ប្រទេសនូវែលសេឡង់ ៖ ប្រទេសនានាលើពិភពលោក តែងតែយកចិត្តទុកដាក់លើសិទ្ធិសត្វ និងការពារសត្វឱ្យរួចផុតពីការធ្វើបា.ប របស់មនុស្ស ហើយនេះមិននិយាយពីការសម្លា.ប់ សត្វចិញ្ចឹម ដូចជា ៖ ឆ្កែ ឬឆ្មា មកធ្វើជាអាហារមនុស្សទេ ។ បើមានករណីស៊ី សា.ច់ឆ្កែ ឬល.ក់ សាច់ឆ្កែ ពលរដ្ឋប្រទេសទាំងនេះមុខជាទទួលទោ.ស មិនខាន ។

កាលពីថ្ងៃទី៥ ខែសីហា ឆ្នាំ២០២៤ សារព័ត៌មានបរទេសរាយការណ៍ថា នារីម្នាក់រស់នៅប្រទេសនូវែលសេឡង់ ត្រូវបានតុលាការកាត់ទោសឱ្យជាប់ពន្ធនាគារពីបទឱ្យឆ្កែស៊ីចំណីច្រើនពេក រហូតដល់ឆ្កែធាត់ខ្លាំងមានជំងឺពេញខ្លួន និងងាប់ ។

ព័ត៌មាននេះទទួលបានការចាប់អារម្មណ៍យ៉ាងខ្លាំងពីក្រុមអ្នកស្រឡាញ់សត្វទូទាំងពិភពលោក ក្រោយពីសារព័ត៌មានបរទេសរាយការណ៍ថា តុលាការបានកាត់ទោសនារីម្នាក់រស់នៅទីក្រុង Auckland ប្រទេសនូវែលសេឡង់ ឱ្យជាប់ពន្ធនាគាររយៈពេល២ខែ ពីបទឱ្យចំណីឆ្កែស៊ីច្រើនពេក ។ វាធ្វើឱ្យឆ្កែរបស់នាងធាត់ខ្លាំងដូចជ្រូក ដើរលែងរួច និងកើតជំងឺជាច្រើន មុនពេលវាងាប់នាពេលបន្ទាប់ ។

តុលាការចោទប្រកាន់ថា ជាការធ្វើទារុណកម្មសត្វ ដោយសារនាងបានចិញ្ចឹមឆ្កែ១ក្បាលឈ្មោះ Nuggi មានទម្ងន់រហូតដល់៥៣.៧គីឡូក្រាម ។ ឆ្កែរបស់នាងមានជំងឺជា
ច្រើនមុខ ហើយគ្មានកម្លាំងដើរឆ្ងាយទេ គឺដើរបានត្រឹមតែ១០ម៉ែត្រប៉ុណ្ណោះ វាត្រូវឈប់សម្រាកដកដង្ហើមចំនួន៣លើក ។ ហេតុនេះ ទើបតុលាការចាត់ទុកថា គឺជាការធ្វើទារុណកម្មសត្វចិញ្ចឹមយ៉ាងខ្លាំង ។

ចំណែកពេទ្យសត្វបញ្ជាក់ថា ពុំបានឮសំឡេងបេះដូងលោតរបស់ឆ្កែ Nuggi ទេ ដោយសារសំឡេងពុំអាចទម្លុះស្រទាប់ខ្លាញ់របស់ Nuggi បាន ។ ក្រោយមក គេក៏បញ្ជូន Nuggi ទៅឱ្យសមាគមការពារការធ្វើទារុណកម្មសត្វ មើលថែទាំ ហើយសមាគមនេះបានសម្រកទម្ងន់របស់ Nuggi ចំនួន៨.៩គីឡូក្រាម ។ ប៉ុន្តែវាគួរឱ្យសោកស្តាយបំផុត ពីព្រោះ Nuggi បានងាប់ដោយសារវាកើតជំងឺផ្សេងទៀត ដូចជា ៖ ជំងឺថ្លើម ។

