ប៉ីប៉ី ឌី ហាក់កំពុងខូចចិត្តដោយសារស្នេហា

ប៉ីប៉ី ឌី ដែលជាមនុស្សល្បីល្បាញមានហាងច្រើនកន្លែង និងចែកចាយប្រ៊េនឆាយផ្ទាល់ខ្លួនបានបង្ហោះសារប្លែកៗហាក់ដូចជាលោកកំពុងខូចចិត្តដោយសារស្នេហា។ មិនត្រឹមតែប៉ុណ្ណោះរយៈពេលចុងក្រោយនេះ ប៉ីប៉ី ឌី ពុំសូវថតវីដេអូកំប្លែងជូនអ្នកគាំទ្រទស្សនាជាចំណីភ្នែកឡើយ។

នៅលើបណ្តាញសង្គមអ៊ីនស្ត្រាក្រាមថ្មីៗនេះ ប៉ីប៉ី ឌី បានបង្ហោះថា «ខ្ញុំជឿលើបុណ្យបាប សាងល្អជាតិនេះទទួលផលល្អជាតិនេះ ខ្ញុំអហោសកម្ម តែខ្ញុំនឹងចងចាំ ហើយចាំទុកថា អំពើល្អខ្លះ ធ្វើខុសមនុស្ស គឺគ្មានតម្លៃ ចុងក្រោយយើងខ្លួនឯងអ្នកខកចិត្ត រីករាយឆ្នាំថ្មី»។

លោកក៏បានបង្ហោះសំណេរបន្តទៀតថា «ប៉ះពាល់ផ្លូវចិត្តខ្លាំង តែខ្ញុំរឹងមាំបាន តែខ្ញុំខឹងខ្លួនឯង ទន់ជ្រាយភ្នែកទន់ពេក យំដូចកូនក្មេង យ៉ាប់មែនកូននេះ តែជឿខ្ញុំ ខ្ញុំពិតជាស្មោះត្រង់ និងទុកចិត្តមនុស្សជុំវិញខ្លួនណាស់ ព្រោះគិតថាខ្ញុំតែងតែធ្វើខ្ញុំនឹងជួបអ្នកល្អ តែខ្ញុំល្ងង់ ចង់ទះកំផ្លៀងខ្លួន ចោះត្រចៀកឱ្យចាំ តែហោចណាស់ ខ្ញុំបានជួបមនុស្សស្រលាញ់ខ្ញុំជាខ្ញុំ ចាត់ទុកថាជាក្តីសុខ មួយហើយ.»។

អ្វីដែលធ្វើឱ្យអ្នកគាំទ្រព្រួយបារម្ភគឺសំណេរមួយបង្ហាញពីក្តីទុក្ខយ៉ាងខ្លាំងថែមទាំងចង់ចាកចេញពីពិភពលោកនេះ។ ប៉ីប៉ី ឌី បានបង្ហោះថា «មនុស្សដែលស្លាប់បាត់ តើពិតជាផុត ទុក្ខមែនអត់?»។

គួរបញ្ជាក់ផងដែរថា ប៉ីប៉ី ឌី ត្រូវបានចាត់ទុកថាជោគជ័យលើអាជីពសិល្បៈរួមទាំងមុខរបរផ្ទាល់ខ្លួនមានទាំងឡាន មានផ្ទះវីឡារ មានកេរ្តិ៍ឈ្មោះបានជួយសង្គមឱ្យច្រើន រួមទាំងមានហ្វេនៗមួយគំនរ។ យ៉ាងណាមិញ ដ្បិតតែមានចំណុចជាច្រើន ប៉ីប៉ី ឌី មិនទាន់សមប្រកបនឹងស្នេហានោះទេជារឿយៗបានជួបនឹងការខកចិត្តនិងស្នេហាមិនស្មោះត្រង់៕