ប្រទេសកូរ៉េខាងត្បូង ៖ កម្មវិធីប្រកួតប្លែកៗតែងតែកើតមានជាប្រចាំ ដើម្បីទាក់ទាញភ្ញៀវទេសចរមកកម្សាន្តនៅប្រទេសខ្លួន ។ កាលពីពេលថ្មីៗនេះ ប្រទេសកូរ៉េខាងត្បូងបានរៀបចំការប្រកួតទៀតហើយ គឺការប្រកួតសម្រាកថ្ងៃត្រង់ ដើម្បីស្វែងរកអ្នកដែលបានគេងលក់ស្កប់ស្កល់ល្អបំផុតនឹងទទួលបានរង្វាន់ធំមិនធ្លាប់មាន ។

កាលពីថ្ងៃទី១២ ខែឧសភា ឆ្នាំ២០២៤ ប្រទេសកូរ៉េខាងត្បូងបានរៀបចំការប្រកួតអង្គុយស្ងៀម និងមិនធ្វើអ្វីសោះ ហើយលើកនេះ កូរ៉េខាងត្បូងបានរៀបចំការប្រកួតថ្មីមួយទៀត គឺប្រកួតសម្រាកពេលថ្ងៃត្រង់ ។ វាបានទាក់ទាញចំណាប់អារម្មណ៍ពលរដ្ឋជាច្រើននាក់ដែលគ្មានពេលវេលាសម្រាកគ្រប់គ្រាន់នាំគ្នាមកចុះឈ្មោះចូលរួមប្រកួតជាច្រើននាក់ ដែលឆ្លុះបញ្ចាំងពីបញ្ហាសង្គមដែលពោរពេញទៅដោយការប្រកួតប្រជែងក្នុងប្រទេសមួយនេះ ។

តើអ្នកណាទៅជឿថា ការសម្រាកនឹងក្លាយជាការប្រកួតមួយ ដែលអ្នកឈ្នះជាបុគ្គលបានសម្រាកលង់លង់ស្កប់ស្កល់ជាងគេ ។ ការប្រកួតនេះមានឈ្មោះថា «Power Nap» ឬការប្រកួតសម្រាកពេលថ្ងៃត្រង់ ដែលរៀបចំឡើងនៅទីក្រុងសេអ៊ូល ប្រទេសកូរ៉េខាងត្បូង កាលពីថ្ងៃទី១៨ ខែឧសភា ឆ្នាំ២០២៤ និងមានបេក្ខជនចូលរួមប្រកួតស្មើជាង១០០នាក់ ។

លក្ខខណ្ឌការប្រកួត គឺបេក្ខជនចូលរួមទាំងអស់ត្រូវបិទភ្នែកសម្រាកនៅពេលថ្ងៃត្រង់ រយៈពេល១ម៉ោងកន្លះ ហើយអ្នកដែលសម្រាកបានស្កប់ស្កល់បំផុតនឹងទទួលបានជ័យជម្នះ ។ វាមិនងាយស្រួលប៉ុន្មានទេ ពីព្រោះក្នុងអំឡុងពេលសម្រាក គណៈកម្មការនឹងព្យាយាមដើររំខានមិនឱ្យបេក្ខជនសម្រាកលក់ស្កប់ស្កល់ ដូចជា ៖ ការខ្សិបដាក់ត្រចៀក, ការយករោមសត្វទៅបោសលើផ្ទៃមុខ និងការបើកសំឡេងមូស ជាដើម ។

បើទោះជាគណៈកម្មការរំខានតាមវិធីផ្សេងៗក្តី ប៉ុន្តែបេក្ខជនចូលរួមប្រកួតទាំងអស់បានត្រៀមខ្លួនរួចរាល់ហើយសម្រាប់ការសម្រាកលក់ស្កប់ស្កល់ ។ គណៈកម្មការនឹងដាក់ពិន្ទុថា តើបេក្ខជនរូបណាបានសម្រាកលក់ស្កប់ស្កល់ជាងគេ តាមរយៈការវាស់ចង្វាក់បេះដូង ។ បើអ្នកណាម្នាក់មានចង្វាក់បេះដូងក្នុងអំឡុងពេលសម្រាកលក់ ខុសគ្នាពីពេលភ្ញាក់ខ្លាំងប៉ុនណា ប៉ុន្តែអ្នកនោះកាន់តែសម្រាកលក់ស្កប់ស្កល់ នឹងឈ្នះការប្រកួតនេះ ។

គណៈកម្មការរៀបចំការប្រកួតនិយាយថា ការប្រកួតនេះជួយដល់បុគ្គលិកធ្វើការនៅតាមក្រុមហ៊ុនផ្សេងៗ ដែលពួកគេពុំបានសម្រាកគ្រប់គ្រាន់ នឹងមានឱកាសបានសម្រាកលក់យ៉ាងស្កប់ស្កល់ និងជាការផ្ញើសារទៅកាន់មនុស្សគ្រប់គ្នាឱ្យដឹងពីសារៈសំខាន់របស់ការសម្រាកសម្រាប់សុខភាព ។ រីឯបេក្ខជនមកចូលរួមប្រកួតប្រាប់ថា ពេលដឹងថា មានការប្រកួតសម្រាក ពួកគេក៏ប្រញាប់មកចុះឈ្មោះ ពីព្រោះក្នុង១ថ្ងៃៗ ពួកគេធ្វើការហត់នឿយណាស់ និងគ្មានពេលសម្រាកគ្រប់គ្រាន់ទេ ទើបពួកគេមកចូលរួមប្រកួតដើម្បីចង់សម្រាកពីការងារ ។

