ប្រទេសអាហ្វ្រិកខាងត្បូង ៖ សារព័ត៌មាន KBN នឹងណែនាំលោកអ្នកឱ្យស្គាល់បុរសម្នាក់ ដែលមានសមត្ថភាពពិសេសអាចទំនាក់ទំនងជាមួយសត្វតោគ្រប់ក្បាលនៅក្នុងព្រៃ និងធ្វើឱ្យពិភពលោកភ្ញាក់ផ្អើលយ៉ាងខ្លាំង ។ បុរសរូបនេះឈ្មោះ Kevin Richardson អាចនិយាយជាមួយតោព្រៃ រហូតដល់គេដាក់ឈ្មោះថា Lion Whisperer ព្រោះលោកមានសមត្ថភាពពិសេសអាចទាក់ទងជាមួយសត្វ និងគ្មានអ្នកណាម្នាក់ធ្វើដូច ។

លោក Kevin Richardson ជាមនុស្សតែម្នាក់គត់នៅលើពិភពលោក ដែលអាចទំនាក់ទំនង និងនិយាយជាមួយសត្វតោគ្រប់ក្បាលនៅប្រទេសអាហ្វ្រិកខាងត្បូង ។ រីឯសត្វតោទាំងឡាយដែលលោកបានទំនាក់ទំនងជាមួយនោះ គឺពួកវាពុំដែលធ្វើបាប និងគិតចង់សម្លាប់លោកឡើយ ។

លោក Kevin Richardson កើតនៅថ្ងៃទី៨ ខែតុលា ឆ្នាំ១៩៧៤ នៅទីក្រុង Johannesburg ប្រទេសអាហ្វ្រិកខាងត្បូង ។ ជាធម្មតា លោកបានដើរចូលក្នុងព្រៃទៅរកសត្វតោកាចសាហាវ ហើយតោទាំងនេះបានមកលេងជាមួយលោក ដូចគ្នានឹងសត្វឆ្មាយក្ស១ក្បាលដែរ គឺពួកវាមិនធ្លាប់ខាំត្របាក់ ឬធ្វើបាបម្តងណាទេ ។

ពេលខ្លះ លោកបាននៅជាមួយតោពេញមួយថ្ងៃ ដោយលោកធ្វើដំណើរជាមួយតោ និងលេងសើចជាមួយវាដូចជាមិត្តភក្តិជិតស្និទ្ធ ។ រីឯអ្នកថតរូបលោកជាមួយតោ គឺនៅសម្ងំក្នុងរថយន្ត ឬក្នុងទ្រុងដែលត្រៀមទុកតែប៉ុណ្ណោះ ពីព្រោះតោគួរឱ្យស្រឡាញ់ទាំងនេះ វានឹងធ្វើបាបអ្នកថតរូបភ្លាមៗ ប្រសិនបើមានឱកាស ។

លោក Kevin Richardson បានផ្តល់សម្ភាសន៍ជាមួយប្រព័ន្ធផ្សព្វផ្សាយថា សត្វទាំងនេះចេះគិត និងដឹងពីអារម្មណ៍របស់លោកចំពោះពួកវា ។ លោកបានព្យាយាមធ្វើគ្រប់វិធីសាស្ត្រដើម្បីបង្ហាញអារម្មណ៍ទៅកាន់តោ, ទទួលបានអារម្មណ៍ពីតោ និងធ្វើឱ្យពួកវាទទួលស្គាល់លោក ។ ពេលវានៅជាមួយលោក វាបានធ្វើមុខមាត់គួរឱ្យស្រឡាញ់ និងព្យាយាមឱបលោកទៀតផង ហើយទង្វើរបស់លោកប្រៀបដូចជា លោកជាឪពុករបស់វា ហើយតោខ្លះទៀតអាចគិតថា លោកជាមិត្តភក្តិ ។

ចំណែកទង្វើដែលលោកធ្វើជាមួយមិត្តភក្តិជើង៤ គួរឱ្យស្រឡាញ់ទាំងនេះ លោកប្រាប់ថា យើងគួរតែឱបថើប ឬបង្ហាញក្តីស្រឡាញ់ទៅកាន់ពួកវា ដូចគ្នានឹងយើងមានមិត្តភក្តិស្មោះត្រង់ម្នាក់ ។ យើងពុំគួរដើរមុខវាទេ គួរតែដើរនៅក្រោយ ឬដើរទន្ទឹមវា ដើម្បីឱ្យវាទុកចិត្តយើង ហើយលោកបានធ្វើបែបនេះជាមួយតោគ្រប់ក្បាល ។

