យោងតាមប្រភពប្រព័ន្ធផ្សព្វផ្សាយរដ្ឋបានរាយការណ៍ថា ប្រធានាធិបតីអ៊ីរ៉ង់ លោក Ebrahim Raisi ,រដ្ឋមន្ត្រីការបរទេសរបស់ប្រទេស ,និងមន្ត្រីជាច្រើននាក់ទៀត ត្រូវបានគេរកឃើញថាបានបាត់ប.ង់ជី.វិត កាលពីថ្ងៃចន្ទទី២០ ខែឧសភានេះ ប៉ុន្មានម៉ោងបន្ទាប់ពីឧទ្ធម្ភាគចក្ររបស់ពួកគេបានធ្លា.ក់នៅតំបន់ភ្នំដែលមានអ័ព្ទ នៃភាគពាយ័ព្យរបស់ប្រទេស។

បំណែកនៃឧទ្ធម្ភាគចក្រ ដែលបានធ្លាក់កាលពីថ្ងៃអាទិត្យទី១៩ ខែឧសភា ដែលដឹកលោក Raisi ,រដ្ឋមន្ត្រីការបរទេស Hossein Amirabdollahian ,អ្នកដំណើរ និងនាវិក ៦នាក់ផ្សេងទៀត ត្រូវបានរកឃើញនៅព្រឹកថ្ងៃច័ន្ទ បន្ទាប់ពីការស្វែងរកពេញមួយយប់ ក្នុងស្ថានភាពព្យុះភ្លៀង។ ទោះជាយ៉ាងណា លោកប្រធានាធិបតី រដ្ឋមន្ត្រីការបរទេសនានា និងអ្នករួមដំណើរទាំងអស់នៅក្នុងឧទ្ធម្ភាគចក្រត្រូវបានបាត់បង់ជីវិតនៅក្នុងការធ្លាក់នេះផងដែរ។

ប្រព័ន្ធផ្សព្វផ្សាយរដ្ឋបានរាយការណ៍ថា រូបភាពពីគេហទំព័របង្ហាញពីឧទ្ធម្ភាគចក្រ Bell 212 ផលិតដោយសហរដ្ឋអាមេរិក បានធ្លាក់ចូលទៅក្នុងកំពូលភ្នំ។ បើតាមការសន្និដ្ឋានក្រៅផ្លូវការ អ្នកទាំងអស់គ្នានោះបានស្លាប់ គេថាអាចបណ្តាលមកពីឧទ្ធម្ភាគចក្របានបើកកាត់តំបន់ភ្នំនោះ ស្របពេលដែលអាកាសធាតុត្រជាក់ខ្លាំង។ ទោះជាយ៉ាងណា មិនទាន់មានសេចក្តីរាយការណ៍ណាមួយបញ្ជាក់អំពីមូលហេតុនៃការធ្លាក់ឲ្យបានពិតប្រាកដនៅឡើយនោះទេ។

ការធ្លាក់ឧទ្ធម្ភាគចក្រ បន្ទាប់ពីលោក Raisi បានត្រឡប់ពីដំណើរទស្សនកិច្ចផ្លូវការទៅកាន់ព្រំដែនជាមួយប្រទេស Azerbaijan នៅភាគពាយព្យនៃប្រទេសអ៊ីរ៉ង់។ Raisi ដែលមានអាយុ ៦៣ ឆ្នាំត្រូវបានជាប់ឆ្នោតជាប្រធានាធិបតីក្នុងឆ្នាំ ២០២១ ហើយចាប់តាំងពីការឡើងកាន់តំណែងបានកសាងនូវស្នាដៃជាច្រើន ដូចជារឹតបន្តឹងច្បាប់សីលធម៌ ត្រួតពិនិត្យការបង្រ្កាបយ៉ាងបង្ហូរឈាមលើការតវ៉ាប្រឆាំងរដ្ឋាភិបាល និងបានជំរុញយ៉ាងខ្លាំងនៅក្នុងកិច្ចចរចានុយក្លេអ៊ែរជាមួយមហាអំណាចពិភពលោក។