អ្នកស្រី ចេនណា គីម ជាបេក្ខជនចូលរួមប្រកួតនិយាយថា ៖ «នៅថ្ងៃធម្មតា ពួកយើងបានធ្វើការរហូតដល់ពេលយប់ និងស្ទើរតែគ្មានកម្លាំងក្នុងខ្លួន ។ នៅថ្ងៃសៅរ៍-អាទិត្យ ទើបយើងបានសម្រាកគ្រប់គ្រាន់ ហើយពេលទទួលដំណឹងថា គេប្រកួតសម្រាក យើងក៏សម្រេចចិត្តមកចូលរួមប្រកួត ពីព្រោះចង់សម្រាកស្រាប់ហើយ» ។

លោក សន ជីហ៊ង ជាបេក្ខជនចូលរួមប្រកួតម្នាក់ទៀតនិយាយថា ៖ «ប្រទេសកូរ៉េខាងត្បូងមានឈ្មោះថា គឺជាសង្គមប្រកួតប្រជែងគ្នាខ្លាំង ទើបធ្វើឱ្យមនុស្សគ្រប់គ្នាពុំសូវផ្តល់ភាពសំខាន់លើការសម្រាកទេ ។ ខ្ញុំគិតថា ការប្រកួតបែបនេះបានជួយឱ្យមនុស្សគ្រប់គ្នានៅសម័យថ្មីបានសម្រាកគ្រប់គ្រាន់ និងកាត់បន្ថយពេលវេលាធ្វើការ» ។

កូរ៉េខាងត្បូងជាប្រទេសមួយស្ថិតក្នុងចំណោមប្រទេសមានសេដ្ឋកិច្ចរីកចម្រើន ហើយពលរដ្ឋកូរ៉េខាងត្បូងមានពេលសម្រាកជាមធ្យមតិចបំផុត គឺស្មើត្រឹមតែ៧ម៉ោង៤១នាទីប៉ុណ្ណោះ បើធៀបនឹងការសម្រាកជាមធ្យមរបស់ពលរដ្ឋប្រទេសផ្សេង គឺស្មើនឹង៨ម៉ោង២២នាទី ។ ហេតុនេះ ការប្រកួតសម្រាកបានទទួលការចាប់អារម្មណ៍យ៉ាងខ្លាំងពីពលរដ្ឋជាច្រើននាក់ ដែលពួកគេស្ត្រេសក្នុងការងារ និងត្រូវការពេលសម្រាកឱ្យបានច្រើន ៕

ប្រទេសអ៊ីតាលី ៖ ទោះជាអាយុតិច ឬច្រើន វាមិនមែនជាឧបសគ្គនោះទេ សម្រាប់កីឡាការិនីរត់ប្រណាំងម្នាក់ជនជាតិអ៊ីតាលី ហើយបើទោះជាមានអាយុរហូតដល់៩០ឆ្នាំក្តី ប៉ុន្តែគាត់បានឈ្នះកំណត់ត្រាពិភពលោកជាច្រើន ។ គាត់និយាយថា គាត់ចូលចិត្តរត់ប្រណាំងខ្លាំងណាស់ ហើយគាត់បានហាត់រត់មិនឈប់ឈរ ដោយសារមានគោលដៅយកឈ្នះខ្លួនឯង ។

កាលពីថ្ងៃទី១៧ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា លោកយាយ អេមម៉ា ម៉ារៀ ម៉ាសេនកា (Emma Maria Massenga) ជាកីឡាការិនីរត់ប្រណាំង អាយុ៩០ឆ្នាំ បានឈ្នះកំណត់ត្រាពិភពលោកម្តងទៀត តាមរយៈការរត់ប្រណាំងចម្ងាយខ្លី និងលឿនបំផុត ។ លោកយាយជាម្ចាស់កំណត់ត្រាពិភពលោក ផ្នែករត់ប្រណាំងលឿនបំផុត ចំនួន៥លើក, ជាម្ចាស់កំណត់ត្រារត់លឿនបំផុតនៅតំបន់អឺរ៉ុប ចំនួន៩លើក និងជាម្ចាស់កំណត់ត្រារត់លឿនបំផុតនៅប្រទេសអ៊ីតាលី ចំនួន២៨លើក ។

