ប៊ី សុធារី បវរកញ្ញាខ្មែរបានធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំងបន្ទាប់ពីបង្ហាញខ្លួនជាមួយនឹងសក់ខ្លីដូចជាម៉ូតសក់បុរស។ ចំពោះការកាត់សក់នេះ សុធារី ថាដោយសារតែស្រ្តេសខ្លាំងពេក។

នៅថ្ងៃទី២១ ធ្នូ ប៊ី សុធារី បានបង្ហាញខ្លួនជាមួយនឹងសក់ខ្លី ខណៈកាលពីមុននាងគឺជាបវរកញ្ញាដែលមានសក់វែងដ៏ស្រស់ស្អាត។ ក្នុងការសម្រេចចិត្តកាត់សក់ខ្លីនេះ ប៊ី សុធារី បាននិយាយក្នុងវីដេអូមួយថា ការកាត់សក់នេះគឺនាងគិតមកជាយូរហើយមិនមែនគិតភ្លាមកាត់ភ្លាមនោះទេហើយក៏បានសួរអ្នកគ្រប់គ្រងដោយលើកមុនមិនអនុញ្ញាតឱ្យនាងកាត់ឡើយ ប៉ុន្តែលើកនេះនាងមិនបានសួរអ្នកណាគេទាំងអស់នាងសម្រេចចិត្តហើយទៅកាត់តែម្តង។

ប៊ី សុធារី ថាការកាត់សក់ម៉ូតនេះក៏ស្រលាញ់ដែរ ប៉ុន្តែរឿងធំបំផុតនោះគឺនាងស្រ្តេស ហើយនាងមិនដឹងថាគួរហៅថាជាជំងឺអ្វីនោះទេ ដោយនាងមានអារម្មណ៍ថាអត់សប្បាយចិត្ត ថប់ដង្ហើម និងបានបញ្ជាក់ច្បាស់ៗថា នាងមានការងារ មានលុយ ប៉ុន្តែនាងនៅតែអត់សប្បាយចិត្ត ខួរក្បាលរបស់នាងរកគោលដៅមិនឃើញគួរតែធ្វើអ្វី។ បវរកញ្ញារូបនេះថា មួយរយៈនេះនាងស្ងាត់គឺនាងកំពុងតែវង្វេងខ្លាំងមែនទែនមិនដឹងថាខ្លួនឯងគួរតែធ្វើអ្វីទាំងការងារក៏មានធ្វើ លុយក៏មានប៉ុន្តែទៅជាមានអារម្មណ៍ថាវង្វេង។

ប៊ី សុធារី ថានាងសម្រេចចិត្តកាត់សក់នេះឡើងមានទាំងការស្រលាញ់ផង និងហេតុផលមួយទៀតថាបើនាងបានកាត់សក់អាចនឹងទម្លាក់បញ្ហានៅក្នុងចិត្តរបស់នាងបានច្រើន។ បវរកញ្ញារូបនេះលើកឡើងទៀតថា នាងពិបាកពន្យល់ពីបញ្ហាដែលបានកើតឡើងនាងមិនដឹងថាធ្វើយ៉ាងមិចទើបសម្រេចចិត្តកាត់សក់ខ្លីនេះហើយប្រហែលជាបវរកញ្ញានៅស្រុកខ្មែរមានតែនាងទេដែលកាត់សក់ខ្លីរបៀបនេះប៉ុន្តែនាងគិតថានាងមើលទៅនៅតែស្អាតដដែល។

ក្រោយពីឃើញ ប៊ី សុធារី កាត់សក់បែបនេះហើយអ្នកគាំទ្រពិតជាបង្ហាញការភ្ញាក់ផ្អើលជាខ្លាំងដោយមិនភ្លេចសរសើរថាស្រស់ស្អាតដូចគ្នា៕

តារាចម្រៀង ហ៊ិន លីដា ដែលទទួលបានប្រជាប្រិយភាពតាមរយៈបទ«អូសអូវ៉ាលី» ត្រូវបានអ្នកលេងបណ្តាញសង្គមចោទថានាងជាតារាចម្រៀងខ្មឺតព្រោះតែបានជួបនៅកន្លែងប្រគំតន្រ្តី ដូចជានៅខេត្តកំពង់ឆ្នាំង ព្រះវិហារ ឧត្តរមានជ័យ ច្រៀងចប់ចុះប្រុយគ្មាននិយាយអ្វីមួយម៉ាត់។ ទោះយ៉ាងណានេះជាការលើកឡើងតែម្ខាងរបស់អ្នកលេងបណ្តាញសង្គមប៉ុណ្ណោះ។

