ភេសជ្ជៈសម្រកទម្ងន់ ៥មុខ ដែលណែនាំដោយអ្នកជំនាញជប៉ុន

គន្លឹះក្នុងការសម្រកទម្ងន់គឺ ធ្វើឱ្យប្រសើរឡើងនូវអត្រាមេតាបូលីស ថាមពល និងខ្លាញ់ក្នុងខ្លួនរបស់អ្នក។ ដូច្នេះហើយ ជំនួយដ៏សំខាន់បំផុតមួយគឺភេសជ្ជៈ យោងតាមអ្នកជំនាញជប៉ុន បាននិយាយថា ការទទួលទានភេសជ្ជៈក៏អាចជួយអ្នកឱ្យសម្រកទម្ងន់យ៉ាងមានប្រសិទ្ធភាពផងដែរ ដែលភេសជ្ជៈទាំងនោះមានដូចជា៖

១.កាហ្វេ៖ កាហ្វេ ជួយធ្វើឱ្យឈាមរត់បានល្អ និងជំនួយដល់តម្រងនោម ជួយបង្កើនប្រព័ន្ធមេតាប៉ូលីសមូលដ្ឋាន។ ការផឹកកាហ្វេក្តៅៗពីកន្លះម៉ោងទៅមួយម៉ោងមុនពេលហាត់ប្រាណអាចជួយអ្នកសម្រកទម្ងន់បានយ៉ាងលឿន ជាពិសេសគឺកាហ្វេដែលគ្មានជាតិស្ករ។

២.ទឹកសណ្តែក៖ ទឹកសណ្តែកសម្បូរទៅដោយប្រូតេអ៊ីនដែលមានគុណភាពល្អ ជួយបំបាត់ការអស់កម្លាំង និងធ្វើឱ្យសីតុណ្ហភាពរាងកាយកើនឡើង។ ការទទួលទានទឹកសណ្តែក ១ កែវនៅពេលព្រឹក នឹងជួយបង្កើនអត្រាមេតាបូលីសក្នុងរាងកាយផងដែរ។

៣.សូដា៖ ទឹកសូដាដែលគ្មានជាតិស្ករ អាចជួយពង្រីកសរសៃឈាម រំញោចដំណើរការនៃប្រព័ន្ធរំលាយអាហារ ជួយឱ្យរាងកាយឡើងកំដៅ និងជំរុញលំហូរឈាមបានល្អ។

៤.ទឹកក្តៅឧណ្ណៗ៖ ការផឹកទឹកក្តៅឧណ្ហៗបន្ទាប់ពីភ្ញាក់ពីគេង ធ្វើឱ្យសរីរាង្គខាងក្នុងមានភាពកក់ក្តៅ ដូចជាក្រពះពោះវៀន ជួយឱ្យប្រព័ន្ធឈាមរត់ប្រសើរឡើង អនុញ្ញាតឱ្យរាងកាយដុតបំផ្លាញជាតិខ្លាញ់កាន់តែមានប្រសិទ្ធភាព និងធ្វើឱ្យការសម្រកទម្ងន់កាន់តែងាយស្រួល។

៥.ទឹកដោះគោក្តៅ៖ ការទទួលទានទឹកដោះគោក្តៅៗមុនចូលគេង ជួយឱ្យអ្នកគេងលក់ស្រួល ព្រោះទឹកដោះគោសម្បូរទៅដោយអាស៊ីតអាមីណូ ដែលជំនួយឱ្យប្រព័ន្ធរំលាយអាហារដំណើរការកាន់តែប្រសើរឡើង នឹងធ្វើឱ្យរាងកាយបញ្ចេញអរម៉ូនលូតលាស់បានល្អ៕ ប្រភព៖sanook