ក្នុងអំឡុងពេលប្រទេសនានាលើពិភពលោក កំពុងតែឈានទៅរកសង្គមមនុស្សចាស់ វាមិនចម្លែកទេ ដែលគេសង្កេតឃើញមនុស្សចាស់ទាំងឡាយនាំគ្នាហាត់ប្រាណកាន់តែច្រើន ។ លោកយាយ អេមម៉ា ម៉ារៀ ម៉ាសេនកា បានកើតនៅថ្ងៃទី១ ខែសីហា ឆ្នាំ១៩៣៣ ហើយបានឈានជើងចូលក្នុងក្រុមអ្នករត់ប្រណាំងអាយុច្រើន នៅពេលលោកយាយអាយុ៥៣ឆ្នាំ ។

ហេតុនេះ លោកយាយបានហាត់រត់រហូតមក និងធ្វើឱ្យលោកយាយអាចរត់ប្រណាំងបានល្អជាងមុន ។ បើទោះជាលោកយាយអាយុកាន់តែច្រើនក្តី ក៏លោកយាយពុំព្រមបោះបង់ការរត់ដែរ ខណៈកីឡាការិនីផ្សេងទៀតដែលមានអាយុស្មើគ្នា ពួកគេបោះបង់ការរត់ប្រណាំងម្តងម្នាក់ៗ ទើបធ្វើឱ្យកម្មវិធីប្រកួតរត់ប្រណាំងខ្លះ លោកយាយគ្មានគូប្រកួតទេ ។ ប៉ុន្តែលោកយាយនៅតែកំណត់គោលដៅថា ត្រូវតែប្រកួតជាមួយខ្លួនឯងដើម្បីឱ្យការរត់ល្អលើសមុន ។

ការប្រកួតរត់ប្រណាំងនៅឆ្នាំ២០២៤ លោកយាយបានឈ្នះកំណត់ត្រាពិភពលោក ក្នុងចម្ងាយផ្លូវ២០០ម៉ែត្រសម្រាប់កីឡាការិនីអាយុច្រើន ខណៈ អ៊ីលីកុ សៃតូ ជាកីឡាករជប៉ុន ដែលបានរត់ប្រើពេលចំនួន៥៣.៣វិនាទី កាលពីឆ្នាំ២០២២ ។ ប៉ុន្តែលោកយាយប្រើពេលរត់ត្រឹមតែ៥១.៤៧វិនាទីប៉ុណ្ណោះ នៅឆ្នាំ២០២៤ ។

ក្រៅពីលោកយាយឈ្នះកំណត់ត្រាពិភពលោកជាបន្តបន្ទាប់ លោកយាយប្រាប់ថា ការរត់ប្រណាំងបានធ្វើឱ្យគាត់ស្គាល់មនុស្សថ្មីៗ និងពុំឯកោផងដែរ ។ លោកយាយប្រាប់ថា ៖ «វាធ្វើឱ្យខ្ញុំអាចឆ្លងកាត់ពេលវេលាលំបាក ដែលមនុស្សអាយុច្រើនដូចខ្ញុំបានជួបការលំបាកជាច្រើន ។ ការរត់ប្រណាំងធ្វើឱ្យខ្ញុំជួបមនុស្សថ្មីៗគ្រប់ពេលវេលា ហើយខ្ញុំពុំចាំបាច់នៅម្នាក់ឯង» ។

ចំណែកគោលដៅបន្ទាប់របស់លោកយាយ គឺដណ្តើមពានរង្វាន់កីឡាការិនីរត់ប្រណាំងលឿនបំផុតប្រចាំប្រទេសអ៊ីតាលី ក្នុងការប្រកួតនៅខែមិថុនា ឆ្នាំ២០២៤ ហើយលោកយាយមានគម្រោងចូលរួមការរត់ប្រណាំងលំដាប់ពិភពលោក នៅប្រទេសស៊ុយអែត ឆ្នាំ២០២៥ ។ ប៉ុន្តែលោកយាយបាននិយាយបែបកំប្លែងថា គាត់ពុំចង់រៀបចំគម្រោងរត់ប្រណាំងនៅឆ្នាំ២០២៥ ទេ ពីព្រោះពុំដឹងថា គាត់នឹងអាចមានជីវិតរស់នៅរហូតដល់ពេលនោះឬក៏អត់ ៕

ប្រទេសថៃ ៖ កាលពីថ្ងៃទី១៧ ខែឧសភា ឆ្នាំ២០២៤ សារព័ត៌មានថៃឈ្មោះ Springnews រាយការណ៍ថា កម្រិតទឹកសមុទ្របានកើនឡើងជារៀងរាល់ថ្ងៃធ្វើឱ្យទីក្រុងបាងកក ដែលមានទីតាំងនៅជាប់ទន្លេចៅព្រះយ៉ា និងជាប់ឆ្នេរសមុទ្រក្លាយជាតំបន់ប្រឈមនឹងទឹកជំនន់ ។ ហេតុនេះ រដ្ឋាភិបាលថៃអាចពិចារណាផ្លាស់ប្តូរទីតាំងក្រុងបាងកកទៅកាន់តំបន់ផ្សេងទៀតនាពេលឆាប់ៗ ។ នេះបើតាមការលើកឡើងរបស់លោក Pawich Kesawawong អគ្គនាយករងនៃអគ្គនាយកដ្ឋានបម្រែបម្រួលអាកាសធាតុ និងបរិស្ថានប្រទេសថៃ ។

រយៈពេលជាច្រើនឆ្នាំមកនេះ មហាជនសួរថា ហេតុអ្វីការរីកចម្រើន, ការងារ, ហេដ្ឋារចនាសម្ព័ន្ធដឹកជញ្ជូន និងឱកាសផ្សេងៗប្រមូលផ្តុំនៅទីក្រុងបាងកកតែមួយ? ហេតុអ្វីនៅតាមបណ្តាខេត្ត-ក្រុងផ្សេងៗមិនទទួលបានឱកាសល្អៗដូចក្រុងបាងកក? តើក្រុងបាងកកជាមជ្ឈមណ្ឌលកណ្តាលអភិវឌ្ឍន៍ខ្លាំងពេក មែនទេ?

