ថ្លែងក្នុងឱកាសក្រសួងវប្បធម៌ និងវិចិត្រសិល្បៈ រៀបចំសន្និសីទសារព័ត៌មាន បង្ហាញពីលទ្ធផលប្រជុំ លើកទី៤៦ របស់គណៈកម្មការបេតិកភណ្ឌពិភពលោក នៅប្រទេសឥណ្ឌា លោកបណ្ឌិត ឈុំ ម៉េងហុង អគ្គលេខាធិការស្តីទីនៃគណៈកម្មការជាតិយូណេស្កូកម្ពុជា ថា៖”កម្ពុជាបានត្រៀមដាក់ទីតាំងសំខាន់ៗចំនួន០៧ ចូលជាជាតំបន់បេតិកភណ្ឌពិភពលោក”។

នៅក្នុងចំណោម៧នេះ មាន៤ជាប្រាសាទ ដែលរួមមាន៖

ប្រាសាទភ្នំដាអង្គរបុរី

ប្រាសាទបន្ទាយឆ្មារ

ប្រាសាទព្រះខ័នស្រុកកំពង់ស្វាយ

ប្រាសាទបេងមាលា។

ដោយឡែក៣ទៀត សារមន្ទីរទួលស្លែង ស្ថានីយន៍បឹងជើងឯក និងម១៣ ដែលបច្ចុប្បន្នកំពុងធ្វើការវាយតម្លៃ ដើម្បីដាក់បញ្ជូលជាសម្បត្តិបេតិភណ្ឌពិភពលោកនៅឆ្នាំ២០២៥ ខាងមុខនេះ។

គួរបញ្ជាក់ថា កម្ពុជាមានសម្បត្តិវប្បធម៌ខ្មែរចំនួន ១០ ដែលត្រូវបានដាក់បញ្ចូលទៅក្នុងបញ្ជីបេតិកភណ្ឌពិភពលោក ក្នុងនោះមាន ៤ ជាបេតិកភណ្ឌរូបី និងបញ្ជីបេតិកភណ្ឌអរូបី៕

កាលថ្ងៃទី៥ ខែសីហា ឆ្នាំ២០២៤ កាសែតជាភាសារុស្សីមួយមានឈ្មោះថា “សេហ្គា” បានចេញផ្សាយ ដោយបានសរសេរដាក់ចំណងជើងថា “ចិនបំបែក កម្ពុជាពីវៀតណាមដោយបង្វែរចរាចរណ៍តាមបណ្ដោយមេគង្គ”។

ជុំវិញករណីនេះ ឯកឧត្តម ជា ច័ន្ទបរិបូណ៌ រដ្ឋលេខាធិការក្រសួងព័ត៌មាន បានបង្ហោះសារនៅរៀបរាប់យ៉ាងលម្អិតដូច្នេះថា៖”កម្ពុជា ពុំបានបោះបង់មិត្តណាមួយចោលឡើយ ! ការទំនាក់ទំនងជាមួយប្រទេសជាមិត្ត គឺសម្បូរបែប ដូចជាផ្កាចម្រុះពណ៌។ យើងរកស៊ីជាមួយប្រទេសជាច្រើនលើសកលលោក ហើយក៏មានប្រទេសជាច្រើន បានជួយដល់កម្ពុជា តែមិត្តចិន បានជួយដល់កម្ពុជា ក្នុងការបំពេញបន្ថែមនូវអ្វីដែលកម្ពុជាត្រូវការ ដែលពុំមានអ្នកណាមកជួយ”។

ឯកឧត្តម ក៏បានសង្កត់ធ្ងន់ថា៖”ការលើកឡើងថា ព្រែកជីកនេះ បានបម្រើអោយនាវាយោធារបស់ចិន វាគ្រាន់តែជាក្តីស្រមៃរបស់អ្នកដែលច្រណែននឹងកម្ពុជាតែប៉ុណ្ណោះ ។កុំបារម្ភនឹងកម្ពុជា ! កម្ពុជា ចេះគិតហើយ ! កម្ពុជាពេលនេះ ត្រូវកំណត់ជោគវាសនាដោយខ្លួនឯង”។

គួរបញ្ជាក់ផងដែរថា គម្រោងព្រែកជីកហ្វូណនតេជោនេះ PAS និង PPAP កាន់កាប់ភាគហ៊ុន ៥១% និង OCIC របស់លោកអ្នកឧកញ៉ាពុង ខៀវសែ ៤៩%៕

