សញ្ញាគួរឲ្យបារម្ភ! ថ្មីៗនេះអ៊ីរ៉ង់បានបង្ហើបថាខ្លួនកំពុងពិចារណាដកខ្លួនចេញពីសន្ធិសញ្ញា ស្តីពីការមិនរីកសាយភាយអាវុធនុយក្លេអ៊ែរ- Non-Proliferation Treaty (NPT) ដែលជាចលនាមួយទប់ស្កាត់ការបង្កើនភាពតានតឹងលើកម្មវិធីនុយក្លេអ៊ែរ ដែលជំរុញឲ្យប្រទេសនានាមានការព្រួយបារម្ភយ៉ាងខ្លាំង ព្រោះប្រសិនបើអ៊ីរ៉ង់ធ្វើបែបនេះបានសម្រេចមែន ពិភពលោកនឹងប្រឈមជាមួយវិនា.សកម្មដ៏គួរឲ្យខ្លាចដោយចៀសមិនផុត។

យោងតាមការចុះផ្សាយរបស់កាសែត Xinhua កាលពីដើមសប្ដាហិ៍នេះ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei ថ្លែងនៅក្នុងសន្និសីទសារព័ត៌មានប្រចាំសប្តាហ៍នៅទីក្រុងតេអេរ៉ង់ថា ស្ថាប័នពាក់ព័ន្ធរបស់អ៊ីរ៉ង់ រួមទាំងសភា កំពុងពិចារណាដកខ្លួនចេញពីសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) របស់ប្រទេសនេះ។ ជម្រើសនេះកំពុងស្ថិតក្រោមការពិនិត្យឡើងវិញ ខណៈដែលសម្ពាធកើនឡើងពីជម្លោះភូមិសាស្ត្រនយោបាយ និងជម្លោះជាមួយប្រទេសលោកខាងលិច។

លោក Baghaei បានគូសបញ្ជាក់ថា អ៊ីរ៉ង់មិនដែលស្វែងរកការអភិវឌ្ឍអាវុធនុយក្លេអ៊ែរទេ ហើយមិនមានបំណងធ្វើដូច្នេះទេតែដោយសារតែអ៊ីរ៉ង់រងភាពអយុត្តិធម៌ជាខ្លាំងពីការវាយប្រហាររបស់សហរដ្ឋអាម៉េរិក និងអ៊ីស្រាអែល និងគ្មាននរណាម្នាក់ចេញមុខថ្កោលទោសលើប្រទេសទាំងពីរនេះឡើយ។

គួរជម្រាបថា ប្រទេសអ៊ីរ៉ង់បានចូលរួមក្នុងសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) កាលពីឆ្នាំ 1970 ដែលជាការចូលរួមដើម្បីទប់ស្កាត់ការរីករាលដាលនៃអាវុធនុយក្លេអ៊ែរ លើកកម្ពស់ការប្រើប្រាស់ថាមពលនុយក្លេអ៊ែរដោយសន្តិវិធី និងលើកទឹកចិត្តដល់ការលុបបំបាត់អាវុធ។ ដូច្នេះការចាកចេញពីសន្ធិសញ្ញានេះ នឹងអាចអនុញ្ញាតឱ្យអ៊ីរ៉ង់បង្កើនល្បឿនសកម្មភាពនុយក្លេអ៊ែរដ៏រសើបដោយគ្មានដែនកំណត់ ដែលបង្កើនការភ័យខ្លាចជាសកលជុំវិញការផលិតអាវុ.ធប្រល័យលោក។

ជាក់ស្ដែង ដូចជាប្រទេសកូរ៉េខាងជើង ដែលបានចាកចេញពីកិច្ចព្រមព្រៀងក្នុងឆ្នាំ 2003 ក្រោយមកបានពន្លឿនការអភិវឌ្ឍអាវុធនុយក្លេអ៊ែរដ៏ខ្លាំងក្លា ដែលរហូតមកទល់ពេលនេះកូរ៉េខាងជើងគឺជាការគំរា.មកំហែ.ងដ៏ធំមួយសម្រាប់ពិភពលោក និងបង្កើនហានិភ័យនៃការប្រណាំងប្រជែងសព្វាវុធនុយក្លេអ៊ែរកាន់តែទូលំទូលាយ។

