ប្រទេសកុងហ្គោ ៖ អាជ្ញាធរប្រទេសកុងហ្គោ (ស្ថិតនៅអាហ្វ្រិកកណ្តាល) និយាយថា អ្នកទោសបានព្យាយាមរត់ចេញពីពន្ធនា.គារ នៅទីក្រុង Kinshasa ដែលជាពន្ធនា.គារ មានប្រព័ន្ធការពារសន្តិសុខខ្ពស់ ។ ហេតុការណ៍នេះបណ្តាលឱ្យមនុស្សស្លា.ប់ រហូតដល់១២៩នាក់ និងរងរបួ.ស ជាច្រើននាក់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣ ខែកញ្ញា ឆ្នាំ២០២៤ ។

លោក ឆាបានី លូគូ រដ្ឋមន្ត្រីក្រសួងមហាផ្ទៃកុងហ្គោ ថ្លែងថា អ្នកទោស២៤នាក់បានស្លាប់ដោយសារគ្រាប់កាំភ្លើង ក្រោយពីឆ្មាំគុកបាញ់កាំភ្លើងព្រមាន កាលពីថ្ងៃទី២ ខែកញ្ញា ។ រីឯអ្នកទោសផ្សេងទៀតស្លាប់ដោយសារការខ្វះខាតខ្យល់ដកដង្ហើម ក្នុងពេលពួកគេជាន់គ្នាពពាក់ពូននៅពន្ធនាគារម៉ាខាឡា ។ បើទោះជាមានមនុស្សស្លាប់ជាច្រើននាក់ក្តី ប៉ុន្តែរដ្ឋាភិបាលនិយាយពីដំបូងថា មានមនុស្សស្លាប់ត្រឹមតែ២នាក់ប៉ុណ្ណោះ ។

កាលពី៧ឆ្នាំមុន ក៏ធ្លាប់កើតហេតុការណ៍ដូចគ្នាដែរ គឺអ្នកទោស៤.០០០នាក់បានរត់ចេញពីពន្ធនាគារមួយនេះ ដែលជាពន្ធនាគារធំបំផុតក្នុងប្រទេសកុងហ្គោ ។ ពលរដ្ឋរស់នៅក្បែរពន្ធនាគារនិយាយថា ពួកគេបានឮសំឡេងគ្រាប់កាំភ្លើងជាប់ៗគ្នា ចាប់ពីម៉ោង១យប់ រហូតដល់ម៉ោង៥ភ្លឺ ។

អាជ្ញាធរបានហាមឃាត់អ្នកកាសែតពុំឱ្យចូលទៅកន្លែងកើតហេតុទេ ក្រោយមក កម្លាំងសន្តិសុខក៏បញ្ជូនសាកសពអ្នកទោសចេញក្រៅ ។ ក្នុងវីដេអូ គេបានឃើញសាកសពអ្នកទោសជាច្រើននៅលើឥដ្ឋ ព្រមទាំងឮសំឡេងសុំការជួយសង្គ្រោះពេលកំពុងប៉ះទង្គិចគ្នា ។

លោក ឆាបានី លូគូ រដ្ឋមន្ត្រីក្រសួងមហាផ្ទៃកុងហ្គោ បានសរសេរក្នុងបណ្តាញសង្គម X ថា លោកសូមសរសើរកម្លាំងសន្តិសុខ, សមត្ថកិច្ច និងទាហាន ដែលសហការគ្នាទប់ទល់ជាមួយអ្នកទោសយ៉ាងឆាប់រហ័ស និងអាចគ្រប់គ្រងស្ថានការណ៍ការពារអ្នកទោសរត់ចេញពីពន្ធនាគារ ។ ហេតុការណ៍នេះបណ្តាលឱ្យមនុស្សស្លាប់, រងរបួស, ខូចខាតសម្ភារៈពន្ធនាគារ និងមានភ្លើងឆេះអគារ ។

សារព័ត៌មាន AFP រាយការណ៍ថា ពន្ធនាគារម៉ាខាឡា អាចដាក់អ្នកទោសចំនួន១.៥០០នាក់ ប៉ុន្តែមានអ្នកទោសនៅទីនេះ រហូតដល់១៤.០០០នាក់ ។ កាលពីឆ្នាំ២០២០ អ្នកទោសជាច្រើនបានស្លាប់ក្នុងពន្ធនាគារ ដោយសារបរិស្ថានមិនល្អ, គ្មានអនាម័យ និងការខ្វះខាតអាហារ ៕

