លោក អួ គីមសាល អតីតបេក្ខជន Cambodian Idol រដូវកាលទី៣ បានថ្លែងប្រាប់ KBN News តាមសារអេឡិចត្រូនិច បញ្ជាក់ពីសុខភាពរបស់ខ្លួនថាពេលនេះលោកបានធូរស្បើយពីជំងឺរលាកស្រោមខួរក្បាលហើយក្រោយពីព្យាបាលមួយរយៈ។ ការព្យាបាលជំងឺនេះគឺលោកអរគុណជាពិសេសដល់សប្បុរសជននានាដែលបានជួយឧបត្ថម្ភលោកកន្លងមកពេលដឹងថាលោកធ្លាក់ខ្លួនឈឺ។
ប្រិយមិត្តមួយចំនួនជ្រាបមកហើយថា កាលពីខែមេសា ឆ្នាំ២០២៣ អតីតបេក្ខជន Cambodian Idol រដូវកាលទី៣ អួ គីមសាល ធ្វើឱ្យអ្នកលេងបណ្តាញសង្គមបង្ហាញក្តីអាណិតអាសូរយ៉ាងខ្លាំងក្រោយពីបងស្រីរបស់លោកទម្លាយវីដេអូ និងរូបភាព លោកធ្លាក់ខ្លួនឈឺធ្ងន់មានជំងឺ depression រឿងការងារ រហូតវិវត្តន៍ទៅជាជំងឺរលាកស្រោមខួរក្បាលធ្ងន់ធ្ងរ ខណៈគ្រួសារអស់លទ្ធភាពព្យាបាលទើបដាច់ចិត្តសុំជំនួយពីសប្បុរសជន។
យ៉ាងណាមិញ បន្ទាប់ពីទទួលបានដំណឹងនេះមានសប្បុរសជនជាច្រើន បានចូលរួមបរិច្ចាគឱ្យលោកគ្រាន់មានថវិកាខ្លះជួយព្យាបាលជំងឺ។ បន្ទាប់ពីមានប្រាក់ ហើយសម្រាកព្យាបាលជំងឺបានមួយរយៈពេលនេះស្ថានភាពជំងឺ អួ គីមសាល បានធូរស្បើយច្រើនហើយ។
ថ្លែងប្រាប់ KBN News ដោយក្តីសប្បាយចិត្ត តាមសារអេឡិចត្រូនិចកាលពីពេលថ្មីៗនេះ អួ គីមសាល បានឱ្យដឹងថាជំងឺរបស់លោកបានធូរស្បើយច្រើនហើយ ប៉ុន្តែមិនទាន់អាចបំពេញការងាររកប្រាក់មកផ្គត់ផ្គង់គ្រួសារនៅឡើយទេ។ ជាមួយគ្នានេះ អួ គីមសាល មិនភ្លេចអរគុណដល់សប្បុរសជនដែលបានជួយលោកកន្លងមក ដែលបានបរិច្ចាគឱ្យលោកទើបលោកមានថវិកាទៅមន្ទីរពេទ្យព្យាបាល។
គួរបញ្ជាក់ផងដែរថា បច្ចុប្បន្ន អួ គីមសាល កំពុងរស់នៅស្រុកកំណើតនាខេត្តបាត់ដំបងជាមួយគ្រួសារ។ បន្ទាប់ពីស្ថានភាពធូរស្បើយ អតីតបេក្ខជន Cambodian Idol រូបនេះក៏បានបង្ហើរសំឡេងបង្ហោះនៅលើបណ្តាញសង្គមផ្ទាល់ខ្លួនផងដែរ៕