ពាក្យថាអាហារគឺសំដៅទៅលើរបស់ដែលអាចញ៉ាំបាន ដូច្នេះគ្រប់ម្ហូបអាហារទាំងអស់នៅលើពិភពលោកភាគច្រើនគឺសុទ្ធតែល្អ និងមានរសជាតិឆ្ងាញ់ទៅតាមតំបន់នីមួយៗ។ ទោះជាយ៉ាងណាក៏មានប្រទេសមួយចំនួននិយមទទួលទានអាហារអាក្រ.ក់ៗផងដែរ ដែលអាហារទាំងនោះត្រូវបានគេចាត់ទុកថាជាអាហារអាក្រ.ក់បំផុតនៅលើពិភពលោក។ ដូច្នេះប្រទេសទាំង ៧ ខាងក្រោមគឺជាអ្នកបង្កើតមុខម្ហូបអាក្រ.ក់បែបនេះ ចង់ដឹងថាអាហារទាំងនោះអាក្រ.ក់យ៉ាងម៉េចខ្លះ តោះមកតាមដានជាមួយយើងទាំងអស់គ្នា។

១. Blodpalt៖ គឺជានំប្រពៃណីដែលត្រូវបានផ្សារភ្ជាប់ជាមួយនឹងផ្នែកភាគខាងជើងនៃប្រទេសស៊ុយអែត និងហ្វាំងឡង់។ នំនេះមានពណ៌ត្នោតខ្មៅដែលមានជីវជាតិត្រូវបានរៀបចំជាមួយម្សៅ barley និងឈាមរបស់សត្វ។ ថ្វីត្បិតតែពួកវាត្រូវបានផលិតឡើងដោយឈាមសត្វមែន តែវាគឺជាអាហារប្រពៃណីជាតិ ដែលតែងតែមានវត្តមាននៅក្នុងពិធីបុណ្យផ្សេងៗរបស់ប្រទេស។

២. Boodog៖ Boodog គឺជាអាហាររបស់ប្រទេសម៉ុងហ្គោលី ត្រូវបានគេចាត់ទុកថាអាក្រក់បំផុតនៅលើពិភពលោក។ វាគឺជាមុខម្ហូបគ្រឿងក្នុងសត្វចម្អិនពីខាងក្នុង ជាមួយនឹងថ្មក្តៅដាក់ក្នុងពោះរបស់វា ដោយគេធ្វើការវះពោះរបស់សត្វហើយដាក់គ្រឿងផ្សំចូលលាយឡំជាមួយគ្រឿងក្នុងសត្វ រួចយកទៅដុតឱ្យឆ្អិនជាការស្រេច។

៣.ដង្កូវ៖ ដង្កូវ Mopane របស់ប្រទេសម៉ាឡាវី គឺជាប្រភេទដង្កូវនាង មានប្រភពប្រូតេអ៊ីនខ្ពស់ ជាអាហារល្បីបំផុតនៅក្នុងប្រទេសម៉ាឡាវី ដោយគេនិយមទទួលទានវាស្រស់ៗតែម្តង ឬក៏ជ្រលក់ជាមួយទឹកប៉េងប៉ោះជាដើម។

៤. Yerushalmi kugel៖ គឺជាម្ហូបដ៏ឈ្ងុយឆ្ងាញ់ដែលផលិតឡើងជាមួយនឹងគុយទាវស្តើងត្រូវបានស្រោបដោយស្ករ caramelized បន្ទាប់មកលាយជាមួយស៊ុត ប្រេងអូលីវ ម្រេច និងអំបិលចូលគ្នាដាក់ក្នុងខ្ទះ រួចដុតរហូតដល់រឹង។ ម្ហូបនេះមានដើមកំណើតមកពីប្រទេសអ៊ីស្រាអែល ក៏ត្រូវបានគេចាត់ទុកថាជាអាហារអាក្រក់បំផុតនៅលើពិភពលោកផងដែរ។

៥. Haggis៖ មុខម្ហូបរបស់ប្រទេសស្កុតឡេនក៏មិនធម្មតាដែរ ត្រូវបានគេចាត់ទុកថាអាហារអាក្រក់បំផុតក្នុងលោក។ Haggis គឺជាអាហារដែលមានរសជាតិឈ្ងុយឆ្ងាញ់ ផលិតចេញពីបេះដូង ថ្លើម និងសួតចៀម រួមផ្សំជាមួយខ្ទឹមបារាំង ម្សៅស្រូវសាលី ស៊ុប និងគ្រឿងទេស ដែលដាក់ក្នុងក្រពះរបស់សត្វ។ ថ្វីត្បិតតែមានការផ្សំគ្រឿងមិនគួរឱ្យជឿបែបនេះក៏ដោយ ក៏មនុស្សជាច្រើនយល់ថាវាឆ្ងាញ់ ជាមួយនឹងរសជាតិដ៏សម្បូរបែបមិនធ្លាប់មាន។

