បុគ្គល កាន់ ចមផ្លាំង គឺជា Influencer ថៃដែលល្បីល្បាញខាងជ្រៀតជ្រែកការងារព្រំដែនកម្ពុជា-ថៃ និងតែងតែមានវត្តមាននៅព្រំដែនជាមួយកងទ័ពថៃ ដោយធ្វើសកម្មភាពញុះញង់ជាច្រើន ប៉ុន្តែគ្មានថ្នាក់ដឹកនាំថៃ ឬក្រសួងណាមួយហាមឃាត់សកម្មភាពរបស់បុគ្គលនេះទេ ទើបបានដៃកាន់តែខ្លាំងបន្ទាប់ពីតាំងខ្លួនឯងជាអ្នកស្នេហាជាតិ ។ កាលពីព្រឹកថ្ងៃទី៧ ខែមេសា ឆ្នាំ២០២៦ អតីតអ្នកនយោបាយថៃបានដាក់លិខិតទៅក្រសួងការពារជាតិឱ្យបណ្តេញ កាន់ ចមផ្លាំង ចេញពីព្រំដែនកម្ពុជា-ថៃ បន្ទាប់ពីមើលឃើញថា គ្មានតួនាទីសំខាន់ និងធ្វើសកម្មភាពជ្រៀតជ្រែកការងារកងទ័ព ។

សារព័ត៌មានថៃ Naewna News រាយការណ៍ថា កាលពីម៉ោង១១ព្រឹក ថ្ងៃទី៧ ខែមេសា លោក ស៊ុនធិយ៉ា សាវ៉ាត់ឌី អតីតអ្នកនយោបាយ និងអតីតទីប្រឹក្សាគណៈកម្មាធិការច្បាប់ យុត្តិធម៌ និងសិទ្ធិមនុស្ស បានដាក់លិខិតទៅក្រសួងការពារជាតិឱ្យបណ្តេញ កាន់ ចមផ្លាំង ចេញពីព្រំដែនកម្ពុជា-ថៃ និងបញ្ឈប់ការគាំទ្ររាល់សកម្មភាពរបស់បុគ្គលនេះ ។ លោកស្នើឱ្យក្រសួងការពារជាតិត្រួតពិនិត្យការចាយវាយប្រាក់មូលនិធិ និងហាមឃាត់ Influencer មកជ្រៀតជ្រែតប្រតិបត្តិការរបស់កងទ័ព ។

អតីតអ្នកនយោបាយរូបនេះស្នើឱ្យក្រសួងការពារជាតិឈប់គាំទ្រ ឬឈប់ជំរុញសកម្មភាពរបស់ កាន់ ចមផ្លាំង ដែលគ្មានប្រយោជន៍សម្រាប់ប្រទេសជាតិ និងពលរដ្ឋ ព្រមទាំងហាមឃាត់បុគ្គលនេះកុំឱ្យជ្រៀតជ្រែកការងារកងទ័ពនៅតាមបណ្តោយព្រំដែនកម្ពុជា-ថៃ ។

ខ្លឹមសារលិខិតដែលដាក់ទៅក្រសួងការពារជាតិ បញ្ជាក់ថា កាន់ ចមផ្លាំង បានប្រមូលប្រាក់មូលនិធិពីពលរដ្ឋ ដោយប្រាប់ថា យកទៅជួយជនរងគ្រោះដោយសារគ្រោះមហន្តរាយធម្មជាតិ និងជួយជនក្រីក្រ ។ បុគ្គលនេះបានបង្ហាញសកម្មភាពក្នុងបណ្តាញសង្គម និងបង្កើតហ្វេសប៊ុកផេកចែកចាយផលិតផល ដែលធ្វើឱ្យប៉ះពាល់ផលប្រយោជន៍រវាងតួនាទីជាប្រធានប្រាក់មូលនិធិ និងផលប្រយោជន៍ផ្ទាល់ខ្លួន ។

ក្រៅពីនេះ កាន់ ចមផ្លាំង បានឈរជាមួយកងទ័ពថៃមួយក្រុមនៅតំបន់ព្រំដែនកម្ពុជា-ថៃ និងបញ្ចេញឥរិយាបថ និយាយពាក្យសម្តីមិនសមរម្យដាក់មន្ត្រីកងទ័ពកម្ពុជានៅច្រកទ្វារព្រំដែនថ្មដា កាលពីថ្ងៃទី២៦ ខែមីនា ដែលធ្វើឱ្យប៉ះពាល់ដល់វិន័យកងទ័ព។ ការបង្ហាញឥរិយាបថមិនសមរម្យនៅចំពោះមុខសាធារណជនបែបនេះ មិនគួរកើតឡើងទេ ។