ទោះយ៉ាងណា ទីក្រុងមួយនេះមិនមានអ្វីសម្បូរបែបគ្រប់យ៉ាងនោះទេ ខណៈតំបន់ជាច្រើនក្នុងក្រុងនេះជាតំបន់ទំនាប ទើបពេលមានភ្លៀងធ្លាក់ខ្លាំងម្តងៗ ក្រុងបាងកក ក៏ក្លាយជាទីក្រុងសមុទ្រមួយរំពេច ។ ហេតុនេះ ក្រុងបាងកក គឺជាទីក្រុងមួយរបស់ប្រទេសថៃដែលគេសន្និដ្ឋានថា នឹងលិចទឹកនាពេលឆាប់ៗ ។

លើសពីនេះ ពិភពលោក ក៏បានឡើងកំដៅជារៀងរាល់ថ្ងៃផងដែរ ដោយសារការបម្រែបម្រួលអាកាសធាតុ ហើយសីតុណ្ហភាពកើនឡើងបានធ្វើឱ្យផ្ទាំងទឹកកករលាយយ៉ាងឆាប់រហ័ស ។ ដូច្នេះ វាធ្វើឱ្យកម្រិតទឹកសមុទ្រកើនឡើងខ្ពស់ រហូតបណ្តាលឱ្យជន់លិចបាងកក ដែលជាទីក្រុងឆ្នេរសមុទ្រ ។

លោក Pawich Kesawawong អគ្គនាយករងនៃអគ្គនាយកដ្ឋានបម្រែបម្រួលអាកាសធាតុ និងបរិស្ថានរបស់រដ្ឋាភិបាលថៃ បានថ្លែងជាមួយសារព័ត៌មាន AFP អំពីករណីការផ្លាស់ប្តូរទីតាំងក្រុងបាងកក ដើម្បីគេចពីទឹកជំនន់ថា ៖ «ក្រុងបាងកកពុំអាចសម្របតាមអាកាសធាតុកាន់តែក្តៅខ្លាំងនាពេលបច្ចុប្បន្នទេ ខ្ញុំគិតថា សីតុណ្ហភាពពិភពលោក ជាមធ្យម គឺលើស១.៥អង្សារសេ ។ ពេលនេះ យើងត្រូវតែគិតពីការសម្របខ្លួន ហើយខ្ញុំគិតថា ក្រុងបាងកកនឹងលិចទឹកមិនខាន បើស្ថានការណ៍នៅតែបែបនេះបន្តទៀត» ។

លោកបន្តថា ៖ «ក្រុងបាងកកបានស្រាវជ្រាវពីវិធានការការពារផ្សេងៗ ដូចជា ៖ ការសាងសង់ទំនប់ស្រដៀងគ្នានឹងប្រទេសហូឡង់ ។ យើងមានគម្រោងថា នឹងផ្លាស់ប្តូរទីតាំងក្រុងបាងកក ហើយនេះជាជម្រើសល្អមួយ ។ ហេតុនេះ យើងនឹងបំបែកទីក្រុង, ស្ថាប័នរដ្ឋាភិបាល និងតំបន់អាជីវកម្មផ្សេងៗ ហើយបាងកកនឹងជាទីក្រុងធំរបស់ប្រទេសថៃបន្តទៀត ប៉ុន្តែយើងនឹងផ្លាស់ប្តូរតែតំបន់អាជីវកម្មប៉ុណ្ណោះ» ។

ចុងក្រោយ លោកបានសំណូមពរឱ្យពលរដ្ឋទាំងអស់ជួយថែរក្សាសម្បត្តិធម្មជាតិរបស់ប្រទេសថៃ និងចូលរួមអនុវត្តវិធានការផ្សេងៗ ដោយលោកបញ្ជាក់ថា តាំងពីដើមឆ្នាំ២០២៤ ការបម្រែបម្រួលអាកាសធាតុបានបណ្តាលឱ្យប្រទេសថៃក្តៅខ្លាំង និងកើតគ្រោះធម្មជាតិអេលនីណូ ។ គ្រោះធម្មជាតិនេះបានប៉ះពាល់ដល់ផលដំណាំ, កម្រិតទឹកសមុទ្រស្រកធ្វើឱ្យផ្កាថ្មប្រែពណ៌ និងឧទ្យានជាតិជាច្រើនកន្លែងបិទដំណើរការ ព្រមទាំងប៉ះពាល់ដល់វិស័យទេសចរណ៍ផងដែរ ។