សមាគមការពារការធ្វើទារុណកម្មសត្វ បញ្ជាក់ថា ការផ្តល់អាហារឱ្យសត្វចិញ្ចឹមស៊ីច្រើនពេកនឹងធ្វើឱ្យប៉ះពាល់សុខភាពសត្វ គឺមិនខុសគ្នាពីការផ្តល់ចំណីពុំគ្រប់គ្រាន់នោះទេ ។ Nuggi គឺជាឆ្កែធាត់បំផុត ដែលពួកគេធ្លាប់បានឃើញកន្លងមក ។

នៅដើមខែសីហា ឆ្នាំ២០២៤ នេះ តុលាការក្នុងតំបន់ Manukau បានចេញដីកាឱ្យនារីជាម្ចាស់ឆ្កែបង់ប្រាក់សំណងចំនួន១.២២២ដុល្លារនូវែលសេឡង់ (ឬស្មើជិត២ពាន់ដុល្លារអាមេរិក) ព្រមទាំងហាមឃាត់នារីរូបនេះចិញ្ចឹមឆ្កែរយៈពេល១ឆ្នាំ ផងដែរ ៕

គ្រប់ទីក្រុងទាំងអស់នៅលើពិភពលោកគឺសុទ្ធតែមានផ្លូវគោក ផ្លូវទឹក និងផ្លូវដែក ដោយឡែកទីក្រុងមួយនេះគឺមិនមានផ្លូវគោក ផ្លូវដែកនោះទេ ពោលគឺមានតែផ្លូវទឹក ដោយប្រជាជននៅទីនោះរស់នៅលើទឹក ធ្វើដំណើរដោយការជិះទូកឆ្លងកាត់ពីតំបន់មួយទៅតំបន់មួយ។ ទោះបីបច្ចុប្បន្នមានការអភិវឌ្ឍន៍ខ្លាំងយ៉ាងណាក៏ដោយ ក៏ទីក្រុងដ៏ធំមួយនេះនៅតែមិនមានផ្លូវគោក ឬផ្លូវដែកតភ្ជាប់ទៅកាន់ពិភពខាងក្រៅបានឡើយ។ ដូច្នេះប្រជាជនមកពីតំបន់ផ្សេងទៀតនៃប្រទេសគឺមិនអាចទៅដល់ទីក្រុងនេះបាននោះទេ ប្រសិនបើអ្នកចង់មកទស្សនាគឺត្រូវជិះទូក ឬកប៉ាល់ឆ្លងកាត់ពីតំបន់មួយទៅតំបន់មួយរយៈពេល ២,៣ ថ្ងៃទើបទៅដល់ទីក្រុងទឹកមួយនេះ ដែលទីក្រុងនោះមានឈ្មោះថា Iquitos។

Iquitos គឺជាទីក្រុងដែលមិនមានផ្លូវគោក ឬផ្លូវដែកតភ្ជាប់ផ្លូវទៅកាន់តំបន់ផ្សេងទៀតនោះទេ ដែលវាមានទីតាំងនៅភាគឦសាននៃប្រទេសប៉េរូ ស្ថិតនៅលើច្រាំងទន្លេ Amazon ត្រូវបានហ៊ុព័ទ្ធដោយព្រៃត្រូពិចក្រាស់ៗ។ ទីក្រុងនេះមានប្រជាជនជិត ៥០០,០០០ នាក់ជាទីក្រុងធំជាងគេទីប្រាំមួយនៅក្នុងប្រទេសប៉េរូ។ ជាទូទៅអ្នកស្រុកនៅទីនោះពឹងផ្អែកទាំងស្រុងលើការដឹកជញ្ជូនតាមផ្លូវអាកាស ដើម្បីធ្វើដំណើរឆ្លងកាត់ទន្លេអាម៉ាហ្សូន ដោយទីក្រុងនេះគឺមានអាកាសយានដ្ឋានអន្តរជាតិមួយ ដែលមានភាពងាយស្រួលសម្រាប់ការទំនាក់ទំនង និងការធ្វើដំណើរជាមួយរដ្ឋធានី Lima និងមានជើងហោះហើរត្រង់ទៅកាន់ទីក្រុង Miami ។

