ប្រទេសអាហ្សង់ទីន ៖ វាបានធ្វើឱ្យអ្នកវិទ្យាសាស្ត្រ និងអ្នកស្រាវជ្រាវជាច្រើននាក់ឆ្ងល់ជាខ្លាំង ពេលឃើញកោះអាថ៌កំបាំងមួយមានរាងជារង្វង់មូល និងអាចផ្លាស់ទីដោយខ្លួនឯង ។ អ្នកបានឃើញកោះនេះសួរថា តើវាកើតឡើងដោយសារធម្មជាតិ ឬជាទីតាំងរបស់មនុស្សក្រៅភព?

ប៉ារ៉ាណា គឺជាទន្លេវែងបំផុតនៅទ្វីបអាមេរិក ដែលមានប្រវែងរហូតដល់៤.៨៨០គីឡូម៉ែត្រ និងហូរឆ្លងកាត់ប្រទេសចំនួន៣ ដូចជា ៖ ប្រេស៊ីល, ប៉ារ៉ាហ្គាយ និងអាហ្សង់ទីន ។ ប៉ុន្តែទន្លេនេះមានរឿងរ៉ាវប្លែកៗ ហើយក្នុងចំណោមនោះមានរឿងរ៉ាវមួយធ្វើឱ្យបណ្តាអ្នកស្រាវជ្រាវឆ្ងល់ជាខ្លាំង គឺកោះនៅបរិវេណតំបន់ដីសណ្តឈ្មោះថា «The Eye» ឬឈ្មោះ «EL Ojo» ដែលភាសាអេស្ប៉ាញ មានន័យថា «កែវភ្នែក» ។

កោះ The Eye មានរាងជារង្វង់មូលស្ថិតនៅតំបន់ឌែលតាប៉ារ៉ាណា និងនៅជិតទីក្រុងបួណូស អៃរេស ។ កោះនេះមានអង្កត់ផ្ចិតប្រមាណ១២០ម៉ែត្រ ហើយវាអាចបម្លាស់ទីដោយខ្លួនឯង ស្រដៀងនឹងកែវភ្នែកមនុស្សកំពុងសម្លឹងមើលបរិវេណជុំវិញ ។

លោក សេសជិអូ ណេអុសប៊ីល័រ ជាអ្នកដឹកនាំថតភាពយន្តជនជាតិអាហ្សង់ទីន បានឃើញកោះនេះដោយចៃដន្យ ក្នុងអំឡុងពេលលោកស្វែងរកទីតាំងថតភាពយន្តរឿងមនុស្សក្រៅភព និងរឿងរ៉ាវអាថ៌កំបាំង ។ ពីដំបូង លោកមានគម្រោងថតភាពយន្តនៅលើកោះនេះ ប៉ុន្តែពេលលោកត្រឡប់មកកោះម្តងទៀត ស្រាប់តែឃើញថា វាបានប្តូរទីតាំង ។

ភស្តុតាងអាចពិសោធន៍ថា កោះនេះបម្លាស់ទីបាន គឺដោយសាររូបភាពថតពីលើអាកាសរបស់ Google Earth ។ ពេលគេយករូបភាពកោះដែលថតខុសពេលវេលា ឬថតខុសថ្ងៃគ្នាមកប្រៀបធៀប គេនឹងឃើញយ៉ាងច្បាស់ថា កោះបានបម្លាស់ទីនៅបរិវេណជិតៗ ។ រហូតមកដល់ពេលនេះ ពុំទាន់មានការបកស្រាយច្បាស់លាស់ថា ហេតុអ្វីទើបវាអាចបម្លាស់ទីបែបនេះ?