ដោយឡែកចំពោះផែនការដកខ្លួនចេញពីសន្ធិសញ្ញា NPT របស់អ៊ីរ៉ង់ អ្នកវិភាគជាច្រើនបានយល់ឃើញថា ការសម្រេចចិត្តបែបនេះទំនងជានឹងបង្កឱ្យមានប្រតិកម្មខ្លាំងពីសហរដ្ឋអាមេរិក និងសម្ព័ន្ធមិត្តរបស់ខ្លួន ដែលអាចនាំឱ្យមានទណ្ឌកម្មកាន់តែធ្ងន់ធ្ងរ ឬឯកោផ្នែកការទូតបន្ថែមទៀត៕

ទោះមាន ឬគ្មានកិច្ចព្រមព្រៀងណាមួយត្រូវសម្រេចបានក៏ដោយ ក៏សង្រ្គាមដ៏ខ្លាំងក្លានៅអ៊ីរ៉ង់នឹងត្រូវបញ្ចប់ក្នុងរយៈពេលពី ២ ទៅ៣សប្ដាហ៍ទៀតដែរ ឲ្យតែអាមេរិកមានប្រាកដចិត្តថា រដ្ឋាភិបាលទីក្រុងតេអេរ៉ង់ នឹងមិនមានសមត្ថភាពអភិវឌ្ឍអាវុធនុយក្លេអ៊ែររាប់សិបឆ្នាំបន្តទៅមុខទៀត។ នេះបើយោងតាមពាក្យសម្ដីរបស់លោកប្រធានាធិបតី ដូណាល់ត្រាំ ថ្លែងនៅថ្ងៃទី០១ ខែមេសានេះ។

តាមការចុះផ្សាយរបស់ទីភ្នាក់ងារសារព័ត៌មាន Euronews ដែលដកស្រង់ប្រសាសន៍របស់លោក ដូណាល់ត្រាំ ដែលនិយាយចេញពីសេតវិមាន បានឲ្យដឹងថា៖ នៅពេលដែលយើងអាចទុកចិត្តបានថា ទីក្រុងតេអេរ៉ង់មិនអាចអភិវឌ្ឍអាវុធនុយក្លេអ៊ែរបានអស់រយៈពេលជាច្រើនឆ្នាំទៅមុខ សង្រ្គាមនេះអាចបញ្ចប់ក្នុងរយៈពេល «ពីរសប្តាហ៍ ឬបីសប្តាហ៍» ដោយបន្ថែមថា «មិនថាយើងមានកិច្ចព្រមព្រៀងរួមគ្នាឬអត់នោះទេ វានឹងមិនពាក់ព័ន្ធនឹងគ្នាឡើយ»។

សេចក្តីថ្លែងការណ៍នេះបង្ហាញពីការផ្លាស់ប្តូរជាយុទ្ធសាស្ត្រឆ្ពោះទៅរកការទប់ស្កាត់ជាជាងការដោះស្រាយដែលបានចរចារយៈពេលវែង ដោយទីក្រុងវ៉ាស៊ីនតោនផ្តល់អាទិភាពដល់ការពន្យារពេលសមត្ថភាពនុយក្លេអ៊ែររបស់អ៊ីរ៉ង់ជាជាងការធានាកិច្ចព្រមព្រៀងជាផ្លូវការ។

ការកត់សម្គាល់នេះកើតឡើងចំពេលមានភាពតានតឹងកាន់តែខ្លាំងឡើងលើកម្មវិធីនុយក្លេអ៊ែររបស់អ៊ីរ៉ង់ និងទំនាក់ទំនងរបស់ខ្លួនជាមួយសន្ធិសញ្ញាស្តីពីការមិនរីកសាយភាយអាវុធនុយក្លេអ៊ែរ (NPT) ។ ការព្រួយបារម្ភបានកើនឡើងបន្ទាប់ពីទីក្រុងតេអេរ៉ង់បង្ហើបសញ្ញាថា ខ្លួនអាចពិចារណាអំពីការដកខ្លួនចេញពីសន្ធិសញ្ញាហាមឃា.ត់ការបង្កើនអា.វុធនុយក្លេអ៊ែរ ដែលបង្កើនការភ័យខ្លាចយ៉ាងខ្លាំងក្លាដល់អន្តរជាតិ។