មហាជជនមួយចំនួនជ្រាបមកហើយថា ហ៊ិន លីដា ជាអ្នកចម្រៀង ម្នាក់ដែលមានប្រវត្តិតស៊ូខ្លាំងលើវិថីសិល្បៈឆ្លងកាត់ការប្រកួតប្រជែងជាច្រើនដងតាំងពីអាយុ៧ឆ្នាំ។ ការតស៊ូនេះបានជំរុញឱ្យនាងក្លាយជាតារាចម្រៀងស្រីទី៣ នៅក្នុងផលិតកម្ម ហ្គាឡាក់ស៊ី បន្ទាប់ពី តន់ ចន្ទសីម៉ា និង អ៊ុក សុវណ្ណរី កាលពីខែវិច្ឆិកា ឆ្នាំ២០២២។ ដំបូងឡើងការលេចវត្តមានក្នុងទ្រនំនេះ ហ៊ិន លីដា ត្រូវបានអ្នកមួយចំនួនថាគឺជាដៃគូប្រកួតប្រជែងរបស់ សីម៉ា ដែលជាគ្រាប់ពេជ្រសំខាន់របស់ក្រុមហ៊ុន ប៉ុន្តែនាងបានឆ្លើយបដិសេធ។

ចុងក្រោយមកនេះ លីដា បានចេញបទចម្រៀងមួយបទដែលក្រុមហ៊ុនបានទិញសិទ្ធិផលិតពីម្ចាស់ដើមមានចំណងជើងថា «អូសវ៉ាលី» ដែលបទនេះមានទាំងការគាំទ្រផងនិងមិនគាំទ្រផង។ អ្វីដែលគួរឱ្យចាប់អារម្មណ៍ លីដា ត្រូវបានអ្នកមួយចំនួនដែលចូលរួមទៅទស្សនាប្រគំតន្រ្តីចោទនាងថា ខ្មឺត។

វីដេអូមួយដែលបង្ហោះនៅថ្ងៃទី១៨ ធ្នូ អ្នកលេងបណ្តាញសង្គមបានចូលខម្មិនការសម្តែងរបស់ លីដា ថា «មកព្រះវិហារ ច្រៀងចប់ចុះប្រុយគ្មាននិយាយអីមួយម៉ាត់ នឹងឯងតារា? មកអន្លង់វែងខេត្តឧត្តរមានជ័យច្រៀងចប់មិននិយាយអីមួយម៉ាត់ ពិធីករហៅ3_4ម៉ាត់ក៏មិនខ្ចីមកវិញ, មកកំពង់ឆ្នាំងច្រៀងហើយចុះមិននិយាយសូម្បីមួយម៉ាត់ឯងស្មានគេទុកវ៉ាលីហើយមកច្រៀងតមានណាចប់បាត់…»។

ទោះយ៉ាងណា នេះគ្រាន់តែជាការលើកឡើងពីសំណាកអ្នកលេងបណ្តាញសង្គមមួយចំនួនដែលបានចោទថា ហ៊ិន លីដា មានចរិតខ្មឺត ខណៈអ្នកមានអ្នកខ្លះថា នាងមិនមែនវាយឬកនោះទេតែអាចប្រហែលជាប្រញាប់ពេកទើបមិនបានស្វាគមន៍ដាក់ទស្សនិកជន៕

អ្នកគាំទ្រមានការភ្ញាក់ផ្អើលជាខ្លាំងបន្ទាប់ពី Influencer ជា ស្រីនា បានបង្ហាញឧបករណ៍តេសមានគំនូសពីរឆ្នូតដោយទស្សនិកជនស្មានថារូបនាងមានផ្ទៃពោះ។ អ្វីដែលកាន់តែភ្ញាក់ផ្អើលមិនមែនជា ជា ស្រីនា នោះទេដែលពរពោះប៉ុន្តែជាម្តាយរបស់នាងកំពុងពរពោះកូនទី៤ ខណៈ ស្រីនា ថាពេលនាងមានកូន កូននាងនឹងលេងជាមួយនឹងកូនម្តាយរបស់ខ្លួន។

អ្នកក្នុងចង្កោមសិល្បៈ រួមទាំងទស្សនិកជនជាអ្នកគាំទ្រគ្រួសាររបស់ ហេង វិសាល ជា ស្រីនា ម៉ាក់នី មានការរំភើបចិត្តជាខ្លាំងនិងមិននឹកស្មានដល់ដែលក្រុមគ្រួសារដ៏គំរូនៅក្នុងសង្គមនេះនឹងមានសមាជិកថ្មីម្នាក់ទៀត។ ជា ស្រីនា បានបង្ហាញឧបករណ៍តេសដែលមានគំនូសពីរឆ្នូតនិងបានលើកឡើងថាជាកាដូឆ្នាំថ្មី។

អ្វីៗត្រូវបានលាតត្រដាងតាមរយៈវីដេអូខ្លីមួយដែលសមាជិកគ្រួសារទាំង៦នាក់បានបង្ហាញប្រអប់កាដូមួយដោយក្នុងនោះមានឧបករណ៍តេសនិងក្រដាសមួយសន្លឹកដោយឪពុក ស្រីនា គឺជាអ្នកបើកហើយថែមទាំងប៉ាន់ស្មានថាគឺជារថយន្តថ្មី។ នៅពេលប្រអប់កាដូត្រូវបានបើកគឺបានឃើញឧបករណ៍តេស រួមទាំងក្រដាសពិនិត្យគ៌រផងដែលធ្វើឱ្យសមាជិកក្នុងគ្រួសារមានការរំភើបចិត្តជាខ្លាំង។