យ៉ាងណាមិញ ការធ្លាក់យន្តហោះនេះកើតឡើងចំពេលដែលមានការខ្វែងគំនិតគ្នាកាន់តែខ្លាំងឡើងនៅក្នុងប្រទេសអ៊ីរ៉ង់ជុំវិញវិបត្តិនយោបាយ សង្គម និងសេដ្ឋកិច្ច។ មេដឹកនាំស្មៀនរបស់អ៊ីរ៉ង់ប្រឈមមុខនឹងសម្ពាធអន្តរជាតិជុំវិញកម្មវិធីនុយក្លេអ៊ែរដែលមានជម្លោះរបស់ទីក្រុងតេអេរ៉ង់ និងការធ្វើឱ្យទំនាក់ទំនងយោធាកាន់តែស៊ីជម្រៅជាមួយរុស្ស៊ីក្នុងអំឡុងសង្គ្រាមនៅអ៊ុយក្រែន។

ចាប់តាំងពីក្រុមហាម៉ាស់ដែលជាសម្ព័ន្ធមិត្តរបស់អ៊ីរ៉ង់បានវាយប្រហារអ៊ីស្រាអែលកាលពីថ្ងៃទី ៧ ខែតុលា បង្កឱ្យមានការវាយលុករបស់អ៊ីស្រាអែលលើតំបន់ហ្គាហ្សា ការប៉ះទង្គិចគ្នាដែលពាក់ព័ន្ធនឹងក្រុមសម្ព័ន្ធមិត្តអ៊ីរ៉ង់បានផ្ទុះឡើងពាសពេញមជ្ឈិមបូព៌ា៕

កាលពីថ្ងៃទី១៩ ខែឧសភា មានបុរសជនជាតិចិនម្នាក់បានបាត់.បង់.ជីវិត បន្ទាប់ពីធ្វើលំហាត់ប្រាណមួយនេះ ដែលបង្កឱ្យមានភាពចម្រូងចម្រាស់ពេញបណ្តាញសង្គម។
លំហាត់ប្រាណ «ព្យួរចង្កា» គឺជាលំហាត់ប្រាណដ៏ពេញនិយមមួយនៅក្នុងប្រទេសចិនដែលគេជឿថាអាចបំបាត់ការឈឺក និងការឈឺឆ្អឹងខ្នង។ យោងតាមគេហទំព័រ Oddity Central បុរសអាយុ ៥៧ ឆ្នាំម្នាក់បានស្លា.ប់ភ្លាមៗ ខណៈពេលដែលកំពុងធ្វើលំហាត់ប្រាណ “ព្យួរចង្កា” នៅលើយោលនៅឯកន្លែងហាត់ប្រាណក្នុងទីក្រុង Chongqing ប្រទេសចិន។ ទោះជាយ៉ាងណាប៉ូលិសបានកំណត់ពីមូលហេតុនៃការស្លាប់របស់បុរសនោះថាគឺជាការចងក។

យោងតាមសាក្សីដែលនៅក្នុងហេតុការណ៍នោះបាននិយាយថា ជាទូទៅលំហាត់ប្រាណនេះពាក់ព័ន្ធនឹងការព្យួរចង្ការនៅលើឧបករណ៍ពិសេសរាងអក្សរ U ដែលធ្វើពីស្បែក បន្ទាប់ពីដាក់ចង្កាឡើង អ្នកហាត់អាចយោលដងខ្លួនក៏បាន ឬរក្សាវាឱ្យនៅស្ងៀមក៏បាន។ ប៉ុន្តែផ្ទុយទៅវិញបុរសនោះស្រាប់តែហាត់ខុសបច្ចេកទេសដោយគាត់បានព្យួរកខ្លួនឯង និងយោលខ្លួនយ៉ាងខ្លាំងទើបធ្វើឱ្យមានរឿងនេះកើតឡើង។ ទោះជាយ៉ាងណាក៏ដោយវិធីសាស្ត្របណ្តុះបណ្តាលនេះនៅតែមានគ្រោះថ្នាក់ខ្លាំងដល់ជីវិត។

