សារមន្ទីរ សម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូណ៌ ត្រូវបានធ្វើពិធីបញ្ចុះបឋមសិលា ក្នុងបរិវេណវត្តរាជបូណ៌ ក្រោមអធិបតីភាព សម្តេចមហាបវរធិបតី ហ៊ុន ម៉ាណែត។

គម្រោងសាងសង់សារមន្ទីរ សម្ដេចព្រះព្រហ្មរតនមុនី ពិន សែម គ្រោងថវិកាចំណាយ ជាង១.០៣៩.៦៦០ដុល្លារ មិនរាប់បញ្ចូលការរចនាទូតាំង និងការលំអ ខាងក្នុងអគារ។

សារមន្ទីរនេះ សាងសង់ឡើងដោយប្រើប្រាស់ស្ថាបត្យកម្មរចនាបទខ្មែរ មានទំហំបណ្តោយ ៣៤ម៉ែត្រ ទទឹង២៦,៦ម៉ែត្រ កម្ពស់ពីរជាន់ (ជាន់ផ្ទាល់ដី និង ជាន់ទីមួយ) គូសដោយមន្ត្រីជំនាញអាជ្ញាធរជាតិអប្សរា ដោយមានការឯកភាពពី សម្ដេចព្រះព្រហ្មរតនមុនី ពិន សែម ដោយគ្រោងប្រើប្រាស់រយៈពេលសាងសង់ចំនួន ២៤ខែ។

ការសាងសង់សារមន្ទីរ សម្ដេចព្រះព្រហ្មរតនមុនី ពិន សែម នោះឡើង គឺដើម្បីបំផុសស្មារតីឱ្យសិស្សានុសិស្ស អ្នកស្រាវជ្រាវ ភ្ញៀវទេសចរជាតិ និងអន្តរជាតិ ស្រលាញ់ ថែរក្សា ការពារសម្បត្តិវប្បធម៌ជាតិ លើកតម្កើង ទំនៀមទំលាប់ ប្រពៃណីដ៏ល្អផូរផង់ ព្រមទាំងដើម្បីរក្សាទុកវត្ថុបុរាណសាងពីដីដុត លោហៈ អង្កាំ ឈើ ឆ្អឹង ភ្លុក ថ្ម សរុបប្រមាណ ២៥៧៥វត្ថុ មានអាយុកាលចាប់ពីសម័យបុរេប្រវត្តិ រហូតដល់សម័យក្រោយអង្គរ៕

ថ្មីៗនេះ មហាជនជាច្រើនបានចាប់អារម្មណ៍ទៅលើយុវតីសាយ ស៊ីណា ដែលបានចូលរួមក្នុងកម្មវិធីប្រឡងជ្រើសរើសយុវជនឆ្នើម នៅឯសាលាវិទ្យាល័យព្រៃព្នៅ ខេត្តព្រៃវែង ដែលកាលគ្រានោះ នាងបានច្រៀងបទ «ស្ពានសាងស្នេហ៍» ជាបទនិពន្ធផ្ទាល់ដោយសម្តេចតេជោ ហ៊ុន សែន។

ជាមួយនឹងទឹកដមសំឡេងដ៏ពិរោះរណ្តំរបស់នាងក៏ទទួលបាននូវការកោតសរសើរព្រោងព្រាត ក៏ដូចជាការពេញចិត្តរបស់សម្តេចតេជោទៅលើយុវតីរូបនេះ សម្តេចក៏បានយល់ព្រមតាមសំណើរនាងជួយសាងសង់អគារសិក្សា ១ខ្នង ជាប្រយោជន៍រួមដល់សិស្សានុសិស្ស និងឧបត្ថម្ភប្រាក់ ១៥.០០០ ដុល្លារដល់គ្រួសារយុវតីរូបនេះផងដែរ។