អ្នកវិទ្យាសាស្ត្រជឿថា កោះ The Eye បានកើតឡើងនៅឆ្នាំ២០០៣ ហើយបើទោះជាមតិផ្សេងៗលើកឡើងពីកោះខុសៗគ្នា ប៉ុន្តែគ្មានការបញ្ជាក់តាមវិទ្យាសាស្ត្រពីកំណើតរបស់កោះទេ ។ ការលើកឡើងមួយតាមវិទ្យាសាស្ត្រដែលបកស្រាយពីរាងមូលរបស់កោះ គឺកើតឡើងដោយសារទឹកត្រជាក់ធ្វើឱ្យវាបម្លាស់ទី ។ អ្នកវិទ្យាសាស្ត្រខ្លះទៀតជឿថា អាចមានទឹកត្រជាក់នៅក្រោមកោះ ដែលមានសីតុណ្ហភាព និងពណ៌ខុសគ្នាពីទឹកនៅបរិវេណជុំវិញ ។

ប៉ុន្តែនេះគ្រាន់តែជាការសន្និដ្ឋានប៉ុណ្ណោះ ពីព្រោះបច្ចុប្បន្ន គ្មានភស្តុតាងផ្នែកវិទ្យាសាស្ត្រច្បាស់លាស់ពាក់ព័ន្ធនឹងកំណើតរបស់កោះឡើយ ។ ក្រុមអ្នកស្រាវជ្រាវ និងអ្នកវិទ្យាសាស្ត្រប្រាប់ថា កោះរង្វង់មូលអាចបម្លាស់ទីនេះមានលក្ខណៈដូចគ្នានឹងតំបន់ផ្សេងៗលើពិភពលោក ដូចជា ៖ ប្រទេសហ្វាំងឡង់, តួកគី, អ៊ីតាលី, ស៊ែប៊ី, រូម៉ានី និងឥណ្ឌា ព្រមទាំងកោះសិប្បនិម្មិតដែលមនុស្សបង្កើតឡើងសម្រាប់រស់នៅ គឺកោះនៅប្រទេសប៉េរូ ។

កោះអណ្តែតទឹកទាំងនេះភាគច្រើនកើតឡើងពីរុក្ខជាតិប្រមូលផ្តុំគ្នា រហូតដល់របូតពីច្រាំងអណ្តែតទៅកណ្តាលទឹក ។ ពេលយូរបន្តិច រុក្ខជាតិទាំងនេះក៏ធំលូតលាស់ និងដុះពាសពេញធ្វើឱ្យឫសវាអណ្តែតទៅឆ្ងាយ ។ ហេតុនេះ ឫសរុក្ខជាតិពុំអាចដុះដល់បាតទឹកទេ វានឹងប្រើប្រាស់អុកស៊ីសែនស្រូបពីឫសជួយឱ្យដើមវាដុះនៅកណ្តាលទឹក ទើបវាក្លាយជាកោះអណ្តែតទឹក ។

នេះជាការបកស្រាយសម្រាប់ការអណ្តែតរបស់កោះ ប៉ុន្តែពុំអាចបកស្រាយពីការបម្លាស់ទីទៅបរិវេណក្បែរៗកោះបានទេ ទើបធ្វើឱ្យអ្នកជឿលើអប៉ីជំនឿ និងជឿរឿងមនុស្សក្រៅភព ជឿថា កោះនេះពុំបានកើតឡើងតាមធម្មជាតិទេ វាជាកោះសិប្បនិម្មិតបង្កើតឡើងដោយមនុស្សក្រៅភព ។ ប៉ុន្តែរូបភាពកោះដែលបានថតទុកអស់រយៈពេលជិត២០ឆ្នាំ គឺចាប់ពីឆ្នាំ២០០៣ ជាភស្តុតាងបង្ហាញថា កោះមានដើមកំណើតតាំងពីពេលមុននេះ ។

លោក សេសជិអូ ណេអុសប៊ីល័រ ចូលចិត្តកោះ The Eye យ៉ាងខ្លាំង ហើយលោកព្យាយាមរកវិធីស្រាវជ្រាវកោះជាមួយក្រុមវិស្វករដើម្បីពិសោធន៍ថា តើវាកើតឡើងតាមធម្មជាតិ ឬយ៉ាងណា? នៅឆ្នាំ២០១៦ លោកបានរៃអង្គាសប្រាក់ចំនួន៥ម៉ឺនដុល្លារអាមេរិកដើម្បីស្រាវជ្រាវកោះ ប៉ុន្តែលោកបរាជ័យ ។ បច្ចុប្បន្ន កោះអាថ៌កំបាំងអាចបម្លាស់ទីដោយខ្លួនឯង នៅតែជាចម្ងល់របស់អ្នកស្រាវជ្រាវបន្តទៀត ៕

