ប្រទេសថៃ ៖ កាលពីថ្ងៃទី៤ ខែមិថុនា ឆ្នាំ២០២៤ នៅវិមានរដ្ឋាភិបាល លោក Srettha Thavisin នាយករដ្ឋមន្ត្រីប្រទេសថៃបានផ្តល់បទសម្ភាសន៍ពីករណីគណបក្សភឿថៃ ដែលព្យាយាមជំរុញច្បាប់លើកលែងទោសដើម្បីពិចារណាក្នុងកិច្ចប្រជុំសភាតំណាងរាស្ត្រ និងលុបចោលបទល្មើសរបស់ជនពាក់ព័ន្ធក្នុងមាត្រា១១២ ដោយលោកថ្លែងថា លោកបាននិយាយពីបញ្ហានេះកន្លងមក ហើយលោកពុំចង់និយាយឡើងវិញទេ ។

នៅពេលអ្នកសារព័ត៌មានសួរថា តើលោកនាយករដ្ឋមន្ត្រីអាចលុបពាក្យចចាមអារ៉ាមបានទេ ដែលលើកឡើងថា លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ
នៅតែស្ថិតក្នុងប្រទេសថៃ និងពុំបានរត់ចោលស្រុកដូចការលើកឡើង? តើលោកបានទាក់ទងទៅលោក ថាក់ស៊ីន ដែរឬទេ?

លោក Srettha Thavisin ថ្លែងថា ៖ «ខ្ញុំបានជួបលោកស្រី Paetongtarn Shinawatra ប្រធានគណបក្សភឿថៃ ហើយខ្ញុំបានសួរពីឪពុករបស់លោកស្រី (គឺលោក ថាក់ស៊ីន) ហើយលោកស្រី Paetongtarn ប្រាប់ថា ឪពុកលោកស្រីសុខសប្បាយធម្មតា ។ ខ្ញុំមានទំនុកចិត្តថា លោក ថាក់ស៊ីន ពុំបានចាកចេញពីថៃទេ ហើយលោកនៅតែតស៊ូជាមួយរឿងក្តីក្នុងតុលាការ ព្រោះលោកបានរស់នៅក្រៅប្រទេសអស់១៧ឆ្នាំហើយ ។ លោកនឹងបង្ហាញខ្លួនក្នុងតុលាការ ខ្ញុំពុំអាចនិយាយជំនួសលោក ថាក់ស៊ីន បានទេ គ្រាន់តែខ្ញុំដឹងថា លោកមិនទៅណាទាំងអស់» ។

គួរបញ្ជាក់ថា លោក ថាក់ស៊ីន អតីតនាយករដ្ឋមន្ត្រីថៃ ត្រូវបានតុលាការកំពូលប្តឹងពាក់ព័ន្ធនឹងមាត្រា១១២ ហើយធ្វើឱ្យអ្នកនយោបាយថៃផ្តោតទៅលើគណបក្សភឿថៃ, លោក ថាក់ស៊ីន និងលោកនាយករដ្ឋមន្ត្រីថៃបច្ចុប្បន្ន ។ គេនឹងរង់ចាំមើលថា តើគណបក្សភឿថៃនឹងបង្ហាញពីគោលជំហររបស់ខ្លួនដូចម្តេចពាក់ព័ន្ធនឹងច្បាប់លើកលែងទោស ឬគណបក្សនេះស្វែងរកដំណោះស្រាយផ្សេង ដូចជា ៖ បង្កើតគណៈកម្មការលើកលែងទោស ។

រីឯលោក ថាក់ស៊ីន នឹងដោះស្រាយដូចម្តេចដើម្បីតស៊ូជាមួយការប្តឹងពាក់ព័ន្ធនឹងមាត្រា១១២ ព្រោះបើតាមសារព័ត៌មានផ្សេងៗរាយការណ៍ថា លោក ថាក់ស៊ីន នឹងមានការធានានៅថ្ងៃទី១៨ ខែមិថុនា ឆ្នាំ២០២៤ ដែលជាថ្ងៃតុលាការណាត់ឱ្យលោក ថាក់ស៊ីន ទៅបង្ហាញខ្លួន ។ ម្យ៉ាងទៀត តាំងពីតុលាការកំពូលប្រកាសប្តឹងលោក ថាក់ស៊ីន គេពុំបានឃើញលោកបង្ហាញខ្លួនជាសាធារណៈដូចមុនទៀតទេ ហើយគ្មានអ្នកណាដឹងថា លោក ថាក់ស៊ីន ស្ថិតនៅកន្លែងណាទេ ។