អ្នកវិភាគនិយាយថា ជំហររបស់សហរដ្ឋអាមេរិកឆ្លុះបញ្ចាំងពីវិធីសាស្រ្តជាក់ស្តែងដែលមានគោលបំណងកំណត់ហានិភ័យនុយក្លេអ៊ែរភ្លាមៗ ជាជាងការបន្តដំណើរការការទូតដែលអាចអូសបន្លាយពេលយូរ និងមិនប្រាកដប្រជា។ ទោះជាយ៉ាងណាក៏ដោយ អ្នករិះគន់ព្រមានថា ការដកខ្លួនចេញដោយគ្មានកិច្ចព្រមព្រៀងជាផ្លូវការអាចបន្សល់ទុកបញ្ហាដែលមិនទាន់ដោះស្រាយ និងបង្កើតភាពមិនប្រាកដប្រជាអំពីស្ថិរភាពនុយក្លេអ៊ែររយៈពេលវែងនៅក្នុងតំបន់៕

វាពិតជាដំណឹងដ៏គួរឱ្យរីករាយមួយដែលអ្នកវិទ្យាសាស្ត្រចិនបានកំណត់គោលដៅពន្យារអាយុមនុស្សរហូតដល់១៥០ឆ្នាំ បន្ទាប់ពីធ្វើការសាកល្បងជោគជ័យលើសត្វកណ្តុរ បើតាមអ្នកវិទ្យាសាស្ត្រចិន គឺមិនមែនជាសុបិនទេ គោលដៅនេះនឹងសម្រេចនារយៈពេលប៉ុន្មានឆ្នាំខាងមុខ ។ វាធ្វើឱ្យមានការចាប់អារម្មណ៍លើពិភពលោក និងតាមដាន តើគោលដៅនេះនឹងសម្រេចដែរឬទេ ។

អ្នកវិទ្យាសាស្ត្រនៅលើពិភពលោក កំពុងតែចាប់អារម្មណ៍នឹងការរកឃើញថ្មីរបស់អ្នកវិទ្យាសាស្ត្រចិន បន្ទាប់ពីក្រុមហ៊ុនបច្ចេកវិទ្យា និងអ្នកស្រាវជ្រាវចិនឈានមុខបង្ហាញពីភាពជោគជ័យនៃការអភិវឌ្ឍសារធាតុដែលអាចពន្យារពេលការចុះខ្សោយនៃកោសិកា និងកំណត់គោលដៅឱ្យមនុស្សមានអាយុវែងជាងមុនរហូតដល់១៥០ឆ្នាំ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី២៩ ខែមីនា ឆ្នាំ២០២៦ ។

ក្រុមហ៊ុន Lonvi Biosciences (ឬ Longevity Biosciences) នៅទីក្រុង Shenzhen បានផលិតថ្នាំផ្សំពីសារធាតុ Procyanidin C1 (PCC1) ដែលជាសារធាតុប្រមូលផ្តុំក្នុងផ្លែទំពាំងបាយជូរ ។ វាមានគុណសម្បត្តិពិសេសក្នុងការស្វែងរក និងបំផ្លាញកោសិកាខូចទ្រង់ទ្រាយ ដែលអ្នកវិទ្យាសាស្ត្រចិនហៅថា «កោសិកា Zombie» ប្រឆាំងនឹងការស្លាប់ ហើយកោសិកាទាំងនេះនឹងបញ្ចេញសារធាតុរលាកបំផ្លាញកោសិកានៅជុំវិញ ដែលជាមូលហេតុចម្បងនៃភាពចាស់ជរា ។

