មានវីដេអូមួយចែករំលែកនៅលើបណ្តាញសង្គមដែល ជី ដេវីត បាននិយាយន័យធៀបមានការកោតសរសើរចេញពីចិត្តថាសិល្បៈកាន់តែបោះជំហានថ្មីលើវិថីនេះមួយកម្រិតទៀត។ ការសរសើរក្នុងន័យធៀបរបស់ ជី ដេវីត ធ្វើឱ្យមានអ្នកមួយចំនួនគិតថាលោកចង់សំដៅទៅកាន់តារាចម្រៀងរ៉េប វណ្ណដា ឡើងឆាកអូឡាំពិក ខណៈតារាចម្រៀង ឱក សុគន្ធកញ្ញា លក់សំបុត្របានខ្ពស់បំផុតមិនធ្លាប់មានពីមុនមកសម្រាប់សិល្បករកម្ពុជា។

ក្នុងកម្មវិធីជួបជុំអ្នកគាំទ្ររបស់តារាចម្រៀង ជី ដេវីត កាលពីថ្ងៃទី៣១ សីហា បានធ្វើឱ្យអ្នកគាំទ្ររំភើបចិត្តព្រោះមិនយូរទេតារាចម្រៀងរូបនេះនឹងមានការប្រគំតន្រ្តីទោលក្នុងពេលឆាប់ៗខាងមុខនេះ។ ក្នុងកម្មវិធីសំណោះសំណាលនេះក៏មានការចែករំលែកពេញបណ្តាញសង្គមនូវរូបភាពសប្បាយៗជាច្រើនរួមជាមួយតារាចម្រៀង ទេព បូព្រឹក្ស បានធ្វើឱ្យ ជី ដេវីត មានការភ្ញាក់ផ្អើលព្រោះតែទទួលបាននាឡិកាដៃថ្មីដែលជារបស់លោកស្រលាញ់ខ្លាំង។

ជាមួយគ្នានេះ ជី ដេវីត ក៏បានបង្ហាញអារម្មណ៍របស់ខ្លួនដោយពោលថាជាអារម្មណ៍ពិតសរសើរសិល្បៈបច្ចុប្បន្នកាន់តែបោះជំហានទៅមុខ។ ក្នុងវីដេអូដែលបានចែករំលែកពីហ្វេនៗចូលរួម ជី ដេវីត បានសុំអ្នកគាំទ្រនិយាយពាក្យក្នុងចិត្តដោយលោកបានលើកឡើយថា សិល្បៈខ្មែរយើងក្នុងឆ្នាំនេះធ្វើបានល្អច្រើន សូមកោតសរសើរ សមិទ្ធផលទាំងអស់នេះកំពុងបោះជំហានឈានទៅកាន់កម្រិតមួយទៀត។

ជី ដេវីត បានពន្យល់បន្ថែមថាអ្វីដែលយើងសម្លឹងឃើញគឺវាពិសេសជាងមុនសម្រាប់សិល្បៈសម្រាប់ការបោះជំហានថ្មីក្រាលនៅលើវិថីនេះ មិននិយាយចំតែនិយាយធៀបដោយសុំកុំឱ្យមានការប្រកាន់លោកនិយាយដោយភាពស្មោះត្រង់ លោកឃើញថាល្អ ពិសេស ដោយសង្ឃឹមថាឆ្នាំក្រោយលោកនឹងយកការណ៍ដែលលោកមើលឃើញនូវបរិបទជុំវិញខ្លួនមកពង្រឹងបន្ថែមទៀតសម្រាប់ខ្លួន។

មិននិយាយន័យចំប៉ុន្តែអ្នកមួយចំនួនអាចសន្និដ្ឋានថាសម្តីនេះអាចចង់សំដៅ ជី ដេវីត សរសើរទៅកាន់តារាចម្រៀងរ៉េប ម៉ាន់ វណ្ណដា ដែលទទួលបានឱកាសសម្តែងនៅក្នុងពិធីបិទកីឡាអូឡាំពិកទីក្រុងប៉ារីស ព្រោះនេះជាភាពជោគជ័យសម្រាប់សិល្បករកម្ពុជាដែលអាចឈានជើងចូលក្នុងកម្មវិធីកីឡាធំបំផុតលើពិភពលោក។ ក្នុងពេលត្រឡប់មកពីទីក្រុងប៉ារីស វណ្ណដា ក៏បានផ្តល់បទសម្ភាសន៍ជាមួយអ្នកសារព័ត៌មានដែរថា មិនដឹងថាឱកាសនេះមានប៉ុន្មានដងកក្នុងជីវិតទេ ប៉ុន្តែទោះបីជាបានឱកាសតែម្តសម្រាប់លោកក្តីលោកសង្ឃឹមថាសិល្បករកម្ពុជាផ្សេងទៀតនឹងទទួលបានឱកាសនេះដូចគ្នា។