ប្រទេសចិន ៖ ស្របពេលសីតុណ្ហភាពកើនឡើងខ្ពស់នៅប្រទេសចិន វាមិនត្រឹមតែធ្វើឱ្យមនុស្សក្តៅប៉ុណ្ណោះទេ ប៉ុន្តែរថយន្តក៏ក្តៅដូចគ្នាដែរ ។ គេឃើញរថយន្តជាច្រើនគ្រឿងនៅចិនមានសភាពហើមប៉ោង មិនថាផ្នែកមុខ, ផ្នែកក្រោយ និងចំហៀង ហើយអ្នកប្រើប្រាស់បណ្តាញសង្គមហៅថា «រថយន្តមានផ្ទៃពោះ» ។

អ្នកប្រើប្រាស់បណ្តាញសង្គមចិន ជាពិសេស បណ្តាញសង្គម X (ឬ Twitter) បានជជែកគ្នាយ៉ាងច្រើនពាក់ព័ន្ធនឹងវីដេអូមួយ ដែលបង្ហាញពីរថយន្តជាច្រើនគ្រឿងមានសភាពប៉ោងនៅផ្នែកខាងក្រៅ ស្រដៀងនឹងមនុស្សមានផ្ទៃពោះ ។ ម្ចាស់រថយន្តជាច្រើនបារម្ភពីបញ្ហានេះ ហើយពួកគេបានសាកសួរពីមូលហេតុពិតប្រាកដ ដែលធ្វើឱ្យរថយន្តប៉ោងជាបន្តបន្ទាប់ ។

Jennifer Cheng ជាអ្នកសារព័ត៌មានដែលមានលំនៅឋាននៅសហរដ្ឋអាមេរិក ប៉ុន្តែបច្ចុប្បន្ន មករស់នៅប្រទេសចិន បានចែកចាយវីដេអូមួយក្នុងបណ្តាញសង្គម X ព្រមទាំងសរសេរថា ៖ «វាមិនមែនជារឿងកំប្លែងទេ! រថយន្តផលិតនៅចិនមានផ្ទៃពោះ ដោយសារអាកាសធាតុក្តៅខ្លាំង» ។

រូបភាពវីដេអូខាងលើត្រូវបានគេយកមកជជែកគ្នាយ៉ាងច្រើន និង Share យ៉ាងឆាប់រហ័សក្នុងបណ្តាញសង្គម ហើយមានចំនួនអ្នកទស្សនាយ៉ាងហោចណាស់ ស្មើនឹង៧៥ម៉ឺន៧ពាន់លើក ។ គេឃើញរថយន្តទំនើបជាច្រើនគ្រឿង ដែលចតនៅតាមទីសាធារណៈមានសភាពប៉ោងដូចៗគ្នា ។

សារព័ត៌មានចិនរាយការណ៍ថា ស្របពេលសីតុណ្ហភាពកើនឡើងខ្ពស់បំផុតនៅចិន ទើបថ្នាំការពារផ្នែកខាងក្រៅរថយន្តហើមបែបនេះ ។ រីឯអ្នកប្រើប្រាស់បណ្តាញសង្គមជាច្រើនឃើញហើយអស់សំណើច ខណៈអ្នកខ្លះទៀតបារម្ភ និងសន្និដ្ឋានខុសៗគ្នា ។

ទោះយ៉ាងណា មនុស្សមួយចំនួនបានធូរចិត្តបន្តិចពាក់ព័ន្ធនឹងរថយន្តប៉ោង ដោយសារវាមិនពាក់ព័ន្ធនឹងបច្ចេកទេសផលិតរថយន្តទេ ។ ប៉ុន្តែវាពាក់ព័ន្ធនឹងសីតុណ្ហភាពកើនឡើងខ្ពស់ ដែលពុំធ្លាប់កើតឡើងនៅប្រទេសចិន ។ បើទោះជារថយន្តទាំងនេះបានបិទស្រទាប់ Film សម្រាប់ការពារកំដៅថ្ងៃក្តី ប៉ុន្តែពេលសីតុណ្ហភាពកើនឡើងខ្ពស់ វានឹងធ្វើឱ្យស្រទាប់ការពារនេះពុំអាចទប់ទល់បាន ។