អតីតអ្នកនយោបាយថៃស្នើឱ្យត្រួតពិនិត្យប្រាក់មូលនិធិដែល កាន់ ចមផ្លាំង ប្រមូលពីពលរដ្ឋ ថាយកទៅធ្វើផ្លូវ តម្រៀបទូរកុងទឺន័រ ឬធ្វើសកម្មភាពនៅព្រំដែន តើបុគ្គលនេះបានចំណាយប្រាក់ត្រូវខ្ទង់ដែរឬទេ? និងមានរបាយការណ៍ចំណូល ចំណាយត្រឹមត្រូវឬអត់? លោកថា បច្ចុប្បន្ន ថៃបណ្តោយឱ្យពលរដ្ឋ និងបុគ្គលគ្មានតួនាទីទៅធ្វើសកម្មភាពនៅព្រំដែនកម្ពុជា-ថៃ រហូតមានជម្លោះពាក្យសម្តីជាមួយមន្ត្រីកងទ័ពកម្ពុជា ។ លើសពីនេះ បុគ្គលនេះបានលូកដៃក្នុងការងាររបស់រដ្ឋាភិបាល ជ្រៀតជ្រែកការងារកងទ័ព ដែលប៉ះពាល់ការគ្រប់គ្រងសន្តិសុខក្នុងតំបន់ ។

សំណើ ៣ចំណុចទៅកាន់រដ្ឋមន្ត្រីក្រសួងការពារជាតិ រួមមាន ៖

១-បញ្ឈប់ការគាំទ្រ ឬបញ្ឈប់សកម្មភាពទាំងអស់របស់ កាន់ ចមផ្លាំង ពាក់ព័ន្ធនឹងកងទ័ពនៅព្រំដែនកម្ពុជា-ថៃ ជាពិសេស បញ្ឈប់ឥរិយាបថមិនសមរម្យ ដូចជា ៖ ជម្លោះពាក្យសម្តី ឬបញ្ចេញមតិយោបល់អ្វីនៅព្រំដែន
២-ត្រួតពិនិត្យការចំណាយប្រាក់មូលនិធិរបស់ កាន់ ចមផ្លាំង ថា តើចំណាយត្រូវខ្ទង់ដែរឬទេ និងត្រឹមត្រូវតាមច្បាប់ឬអត់
៣-ឱ្យកងទ័ពជាអ្នកបំពេញតួនាទីនៅព្រំដែន និងហាមបុគ្គលគ្មានតួនាទីចូលជ្រៀតជ្រែកការងារកងទ័ព ឬការងាររដ្ឋាភិបាល ។

គួរបញ្ជាក់ថា មន្ត្រីក្រសួងការពារជាតិបានទទួលយកលិខិតរបស់លោក ស៊ុនធិយ៉ា អតីតអ្នកនយោបាយ ដើម្បីរាយការណ៍ទៅមន្ត្រីគ្រប់លំដាប់ថ្នាក់ពិចារណាចាត់វិធានការបន្តទៀត ប៉ុន្តែមិនដឹងថា តើក្រសួងការពារជាតិថៃនឹងមានចំណាត់ការបែបណាចំពោះ Influencer រូបនេះ ៕

ស្មារតីជាតិនិយមកើនឡើងលើសពីការភ័យខ្លាច! ខណៈដែលសហរដ្ឋអាមេរិកប្រកាសថានឹងកម្ទេចប្រទេសអ៊ីរ៉ង់ រួមទាំងប្រជាជាតិអ៊ីរ៉ង់ទាំងមូលចោលក្នុងពេលមួយយប់ ប្រជាជនអ៊ីរ៉ង់ប្រមាណជាង ១៤ លាននាក់ ត្រូវបានរាយការណ៍ថា បានត្រៀមខ្លួនរួចស្រេចដើម្បីបូជាជីវិត ខណៈមានមនុស្សរាប់ម៉ឺនរាប់សែននាក់នៅក្នុងទីក្រុងធំៗមួយចំនួននៃប្រទេសនេះ បានមកឈរប្រមូលផ្ដុំនៅជុំវិញរោងចក្រថាមពល ជាមួយនឹងការបញ្ជាក់ដ៏អង់អាចថា បើគង់តែត្រូវស្លា.ប់ដដែល ពួកគេសុខចិត្តស្លា.ប់ដើម្បីការពារសាធារណរដ្ឋឥស្លាមមួយនេះ។

