ប្រទេសកាណាដា ៖ មនុស្សភាគច្រើនបានស្វែងរកឱកាសការងារមានភាពបត់បែន និងអាចធ្វើការពីចម្ងាយ ជាពិសេស ក្រុមយុវជនចាប់អារម្មណ៍ធ្វើការនៅក្រៅប្រទេស ឬស្វែងរកការងារថ្មីក្នុងប្រទេសមានសេដ្ឋកិច្ចរីកចម្រើន ។ លទ្ធផលស្ទង់មតិរបស់ Jobseeker បង្ហាញថា មនុស្សវ័យធ្វើការជាង៨០០លាននាក់ កំពុងស្វែងរកការងារនៅក្រៅប្រទេស ។

តាមលទ្ធផលស្ទង់មតិបញ្ជាក់ថា ប្រទេសដែលមនុស្សទូទាំងពិភពលោក ចង់មកធ្វើការច្រើនបំផុត គឺកាណាដា ។ រីឯពលរដ្ឋប្រទេសចង់មកធ្វើការនៅកាណាដាច្រើនជាងគេ រួមមាន ៖ កូស្តារីកា អាល្លឺម៉ង់ ឥណ្ឌា ជប៉ុន ម៉ិកស៊ិក អាហ្វ្រិកខាងត្បូង អារ៉ាប៊ីសាអូឌីត និងអេមីរ៉ាតអារ៉ាប់រួម ។

ខាងក្រោមនេះ គឺជាចំណាត់ថ្នាក់ប្រទេសដែលជនបរទេសចង់មកធ្វើការច្រើនបំផុត ៖
១-កាណាដា
២-អូស្ត្រាលី
៣-សហរដ្ឋអាមេរិក និងស្វីស
៤-ដាណឺម៉ាក, សិង្ហបុរី, អារ៉ាប៊ីសាអូឌីត និងអង់គ្លេស
៥-ជប៉ុន, កាតា, អាល្លឺម៉ង់, អេស្ប៉ាញ និងនូវែលសេឡង់

មូលហេតុធ្វើឱ្យកាណាដាក្លាយជាប្រទេសដែលជនបរទេសចង់មកធ្វើការច្រើន ដោយសារកាណាដាបានទទួលយកវប្បធម៌ចម្រុះ និងមានភាសាផ្លូវការចំនួន២ ហើយដំណើរការត្រួតពិនិត្យឯកសារ និងការស្នើសុំអនុញ្ញាតធ្វើការរបស់ជនបរទេស គឺឆាប់រហ័សជាងបណ្តាប្រទេសនៅសហភាពអឺរ៉ុប, សហរដ្ឋអាមេរិក និងអង់គ្លេស ។

អ្នកជំនាញការងារមកពី Jobseeker និយាយថា ៖ «ក្រុមហ៊ុននានាបានហៅបុគ្គលិកមកធ្វើការក្នុងការិយាល័យ ចាប់ពី៣ថ្ងៃ ទៅ៤ថ្ងៃក្នុង១សប្តាហ៍ ប៉ុន្តែបុគ្គលិកចង់ធ្វើការពីចម្ងាយដើម្បីឱ្យមានតុល្យភាពរវាងជីវិត និងការងារ ។ មនុស្សជាច្រើនចង់មកធ្វើការនៅកាណាដា ពីព្រោះពលរដ្ឋកាណាដាស្វាគមន៍មនុស្សមានវប្បធម៌ខុសគ្នា ហើយការស្នើសុំស្នាក់នៅសម្រាប់ជនបរទេស គឺច្បាស់លាស់ និងឆាប់រហ័ស» ។

កាណាដា គឺជាប្រទេសធំលំដាប់ទី២ លើពិភពលោក ដែលមានភាសាផ្លូវការចំនួន២ គឺអង់គ្លេស និងបារាំង ។ ផ្នែកអប់រំ សុខភាព បរិស្ថាន ទំនាក់ទំនងសង្គម និងជីវភាពប្រចាំថ្ងៃនៅកាណាដា គឺល្អប្រសើរ ។ តាមទិន្នន័យការចាត់ចំណាត់ថ្នាក់សន្ទស្សន៍គុណភាពជីវិតរបស់ OECD គឺកាណាដាបានជាប់ចំណាត់ថ្នាក់ទី១ ក្នុងចំណោមប្រទេសល្អបំផុតចំនួន១០ ៕