អស់រយៈពេលជាច្រើនឆ្នាំសមយុទ្ធ “ព្យួរចង្កា” ដ៏ចម្លែកបានបង្កឱ្យមានភាពចម្រូងចម្រាសពេញប្រទេសចិន។ លំហាត់នេះត្រូវបានណែនាំនៅឆ្នាំ ២០១៧ ដោយលោក Sun Rongchun ដែលបានអះអាងថាវិធីសាស្ត្រនេះមានប្រសិទ្ធភាពក្នុងការបំបាត់ការឈឺក និងខ្នង។ បន្ទាប់ពីនោះ លំហាត់ប្រាណនេះក៏បានក្លាយជាការពេញនិយមយ៉ាងឆាប់រហ័សនៅក្នុងសួនឧទ្យាន និងកន្លែងហាត់ប្រាណខាងក្រៅទូទាំងប្រទេសចិន។ ទោះបីជាការព្យួរចង្កានេះអាចធ្វើឱ្យមនុស្សបាត់ឈឺក ឬឈឺឆ្អឹងខ្នងពិតមែន ក៏ក្រុមគ្រូពេទ្យបានព្រមានអំពីគ្រោះថ្នាក់នៃការធ្វើលំហាត់ប្រាណ ដោយហាមព្យួរញឹកញាប់ពេក យូរៗម្តងបានហើយ។

គួរបញ្ជាក់ដែរថា សោកនាដកម្មថ្មីៗនេះបានបង្ហាញឱ្យឃើញថានៅពេលដែលមនុស្សមិនបានអនុវត្តត្រឹមត្រូវតាមការណែនាំរបស់អ្នកជំនាញនោះហានិភ័យនឹងកើតឡើង។ លោក Zhao Qiang នាយករងនៃមន្ទីរពេទ្យសម្ព័ន្ធក្នុងសាកលវិទ្យាល័យឱសថបុរាណ Tianjin ប្រទេសចិនបានព្រមានថា “កុំធ្វើលំហាត់ប្រាណដោយប្រើឧបករណ៍ចម្លែកទោះបីជាលំហាត់នេះផ្អែកលើគោលការណ៍នៃការព្យាបាលក៏ដោយ។ វាអាចបំផ្លាញសរសៃប្រសាទ ខួរឆ្អឹងខ្នង ឬអាចបណ្តាលឱ្យកើតជំងឺដាច់សរសៃឈាមខួរក្បាល។ ដូច្នេះកុំព្យួរក ឬចង្កាពេលហាត់ប្រាណ វានឹងមិនមានអត្ថប្រយោជន៍ណាមួយសម្រាប់សុខភាពរបស់អ្នកឡើយ»៕

អង្គការពលកម្មអន្តរជាតិ (ILO) ដែលជាភ្នាក់ងារមួយស្ថិតនៅក្រោមអង្គការសហប្រជាជាតិ បានបង្ហាញរបាយការណ៍ចុងក្រោយថា បញ្ហាការធ្វើការនៅក្រោមកំដៅថ្ងៃក្តៅខ្លាំង និងការបំពុលបរិយាកាសនៅតាមប្រទេសនានា បានធ្វើឱ្យប៉ះពាល់យ៉ាងខ្លាំងដល់សុខភាព និងសុវត្ថិភាពរបស់កម្មករនៅជុំវិញពិភពលោក ។

របាយការណ៍ «Health Policy Watch» បញ្ជាក់ថា មានកម្មកររហូតដល់ជាង២២លាននាក់ ដែលបានប្រឈមនឹងការកើតជំងឺផ្សេងៗដោយសារអាកាសធាតុក្តៅខ្លាំងពេក និងមានកម្មករស្លាប់ជិត២ម៉ឺននាក់ក្នុង១ឆ្នាំៗ ដោយសារតែសីតុណ្ហភាពកើនឡើងខ្ពស់ ហើយចំនួននេះបានកើនឡើងជាបន្តបន្ទាប់ផងដែរ ។