តាមការសាកល្បងរបស់ក្រុមហ៊ុនទៅលើសត្វកណ្តុរ និងការស្រាវជ្រាវនៅទីក្រុងសៀងហៃ គឺអាយុសត្វកណ្តុរដែលទទួលបានសារធាតុនេះមានអាយុកើនឡើងជាមធ្យមរហូតដល់៩.៤% បើធៀបនឹងកណ្តុរមិនទទួលបានសារធាតុ ។ វាមានសុខភាពរឹងមាំជាងមុន, កាត់បន្ថយការរលាកក្នុងអវៈយវៈសំខាន់ និងជួយថែទាំឆ្អឹងបានល្អជាងពេលធម្មតា ។

បន្ទាប់ពីសាកល្បងជោគជ័យលើសត្វកណ្តុរ អ្នកវិទ្យាសាស្ត្រចិនបានកំណត់គោលដៅជំហ៊ានបន្ទាប់នឹងពន្យារអាយុមនុស្សរហូតដល់១៥០ឆ្នាំ ។ ប្រធានផ្នែកបច្ចេកវិទ្យា (CTO) របស់ក្រុមហ៊ុន Lonvi Biosciences បាននិយាយយ៉ាងមានទំនុកចិត្តថា ៖ «នេះជារឿងសមហេតុផលផ្នែកវិទ្យាសាស្ត្រដែលមនុស្សនឹងមានអាយុវែងដល់១៥០ឆ្នាំ ហើយក្នុងរយៈពេលប៉ុន្មានឆ្នាំខាងមុខ មនុស្សនឹងមានអាយុវែងពិតប្រាកដ» ។

ចំណែកអ្នកជំនាញមកពីសាកលវិទ្យាល័យផ្សេងៗ ដូចជា ៖ សាកលវិទ្យាល័យ Peking នៅតែធ្វើការរួមគ្នាជាមួយការប្រើប្រាស់បច្ចេកទេស Chemical Reprogramming ឬការប្រើប្រាស់សារធាតុគីមីដើម្បីផ្លាស់ប្តូរកោសិកាមនុស្សឱ្យមានរូបរាងក្មេងជាងវ័យ ។ នេះជាវិធីមួយផ្សេងទៀតដែលជួយគាំទ្រគោលដៅពន្យារអាយុមនុស្សឱ្យមានសុវត្ថិភាព និងប្រសិទ្ធភាពខ្ពស់បំផុត មុនពេលចាប់ផ្តើមសាងល្បងជាមួយមនុស្ស ។

ប្រសិនបើគោលដៅរបស់អ្នកវិទ្យាសាស្ត្រចិនទទួលជោគជ័យមែននោះ វាពិតជាដំណឹងគួរឱ្យរីករាយមួយសម្រាប់អ្នកចង់រស់នៅលើផែនដីបានយូរជាងមុន ។ ចុះលោកអ្នកវិញចង់មានអាយុវែងរហូតដល់១៥០ឆ្នាំទេ ពីព្រោះតាមការអះអាងរបស់វិទ្យាសាស្ត្រចិន គឺរយៈពេលប៉ុន្មានឆ្នាំខាងមុខ មនុស្សនឹងមានអាយុវែងពិតប្រាកដ ៕

កាលពីថ្ងៃទី៣០ ខែមីនា ឆ្នាំ២០២៦ ប្រទេសថៃបានប្រកាសអាសន្នពីការឡើងកំដៅខ្លាំងបំផុតមិនធ្លាប់មានរហូតដល់៦០អង្សាសេនៅដើមខែមេសានេះ ដែលជាកម្រិតគ្រោះថ្នា.ក់បំផុតសម្រាប់សុខភាពមនុស្ស ។ វាជាសន្ទស្សន៍កំដៅ មិនមែនជាសីតុណ្ហភាពខ្យល់ពិតប្រាកដទេ ប៉ុន្តែជាកម្រិតកំដៅដែលរាងកាយទទួលបានបណ្តាលមកពីសីតុណ្ហភាពខ្ពស់ និងកម្រិតសំណើមក្នុងខ្យល់ ដែលធ្វើឱ្យរាងកាយពិបាកបញ្ចេញកំដៅតាមញើស ។