យោងតាមការបង្ហោះរបស់អតីតប្រធានាធិបតីទី៩ របស់ប្រទេសអ៊ីរ៉ង់ លោក Masoud Pezeshkian នៅលើបណ្ដាញសង្គម X បានឲ្យដឹងថា រហូតមកដល់ពេលនេះ ជនជាតិអ៊ីរ៉ង់ដែលមានមោទនភាពជាង ១៤ លាននាក់បានចុះឈ្មោះលះបង់ជីវិតរបស់ពួកគេដើម្បីការពារប្រទេស។ លោកបន្ថែមថា ខ្លួនលោកផ្ទាល់ក៏នឹងនៅទីនេះជាដរាបដើម្បីលះបង់ជីវិតសម្រាប់ជាតិផងដែរ។

ដោយឡែកបើយោងតាមបាយការណ៍របស់សារព័ត៌មានធំៗដូចជា CNN, BBC, Al Jazeera និង The Guardian ក៏បានបង្ហាញដែរថា យុវជនអ៊ីរ៉ង់ដែលរួមមានទាំងនិស្សិត អត្តពលិក វិចិត្រករ និងប្រជាជនគ្រប់លំដាប់ថ្នាក់ បានប្រមូលផ្តុំគ្នាជា «ច្រវ៉ាក់មនុស្ស» នៅជុំវិញរោងចក្រថាមពល និងទីតាំងសំខាន់ៗមួយចំនួន។ នៅក្នុងទីក្រុងធំៗដូចជា តេអេរ៉ង់ តាប្រ៊ីស និងដេសហ្វុល ហ្វូងមនុស្សរាប់ម៉ឺននាក់បានឈរគ្រវីទង់ជាតិដោយឈរស្មាទល់នឹងស្មា ដែលជានិមិត្តរូបនៃការការពារកន្លែងដែលពួកគេជឿថាអាចត្រូវបានកំណត់គោលដៅដោយការវា.យប្រហាររបស់សហរដ្ឋអាមេរិក។

ចលនានេះធ្វើឡើងបន្ទាប់ពីការព្រមានរបស់លោក ត្រាំ ថាសហរដ្ឋអាមេរិកអាចបំផ្លាញហេដ្ឋារចនាសម្ព័ន្ធរបស់អ៊ីរ៉ង់ ជាពិសេសនឹងឈានដល់ ការរំលា.យ “អរិយធម៌ទាំងមូលរបស់អ៊ីរ៉ង់ឲ្យស្លា.ប់នៅយប់នេះ” ប្រសិនបើមិនមានកិច្ចព្រមព្រៀងណាមួយត្រូវបានសម្រេច។ នេះគឺជាសញ្ញាព្រមានទៅកាន់អាម៉េរិកថា ប្រសិនបើការវាយប្រហារពិតជាកើតឡើងមែននោះ វានឹងក្លាយជាសង្រ្គាមបង្ហូរឈាមដ៏យូរអង្វែងមួយ ដោយសារតែស្មារតីតស៊ូរបស់ប្រជាជនអ៊ីរ៉ង់ដែលមិនខ្លាចស្លាប់ដើម្បីការពារទឹកដីរបស់ខ្លួន។

ទោះជាយ៉ាងណាក៏ដោយ គិតមកត្រឹមថ្ងៃពុធ ទី៨ ខែមេសា នេះស្ថានភាពហាក់ធូរស្រាលបានបន្តិច ក្រោយសហរដ្ឋអាមេរិកយល់ព្រមទទួលយកបទឈប់បា.ញ់រយៈពេល ២សប្ដាហ៍ ក្រោយពេលអ៊ីរ៉ង់យល់ព្រមបើកឡើងវិញនូវច្រកហ័រមូស។ លទ្ធផលចុងក្រោយនេះ មិនត្រឹមតែល្អសម្រាប់ប្រជាជាតិអ៊ីរ៉ង់ប៉ុណ្ណោះទេ តែក៏ជាដំណឹងល្អសម្រាប់ពិភពលោកទាំងមូលផងដែរ។

