាតុកាដមីញ៉ូម នឹងបណ្តាលឲ្យមនុស្សប្រឈមមុខនឹងជំងឺមហារីកសួត។

យ៉ាងណាមិញ ប្រធានផ្នែកសហប្រតិបត្តិការអន្តរជាតិ និងទំនាក់ទំនងនៅនាយកដ្ឋានការពាររុក្ខជាតិរៀតណាមបានថ្លែងថា ការនាំចេញទុរេនសរុបពីវៀតណាមទៅកាន់ប្រទេសចិនក្នុងអំឡុងពេលនេះគឺមានត្រឹមតែ០.០១% ប៉ុណ្ណោះ។ តាមការបញ្ជាក់ពីភាគីវៀតណាម សារធាតុ cadmium គឺទំនងជាអាចកើតចេញពីដី ទឹក ឬការបំភាយចេញពីរោងចក្រនៅក្បែរនោះ ដែលមិនមែនជាការដាក់សារធាតុនេះចូលដោយផ្ទាល់នោះទេ។

នាយកដ្ឋានកសិកម្មរៀតណាម បច្ចុប្បន្នកំពុងស៊ើបអង្កេតយ៉ាងសកម្មអំពីមូលហេតុ ហើយបានណែនាំផលិតករទុរេនទាំងអស់ ពង្រឹងការគ្រប់គ្រងសារធាតុផ្សំ និងការអនុវត្តកសិកម្មឲ្យបានម៉ត់ចត់ ជាពិសេសគឺត្រូវមានយន្តការណ៍ត្រួតពិនិត្យកម្រិត cadmium ឱ្យបានច្បាស់លាស់មុនពេលនាំចេញ។

ទោះជាយ៉ាងណា នាពេលថ្មីៗនេះសមាគមន៍បន្លែនិងផ្លែឈើវៀតណាម បាននឹងកំពុងទទួលរងនូវសម្ពាធនិងការព្រមានយ៉ាងធ្ងន់ធ្ងរពីប្រទេសចិន ជុំវិញកម្រិតជាតិពុល cadmium លើសកំណត់នៃផ្លែឈើនាំចេញរបស់វៀតណាម និងតម្រូវឲ្យមានការដោះស្រាយចំពោះបញ្ហានេះជាចាំបាច់ផងដែរ៕

យោងតាមប្រភពសារព័ត៌មាន The Straits Time កាលពីថ្ងៃទី១ ខែឧសភានេះបានឲ្យដឹងថា គិតមកត្រឹមពេលនេះ រលកកម្តៅឆ្នាំ២០២៤ នៅប្រទេសឥណ្ឌាបណ្តាលឲ្យមនុស្សប្រមាណ៩នាក់ បានបាត់បង់ជីវិតដោយសារតែជំងឺដាច់សរសៃឈាមខួរក្បាល ខណៈតំបន់ខ្លះក៏កំពុងតែខ្វះទឹកក្នុងការចែកចាយទៅកាន់ប្រជាពលរដ្ឋខ្លួន។

សីតុណ្ហភាពកម្តៅនៅឯភាគខាងកើតប្រទេសឥណ្ឌាបានកើនឡើងខ្ពស់បំផុតក្នុងប្រវត្តិសាស្រ្ត សម្រាប់ខែមេសានេះ ខណៈការិយាល័យអាកាសធាតុបានព្យាករណ៍ថា សម្រាប់ខែឧសភា សីតុណ្ហភាពនឹងកាន់តែបន្តក្តៅខុសពីធម្មតាបន្ថែមទៀត។

ជាមួយគ្នានេះ តាមសេចក្តីរាយការណ៍ មនុស្សយ៉ាងហោចណាស់៩នាក់ហើយ បានស្លាប់ដោយសារតែជំងឺដាច់សរសៃឈាមខួរក្បាល ដោយហេតុថាពួកគេបានព្យាយាមធ្វើការ ស្ថិតនៅក្រោមកម្តៅថ្ងៃរយៈពេលយូរម៉ោងពេក។ បន្ថែមពីនេះ នៅតំបន់មួយចំនួននៅឯប្រទេសឥណ្ឌាក៏កំពុងប្រឈមនឹងបញ្ហាកង្វះទឹកប្រើប្រាស់ ដោយសារតែអាកាសធាតុក្តៅស្ងួតហួតហែងជាយូរមកហើយ និងគ្មានភ្លៀងធ្លាក់ទាល់តែសោះ។