ហេតុនេះ ដើម្បីកាត់បន្ថយផលប៉ះពាល់ដោយសារអាកាសធាតុក្តៅខ្លាំង អ្នកជំនាញបានណែនាំឱ្យម្ចាស់រថយន្តប្រើប្រាស់ស្រទាប់ Film (ដែលមានរាងជាសន្លឹកស្តើងៗសម្រាប់បិទរថយន្តការពារកំដៅថ្ងៃ) និងប្រើប្រាស់កាវមានគុណភាពល្អ ។ ក្រៅពីនេះ គួរតែចៀសវាងចតរថយន្តហាលថ្ងៃនៅពេលមេឃក្តៅខ្លាំង ៕

ប្រទេសថៃ ៖ កាលពីថ្ងៃទី២៣ ខែសីហា ឆ្នាំ២០២៤ សារព័ត៌មានថៃរាយការណ៍ថា មហាជនផ្ទុះការរិះគ.ន់ ថា តើសមត្ថកិច្ចបាត់ទៅណាអស់ ទើបបណ្តោយឱ្យយុវតីម្នាក់យកវ៉ាលិសអគ្គិសនីប្រើក្នុងអាកាសយានដ្ឋានមកជិះលើផ្លូវ «វីផាវ៉ាឌី រាំងស៊ីត» ក្នុងទីក្រុងបាងកក និងឱនមុខចុចទូរស័ព្ទ ពុំខ្វល់ពីយានជំនិះផ្សេងទៀត ។ ការរិះគ.ន់ ពីសំណាក់មហាជន គឺក្រោយមានការចែកចាយវីដេអូយុវតីនេះយ៉ាងច្រើនក្នុងបណ្តាញសង្គម ។

នៅក្នុងវីដេអូ គេបានឃើញយុវតីខាងលើពុំពាក់មួកសុវត្ថិភាព ជិះវ៉ាលិសធ្វើដំណើរអគ្គិសនីនៅតាមផ្លូវជាមួយរថយន្តតូច-ធំជាច្រើនគ្រឿងទៀត ហើយធ្វើឱ្យអ្នកប្រើប្រាស់បណ្តាញសង្គមឃើញរូបភាពនេះរិះគន់ថា វាជាទង្វើពុំសមរម្យទាល់តែសោះ និងខុសច្បាប់ ។

បច្ចុប្បន្ន វ៉ាលិសធ្វើដំណើរអគ្គិសនីទទួលបានការពេញនិយមខ្លាំងក្នុងបណ្តាញសង្គម ពីព្រោះការផលិតវ៉ាលិសនេះឡើង គឺដើម្បីបង្កលក្ខណៈងាយស្រួលដល់អ្នកដំណើរប្រើប្រាស់ក្នុងអាកាសយានដ្ឋានតែប៉ុណ្ណោះ ។ វ៉ាលិសនេះអាចទ្រទ្រង់ទម្ងន់ខ្លួនមនុស្សបាន ប៉ុន្តែយុវតីខាងលើបែរជាយកវ៉ាលិសមកជិះពេញផ្លូវធ្វើឱ្យមហាជនឃើញហើយបារម្ភពីសុវត្ថិភាពការធ្វើដំណើរ ។

វីដេអូយុវតីជិះវ៉ាលិសអគ្គិសនីតាមដងផ្លូវត្រូវបានមហាជនរិះគន់យ៉ាងខ្លាំង ដោយសារនាងពុំពាក់មួកសុវត្ថិភាព និងគ្មានឧបករណ៍សម្រាប់ការពារខ្លួនអ្វីទាំងអស់ ។ លើសពីនេះ នាងថែមទាំងអង្គុយលើវ៉ាលិសរបស់ខ្លួននៅពីក្រោយគូទរថយន្តក្រុង ក្នុងទីក្រុងបាងកកទៀតផង ។

មហាជនសួរថា តើទង្វើនេះសមរម្យ និងស្របច្បាប់ប្រទេសថៃដែរឬទេ? ហើយវ៉ាលិសអគ្គិសនីសម្រាប់ប្រើប្រាស់ក្នុងអាកាសយានដ្ឋាន ពិតជាអាចជិះតាមផ្លូវបែបនេះ មែនទេ? យុវតីនេះមិនខ្វល់នឹងយានជំនិះផ្សេងទៀត ដោយសារនាងរវល់ឱនមុខចុចទូរស័ព្ទដៃគ្រប់ពេលវេលា ។ ហេតុនេះ មហាជនសំណូមពរឱ្យស្ថាប័នពាក់ព័ន្ធត្រួតពិនិត្យករណីនេះជាបន្ទាន់ ដើម្បីសុវត្ថិភាពតាមផ្លូវ ។

