អ្នកគាំទ្រពីរនាក់អាចប្រឈមមុខនឹងចំណាត់ការផ្លូវច្បាប់ដែលគេរាយការណ៍ថាបានព្យាយាមថើប Jin សមាជិកក្រុម BTS ដោយគ្មានការយល់ព្រមពីតារាចម្រៀងរូបនេះក្នុងអំឡុងពេលព្រឹត្តិការណ៍ឱបបន្ទាប់ពីរូបគេបានបំពេញកាតព្វកិច្ចយោធារួចរាល់ហើយជួបជុំអ្នកគាំទ្រក្នុងទីក្រុងស៊េអូល។

យោងតាមរបាយការណ៍ពី Soompi និង KoreaBoo បានឱ្យដឹងថា ស្ថានីយ៍ប៉ូលិស Seoul Songpa បានទទួលពាក្យបណ្តឹងកាលពីថ្ងៃទី១៤ ខែមិថុនា អំពីអ្នកគាំទ្រដែលត្រូវបានចោទប្រកាន់ថាបានប៉ុនប៉ងថើប Jin ។ អាជ្ញាធរបាននិយាយថា «យើងបានទទួលពាក្យបណ្តឹងតាមរយៈប្រព័ន្ធញត្តិជាតិ ប៉ុន្តែយើងមិនទាន់បានទទួលពាក្យបណ្តឹងផ្លូវការទេ។ យើងមិនទាន់បានឃាត់ជនសង្ស័យនៅឡើយទេ ដោយបន្ថែមថាពួកគេកំពុងពិចារណាថាតើត្រូវបើកការស៊ើបអង្កេតឱ្យបានហ្មត់ចត់លើឧប្បត្តិហេតុនេះឬយ៉ាងណា»។

ឧបទ្ទវហេតុនេះបានកើតឡើងនៅក្នុងព្រឹត្តិការណ៍ប្រារព្ធខួបលើកទី១១ របស់ BTS ដែល Jin វ័យ ៣១ ឆ្នាំបានផ្តល់ការឱបដល់អ្នកគាំទ្រចំនួន ១០០០នាក់ ជានិមិត្តសញ្ញានៃការកោតសរសើរចំពោះការគាំទ្ររបស់ពួកគេក្នុងអំឡុងពេលបំពេញកាតព្វកិច្ចយោធារបស់លោក។ក្នុងវីដេអូដែលបានបង្ហោះលើបណ្តាញសង្គម Jin ហាក់មានការមិនស្រណុកចិត្តយ៉ាងខ្លាំង ហើយបានងាកចេញភ្លាមៗបន្ទាប់ពីមានអ្នកគាំទ្រចង់ថើបគេ។

បន្ទាប់ពីរូបភាពនិងវីដេអូនេះបានសាយភាយនៅលើអ៊ិនធឺណិតអ្នកគាំទ្រមួយចំនួនបានសម្តែងការខឹងសម្បារតាមប្រព័ន្ធអនឡាញ ដោយអំពាវនាវឱ្យមានការស៊ើបអង្កេតឱ្យបានហ្មត់ចត់ក្រោមច្បាប់បៀតបៀនផ្លូវភេទដែលពាក់ព័ន្ធ។

នៅថ្ងៃទី១២ ខែមិថុនា Jin សមាជិក BTS ត្រូវបានចេញពីមជ្ឈមណ្ឌលហ្វឹកហ្វឺនរបស់កងពលធំថ្មើរជើងទី៥ នៅខេត្ត Gyeonggi ជាកន្លែងដែលតារាចម្រៀងរូបនេះបានបម្រើការជាគ្រូជំនួយអស់រយៈពេល ១៨ ខែ។ ការត្រលប់មកវិញរបស់ Jin គឺជាសមាជិកក្រុម BTS ដំបូងគេដែលបំពេញកាតព្វកិច្ចយោធារួចរាល់។ នៅថ្ងៃទី១៣ ខែមិថុនា Jin បានចូលរួមព្រឹត្តិការណ៍មួយក្នុងទីក្រុងសេអ៊ូល ជាកន្លែងដែលលោកបានជួបជុំជាមួយ ARMYs ដើម្បីអបអរសាទរការត្រឡប់មកវិញរបស់លោកក៏ដូចជាអបអរខួបលើកទី ១១ របស់ BTS ៕