ប្រសិនបើបទឈប់បា.ញ់រយៈពេល ២សប្ដាហ៍នេះ ត្រូវបានភាគីទាំងពីរគោរពតាមបានដោយជោគជ័យ នោះការបញ្ចប់សង្រ្គាមជាអចិន្រ្តៃយ៍ ក៏លែងជារឿងដែលឆ្ងាយមិនទៅរួចទៀតដែរ។ ស្របពេលជាមួយគ្នានេះ គេរំពឹងថាតម្លៃប្រេងអាចនឹងធ្លាក់ចុះមកវិញក្នុងពេលឆាប់ៗ ក្រោយការបើកឡើងវិញនៃច្រកសមុទ្រហ័រមូស៕

យោងតាមរបាយការណ៍ថ្មីៗនេះដែលដកស្រង់សម្តីអ្នកជំនាញដែលថ្លែងទៅកាន់សារព័ត៌មាន Fox News បានអះអាងថា អ៊ីរ៉ង់កំពុងប្រើប្រាស់បច្ចេកវិទ្យាមីស៊ីលបាលីស្ទិក អាវុ.ធ និងប្រពន្ធ័ការពារទំនើបៗជាច្រើនទៀត ដែលទទួលបានមកពីកូរ៉េខាងជើងផ្លោងទៅលើមូលដ្ឋានយោធាសហរដ្ឋអាមេរិក ក៏ដូចជាប្រតិបត្តិការជាបន្តបន្ទាប់ប្រឆាំងនឹងអ៊ីស្រាអែល។

តាមលោក Bruce Bechtol សាស្ត្រាចារ្យវិទ្យាសាស្ត្រនយោបាយដែលទទួលស្គាល់ជាសកលលើបញ្ហាយោធា និងនយោបាយកូរ៉េខាងជើង បានប្រាប់ Fox News ថា “កូរ៉េខាងជើងជាអ្នកលក់ ហើយអ៊ីរ៉ង់ជាអ្នកទិញ” ដោយពន្យល់ថា ទីក្រុងព្យុងយ៉ាងបានផ្គត់ផ្គង់គ្រឿងបន្លាស់សព្វាវុធ និងប្រព័ន្ធមីស៊ីលជាយូរមកហើយជាថ្នូរនឹងសាច់ប្រាក់ និងប្រេងពីអ៊ីរ៉ង់។

អ្នកជំនាញរូបនេះបានបញ្ជាក់ទៀតថា អាវុធទាំងនេះមិនមែនជាអាវុធសម្ងាត់នោះទេ ដោយពួកវាមួយចំនួនមានតាំងពីរាប់ទសវត្សរ៍មុន ពោលគឺកូរ៉េខាងជើងនិងអ៊ីរ៉ង់ មានសមត្ថភាពគ្រប់គ្រងលើអាវុធទាំងនេះតាំងពីឆ្នាំ ២០០៥ មកម្ល៉េះ។

បញ្ហានេះកំពុងទទួលការចាប់អារម្មណ៍យ៉ាងខ្លាំងបន្ទាប់ពីមានរបាយការណ៍ថា អ៊ីរ៉ង់បានបាញ់មីស៊ីលផ្លោងទៅកាន់មូលដ្ឋានយោធារួមគ្នារវាងសហរដ្ឋអាមេរិក និងចក្រភពអង់គ្លេសនៅមហាសមុទ្រឥណ្ឌាក្នុងអំឡុងសង្គ្រាមបច្ចុប្បន្ន។ ខណៈពេលដែលការវាយប្រហារមិនបានវាយចំគោលដៅរបស់ខ្លួន មន្ត្រី និងអ្នកវិភាគអាមេរិកបាននិយាយថា វាបង្ហាញពីសមត្ថភាពវាយប្រហាររយៈចម្ងាយឆ្ងាយដែលកំពុងកើនឡើងរបស់អ៊ីរ៉ង់ ដែលមានខ្លះអាចជាប់ទាក់ទងនឹងការរចនារបស់កូរ៉េខាងជើង។