កាលពីថ្ងៃទី ១៨ ខែកក្កដានេះ សម្តេចតេជោ ហ៊ុន សែន បានបង្ហោះសារដែលមានខ្លឹមសារយ៉ាងដូច្នេះថា «កាលពីម្សិលមិញខ្ញុំបានបង្ហោះពីចៅស្រីសាយ ស៊ីណាដែលពេលនោះមិនទាន់ស្គាល់ឈ្មោះនិងទីកន្លែងរស់នៅ។ ខ្ញុំព្យាយាមជួបចៅស្រីតាម telegram ដើម្បីសួរនាំពីការរៀនសូត្រនិងជីវភាពគ្រួសារ ព្រមទាំងបានជួយថវិកាខ្លះសម្រាប់ចៅស្រីនិងឪពុកម្តាយ។ ថ្ងៃនេះលោក អ៊ួន សារ៉ាត់ បានទៅដល់ផ្ទះ ដើម្បីសួរនាំឪពុកម្តាយនិងចៅស្រីព្រមទាំងឲ្យចៅស្រីច្រៀងចម្រៀង ២ បទដោយគ្មានភ្លេង(ច្រៀងគោក) ដែលបទទីមួយ(ស្ពានសាងស្នេហ៍) ឯបទទីពីរ (វណ្ណៈសង្គម)។ ទោះអត់ភ្លេងក៍ចៅនៅតែច្រៀងបានពិរោះ។ តាសូមសរសើរចៅដែលចៅបានផ្ញើសារមកតាសូមស្នើឲ្យតាជួយកសាងអាគារសិក្សា១ខ្នង៣ជាន់ ៣០បន្ទប់ដើម្បីជាប្រយោជន៍រួមរបស់សិស្ស។ តាបានបញ្ជូនសំណើចៅទៅនាយករដ្ឋមន្ត្រីហ៊ុន ម៉ាណែតរួចហើយ។ ចុងក្រោយខ្ញុំថ្លែងអំណរគុណចំពោះបងប្អូនកូនក្មួយ ដែលមកLike ជិតកន្លះលាននាក់ និងចូលមកcomments ជាង២ម៉ឺននាក់ ក្រោយខ្ញុំបង្ហោះបាន១៨ម៉ោង»។

ជាមួយគ្នានោះ លោក សួន សុម៉ាលីន អភិបាលខេត្តព្រៃវែង បានផ្ញើសារគោរពថ្លែងអរគុណជូនចំពោះសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ដែលសម្តេចទាំងទ្វេរបានសម្រេចឧបត្ថម្ភសាលារៀន ១ខ្នង ៣ជាន់ ៣០បន្ទប់ ដល់ទៅវិទ្យាល័យព្រៃព្នៅ និងបានពេញចិត្តនូវទឹកដមសំឡេង របស់យុវសិស្ស សាយ ស៊ីណា ដែលបានច្រៀងចម្រៀងមួយបទ ក្រោមចំណងជើងថា «ស្ពានសាងស្នេហ៍» ដោយបានឧបត្ថម្ភថវិកាដល់យុវសិស្សរូបនេះ និងក្រុមគ្រួសារចំនួន ១៥,០០០ដុល្លារ៕

«ចាស់អ្នក ថ្មីខ្ញុំ» ជាយុទ្ធនាការថ្មីមួយ ហាក់កំពុងទទួលបាននូវការចាប់អារម្មណ៍ខ្លាំងក្នុងចំណោមមហាជន ព្រោះថាយុទ្ធនាការនេះគឺជាការកែច្នៃ ទទួលយករបស់របរចាស់ៗពីអ្នកប្រើប្រាស់ ដើម្បីជាប្រយោជន៍ ផ្គត់ផ្គង់ទៅកាន់អ្នកដែលមានជីវភាពខ្វះខាត។

យុទ្ធនាការ «ចាស់អ្នក ថ្មីខ្ញុំ» ក្រោមគំនិតផ្ដួចផ្ដើមរបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា ដែលបានចាប់អនុវត្តតាំងពីថ្ងៃទី១២ រហូតដល់ថ្ងៃទី៣១ ខែកក្កដា ឆ្នាំ២០២៤ នេះ។

តាមរយៈយុទ្ធនាការនេះ អ្នកទាំងអស់គ្នាគឺអាចធ្វើការបរិច្ចាគនូវសម្ភារ របស់របរចាស់ៗ ដូចជា សម្លៀកបំពាក់ ឬសម្ភារសិក្សា ឬអ្វីក៏ដោយ ដែលពលរដ្ឋឬសិស្សនិស្សិតទូទៅ ឈប់ប្រើហើយ តែនៅមានគុណភាពល្អនិងមានតម្លៃ សម្រាប់យកទៅកែច្នៃឱ្យក្លាយជារបស់របរថ្មី មានប្រយោជន៍សម្រាប់អ្នកដែលត្រូវការ។