កាលពីថ្ងៃទី៣០ ខែមីនា លោក វេងថាង ភួងសាប់ អ្នកនាំពាក្យក្រសួងសេដ្ឋកិច្ច និងសង្គមឌីជីថល បានលើកឡើងពីសន្ទស្សន៍កំដៅកើនឡើងខ្ពស់នៅប្រទេសថៃ រហូតដល់៦០អង្សាសេនៅដើមខែមេសាថា សន្ទស្សន៍កំដៅ (Heat Index) មិនមែនជាសីតុណ្ហភាពខ្យល់ពិតប្រាកដទេ ប៉ុន្តែជាកម្រិតកំដៅដែលរាងកាយទទួលបានបណ្តាលមកពីសីតុណ្ហភាពខ្ពស់ និងកម្រិតសំណើមក្នុងខ្យល់ ដែលធ្វើឱ្យរាងកាយពិបាកបញ្ចេញកំដៅតាមញើស ហើយលោកណែនាំឱ្យពលរដ្ឋថែទាំសុខភាពឱ្យបានល្អ ។

លោកបន្តថា ក្រសួងសេដ្ឋកិច្ច និងសង្គមឌីជីថលព្រួយបារម្ភពីសន្ទស្សន៍កំដៅកើនឡើងខ្ពស់នឹងប៉ះពាល់ដល់សុខភាពពលរដ្ឋ ជាពិសេស មនុស្សចាស់ កុមារ ស្ត្រីមានផ្ទៃពោះ អ្នកជំងឺរ៉ាំរ៉ៃ អ្នកធ្វើការក្រោមកំដៅថ្ងៃ និងអ្នកជំងឺធាត់ ដែលចាំបាច់ត្រូវតែថែទាំសុខភាពឱ្យបានល្អ ដើម្បីការពារខ្លួនពីគ្រោះថ្នាក់ ដូចជា ៖

-ចៀសវាងនៅក្រោមកំដៅថ្ងៃពេលអាកាសធាតុក្តៅខ្លាំង ចាប់ពីម៉ោង១រសៀល ដល់ម៉ោង៤ល្ងាច
-ផឹកទឹក ចាប់ពី៦កែវ ទៅ៨កែវក្នុង១ថ្ងៃ ទោះជាមិនស្រេកក៏ដោយ
-ហាមផឹកភេសជ្ជៈផ្អែមខ្លាំង
-ស្លៀកពាក់សម្លៀកបំពាក់មានខ្យល់ចេញ-ចូល ពាក់មួក និងបាំងឆ័ត្រការពារកំដៅថ្ងៃ
-មនុស្សចាស់គួរផឹកទឹកឱ្យបានញឹកញាប់ សម្រាន្តគ្រប់គ្រាន់ នៅកន្លែងមានខ្យល់ ចៀសវាងនៅក្រោមកំដៅថ្ងៃ ។

ចំណែកអ្នកហាត់ប្រាណខាងក្រៅ និងអ្នកធ្វើការខាងក្រៅអគារ គួរតែធ្វើការជាក្រុមដើម្បីជួយមើលគ្នាទៅវិញទៅមកក្នុងករណីមានបញ្ហាសុខភាពដោយសារកំដៅខ្លាំង ដូចជា ៖ ដាច់សរសៃឈាមខួរក្បាល ខណៈពេលនេះ ខេត្តនៅភាគខាងជើង និងភាគឦសានប្រទេសថៃ កំពុងគ្របដណ្តប់ដោយខ្យល់ពុលខ្លាំង និងធូលីកខ្វក់ស្ថិតក្នុងកម្រិតគ្រោះថ្នាក់ដល់សុខភាព ៕