មតិខ្លះលើកឡើងថា លោក ថាក់ស៊ីន រត់ចោលស្រុកទៀតហើយ ព្រោះលោកពុំអាចឈ្នះក្តីក្នុងតុលាការលើកនេះ ហើយលោកខ្លាចជាប់គុកម្តងទៀត ។ ប៉ុន្តែមតិខ្លះថា លោកមិនចាកចេញពីប្រទេសថៃទេ ព្រោះលោកបានរស់នៅក្រៅប្រទេសអស់ច្រើនឆ្នាំហើយ ទម្រាំអាចចូលមកប្រទេសថៃវិញ មិនងាយស្រួលឡើយ ។ ហេតុនេះ លោកនឹងតស៊ូបន្តទៀតក្នុងតុលាការ ។

បើតាមពាក្យចចាមអារ៉ាមថា នឹងមានការផ្លាស់ប្តូរនាយករដ្ឋមន្ត្រីនៅប្រទេសថៃ ដោយសារលោក Srettha សុខចិត្តលះបង់តួនាទីរបស់ខ្លួនតាមពាក្យសន្យាជាមួយអតីតនាយករដ្ឋមន្ត្រីថៃ ។ ប៉ុន្តែលោក Srettha បញ្ជាក់ថា នឹងគ្មានការផ្លាស់ប្តូរនាយករដ្ឋមន្ត្រីថៃ ព្រោះលោកពុំបានសន្យាអ្វីជាមួយអតីតនាយករដ្ឋមន្ត្រីទេ គឺលោកនឹងបម្រើប្រទេសជាតិបន្តទៀត ។ លោកបន្តការសហការជាមួយអតីតនាយករដ្ឋមន្ត្រីគ្រប់រូប ព្រោះលោកប្រៀបដូចជាទឹកកន្លះកែវ ៕

យោងតាមកំណត់ត្រាពិភពលោក Guinness សត្វគោប្រេស៊ីលមួយក្បាលនេះត្រូវបានគេដេញថ្លៃរហូតដល់ ៤ លានដុល្លារអាមេរិក ក្លាយជាសត្វគោថ្លៃបំផុតមិនធ្លាប់មាន។ ឆ្ងល់អត់? តើមកពីមូលហេតុអ្វីបានជាគោប្រភេទនេះមានតម្លៃថ្លៃបំផុតបែបនេះ? ជាការពិតណាស់នៅប្រទេសប្រេស៊ីលគឺមានសត្វគោល្អៗរាប់រយលានក្បាល ទោះជាយ៉ាងណាសត្វគោ Viatina-19 FIV Mara Movéis គឺបានក្លាយជាគោថ្លៃបំផុតក្នុងលោក ដោយមួយក្បាលមានតម្លៃរហូតដល់ ៤ លានដុល្លារអាមេរិកឯណោះ។

Viatina-19 គឺជាគោពណ៌សមានទំងន់ ១.១ តោន ដែលទម្ងន់របស់វាគឺច្រើនជាងពីដងបើធៀបនឹងគោពេញវ័យដទៃ។ គោនេះកំពុងរស់នៅក្នុងកសិដ្ឋានមួយនៃទីក្រុង Uberaba រដ្ឋ Minas Gerais ដោយវាត្រូវបានការពារយ៉ាងតឹងរ៉ឹង និងត្រួតពិនិត្យយ៉ាងដិតដល់ដោយកាមេរ៉ាសុវត្ថិភាព អមដោយពេទ្យសត្វ និងឆ្មាំសន្តិសុខ ធ្វើឱ្យគោមួយក្បាលនេះទាក់ទាញការចាប់អារម្មណ៍យ៉ាងខ្លាំង។