៦.ពងទាកូន៖ ពងទាកូនគឺជាអាហារសម្រន់ដ៏ពេញនិយមមួយរបស់ប្រទេសហ្វីលីពីន ប៉ុន្តែត្រូវបានគេចាត់ទុកថាជាអាហារអាក្រក់បំផុតនៅលើពិភពលោក។ មុខម្ហូបនេះយើងត្រូវញ៉ាំជាមួយជី ឬខ្ទឹមជ្រក់លាយជាមួយអំបិលម្រេច និងក្រូចឆ្មារ ដែលវាក៏មានលក់នៅតាមដងផ្លូវនានាក្នុងប្រទេសកម្ពុជាយើងផងដែរ។

៧.ប្រហុក៖ ប្រហុករបស់ខ្មែរយើងក៏ត្រូវបានគេចាត់ទុកថាជាអាហារអាក្រក់បំផុតនៅលើពិភពលោកដែរ ដោយសារវាមានក្លិនស្អុយ ទោះជាយ៉ាងណាវាគឺជាមុខម្ហូបដ៏ល្អបំផុតរបស់ប្រទេសយើង និងជាគ្រឿងផ្សំដែលមិនអាចខ្វះបាន៕

នាព្រឹត្តិការណ៍អូឡាំពិកប៉ារីសឆ្នាំ២០២៤នេះ កម្ពុជា នៅសល់តែអត្តពលិកម្នាក់ទៀតប៉ុណ្ណោះ ដែលនឹងប្រកួតនៅក្នុងថ្ងៃនេះ ខណៈអត្តពលិក២រូបផ្សេងទៀតបានបរាជ័យរួចមកហើយ។

អត្តពលិកកម្ពុជាចុងក្រោយគេនេះ គឺកីឡាករ ឈុន ប៊ុនថន ដែលត្រូវប្រកួតថ្ងៃទី៧ ខែសីហា ម៉ោង ៦ល្ងាច ម៉ោងនៅកម្ពុជា លើវិញ្ញាសារត់ចម្ងាយ ៨០០ម៉ែត្រ។

ឈុន ប៊ុនថន ជាម្ចាស់ជើងឯកលេខ១ ក្នុងវិញ្ញាសាររត់ចម្ងាយ ៨០០ម៉ែត្រ និង ១ ៥០០ម៉ែត្រ ក្នុងការប្រកួតកីឡាជាតិលើកទី១ និងលើកទី២ បាននាំមុខគេនៅក្នុងការប្រកួតជម្រុះរត់ចម្ងាយ ៨០០ម៉ែត្រក្នុងក្រុមទី២ ដែលមានកីឡាករ ៨ប្រទេសចូលរួម។

មិនតែប៉ុណ្ណោះ រូបគេក៏ជាម្ចាស់មេដាយមាសសុីហ្គេមឆ្នាំ២០២៣​ ដែលកម្ពុជាធ្វើជាម្ចាស់ផ្ទះផងដែរ។

គួរបញ្ជាក់ផងដែរថា កម្ពុជា មានអត្តពលិក៣នាក់ប៉ុណ្ណោះ ដែលចូលរួមរឹត្តិការណ៍អូឡាំពិកប៉ារីស ដោយក្នុងនោះ កីឡាករ អង់គ្វីន ម៉ាតាំងក្លូឌ ដែលប្រកួតក្នុងវិញ្ញាហែលទឹកសេរី១០០ម៉ែត្រ កាលពីថ្ងៃទី៣០ ខែកក្កដា កន្លងទៅបានបាត់បង់សិទ្ធឡើងទៅវគ្គបន្តហើយ ដោយធ្វើបានត្រឹមលេខ៣។

រីឯកីឡាការិនី សាក់ប៊ុន អប្សរា កាតារីណា ដែលប្រកួតលើវិញ្ញាសាហែលទឹក ៥០ម៉ែត្រ ក៏ធ្វើមិនបានល្អ បាត់បង់សិទ្ធឡើងទៅវគ្គបន្តផងដែរ៕