ម្តាយ ជា ស្រីនា ដែលកំពុងមានទម្ងន់នេះគឺជាកូនទី៤នៅក្នុងគ្រួសារហើយ ស្រីនា បាននិយាយក្នុង វីដេអូថានាងទទួលបានប្អូនស្រីម្នាក់ទៀត ខណៈបាននិយាយដោយរំភើបថាពេលនាងមានកូន កូនរបស់នាងនឹងលេងជាមួយនឹងកូនម្តាយនាង។ ងាកទៅកាន់ស្រីនាថ ដែលជាកូនទី២វិញ នៅពេលទទួលបានកាដូឆ្នាំថ្មីមានប្អូនម្នាក់ទៀតគឺនាងរំភើបចិត្តរហូតដល់ស្រក់ទឹកភ្នែក។

ដំណឹងល្អនេះបានធ្វើឱ្យអ្នកសិល្បៈនិងអ្នកគាំទ្របានចូលរួមអបអរសាទរទៅកាន់ក្រុមគ្រួសារល្បីឈ្មោះនៅក្នុងសង្គមនេះផងដែរ។ គួរកត់សម្គាល់ថា ក្រុមគ្រួសារ ជា ស្រីនា ត្រូវបានទស្សនិកជនថាគឺជាគ្រួសារគំរូមួយនៅក្នុងសង្គមបង្ហាញអ្វីដែលជាគំរូល្អ ជួយសង្គម គោរពប្រតិបត្តិធម៌ មានទឹកចិត្តសប្បុរសគួរឱ្យគោរពជាគំរូដ៏ល្អសម្រាប់គ្រួសារដទៃទៀត៕

អ្នកបង្កើតមាតិកានៅលើបណ្តាញសង្គមជា Influencer មួយរូបអ្នកនាង កល្យាណី បាននិយាយលាយឡំដោយទឹកភ្នែកថាក្នុងអាជីពរបស់ខ្លួនរយៈពេល៧ឆ្នាំត្រូវបានក្រុមហ៊ុនធំៗមួយចំនួនមានកុងត្រាត្រឹមត្រូវបោកប្រើមិនបានទូទាត់ប្រាក់ឱ្យ២ទៅ៣ខែយកលេសគ្រប់សព្វទាំងថាមេនៅក្រៅប្រទេសនិងខាងគណនេយ្យឈឺ។

នៅថ្ងៃទី២៣ ធ្នូ គណនីទិកតុក កល្យាណី បានបង្ហោះវីដេអូជិត៣នាទី និយាយដោយទឹកភ្នែកផ្តាំផ្ញើទៅដល់ Influencer មួយចំនួនអ្នកដែលជា content creator ដូចជាខ្លួនបើអាចជៀសបានក្រុមហ៊ុនធំៗ មានកុងត្រាត្រឹមត្រូវ ជៀសទៅ។ អ្នកនាងបញ្ជាក់ទៀតថា ការងារជា content creator រយៈពេល៧ឆ្នាំហើយគឺដដែលតែម្តង ក្រុមហ៊ុនដែលមានកុងត្រាគឺជាក្រុមហ៊ុនដែលលេប Payment បោកប្រើបញ្ចុះតម្លៃបោកស៊ីតែម្តង។

គណនីដដែលបានលើកឡើងទៀតថា បើសិនជា អតិថិជនធម្មតា មិនធំដុំគឺចំនួនលុយបាញ់មកស្រួលទាំងមិនទាន់ធ្វើវីដេអូ បាញ់លុយមកកក់ជាដើម បង្ហោះភ្លាមបាញ់លុយឱ្យគ្រប់ភ្លាម។ អ្នកបង្កើតមាតិការូបនេះបានលើកឡើងទៀតថា ក្រុមហ៊ុនដែលធំខ្លាំងដល់ថ្នាក់ international មិនបានឱ្យលុយយកលេសថាមេនៅក្រៅប្រទេស ខាងគណនេយ្យឈឺ ពន្យារពេល២ទៅ៣ខែអ្នកដែលចាំ Payment គឺចាំស្កកហើយនៅពេលទាមទារការទូទាត់មើលមកថាយើងជាមនុស្សដូចឃ្លានលុយ។

អ្នកនាង កល្យាណី ថាក្រុមហ៊ុនមិនខ្វល់នោះទេថាយើងត្រូវការលុយត្រូវយកមកបំពេញតម្រូវការក្នុងគ្រួសារយ៉ាងណា គឺចង់បានការងារមកមុនហើយទុកចោលរាប់ខែដោយសារតែក្រុមហ៊ុនធំហើយចំណុចនេះនាងសឹងតែបោកក្បាលជាមួយថ្មកត់ចំណាំចំពោះក្រុមហ៊ុនធំៗមានកុងត្រាហើយគេបោកបានទាំងប្រឡូកវិស័យនេះមក៧ឆ្នាំហើយដោយសារតែកុងត្រា៕