ការផ្តល់ឲ្យនេះ អ្នកបរិច្ចាគគ្រប់រូបគឺអាចយកសម្ភារៈ ឬរបរខ្លួន ទៅដាក់ក្នុងធុង នៅតាមទីតាំងនានា ដែលអាជ្ញាធរបានកំណត់ មានស្ទើរតែគ្រប់ទីតាំងក្នុងរាជធានីភ្នំពេញ និងតាមបណ្តាខេត្តដូចជាខេត្តកំពត និងខេត្តបាត់ដំបងជាដើម។

គួរបញ្ជាក់ថា «ចាស់អ្នក ថ្មីខ្ញុំ» ជាកម្មវិធីដ៏ល្អ សម្រាប់ឱ្យប្រជាពលរដ្ឋទាំងអស់ និងគ្រប់ស្រទាប់វណ្ណៈ អាចចូលរួមចំណែកជាមួយសកម្មភាពសប្បុរសសង្គមមនុស្ស និងសង្គមជាតិទាំងមូល ហើយវាក៏ជាបង្ហាញពីវប្បធម៌នៃការចែករំលែក និងសេចក្តីស្រលាញ់ទៅកាន់សាធារណៈជនទូទៅ ក្រោមពាក្យស្លោក«ខ្មែរស្រលាញ់ខ្មែរ ខ្មែរជួយខ្មែរ ខ្មែរមានមោទនភាព»៕

ក្រសួងព័ត៌មាន បាននិងកំពុងរៀបចំសណ្តាប់ធ្នាប់ក្នុងវិស័យសារព័ត៌មាន គុណភាពព័ត៌មាន និងសុវត្ថិភាពព័ត៌មាន ដើម្បីទប់ស្កាត់និងប្រឆាំងព័ត៌មានក្លែងក្លាយ, ការអនុវត្តនិងគោរពក្រម សីលធម៌វិជ្ជាជីវៈ ឱ្យបានត្រឹមត្រូវក្នុងចំណោមអ្នកសារព័ត៌មាន។

ក្រសួងព័ត៌មាន ស្នើដល់អ្នកសារព័ត៌មាន អ្នកប្រើប្រាស់បណ្តាញសង្គម និង MMO សូមយកស្មារតីទទួលខុសត្រូវខ្ពស់ក្នុងការចែកចាយ ព័ត៌មានដោយសុចរិត ពិតប្រាកដ និងគោរពតាមក្រមសីលធម៌វិជ្ជាជីវៈ ដែលមាននៅក្នុងច្បាប់ ស្តីពីរបបសារព័ត៌មាន។

នៅក្នុងនោះ សម្តេចមហាបវរធិបតី ហ៊ុន ម៉ាណែត ក៏បានស្នើឱ្យឯកឧត្ដម នេត្រ ភក្រ្ដា រដ្ឋមន្ត្រីក្រសួងព័ត៌មានដកអាជ្ញាប័ណ្ណ និងដាក់ក្នុងបញ្ជីខ្មៅ ចំពោះអ្នកព័ត៌មានណាដែលផ្សាយព័ត៌មានមិនពិត តាមគៀបគេស៊ី និងបំពុលសង្គមដើម្បីកុំធ្វើឱ្យអ្នកព័ត៌មានបួនដប់នាក់នេះ ធ្វើឱ្យប៉ះពាល់ដល់អ្នកព័ត៌មានវិជ្ជាជីវៈ។

សម្ដេចធិបតី សង្កត់ធ្ងន់ថា៖” រាជរដ្ឋាភិបាលគ្មានការបិទសិទ្ធិសេរីភាពក្នុងការបញ្ចេញមតិនោះទេ ប៉ុន្ដែត្រូវគោរពសិទ្ធិអ្នកដ៏ទៃ ដោយត្រូវផ្សាយមានពិត ដើម្បីផ្តល់ប្រយោជន៍ដល់សង្គមជាតិ”៕

ក្រសួងបរិស្ថាន និងក្រសួងកសិកម្ម ព្រមទាំងអង្គការសត្វព្រៃ និងរុក្ខជាតិ បានប្រកាសរកឃើញសម្បុកក្រពើភ្នំចំនួន៥ នៅឧទ្យានជាតិជួរភ្នំក្រវាញ ដែលជាចំនួនសំបុកពងកូនច្រើនបំផុតមិនធ្លាប់មានក្នុងរយៈពេលជាង២០ឆ្នាំកន្លងមកនេះ។