ងាកមកតារាចម្រៀង ឱក សុគន្ធកញ្ញា វិញក៏ធ្វើឱ្យទីផ្សារសិល្បៈស្រុកខ្មែរមានសញ្ញាវិជ្ជមានដូចគ្នាព្រោះតែអាចលក់សំបុត្របានថ្លៃជាងគេក្នុងចំណោមសសិល្បករក្នុងស្រុក។

ជាមួយនឹងសមិទ្ធផលតារាចម្រៀងផ្សេងៗ ប៉ុន្តែអ្នកគាំទ្រក៏មិនភ្លេចពីសមិទ្ធរបស់តារាចម្រៀង ជី ដេវីត និង ទេព បូព្រឹក្ស ដូចគ្នាដែលបានខិតខំជួយផ្សព្វផ្សាយផ្នែកវប្បធម៌ខ្មែរតាមរយៈវិស័យតន្រ្តី។ នេះបញ្ជាក់ថាសិល្បករកម្ពុជាគឺជាធាតុសំខាន់ទាំងអស់គ្នាមិនថាជាសិល្បករ សិល្បការិនី រូបណាទេបង្កើតអ្វីដែលជាភាពជោគជ័យគួរតែមានការគាំទ្រទាំងអស់គ្នា កុំប្រកាន់ថាជាហ្វេនអ្នកនេះ ហ្វេនអ្នកនោះគួរសាទរទើបមានភាពរីកចម្រើនបានលឿន៕

ស្ទើរតែមិនគួរឱ្យជឿបទចម្រៀងខ្មែរមួយបទមានចំណងជើងថា«សង្ក្រាន្តស្គាល់ស្នេហ៍» របស់តារាចម្រៀងរ៉េប វណ្ណដា កំពុង Trending ខ្លាំងនៅប្រទេសថៃនិងឡាវ មានការចូលលេងរាប់ម៉ឺននាក់ក្នុងនោះក៏មានតារាល្បីៗមួយចំនួនលេងបទនេះដូចគ្នាធ្វើឱ្យផ្ទុះកក្រើកពេញបណ្តាញសង្គម។

កាលពីពេលថ្មីៗមកនេះតារាសម្តែងជួរមុខ ម៉ៃ ដាវីកា ( Mai Davika) បានធ្វើឱ្យមានការចាប់អារម្មណ៍មិនធម្មតាព្រោះតែតារាល្បីឈ្មោះរូបនេះបានលេងបទចម្រៀងរបស់ វណ្ណដា ដែលកម្រមានខ្មែរមានការពេញនិយមនៅស្រុកថៃណាស់ ប៉ុន្តែ វណ្ណដា អាចធ្វើឱ្យរឿងនេះកើតឡើង។ លើសពីនេះតារាសម្តែងល្បីឈ្មោះរូបនេះលេងបទនេះដល់តែពីរដងឯណោះមើលទៅ ម៉ៃ ដាវីកា ពិតជាជាប់ចិត្តបទនេះណាស់។

មិនត្រឹមតែ ម៉ៃ ដាវីកា ប៉ុណ្ណោះទេ តារាស្រី មីន ឆាលីដា (Mint Chalida) តារាសម្តែងប្រចាំទូរទស្សន៍ថៃប៉ុស្តិ៍លេខ៣ ក៏បានចូលរួមលេងបទ «សង្ក្រាន្តស្គាល់ស្នេហ៍» របស់ វណ្ណដាដូចគ្នាដែលនេះជា Soft Power មួយរបស់ វណ្ណដា ដែលជះឥទ្ធិពលទៅកាន់ជាតិសាសន៍ដទៃចូលរួមលេងពាសពេញបណ្តាញសង្គមទិកតុក។ មិនត្រឹមតែតារាសម្តែងល្បីឈ្មោះទាំងពីររូបនេះប៉ុណ្ណោះទេដែលនាំគ្នា Challenge លេងនៅទិកតុកប៉ុន្តែអ្នកលេងទិកតុកល្បីៗជាច្រើនទៀតចូលរួមលេងយ៉ាងផុសផុល ។