តំបន់ទីក្រុងរបស់ Iquitos មិនមានទំហំធំខ្លាំងទេ វាគ្រាន់តែមានផ្លូវធំចំនួនបីដែលលាតសន្ធឹងស្របទៅនឹងទន្លេ Amazon ហើយផ្លូវតូចៗនៅសងខាងជាប់គ្នា ដោយបែងចែកទីក្រុងទៅជាការ៉េធំៗ និងតូចមិនស្មើគ្នា។ នៅក្នុងទីក្រុងមិនមានផ្លូវទៅកាន់ពិភពខាងក្រៅនោះទេ ដូច្នេះរថយន្ត អាគារខ្ពស់ៗគឺមិនមានដូចទីក្រុងផ្សេងឡើយ។ ជាធម្មតាប្រជាជននៅទីនោះរស់នៅលើទឹក ដោយសង់ផ្ទះឈើតូចៗ ចិញ្ចឹមជីវិតដោយការស្ទូចត្រី និងផលិតកម្មកៅស៊ូ ក៏ដូចជាមិនដែលដើរចេញពីទីក្រុងនេះទេក្នុងជីវិតរបស់ពួកគេ ពួកគេមិនដែលស្គាល់ និងមិនខ្វល់ពីពិភពខាងក្រៅឡើយ។

ពួកគេរស់នៅក្នុងភាពសុខដុមរមនាជាមួយនឹងធម្មជាតិ រីករាយនឹងភាពស្រស់ស្អាត និងភាពសម្បូរបែបនៃព្រៃអាម៉ាហ្សូន ត្រូវបានគេចាត់ទុកថាជាទីក្រុងដែលលាក់ខ្លួននៅក្នុងទន្លេរអាម៉ាហ្សូន។ ទន្លេអាម៉ាហ្សូនគឺជាទន្លេដែលមានលំហូរ និងតំបន់បង្ហូរទឹកធំជាងគេបំផុតនៅលើពិភពលោក។ Iquitos មានទីតាំងនៅខាងលើទន្លេនេះហើយជាកំពង់ផែប្រឡាយដ៏សំខាន់មួយនៅភាគឦសានប្រទេសប៉េរូ។ បច្ចុប្បន្ន Iquitos គឺជាមជ្ឈមណ្ឌលពាណិជ្ជកម្មនៃប្រទេសប៉េរូនៅក្នុងតំបន់ Amazon ។ ទីក្រុងនេះត្រូវបានបង្កើតឡើងដំបូងក្នុងឆ្នាំ ១៨៦៣ ហើយបានក្លាយជាកំពង់ផែសេរីនៅឆ្នាំ ១៩៨០។

ក្នុងអំឡុងពេលនៃការរីកចំរើននៃពាណិជ្ជកម្មកៅស៊ូនៅដើមទសវត្សរ៍ឆ្នាំ ២០០០ ទីក្រុង Iquitos បានពង្រីកយ៉ាងឆាប់រហ័សពីភូមិនេសាទតូចមួយទៅជាទីក្រុងដ៏អ៊ូអរ។ ម្ចាស់ចម្ការកៅស៊ូ និងក្រុមហ៊ុនសាជីវកម្មយក្សបានប្រមូលផ្តុំគ្នានៅទីនេះ ហើយវាក៏បានស្វាគមន៍ជនអន្តោប្រវេសន៍មួយចំនួនធំមកពីអឺរ៉ុប អាស៊ី និងអាមេរិកឡាទីន ដែលនាំឱ្យមានការលាយឡំជាតិសាសន៍ និងក្រុមជនជាតិភាគតិចចម្រុះនៅក្នុងទីក្រុងសព្វថ្ងៃនេះ៕

ប្រទេសវៀតណាម ៖ កាលពីថ្ងៃទី៥ ខែសីហា ឆ្នាំ២០២៤ សារព័ត៌មានបរទេសរាយការណ៍ថា យោងតាមទិន្នន័យជាផ្លូវការរបស់ប្រទេសវៀតណាមបញ្ជាក់ថា ក្នុងរយៈពេលត្រឹមតែ៧ខែប៉ុណ្ណោះ (គិតចាប់ពីខែមករា ដល់ខែកក្កដា ឆ្នាំ២០២៤) មានក្រុមហ៊ុនបើកថ្មីនៅវៀតណាម រហូតដល់ជាង៩៥.២០០ក្រុមហ៊ុន ។