សម្បុកក្រពើភ្នំចំនួន៥នេះ មានពងសរុប ១០៦គ្រាប់ នៅឧទ្យានជាតិជួរភ្នំក្រវាញ។ ក្នុងចំណោមពងក្រពើភ្នំដែលទើបរកឃើញជាង ១០០គ្រាប់នេះ គឺមាន៦០គ្រាប់បានញាស់ចេញពីសម្បុកដោយជោគជ័យក្នុងចន្លោះថ្ងៃទី២៧ដល់ថ្ងៃទី៣០មិថុនា ឆ្នាំ២០២៤។

ការរកឃើញសម្បុកក្រពើភ្នំនេះជាជោគជ័យថ្មីរបស់ខ្លួនចេញពីការខិតខំជ្រើសរើសពូជក្រពើភ្នំសុទ្ធមកបង្កាត់ដាក់ចូលក្នុងជម្រកធម្មជាតិវិញ ក្នុងដែនអភិរក្សបរិស្ថាន។

ក្រពើភ្នំ បានដើរតួនាទីសំខាន់ក្នុងប្រព័ន្ធអេកូឡូស៊ី ខណៈការរកឃើញសម្បុកពងកូនលើកនេះជាការឆ្លុះបញ្ចាំងឱ្យឃើញថាឧទ្យានជាតិជួរភ្នំក្រវាញជាទីជម្រកធម្មជាតិមានសុវត្ថិភាព និងសមស្របសម្រាប់ការរស់នៅរបស់ប្រភេទសត្វដ៏កម្រនេះ។

សត្វក្រពើភ្នំមានចំនួនប្រមាណជាង ១០០០ក្បាលប៉ុណ្ណោះនៅលើពិភពលោក ក្នុងនោះកម្ពុជាត្រូវបានគេចាត់ទុកថាមានវត្តមានសត្វក្រពើភ្នំច្រើនជាងគេប្រមាណជាង ៣០០ក្បាល៕

ដោយមានមានភ្លៀងធ្លាក់មកជាប់ៗគ្នាជាច្រើនថ្ងៃ បានបង្កឱ្យប្រជាពលរដ្ឋ ដែលមានលំនៅឋាននៅជាប់ដងស្ទឹងសង្កែ ហាក់មានការព្រួយបារម្ភខ្លាំង ក្រោយមានលំនៅឋាន៣ខ្នងបានបាក់ចូលស្ទឹងសង្កែ។

ការរអិលបាក់ស្រុតដីនេះបានកើតឡើងនៅវេលាម៉ោង២យប់ឈានចូលថ្ងៃទី១៨ ខែកក្កដា ឆ្នាំ២០២៤ ដែលស្ថិតនៅភូមិស្នាពីមុខ ឃុំព្រែកខ្ពប ស្រុកឯកភ្នំ ខេត្តបាត់ដំបង បណ្តាលឱ្យស្រុតផ្ទះបាយ និងរោងលក់គុយទាវរបស់ប្រជាពលរដ្ឋចំនួន៣គ្រួសា។

មូលហេតុនៃការបាក់ស្រុតនេះ ក៏ព្រោះតែប៉ុន្មានថ្ងៃកន្លងមកនេះ មានភ្លៀងធ្លាក់ខ្លាំងជាប់គ្នា ធ្វើឱ្យដីជ្រាបពីម្ខាងផ្លូវដែលមិនមានទឹកហូរ ត្រូវជ្រាបឆ្លងផ្លូវបាក់ផ្លូវចូលទៅស្ទឹង ធ្វើឱ្យទឹកហូរខាងក្រោម ដែលមានដីស្អុយ ហើយរអិលបាក់តែម្តង ហើយចំពោះអ្នកនៅសង្ខាងផ្ទះដែលបាក់ជាប់ៗគ្នាខាងមាត់ស្ទឹងនោះ ក៏កំពុងរងនូវហានិភ័យនេះផងដែរ ។

អភិបាលស្រុកឯកភ្នំ លោកម៉ិល សុផល បានស្នើឱ្យពលរដ្ឋប្រុងប្រយ័ត្ន និងប្រញ៉ាប់រាយការណ៍ទៅអាជ្ញាធរមូលដ្ឋាន ឬសមត្ថកិច្ចដែលនៅជិតបំផុត ចំពោះបាតុភូតធម្មជាតិណាមួយដែលកើតឡើង៕