ផលប៉ះពាល់បណ្តាលមកពីការបម្រែបម្រួលអាកាសធាតុនៅលើពិភពលោក បានបណ្តាលឱ្យកម្មករទាំងអស់ប្រឈមនឹងបញ្ហាសុខភាព ដូចជា ៖ កើតជំងឺមហារីក, ជំងឺពាក់ព័ន្ធនឹងប្រព័ន្ធផ្លូវដង្ហើម, មានបញ្ហាតម្រងនោម និងជំងឺដាច់សរសៃឈាមខួរក្បាល ។

កម្មករធ្វើការនៅក្រោមកំដៅថ្ងៃក្នុងផ្នែកផ្សេងៗ ដូចជា ៖ ផ្នែកកសិកម្ម, សំណង់, ការនេសាទ និងការដឹកជញ្ជូន ពួកគេបានប្រឈមនឹងជំងឺដាច់សរសៃឈាមខួរក្បាល និងស្លាប់ភ្លាមៗ ។ រីឯអ្នកធ្វើការក្នុងអគារគ្មានខ្យល់ចេញ-ចូលគ្រប់គ្រាន់ ដូចជា ៖ រោងចក្រ, ក្រុមហ៊ុន និងឃ្លាំងទំនិញផ្សេងៗ ក៏ប្រឈមនឹងផលប៉ះពាល់សុខភាពធ្ងន់ធ្ងរផងដែរ ។

Chihoko Asada Miyakawa ជានាយកគ្រប់គ្រងអាស៊ីប៉ាស៊ីហ្វិករបស់អង្គការពលកម្មអន្តរជាតិ (ILO) និយាយថា អាកាសធាតុក្តៅខ្លាំងបានប៉ះពាល់ដល់សុខភាព សុវត្ថិភាព និងការរស់នៅរបស់កម្មករនៅតំបន់អាស៊ីប៉ាស៊ីហ្វិក ។ រីឯអ្នកប្រកបរបរដឹកជញ្ជូនទំនិញ និងអាជីវករលក់ដូរទំនិញនៅតាមផ្លូវ ពួកគេបានស្រូបយកជាតិពុលពីបរិយាកាសជារៀងរាល់ថ្ងៃ ហើយរដ្ឋាភិបាលគួរតែអប់រំឱ្យពួកគេយល់ដឹងពីការបំពុលបរិយាកាស និងមានឧបករណ៍ការពារខ្លួនដើម្បីកាត់បន្ថយផលប៉ះពាល់ ។

បើទោះជាកន្លងមក ប្រទេសមួយចំនួន ដូចជា ៖ ចិន, ឥណ្ឌា, សិង្ហបុរី, វៀតណាម និងថៃ បានកំណត់វិធានការគ្រប់គ្រងកំដៅនៅកន្លែងធ្វើការក្តី ប៉ុន្តែការការពារផលប៉ះពាល់ផ្សេងៗដោយសារការបម្រែបម្រួលអាកាសធាតុ ពុំទាន់ល្អនៅឡើយទេ ។ ហេតុនេះ ក្នុងកិច្ចប្រជុំដែលគ្រោងរៀបចំឡើងនៅឆ្នាំ២០២៥ ខាងមុខ អង្គការពលកម្មអន្តរជាតិបានស្នើឱ្យរដ្ឋាភិបាល, និយោជក និងអ្នកតំណាងកម្មករនៅប្រទេសនានាមកចូលរួមប្រជុំ ដើម្បីស្វែងរកមធ្យោបាយដោះស្រាយបញ្ហាគ្រោះថ្នាក់បណ្តាលមកពីអាកាសធាតុ ៕

បរទេស៖ ហេតុតែជាបុគ្គលល្បីធ្វើអ្វីក៏សម គ្រាន់តែកន្សែងពណ៌សធម្មតាសោះ ក៏ត្រូវបានគេដាក់ដេញថ្លៃក្នុងតម្លៃជិត ១ លានដុល្លារដែរ។
កន្សែងក្រដាស់ពណ៌សធម្មតាមួយ ដែលបង្ហាញពីកិច្ចព្រមព្រៀងរវាងកីឡាករបាល់ទាត់លំដាប់ពិភពលោក Lionel Messi កាលពីលោកអាយុ ១៣ ឆ្នាំ និងក្លឹប FC Barcelona ត្រូវបានលក់នៅក្នុងការដេញថ្លៃតាមអ៊ីនធឺណិតដោយក្រុមហ៊ុន Bonhams ដែលមានមូលដ្ឋាននៅចក្រភពអង់គ្លេសក្នុងតម្លៃ ៧៦២,៤០០ ផោន (ប្រមាណ ៩៦៨,៦០០ ដុល្លារអាមេរិក)។