មនុស្សមួយចំនួនយល់ឃើញថា រឿងបែបនេះមិនអាចទៅរួចទេ ប៉ុន្តែនេះជាអ្វីដែលលោក Kevin Richardson បានបង្ហាញឱ្យមនុស្សនៅលើពិភពលោកឃើញថា មនុស្សក៏អាចទំនាក់ទំនងជាមួយសត្វកាចសាហាវបានដែរ ៕

នៅក្នុងយុគសម័យថ្មីនៃបច្ចេកវិទ្យា គ្រប់ទីកន្លែងសុទ្ធតែត្រូវបានបំពាក់ដោយបណ្តាញ Wifi យ៉ាងងាយស្រួល ប៉ុន្តែអ្នកមិនអាចមានពាក្យសម្ងាត់ដើម្បីប្រើប្រាស់វាបាននោះទេ។ ប្រសិនបើអ្នកនៅតាមផ្លូវ ឬនៅកន្លែងណាមួយ ហើយត្រូវការភ្ជាប់អ៊ីនធឺណិតដើម្បីធ្វើការ ឬរុករកគេហទំព័រ ប៉ុន្តែមិនមានទិន្នន័យចល័ត អ្នកអាចចូលប្រើ Wifi ដោយគ្មានពាក្យសម្ងាត់ដូចខាងក្រោម។ ការចាប់វ៉ាយហ្វាយឥតគិតថ្លៃដោយមិនចាំបាច់ប្រើពាក្យសម្ងាត់នឹងជួយអ្នកឱ្យកាន់តែសកម្មក្នុងស្ថានភាពដែលអ្នកត្រូវការប្រើវា បូករួមទាំងការកាត់បន្ថយចំណាយលើការប្រើប្រាស់ 3G/4G/5G ផងដែរ។

ហេតុនេះដើម្បីភ្ជាប់វ៉ាយហ្វាយឥតគិតថ្លៃដោយមិនចាំបាច់ប្រើពាក្យសម្ងាត់ ជាដំបូងអ្នកគួរដោនឡូនកម្មវិធី “WiFi Master” ដែលវាគឺជាកម្មវិធីចែករំលែកពាក្យសម្ងាត់ Wifi ត្រូវបានប្រើប្រាស់ដោយមនុស្សជាច្រើន អនុញ្ញាតឱ្យអ្នកចូលប្រើបណ្តាញ Wifi ដោយមិនគិតថ្លៃនៅជុំវិញភោជនីយដ្ឋាន សណ្ឋាគារ ហាងកាហ្វេ…ជាដើម។ ទោះជាយ៉ាងណាកម្មវិធី WiFi Master អាចប្រើបានតែជាមួយបណ្តាញ Wifi ដែលមានពាក្យសម្ងាត់សាមញ្ញប៉ុណ្ណោះ។ ដូច្នេះប្រសិនបើអ្នកប្រើ iPhone ឬ Android អ្នកអាចអនុវត្តតាមជំហានទាំងនេះ៖

-ជំហានទី 1: បន្ទាប់ពីទាញយកកម្មវិធីដោយជោគជ័យ សូមបើក WiFi Master ហើយជ្រើសរើស Connect ឥឡូវនេះ នោះកម្មវិធីនឹងបង្ហាញការជូនដំណឹងដែលណែនាំអ្នកឱ្យជ្រើសរើសបណ្តាយ Wifi ណាមួយដែលអ្នកពេញចិត្ត។
-ជំហានទី 2៖ ដើម្បីបើកទិន្នន័យចល័តសម្រាប់កម្មវិធីសកម្ម សូមជ្រើសរើស “បើកចរាចរណ៍” នោះ WiFi Master នឹងស្វែងរកប្រភពបណ្តាញនៅក្បែរនោះដោយស្វ័យប្រវត្តិ ជ្រើសរើសរូបតំណាងគន្លឹះនៅចំណុច Wifi ដែលអ្នកចង់ភ្ជាប់។
-ជំហានទី 3៖ ចុច Connect ហើយរង់ចាំមួយភ្លែតដើម្បីឱ្យឧបករណ៍ភ្ជាប់ទៅបណ្តាញ Wifi ដែលអ្នកបានជ្រើសរើសជាការស្រេច។