ឃើញមានការគាំទ្រដូចនេះអ្នកគាំទ្ររបស់តារាចម្រៀង វណ្ណដា បានបង្ហាញអារម្មណ៍រំភើបចិត្តមិនតិចនោះទេដែលឃើញបទចម្រៀងតារាកម្ពុជាទទួលបានការគាំទ្រពីសំណាកប្រទេសជិតខាងដូចនេះហើយសុទ្ធតែតារាកំពូលៗប្រចាំប្រទេសថៃពេញចិត្តលេងបទនេះ។

នេះគឺជា Soft Power របស់ វណ្ណដា ដែលអាចសាយភាពភាសាជាតិតន្រ្តីកម្ពុជាតាមរយៈបទចម្រៀងនេះដោយមានការស្ម័គ្រចិត្តលេងបទ សង្ក្រាន្តស្គាល់ស្នេហ៍ ភ្លូកទឹកភ្លូកដីដែលអាចអូសទាញប្រជាប្រិយភាពកាន់តែខ្លាំងពីមួយកម្រិតទៅមួយកម្រិត។

គួរបញ្ជាក់ថា បទ សង្ក្រាន្តស្គាល់ស្នេហ៍ របស់ វណ្ណដា ដែលកំពុងល្បីខ្លាំងនៅក្រៅប្រទេសនេះគឺបានចេញកាលពីថ្ងៃទី៥ ខែមេសា ឆ្នាំ២០២៤ ដែលមានការចូលរួមសម្តែងពីតារាម៉ូដែលខ្មែរកាត់បារាំង មាលា ហើយមកទល់ពេលនេះមានការស្តាប់លើស២១លានដងហើយ៕

តម្លៃសំបុត្រការប្រគំតន្រ្តីរបស់កំពូលតារាចម្រៀងឱក សុគន្ធកញ្ញា មានតម្លៃចាប់ពី៣០ដុល្លារដល់១០០ដុល្លារបានក្លាយជារឿងចម្រូងចម្រាសលើបណ្តាញសង្គមប៉ុន្តែក៏មានអ្នកល្បីលើបណ្តាញសង្គមដូចជា Peypey dy , Bong Rith – អឿនឈឿន និងបណ្តាផេកមួយចំនួនទៀតចេញមកការពារតារាចម្រៀងរូបនេះផងដែរដើម្បីឆ្លើយតបទៅកាន់អ្នករិះគន់។

Peypey dy ជាបុគ្គលមានឥទ្ធិពលនៅលើបណ្តាញសង្គមជាម្ចាស់ជំនួញ និងជាម្ចាស់ផលិតកម្ម បានសរសេរនៅលើបណ្តាញសង្គមកាលពីយប់ថ្ងៃទី៣១ សីហា ថា «ខ្លីៗ
បើអត់លុយទិញសំបុត្រ នៅឱ្យស្ងៀម អត់ខ្មាសគេទេ? អញភ័យខ្លាចតែទិញមិនបានផងនៀក»។ នៅព្រឹកថ្ងៃទី១ ខែកញ្ញា លោកបានបង្ហោះទៀតថា «សំបុត្រSold outគ្រប់ប្រភេទ អ្នកទើសងើបឡើងមានអីនិយាយទៀតអត់?»។ មិនត្រឹមតែ Peypey dy ប៉ុណ្ណោះទេ ប៉ុន្តែគេបានឃើញអ្នកបង្កើតមាតិកាមួយរូបទៀតគឺ Bong Rith – អឿនឈឿន គឺបានចេញជាវីដេអូតែម្តងនិយាយទាក់ទងនឹងបញ្ហាចម្រូងចម្រាសនេះ។