យោងតាមការចុះផ្សាយរបស់សារព័ត៌មាន Reuters កន្សែងដ៏មានតម្លៃនេះត្រូវបានចុះហត្ថលេខាក្នុងខែធ្នូ ឆ្នាំ២០០០ ដោយអតីតនាយកកីឡារបស់ Barca លោក Carles Rexach និងទីប្រឹក្សាផ្ទេរកីឡាករ Josep Minguella ក្នុងកិច្ចចរចារជាមួយភ្នាក់ងាររបស់ Messi ដើម្បីយកលោកមកចូលរួមលេងក្នុងក្លឹបបាល់ទាត់នេះ។ នៅពេលនោះ Messi មានអាយុត្រឹមតែ ១៣ ឆ្នាំប៉ុណ្ណោះ ទោះជាយ៉ាងណាដើម្បីឱ្យកីឡាកររូបនេះមានអារម្មណ៍ថាសុវត្ថិភាពក្នុងការរួមចំណែករបស់គាត់ និងឈានដល់កិច្ចព្រមព្រៀងយ៉ាងឆាប់រហ័ស កិច្ចសន្យានេះក៏ត្រូវបានសរសេរនៅលើកន្សែងក្រដាស់ ហើយចុះហត្ថលេខាដោយភាគីពាក់ព័ន្ធប៉ុណ្ណោះ។

លោក Ian Ehling ប្រធានផ្នែកសៀវភៅ និងសាត្រាស្លឹករឹតនៅ Bonhams New York បាននិយាយថា “វាមើលទៅដូចជាកន្សែងក្រដាសពណ៌សធម្មតាមែន ប៉ុន្តែវាជាកន្សែងដ៏ល្បីល្បាញបំផុតនៅពេលចាប់ផ្តើមអាជីពរបស់ Lionel Messi” ។ កន្សែងនេះគឺជាការចាប់ផ្តើមអាជីពដំបូងរបស់ Messi និងបានផ្លាស់ប្តូរជិវិតរបស់ក្លឹប Barcelona ដែលនាំមកនូវគ្រាដ៏រុងរឿងបំផុតរបស់កីឡាបាល់ទាត់ដល់អ្នកគាំទ្ររាប់ពាន់លាននាក់ជុំវិញពិភពលោក »។

ក្នុងរយៈពេល ១៧ ឆ្នាំ Messi បានក្លាយជាកីឡាករដ៏អស្ចារ្យបំផុតរបស់ Barcelona ដោយបានឈ្នះពានរង្វាន់ជាង ៣០ និងចាកចេញពីក្លឹប Catalan ជាអ្នកស៊ុតបញ្ចូលទីនាំមុខគេគ្រប់ពេលជាមួយនឹង ៦៧២ គ្រាប់។ គាត់ក៏បានឈ្នះពានរង្វាន់ Ballon d’Or ចំនួនប្រាំបីសម្រាប់កីឡាករល្អបំផុតរបស់ពិភពលោក និងបានដឹកនាំអាហ្សង់ទីនឱ្យឈ្នះពាន World Cup នៅឆ្នាំ ២០២២ ផងដែរ។ ទោះជាយ៉ាងណាបច្ចុប្បន្ន Messi ឥឡូវនេះគឺលេងឱ្យក្លឹបអាមេរិក Inter Miami ក្នុង Major League Soccer៕

