អ្នកលេងបណ្តាញសង្គមវែកញែកព្រាតរឿងម្ចាស់ពាន លីម តិចម៉េង ហាក់មិនមានបទល្បីផ្ទុះកក្រើកខ្លាំង

នៅលើបណ្តាញសង្គមទិកតុកផ្ទុះការវែកញែកមិនធម្មតាជុំវិញរឿងម្ចាស់ពាន លីម តិចម៉េង ហាក់មិនមានបទផ្ទុះកក្រើកខ្លាំង ក្នុងនាមជាម្ចាស់ពានមួយរូប ដោយអ្នកខ្លះក៏បានលើកឡើងថា សឹងតែទាំងអស់ហើយដែលម្ចាស់ពានមិនល្បី មិនមានបទផ្ទុះកក្រើក។ រីឯអ្នកខ្លះទៀតបានលើកឡើងថា កុំប្រៀបធៀបគ្នារវាង លីម តិចម៉េង និងតារាចម្រៀងផ្សេងទៀតមិនមែនជាម្ចាស់ពាន ព្រោះសមត្ថភាពអ្នកទាំងពីរមានម្យ៉ាងម្នាក់ ទោះបីជាមិនមានបទផ្ទុះកក្រើកខ្លាំងមែនតែ តិចម៉េង មាន Event ជាប់រហូតសឹងតែរកពេលសម្រាកគ្មាន។

គិតមកទល់នេះ តារាចម្រៀង លីម តិចម៉េង ក្លាយជាម្ចាស់ពានជាង៩ខែហើយ ព្រមទាំងបានចេញបទចម្រៀងជាច្រើនបទនៅក្នុងផលិតកម្មរស្មីហង្សមាស ព្រមទាំងមានកម្មវិធីប្រគំតន្ត្រីមិនចេះដាច់រហូតអាចមានសមត្ថភាពទិញរថយន្តស៊េរីទំនើបដោយញើសឈាមខ្លួនឯង។ដ្បិតថាម្ចាស់ពាន Cambodian Idol រដូវកាលទី៤ រូបនេះបានចេញបទចម្រៀងលើទីផ្សារច្រើនបទក្តីប៉ុន្តែហាក់មិនសូវផ្ទុះកក្រើកខ្លាំងនោះទេ រហូតមានការវែកញែកនៅលើបណ្តាញសង្គមជាច្រើនពីបញ្ហានេះ។ មិនត្រឹមតែប៉ុណ្ណោះក៏មានការប្រៀបធៀបបទម្ចាស់ពាន ទៅនឹងបទចម្រៀងដែលមិនមែនជាម្ចាស់ពានហាក់មានការផ្ទុះកក្រើកជាង។

អ្នកលេងបណ្តាញសង្គម បានលើកឡើងថា «តិចម៉េងទាំងអត្តចរិត ប្រជាប្រិយ ទាំងសំឡេងក៏មិនអន់ដែរ សំខាន់លើបទដែលគេចេញឱ្យគាត់, គាំទ្រទាំង២តែយើងត្រូវរៀនទទួលស្គាល់ការពិតសមត្ថភាពរបស់ តិចម៉េង ពិតជានៅក្រោម ភិទិ មែនទាំងបច្ចេកទេសច្រៀងទាំងសម្លេង ភិទិ គឺល្អជាងសូម្បីតែគណៈកម្មការក៏និយាយដែរ , បង ភិទិ ច្រៀងពីរោះជាងបងតិចម៉េង តែបងតិចម៉េងអាចឆក់យកបេះដូងរបស់មហាជនជាងបងភិទិ នេះជាមូលហេតុដែលគាត់ឈ្នះ, កុំយកមកប្រៀបធៀបសំឡេងពីរោះម្យ៉ាងម្នាក់សំខាន់ការងាររាល់ថ្ងៃរកពេលដេកគ្មានផង»។ ចំណែកអ្នកខ្លះទៀតបានលើកឡើងថា «គាត់មិនមែននិពន្ធបទខ្លួនឯងណាអាស្រ័យលើគេនិពន្ធឱ្យគាត់ច្រៀងតើគាត់ត្រូវតែច្រៀងទោះល្បីឬមិនល្បីក៏មិនអីដែលនៅតែមានអ្នកគាំទ្រគាត់ចឹង, មិនអីទេទោះគាត់គ្មានបទល្បីក៏ដោយសំខាន់ឱ្យ តែមានអ៊ីវិនពេញៗរាល់ខែ, ម្ចាស់ពានគ្នារកពេលសម្រាកគ្មាន មួយខែៗតារាងការងារពេញៗ, ពានគេលែងគិតហើយ សំខាន់បទពីរោះល្បី, ស្រលាញ់១ណាស្តាប់១នឹងទៅបងកុំប្រៀបធៀបគាត់ធ្វើអី»។

ទោះយ៉ាងណា នេះគ្រាន់តែជាការលើកឡើងរបស់អ្នកលេងបណ្តាញសង្គមប៉ុណ្ណោះដោយសារតែគេសង្កេតឃើញថា តិចម៉េង ជាម្ចាស់ពាន មិនសូវមានបទផ្ទុះកក្រើកខ្លាំង តែប្រជាប្រិយភាពរបស់តារាចម្រៀងទាំងពីររូបសុទ្ធតែមានហ្វេនគាំទ្ររាងៗខ្លួន។ ចំណែកឯសមត្ថភាពទៀតសោតរិតតែមិនអាចប្រៀបធៀបគ្នាឡើយ ព្រោះទឹកដមសំឡេងមនុស្សម្នាក់ៗមានតាមបែបផែនផ្សេងៗគ្នា៕