ចាប់តាំងពីដើមសប្តាហ៍រហូតមកដល់ពេលនេះ អាពាហ៍ពិពាហ៍របស់តារាចិន Chen Xiao និងភរិយាតារាសម្តែងតៃវ៉ាន់ Michelle តួអង្គ យ៉ាងគួរនិងសៀវឡុងនី២០១៤ បានបន្តស្ថិតនៅលើកំពូលប្រធានបទដែលពេញនិយមបំផុតនៅលើ Weibo ។ paparazzi មួយចំនួនបាននិយាយថា Chen Xiao ចង់បែកគ្នាពីប្រពន្ធតាំងពីចុង ឆ្នាំ២០២៣ ដោយយល់ព្រមចាកចេញពីទ្រព្យសម្បត្តិរបស់ខ្លួនទៅឱ្យ Michelle ។ តាមប្រភពព័ត៌មានបានឱ្យដឹងថាគូស្នេហ៍មួយគូនេះបានបែកគ្នា ហើយកូនប្រុសត្រូវម្តាយមើលថែ ។

នៅថ្ងៃខួបកំណើតរបស់ Michelle ឆ្នាំនេះ (៣១ ឧសភា) តារាសម្តែង Chen Xiao ជាស្វាមីមិនបានអបអរសាទរភរិយារបស់លោកជាសាធារណៈដូចឆ្នាំមុនៗទេ។ ចំណែក Michelle វិញក៏មិនបានមកស្ទូឌីយ៉ូដើម្បីមកមើល Chen Xiao ជាងមួយឆ្នាំមកហើយ។
យោងតាមប្រភពភាគីរបស់លោក Chen Xiao បានបដិសេធមិននិយាយអំពីស្ថានភាពអាពាហ៍ពិពាហ៍ ខណៈដែល Michelle ក៏មិនឆ្លើយតបចំពោះឧបទ្ទវហេតុនេះដែរ។

តារាសម្តែងទាំងពីរបានរៀបការជាមួយគ្នានៅឆ្នាំ ២០១៦។ ចាប់តាំងពីពេលនោះមក Michelle បានកំណត់ការងាររបស់នាងក្នុងការថែរក្សាកូន និងចិញ្ចឹមគ្រួសារ ខណៈដែល Chen Xiao បានធ្វើការជាបន្តបន្ទាប់នៅក្នុងក្រុមផលិតភាពយន្ត។ នៅក្នុងមួយឆ្នាំ ២០២២តារាប្រុសរូបនេះធ្លាប់បាននិយាយថា ភរិយារបស់ខ្លួនគឺឆ្លាត ចេះដឹង និងមានធនធាន។ លោកបានសម្តែងការដឹងគុណភរិយាដែលបានមើលថែគ្រួសារ និងចិញ្ចឹមកូន ដើម្បីឱ្យខ្លួនលោកផ្តោតទៅលើការតស៊ូក្នុងអាជីពរបស់លោក។
បច្ចុប្បន្ន Chen Xiao មានអាយុ៣៧ឆ្នាំ និង Michelle អាយុ៤១ឆ្នាំ ។ អ្នកទាំងពីរបានស្រលាញ់គ្នានៅពេលដែលពួកគេដើរតួជាយ៉ាងគួរនិងសៀវឡុងនីក្នុងឆ្នាំ២០១៤និងបានរៀបការនៅខែកក្កដា ឆ្នាំ ២០១៦ ហើយនៅក្នុងខែធ្នូ ឆ្នាំដដែលនោះគូស្នេហ៍នេះបានស្វាគមន៍កូនប្រុសជាមួយគ្នា៕

តារារ៉េប Sprite ដែលមានឈ្មោះកំណើត Sukkonlawat ជាតារារ៉េបថៃដ៏ល្បីអាយុ ១៨ឆ្នាំដែលមានបទចម្រៀងបានជាប់ចំណាត់ថ្នាក់នៅលើតារាង Billboard Global Charts ជាមួយនឹងបទ «Ton» ត្រូវបានប្តឹងដោយអតីតក្រុមហ៊ុនរបស់គេ ពីបទរំលោ.ភកិច្ចសន្យា។

ទោះបីជាភាពជាក់លាក់នៃជម្លោះមិនត្រូវបានបង្ហាញឱ្យដឹងក៏ដោយ HYPE TRAIN ENTERTAINMENT អះអាងថា Sprite នឹងទទួលបាន ២០,០០០ បាត ប្រមាណ៥៤៥ដុល្លារសម្រាប់រាល់ការមើល ១,០០០,០០០ ដងដែលទទួលបាននៅលើ YouTube ដោយក្រុមហ៊ុនរក្សាបាន ៧០ ភាគរយនៃចំនួននោះ។