អ្វីដែលពិភពលោកភ្ញាក់ផ្អើល គឺថ្មីៗនេះ វៀតណាមបានបញ្ចេញ និងបង្ហាញនូវប្រភេទអាវុ.ធ ដែលផលិតដោយខ្លួនឯងផ្ទាល់ (Made in Vietnam) ក្នុងពិព័រណ៍អាវុ.ធ អន្តរជាតិ ទីក្រុងហាណូយ នៅថ្ងៃទី១៩ ខែធ្នូ ឆ្នាំ២០២៤ ដើម្បីពង្រឹងវិស័យការពារប្រទេស និងការនាំចេញអាវុ.ធ ស្របពេលមានជម្លោះជាមួយចិន ។ រីឯប្រទេសចូលរួមការតាំងពិព័រណ៍នេះ រួមមាន ៖ អាមេរិក តួកគី អ៊ីស្រាអែល អ៊ីរ៉ង់ រុស្ស៊ី អ៊ុយក្រែន និងបណ្តាប្រទេសអឺរ៉ុប ។

វៀតណាមបាននាំចូលអាវុធជាច្រើនពីរុស្ស៊ី ប៉ុន្តែរយៈពេលចុងក្រោយនេះ រដ្ឋាភិបាលក្រុងហាណូយបានពង្រឹងសមត្ថភាពការពារជាតិ ពេលវៀតណាមមានជម្លោះជាមួយចិនក្នុងសមុទ្រចិនខាងត្បូង ។ ថ្មីៗនេះ វៀតណាមព្យាយាមលើកកម្ពស់វិស័យការពារជាតិ និងជំរុញការនាំចេញអាវុធទៅក្រៅប្រទេស ។

Viettel គឺជាក្រុមហ៊ុនអាវុធដែលរដ្ឋាភិបាលវៀតណាមជាម្ចាស់ បានដឹកនាំក្រុមហ៊ុនអាវុធនៅវៀតណាមមកចូលរួមបង្ហាញអាវុធផ្សេងៗ ដូចជា ៖ ប្រព័ន្ធការពារមីស៊ីល ដ្រូន រ៉ាដាការពារគ្រោះថ្នាក់លើអាកាស រថពាសដែក និងកាំភ្លើងធំ ។

អ្នកជំនាញសន្តិសុខវៀតណាមមកពីសាកលវិទ្យាល័យ New South Wales ប្រទេសអូស្ត្រាលី និយាយថា វៀតណាមបានអួតអាវុធរបស់ខ្លួនក្នុងពិព័រណ៍អាវុធអន្តរជាតិ និងជាយុទ្ធសាស្ត្រសំខាន់សម្រាប់ពង្រឹងវិស័យការពារជាតិ ព្រមទាំងឈានដល់ការចុះកិច្ចព្រមព្រៀងជាមួយក្រុមហ៊ុននាំចេញអាវុធបរទេសឱ្យមកផលិតគ្រឿងបន្លាស់សព្វាវុធនៅវៀតណាម ។

កន្លងមក វៀតណាមបានពិភាក្សាជាមួយក្រុមហ៊ុនកូរ៉េខាងត្បូង ដើម្បីចុះកិច្ចព្រមព្រៀងផលិតគ្រាប់កាំភ្លើងធំ និងគ្រឿងបន្លាស់យន្តហោះ ។ ក្រៅពីនេះ វៀតណាមក៏បានពិភាក្សាពីកិច្ចព្រមព្រៀងស្រដៀងគ្នាជាមួយក្រុមហ៊ុនផ្សេងៗផងដែរ ដូចជា ៖ ក្រុមហ៊ុនមកពីសាធារណរដ្ឋឆេក ។