Bong Rith – អឿនឈឿន បាននិយាយថា មិនមែនមិនចង់ឱ្យបញ្ចេញយោបល់ទេ តែវែកញែកខុសរបៀបរឿងតូចទៅជារឿងធំ ធ្វើឱ្យតារាដែលមានកេរ្តិ៍ឈ្មោះផូរផង់ដែលមានកេរ្តិ៍ឈ្មោះកិត្តិយសដែលខំសាងមកជាយូរអាចនឹងមានបញ្ហាដោយសារតែការវែកញែកអត់ប្រយោជន៍។ លោកថា ប្រសិនជាអត់មានលុយនៅឱ្យស្ងៀម នៅផ្ទះទុកឱ្យគេអ្នកមានលុយទៅមើលរឿងសាមញ្ញតែប៉ុណ្ណឹងទេ មើលតួផងថាលំដាប់ណា លំដាប់ជាតិអាចនិយាយបានថា top1 លំដាប់លេខ១ហើយឱ្យលក់សំបុត្រ១ម៉ឺន២ម៉ឺនរៀលឬក៏យ៉ាងមិច មិនមែនល្បីធម្មតាទេ ល្បីដល់ថ្នាក់លំដាប់គេស្រលាញ់មនុស្សហ្នឹង មិនមែនស្រលាញ់តែបទចម្រៀង ស្រលាញ់តែសិល្បៈរបស់គាត់មិនបាច់ចេញបទថ្មីទេ យកតែបទចាស់១៥ឆ្នាំមុនមកច្រៀងគេគ្រាន់តែឃើញវត្តមានម្នាក់នឹងគឺគេទៅតែម្តងដោយមិនចាំបាច់មានហេតុផលបទចម្រៀងថ្មីអ្វីទាំងអស់។

អ្នកបង្កើតមាតិការូបនេះថា ឱក សុគន្ធកញ្ញាជាអាយដលលំដាប់លេខ១ចង់ឱ្យលក់តម្លៃសំបុត្រប៉ុន្មាន។ អ្វីដែលបង្ហោះចេញជាសាធារណៈគឺតែងតែមានការវែកញែក ការលើកឡើងក៏ប៉ុន្តែអ្វីក៏ដោយមិនមានការចំណេញឡើងមកឬក៏ប៉ះពាល់ឬក៏ខាតបង់ដល់មនុស្សម្នាក់ហ្នឹងយល់ល្អកុំអី។ លោកថា អ្វីដែលលោកនិយាយអត់មានពាក់ព័ន្ធនឹងការមើលងាយជីវភាពអ្នកណាមួយប៉ុន្តែលោកនិយាយពីអ្នកដែលទើសគេខុសរបៀបចេញមកវែកញែក ជាន់ឈ្លីគេ ប៉ះពាល់គេ បើសិនជាអត់លុយទេនៅឱ្យស្ងៀមទៅ។

Bong Rith – អឿនឈឿន បានបន្ថែមទៀតថា អ្នកដែលនិយាយថាថ្លៃខ្លាំង ថ្លៃប្រហែលតារាបរទេសហើយ ដោយបានចោទជាសំណួរមកវិញថា តារាស្រុកគេថ្លៃហេតុអ្វីតារាក្នុងស្រុកមិនអាចឡើងតម្លៃខ្លួនឱ្យថ្លៃចឹងបាន។ លោកហ៊ាននិយាយថា តម្លៃប៉ុណ្ណឹងគឺមិនថ្លៃណាស់ណាទេដែលអ្នកគាំទ្រចាយលុយទៅមើល Concert solo តាំងពីដើមគឺគេយល់ហើយ ណាស់អ្នកដែលមិនធ្លាប់ហើយចេញយោបល់ខុសទំនង គួរសិក្សាឱ្យដល់ទៅលើការប្រគំតន្រ្តីនីមួយៗ៕

តារាចម្រៀង សួស វីសា បានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងបន្ទាប់ពីរូបនាងបកស្រាយទម្រង់ហោមរោងយីកេបានយ៉ាងពីរោះស្តាប់ហើយជក់ចិត្តណាស់។ ទោះបីជាកន្លងមកជាច្រើនឆ្នាំយ៉ាងណាក្តីអ្នកគាំទ្របានសរសើរថា សួស វីសា នៅតែច្រៀងពីរោះដូចកាលពីប្រកួតក្នុងកម្មវិធី I Am A Singer Cambodia រដូវកាលទី១ ឆ្នាំ២០១៦។

