ប្រទេសអេហ្ស៊ីប ៖ កាលពីថ្ងៃទី១៩ ខែវិច្ឆិកា ឆ្នាំ២០២៤ សារព័ត៌មាន Reuters រាយការណ៍ថា យុវជនឈ្មោះ Omar Nok អ្នកធ្វើដំណើរផ្សងព្រេងនៅប្រទេសអេហ្ស៊ីប និងមានឈ្មោះល្បីល្បាញក្នុងបណ្តាញសង្គម បានធ្វើដំណើរទៅដល់ប្រទេសជប៉ុនដោយជោគជ័យ ។ យុវជនរូបនេះបានកំណត់គោលដៅទៅជប៉ុនដោយពុំជិះយន្តហោះ ក្នុងចម្ងាយផ្លូវសរុប ៤៦,២៣៩គីឡូម៉ែត្រ និងចំណាយពេលអស់២៧៤ថ្ងៃ ។

លោក Omar មានអាយុ៣០ឆ្នាំ និងមានអ្នកតាមដានក្នុង Instagram រហូតដល់ជាង៧៥ម៉ឺននាក់ បានបង្ហោះរូបភាពជោគជ័យរបស់ខ្លួន ក្រោយពីបានធ្វើដំណើរឆ្លងកាត់ជាង១០ប្រទេសដើម្បីទៅដល់ជប៉ុន តាមការតាំងចិត្តដោយពុំជិះយន្តហោះ ។ លោកធ្វើដំណើរតាមរថយន្ត, ម៉ូតូ, នាវា, ជិះសត្វអូដ្ឋ និងសេះ រហូតដល់គោលដៅ បើប្រៀបធៀបជាមួយការជិះយន្តហោះពីទីក្រុងឃៃរ៉ូ ប្រទេសអេហ្ស៊ីប ទៅកាន់ទីក្រុងតូក្យូ ប្រទេសជប៉ុន គឺចំណាយពេលតែ១២ម៉ោងប៉ុណ្ណោះ ។

លោកបានថតរូបភាពជាបន្តបន្ទាប់ក្នុងអំឡុងពេលធ្វើដំណើរ ចាប់ពីទីក្រុងឃៃរ៉ូ រហូតដល់ទីក្រុងតូក្យូ ក្នុងចម្ងាយផ្លូវសរុប ៤៦,២៣៩គីឡូម៉ែត្រ ។ លោកប្រាប់ថា ជប៉ុន គឺជាគោលដៅឆ្ងាយបំផុតដែលលោកបានធ្វើដំណើរមកដល់ក្នុងតំបន់អាស៊ី ដោយពុំចាំបាច់ជិះយន្តហោះ ហើយលោកធ្វើដំណើរតាមនាវាមកដល់ទីក្រុង Fukuoka កាលពីខែតុលា ឆ្នាំ២០២៤ បន្ទាប់មក ក៏ធ្វើដំណើរមកទីក្រុងតូក្យូ ។

កន្លងមក លោកធ្លាប់ធ្វើដំណើរផ្លូវឆ្ងាយក្នុងតំបន់អឺរ៉ុប និងអាមេរិក ប៉ុន្តែពុំធ្លាប់ធ្វើដំណើរឆ្ងាយបែបនេះទេ ។ ការធ្វើដំណើរថ្ងៃដំបូងពិបាកបំផុត ក្រោយពីឪពុករបស់លោកនាំមកកំពង់ផែសមុទ្រក្រហមនៅទីក្រុង Safaga ភាគខាងត្បូងអេហ្ស៊ីប ដើម្បីជិះនាវាទៅអារ៉ាប៊ីសាអូឌីត គឺលោកបារម្ភថា ពុំអាចនិយាយភាសាបរទេសបានពេលទៅដល់អាស៊ីកណ្តាល និងគ្មានភ្ញៀវទេសចរច្រើន ។ ប៉ុន្តែដោយសារការលើកទឹកចិត្តពីឪពុក លោកក៏សម្រេចចិត្តជិះនាវា និងធ្វើដំណើរបន្ត ។

លោកបានឆ្លងកាត់ Mecca ជាទីក្រុងរបស់សាសនាឥស្លាម រួចហើយធ្វើដំណើរកាត់តាមវាលខ្សាច់ប្រទេសអ៊ីរ៉ង់មកដល់រុស្ស៊ី ឆ្លងកាត់ជួរភ្នំថាជិគីស្ថាន ។ លោកបានឆ្លងកាត់តំបន់ខ្លះរបស់ប្រទេសកៀហ្ស៊ីស៊ីស្ថាន និងកាហ្សាក់ស្ថាន ដោយជិះសត្វអូដ្ឋ និងសេះ ។

លោកធ្លាប់ធ្វើការផ្នែកវិភាគហិរញ្ញវត្ថុរបស់ Amazon ប្រទេសអាល្លឺម៉ង់ និងលុចសំបួរ ហើយលោកបានចាយវាយប្រាក់សន្សំសម្រាប់ការធ្វើដំណើរលើកនេះ ។ លោកបានចំណាយប្រាក់ចំនួន២៥ដុល្លារអាមេរិកក្នុង១ថ្ងៃ រីឯការធ្វើដំណើរកាត់តាមប្រទេសអាហ្វហ្គានីស្ថាន មានរយៈពេល២សប្តាហ៍ គឺចំណាយប្រាក់អស់តែ៨៨ដុល្លារប៉ុណ្ណោះ ។