លោកសង្កត់ធ្ងន់ថា រដ្ឋាភិបាលថៃត្រូវតែគិតពីការបំភាយឧស្ម័នផ្ទះកញ្ចក់ និងផលប៉ះពាល់ក្នុងផ្នែកផ្សេងទៀត មុនពេលស្ថានការណ៍បំពុលបរិស្ថាននៅប្រទេសថៃកាន់តែធ្ងន់ធ្ងរជាងនេះ ។ បើមិនដូច្នោះទេ ប្រទេសថៃអាចនឹងមានទីក្រុងថ្មីមានឈ្មោះថា ទីក្រុងណាខនប៉ាធុម, ទីក្រុងរាជបុរី, ទីក្រុងឈៀងម៉ៃ និងទីក្រុងយ៉ាឡា មានន័យថា ថៃនឹងបង្កើតទីក្រុងធំនៅតាមបណ្តាខេត្តទាំងនេះ ៕

បរទេស៖ ថ្មីៗនេះក្រុមហ៊ុន Apple ត្រូវបានគេនិយាយថាកំពុងអភិវឌ្ឍស្មាតហ្វូនដែលស្តើងជាងគេបំផុតហៅថា iPhone 17 Slim ដែលរំពឹងថានឹងចេញនៅចុងឆ្នាំ ២០២៥ ខណៈ iPhone 16 ក៏ត្រូវបានគេរំពឹងដែរថានឹងប្រកាសលក់ជាផ្លូវការនៅខែកញ្ញាឆ្នាំនេះ។
យោងតាម The Information ទូរស័ព្ទ iPhone ស្តើងបំផុតនឹងមានការរចនាប្លែកជាងមុន ហើយអាចនឹងមានតម្លៃថ្លៃជាងប្រភេទ iPhone Pro Max ដែលរំពឹងថានឹងចេញលក់ជាមួយ iPhone 17 នៅខែកញ្ញា ឆ្នាំ ២០២៥។ ទោះជាយ៉ាងណាក៏ដោយ ប្រភពបាននិយាយថា បច្ចុប្បន្នក្រុមហ៊ុន Apple នៅតែស្ថិតក្នុងដំណើរការសាកល្បង និងមិនទាន់មានជម្រើសចុងក្រោយនៅឡើយទេ។

យោងតាម MacRumors ទូរស័ព្ទ iPhone 17 Slim នឹងមានអេក្រង់ 6.12 អ៊ីងតាមអង្កត់ទ្រូង ទំហំរបស់ iPhone ស្តង់ដារ និងអេក្រង់ 6.69 អ៊ីញនៃម៉ូដែល Pro Max។ បើយោងតាមប្រភព ភាពខុសគ្នាគួរឱ្យកត់សម្គាល់មួយទៀតនៅលើ iPhone ដ៏ស្តើងនេះគឺថា កាមេរ៉ាខាងក្រោយនឹងមានទីតាំងនៅកណ្តាលកំពូលនៃទូរស័ព្ទជំនួសឱ្យជ្រុងខាងឆ្វេងផ្នែកខាងលើ។ ឈ្មោះកូដរបស់ផលិតផលក្នុងគម្រោងគឺ D23 ដែលអាចប្រើបន្ទះឈីបដំណើរការជំនាន់ចុងក្រោយរបស់ Apple គឺ A19។ ការបន្ថែមកំណែកម្រិតខ្ពស់ទៅបន្ទាត់ iPhone អាចជាការឆ្លើយតបរបស់ Apple ចំពោះការបង្កើនសម្ពាធពីគូប្រជែង។

នៅក្នុងទីផ្សារប្រទេសចិន “Apple” កាន់តែបាត់បង់តំណែងរបស់ខ្លួន បើធៀបនឹងម៉ាកយីហោក្នុងស្រុក ជាពិសេស Huawei និង Honor ។ យោងតាមក្រុមហ៊ុនស្រាវជ្រាវទីផ្សារ IDC ក្រុមហ៊ុន Samsung កាន់កាប់ចំណែកទីផ្សារស្មាតហ្វូនធំបំផុតក្នុងរយៈពេល ៣ ខែដំបូងនៃឆ្នាំ ២០២៤ ជាមួយនឹង ២០.៨% ខណៈដែល Apple ដើរតាម Samsung ជាមួយនឹងចំណែកទីផ្សារ ១៧.៣%។

នៅចុងត្រីមាសទីមួយនៃឆ្នាំ ២០២៤ ប្រាក់ចំណូលរបស់ iPhone បានធ្លាក់ចុះ ១០.៥% មកនៅត្រឹម ៤៥.៩៦ ពាន់លានដុល្លារអាមេរិក។ Apple អាចនឹងពិចារណាបញ្ឈប់ការផលិត iPhone Plus ដែលមានតម្លៃថោកជាង Pro Max ហើយបន្តបង្កើតកំណែអាប់ដេតសម្រាប់ iPhone SE នៅដើមឆ្នាំក្រោយ។ ហេតុនេះ iPhone 17 Slim ដែលជាប្រភេទ iPhone ស្តើងបំផុតត្រូវបានគេរំពឹងថានឹងអាចយកឈ្នះទីផ្សារប្រទេសចិននៅឆ្នាំ ២០២៥៕