វិលមកឡើងឆាកតន្រ្តីវិញបន្ទាប់ពីមានបញ្ហាសុខភាពអស់មួយរយៈធំ តារាចម្រៀង សួស វីសា នៅតែជាទីចាប់អារម្មណ៍របស់មហាជនតាមរយៈទឹកដមសំឡេងរបស់នាងទោះបីជាមិនបានបង្ហាញខ្លួនញឹកញាប់ក្តី។ មិនត្រឹមតែមានអាជីពជាតារាចម្រៀងប៉ុន្តែ តារាស្រីរូបនេះក្តោបក្តាប់ជំនួញជាច្រើននៅក្នុងដៃជាមួយស្វាមីលោក ថមមី ថែមទាំងបានបង្កើតកម្មវិធីមួយហៅតារាកិត្តិយសមកសម្ភាសន៍ជាមួយនឹងសំលៀកបំពាក់គេងយប់។

ថ្មីៗនេះតារាចម្រៀង សួស វីសា ក៏បានធ្វើឱ្យទស្សនិកជនតាមបណ្តាញសង្គមមានការចាប់អារម្មណ៍យ៉ាងខ្លាំងនៅពេលឃ្លីបវីដេអូរបស់តារាចម្រៀងរូបនេះបានចែករំលែកនៅលើប្រព័ន្ធអ៊ីនធឺណិត។ ក្នុងកម្មវិធីប្រគំតន្រ្តីមួយដែលស្ថិតក្នុងសំលៀកបំពាក់ប្រពៃណីខ្មែរ សួស វីសា និង ផន ស្រីខួច ត្រូវបានពិធីករពិធីការិនី អង្រួនចិត្តបកស្រាយបទចម្រៀងអំឡុងពេលអ្នកទាំងពីរប្រកួត។

សួស វីសា​បានបង្ហើរសំឡេងរបស់ខ្លួនក្នុងទម្រង់ហោមរោងយីកេ ទោះបីជាគ្មានភ្លេងអមក្តីប៉ុន្តែទឹកដមសំឡេងរបស់នាងនៅតែពីរោះដក់ជាប់ក្នុងចិត្តទទួលបានការសរសើរយ៉ាងច្រើន។ ទស្សនិកជនបានបញ្ចេញមតិសរសើរជាច្រើនទៅកាន់តារាចម្រៀង សួស វីសា ថាច្រៀងបានពីរោះណាស់ ស្តាប់ហើយព្រឺសម្បុរតែម្តង។ ចំពោះប្រិយមិត្តដែលនៅចាំការប្រកួតរបស់ សួស វីសា ក៏បានលើកឡើងដែរថាទោះបីជាកន្លងផុតយូរឆ្នាំយ៉ាងណាតារាចម្រៀងរូបនេះនៅតែបកស្រាយបានយ៉ាងពីរោះ។

គួរឱ្យដឹងថាការបង្ហើរសំនៀងទម្រង់ហោមរោងយីកេរបស់ សួស វីសា នេះគឺនាងធ្លាប់បានយកមកប្រកួតជាមួយតារាចម្រៀងផ្សេងទៀតនៅក្នុងកម្មវិធី I Am A Singer Cambodia រដូវកាលទី១ ឆ្នាំ២០១៦។ សួស វីសា មិនត្រឹមតែជាអ្នកចម្រៀងសម័យច្រៀងបទមនោសញ្ចេតនាឬបទញាក់នោះទេ ប៉ុន្តែនាងក៏មានចំណេះជំនាញខាងសិល្បៈបុរាណដូចគ្នាព្រោះនាងគឺជា នាដការីឆ្នើមមកពីសាកលវិទ្យាល័យភូមិន្ទនិងវិចិត្រ សិល្បៈ និងអាចរាំរបាំប្រពៃណីបានយ៉ាងស្ទាត់ជំនាញផងដែរ។

គួរបញ្ជាក់ថា បច្ចុប្បន្ន សួស វីសា កំពុងពរពោះកូនទី២ផងដែរបន្ទាប់ពីកូនស្រីច្បងមានអាយុជិត៤ឆ្នាំហើយ៕