លោក Ney Pereira ដែលជាសហម្ចាស់ក្រុមហ៊ុន Viatina-19 ម្នាក់ក្នុងចំណោមសហម្ចាស់ក្រុមហ៊ុន Viatina-19 បានចែករំលែកថា មូលហេតុដែលគោមួយក្បាលនេះមានតម្លៃថ្លៃគឺដោយសារ អត្រាលូតលាស់ល្អ ធន់នឹងអាកាសធាតុទោះអាកាសប្រែប្រួលខ្លាំងបែបណាក៏វានៅតែអាចរស់នៅបានធម្មតា មានកម្លាំងខ្លាំងមហិមារ មានភាពល្អឥតខ្ចោះក្នុងការបង្កាត់ពូជ មានគ្រប់លក្ខណៈដែលអ្នកចិញ្ចឹមត្រូវការ និងជាពិសេសមានសមត្ថភាពអស្ចារ្យក្នុងការបញ្ជូនលក្ខណៈដ៏ខ្ពង់ខ្ពស់របស់វាទៅកាន់គោជំនាន់ក្រោយទៀត។

គោដ៏មានតម្លៃដូចជា Viatina-19 ត្រូវបានចិញ្ចឹមសម្រាប់ការបង្កាត់ពូជ ដើម្បីបន្តអភិវឌ្ឍជំនាន់ក្រោយ។ លោក Ney Pereira ដែលជាម្ចាស់ម្នាក់បាននិយាយថា “យើងមិនសម្លាប់សត្វដែលល្អបំផុតនោះទេ ប៉ុន្តែយើងនឹងបង្កាត់ពូជរបស់ពួកវា ហើយនៅពេលអនាគត ពួកវានឹងអាចចិញ្ចឹមពិភពលោកទាំងមូលបាន។ Viatina-19 បានឈ្នះពានរង្វាន់ដ៏មានកិត្យានុភាពជាច្រើននៅឯការប្រលង “ជើងឯកគោពិភពលោក” នៃ Fort Worth ក្នុងរដ្ឋតិចសាស់ ដែលនេះត្រូវបានគេចាត់ទុកថាជាគោដ៏ល្អឥតខ្ចោះ។

ឧស្សាហកម្មគោក្របីបច្ចុប្បន្នគឺជាប្រភពសំខាន់នៃការអភិវឌ្ឍន៍សេដ្ឋកិច្ចរបស់ប្រទេសប្រេស៊ីល ហើយរដ្ឋាភិបាលកំពុងធ្វើការដើម្បីដណ្តើមយកទីផ្សារនាំចេញថ្មី។ ជាពិសេស Viatina-19 គឺជានិមិត្តរូបនៃមហិច្ឆតារបស់ប្រទេសនេះក្នុងការអភិវឌ្ឍន៍សត្វគោដ៏មានតម្លៃ។ គួរបញ្ជាក់ដែរថា ប្រេស៊ីលមានគោជាង ២៣០ លានក្បាលដែលសុទ្ធតែជាគោធំជាងគេនៅលើពិភពលោក។ ប្រទេសនេះបាននាំចេញសាច់គោច្រើនជាង ២ លានតោនក្នុងឆ្នាំ ២០២២ និង ២០២៣ ដែលជាចំនួនច្រើនបំផុតចាប់តាំងពីស្ថិតិបានចាប់ផ្តើមក្នុងឆ្នាំ ១៩៩៧៕

ក្រុមចម្រៀងនារីថ្មីរបស់ផលិតកម្ម BPM Entertainment គឺ BADVILLAIN បានធ្វើឱ្យមានការភ្ញាក់ផ្អើលកាលពីពេលថ្មីៗនេះ ប៉ុន្តែមិនមានលក្ខណៈវិជ្ជមាននោះទេ ប៉ុន្តែធ្វើឱ្យមានមតិវែកញែកបែកផ្សែងពេញបណ្តាញសង្គម X ដែលអ្នកលេងអ៊ីនធឺណិតចោទប្រកាន់ថាក្រុមនេះ ចម្លងស្ទាយ៍របស់ក្រុមចម្រៀង BABYMONSTER របស់ផលិតកម្ម YG។