គួរបញ្ជាក់ដែរថា ទោះបីជា wifi ជួយអ្នកបានច្រើនក៏ដោយ ពេលចូលប្រើ wifi សាធារណៈដោយឥតគិតថ្លៃ អ្នកគួរតែដឹងថាកម្រិតមិនមានសុវត្ថិភាពគឺខ្ពស់។ វ៉ាយហ្វាយឥតគិតថ្លៃជាច្រើនអាចបង្កើតលក្ខខណ្ឌសម្រាប់ពួក Hacker ក្នុងការជ្រៀតចូល និងលួចព័ត៌មាននៅលើឧបករណ៍របស់អ្នក។ លើសពីនេះ ដំណើរការចូលអាចនឹងត្រូវបានរំខានដោយសារ wifi ដើរយឺតព្រោះមានគេប្រើប្រាស់ច្រើន។ ដូច្នេះហើយ អ្នកត្រូវពិចារណាឱ្យបានហ្មត់ចត់បំផុតនៅពេលជ្រើសរើសជម្រើសនេះ៕

បរទេស៖ យោងតាមក្រុមហ៊ុនដេញថ្លៃ Webb’s Auction House កាលពីថ្មីៗនេះបានឱ្យដឹងថា រោមសត្វស្លាប Huia ដែលបានផុតពូជជាយូរមកហើយត្រូវបានរកឃើញជាលើកចុងក្រោយនៅដើមសតវត្សទី ២០ ទើបតែបានដាក់បង្ហាញជាផ្លូវការ និងលក់ដេញថ្លៃក្នុងតម្លៃកំណត់ត្រាខ្ពស់បំផុតមួយគឺ ២៨,៤០០ ដុល្លារអាមេរិក នៅឯការដេញថ្លៃកាលពីថ្ងៃទី ២០ ខែឧសភាកន្លងទៅ ដែលរោមសត្វនេះបានបំបែកឯតទគ្គកម្ម ក្លាយជារោមសត្វថ្លៃបំផុតនៅលើពិភពលោកដែលមិនធ្លាប់មាន។

លោក Leah Morris ប្រធានផ្នែកសិល្បៈតុបតែងនៅឯផ្ទះដេញថ្លៃដែលមានមូលដ្ឋាននៅទីក្រុង Auckland បាននិយាយថា “រោមសត្វ huia ដ៏កម្រនេះគឺជាគំរូដ៏ល្អមួយនៃប្រវត្តិសាស្រ្តធម្មជាតិរបស់ Aotearoa ហើយរំឭកយើងអំពីភាពផុយស្រួយនៃប្រព័ន្ធអេកូឡូស៊ី”។ វាជាកម្មសិទ្ធិរបស់គ្រួសារបក្សីអាកាស្យា បក្សី huia មានប្រជាប្រិយភាពខ្លាំងរហូតដល់ផុតពូជ។ សម្រាប់ប្រជាជន Maori នៃប្រទេសនូវែលហ្សេឡង់ រោមសត្វនៃប្រភេទនេះតំណាងឱ្យឋានៈខ្ពស់ ហើយត្រូវបានខ្ទាស់នៅលើក្បាលអំឡុងពេលរៀបចំពិធីធំៗកាលពីសម័យមុន។

យោងតាមសារមន្ទីរនូវែលសេឡង់ មានតែអ្នកដែលមានឋានៈខ្ពស់ជាងគេប៉ុណ្ណោះដែលត្រូវបានអនុញ្ញាតឱ្យពាក់រោមសត្វ huia នៅលើក្បាលរបស់ពួកគេ។ រោមរបស់បក្សីនេះច្រើនតែប្រើដើម្បីផ្លាស់ប្តូរទំនិញមានតម្លៃជាច្រើនផ្សេងទៀត ឬជាអំណោយដើម្បីបង្ហាញពីមិត្តភាព និងការគោរព។ ប្រជាជននូវែលសេឡង់នៅអឺរ៉ុបក៏ចាត់ទុកសត្វ huia ជានិមិត្តរូបនៃកិត្យានុភាពផងដែរ ដោយមនុស្សបានប្រើរោមរបស់បក្សីដើម្បីធ្វើជាគ្រឿងសំលៀកបំពាក់ ហើយសត្វស្លាប huia ក៏ត្រូវបានគេប្រើប្រាស់ជាគ្រឿងតុបតែងក្នុងផ្ទះអ្នកមានទៀតផង។

ទោះជាយ៉ាងណាក៏ដោយ ក្រុមហ៊ុនដេញថ្លៃបាននិយាយថា អ្នកដែលចង់ទិញរោមសត្វត្រូវដាក់ពាក្យសុំអាជ្ញាប័ណ្ណពីក្រសួងវប្បធម៌ និងបេតិកភណ្ឌនូវែលសេឡង់ជាមុនសិន មុនពេលចូលរួមក្នុងការដេញថ្លៃនៅដើមសប្តាហ៍នេះ។ ស្លាបនេះត្រូវបានលក់តែអ្នកដែលបានចុះបញ្ជីប៉ុណ្ណោះ ហើយមិនអាចយកចេញពីប្រទេសដោយគ្មានការអនុញ្ញាតពីនាយកដ្ឋានបានទេ៕