អ្នកប្រើប្រាស់បណ្តាញសង្គមម្នាក់និយាយថា ៖ «យុវតីនេះអាចជាជនជាតិចិន និងមិនខ្លាចស្លាប់» ។ បន្ទាប់មក ជនជាតិថៃម្នាក់ក៏ឆ្លើយតបទៅមតិនេះថា ៖ «នាងធ្លាប់ជិះវ៉ាលិសអគ្គិសនីនៅចិន ប៉ុន្តែនាងពុំអាចជិះនៅថៃបានទេ» ។ រីឯជនជាតិថៃផ្សេងទៀតថា ៖ «នាងចុចទូរស័ព្ទបណ្តើរ ជិះវ៉ាលិសបណ្តើរ ដោយសារនាងរវល់ឆែកមើលផែនទីផ្លូវ» ។

គួរបញ្ជាក់ថា វ៉ាលិសអគ្គិសនីអាចរត់បានក្នុងចម្ងាយលឿនបំផុតស្មើនឹង១៣គីឡូម៉ែត្រក្នុង១ម៉ោង និងរត់លើផ្លូវរហូតដល់១០គីឡូម៉ែត្រឯណោះ ហើយវ៉ាលិសប្រភេទនេះមានឧបករណ៍ដំឡើង និងបន្ថយល្បឿនគ្រប់បែបយ៉ាង ។ ប្រទេសនានាពុំអនុញ្ញាតឱ្យពលរដ្ឋជិះវ៉ាលិសនេះនៅតាមផ្លូវទេ ដូចជា ៖ ជប៉ុនបានហាមជិះវ៉ាលិសនេះដាច់ខាត បើគ្មានលិខិតអនុញ្ញាត ថែមទាំងពិន័យប្រាក់ទៀតផង ខណៈចិនក៏មានច្បាប់ហាមជិះវ៉ាលិសនេះនៅតាមផ្លូវដែរ ៕

ប្រទេសវៀតណាម ៖ រដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម លោក ឡេ មិនហួន ថ្លែងថា វៀតណាមគួរតែជំរុញទុរេនឱ្យក្លាយជាផ្លែឈើតំណាងជាតិ តាមរយៈការកំណត់ស្តង់ដារគុណភាព និងបង្កើតម៉ាកយីហោ ដើម្បីប្រកួតប្រជែងជាមួយបណ្តាប្រទេសនាំចេញទុរេន ដូចជា ៖ ថៃ និងម៉ាឡេស៊ី ។ នេះបើតាមការចុះផ្សាយរបស់សារព័ត៌មានវៀតណាម កាលពីថ្ងៃទី២២ ខែសីហា ឆ្នាំ២០២៤ ។

រដ្ឋមន្ត្រីក្រសួងកសិកម្មរូបនេះបន្តថា ការជំរុញឱ្យទុរេនក្លាយជាផ្លែឈើ ឬផលិតផលតំណាងជាតិ ចាំបាច់ត្រូវតែពឹងផ្អែកលើគោលនយោបាយកសិកម្មដ៏ទូលំទូលាយ និងបណ្តុះបណ្តាលផ្តល់ចំណេះដឹងដល់កសិករ និងផ្នែកអាជីវកម្ម ។ នេះជាចំណុចសំខាន់ ដោយសារបច្ចុប្បន្ន វៀតណាមដើរតាមក្រោយប្រទេសថៃ និងម៉ាឡេស៊ី ក្នុងការនាំចេញផ្លែឈើទៅប្រទេសចិន ហើយការដាំដុះទុរេននៅវៀតណាមមានទ្រង់ទ្រាយតូច និងដាំដុះក្នុងតំបន់ឆ្ងាយៗពីគ្នា ។