សារព័ត៌មានស៊ីនហួរបានរាយការណ៍ពីទីក្រុងហាណូយ ប្រទេសវៀតណាមថា ការិយាល័យស្ថិតិទូទៅរបស់វៀតណាមបានរាយការណ៍ពីចំនួនក្រុមហ៊ុនទើបបង្កើតថ្មី ក្នុងរយៈពេល៧ខែដំបូងឆ្នាំ២០២៤ កន្លងមក គឺស្មើជាង៩៥.២០០ក្រុមហ៊ុន កើនឡើង៦,៣% បើប្រៀបធៀបពីមួយឆ្នាំទៅមួយឆ្នាំ ។ រីឯដើមទុនរបស់ក្រុមហ៊ុនចុះបញ្ជីសរុបស្មើជាង៨៥៤លានលានដុង កើនឡើង២,៤% បើធៀបពីមួយឆ្នាំទៅមួយឆ្នាំ ។

ចំណែកចំនួនក្រុមហ៊ុនបង្កើតថ្មីផ្នែកសេវាកម្ម កើនឡើង៦,៨% និងក្រុមហ៊ុនផ្នែកឧស្សាហកម្ម និងសំណង់ កើនឡើង៤,៨% ។ រីឯក្រុមហ៊ុនផ្នែកកសិកម្ម, ព្រៃឈើ និងនេសាទ ធ្លាក់ចុះ២,៨% បើធៀបនឹងរយៈពេលដូចគ្នាកាលពីឆ្នាំ២០២៣ ។

ទន្ទឹមនឹងនេះ មានក្រុមហ៊ុនជិត៤៤.៣០០ក្រុមហ៊ុន ដែលធ្លាប់ផ្អាកដំណើរការនាពេលកន្លងមក បានបើកដំណើរការអាជីវកម្មឡើងវិញ បើគិតចាប់ពីខែមករា ដល់ខែកក្កដា ឆ្នាំ២០២៤ ។ ប៉ុន្តែមានក្រុមហ៊ុនជាង១៧.៩០០ក្រុមហ៊ុន បានបិទដំណើរការអាជីវកម្មក្នុងរយៈពេល៧ខែ ឆ្នាំ២០២៤ ។

ប្រទេសវៀតណាមបានក្លាយជាគោលដៅសំខាន់មួយដែលក្រុមហ៊ុនបរទេសចាប់អារម្មណ៍វិនិយោគ ដោយសារវៀតណាមមានកត្តាទាក់ទាញជាច្រើន ដូចជា ៖ ថ្លៃឈ្នួលកម្លាំងពលកម្មថោក, ពលរដ្ឋគ្រប់អាយុធ្វើការច្រើន, វិធានការទាក់ទាញការវិនិយោគរបស់រដ្ឋាភិបាល, ទីតាំងល្អបើធៀបនឹងប្រទេសនានាក្នុងតំបន់អាស៊ាន និងស្ថិរភាពនយោបាយ ។

សេដ្ឋវិទូវៀតណាមលើកឡើងថា វៀតណាមជាប្រទេសមួយក្នុងចំណោមប្រទេសមានសេដ្ឋកិច្ចបើកចំហ និងទទួលបានផលប្រយោជន៍យ៉ាងច្រើនពីផ្នែកពាណិជ្ជកម្ម ហើយសេដ្ឋកិច្ចវៀតណាមនឹងកាន់តែលូតលាស់បន្ថែមទៀតនៅឆ្នាំ២០២៤ ។