លោកអ្នកប្រហែលជាធ្លាប់ស្គាល់គោប្រេស៊ីលហើយដែលមានឈ្មោះថា Viatina-19 FIV Mara Movéis ត្រូវបានទទួលស្គាល់ដោយកំណត់ត្រាពិភពលោក Guinness ថាជាគោថ្លៃបំផុតក្នុងលោកជាមួយតម្លៃ ៤ លានដុល្លារអាមេរិកក្នុងមួយក្បាល។ ទោះជាយ៉ាងណាថ្មីៗនេះគោឥណ្ឌាមួយក្បាលដែលមានឈ្មោះថា Shahenshah ក៏បានក្លាយជាគោថ្លៃបំផុតទីពីរក្នុងលោកផងដែរ ជាមួយតម្លៃ ២.៩ លានដុល្លារអារិក គឺជាកម្មសិទ្ធិរបស់កសិករម្នាក់ឈ្មោះ Narendra Singh ក្នុងស្រុក Panipat រដ្ឋ Haryana ប្រទេសឥណ្ឌា។

សត្វគោឥណ្ឌា Shahenshah មានទម្ងន់រហូតដល់ ១.៥ តោន ដែលទម្ងន់នេះគឺធ្ងន់ជាងគោប្រេស៊ីលទៅទៀត ខណៈគោប្រេស៊ីល Viatina-19 មានទម្ងន់ត្រឹមតែ ១.១ តោនប៉ុណ្ណោះ។ កសិករឥណ្ឌា Narendra Singh បាននិយាយថា មានគេឱ្យតម្លៃគោរបស់លោករហូតដល់ ២៥០ លានរ៉ូពី (ប្រមាណជិត ៣ លានដុល្លារអាមេរិក) ប៉ុន្តែលោកនៅតែមិនព្រមលក់ ព្រោះលោកស្រឡាញ់វា ហើយវាតែងតែផ្តល់ប្រយោជន៍ជាច្រើនឱ្យលោកទ្វេដង។ ម្ចាស់គោបានបន្តទៀតថា លោកតែងតែរកលុយបានយ៉ាងច្រើនសន្ធឹកសន្ធាប់ពីការលក់ទឹកកាមរបស់ Shahenshah ដោយសារទឹកកាមរបស់គោមានរចនាសម្ព័ន្ធល្អលើសគេ។

ហើយកូនគោដែលបង្កើតចេញពីទឹកកាមរបស់គោ Shahenshah គឺពួកវាអាចផលិតទឹកដោះកាន់តែច្រើននៅពេលដែលវាចាស់ទុំ។ កសិករឥណ្ឌារូបនេះបានបន្ថែមទៀតថា លោកតែងតែមើលថែគោយ៉ាងដិតដល់បំផុត ដោយឱ្យវាផឹកទឹកដោះគោ ៤០លីត្រ ហូបផ្លែប៉ោម ១០០ ផ្លែ និងផ្លែឈើស្ងួត ៥ គីឡូក្រាមជារៀងរាល់ថ្ងៃ រួមទាំងមានអ្នកមើលថែ៤ នាក់ជាប្រចាំព្រឹកល្ងាចនិងយប់ផងដែរ។ ជាការពិតណាស់ តម្លៃគោមួយក្បាល ៣ លានដុល្លារគឺខ្ពស់ខ្លាំងណាស់ ប្រសិនបើអ្នកតើហ៊ានលក់ដែរឬទេ ព្រោះតម្លៃនេះអាចទិញឡានទំនើបៗដូចជា Tesla Cyberdrag បានដល់រហូត ៣-៤ គ្រឿងឯណោះ រួមទាំងផ្ទះប្រណិតៗជាច្រើនទៀត។

គួរបញ្ជាក់ដែរថា គោឥណ្ឌា Shahenshah និងគោប្រេស៊ីល Viatina-19 សុទ្ធតែមានលក្ខណៈពិសេសខុសប្លែកពីគោធម្មតា ទើបតម្លៃរបស់ពួកវាថ្លៃបែបនេះ។ គោឥណ្ឌា Shahenshah មានទឹកកាមដែលមានរចនាសម្ព័ន្ធល្អលើសគេ ខណៈគោប្រេស៊ីល Viatina-19 គឺមានអត្រាលូតលាស់ល្អ ធន់នឹងអាកាសធាតុទោះបរិយាកាសប្រែប្រួលខ្លាំងយ៉ាងណាក៏ដោយ ក៏វានៅតែអាចរស់នៅបានធម្មតា មានសុខភាពល្អ មានកម្លាំងខ្លាំងមហិមារ មានភាពល្អឥតខ្ចោះក្នុងការបង្កាត់ពូជ មានគ្រប់លក្ខណៈដែលអ្នកចិញ្ចឹមត្រូវការ និងជាពិសេសមានសមត្ថភាពអស្ចារ្យក្នុងការបញ្ជូនលក្ខណៈដ៏ខ្ពង់ខ្ពស់របស់វាទៅកាន់គោជំនាន់ក្រោយទៀត៕