ក្រៅពីនេះ ផលិតផលនីមួយៗត្រូវតែឆ្លងកាត់លក្ខណៈវិនិច្ឆ័យជាច្រើនដំណាក់កាល ដើម្បីឱ្យវាមានគុណសម្បត្តិក្លាយជាផលិតផលតំណាងជាតិ ដូចជា ៖ ទំហំ, សមត្ថភាពប្រកួតប្រជែងផ្នែកនាំចេញ, ការប្រើប្រាស់បច្ចេកវិទ្យា និងសក្តានុពលកាន់កាប់កម្មសិទ្ធិបញ្ញា ។

ក្រុមអ្នកជំនាញវៀតណាមរំពឹងថា នៅចុងឆ្នាំ២០២៤នេះ ការនាំចេញទុរេនរបស់វៀតណាមនឹងកើនឡើងរហូតដល់៣ពាន់៥រយលានដុល្លារអាមេរិក ដោយសារការពិចារណាពីលក្ខខណ្ឌអំណោយផល នាពេលបច្ចុប្បន្ន ។

គួរបញ្ជាក់ថា ប្រទេសវៀតណាមទទួលបានប្រាក់ចំណូលពីការនាំចេញទុរេន ស្មើប្រមាណ១ពាន់៧រយលានដុល្លារអាមេរិក គិតចាប់ពីខែមករា រហូតដល់ខែកក្កដា ឆ្នាំ២០២៤ ។ រីឯចិន គឺជាប្រទេសនាំចូលទុរេនវៀតណាមច្រើនបំផុត ។

ការនាំចេញទុរេនទៅចិន គឺវៀតណាមមានប្រៀបជាងប្រទេសផ្សេងៗ ដោយសារវៀតណាមលក់ទុរេនថោកជាងគេ រហូតដល់២០% និងនាំចេញទៅចិនឆាប់រហ័សទៀតផង ។ វាបានធ្វើឱ្យប្រទេសនានាភ្ញាក់ផ្អើលយ៉ាងខ្លាំង ពីព្រោះចិនទើបតែអនុញ្ញាតឱ្យវៀតណាមនាំចេញទុរេនទៅប្រទេសខ្លួនកាលពីឆ្នាំ២០២២ ប៉ុណ្ណោះ ប៉ុន្តែបច្ចុប្បន្ន ទុរេនវៀតណាមបានវ៉ាដាច់ទុរេនថៃក្នុងទីផ្សារចិន ។

មូលហេតុធ្វើឱ្យទុរេនវៀតណាមមានប្រៀបជាងគេ ដោយសារវៀតណាមមានព្រំដែនជាប់ចិន ទើបការចំណាយដើមទុនដឹកជញ្ជូនទុរេនអស់ថោកជាងប្រទេសផ្សេង ។ ហេតុនេះ វៀតណាមអាចលក់ទុរេនឱ្យចិនក្នុងតម្លៃថោកបាន ៕

សហរដ្ឋអាមេរិក ៖ ពលរដ្ឋអាមេរិកសួរថា តើវាជាអ្វីឱ្យប្រាកដ? ហេតុអ្វីទើបកើតជារង្វង់មូលបែបនេះ? ពួកគេក៏នាំគ្នាយកទូរស័ព្ទមកថតរូបភាព និងវីដេអូបង្ហោះក្នុងបណ្តាញសង្គម ក្រោយឃើញរង្វង់មូលអាថ៌កំបាំងពណ៌ខ្មៅមួយហោះលើមេឃ ក្នុងទីក្រុង Williamsburg សហរដ្ឋអាមេរិក ។ មនុស្សភាគច្រើនយល់ថា វាអាចជាសញ្ញាបង្ហាញថា នឹងមានហេតុការណ៍អាក្រ.ក់ កើតឡើង ។

ក្នុងវីដេអូថតកាលពីថ្ងៃទី២០ ខែសីហា ឆ្នាំ២០២៤ គេបានឃើញរង្វង់មូលខ្មៅមួយ ដែលស្រដៀងគ្នានឹងអ្នកណាម្នាក់យកប៊ិកមកគូសរង្វង់លើមេឃ ហើយធ្វើឱ្យមតិខ្លះសន្និដ្ឋានថា វាគ្រាន់តែជារូបភាពកាត់តប៉ុណ្ណោះ ។ ប៉ុន្តែមានមនុស្សមួយក្រុមទៀតបញ្ជាក់ថា ពួកគេក៏បានឃើញរង្វង់មូលដូចគ្នាដែរ ទើបធ្វើឱ្យមហាជនចង់ដឹងការពិតកាន់តែខ្លាំង ។