សហរដ្ឋអាមេរិក៖ បន្ទាប់ពីជោគជ័យនៃការផ្សាំបន្ទះឈីបខួរក្បាលលើកដំបូងកាលពីដើមឆ្នាំ ២០២៤ ក្រុមហ៊ុន Neuralink របស់ Elon Musk បច្ចុប្បន្នបានកំពុងស្វែងរកបេក្ខជនទីពីរសម្រាប់ការធ្វើតេស្តយ៉ាងសកម្មនេះ។
មហាសេដ្ឋី Elon Musk ដែលជាស្ថាបនិកក្រុមហ៊ុន Neuralink ថ្មីៗនេះបានប្រកាសនៅលើបណ្តាញសង្គម X ថា ក្រុមហ៊ុនរបស់លោកកំពុងស្វែងរកបេក្ខជនទីពីរសម្រាប់ការធ្វើតេស្ត implant chip ខួរក្បាល។ គម្រោង “Telepathy” មានគោលបំណងបង្កើតចំណុចប្រទាក់ខួរក្បាល-កុំព្យូទ័រ ដែលអនុញ្ញាតឱ្យអ្នកប្រើប្រាស់គ្រប់គ្រងឧបករណ៍អេឡិចត្រូនិកដោយគ្រាន់តែប្រើខួរក្បាលគិតរបស់ពួកគេ។

កាលពីខែមីនា ឆ្នាំមុនក្រុមហ៊ុន Neuralink បានទទួលការអនុញ្ញាតឱ្យធ្វើការសាកល្បងមនុស្សជាលើកដំបូង ហើយលោក Noland Arbaugh អាយុ ៣០ ឆ្នាំ គឺជាជនពិការបានក្លាយជាមនុស្សដំបូងគេបង្អស់របស់ក្រុមហ៊ុន ដែលត្រូវបានបញ្ចូលជាមួយនឹងបន្ទះឈីបខួរក្បាល Neuralink ។ លោក Arbaugh ចែករំលែកថាចំណុចប្រទាក់សរសៃប្រសាទនេះបាន “ផ្លាស់ប្តូរជីវិត” របស់គាត់ ដែលអនុញ្ញាតឱ្យគាត់អាចចូលមើលគេហទំព័រផ្សេងៗដោយសេរីនៅលើបណ្តាញសង្គម និងលេងហ្គេមវីដេអូដោយប្រើតែគំនិតរបស់គាត់ប៉ុណ្ណោះ។

ទោះជាយ៉ាងណាក៏ដោយការធ្វើតេស្តដំបូងរបស់ Neuralink មិនរលូនទាំងស្រុងនោះទេ។ កាលពីសប្តាហ៍មុន ក្រុមហ៊ុននេះបាននិយាយថា ខ្សែមីក្រូទស្សន៍ជាច្រើនដែលភ្ជាប់ឧបករណ៍ទៅនឹងខួរក្បាល ដែលនីមួយៗស្តើងជាងសរសៃសក់ បានដំណើរការមិនប្រក្រដីក្លាយទៅជាភាពមិនត្រឹមត្រូវក្នុងប៉ុន្មានសប្តាហ៍បន្ទាប់ពីការវះកាត់។ បញ្ហានេះបានធ្វើឱ្យបន្ទះឈីបផ្សេងទៀតដែលបានដាក់បញ្ចូលដំណើរការតិចជាងមុន ដូច្នេះក្រុមហ៊ុនក៏សម្រេចយកខ្សែមីក្រូទស្សន៍ជាច្រើនដែលភ្ជាប់ឧបករណ៍ទៅនឹងខួរក្បាលចេញពីអ្នកជំងឺទាំងស្រុង ដើម្បីឱ្យបន្ទះឈីបផ្សេងទៀតដំណើរការធម្មតាវិញ។

ក្រុមហ៊ុន Neuralink បាននិយាយថា យើងបានកែសម្រួលបន្ទះឈីបរបស់លោក Arbaugh រួចហើយដែលអនុញ្ញាតឱ្យវាដំណើរការប្រកបដោយប្រសិទ្ធភាពម្តងទៀត។ គម្រោងរបស់ Neuralink ត្រូវបានគេរំពឹងថានឹងមិនមានការលំបាកក្នុងការទាក់ទាញបេក្ខជនសម្រាប់ការធ្វើតេស្តចុងក្រោយបង្អស់នោះទេ។ មនុស្សរាប់ពាន់នាក់ត្រូវបានគេនិយាយថាបានសម្តែងការចាប់អារម្មណ៍លើការវះកាត់បញ្ចូលបន្ទះឈីបខួរក្បាលនៅពេលដែល Neuralink បានចាប់ផ្តើមជ្រើសរើសកាលពីខែកញ្ញាឆ្នាំមុន។ យោងតាមទីភ្នាក់ងារព័ត៌មាន Bloomberg ក្រុមហ៊ុនគ្រោងនឹងដំណើរការលើមនុស្សចំនួន ១១ នាក់នៅឆ្នាំ ២០២៤ នេះ ហើយមានគោលបំណងថានឹងមានអ្នកប្រើប្រាស់ច្រើនជាង ២២,០០០ នាក់នៅឆ្នាំ ២០៣០៕