មេធាវីរបស់ Sprite មានឈ្មោះថាលោក James LK បានបង្ហាញនៅលើបណ្តាញសង្គម Facebook ថាក្នុងករណីនេះ Sprite នឹងត្រូវការការចូលមើលជាង ២ពាន់លានដង ដើម្បីទូទាត់សងការខូចខាតផ្នែកហិរញ្ញវត្ថុចំនួន ១៤លានបាត ដែលប្រមាណនឹងជាង៣៨ម៉ឺនដុល្លារអាម៉េរិក។

ទោះជាយ៉ាងណាក៏ដោយ ឆាណែលដែលបានបង្ហោះវីដេអូចម្រៀងរបស់តារារ៉េបវ័យក្មេងរូបនេះបច្ចុប្បន្នមានអ្នកចូលមើលជាង ៤២១ លានដង មិនមែនជារបស់អ្នករ៉េបវ័យក្មេងរូបនេះទេ ឬយ៉ាងហោចណាស់ក៏មិនមែនជាវេទិកាដែល Sprite ទទួលបានប្រាក់ចំណូលដែរដែលនេះជាចម្ងល់ថា តើលុយ១៤លានបាតបានមកពីណា?

មេធាវីខាងលើបានបង្ហាញការអាណិតអាសូរទៅកាន់ Nong Sprite ដោយបានរៀបរាប់ថារូបគេគជាកូនល្អ ចេះដឹងគុណ និងពូកែនិពន្ធ និងច្រៀង។ តារារ៉េបវ័យក្មេងរូបនេះត្រូវបោះបង់ការសិក្សាព្រោះឪពុកម្តាយរបស់ខ្លួនមានប្រាក់ចំណូលទាប។ មេធាវី James LK ក៏បានកោតសរសើរឪពុកម្តាយរបស់ Rapper វ័យក្មេងរូបនេះដែលបានតស៊ូអត់ធ្មត់ និងគាំទ្រកូនអស់ពីលទ្ធភាពដោយបង្ហាញខ្លួនទាំងគ្រួសារជុំវិញបញ្ហាប្រឈមផ្លូវច្បាប់នេះ។ តាមដីកាចោទ មកកាន់តារារ៉េបវ័យក្មេងរូបនេះរំលោភកិច្ចសន្យាទោះបីជាភាគីឪពុករបស់ Sprite បានស្នើសុំលុបចោលកិច្ចសន្យាមុននឹងកូនប្រុសរបស់ខ្លួនល្បីលើពិភពលោក ។

ការរំលោភលើសិទ្ធិអ្នកនិពន្ធនៅតែជាបញ្ហាដ៏ចម្រូងចម្រាសនៅក្នុងឧស្សាហកម្មតន្ត្រី ជាពិសេសនៅក្នុងប្រទេសថៃ ដែលសិល្បករតែងតែប្រឈមមុខនឹងបញ្ហាផ្លូវច្បាប់លើកម្មសិទ្ធិ និងសិទ្ធិក្នុងការបង្កើតរបស់ពួកគេ។ ជាក់ស្តែង ក្នុងឧប្បត្តិហេតុមួយដែលទាក់ទងគ្នានេះ កាលពីកក្កដា ឆ្នាំ២០២៣ តារាចម្រៀងថៃម្នាក់ក៏ត្រូវបានក្រុមហ៊ុន RS ប្តឹងទារប្រាក់ ១២ លានបាតដូចគ្នាពីបទរំលោភសិទ្ធិអ្នកនិពន្ធ បើទោះជានិពន្ធបទចម្រៀងដោយខ្លួនលោក។

Sprite ដែលបច្ចុប្បន្នចុះហត្ថលេខាជាមួយ Hype Train Records មិនបានធ្វើអត្ថាធិប្បាយជាសាធារណៈលើបណ្ដឹងនេះទេ។ លោកត្រូវបានគេឃើញចុងក្រោយនៅសហរដ្ឋអាម៉េរិកជាមួយនឹងក្រុមហ៊ុនគ្រប់គ្រងរបស់ខ្លួនដែលសម្តែងនៅ Sabaidee Fest ក្នុងរដ្ឋកាលីហ្វ័រញ៉ា។