លោក រ៉នស្តេប បានផ្ញើវីដេអូទៅសារព័ត៌មានអាមេរិក ហើយបញ្ជាក់ថា លោកកំពុងតែធ្វើការនៅបរិវេណក្បែរមន្ទីរពេទ្យឈ្មោះ «អ៊ីថឺនស្តេត» ក្នុងទីក្រុង Williamsburg រដ្ឋ Virginia ស្រាប់តែឃើញរង្វង់មូលដ៏ចម្លែកមួយលើមេឃ ។ វាជារង្វង់មូលផ្សែងយ៉ាងធំហោះលើមេឃប្រមាណជា១០នាទី បន្ទាប់មក វាក៏បាត់ទៅវិញ ។

សារព័ត៌មានអាមេរិក និងមនុស្សមួយចំនួនបានព្យាយាមរកមូលហេតុដែលបណ្តាលឱ្យកើតរង្វង់មូល ដោយពួកគេបានស្រាវជ្រាវឯកសារ និងស្វែងរកព័ត៌មានក្នុងអ៊ីនធើរណេត ដែលសរសេរពាក់ព័ន្ធនឹងហេតុការណ៍នេះ ។ បើតាមការស្រាវជ្រាវរបស់ពួកគេបញ្ជាក់ថា វាអាចកើតឡើងដោយសារភ្លើងឆេះ ឬផ្ទុះអ្វីម្យ៉ាង ទើបបង្កើតជារង្វង់ ។

ក្រោយមក សារព័ត៌មានអាមេរិកក៏បានទាក់ទងទៅភ្នាក់ងារពន្លត់អគ្គិភ័យក្នុងតំបន់នោះភ្លាមៗដើម្បីសួរថា តើមានហេតុការណ៍ភ្លើងឆេះក្នុងពេល ពលរដ្ឋរាយការណ៍ថា មានរង្វង់មូលលើមេឃនៅទីកុ្រង Williamsburg ដែរឬទេ? ប្រធានផ្នែកពន្លត់អគ្គិភ័យប្រាប់ថា គ្មានអ្នកណារាយការណ៍ពីភ្លើងឆេះទេ ។

សារព័ត៌មានអាមេរិកសួរបន្តថា តើមានឆ្នាំងដាំបាយអគ្គិសនីផ្ទុះដែរឬទេ? ប្រធានផ្នែកពន្លត់អគ្គិសនីបញ្ជាក់ថា លោកបានទាក់ទងទៅកាន់អាជ្ញាធរទីក្រុង Williamsburg និងទីក្រុងផ្សេងទៀត ប៉ុន្តែពួកគេប្រាប់ថា គ្មានហេតុការណ៍គ្រោះថ្នាក់ពាក់ព័ន្ធនឹងសម្ភារៈអគ្គិសនីទេ ។

ចំណែកមន្ត្រីឧតុនិយមនិយាយថា លោកធ្លាប់ឃើញរង្វង់មូលបែបនេះកើតឡើងដោយសារកាំជ្រួច ហើយវាអាចបណ្តាលមកពីផ្សែងចេញពីរោងចក្រឧស្សាហកម្ម ឬការផ្ទុះ ។ ទោះយ៉ាងណា គ្មានអ្នកណាដឹងថា រង្វង់មូលដ៏ធំនេះកើតឡើងដោយសារអ្វីទេ ។ មតិខ្លះសន្និដ្ឋានថា វាអាចជាបាតុភូតធម្មជាតិកើតឡើងដោយសារពន្លឺ និងស្រមោល ឬជាបាតុភូតថ្មី ដែលខាងឧតុនិយមពុំធ្លាប់ឃើញ ។

អ្នកវិទ្យាសាស្ត្រ និងអ្នកជំនាញជាច្រើនចាប់អារម្មណ៍យ៉ាងខ្លាំង ហើយពួកគេក៏ស្រាវជ្រាវ និងវិភាគព័ត៌មានដែលប្រមូលបានពីរូបភាព និងវីដេអូ ដើម្បីរកការពិតរបស់បាតុភូតដ៏ចម្លែកនេះ ។ វាពុំត្រឹមតែធ្វើឱ្យពលរដ្ឋនៅទីក្រុង Williamsburg ភ្ញាក់ផ្អើលប៉ុណ្ណោះទេ ប៉ុន្តែមនុស្សលើពិភពលោក ក៏ភ្ញាក់ផ្អើលដូចគ្នាដែរ ហើយគិតថា វាជាទ្វារឆ្លងភព ៕