ព្រីន និង រចនា រ៉ាវាឌី បានផ្តល់បទសម្ភាសមួយជាមួយគ្នាដោយលើកឡើងពីការផ្អាកសកម្មភាពសម្តែងរបស់ខ្លួនដោយសារតែចរិតតួអង្គក្នុងសាច់រឿងអ្នកទាំងពីរសម្តែងឡើងឆ្អែតហើយទើបអ្នកទាំងពីរចង់មានអ្វីដែលថ្មីតួអង្គមានចរិតបែបដូចកុនហូលីវូដទើបព្រមទទួលសម្តែងឡើងវិញ។ យ៉ាងណាមិញការលើកឡើងរបស់ ព្រីន និង រចនា រ៉ាវាឌី ធ្វើឱ្យអ្នកមួយចំនួនគិតថាពួកគេអំនួត ខណៈសាមីខ្លួនបានបដិសេធថាពួកគេមិនបានអំនួតនោះទេគ្រាន់តែចង់បានអ្វីដែលថ្មីសម្រាប់អ្នកគាំទ្រប៉ុណ្ណោះ។

ព្រីន និង រចនា រ៉ាវាឌី ត្រូវបានទស្សនិកជនចាត់ទុកថាអ្នកទាំងពីរជាដៃគូដ៏ស័ក្តិសមរាល់សាច់រឿងអ្នកទាំងពីរបានចាប់ដៃគូជាមួយគ្នាសន្ទុះនៃការគាំទ្រទទួលបានច្រើន។ យ៉ាងណាមិញគេសង្កេតឃើញថាតារាសម្តែងទាំងពីរនេះបានផ្អាកពីការសម្តែងរឿងមកជាបង្កើតមាតិកាខ្លីៗវិញម្តង។ នាពេលថ្មីៗនេះ ព្រីន និង រចនា រ៉ាវាឌី បានផ្តល់បទសម្ភាសទៅកាន់សារព័ត៌មានដោយបានរៀបរាប់ពីមូលហេតុដែលពួកគេសម្រេចចិត្តមិនទទួលថតរឿងឡើងវិញ។

ក្នុងបទសម្ភាស ព្រីន និង រចនា រ៉ាវាឌី អ្នកទាំងពីរសម្តែងឡើងឆ្អែតឆ្អន់ទៅហើយទៅលើតួអង្គផ្សេងៗទៀត បើឱ្យទទួលថតតួអង្គដដែលអ្នកទាំងពីរមិនទទួលថតនោះទេព្រោះមិនមានអ្វីដែលថ្មីសម្រាប់អ្នកគាំទ្រ។ ព្រីន និង រចនា រ៉ាវាឌី ថាពួកគេចង់សម្តែងបែបតួអង្គដូចជាហូលីវូដវិញម្តង ណាមួយអ្នកទាំងពីរក៏មមាញឹកការងារផ្សេងចង់យកពេលធ្វើអ្វីដែលថ្មីសម្រាប់ខ្លួនឯងវិញម្តង។

យ៉ាងណាមិញ ការមិនទទួលថតរឿងដោយសារតែសម្តែងឡើងឆ្អែតឆ្អន់ជាតួអង្គដដែលៗនេះធ្វើឱ្យមានមតិលេចឡើងថាតារាសម្តែងទាំងពីរនេះអំនួតមិនឱ្យតម្លៃភាពយន្តខ្មែរដោយសារតែបោះសម្តីថាភាពយន្តខ្មែរដដែលៗមិនមានអ្វីប្លែក។

ការលើកឡើងនេះដែរ រចនា រ៉ាវាឌី បានលើកឡើងថាការលើកឡើងថាខ្លួនអំនួតគឺជាព័ត៌មានមិនគ្រប់ជុ្រងជ្រោយរូបនាងមិនចង់បានន័យដូចការលើកឡើងនោះទេ និងបានអរគុណសម្រាប់ការបញ្ចេញមតិយោបល់របស់មហាជនក្នុងន័យស្ថាបនា។

ចំណែកឯ ព្រីន វិញបានលើកឡើងថាលោកមិនមែនចង់ថត រឿង Hollywood ទេខ្លួន
ចង់come back ជាមួយសាច់រឿងប្លែកៗ ដូចរឿងខាង Hollywood ព្រោះលោកមិនចង់ឱ្យអ្នកគាំទ្រ មើលរឿងអ្នកទាំងពីរក្នុង Character ដដែលខ្លាចអ្នកគាំទ្រធុញ ព្រោះមិនមានអ្វីថ្មីប្លែក។ តារាចម្រៀង និងសម្តែង រូបនេះបានលើកឡើងទៀតថាគេមិនបានមើលងាយភាពយន្តខ្មែរ ដដែលៗគ្មានអីថ្មីនោះដែរ គឺលោកចង់សំដៅការសំដែងរឿងរបស់ខ្លួនកន្លងមក។