ការធ្វើដំណើរតាមផ្លូវដ៏វែងឆ្ងាយនេះ លោកពុំអារម្មណ៍ពីគ្រោះថ្នាក់ទេ ពីព្រោះតែងតែមានមនុស្សពុំស្គាល់គ្នាជួយជានិច្ច ។ ពួកគេចិត្តល្អ ហើយលោកមានទំនុកចិត្តថា សន្តិភាពនឹងកើតឡើងនៅលើពិភពលោក ៕

ប្រទេសទួរគី៖ កាហ្វេកប់ក្នុងខ្សាច់ក្តៅរបស់ប្រទេសទួរគីគឺមានប្រវត្តិយូរលង់ណាស់មកហើយ ដោយបច្ចុប្បន្នវប្បធម៌ និងប្រពៃណីកាហ្វេនេះត្រូវបានអង្គការ UNESCO ទទួលស្គាល់ថាជាបេតិកភណ្ឌវប្បធម៌អរូបីនៃមនុស្សជាតិ។
កាហ្វេកប់ក្នុងខ្សាច់ក្តៅមានដើមកំណើតនៅក្នុងវប្បធម៌អូតូម៉ង់ប្រហែលសតវត្សទី ១៤ ចាប់តាំងពីសម័យអូតូម៉ង់មក ស្តេច និងពួកអភិជនបានសុំឱ្យអ្នកបំរើរបស់ពួកគេ ធ្វើកាហ្វេក្នុងខ្សាច់ក្តៅ ដោយសារកាលពីជំនាន់មុនកាហ្វេនេះបម្រើសម្រាប់ស្តេច និងអភិជនប៉ុណ្ណោះ។

ទោះជាយ៉ាងណាបច្ចុប្បន្នកាហ្វេនេះគឺបម្រើគ្រប់ជាតិសាសន៍ ហើយវាមានការពេញនិយមខ្លាំងណាស់ ជាពិសេសគឺនៅពេលអាហារថ្ងៃត្រង់ ឬបន្ទាប់ពីអាហារពេលល្ងាចរួច។ លោក Osman ម្ចាស់ហាងកាហ្វេក្នុងសង្កាត់ Fatih ក្រុងអ៊ីស្តង់ប៊ុល ប្រទេសទួរគី បាននិយាយថា កាហ្វេខ្សាច់ត្រូវបានដាក់លក់តាំងពីព្រឹកដល់យប់ ក្នុងតម្លៃជាង ៣ ដុល្លារអាមេរិកសម្រាប់មួយពែង ដោយបម្រើជាមួយម៉ាស្មេឡូ ហើយជារៀងរាល់ថ្ងៃលោកលក់កាហ្វេខ្សាច់អស់ជាង ៤០០ ពែងឯណោះ។

អ្នកទេសចរម្នាក់បាននិយាយថា កាហ្វេខ្សាច់ទួរគីគឺមានរសជាតិឆ្ងាញ់ប្លែកខុសពីកាហ្វេទូទៅ ជាមួយពណ៌ត្នោតស្រាល កាហ្វេនេះជាចំណង់ចំណូលចិត្តរបស់មនុស្សដែលចូលចិត្តកាហ្វេបែបស្រាល។ កាហ្វេខ្សាច់មានភាពងាយស្រួលក្នុងការស្វែងរកនៅតាមដងផ្លូវនៃទីក្រុង Istalbul ជាពិសេសនៅតំបន់ Taksim ដែលជាកន្លែងភ្ជាប់ផ្លូវដើរជាមួយនឹងហាងជាច្រើន តូបលក់អាហារ ហាងកាហ្វេ ឬនៅក្នុងសណ្ឋាគារ។

គួរបញ្ជាក់ដែរថា កាហ្វេកប់ក្នុងខ្សាច់ក្តៅរបស់ប្រទេសទួរគីធ្វើឡើងពីម្សៅកាហ្វេ ហើយដាក់ចូលទៅក្នុងដែក “cezve” បន្ទាប់មកដាក់ដែកនោះនៅក្នុងថាសខ្សាច់ក្តៅលើភ្លើង ឬចង្ក្រានអគ្គិសនីនៅកម្តៅ ១៨០ អង្សាសេ។ នៅពេលដែលកាហ្វេឆ្អិន និងពុះ វានឹងត្រូវចាក់ចូលទៅក្នុងពែងតូចមួយសម្រាប់ភ្ញៀវ ដើម្បីទទួលបានរសជាតិដ៏សម្បូរបែប៕