គួរបញ្ជាក់ថា ពិព័រណ៍អាវុធអន្តរជាតិនៅទីក្រុងហាណូយ គឺចាប់ពីថ្ងៃទី១៩ ដល់ថ្ងៃទី២២ ខែធ្នូ ឆ្នាំ២០២៤ ហើយមានក្រុមហ៊ុនបរទេសចូលរួមបង្ហាញអាវុធ ជិត២៥០ក្រុមហ៊ុន ។ វៀតណាមបានអភិវឌ្ឍន៍សមត្ថភាពការពារជាតិក្នុងតំបន់អស់រយៈពេលច្រើនឆ្នាំហើយ ជាពិសេស តំបន់មានជម្លោះជាមួយចិន ៕

ប្រទេសឥណ្ឌូណេស៊ី ៖ ច្បាប់ប្រើប្រាស់គ្រឿងបន្លាស់ និងវត្ថុធាតុដើមរបស់រដ្ឋាភិបាលឥណ្ឌូណេស៊ី ដែលកំណត់ឱ្យក្រុមហ៊ុនទូរស័ព្ទស្មាតហ្វូនត្រូវតែយកគ្រឿងបន្លាស់ផលិតក្នុងប្រទេសនេះស្មើជាង៤០% នឹងធ្វើឱ្យប៉ះពាល់ប្រាក់ចំណេញរបស់ក្រុមហ៊ុនបរទេស និងសេដ្ឋកិច្ចឥណ្ឌូណេស៊ី ។ នេះបើតាមការលើកឡើងរបស់សេដ្ឋវិទូ កាលពីពាក់កណ្តាលខែធ្នូ ឆ្នាំ២០២៤ ។

កាលពីថ្ងៃទី៣ ខែធ្នូ កន្លងមក អនុរដ្ឋមន្ត្រីក្រសួងឧស្សាហកម្មឥណ្ឌូណេស៊ីបាននិយាយមកកាន់ប្រព័ន្ធផ្សព្វផ្សាយថា រដ្ឋាភិបាលមានគម្រោងឱ្យក្រុមហ៊ុនផលិតទូរស័ព្ទស្មាតហ្វូនបង្កើនការប្រើប្រាស់គ្រឿងបន្លាស់ក្នុងស្រុក ។ គម្រោងនេះក្រោយពីរដ្ឋាភិបាលបដិសេធសំណើបន្ថែមប្រាក់វិនិយោគចំនួន១០០លានដុល្លារអាមេរិករបស់ Apple ជាក្រុមហ៊ុនអាមេរិកនាំមុខផ្នែកបច្ចេកវិទ្យា ដើម្បីលក់ទូរស័ព្ទ iPhone 16 ។

ច្បាប់ប្រើប្រាស់គ្រឿងបន្លាស់ និងវត្ថុធាតុដើមនៅឥណ្ឌូណេស៊ី គឺគិតចាប់ពីបន្ទះសូឡាស្រូបពន្លឺព្រះអាទិត្យ រហូតដល់រថយន្តអគ្គិសនី ដែលច្បាប់នេះមានគោលដៅការពារឧស្សាហកម្មក្នុងស្រុក, បង្កើតខ្សែសង្វាក់ផ្គត់ផ្គង់បន្ថែមនៅឥណ្ឌូណេស៊ី និងការប្រើគ្រឿងបន្លាស់ក្នុងស្រុក ស្របពេលឥណ្ឌូណេស៊ីកំពុងប្រកួតប្រជែងជាមួយវៀតណាម ក្នុងការទាក់ទាញវិនិយោគិនដែលប្តូរទីតាំងផលិតចេញពីចិន ។

