ថ្មីៗនេះមានវីដេអូ និងរូបភាពបង្ហាញឱ្យដឹងថាតារាចម្រៀងល្បីឈ្មោះ ជី ដេវីត បានចាប់ផ្តើមចូលរៀនស្រូបយកចំណេះវិជ្ជាបន្ថែមទៀតទៅលើភាសាបាលី-សំស្ក្រឹត ខណៈលោកក៏មានសេចក្តីជ្រះថ្លាក្នុងវិស័យពុទ្ធសាសនាធ្លាប់បួសជាព្រះសង្ឃនាពេលកន្លងមកផង។
ពាក្យថារៀនគឺរៀនមិនចេះចប់ទេទោះស្ថិតក្នុងវ័យណា ឋានៈណាក៏ដោយក៏អាចរៀនបានដែរប្រសិនជាមានចិត្តចង់ចេះចង់ដឹងមិនទាន់ហួសពេលនោះទេ។ តួយ៉ាងដូចជាតារាចម្រៀង ជី ដេវីត ជាដើមដ្បិតតែរស់នៅផ្ទះធំទ្រនំខ្ពស់ ការងារសិល្បៈក៏ជោគជ័យ មានលុយចាយពេញៗដៃក៏តារាប្រុសរូបនេះមិនហត់នឿយនឹងស្រូបចំណេះវិជ្ជាបន្ថែមនៅក្នុងជីវិតផងដែរ។
ថ្មីៗនេះនៅលើបណ្តាញសង្គមមានវីដេអូ និង រូបភាពបង្ហាញពីតារាចម្រៀង ជី ដេវីត បានចាប់ផ្តើមចូលសិក្សារៀនសូត្រពីភាសាបាលី-សំស្ក្រឹត នៅពុទ្ធិកវិទ្យាល័យព្រះសុរាម្រឹត ប្រកបដោយស្នាមញញឹម។ បន្ទាប់ពីឃើញសកម្មភាពគួរឱ្យសរសើររបស់ ជី ដេវីត ដូចនេះហើយអ្នកគាំទ្រពោលសរសើរពីតារាចម្រៀងរូបនេះមិនដាច់ពីមាត់។
គួរបញ្ជាក់ផងដែរថា ជី ដេវីត មិនត្រឹមតែដាក់ចិត្តដាក់កាយក្នុងការរៀនភាសាបាលី-សំស្ក្រឹតនោះទេតែកន្លងមកលោកជាតារាប្រុសម្នាក់ដែលមានចិត្តជ្រះថ្លាក្នុងវិស័យព្រះពុទ្ធសាសនា ធ្លាប់សាងផ្នូសបួសជាសង្ឃនៅវត្តល្អាងកង្កែប ឯស្រុកបាណន់ ខេត្តបាត់ដំបង កាលពីខែកក្កដា ឆ្នាំ២០២០ ដោយបានបួសមួយរយៈពេលខ្លីដើម្បីស្វែងយល់ពីព្រះពុទ្ធសាសនា និងជម្រះភាពម៉ងសៅរឿងស្មុគស្មាញទាំងឡាយនៅក្នុងជីវិត៕