ទោះជាយ៉ាងណាក៏ដោយ មិនមែនចារកម្មទាំងអស់ស្របនឹងការអះអាងទាំងនេះទេ។ ការវាយតម្លៃដាច់ដោយឡែកពីគ្នាដែលរាយការណ៍ដោយ Reuters បានបង្ហាញថា កូរ៉េខាងជើងអាចនឹងកំពុងរក្សាគម្លាតពីអ៊ីរ៉ង់ ហើយនៅក្នុងសង្រ្គាមថ្មីៗនេះពួកគេមិនទាន់បានបញ្ជូនអាវុធ ឬជំនួយណាមួយដែលត្រូវបានបញ្ជាក់ទៅកាន់អ៊ីរ៉ង់ឡើយ។

ភាពផ្ទុយគ្នានេះបង្ហាញពីភាពមិនប្រាកដប្រជាជាបន្តបន្ទាប់អំពីវិសាលភាពនៃកិច្ចសហប្រតិបត្តិការរបស់សម្ព័ន្ធមិត្តទាំងពីរ ទោះបីជាសង្គ្រាមរវាងអ៊ីរ៉ង់ អ៊ីស្រាអែល និងសហរដ្ឋអាមេរិកនៅតែបន្តកើនឡើងក៏ដោយ៕

គ្រាន់តែជម្លោះនៅមជ្ឈិបបូព៌ារយៈពេលជាងមួយខែបានបង្ខំឲ្យពិភពលោកទាំងមូលធ្លាក់ក្នុងវិបត្តិខ្វះខាតប្រេងឥន្ធនៈ និងប្រេងឡើងថ្លៃ ធ្វើឲ្យមនុស្សម្នារជួបទុក្ខលំបាក ប៉ះពាល់ជីវភាពយ៉ាងនេះទៅហើយ តែមានធ្លាប់ស្រមៃឬអត់ថា ចុះប្រសិនបើពិភពលោកទាំងមូលអស់ប្រេងប្រើទៀត? នោះតើមនុស្សទាំងអស់នឹងត្រូវរស់នៅ និងប្រកបរបរចិញ្ចឹមជីវិតដោយរបៀបណា?

យោងតាមអង្គការថាមពលធំៗដូចជាទីភ្នាក់ងារថាមពលអន្តរជាតិ និងរដ្ឋបាលព័ត៌មានថាមពលសហរដ្ឋអាមេរិក មនុស្សមិនត្រូវបានគេរំពឹងថានឹង “អស់ប្រេង” ភ្លាមៗក្នុងពេលឆាប់ៗនេះទេ។ តាមការប៉ាន់ស្មានរបស់អ្នកជំនាញបានបង្ហាញថា ទុនបំរុងប្រេងសកលដែលបានបញ្ជាក់អាចមានរយៈពេលជាច្រើនទសវត្សរ៍តទៅមុខ ដែលជារឿយៗត្រូវបានលើកឡើងថាអាចនៅចន្លោះពី 40-50 ឆ្នាំទៀតបើមើលតាមអត្រាប្រើប្រាស់បច្ចុប្បន្ន។

ស្ដាប់ទៅដូចជាវានៅសល់រយៈពេលយូរទៀតមែនទេ? ប៉ុន្តែតាមពិតទៅវាកំពុងតែខិតចូលកាន់តែកៀកទៅៗហើយ។ ផ្អែកតាមទិន្នន័យនាពេលបច្ចុប្បន្នប្រេងនឹងកាន់តែពិបាកចម្រាញ់ រីឯថ្លៃដើមក្នុងការផលិតនឹងកាន់តែឡើងថ្លៃតាមពេលវេលា នៅមុនពេលវាឈានដល់ការរីងអស់ទៅវិញទាំងស្រុងពីភពផែនដី។ តែទោះជាយ៉ាងណា ការរកឃើញថ្មីៗ និងបច្ចេកវិទ្យាដែលកាន់តែរីកចម្រើន ដូចជាការខួងយកប្រេងក្នុងសមុទ្រជ្រៅ និងការទាញយកប្រេង shale អាចអូសបន្លាយរយៈពេលដែលប្រេងអាចនៅមានឲ្យប្រើប្រាស់បន្តទៀតបាន។