Sprite គឺជាតារារ៉េបវ័យក្មេងបំផុតនៅក្នុងប្រទេសថៃ ហើយក៏ជាតារារ៉េបម្នាក់ស្រលាញ់ពេញចិត្ត វណ្ណដា ដូចគ្នា ខណៈអ្នកទាំងពីររួមជាមួយ Rapper ប្រចាំប្រទេសថៃផ្សេងទៀតធ្លាប់សហការចេញបទចម្រៀង «Run The Town »កាលពីខែមេសា ឆ្នាំ២០២២៕

BLACKPINK បានបង្ហាញខ្លួនដំបូងក្នុងខែសីហា ឆ្នាំ២០១៦ជាមួយបទចម្រៀងពីរបទ ខណៈមកទល់ពេលនេះសមាជិកទាំងអស់បន្តសកម្មភាពនិងយុទ្ធសាស្រ្តចំនួនពីរគឺសកម្មភាពក្រុមជាមួយ YG Entertainment និងសកម្មភាពបុគ្គលជាមួយភ្នាក់ងាររៀងៗខ្លួន។ ក្នុងនាមជាក្រុមចម្រៀងនារី K-pop ឈានមុខគេដែលមានវត្តមានទូទាំងពិភពលោកដ៏រឹងមាំ តុល្យភាពរវាងសកម្មភាពបុគ្គល ការបង្ហាញខ្លួនទាំងក្រុមនឹងក្លាយជាបញ្ហាប្រឈមដ៏សំខាន់សម្រាប់ BLACKPINK ។

នៅថ្ងៃទី ១៨ ខែមិថុនា Rosé សមាជិកក្រុម BLACKPINK បានប្រកាសពីកិច្ចសន្យាគ្រប់គ្រងរបស់នាងជាមួយក្រុម THE BLACK LABEL ។ Rosé នឹងចាប់ផ្តើមដំណើរថ្មីជាមួយទីភ្នាក់ងារនេះ ដែលបង្កើតឡើងក្នុងឆ្នាំ ២០១៦ ដោយ Teddy ដែលជាអតីតសមាជិកក្រុម 1TYM របស់ YG Entertainment ។ ពីមុនសមាជិក Jennie, Lisa និង Jisoo បានបង្កើតក្រុមហ៊ុនផ្ទាល់ខ្លួនរបស់ពួកគេសម្រាប់សកម្មភាពបុគ្គល។

នៅខែធ្នូ ឆ្នាំ២០២៣ Jennie បានបង្កើតក្រុមហ៊ុនឯករាជ្យរបស់នាងមានឈ្មោះថា ODD ATELIER (ហៅកាត់ OA)។ Jennie បានចូលរួមយ៉ាងសកម្មជាមួយសាធារណជនតាមរយៈតន្ត្រីថ្មីៗ កម្មវិធីទូរទស្សន៍ និងកម្មវិធីប្លែកៗតាមអ៊ីនធឺណិត។ នាងបានបង្ហាញខ្លួនក្នុងបទចម្រៀងរបស់ Zico មានចំណងជើងថា «SPOT»ដែលដណ្ដើមយកបេះដូងអ្នកគាំទ្រទូទាំងពិភពលោក។ Jennie កំពុងកំណត់ម៉ាកយីហោ និងស្ទីលប្លែកៗរបស់នាងយ៉ាងឆាប់រហ័ស តាមរយៈសកម្មភាពទោលរបស់នាងទាំងការដើរម៉ូត ខណៈថ្មីៗនេះទើបតែបង្ហាញខ្លួនជាពិធីការិនីទៀត។

Lisa បានបង្កើតក្រុមហ៊ុនផ្ទាល់ខ្លួនឈ្មោះ LLOUD នៅក្នុងខែកុម្ភៈ ឆ្នាំ២០២៤ ហើយបានប្រកាសពីភាពជាដៃគូជាមួយ RCA Records ក្រោម Sony Music ក្នុងខែមេសា ឆ្នាំ ២០២៤។ ក្រៅពីតន្ត្រី Lisa គ្រោងនឹងដាក់បញ្ចាំងជាលើកដំបូងនៅក្នុងរឿងភាគដើមរបស់ HBO «The White Lotus» season 3 ។ នាង នឹងឡើងឆាកយ៉ាងរហ័ស ដើម្បីបង្ហាញពីភាពទាក់ទាញរបស់នាង ដែលមិនអាចទៅរួចជាមួយក្រុម។ នៅខែកុម្ភៈ ឆ្នាំ ២០២៤ Jisoo បានប្រកាសក្រុមហ៊ុនរបស់នាងមានឈ្មោះថា BLISSOO ហើយកំពុងផ្តោតលើអាជីពសម្តែងរបស់នាង។ Jisoo បានបញ្ជាក់ពីតួនាទីរបស់នាងនៅក្នុងរឿង «Omniscient Reader’s Viewpoint» និងរឿង «Influenza»។