បើនិយាយពីស្មានហ្វូនដែលអាចបត់បានពីរតង់ ឬបីតង់របស់ Samsung ធៀបទៅនឹង Huawei ច្បាស់ណាស់ប្រាកដជា Huawei ឈ្នះហើយ ព្រោះបច្ចុប្បន្នក្រុមហ៊ុនចិន Huawei បានកាន់កាប់តំណែងជាក្រុមហ៊ុនផលិតស្មាតហ្វូនអេក្រង់បត់លេខមួយក្នុងពិភពលោកសម្រាប់ត្រីមាសទីពីរជាប់ៗគ្នា ទោះបីស្មានហ្វូនអេក្រង់បត់បានបីតង់មិនទាន់ចេញលក់ជាផ្លូវការក៏ដោយ ក៏គេគិតថា Huawei នៅតែបន្តឈានមុខគេក្នុងផ្នែកទាំងនេះ។ យោងតាមទិន្នន័យចុងក្រោយពី TechInsights ក្រុមហ៊ុនផលិតរបស់ចិន គឺជាអ្នកលក់ស្មាតហ្វូនដែលអាចបត់បានល្អបំផុតនៅលើពិភពលោកក្នុងរយៈពេលកន្លះឆ្នាំមកនេះ។

កន្លងមកទិន្នន័យស្រាវជ្រាវ Counterpoint ក៏បានបញ្ជាក់ផងដែរថា ក្រុមហ៊ុន Huawei បានកាន់កាប់ចំណែកទីផ្សារធំបំផុតនៅក្នុងផ្នែកនេះ ដោយទម្លាក់ Samsung ឱ្យឈរនៅចំណាត់ថ្នាក់ទីពីរ។ បើតាមរបាយការណ៍ពី TechInsights ក៏បានបង្ហាញដែរថាក្រុមហ៊ុន Huawei សម្រេចបាននូវកំណើន ២២៩% ក្នុងរយៈពេលដូចគ្នាកាលពីឆ្នាំមុន ដោយវ៉ាដាច់ Samsung ដើម្បីរក្សាតំណែងកំពូលនៅក្នុងទីផ្សារស្មាតហ្វូនដែលអាចបត់បានរបស់ខ្លួន ទោះបីស្ថិតនៅក្រោមការហាមឃាត់ពីសហរដ្ឋអាមេរិកក៏ដោយ ក៏ក្រុមហ៊ុននេះនៅតែទទួលបានភាពជោគជ័យជាបន្តបន្ទាប់។

លក្ខខណ្ឌអំណោយផលមួយដែលជួយឱ្យក្រុមហ៊ុន Huawei សម្រេចបានជោគជ័យនោះគឺថា អាស៊ីប៉ាស៊ីហ្វិក ដែលជាកន្លែងស្គាល់ម៉ាកយីហោនេះគឺជាទីផ្សារប្រើប្រាស់ស្មាតហ្វូនដែលអាចបត់បានយ៉ាងរស់រវើកបំផុតក្នុងរយៈពេលបីខែនៃខែមេសា ឧសភា និងមិថុនាថ្មីៗនេះ។ ខណៈ Samsung សម្រេចបានកំណើនត្រឹមតែ ៥% ប៉ុណ្ណោះ ដែលទាបជាងអត្រាកំណើនជាមធ្យមនៃទីផ្សារទាំងមូល ៨៥% ទោះបីជាក្រុមហ៊ុន Samsung ពីមុនបានដឹកនាំផ្នែកនេះអស់រយៈពេលជាច្រើនឆ្នាំក៏ដោយ ក៏បច្ចុប្បន្ន Samsung បានធ្លាក់ចេញពីតំណែង។

គួរបន្ថែមផងដែរថា Samsung គឺជាក្រុមហ៊ុនផលិតស្មាតហ្វូនដែលត្រួសត្រាយផ្លូវក្នុងការធ្វើពាណិជ្ជកម្មស្មាតហ្វូនដែលអាចបត់បាន ហើយអស់រយៈពេលជាយូរមកហើយស្ទើរតែផ្តាច់មុខទីផ្សារនេះ មុនពេល Oppo, Vivo, Xiaomi, OnePlus, Huawei … បានកើនឡើងយ៉ាងខ្លាំងពីប្រទេសចិន។ ទីផ្សារអ្នកប្រើប្រាស់កំពូលរបស់ Samsung សព្វថ្ងៃនេះនៅតែជាអាមេរិកខាងជើង ដែលក្រុមហ៊ុនមានមូលដ្ឋានរឹងមាំគួរសម ហើយក៏ជាចំណែកទីផ្សារដែលរកប្រាក់ចំណេញនៃផ្នែកស្មាតហ្វូនផងដែរ៕