សេដ្ឋវិទូនានានិយាយថា ច្បាប់នេះពុំអាចទាក់ទាញការវិនិយោគទេ ប៉ុន្តែនឹងធ្វើឱ្យក្រុមហ៊ុន Foxconn និង Tesla ដកការវិនិយោគចេញពីឥណ្ឌូណេស៊ី ។ ការចំណាយរបស់ក្រុមហ៊ុននឹងកើនឡើង, សមត្ថភាពប្រកួតប្រជែងការនាំចេញធ្លាក់ចុះ ហើយនឹងប៉ះពាល់សេដ្ឋកិច្ចឥណ្ឌូណេស៊ី ។ រីឯវៀតណាមបានទាក់ទាញការវិនិយោគផ្នែកបច្ចេកវិទ្យាខ្លាំងជាងឥណ្ឌូណេស៊ី បើទោះជាទីផ្សារក្នុងស្រុកវៀតណាមតូចជាងឥណ្ឌូណេស៊ីក្តី ។ បើឥណ្ឌូណេស៊ីតម្រូវឱ្យក្រុមហ៊ុននានាប្រើប្រាស់គ្រឿងបន្លាស់ និងវត្ថុធាតុដើមក្នុងស្រុក នឹងធ្វើឱ្យវិនិយោគិនផ្លាស់ប្តូរទីតាំងផលិតទៅវៀតណាម ។

លើសពីនេះ វៀតណាមបានបង្កើតកិច្ចព្រមព្រៀងពាណិជ្ជកម្មសេរីជាមួយអឺរ៉ុប ខណៈឥណ្ឌូណេស៊ីកំពុងព្យាយាមបង្កើតកិច្ចព្រមព្រៀងនេះ ។ វៀតណាមបានទទួលផលប្រយោជន៍ព្រោះក្រុមហ៊ុននានាផ្លាស់ប្តូរទីតាំងផលិតចេញពីចិន ដោយសារចិនមានភាពតានតឹងពាណិជ្ជកម្មជាមួយអាមេរិក ៕

ខណៈប្រទេសជាច្រើនកំពុងប្រឈមនឹងបញ្ហាសេដ្ឋកិច្ច ដោយសារជម្លោះនៅអឺរ៉ុប និងមជ្ឈិមបូព៌ា រួមទាំងការបោះឆ្នោតសំខាន់ៗនៅសហរដ្ឋអាមេរិក និងឥណ្ឌា បានរារាំងដល់កំណើនសេដ្ឋកិច្ចពិភពលោកនៅឆ្នាំនេះ។ ទោះជាយ៉ាងណាបើយោងតាមអ្នកជំនាញសេដ្ឋវិទូបានចងក្រងទិន្នន័យអំពីសូចនាករសេដ្ឋកិច្ច និងហិរញ្ញវត្ថុចំនួន ៥ រួមមាន: កំណើនផលិតផលក្នុងស្រុកសរុប ការអនុវត្តទីផ្សារភាគហ៊ុន អតិផរណាស្នូល ភាពអត់ការងារធ្វើ និងឱនភាពថវិការបស់ប្រទេសចំនួន ៣៧ នៅក្នុងអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) បានឱ្យដឹងថា៖

ក្នុងចំណោមបណ្តាប្រទេសទាំងអស់ជុំវិញពិភពលោកមានតែប្រទេស ៤ ប៉ុណ្ណោះដែលមានដំណើរការសេដ្ឋកិច្ចល្អបំផុតនៅឆ្នាំនេះ ដែលក្នុងនោះរួមមាន៖ អេស្ប៉ាញ អៀរឡង់ ដាណឺម៉ាក និងក្រិច។ យោងតាមវិទ្យាស្ថានជាតិស្ថិតិរបស់អេស្ប៉ាញ GDP របស់ប្រទេសនេះត្រូវបានគេរំពឹងថានឹងកើនឡើងជាង ៣% ដោយសារទីផ្សារការងារដ៏រឹងមាំ និងកម្រិតខ្ពស់នៃអន្តោប្រវេសន៍ដែលជំរុញទិន្នផលសេដ្ឋកិច្ច។ ដូច្នេះអេស្ប៉ាញនឹងបន្តដំណើរការលើសពីបណ្តាប្រទេសនៅតំបន់ចាយប្រាក់អឺរ៉ូ ដោយសារនិន្នាការទីផ្សារការងារវិជ្ជមាន និងកំណែទម្រង់ដ៏រឹងមាំ រួមទាំងការធ្វើឱ្យប្រសើរឡើងនូវការប្រកួតប្រជែង។

