មកស្គាល់កោះមួយ ប្រៀបបានជាឋានសួគ៌ក្រោមមេឃ កំពុងលាក់ខ្លួននៅកណ្តាលសាគរដ៏ធំល្វឹងល្វើយក្នុងខេត្តកោះកុង

កោះម្នាស់ ស្ថិតនៅក្នុងទឹកដីខេត្តកោះកុង ដោយភ្ញៀវទេសចរណ៍ត្រូវធ្វើដំណើរពីភ្នំពេញតាមបណ្តោយផ្លូវជាតិលេខ៤ ប្រហែល៥ម៉ោង ឆ្ពោះទៅខេត្តកោះកុង បត់ឆ្វេងទៅកំពង់ផែកោះស្តេច មានផ្លូវបំបែកឆ្វេងទៅកំពង់ផែទូកក្តោងតារាសាគរ និងជិះទូកប្រហែល២០នាទី ទើបទៅដល់កោះមួយនេះ។ថ្វីបើកោះនេះមានទេសភាពស្រស់ស្អាតគួរឱ្យគយគន់ មានទឹកសមុទ្រថ្លាដូចកញ្ចក់ ឆ្នេរខ្សាច់សក្បុស ដើមដូងដុះទេរចេញពីឆ្នេរសមុទ្រ ខ្យល់បរិសុទ្ធ មុជទឹកមើលផ្កាថ្ម ស្ទូចត្រី ផឹកដូងត្រជាក់ដល់បេះដូងក្តី​ ក៏ប៉ុន្តែកោះនេះហាក់មិនសូវមានភ្ញៀវទេសចរណ៍មកកម្សាន្តច្រើននោះទេ។

នៅទីនេះភ្ញៀវទេសចរណ៍អាចសម្រាកបោះតង់បាន និងអាចជួលទូកអ្នកនេសាទ ធ្វើដំណើរកម្សាន្តស្ទួចត្រី ឬគយគន់ថ្ងៃលិចបានផងដែរ។

ជាមួយនឹងសម្រស់ដ៏ស្អាត និងធនធានធម្មជាតិដ៏សម្បូរបែប កោះនេះ ត្រូវបានរដ្ឋបាលខេត្តកោះកុង ចុះកិច្ចព្រមព្រៀងជាមួយក្រុមហ៊ុនឯកជន ដើម្បីអភិវឌ្ឍន៍កោះមួយនេះ យក្លាយជាតំបន់សម្រាកលំហែកម្សាន្តប្រណិតបែបអេកូទេសចរណ៍តំបន់ឆ្នេរសមុទ្រប្រចាំខេត្តកោះកុង៕

រូបភាពដោយ៖ CHAN