ប្រទេសឥណ្ឌូណេស៊ី ៖ Surabaya ជាទីក្រុងធំលំដាប់ទី២ របស់ប្រទេសឥណ្ឌូណេស៊ីមានគោលនយោបាយឱ្យពលរដ្ឋយកដបផ្លាស្ទិកមកប្តូរជាមួយសំបុត្រជិះរថយន្តក្រុងមិនគិតថ្លៃ ។ ដបផ្លាស្ទិក៥ ឬកែវផ្លាស្ទិក១០ អាចប្តូរយកសំបុត្រជិះរថយន្តក្រុងរយៈពេល២ម៉ោង ដោយអ្នកដំណើរអាចយកដបផ្លាស្ទិកទៅឱ្យស្ថានីយរថយន្តក្រុងដើម្បីប្តូរយកសំបុត្រ ឬយកដបផ្លាស្ទិកបង់ថ្លៃសំបុត្ររថយន្តក្រុងក៏បាន ។

ឥណ្ឌូណេស៊ី ស្ថិតក្នុងចំណោមប្រទេសមានបញ្ហាសំរាមផ្លាស្ទិកច្រើនបំផុតនៅលើពិភពលោក ។ កាលពីឆ្នាំ២០២២ ឥណ្ឌូណេស៊ីបានផលិតផ្លាស្ទិកច្រើនរហូតដល់៣លាន២សែនតោន ក្នុងនោះផ្លាស្ទិកចំនួន១លាន៣សែនតោនបានហូរធ្លាក់ទៅក្នុងសមុទ្រ ។

ហេតុនេះ ទីក្រុង Surabaya មានគោលនយោលបាយឱ្យពលរដ្ឋយកដបផ្លាស្ទិកមកប្តូរសំបុត្រជិះរថយន្តក្រុងមិនគិតថ្លៃ ហើយសង្ឃឹមថា នឹងអាចជួយកាត់បន្ថយបញ្ហាសំរាមផ្លាស្ទិក ព្រមទាំងជំរុញឱ្យពលរដ្ឋងាកមកប្រើប្រាស់មធ្យោបាយដឹកជញ្ជូនសាធារណៈច្រើនជាងមុន ។

រថយន្តក្រុងពណ៌ក្រហម ឈ្មោះ Suroboyo Bus បានដំណើរការកាលពីឆ្នាំ២០១៨ នៅទីក្រុង Surabaya ក្រោមការដឹកនាំរបស់អភិបាលក្រុង លោកស្រី Tri Rismaharini ។ រថយន្តក្រុងនេះត្រូវបានប្រើប្រាស់ជាមធ្យោបាយធ្វើដំណើរសាធារណៈដ៏សំខាន់របស់ទីក្រុង ។ ប៉ុន្តែដោយសារមានសំរាមផ្លាស្ទិកច្រើន ទើបទីក្រុងនេះ បង្កើតគំនិតថ្មី គឺឱ្យពលរដ្ឋយកដបផ្លាស្ទិកមកប្តូរសំបុត្រជិះរថយន្តក្រុង ហើយសង្ឃឹមថា នឹងជួយកាត់បន្ថយបរិមាណសំរាមផ្លាស្ទិក ។

ចំណែកលក្ខខណ្ឌការប្តូរយកសំបុត្រជិះរថយន្តក្រុងពុំគិតថ្លៃ គឺអ្នកដំណើរម្នាក់ៗត្រូវមានដបផ្លាស្ទិក៥ ឬកែវផ្លាស្ទិក១០ មកប្តូរយកសំបុត្រជិះរថយន្តក្រុងរយៈពេល២ម៉ោង ។ អ្នកដំណើរអាចយកដបផ្លាស្ទិកទៅឱ្យស្ថានីយរថយន្តក្រុងដើម្បីប្តូរយកសំបុត្រ ឬយកដបផ្លាស្ទិកបង់ថ្លៃសំបុត្ររថយន្តក្រុងក៏បាន ។ រយៈពេល១ថ្ងៃ រថយន្តក្រុងនេះអាចប្រមូលសំរាមផ្លាស្ទិករហូតដល់២៤៩គីឡូក្រាម ។

អ្វីដែលអ្នកដំណើរត្រូវធ្វើ គឺគិតខ្លួនឯងថា តើចង់ធ្វើដំណើរទៅកន្លែងណា? និងគួរត្រៀមសំរាមផ្លាស្ទិកប៉ុន្មាន ដើម្បីអាចជិះរថយន្តក្រុងទៅដល់គោលដៅ? ហេតុនេះ គំនិតថ្មីខាងលើមានសារៈសំខាន់ណាស់ក្នុងការកាត់បន្ថយសំរាមក្នុងទីក្រុង និងផ្លាស់ប្តូរទម្លាប់របស់ពលរដ្ឋឥណ្ឌូណេស៊ីបន្តិចម្តងៗ ៕