ទោះយ៉ាងណា នាថ្ងៃអនាគត វៀតណាមនឹងប្រឈមជាមួយការខ្វះខាតកម្លាំងពលកម្មដូចប្រទេសនានាលើពិភពលោកដែរ ។ បើទោះជាវៀតណាមមានកម្លាំងពលកម្មច្រើនរហូតដល់៥៦លាននាក់ក្តី ប៉ុន្តែកម្លាំងពលកម្មវៀតណាមនៅតែតិចជាងចិន រហូតដល់១៤ដង ។ ហេតុនេះ វៀតណាមនឹងប្រើប្រាស់បច្ចេកវិទ្យាដើម្បីជំនួសកម្លាំងមនុស្ស (ឬ Automation) ដែលជាផ្នែកមួយសម្រាប់អភិវឌ្ឍន៍ទីផ្សារការងារ ព្រមទាំងគាំទ្រផ្នែកឧស្សាហកម្ម និងការផលិតក្នុងស្រុក ៕

ប្រទេសជប៉ុន ៖ វាបានធ្វើឱ្យពលរដ្ឋជប៉ុនរិះគ.ន់ ពេញបណ្តាញសង្គម ហើយពួកគេសួរថា តើជប៉ុនហាមឃាត់បុគ្គលិកធ្វើការក្នុងផ្នែកទាំងនេះពាក់វ៉ែនតា គឺជាការសមរម្យដែរឬទេ? អ្នកប្រើប្រាស់បណ្តាញសង្គមខ្លះនិយាយថា ការហាមឃាត់បែបនេះ គឺជាគំនិតមួយហួសសម័យ និងរំលោ.ភ សិទ្ធិផ្ទាល់ខ្លួនបុគ្គល ។

ប្រធានបទជជែកគ្នាក្នុងបណ្តាញសង្គមនេះ ក្រោយពីនារីរត់តុនៅភោជនីយដ្ឋានល្បីមួយនៅប្រទេសជប៉ុន បានសរសេរក្នុងបណ្តាញសង្គមថា នាងត្រូវស្លៀកពាក់ឈុតគីម៉ូណូ ហើយខាងភោជនីយដ្ឋានពុំអនុញ្ញាតឱ្យនាងពាក់វ៉ែនតាធ្វើការទេ ។ មូលហេតុ គឺវ៉ែនតារបស់នាងអាចជ្រុះក្នុងអំឡុងពេលលើកអាហារជូនភ្ញៀវ ហើយការពាក់វ៉ែនតានិយាយជាមួយភ្ញៀវ ហាក់មិនសុភាព ។ មូលហេតុមួយទៀតដែលភោជនីយដ្ឋានហាមនាងពាក់វ៉ែនតាធ្វើការ គឺឈុតគីម៉ូណូជាមួយវ៉ែនតា ពុំសាមសមជាមួយគ្នាយ៉ាងខ្លាំង ។

ប្រធានបទនេះធ្វើឱ្យអ្នកប្រើប្រាស់បណ្តាញសង្គមប្រកែកគ្នាជាច្រើនថា តើមូលហេតុបែបនេះរបស់ភោជនីយដ្ឋានសមហេតុផលដែរឬទេ? លើសពីនេះ មានប្រធានបទមួយទៀតដែលធ្វើឱ្យមានការជជែកគ្នាក្នុងបណ្តាញសង្គម គឺមិនមែនមានតែភោជនីយដ្ឋានតែមួយទេ ដែលពុំអនុញ្ញាតឱ្យបុគ្គលិកស្រីពាក់វ៉ែនតា ប៉ុន្តែនៅមានការងារចំនួន៣ប្រភេទទៀត ក៏ពុំអនុញ្ញាតដូចគ្នា រួមមាន ៖ នារីអាកាសចរណ៍, បុគ្គលិកលក់គ្រឿងសម្អាង និងបុគ្គលិកទទួលភ្ញៀវ ។

បើតាមទិន្នន័យបញ្ជាក់ថា ប្រទេសជប៉ុនពុំអនុញ្ញាតឱ្យនារីអាកាសចរណ៍ពាក់វ៉ែនតាទេ ដោយសារមូលហេតុសុវត្ថិភាពការធ្វើដំណើរតាមយន្តហោះ ។ ឧទាហរណ៍ បើនារីអាកាសចរណ៍ដ៏ស្រស់ស្អាតម្នាក់កំពុងតែស្វែងរកវ៉ែនតាជ្រុះរបស់ខ្លួន ខណៈនាងកំពុងនាំអ្នកដំណើររញ៉ៃរញ៉ៃជាច្រើននាក់ចុះពីយន្តហោះ វាជារូបភាពពុំល្អឡើយ ។