អ្នកគាំទ្រអន្តរជាតិរបស់ BABYMONSTER ចោទប្រកាន់ក្រុមថ្មីនេះពីបទចម្លង Teaser ដែលបង្ហាញពីរូបភាពរបស់សមាជិក …មានឡូហ្គោស្រដៀងគ្នា។ និមិត្តសញ្ញាអាល់ប៊ុមរបស់ BADVILLAIN ត្រូវបានប្រៀបធៀបទៅនឹងនិមិត្តសញ្ញាហត្ថលេខារបស់ G-DRAGON ។ លើសពីនេះរូបភាពមានស្នែងស្រដៀងនឹងឡូហ្គោហាងលេចឡើងរបស់ BABYMONSTER។ អ្វីដែលអ្នកគាំទ្រចាត់ទុកថាអាក្រក់បំផុតគឺត្រូវបានគេចោទថាចម្លងរូបសញ្ញារបស់ BABYMONSTER ដែលក្បាច់នេះកើតឡើងនៅក្នុងបទ «Sheesh» ដែលក្រុមចម្រៀងនេះបង្កើតស្នែងនៅខាងក្រោយក្បាលរបស់ពួកគេ។ ស្រមោលរបស់ក្រុម BADVILLAIN មានលក្ខណៈពិសេសស្រដៀងគ្នា។ មិនត្រឹមតែប៉ុណ្ណឹង អ្នកគាំទ្របានអះអាងថា BADVILLAIN ក៏បានប្រើឧបករណ៍ស្រដៀងគ្នានៅក្នុងតន្ត្រីរបស់ពួកគេផងដែរ។

ទោះយ៉ាងណា អ្នកលេងអ៊ីនធឺណិតផ្សេងទៀតបានព្យាយាមបដិសេធការចោទប្រកាន់នេះដោយបានលើកឡើងថាក្បាច់នេះត្រូវបានចាត់ទុកថាជារឿងធម្មតានៅក្នុង K-Pop ។ បន្ទាប់មក អ្នកគាំទ្រក៏អះអាងដែរថា រូបស្រមោលដែលមានផ្ទៃខាងក្រោយពណ៌ក្រហម មានជាហូរហែពីក្រុមK-Pop មុនៗមកម្ល៉េះ មិនមែនមានតែក្រុម BABYMONSTER នោះទេ។
យ៉ាងណា អ្នកផ្សេងទៀតការពារអ្នកគាំទ្រ BABYMONSTER ដោយអះអាងថា ការចោទប្រកាន់មានមូលដ្ឋានខ្លះចំពោះពួកគេដែលបង្កើតទៅជាមានការវែកញែកយ៉ាងខ្លាំងនៅលើបណ្តាញសង្គមទៅតាមហេតុផលរៀងៗខ្លួន។

គួរបញ្ជាក់ថា ក្រុមចម្រៀងនារី BADVILLAIN មានសមាជិក៧នាក់ស្ថិតក្រោមផលិតកម្ម BPM Entertainment ។ ពួកគេបានបង្ហាញខ្លួនជាលើកដំបូងនៅថ្ងៃទី៣ ខែមិថុនា ឆ្នាំ២០២៤ ជាមួយនឹងអាល់ប៊ុមទោល «Overstep» ។ BABYMONSTER ជាក្រុមចម្រៀងស្ថិតក្នុងទ្រនំ YG បង្ហាញខ្លួនដំបូងជាមួយសមាជិក៦ នាក់ និងវិលត្រលប់មកវិញជាមួយសមាជិក៧នាក់ជាមួយនឹងបទ «Sheesh»៕

ម៉ាឡេស៊ី៖ មួយជីវិតរៀបការម្តង កូនកំលោះម៉ាឡេស៊ីស្រាប់តែតែងខ្លួន Cosplay បែបនេះក្នុងពិធីអាពាហ៍ពិពាហ៍របស់ខ្លួនកាលពីថ្ងៃទី ២៨ ឧសភា ២០២៤។
នៅក្នុងវីដេអូមួយដែលបានផ្សព្វផ្សាយតាមបណ្តាញសង្គមបានបង្កឱ្យមានការចាប់អារម្មណ៍យ៉ាងខ្លាំងពីសំណាក់អ្នកនិយមលេងអ៊ីនធឺណិត ដោយនៅក្នុងវិដេអូនោះគេបានឃើញថា កូនកំលោះស្រាប់តែតែងខ្លួនជាតួអង្គប្រឌិតបែបវិទ្យាសាស្ត្រជប៉ុនក្នុងរឿងព្រេងនិទាន Ultraman ជំនួសឱ្យការស្លៀកសម្លៀកបំពាក់បែបប្រពៃណី ខណៈកូនក្រមុំនៅតែគ្រងឈុតប្រពៃណីដដែល។