ទោះជាយ៉ាងណា ក្នុងអំឡុងរដូវក្តៅនេះ យោងតាមវេជ្ជបណ្ឌិតជំនាញបានគូសបញ្ជាក់ថា មនុស្សម្នាគឺមិនត្រូវទ្រាំស្ថិតនៅក្រោមកម្តៅថ្ងៃរយៈពេលយូរម៉ោងពេកនោះទេ និងត្រូវតែទទួលទានទឹកឲ្យបានគ្រប់គ្រាន់ ទើបជាការប្រសើរដល់សុខភាព៕

ប្រទេសជប៉ុន៖ ផ្ទះទំនេរនៅក្នុងប្រទេសជប៉ុនបានកើនឡើងដល់ជិត ៩ លានយូនីត ដោយសារចំនួនប្រជាជននៅក្នុងប្រទេសនេះមានការថយចុះ ដែលការថយចុះនេះបានជះឥទ្ធិពលយ៉ាងខ្លាំងដល់សង្គម និងសេដ្ឋកិច្ចរបស់ប្រទេសជប៉ុន។
យោងតាមចុះផ្សាយរបស់ The Guardian កាលពីថ្ងៃទី១ ខែឧសភា ឆ្នាំ២០២៤ ថារដ្ឋាភិបាលជប៉ុនទើបតែបានប្រកាសពីការស្ទង់មតិដែលបង្ហាញថាចំនួនផ្ទះទំនេរនៅក្នុងប្រទេសបានកើនឡើងដល់កំណត់ត្រាថ្មី ៩ លានយូនីតត្រឹមខែតុលា ឆ្នាំ ២០២៣ ដែលជាការកើនឡើងចំនួន ៥១០,០០០ យូនីត បើធៀបនឹងការស្ទង់មតិចុងក្រោយបំផុតក្នុងឆ្នាំ ២០១៨ ត្រូវបានធ្វើឡើងដោយក្រសួងកិច្ចការផ្ទៃក្នុង និងទំនាក់ទំនងរបស់ជប៉ុនរៀងរាល់ប្រាំឆ្នាំម្តង។

ដូច្នេះគិតត្រឹមខែតុលាឆ្នាំមុន ចំនួនផ្ទះទំនេរមាន ១៣.៨% នៃផ្ទះទាំងអស់នៅក្នុងប្រទេសជប៉ុន។ នេះជាអត្រាខ្ពស់ដែលបង្ហាញថាផ្ទះប្រហែលមួយ ឬពីរក្នុងចំណោមផ្ទះប្រាំពីរគឺគ្មានមនុស្សរស់នៅទេ។ មូលហេតុដែលបណ្តាលឱ្យមានផ្ទះទំនេរច្រើនរហូតដល់ជិត ៩ លានគឺដោយសារចំនួនប្រជាជននៅជនបទធ្លាក់ចុះ ហើយភាគច្រើនផ្ទះនៅតំបន់ទាំងនោះគឺនៅឆ្ងាយពីមជ្ឈមណ្ឌលសំខាន់ៗដូចជាមន្ទីពេទ្យ សាលារៀន និងក្រុមហ៊ុននានា ធ្វើឱ្យប្រជាជនមិនមានចំណាប់អារម្មណ៍មករស់នៅទីនេះ ហើយផ្ទះក៏ត្រូវបានគេទុកចោលរហូតមកដល់ពេលនេះ។

គួរបញ្ជាក់ដែរថា នៅឆ្នាំ ១៩៧៣ ចំនួនផ្ទះទំនេរនៅក្នុងប្រទេសជប៉ុនមានត្រឹមតែ ១.៧២ លានផ្ទះប៉ុណ្ណោះ ដែលស្មើនឹង ៥.៥% នៃចំនួនផ្ទះសរុបនៅក្នុងប្រទេស។ រីឯនៅឆ្នាំ ១៩៩៣ វិញចំនួនផ្ទះដែលគ្មានមនុស្សរស់នៅបានកើនឡើងដល់ ៤.៤៨ លាន ហើយចំនួននេះបានកើនឡើងទ្វេដងក្នុងរយៈពេល ៣០ ឆ្នាំកន្លងមកនេះ។ ទោះជាយ៉ាងណាទិន្នន័យបង្ហាញថា ក្នុងចំណោម ៩ លានយូនីតទំនេរ មាន ៤.៤៣ លានយូនីតសម្រាប់ជួល និង ៣៣០.០០០ យូនីតសម្រាប់លក់ និង ៣៨០.០០០ យូនីតទៀតគឺមានម្ចាស់ប៉ុន្តែពួកគេចាត់ទុកជាផ្ទះទីពីរ ប្រើសម្រាប់តែវិស្សមកាលប៉ុណ្ណោះ។