បើយោងតាមស្ថិតិរបស់ Seasia ផ្អែកលើការព្យាករណ៍កំណើន GDP របស់អាស៊ីអាគ្នេយ៍ឆ្នាំ ២០២៤ ដោយ IMF សរុបទិន្នន័យកាលពីឆ្នាំមុននិងការធ្វើបច្ចុប្បន្នភាពខែមករា ឆ្នាំ ២០២៤នេះបានបង្ហាញឲ្យឃើញថា កម្ពុជាបាននាំមុខការព្យាករណ៍កំណើននៅក្នុងតំបន់អាស៊ីអាគ្នេយ៍ក្នុងឆ្នាំ ២០២៤ ដោយកម្ពុជាឈរលើលេខរៀងទី៣ ជាមួយនឹងកំណើនសេដ្ឋកិច្ច ៦.១%។

ព្រះរាជាណាចក្រកម្ពុជាឈរនៅលេខរៀងពី៣ ក្នុងចំណោម២៥ប្រទេសនៅអាស៊ីប្រចាំឆ្នាំ២០២៤ ជាប្រទេសជាមានសេដ្ឋកិច្ចលូតលាស់លឿនបំផុត។ ខណៈម៉ាកាវជាប់លេខ១នៅអាស៊ី ជាមួយនឹងកំណើន GDP ២៤.២%។ ខណៈលេខ២បានទៅលើប្រទេសឥណ្ឌា កំណើន GDP ៦.៣%។ លេខ៣ គឺកម្ពុជា កំណើន GDP ៦.១%។ បន្ទាប់មកគឺបង់ក្លាដេស ៦%, ៥.ហ្វីលីពីន ៥.៩%, ៦.វៀតណាម ៥.៨%, ៧.អូបេគីស្ថាន ៥.៥%, ៨.អាមេនៀ ៥%, ៩.នេប៉ាល់ ៥%, ១០.ឥណ្ឌូណេស៊ី៥%។ ខណៈម៉ាឡេស៊ីស្ថិតនៅលេខរៀងទី១៤ , ចិននៅលេខរៀងទី១៧ , ឡាវលេខរៀងទី១៨, ប្រុយណេ លេខរៀងទី១៩ និងថៃ នៅលេខរៀងទី២០។

ទោះជាយ៉ាងណា ចំណាត់ថ្នាក់ទាំងនេះ គឺជាការសបញ្ជាក់ពីការដឹកនាំដ៏មានប្រសិទ្ធភាពរបស់រាជរដ្ឋាភិបាលនៃប្រទេសនីមួយៗ ជាពិសេសគឺកម្ពុជាដែលកំពុងតែស្ថិតនៅលេខរៀងទីនៅអាស៊ីនេះ គឺប្រាកដណាស់ថាមកពីការដឹកនាំប្រទេសចំគោលដៅរបស់សម្តេចធិបតីហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជាបច្ចុប្បន្ននេះ ក្នុងកិច្ចខិតខំប្រឹងប្រែងជំរុញឱ្យមានការស្តារសេដ្ឋកិច្ចឡើងវិញ ក្រោយការរីករាលដាលនៃជំងឺកូវីដ-១៩ និងវិបត្តិសង្គ្រាមអ៊ុយក្រែន-រុស្ស៊ី។

គួរបញ្ជាក់ថា សេដ្ឋកិច្ចដ៏រឹងមាំរបស់កម្ពុជាត្រូវបានជំរុញដោយវិស័យចម្រុះ រួមមាន សម្លៀកបំពាក់ ស្បែកជើង និងការនាំចេញទំនិញធ្វើដំណើរ ទេសចរណ៍ កសិកម្ម និងអចលនទ្រព្យ និងសំណង់ផងដែរ៕

ប្រទេសវៀតណាម ៖ សារព័ត៌មានបរទេសបានរាយការណ៍កាលពីថ្ងៃទី១៨ ខែឧសភា ឆ្នាំ២០២៤ ថា Global Property Guide គឺជាក្រុមហ៊ុនស្រាវជ្រាវទីផ្សារនៅតំបន់អឺរ៉ុបបានផ្តល់ទិន្នន័យថា ទីក្រុងហាណូយ និងទីក្រុងហូជីមិញ ប្រទេសវៀតណាម មានតម្លៃជួលលំនៅឋានថ្លៃបំផុត បើធៀបនឹងប្រទេសនានាក្នុងតំបន់អាស៊ាន ។