សហរដ្ឋអាមេរិក ៖ កាលពីថ្ងៃទី២១ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ក្រសួងកសិកម្មរបស់អាមេរិកបានប្រកាសឱ្យកែលម្អការផ្តល់អាហារនៅតាមសាលារៀនទាំងអស់ ដូចជា ៖ ហាមបន្ថែមស្ករក្នុងអាហារកូនសិស្ស និងកាត់បន្ថយជាតិសូដ្យូម ។ ការប្រកាសពីគោលការណ៍ថ្មីនេះ គឺដើម្បីបង្កើនគុណភាពអាហារូបត្ថម្ភនៅតាមសាលារៀនទូទាំងប្រទេស ។

វាក៏ជាការផ្លាស់ប្តូរទម្លាប់បរិភោគអាហាររបស់កូនសិស្សផងដែរ ដើម្បីឱ្យយុវជនអាមេរិកមានសុខភាពល្អ ។ លោក Tom Vilsack រដ្ឋមន្ត្រីក្រសួងកសិកម្មអាមេរិកបាននិយាយសង្កត់ធ្ងន់ពីសារៈសំខាន់របស់អាហារកូនសិស្ស ថា ៖ «ការកែលម្អគោលការណ៍ទាំងអស់នេះ គឺដើម្បីឱ្យប្រាកដចិត្តថា កូនសិស្សរបស់យើងនឹងបានបរិភោគអាហារមានប្រយោជន៍ដល់សុខភាព, អាហារមានគុណភាពល្អ និងជាប្រភេទអាហារដែលអាណាព្យាបាលចង់ឱ្យកូនៗបរិភោគ» ។

ក្រៅពីនេះ គោលការណ៍ថ្មីនេះ គឺស្របតាមគោលការណ៍ណែនាំរបបអាហាររបស់អាមេរិកផងដែរ ដែលបង្ហាញពីការយកចិត្តទុកដាក់របស់ស្ថាប័នពាក់ព័ន្ធ ដើម្បីឱ្យយុវជនអាមេរិកមានសុខភាពល្អ ។ រីឯគោលការណ៍សំខាន់ដែលគេជជែកគ្នាច្រើនបំផុតនោះ គឺសាលារៀននានាគួរតែកាត់បន្ថយបរិមាណស្ករ និងសូដ្យូមក្នុងអាហារកូនសិស្ស ។

ការព្យាយាមជំរុញឱ្យសាលារៀននានាយកចិត្តទុកដាក់លើសុខភាពកូនសិស្ស និងស្របតាមគោលការណ៍ណែនាំរបបអាហាររបស់អាមេរិក គឺមានគោលដៅឱ្យយុវជនជ្រើសរើសអាហារល្អសម្រាប់សុខភាពរបស់ពួកគេ និងបង្កើតទម្លាប់បរិភោគអាហារសម្រាប់លើកកម្ពស់សុខុមាលភាពផ្ទាល់ខ្លួន ។

ប៉ុន្តែការអនុវត្តគោលការណ៍ថ្មីនេះអាចជោគជ័យបាន លុះត្រាតែមានការសហការពីស្ថាប័នពាក់ព័ន្ធផ្សេងៗ ដើម្បីផ្តល់អាហារមានប្រយោជន៍ដល់សុខភាពកូនសិស្ស ។ ហេតុនេះ កូនសិស្ស, អាណាព្យាបាល និងអ្នកពាក់ព័ន្ធផ្សេងៗ ចាំបាច់ត្រូវតែចូលរួមសហការអនុវត្តគោលការណ៍ថ្មីឱ្យបានល្អ ហើយកូនសិស្សអាមេរិកអាចបរិភោគអាហារមានប្រយោជន៍ ពីព្រោះវានឹងជួយឱ្យពួកគេលូតលាស់រាងកាយ និងប្រាជ្ញា ៕