ចំណែកបុគ្គលិកលក់គ្រឿងសម្អាងដែលពួកនាងតំណាងឱ្យភាពស្រស់ស្អាត ហើយអតិថិជនតែងតែចង់ឃើញលទ្ធផលការប្រើប្រាស់គ្រឿងសំអាងនៅលើផ្ទៃមុខបុគ្គលិកផ្នែកលក់ ប៉ុន្តែវ៉ែនតាបែរជាបិទបាំងភាពស្រស់ស្អាតលើផ្ទៃមុខ ។

រីឯបុគ្គលិកទទួលភ្ញៀវ ក៏ជប៉ុនពុំអនុញ្ញាតឱ្យពាក់វ៉ែនតាធ្វើការដូចគ្នាដែរ ដោយសារការពាក់វ៉ែនតានឹងធ្វើឱ្យភ្ញៀវមកទំនាក់ទំនង ឬសាកសួរព័ត៌មានផ្សេងៗមានអារម្មណ៍ថា ពួកគេយឺតយ៉ាវជាងពេលបុគ្គលិកទទួលភ្ញៀវមិនពាក់វ៉ែនតា ។

ហេតុនេះ អ្នកប្រើប្រាស់បណ្តាញសង្គមជប៉ុនភាគច្រើនបានជជែកគ្នាពីបម្រាមទាំងនេះ ជាពិសេស អ្នកមិនឯកសារនឹងបម្រាមខាងលើយល់ឃើញថា នេះជាគំនិតមួយហួសសម័យ និងរំលោភសិទ្ធិផ្ទាល់ខ្លួន ។ ចុះលោកអ្នកវិញយល់ឃើញយ៉ាងណាដែរ ពាក់ព័ន្ធនឹងបម្រាមនេះ?

នៅលើភពផែនដីយើងនេះគឺមានតំបន់ទេសភាពស្រស់ស្អាតជាច្រើនរាប់រយកន្លែងឯណោះ។ ទោះជាយ៉ាងណាបើយោងតាម Condé Nast Traveler ដែលជាគេហទំព័រទេសចរណ៍បែបប្រណិតដ៏ល្បីល្បាញបំផុតមួយ បានឱ្យដឹងថា នៅលើពិភពលោកយើងនេះគឺមានតែ ៥ កន្លែងប៉ុណ្ណោះ ដែលត្រូវបានគេចាត់ទុកថាជាកន្លែងមានទេសភាពអស្ចារ្យបំផុតប្រៀបបានដូចជាឋានសួគ៌អ៊ីចឹង។ ប្រសិនបើយើងមើលត្រឹមរូបភាពគិតថាប្រហែលជាកាត់តហើយ ប៉ុន្តែកន្លែងទាំងនេះគឺពិតជាមែននៅលើផែនដី។

១.តំបន់ Salar de Uyuni ប្រទេសបូលីវី៖ គឺជាផ្ទាំងអំបិលពណ៌សដ៏ធំបំផុតនៅលើពិភពលោក ត្រូវបានគេស្គាល់ថាជាតំបន់ឋានសួគ៌ ដោយសារវាមានទីធ្លាធំទូលាយ និងមានផ្ទៃមេឃពណ៌ខៀវភ្លឺស្រឡះល្អ អមដោយទេសភាពដ៏អស្ចារ្យបំផុតមានតែមួយគ្មានពីរ។ វាត្រូវបានគ្របដណ្ដប់ដោយសំបកអំបិលពីរបីម៉ែត្រ ដែលមានភាពរាបស្មើមិនធម្មតាជាមួយនឹងការប្រែប្រួលកម្ពស់ជាមធ្យមក្នុងរង្វង់មួយម៉ែត្រលើផ្ទៃដីទាំងមូលនៃសាឡារ។ Salar de Uyuni ស្ថិតនៅក្នុងខេត្ត Daniel Campos ភាគនិរតីនៃប្រទេសបូលីវី នៅជិតកំពូលភ្នំ Andes នៅកម្ពស់ ៣,៦៥៦ ម៉ែត្រពីលើនីវ៉ូទឹកសមុទ្រ។