ទោះជាយ៉ាងណាក៏ដោយ ចំនួននេះមិនថេរឡើយ ដ្បិតវាអាស្រ័យលើតម្រូវការប្រើប្រាស់របស់មនុស្សថាមានការកើនឡើងដែរឬអត់ និងវាអាស្រ័យលើការប្រែប្រួលនៃពេលវេលា។ ហេតុដូចនេះទើបបានជារដ្ឋាភិបាលរបស់ប្រទេសជាច្រើនអំពាវនាវឲ្យប្រជាជនខ្លួនប្រើប្រាស់ប្រេងឥន្ធនៈដោយសន្សំសំចៃ។

បច្ចុប្បន្នប្រទេសជាច្រើន កំពុងចាប់អារម្មណ៍ចំពោះការវិនិយោគលើថាមពលស្អាត និងអាចកកើតឡើងវិញដូចជា ថាមពលព្រះអាទិត្យ និងខ្យល់ ក៏ដូចជាករប្រើប្រាស់យានយន្តអគ្គិសនី ដើម្បីកាត់បន្ថយការបំភាយឧស្ម័ន និងប្រយុទ្ធប្រឆាំងនឹងការប្រែប្រួលអាកាសធាតុ។

ក្រុមអ្នកជំនាញមកពីទីភ្នាក់ងារថាមពលអន្តរជាតិ (IEA) ធ្លាប់បានព្យាករថា ការប្រើប្រាស់ប្រេងនឹងកើនឡើងខ្ពស់បំផុតចុងក្រោយនៅឆ្នាំ២០៣០ ហើយបន្ទាប់មកវានឹងធ្លាក់ចុះមកវិញជាបន្តបន្ទាប់ ដូច្នេះទើបគេគណនាថា បរិមាណប្រេងបច្ចុប្បន្នអាចទ្រទ្រង់សកម្មភាពគ្រប់យ៉ាងរបស់មនុស្សជាមធ្យមបានត្រឹម ៥០ឆ្នាំ ទៀតប៉ុណ្ណោះ។ និយាយឱ្យសាមញ្ញទៅ មនុស្សជាតិទំនងជាមិន “អស់” ប្រេងភ្លាមៗនោះទេ។ ផ្ទុយទៅវិញ ប្រេងនឹងកាន់តែមិនសូវសំខាន់ នៅពេលដែលប្រភពថាមពលស្អាតចូលមកជំនួស។

ដូច្នេះបញ្ហាប្រឈមពិតប្រាកដមិនមែនគ្រាន់តែជាចំនួនប្រេងដែលនៅសល់នោះទេ ប៉ុន្តែតើពិភពលោកអាចផ្លាស់ប្តូរពីការប្រើប្រាស់ប្រេងទៅជាថាមពលប្រកបដោយនិរន្តរភាពលឿនប៉ុណ្ណាសម្រាប់អនាគត៕

របាយការណ៍ចុងក្រោយបង្អស់ទាក់ទងនឹងសង្រ្គាមនៅមជ្ឈិមបូព៌ាបានបង្ហាញថា ប្រទេសអ៊ីរ៉ង់បានយល់ព្រមបើកច្រកសមុទ្រហ័រមូសមកវិញ ក្រោយអាមេរិកយល់ព្រមផ្អាកការវា.យប្រហារលើពួកគេរយៈពេល ២សប្តាហ៍។ នេះអាចចាត់ទុកថាជាដំណឹងដ៏ល្អមួយទោះជាសង្រ្គាមមិនទាន់បញ្ចប់ជាស្ថាពរ ព្រោះថាបន្ទាប់ពីនេះតម្លៃប្រេងអាចនឹងមានការធ្លាក់ចុះ។

យោងតាមសារដែលបានបង្ហោះលើបណ្តាញសង្គម Truth Social របស់ប្រធានាធិបតីអាមេរិក ដូណាល់ ត្រាំ នៅថ្ងៃពុធ ទី៨ ខែមេសា ឆ្នាំ២០២៦ បានបញ្ជាក់ថា៖ អាមេរិកយល់ព្រមផ្អាកការទម្លាក់គ្រាប់បែក និងការវាយប្រហារលើប្រទេសអ៊ីរ៉ង់ ក្នុងរយៈពេលពីរសប្តាហ៍។ នេះនឹងក្លាយជា បទឈប់បាញ់ ទ្វេភាគីសម្រាប់អនុវត្តទាំងសងខាង!។