ចំណែកសារព័ត៌មានស៊ីនហួរបានរាយការណ៍ពីទីក្រុងហាណូយ ប្រទេសវៀតណាម នៅថ្ងៃដដែលថា តម្លៃជួលអាផាតមិន ដែលមានបន្ទប់សម្រាក១បន្ទប់ ស្ថិតក្នុងទីតាំងល្អបំផុតនៅទីក្រុងហាណូយ និងទីក្រុងហូជីមិញ គឺជាមធ្យមស្មើរហូតដល់៦៨៨ដុល្លារអាមេរិកក្នុង១ខែ ។

ចំណែកការទិញអាផាតមិន មានបន្ទប់សម្រាក១បន្ទប់ ស្ថិតក្នុងទីតាំងល្អបំផុតក្នុងទីក្រុងទាំងពីរខាងលើនេះ គឺមានតម្លៃស្មើនឹង២១៤.៥០០ដុល្លារអាមេរិក (ស្មើជាង២១ម៉ឺនដុល្លារអាមេរិក) ។ ដូច្នេះ វាមានតម្លៃលើសអាផាតមិន នៅទីក្រុងហ្សារកាតា ប្រទេសឥណ្ឌូណេស៊ីទ្វេដងឯណោះ ខណៈ អាផាតមិន នៅទីក្រុងហ្សារកាតា ស្មើត្រឹមតែ១១២.៥០០ដុល្លារអាមេរិក ហើយវាមានតម្លៃខ្ពស់ជាងអាផាតមិន នៅទីក្រុងបុមបៃ ប្រទេសឥណ្ឌា និងអាផាតមិន ទីក្រុងម៉ានីល ប្រទេសហ្វីលីពីន ។

លោក ង្វៀនហួយអាន់ ជាអ្នកវិភាគរបស់ Coldwell Banker Richard Ellis គឺជាក្រុមហ៊ុនមួយស្ថិតក្នុងចំណោមក្រុមហ៊ុនផ្តល់ការប្រឹក្សាយោបល់ផ្នែកអចលនទ្រព្យ បាននិយាយថា បច្ចុប្បន្ន ទីផ្សារអាផាតមិន របស់ទីក្រុងហូជីមិញ ប្រទេសវៀតណាម ស្ថិតក្នុងអំឡុងពេលមានស្ថិរភាព ក្រោយពីតម្លៃអាផាតមិន កើនឡើងខ្ពស់ក្នុងរយៈពេលប៉ុន្មានឆ្នាំចុងក្រោយនេះ ។

ចំណែកលោក ង្វៀនដឺឌៀប អនុប្រធានក្រុមហ៊ុន Hanoi Real Estate Club និយាយថា ៖ «តម្លៃអាផាតមិន ដែលមានស្ទាយបែបប្រទេសលោកខាងលិច បានកើនឡើងយ៉ាងឆាប់រហ័សនៅឆ្នាំ២០២៤ ជាពិសេសបំផុត អាផាតមិន ស្ថិតក្នុងគម្រោងអាផាតមិន ប្រណីតទាន់សម័យ គឺមានតម្លៃខ្ពស់ខ្លាំង» ។

មន្ត្រីជំនាញរូបនេះបញ្ជាក់ថា ការខ្វះខាតការផ្គត់ផ្គង់បានធ្វើឱ្យតម្លៃអាផាតមិន កើនឡើងជាបន្តបន្ទាប់ ហើយដើម្បីគ្រប់គ្រងតម្លៃអាផាតមិន នៅប្រទេសវៀតណាម គឺយើងពុំអាចបង្ខំឱ្យវិនិយោគិនបញ្ចុះតម្លៃបានទេ ។ ដូច្នេះ វិធីតែមួយគត់ គឺរដ្ឋាភិបាលត្រូវតែលុបបំបាត់ឧបសគ្គ និងបង្កើនការវិនិយោគក្នុងគម្រោងថ្មីៗដើម្បីបង្កើនការផ្គត់ផ្គង់ បន្ទាប់មក តម្លៃអាផាតមិន នឹងធ្លាក់ចុះវិញ ៕