នេះបើយោងតាមទិន្នន័យចងក្រងដោយ Economist ចំណាត់ថ្នាក់ទីពីរបានទៅលើប្រទេសអៀរឡង់ដែល GDP នៅត្រីមាសទីបីរបស់ប្រទេសនេះកើនឡើង ២% បើប្រៀបធៀបទៅនឹងត្រីមាសទី ៤ ឆ្នាំ ២០២៣ ហើយទីផ្សារភាគហ៊ុនបានកើនឡើង ១៧.៦% ភាពអត់ការងារធ្វើបានថយចុះ ០.៣% និងអតិផរណាស្នូលមានត្រឹមតែ ២.៣% ប៉ុណ្ណោះ។ ចំណុចលេចធ្លោរបស់ប្រទេសនេះគឺដោយសារប្រាក់ចំណូលពន្ធច្រើន អៀរឡង់មានអតិរេកថវិកាធំបីឆ្នាំជាប់ៗគ្នា ដែលជួយរដ្ឋាភិបាលបង្កើនការចំណាយ កាត់បន្ថយពន្ធ និងបង្កើតមូលនិធិវិនិយោគជាតិយ៉ាងឆាប់រហ័ស។

ចំណាត់ថ្នាក់ទី ៣ រួមមានប្រទេសដាណឺម៉ាក និងក្រិក។ កាលពីដើមខែនេះ ក្រសួងសេដ្ឋកិច្ចដាណឺម៉ាកបានបង្កើនការព្យាករណ៍ GDP របស់ខ្លួនសម្រាប់ឆ្នាំនេះពី ១.៩% ទៅ ៣% ហើយកំណើននៅឆ្នាំ ២០២៥ ក៏ត្រូវបានកែសម្រួលពី ២.២% ទៅ ២.៩% ផងដែរ។ យោងតាមក្រសួងសេដ្ឋកិច្ចប្រទេសដាណឺម៉ាក រីកចម្រើនខ្លាំងដោយសារកំណើនការងារ ហើយមួយភាគប្រាំទៀតគឺដោយសារតែការកើនឡើងនៃការជ្រើសរើសបុគ្គលិកនៅក្រុមហ៊ុន Novo Nordisk ដែលមានបុគ្គលិកប្រហែល ៣០,០០០ នាក់។ រីឯប្រទេសក្រិក ក៏ត្រូវបានគេព្យាករណ៍ថា សេដ្ឋកិច្ចប្រទេសនេះនឹងកើនឡើង ២.៣% នៅឆ្នាំ២០២៤ និង ២.២% នៅឆ្នាំ ២០២៥ ផងដែរ៕

ប្រទេសថៃ ៖ លោក Dhanin Chearavanont បានជាប់ចំណាត់ថ្នាក់ទី១ ជាមហាសេដ្ឋីថៃមានទ្រព្យសម្បត្តិច្រើនបំផុត និងជាប់ចំណាត់ថ្នាក់ជាមហាសេដ្ឋីលំដាប់ពិភពលោកផងដែរ ក្នុងការចាត់ចំណាត់ថ្នាក់មហាសេដ្ឋីពិភពលោកចុងក្រោយបំផុតរបស់ទស្សនាវដ្តី Forbes ។ លោកបង្ហាញពីគំនិតរបស់ខ្លួនថា លោកធ្វើការដូចជាការដើរកម្សាន្ត ហើយធ្វើខ្លួនដូចទឹកមិនពេញកែវ ដោយរៀនសូត្រពីមនុស្សឆ្លាតៗជានិច្ច ។

លោក Dhanin ជាបុគ្គលមានទ្រព្យសម្បត្តិច្រើនបំផុតនៅប្រទេសថៃ និងជាម្ចាស់ក្រុមហ៊ុន CP បានជាប់ចំណាត់ថ្នាក់ទី១៥៩ ក្នុងការចាត់ចំណាត់ថ្នាក់មហាសេដ្ឋីពិភពលោក ឆ្នាំ២០២៤ របស់ទស្សនាវដ្តី Forbes ដែលលោកមានទ្រព្យសម្បត្តិ ចំនួន១២ពាន់៥រយលានដុល្លារអាមេរិក ។ ក្រុមហ៊ុន CP បានប្រកបអាជីវកម្មក្នុងប្រទេសចំនួន២២ និងមានបុគ្គលិកជាង៤៥ម៉ឺននាក់នៅទូទាំងពិភពលោក ហើយក្នុង១ឆ្នាំៗ ក្រុមហ៊ុននេះបានបង់ពន្ធឱ្យរដ្ឋាភិបាលថៃ ស្មើជាង២ម៉ឺនលានបាត ។