ផ្ទះទំនេរគឺជារឿងធម្មតាជាពិសេសនៅជនបទរបស់ប្រទេសជប៉ុន។ ផ្ទះនៅតាមជនបទជាច្រើនត្រូវបានកាន់កាប់ដោយប្រជាជនរស់នៅក្នុងទីក្រុងធំៗ។ ពួកគេបានទទួលមរតកពីសាច់ញាតិ ប៉ុន្តែមិនមានឆន្ទៈ ឬមិនអាចជួសជុលពួកវាឡើងវិញបានទេ។ មន្ត្រីជប៉ុនជំរុញឱ្យម្ចាស់ផ្ទះជួសជុល រុះរើ លក់ ឬរកវិធីប្រើប្រាស់ឡើងវិញ។ ពួកគេក៏បានបង្កើតច្បាប់ដើម្បីចេញការព្រមានដល់ម្ចាស់ផ្ទះទាំងនេះផងដែរ។ ទិន្នន័យរបស់រដ្ឋាភិបាល ជប៉ុន ក្នុងខែកុម្ភៈ បានបង្ហាញថា អត្រាកំណើតរបស់ប្រទេសនេះបានធ្លាក់ចុះដល់កម្រិតទាបថ្មីមួយនៅឆ្នាំ ២០២៣ នៅពេលដែលការស្លាប់មានការកើនឡើងទ្វេដងនៃអត្រាកំណើត៕

ប្រទេសចិន ៖ ប្រទេសចិនបានធ្វើវិសោធនកម្មច្បាប់អប់រំការពារជាតិ (National Defense Education Law) ដើម្បីឱ្យសិស្សរៀននៅកម្រិតមធ្យមសិក្សា និងឧត្តមសិក្សាទាំងអស់ត្រូវតែឆ្លងកាត់ការបណ្តុះបណ្តាល និងហ្វឹកហាត់ទាហានជាមូលដ្ឋាន ហើយស្ថិតក្រោមការទទួលខុសត្រូវរបស់ក្រសួងអប់រំ និងគណៈកម្មាធិការមជ្ឈិមបក្សកុម្មុយនិស្ត ។

ការធ្វើវិសោធនកម្មច្បាប់មានគោលបំណងជំរុញឱ្យពលរដ្ឋចិនគ្រប់រូបយល់ដឹងពីតួនាទីការពារប្រទេស ក៏ដូចជាជួយឱ្យប្រទេសចិនអាចសម្របខ្លួនជាមួយការផ្លាស់ប្តូរថ្មីៗនៅលើពិភពលោកផងដែរ ។ នេះបើតាមការរាយការណ៍របស់សារព័ត៌មានចិន ។

ចំណែកអ្នកវិភាគយល់ឃើញថា ការធ្វើវិសោធនកម្មច្បាប់ គឺបង្ហាញពីការបារម្ភរបស់រដ្ឋាភិបាលចិនពាក់ព័ន្ធនឹងស្ថានការណ៍សន្តិសុខជាតិ ខណៈបច្ចុប្បន្ន មានបញ្ហាជម្លោះកើតឡើងជាបន្តបន្ទាប់រវាងចិន និងអាមេរិក រួមទាំងតៃវ៉ាន់ ខណៈចិនអះអាងថា តៃវ៉ាន់ គឺជាទឹកដីមួយផ្នែករបស់ខ្លួន ។ ហេតុនេះ ចិនត្រូវការបង្រួបបង្រួមប្រទេសជាមួយតៃវ៉ាន់ក្រោមគោលនយោបាយចិនតែមួយ បើទោះជាត្រូវប្រើកងកម្លាំងគ្រប់គ្រងតៃវ៉ាន់ក្តី ។

ក្រៅពីនេះ វាជាការបង្ហាញពីគោលដៅរបស់ប្រធានាធិបតីចិន លោក ស៊ី ជិនពីង ដែលចង់ពង្រឹងអំណាច, បណ្តុះគំនិតជាតិនិយម, ឱ្យពលរដ្ឋត្រៀមខ្លួនតស៊ូផ្នែកទាហាន និងជំរុញយុវជនសម័យថ្មីចូលរួមឱ្យបានច្រើនជាមួយទាហាន ។

ក្រៅពីនេះ ការធ្វើវិសោធនកម្មច្បាប់កើតឡើងក្រោយពីកងទ័ពរំដោះប្រជាជនចិនបរាជ័យជាបន្តបន្ទាប់ក្នុងការទាក់ទាញយុវជនចេះដឹងឱ្យដាក់ពាក្យធ្វើទាហានគ្រប់ចំនួន ខណៈអត្រាគ្មានការងារធ្វើរបស់យុវជនកើនឡើង ៕