២.តំបន់ Pamukkale ប្រទេសទួគី៖ គឺជាអាងទឹកដ៏ស្រស់ស្អាតបំផុតក្នុងលោកប្រៀបបានដូចជាឋានសួគ៌អ៊ីចឹង។ តំបន់នេះមានភាពល្បីល្បាញខ្លាំងដោយសារសារធាតុរ៉ែកាបូនដែលបានបន្សល់ទុកដោយលំហូរនៃទឹកនិទាឃរដូវ។ Pamukkale មានន័យថា “ប្រាសាទកប្បាស” គឺជាតំបន់ធម្មជាតិមួយនៅក្នុងខេត្ត Denizli ភាគនិរតីនៃប្រទេសទួរគី ដែលតំបន់នេះត្រូវបានទាក់ទាញអ្នកទស្សនាទៅកាន់ប្រភពទឹកកំដៅរបស់វាតាំងពីសម័យបុរាណមកម្លេះ។

៣.កោះ Vaadhoo ប្រទេសម៉ាល់ឌីវ៖ ឆ្នេរនៅកោះ Vaadhoo ក្នុងប្រទេសម៉ាល់ឌីវ បានទទួលការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរនៅជុំវិញពិភពលោក ដោយសារទេសភាពនាពេលរាត្រីនៅកោះនេះមានពន្លឺខៀវភ្លឺចែងចាំងចេញពីផ្ទៃសមុទ្រយ៉ាងច្បាស់ល្អ មើលទៅដូចជាផ្កាយកំពុងរះនៅក្រោមបាតសមុទ្រអ៊ីចឹង ដែលបាតុភូតនេះត្រូវបានគេស្គាល់យ៉ាងច្បាស់ថាជា “សមុទ្រនៃផ្កាយ” ។

៤.ឧទ្យានជាតិ Lençóis Maranhenses ប្រទេសប្រេស៊ីល៖ ភូមិសាស្ត្រនៃឧទ្យានជាតិLençóis Maranhenses របស់ប្រទេសប្រេស៊ីលគឺដូចជាមិនមែននៅលើផែនដីអ៊ីចឹង ដោយសារទេសភាពនៃឧទ្យានជាតិនេះគឺមើលទៅពិតជាអស្ចារ្យខ្លាំងមែនទែន។ កន្លែងនេះប្រៀបបានដូចជាឋានសួគ៌ មានបឹងខ្សាច់ដ៏ធំល្វឹងល្វើយនៃវាលខ្សាច់ពណ៌សខ្ពស់ និងបឹងទឹកភ្លៀងតាមរដូវ ដែលស្រស់ស្អាតខ្លាំងមិនអាចពណ៌នាបាន។

៥.ទឹកធ្លាក់ Victoria៖ គឺជាទឹកធ្លាក់នៅលើទន្លេ Zambezi ដែលមានទីតាំងនៅព្រំដែនរវាងប្រទេស Zambia និង Zimbabwe។ វាគឺជាទឹកធ្លាក់ដ៏ធំបំផុតមួយរបស់ពិភពលោក ដែលមានទទឹង ១,៧០៨ ម៉ែត្រ និងជាតំបន់រស់នៅរបស់រុក្ខជាតិ និងសត្វគ្រប់ប្រភេទ។ ទឹកធ្លាក់ Victoria ត្រូវបានគេស្គាល់ថាជាទឹកជ្រោះនៃឋានសួគ៌ ដោយសារទេសភាពដ៏អស្ចារ្យគ្មានពីររបស់វា និងកម្ពស់ទឹកដ៏សែនខ្ពស់របស់វា ធ្វើឱ្យទីនេះត្រូវបានគេប្រៀបដូចជាឋានសួគ៌៕