ទីកន្លែងកំណើតរបស់លោក Dhanin គឺនៅតំបន់យ៉ាវរ៉ាជ ទីក្រុងបាងកក ដែលមានឪពុកជាជនជាតិចិន ។ លោកបានបង្ហាញពីគន្លឹះភាពជោគជ័យថា ការប្រកបអាជីវកម្ម គឺដូចគ្នានឹងការដើរកម្សាន្តដែរ បើយើងរីករាយក្នុងការដោះស្រាយបញ្ហា យើងនឹងអាចធ្វើការផង និងមានសេចក្តីសុខផង ។ ចំណុចសំខាន់ មិនត្រូវបញ្ឈប់ការរៀនសូត្រទេ ហើយត្រូវរៀនសូត្រពីមនុស្សឆ្លាតៗដើម្បីអាប់ឌេតចំណេះដឹងគ្រប់ពេលវេលា ។

ខាងក្រោមនេះ គឺជាចំណាត់ថ្នាក់មហាសេដ្ឋីពិភពលោក ឆ្នាំ២០២៤ ចាប់ពីលេខ១ ដល់លេខ៤ ៖

១-លោក Bernard Arnault អ្នកជំនួញបារាំង អាយុ៧៥ឆ្នាំ និងគ្រួសារ Bernard Arnault & Family ជាក្រុមហ៊ុនពហុជាតិ និងម្ចាស់ម៉ាក Louis Vuitton ជាប់ចំណាត់ថ្នាក់ទី១ ជាបុគ្គលមានទ្រព្យសម្បត្តិច្រើនបំផុតលើពិភពលោក ដែលមានទ្រព្យសម្បត្តិចំនួន២៣៣ពាន់លានដុល្លារអាមេរិក
២-លោក Elon Musk នាយកក្រុមហ៊ុន Tesla និង SpaceX ជាប់ចំណាត់ថ្នាក់ទី២ មានទ្រព្យសម្បត្តិចំនួន១៩៥ពាន់លានដុល្លារអាមេរិក
៣-លោក Jeff Bezos នាយកក្រុមហ៊ុន Amazon ជាប់ចំណាត់ថ្នាក់ទី៣ និង
៤-លោក Mark Zuckerberg នាយកក្រុមហ៊ុន Facebook ជាប់ចំណាត់ថ្នាក់ទី៤

ចំណែក Bloomberg បានចាត់ចំណាត់ថ្នាក់គ្រួសារចំនួន២៥ មានទ្រព្យសម្បត្តិច្រើនបំផុតលើពិភពលោក ប្រចាំឆ្នាំ២០២៤ (World’s Richest Families 2024) ក្នុងនោះគ្រួសារត្រកូល Chearavanont ម្ចាស់ក្រុមហ៊ុន CP ជាប់ចំណាត់ថ្នាក់ទី១៩ មានទ្រព្យសម្បត្តិចំនួន១លាន៥សែនលានបាត ដែលប្រហាក់ប្រហែលគ្នានឹងគ្រួសារត្រកូល Quandt ម្ចាស់ក្រុមហ៊ុនរថយន្ត Mini & Rolls-Royce នៅអាល្លឺម៉ង់ មានទ្រព្យសម្បត្តិចំនួន១លាន៦សែនលានបាត ជាប់ចំណាត់ថ្នាក់ទី១៨ ។

គួរបញ្ជាក់ថា Charoen Pokphand Group (CP) គឺជាក្រុមហ៊ុនផលិតចំណីសត្វដ៏ធំបំផុតនៅប្រទេសថៃ និងលើពិភពលោក ។ ក្រុមហ៊ុននេះបានរីកចម្រើន និងពង្រីកអាជីវកម្មជាបន្តបន្ទាប់ ហើយបានគិតគូរពីផលប្រយោជន៍ជាតិ និងពលរដ្ឋ ៕