ទឹកជ្រោះប៊ូស្រានាជំនោរវស្សានេះ បង្កើតបានជាឋានសួគ៌គួរជាទីមនោរម្យ ដែលទាក់ចិត្តភ្ញៀវទេសចរទាំងជាតិនិងអន្តរជាតិ មិនអាចមើលរំលងរមណីយធម្មជាតិមួយនេះឡើយ នៅពេលបានមកកម្សាន្តក្នុងខេត្តមណ្ឌលគិរី។

ថ្មីៗនេះ យោងតាមវីដេអូដែលបានដាក់បង្ហោះដោយ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹកនិងឧតុនិយម គឺបានបង្ហាញពីទិដ្ឋភាពទឹកជ្រោះប៊ូស្រាដ៏ស្រស់ត្រកាលនាជំនោរវស្សា ដោយភ្ជាប់មកជាមួយនឹងខ្លឹមសារថា«នេះជារបស់កូនខ្មែរ មិនបានកាត់ទៅឲ្យបរទេសណាទេ។ បើស្រលាញ់ សូមអញ្ជើញទៅលេងផង»។

ទឹកជ្រោះប៊ូស្រាស្ថិតនៅក្នុងប្រភេទរមណីយដ្ឋាន ទឹកជ្រោះឬទឹកធ្លាក់ និងទេសចរណ៍ធម្មជាតិ ហើយក៏ត្រូវបានគេចាត់ចំណាត់ថ្នាក់ថាជាទឹកជ្រោះធំជាងគេបំផុតមួយនៅកម្ពុជា។ ទឹកជ្រោះប៊ូស្រា ដែលមានទីតាំងស្ថិតនៅភូមិពូទិស ឃុំប៊ូស្រា ស្រុកពេជ្រាដា ខេត្តមណ្ឌលគិរី មានចម្ងាយប្រហែល ៤៣ គីឡូម៉ែត្រ ពីរង្វង់មូលគោព្រៃ។

បន្ថែមពីលើការគយគន់ទិដ្ឋភាពទឹកជ្រោះដ៏ស្រស់ត្រកាលគ្មានពីរ ព័ន្ធជុំវិញព្រៃប្រឹក្សាដ៏ខៀវស្រងាត់ហើយ នៅទីនោះភ្ញៀវទេសចរគ្រប់ៗរូបក៏អាចរីករាយជាមួយសកម្មភាពសប្បាយៗជាច្រើនទៀតដូចជា លេងទឹកឬហែលទឹក, ជិះខ្សែរ៉ក , ខ្យូសបរិភោគអាហារ ឬរៀបចំអាហារដោយខ្លួនឯងក៏បាន និងការស្លៀកពាក់បែបជនជាតិដើមភាគតិចព្នងដើម្បីថតរូបទុកជាអនុស្សាវរីយ៍ជាដើម។

គួរបញ្ជាក់ថា ទឹកជ្រោះប៊ូស្រាមាន៣ ដំណាក់ ហើយអ្នកលេងទឹកភាគច្រើនគឺប្រជុំគ្នានៅដំណាក់ទី១។ កម្រមានអ្នកទេសចរទៅដល់ដំណាក់ទី៣ណាស់ ដោយសារស្ថិតនៅក្នុងព្រៃក្រាស់ ពុំមានផ្លូវសម្រាប់អ្នកថ្មើរជើង។
• ដំណាក់ទី១: ទឹកហូរធ្លាក់ក្នុងកំពស់ ៨ ទៅ ១២ម៉ែត្រ ដែលមានមុខកាត់ទទឹង ១៥ម៉ែត្រ នៅរដូវវស្សា និង កំពស់ពី១០ ទៅ ១៥ម៉ែត្រ នៅរដូវប្រាំង។
• ដំណាក់ទី២: ហូរធ្លាក់ពីកំពស់ ១៥ ទៅ ២០ម៉ែត្រ និង មុខកាត់ទទឹង ២០ម៉ែត្រនៅរដូវវស្សា និង កំពស់ពី១៨ ទៅ ២៥ម៉ែត្រ ដែលមានមុខកាត់១៣ម៉ែត្រ នៅរដូវប្រាំង។ ទឹកធ្លាក់ទី២នេះ មានចំងាយ១៥០ម៉ែត្រពីទឹកធ្លាក់ទី១។
• ដំណាក់ទី៣: ហូរធ្លាក់ដោយល្បឿនលឿនខ្លាំងជាងល្បាក់ទី២។ ល្បាក់នេះ យើងមិនអាចទៅដល់បានទេ ពីព្រោះជាតំបន់ព្រៃក្រាស់ ខ្វះមធ្យោបាយធ្វើដំណើរ និង តំបន់គ្រោះថ្នាក់នៃពពួកសត្វព្រៃ៕