លោក អេកថាំម៉ានូន វ៉ាន់ណា មេបញ្ជាការកងទ័ពជើងទឹកប្រចាំខេត្តត្រាត ត្រូវបានដកតំណែងកាលពីថ្ងៃទី៣០ ខែមីនា ឆ្នាំ២០២៦ និងឱ្យទៅដឹកនាំអង្គភាពកម្ចាត់មីនមនុស្សធម៌កងទ័ពជើងទឹក (HMAU) វិញ ដែលធ្វើឱ្យមហាជនថៃចាប់អារម្មណ៍យ៉ាងខ្លាំងថា មូលហេតុអាចមកពីលោកចុះទៅកាន់កន្លែងពង្រាយទូរកុងទឺន័រនៅច្រកទ្វារព្រំដែនថ្មដា កាលពីថ្ងៃទី២៦ ខែមីនា គឺនៅថ្ងៃនោះ លោក និងកងទ័ពម្នាក់ទៀតឈ្មោះ ថូនី (ជាកូនចៅក្រោមឱវាទ) បានប្រើប្រាស់ពាក្យសម្តីមិនសមរម្យមកលើមន្ត្រីកងទ័ពកម្ពុជា ។ ប៉ុន្តែបញ្ជាការដ្ឋានការពារព្រំដែនខេត្តចាន់ថាក់បុរី និងត្រាត បកស្រាយថា គ្រាន់តែផ្លាស់ប្តូរតំណែងធម្មតា មិនពាក់ព័ន្ធនឹងជម្លោះព្រំដែនទេ ។

កាលពីថ្ងៃទី៣០ ខែមីនា លោក អភិឆាតិ សាប់ប្រាសឺត មេបញ្ជាការដ្ឋានកងទ័ពជើងទឹក និងជាមេបញ្ជាការដ្ឋានការពារព្រំដែនខេត្តចាន់ថាក់បុរី និងត្រាត បានបញ្ជាឱ្យដកតំណែងកងទ័ពជើងទឹកប្រចាំការនៅព្រំដែន ចំនួន១៧រូប ក្នុងនោះក៏មានលោក អេកថាំម៉ានូន វ៉ាន់ណា មេបញ្ជាការកងទ័ពជើងទឹកប្រចាំខេត្តត្រាត ផងដែរ ដោយឱ្យលោក អេកថាំម៉ានូន វ៉ាន់ណា ទៅដឹកនាំអង្គភាពកម្ចាត់មីនមនុស្សធម៌កងទ័ពជើងទឹក (HMAU) ។

លោក អេកថាំម៉ានូន វ៉ាន់ណា មេបញ្ជាការកងទ័ពជើងទឹកប្រចាំខេត្តត្រាត ត្រូវបានដកតំណែងភ្លាមៗនេះធ្វើឱ្យមហាជនចាប់អារម្មណ៍យ៉ាងខ្លាំង ដោយសារលោកជាមេបញ្ជាការកងទ័ពជើងទឹកដ៏សំខាន់ និងបានបំពេញការងារយ៉ាងសកម្មជាច្រើន ដូចជា ៖ បង្ក្រាបភាពចលាចលនៅខេត្តភាគខាងត្បូង និងធ្វើសង្គ្រាមឈ្លានពានកម្ពុជា លើកទី២ ដោយដឹកនាំកងទ័ពដណ្តើមកាន់កាប់ទឹកដីកម្ពុជានៅជាប់ខេត្តត្រាត ។

លោក អេកថាំម៉ានូន វ៉ាន់ណា បានផ្តល់សម្ភាសន៍ជាមួយសារព័ត៌មានថា លោកត្រូវបានដកតំណែងភ្លាមៗទាំងយប់ដោយមិនដឹងខ្លួនជាមុនឡើយ ។ ពេលនេះ កំពុងតែប្រមូលរបស់របរទុកដាក់ និងប្រគល់ភារកិច្ចទៅឱ្យអ្នកផ្សេងនៅថ្ងៃទី១ ខែមេសា ។