កាលពីខែធ្នូ ឆ្នាំ២០២៣ BLACKPINK បានបន្តកុងត្រាថ្មីជាមួយផលិតកម្ម YG Entertainment សម្រាប់សកម្មភាពក្រុម។ ទោះបីជាពាក្យចចាមអារ៉ាមអំពីការបែកគ្នាបានផ្សព្វផ្សាយដោយសារតែការចរចាកិច្ចសន្យាយូរក៏ដោយ សមាជិកបានចុះហត្ថលេខាឡើងវិញដើម្បីបន្តសកម្មភាពបុគ្គលដាច់ដោយឡែកខណៈពេលដែលរក្សាសកម្មភាពក្រុមជាមួយគ្នា។ បន្ទាប់ពីរឿងនេះ Jennie, Lisa និង Jisoo បានបង្កើតក្រុមហ៊ុនឯករាជ្យរបស់ពួកគេ ហើយកិច្ចសន្យារបស់ Rosé ជាមួយ The Black Label បានបញ្ជាក់ផ្លូវថ្មីរបស់សមាជិករូបនេះ។

កិច្ចការសំខាន់នៅពេលនេះ គឺការសម្របសម្រួលសកម្មភាពបុគ្គល និងក្រុម។ ដោយសារសមាជិកត្រូវបានគេរំពឹងថានឹងមានភាពសកម្មក្នុងវិស័យផ្សេងៗ របៀបដែលពួកគេអាចមកជួបជុំគ្នាដោយជាក្រុមនឹងកំណត់ពេលយូរអង្វែងរបស់ BLACKPINK ។

ក្នុងអំឡុងពេលសកម្មភាពផ្ទាល់ខ្លួនរបស់ពួកគេ សមាជិកទំនងជានឹងស្វែងរកផ្លូវថ្មី និងបង្ហាញរចនាប័ទ្មផ្ទាល់ខ្លួនដាច់ដោយឡែកដែលមិនអាចធ្វើទៅបាននៅក្នុងក្រុម។ អ្នកគាំទ្រនឹងឃើញសមាជិកចូលរួមក្នុងសកម្មភាពជាច្រើន ដោយបង្កើនតម្លៃម៉ាកយីហោនីមួយៗរបស់ពួកគេ។នៅពេលដែលវាដល់ពេលសម្រាប់សកម្មភាពក្រុម សមាជិកនឹងត្រូវកំណត់ការប្រឹងប្រែងទោលរបស់ពួកគេជាបណ្តោះអាសន្ន ហើយជួបជុំគ្នាវិញ។ ការសម្របសម្រួលកាលវិភាគនៅទូទាំងភ្នាក់ងារផ្សេងៗគ្នានឹងមានសារៈសំខាន់ក្នុងការធានាពេលវេលាគ្រប់គ្រាន់សម្រាប់សកម្មភាពក្រុម។ ពួកគេនឹងត្រូវមើលទៅក្នុងទិសដៅដូចគ្នាដើម្បីធានាបាននូវការសហការគ្នាដោយរលូន។

ទោះបីជាសមាជិកនៅតែមានភាពស្និទ្ធស្នាលជាមិត្តភាពខ្លាំងក៏ដោយ ប៉ុន្តែការធ្វើឱ្យមានតុល្យភាពសកម្មភាព «រួមគ្នា ប៉ុន្តែដាច់ដោយឡែក» ប្រហែលជាមិនងាយស្រួលទេ នៅពេលពួកគេចាប់ផ្តើមការខិតខំប្រឹងប្រែងបុគ្គលពេញលេញ។

ការរក្សាឋានៈរបស់ពួកគេជាក្រុមចម្រៀងនារីលំដាប់កំពូលរបស់ពិភពលោកនឹងតម្រូវឱ្យមានកិច្ចសហការយ៉ាងជិតស្និទ្ធរវាងភ្នាក់ងារនីមួយៗ និង YG Entertainment ។ ការរក្សាគោលការណ៍ «ក្រុមតែមួយ» នៅក្នុងចិត្តគឺជាកិច្ចការមូលដ្ឋាននៅក្នុងយុគសម័យ «BLACKPINK 2.0» ថ្មីនៃសកម្មភាពដាច់ដោយឡែក និងសកម្មភាពរួមគ្នា៕