ប្រទេសឥណ្ឌា ៖ នៅថ្ងៃទី២២ ខែឧសភា ឆ្នាំ២០២៤ សារព័ត៌មានបរទសរាយការណ៍ថា យន្តហោះ១គ្រឿងរបស់ក្រុមហ៊ុនអាកាសចរណ៍ Emirates Airline បានហោះទៅបុកសត្វស្លាបកវែងមួយហ្វូង ក្នុងអំឡុងពេលយន្តហោះនេះត្រៀមចុះចតនៅអាកាសយានដ្ឋានអន្តរជាតិក្នុងទីក្រុងបុមបៃ ប្រទេសឥណ្ឌា ។ ហេតុការណ៍នេះបណ្តាលឱ្យសត្វស្លាបងា.ប់ យ៉ាងហោចណាស់ ចំនួន៣៦ក្បាល ។

សារព័ត៌មាន AFP បានរាយការណ៍ពីទីក្រុងបុមបៃ ប្រទេសឥណ្ឌាថា ហេតុការណ៍ខាងលើបានកើតឡើងកាលពីថ្ងៃទី២០ ខែឧសភា កន្លងមក គឺយន្តហោះរបស់ក្រុមហ៊ុនអាកាសចរណ៍ Emirates Airline ដែលជារបស់សហព័ន្ធអារ៉ាប់រួម បានហោះបុកសត្វស្លាបកងវែង១ហ្វូង មុនពេលយន្តហោះនេះចុះចតនៅអាកាសយានដ្ឋានអន្តរជាតិទីក្រុងបុមបៃ ។

មន្ត្រីក្រុមហ៊ុនអាកាសចរណ៍ Emirates Airline បញ្ជាក់ថា ជើងហោះហើរ EK508 បានធ្វើដំណើរចាកចេញពីទីក្រុងឌូបៃ មកកាន់ទីក្រុងបុមបៃ និងមានអ្នកដំណើរជាង៣០០នាក់ បានចុះចតដោយសុវត្ថិភាពនៅប្រទេសឥណ្ឌា ។ ប៉ុន្តែអាកាសយានិកចាំបាច់ត្រូវតែចតយន្តហោះនេះមួយកន្លែងសិន ក្រោយពីខូចខាតដោយសារបុកសត្វស្លាប ។

មន្ត្រីក្រុមហ៊ុនអាកាសចរណ៍បន្តថា ៖ «យន្តហោះបានចុះចតដោយសុវត្ថិភាព ខណៈអ្នកដំណើរ និងបុគ្គលិកបម្រើការក្នុងយន្តហោះទាំងអស់បានចុះពីយន្តហោះ ហើយ
គ្មានអ្នកណាម្នាក់រងរបួសទេ ។ ប៉ុន្តែវាគួរឱ្យសោកស្តាយខ្លាំងណាស់ ដែលបាត់បង់សត្វស្លាបកវែងអស់មួយចំនួន ហើយក្រុមហ៊ុនអាកាសចរណ៍បានសហការជាមួយអាជ្ញាធរឥណ្ឌាក្នុងរឿងនេះ» ។

សត្វស្លាបកវែងរាប់ម៉ឺនក្បាលបានហើរមកកាន់ទីក្រុងបុមបៃ រដ្ឋ Maharashtra ហើយពួកវាតែងតែប្រមូលផ្តុំនៅតាមតំបន់ទឹកជាច្រើនកន្លែង ។ គេសន្និដ្ឋានថា សត្វទាំងនេះត្រូវបានយន្តហោះបុក ក្នុងអំឡុងពេលពួកវាកំពុងហើរទៅកាន់រដ្ឋ Gujarat ដែលជាកន្លែងសម្បូរចំណីអាហារ និងជាកន្លែងបន្តពូជ ។

លោក ស៊ីរ៉ាម៉ារ៉ាវ ជាមន្ត្រីរដ្ឋបាលព្រៃឈើជាន់ខ្ពស់របស់ឥណ្ឌានិយាយថា ក្រុមការងារបានចុះមកកាន់កន្លែងកើតហេតុ និងចាប់ផ្តើមស៊ើបអង្កេតករណីនេះ ដើម្បីស្វែងរកមូលហេតុការងាប់របស់សត្វស្លាប ។ រីឯលោក ថាយ៉ាណាន់ ស្តាលីន ជាមន្ត្រីបរិស្ថាននៅទីក្រុងបុមបៃ និយាយថា វាបណ្តាលមកពីខ្សែភ្លើងនៅដែនជម្រកសត្វព្រៃ ៕