កូនលោះ Zulhafizie បាននិយាយថា “លោកពិតជាចូលចិត្តការតែងខ្លួន Cosplay ជាតួអង្គ Ultraman ណាស់ព្រោះតួអង្គនេះគឺជាផ្នែកមួយនៃជីវិតរបស់លោក”។ កូនលោះរូបនេះបានបន្តទៀតថា លោកពិតជាអរគុណភរិយាដែលសុខចិត្តធ្វើតាមតម្រូវការពិសេសរបស់លោក។ លោកក៏បានថ្លែងអំណរគុណដល់គ្រួសារទាំងពីរដែលបានគាំទ្រពួកគេក្នុងការរៀបចំពិធីមង្គលការដ៏ពិសេសនេះ។

នៅក្នុងវីដេអូដែលបានចែកចាយនោះគេបានឃើញថា កូនក្រមុំកាន់ផ្កាមង្គលការ គ្រងឈុតបុរាណបែបប្រពៃណី កាន់ដៃកូនកំលោះដោយស្នាមញញឹម។ ដោយកូនក្រមុំបានដឹងរឿងគ្រប់យ៉ាងរបស់កូនកំលោះ ហើយភ្លាមៗនោះក៏យល់ស្របជាមួយនឹងគំនិតរបស់កូនកំលោះក្នុងការប្រែក្លាយទៅជា Ultraman ។ Ultraman គឺតួអង្គ Hero ដ៏ល្បីល្បាញមួយរបស់ជប៉ុន ដែលតែងតែប្រយុទ្ធជាមួយក្រុមបិសាច ហើយតែងតែងយកឈ្នះក្រុមបិសាចជានិច្ច។

នៅក្នុងវីដេអូនៃពិធីមង្គលការនេះបានលេចឡើងលើបណ្ដាញសង្គមធ្វើឱ្យមនុស្សជាច្រើនរំភើបចិត្តយ៉ាងខ្លាំង។ ដោយមនុស្សម្នាក់បានបញ្ចេញមតិថា “ខ្ញុំមិននឹកស្មានថា Ultraman អាចនឹងរៀបការទេ”។ គួរបញ្ជាក់ដែរថា គិតត្រឹមថ្ងៃទី ២៩ ឧសភា វីដេអូអាពាហ៍ពិពាហ៍នេះទាក់ទាញអ្នកចូលមើលរហូតដល់ ៩.៣ លានដងនិង ៦០ ម៉ឺន Like ដោយទទួលបានមតិវិជ្ជមានជាង ៤ ម៉ឺន។ មនុស្សភាគច្រើនបានអបអរសាទរគូស្នេហ៍វ័យក្មេងនេះចំពោះសុភមង្គលពិសេសរបស់ពួកគេ ដោយសរសើរពួកគេចំពោះភាពច្នៃប្រឌិត និងកំប្លែង៕

ប្រទេសអូស្ត្រាលី ៖ នេះជាសណ្ឋាគារមួយដែលសាងសង់ឡើងមិនមែនសម្រាប់ឱ្យភ្ញៀវចូលស្នាក់នៅទេ ប៉ុន្តែគេសាងសង់វាសម្រាប់បំភ័ន្តភ្នែកអ្នកដំណើរដែលបើករថយន្តឆ្លងកាត់ទីនេះប៉ុណ្ណោះ ។ សណ្ឋាគារនេះឈ្មោះ «Hotel Eastlink» ស្ថិតនៅតាមបណ្តោយផ្លូវមួយក្នុងទីក្រុង Melbourne ប្រទេសអូស្ត្រាលី ។