ស្របពេលជាមួយនឹងការប្រកាសបទឈប់បាញ់២សប្តាហ៍នេះ លោក ត្រាំ ក៏បានទទួលសំណើ ១០ ចំណុចពីអ៊ីរ៉ង់ផងដែរ ដោយលោកជឿជាក់ថា ទាំងនោះគឺជាមូលដ្ឋានដែលអាចយកទៅអនុវត្តបានសម្រាប់ការចរចាដើម្បីបញ្ចប់សង្គ្រាម។ សំណើ១០ចំណុចនោះរួមមាន៖ ១. ការធានាថា អ៊ីរ៉ង់នឹងមិនត្រូវបានវាយប្រហារម្តងទៀតទេ។ ២. ការបញ្ចប់សង្រ្គាមជាស្ថាពរ មិនមែនត្រឹមបទឈប់បាញ់។ ៣. បញ្ឈប់ការវាយប្រហាររបស់អ៊ីស្រាអែលនៅលីបង់។ ៤. លុបចោលរាល់ទណ្ឌកម្មរបស់អាមេរិកលើអ៊ីរ៉ង់។ ៥. បញ្ឈប់ការវាយប្រហារក្នុងតំបន់ប្រឆាំងនឹងសម្ព័ន្ធមិត្តរបស់អ៊ីរ៉ង់។ ៦. ជាការឆ្លើយតប អ៊ីរ៉ង់នឹងបើកច្រកសមុទ្រ Hormuz ឡើងវិញ។ ៧. អ៊ីរ៉ង់នឹងកំណត់យកកម្រៃសេវា ២ លានដុល្លារ ក្នុងមួយនាវា។ ៨. អ៊ីរ៉ង់នឹងបែងចែកប្រាក់ចំណូលទាំងនេះជាមួយប្រទេសអូម៉ង់។ ៩. អ៊ីរ៉ង់នឹងចេញច្បាប់សម្រាប់ការធ្វើដំណើរដោយសុវត្ថិភាពតាមច្រក Hormuz។ ១០. អ៊ីរ៉ង់នឹងប្រើប្រាស់ប្រាក់ចំណូលពីច្រក Hormuz សម្រាប់ការស្តារឡើងវិញ ជំនួសឲ្យការបង់សំណង។

ដោយឡែកបើយោងតាមការចុះផ្សាយរបស់ CNN រដ្ឋមន្ត្រីការបរទេសអ៊ីរ៉ង់ Abbas Araghchi បានប្រកាសថា ក្នុងរយៈពេល២សប្តាហ៍នេះ ច្រក Hormuz នឹងបើកឡើងវិញសម្រាប់ការធ្វើនាវាចរណ៍ដោយសុវត្ថិភាព ប៉ុន្តែបើមានការវាយប្រហារជាបន្ត នោះច្រកនេះនឹងបិទវិញដដែល។ លោកបញ្ជាក់ថា ការបើកច្រកនេះនឹងត្រូវធ្វើឡើង តាមរយៈការសម្របសម្រួលជាមួយកងកម្លាំងប្រដាប់អាវុធរបស់អ៊ីរ៉ង់ និងដោយការពិចារណាឲ្យបានហ្មត់ចត់លើកម្រិតបច្ចេកទេសផ្សេងៗ។

ទន្ទឹមគ្នានេះ ក្រុមប្រឹក្សាសន្តិសុខកំពូលអ៉ីរ៉ង់ ក៏បានទទួលស្គាល់ពីការឈានដល់បទឈបបាញ់ផងដែរ ដោយមានការយល់ព្រមពីមេដឹកនាំកំពូលអ៉ីរ៉ង់ លោក Mojtaba Khamenei ហើយបាន បញ្ជាក់ថាកិច្ចចរចារវាងសហរដ្ឋអាមេរិក និងអ៉ីរ៉ង់នៅចាប់ផ្ដើមនៅថ្ងៃសុក្រសប្ដាហ៍នេះក្នុងទីក្រុងអ៉ីស្លាម៉ាបាដ។ ដោយឡែក ប្រព័ន្ធផ្សព្វផ្សាយអាមេរិក និងអ៉ីស្រាអែល ក៏បានរាយការណ៍ដែរថាអ៉ីស្រាអែលក៏បានយល់ព្រមទទួលយកបទឈប់បាញ់ដែរ៕