ព្រីន ថារូបគេនៅតែស្រលាញ់ការសំដែង និងឱ្យតម្លៃលើការសំដែងរឿងដដែល មិនដែលគិតពីកម្រៃ ថោករឺ ថ្លៃទេព្រោះលោកកើតចេញពីអ្នកសំដែងមិនដែលភ្លេចកំណើតម្ដងណាទេ។

គួរបញ្ជាក់ថា ព្រីន និង រចនា រ៉ាវាឌី មានឈ្មោះបោះសំឡេងលើអាជីពសម្តែងបន្ទាប់ពីអ្នកទាំងពីរបានចាប់ដៃគូសម្តែងជាមួយគ្នាក្នុងខ្សែរឿងជីវិត «អ្នកឈ្នះ» របស់ផលិតកម្មសាស្រ្តាហ្វៀមក្នុងឆ្នាំ២០២០៕

កាលពីពេលថ្មីៗមកនេះអ្នកនិយមលេងអ៊ិនធឺណិតជុំវិញពិភពលោកមានការរំភើបយ៉ាងខ្លាំងចំពោះពាក្យចចាមអារ៉ាមថា Lisa សមាជិកក្រុម BLACKPINK នឹងត្រលប់មកវិញក្នុងពេលឆាប់ៗនេះ។ ដំណឹងនេះបានធ្វើឱ្យមានការសាយភាយកាន់តែខ្លាំងនៅលើបណ្តាញសង្គម បន្ទាប់ពី Ryan Tedder មេដឹកនាំក្រុម One Republic ដែលបានចូលរួមចំណែកក្នុងការផលិត និងនិពន្ធបទចម្រៀងដ៏អស្ចារ្យឱ្យ Taylor Swift, Maroon 5 និង BLACKPINK បានបង្ហោះនៅលើបណ្តាញសង្គមរបស់លោក។

នៅក្នុង Story Instagram របស់ Ryan Tedder បានបង្ហាញថាលោកកំពុងធ្វើការជាមួយ «សិល្បករថៃដើម្បីផលិតបទចម្រៀងថ្មី» ហើយប៉ុន្មានម៉ោងក្រោយមកលោកបានបង្ហោះស្រដៀងគ្នាប៉ុន្តែលើកនេះTag ទៅកាន់ Lisa ។ អ្វីដែលកាន់តែពិសេសក៏មានការលើកឡើងយ៉ាងមុតមាំថាអាល់ប៊ុមដែលមានពាក្យចចាមអារ៉ាមរបស់ Lisa នឹងរួមបញ្ចូលការសហការពិសេសជាមួយតារាចម្រៀងអេស្ប៉ាញគឺ Rosalía ។ ការប៉ាន់ស្មាននេះគឺដោយសារតែការបង្ហោះ Instagram នាពេលថ្មីៗនេះរបស់ Rosalía ដែលមានទង់ជាតិថៃ និងលេខ ៩ លេចឡើង ដែលភាគច្រើនទំនងជាសំដៅទៅលើខែនៃការចេញផ្សាយដែលនឹងអាចជាខែកញ្ញា។

លទ្ធភាពដែល Lisa សហការជាមួយ Rosalía គឺអាចជឿទុកចិត្តបាន ដូចដែល Lisa ធ្លាប់បាននិយាយនៅក្នុង vlog របស់នាងថានាងចង់ធ្វើការជាមួយ Rosalía និង Tyla នៅលើអាល់ប៊ុមទោលរបស់នាង លើសពីនេះអ្នកទាំងពីរគឺជាមិត្តជិតស្និទ្ធិ។ កាលពីមុន Rosalía បានជួប Lisa នៅខាងក្រោយឆាកនៅ Coachella ហើយនៅខែកញ្ញា ឆ្នាំ ២០២៣ Lisa ត្រូវបានគេឃើញនៅឯពិធីខួបកំណើតរបស់ Rosalía ។
យ៉ាងណាមិញ ទោះបីជារឿងនេះគ្រាន់តែជាពាក្យចចាមអារ៉ាមក្តី ប៉ុន្តែអ្នកគាំទ្របានបង្ហាញអារម្មណ៍រំភើបចិត្តចំពោះដំណឹងដែល lisa អាចនឹងចេញបទចម្រៀងឆាប់ៗបន្ទាប់ពីខកខានចេញបទថ្មីអស់រយៈពេលជាច្រើនឆ្នាំ។ ការពិតដែលសហការជាមួយតារាចម្រៀងអេស្ប៉ាញទៀតសោតអ្នកគាំទ្រក៏រំភើបចិត្តដូចគ្នាដោយបន់ឱ្យពាក្យចចាមអារ៉ាមនេះក្លាយជាការពិតឆាប់ៗ។

Lisa សមាជិក BLACKPINK បានចេញអាល់ប៊ុលទោលលើកដំបូងកាលពីឆ្នាំ២០២១មានចំណងជើង Lalisa ក្នុងនោះមានបទចម្រៀងពីរបទគឺ Lalisa និង Money ៕