កូនស្រីរបស់ Angelina Jolie និង Brad Pitt បានបង្ហាញខ្លួននៅក្នុងវីដេអូចម្រៀង K-Pop

អ្នកលេងអ៊ីនធឺណិតមានការភ្ញាក់ផ្អើលយ៉ាងខ្លាំងនៅពេលដឹងថា Shiloh ដែលជាកូនស្រីរបស់តារាហូលីវូដ Angelina Jolie និង Brad Pitt បានបង្ហាញខ្លួននៅក្នុងវីដេអូចម្រៀងរបស់តារាចម្រៀង K-pop Dayoung សមាជិក WJSN។

នៅក្នុងវីដេអូខ្លីៗនៃបទ «What’s a girl to do» របស់ Dayoung បានបង្ហាញពីវត្តមានរបស់ Shiloh Jolie អាយុ១៩ឆ្នាំដែលជាកូនស្រីរបស់តារាហូលីវូដ Angelina Jolie និង Brad Pitt ។ រូបនាងតែងតែត្រូវបានប្រព័ន្ធផ្សព្វផ្សាយអន្តរជាតិពណ៌នាថាជាក្មេងអ្នកមានដ៏ល្បីល្បាញម្នាក់ ដែលធំធាត់នៅក្រោមក្រសែរភ្នែកជាច្រើន ប៉ុន្តែការបង្ហាញខ្លួនជាសាធារណៈលើកដំបូងរបស់នាងនៅក្នុងព្រឹត្តិការណ៍ឧស្សាហកម្មកម្សាន្តមួយគឺមិននឹកស្មានដល់។

នៅក្នុងវីដេអូ ទោះបីជាពេលវេលារបស់ Shiloh មានរយៈពេលខ្លីក៏ដោយ រូបរាងរបស់នាង ដែលរួមបញ្ចូលគ្នានូវបបូរមាត់ដ៏ប្លែករបស់ម្តាយ និងភ្នែកដ៏ជ្រៅរបស់ឪពុក បានរីករាលដាលភ្លាមៗ។ អ្នកទស្សនាជាច្រើនបានបញ្ចេញមតិថា Shiloh បានទទួលមរតកហ្សែនដ៏ល្អបំផុតទាំងអស់ពីឪពុកម្តាយរបស់នាង។ អ្វីដែលគួរឱ្យភ្ញាក់ផ្អើលជាងនេះទៅទៀតនោះគឺថា កិច្ចសហការនេះមិនបានកើតចេញពីធនធានហូលីវូដ ឬទំនាក់ទំនងគ្រួសាររបស់ Angelina Jolie និង Brad Pitt ទេ ប៉ុន្តែវាគឺជាលទ្ធផលទាំងស្រុងនៃការហៅជ្រើសរើសតួសម្តែងដោយអនាមិក។

យោងតាមក្រុមហ៊ុនកម្សាន្ត Starship Entertainment ដើម្បីធ្វើឱ្យការសម្តែងរបស់ Dayoung នៅក្នុងវីដេអូចម្រៀងល្អឥតខ្ចោះ ក្រុមការងារផលិតកម្មបានរៀបចំការសវនកម្មបើកចំហមួយនៅសហរដ្ឋអាម៉េរិក ជាចម្បងសម្រាប់អ្នករាំដែលមានទំនាក់ទំនងជាមួយក្រុមហ៊ុនរាំ។Shiloh គឺជាអ្នកដែលបានប្រឡងជាប់វគ្គសវនកម្មចុងក្រោយ ហើយបានចូលរួមក្នុងការថតវីដេអូចម្រៀង។ អ្នកតំណាងក្រុមហ៊ុនម្នាក់បាននិយាយថា «សូម្បីតែបន្ទាប់ពីការថតចប់ក៏ដោយ ក៏យើងមិនបានដឹងថានាងជាកូនស្រីរបស់តារាហូលីវូដទាំងនោះដែរ។ យើងទើបតែដឹងថ្មីៗនេះដោយចៃដន្យ»។

អ្នកលេងអ៊ីនធឺណិតបានបញ្ចេញមតិលេងសើចថា Shiloh ប្រហែលជាក្មេងមានទ្រព្យស្តុកស្តម្ភដែលមានភាពស្ងប់ស្ងាត់បំផុតនៅពេលចូលប្រឡូកក្នុងវិស័យកម្សាន្ត។លើសពីនេះ អ្នកគាំទ្រ Kpop ក៏បានសម្តែងការរំពឹងទុករបស់ពួកគេចំពោះសក្តានុពលរបស់ Shiloh ផងដែរ។ ក្រៅពីការសរសើរសម្រស់ និងភាពទាក់ទាញរបស់នាង ទស្សនិកជនសង្ឃឹមថា ក្មេងស្រីអាយុ ១៩ ឆ្នាំរូបនេះនឹងបង្ហាញជំនាញរាំ និងសម្តែងរបស់នាងដូចជាតារា Kpop idol ដែរ។
តាមពិតទៅ មានមតិយោបល់ជាច្រើនបានចាប់ផ្តើមពិភាក្សាយ៉ាងយកចិត្តទុកដាក់អំពីលទ្ធភាពដែល Shiloh ចូលរួមក្នុងឧស្សាហកម្មតន្ត្រី Kpop។

ដោយសារតែមានរបាយការណ៍ជាច្រើនចាប់តាំងពី Shiloh នៅក្មេងមក ដែលសិក្សារបាំ ហើយការចូលរួមរបស់នាងនៅក្នុងការសវនកម្មវីដេអូចម្រៀង Kpop នេះហាក់ដូចជាបញ្ជាក់ដោយប្រយោលអំពីប្រវត្តិរបាំរបស់នាង។ ពីមុន Shiloh បានបង្ហាញសមត្ថភាពរាំរបស់នាងម្តងហើយម្តងទៀតនៅក្នុងវីដេអូផ្សេងៗ ដោយទទួលបានការសរសើរជាច្រើនពីអ្នកគាំទ្រ និងអ្នកជំនាញ៕