តាមការសន្និដ្ឋានរបស់មហាជន លោក អេកថាំម៉ានូន វ៉ាន់ណា ត្រូវបានដកតំណែងភ្លាមៗ គឺអាចមកពីលោកចុះទៅកាន់កន្លែងពង្រាយទូរកុងទឺន័រនៅច្រកទ្វារព្រំដែនថ្មដាកាលពីថ្ងៃទី២៦ ខែមីនា កន្លងមក ដែលនៅថ្ងៃនោះ លោក និងកងទ័ពម្នាក់ទៀតឈ្មោះ ថូនី (ជាកូនចៅក្រោមឱវាទ) បានប្រើប្រាស់ពាក្យសម្តីមិនសមរម្យមកលើមន្ត្រីកងទ័ពកម្ពុជា រហូតទាក់ទាញការចាប់អារម្មណ៍យ៉ាងខ្លាំង ។

កងទ័ពឈ្មោះ ថូនី គឺជាកូនចៅមានទំនាក់ទំនងជិតស្និទជាមួយលោក អេកថាំម៉ានូន វ៉ាន់ណា មេបញ្ជាការកងទ័ពជើងទឹកប្រចាំខេត្តត្រាត ។ កាលពីថ្ងៃទី២៦ ខែមីនា បុគ្គល ថូនី និង Influencer កាន់ ចមផ្លាំង បានស្រែកបណ្តេញមន្ត្រីកងទ័ពកម្ពុជាឱ្យចេញពីតំបន់ព្រំដែនថ្មដា ក្នុងអំឡុងពេលកងទ័ពថៃកំពុងតែយកទង់ជាតិរបស់ខ្លួនមកដាក់លើទូរកុងទឺន័រ ។

ពាក់ព័ន្ធនឹងបញ្ហានេះ បញ្ជាការដ្ឋានការពារព្រំដែនខេត្តចាន់ថាក់បុរី និងត្រាត បកស្រាយថា នេះគ្រាន់តែជាការផ្លាស់ប្តូរតំណែងតាមទម្លាប់ពាក់កណ្តាលឆ្នាំសម្រាប់មន្ត្រីកងទ័ពចំនួន១៧រូបប៉ុណ្ណោះ មិនពាក់ព័ន្ធនឹងជម្លោះព្រំដែនទេ ហើយលោក អេកថាំម៉ានូន វ៉ាន់ណា មានបទពិសោធន៍ការងារ និងស័ក្តិសមសម្រាប់ដឹកនាំអង្គភាពកម្ចាត់មីនមនុស្សធម៌កងទ័ពជើងទឹក ។

ចំណែករដ្ឋមន្ត្រីក្រសួងការពារជាតិ លោក Adul Boonthamcharoen កាលពីថ្ងៃទី៣១ ខែមីនា បាននិយាយពាក់ព័ន្ធនឹងការដកតំណែងមេបញ្ជាការកងទ័ពជើងទឹកប្រចាំខេត្តត្រាត ថា វាគ្មានអ្វីទេ លោក អេកថាំម៉ានូន វ៉ាន់ណា នឹងកាន់តំណែងថ្មីល្អជាងតំណែងចាស់ ។

គួរបញ្ជាក់ថា កាលពីថ្ងៃទី២៦ ខែមីនា ឆ្នាំ២០២៦ កងទ័ពថៃបានយកកុងទឺន័រចំនួន៣ទូរ មកដាក់ពង្រាយបន្ថែមទៀតនៅឃុំថ្មដា ស្រុកវាលវែង ខេត្តពោធិ៍សាត់ ដើម្បីព័ទ្ធយកដីកម្ពុជាដោយខុសច្បាប់ ហើយនៅថ្ងៃនោះ មន្ត្រីកងទ័ពកម្ពុជាក៏បានចូលទៅហាមឃាត់ ទើបកងទ័ពថៃប្រើប្រាស់ពាក្យសម្តីខ្លាំងៗបណ្តេញ ។

រាជរដ្ឋាភិបាលកម្ពុជាបានដាក់លិខិតតវ៉ាជាបន្តបន្ទាប់ តាមរយៈក្រសួងការបរទេស និងបញ្ចាក់ម្តងហើយម្តងទៀត គឺកម្ពុជាប្រកាន់ជំហរដាច់ខាត ដោយមិនទទួលស្គាល់ការកែប្រែខ្សែបន្ទាត់ព្រំដែនតាមរយៈការប្រើកម្លាំងឡើយ ៕