បើទោះជាវាមានឈ្មោះថាសណ្ឋាគារ និងមានរូបរាងខាងក្រៅដូចគ្នានឹងសណ្ឋាគារពិតប្រាកដក្តី ប៉ុន្តែវាមិនដូចជាមនុស្សគ្រប់គ្នាគិតនោះទេ ។ នេះជាការតាំងបង្ហាញនូវស្នាដៃសិល្បៈក្នុងតំបន់របស់អ្នកជំនាញសិល្បៈសាងសង់ គឺលោក Callum Morton ព្រមទាំងបានបង្ហាញជាសាធារណៈតាំងពីឆ្នាំ២០០៧ មកម៉្លេះ ។

ចាប់តាំងពីពេលនោះ សណ្ឋាគារ Eastlink បានធ្វើឱ្យអ្នកដំណើរនៅតាមផ្លូវយល់ច្រឡំគ្រប់ៗគ្នា ។ វាមានរូបរាងដូចគ្នានឹងសណ្ឋាគារតូចមួយ ដែលមានកម្ពស់២០ម៉ែត្រ និងទទឹង១២ម៉ែត្រ ព្រមទាំងមានបរិវេណផ្នែកខាងមុខ៥ម៉ែត្រ សម្រាប់ចតយានជំនិះ ។ បើបើកបររថយន្តក្នុងល្បឿនលឿន អ្នកដំណើរនឹងជឿថា វាពិតជាសណ្ឋាគារខ្នាតតូច ពីព្រោះនៅផ្នែកខាងលើអគារ គេបានឃើញអក្សរពណ៌ក្រហមសរសេរថា «HOTEL» ។

ហេតុនេះ វាមិនចម្លែកចិត្តទេ ដែលមានមនុស្សជាច្រើននាក់ព្យាយាមទំនាក់ទំនងទៅខាងសណ្ឋាគារនេះដើម្បីកក់បន្ទប់ស្នាក់នៅ ។ នៅពេលយប់ គេនឹងឃើញបង្អួចស្តើងៗរបស់សណ្ឋាគារបើកភ្លើងភ្លឺព្រោងព្រាត ហើយមើលទៅ វាដូចគ្នានឹងមានមនុស្សកំពុងស្នាក់នៅដែរ ។ ប៉ុន្តែបើពិនិត្យឱ្យបានច្បាស់នឹងដឹងថា វាមិនមែនជាសណ្ឋាគារពិតប្រាកដទេ ពីព្រោះបរិវេណខាងក្នុងអគារគ្មានផ្លូវ ឬបន្ទប់សម្រាប់ឱ្យភ្ញៀវដើរចូល ពីព្រោះវាគ្រាន់តែជាសិល្បៈប៉ុណ្ណោះ ។

នេះជាការតាំងចិត្តរបស់អ្នកបង្កើតស្នាដៃសណ្ឋាគារនេះ ដោយបានដាក់ឱ្យវាស្ថិតនៅដាច់ឆ្ងាយពីអគារផ្សេងៗ ក្នុងគោលបំណងបំភ័ន្តភ្នែកអ្នកដំណើរឆ្លងកាត់ទីនេះ ។ លោក Callum Morton ជាអ្នកជំនាញសិល្បៈសាងសង់សណ្ឋាគារ Eastlink និយាយថា បើមើលមួយភ្លែត អ្នកដំណើរអាចគិតថា វាជាសណ្ឋាគារ ប៉ុន្តែក្រោយមក ពួកគេនឹងមើលឃើញថា វាគ្រាន់តែជាឧបករណ៍ដែលយកមកដំឡើងតម្រៀបលើគ្នាប៉ុណ្ណោះ ។

លោកនិយាយថា ៖ «ខ្ញុំគិតថា វាជារឿងគួរឱ្យចាប់អារម្មណ៍មួយ ដែលត្រូវយកអ្វីម្យ៉ាងមកដាក់នៅបរិវេណទីវាល និងងាយស្រួលឱ្យអ្នកដំណើរឆាប់មើលឃើញ ។ វាអាចផ្លាស់ប្តូរការគិតរបស់មនុស្សពាក់ព័ន្ធនឹងសិល្បៈក៏ថាបាន» ៕