ប្រទេសថៃ ៖ កាលពីថ្ងៃទី១២ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា គណៈរដ្ឋមន្ត្រីបានឯកភាពបង្កើនថ្ងៃឈប់សម្រាកពិសេស ចំនួន៣ថ្ងៃ ក្នុងឆ្នាំ២០២៥ និងឆ្នាំ២០២៦ ។ ហេតុនេះ នៅឆ្នាំ២០២៥ ពលរដ្ឋថៃនឹងឈប់សម្រាកចំនួន២១ថ្ងៃ ដោយកំណត់បន្ថែមការឈប់សម្រាកយូរថ្ងៃនៅខែមិថុនា និងខែសីហា ព្រមទាំងឈប់សម្រាកយូរថ្ងៃពេលចូលឆ្នាំថ្មី ឆ្នាំ២០២៦ ។

លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ ដែលបំពេញតួនាទីជំនួសលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ និយាយថា កិច្ចប្រជុំគណៈរដ្ឋមន្ត្រី កាលពីថ្ងៃទី១២ ខែវិច្ឆិកា កន្លងមក បានឯកភាពបង្កើនថ្ងៃឈប់សម្រាកពិសេស ចំនួន៣ថ្ងៃ ដោយកំណត់ថ្ងៃសម្រាកនៅឆ្នាំ២០២៥ ចំនួន២ថ្ងៃ និងឆ្នាំ២០២៦ ចំនួន១ថ្ងៃ ។

នៅឆ្នាំ២០២៥ ពលរដ្ឋថៃនឹងឈប់សម្រាក ចំនួន២ថ្ងៃ គឺនៅថ្ងៃច័ន្ទ ទី២ ខែមិថុនា និងថ្ងៃច័ន្ទ ទី១១ ខែសីហា ។ រីឯឆ្នាំ២០២៦ ពលរដ្ឋថៃនឹងឈប់សម្រាក ចំនួន១ថ្ងៃ គឺនៅថ្ងៃសុក្រ ទី២ ខែមករា ដែលបន្ថែមលើថ្ងៃឈប់សម្រាកចាស់ ។ នេះបើយោងតាមការឯកភាពក្នុងកិច្ចប្រជុំគណៈរដ្ឋមន្ត្រី ។

ការបង្កើនចំនួនថ្ងៃឈប់សម្រាកនៅឆ្នាំ២០២៥ និងឆ្នាំ២០២៦ ដើម្បីឱ្យពលរដ្ឋបានសម្រាកពីការងារជាច្រើនថ្ងៃជាប់ៗគ្នា ហើយនឹងជំរុញឱ្យមានការធ្វើដំណើរកម្សាន្តកាន់តែច្រើន ។ ហេតុនេះ វានឹងជួយជំរុញដល់វិស័យទេសចរណ៍ និងសេដ្ឋកិច្ចផងដែរ ។

លើសពីនេះ ការបង្កើនចំនួនថ្ងៃឈប់សម្រាកនឹងជំរុញដល់គោលនយោបាយរបស់រដ្ឋាភិបាល ដែលកំណត់ឱ្យឆ្នាំ២០២៥ ក្លាយជាឆ្នាំទទួលភ្ញៀវទេសចរ និងកីឡាក្នុងប្រទេសថៃ (Amazing Thailand Grand Tourism and Sports Year 2025) ។

ដូច្នេះ ពេលពលរដ្ឋបានឈប់សម្រាកយូរថ្ងៃ ពួកគេនឹងអាចរៀបចំគម្រោងធ្វើដំណើរកម្សាន្ត និងចំណាយប្រាក់ទិញទំនិញផ្សេងៗនៅទូទាំងប្រទេសក្នុងអំឡុងពេលដំណើរកម្សាន្ត ។ ក្រៅពីនេះ វានឹងជួយកាត់បន្ថយការកកស្ទះចរាចរណ៍នៅតាមដងផ្លូវនៅកាន់បណ្តាខេត្តនានា ។

ដោយឡែក ការបង្កើនចំនួនថ្ងៃឈប់សម្រាកនឹងជួយឱ្យស្ថាប័នរដ្ឋ ក៏ដូចជាក្រុមហ៊ុនឯកជនធ្វើផែនការរៀបចំកម្មវិធីផ្សេងៗក្នុងថ្ងៃឈប់សម្រាកបានយ៉ាងសមស្រប ៕

ប្រទេសចិន៖ ថ្មីៗនេះយាន Thien Chau 8 ដែលផ្ទុកឥដ្ឋរាប់រយបានបាញ់បង្ហោះទៅកាន់ស្ថានីយអវកាស Thien Cung ដើម្បីសាកល្បងសាងសង់មូលដ្ឋាននៅលើឋានព្រះច័ន្ទជាលើកដំបូង។
ពួកគេមិនត្រឹមសិក្សាស្រាវជ្រាវប៉ុណ្ណោះទេ ឥឡូវនេះក៏បានអនុវត្តជាក់ស្តែងតែម្តង ដោយយកឥដ្ឋមានគុណភាពរាប់រយទៅកាន់ឋានព្រះច័ន្ទ ដើម្បីសាកល្បងសាងសង់មូលដ្ឋាននៅទីនេះ។

ឥដ្ឋនេះមានសមត្ថភាពទប់ទល់នឹងស្ថានភាពដ៏អាក្រក់នៅលើឋានព្រះច័ន្ទ រួមទាំងការប្រែប្រួលសីតុណ្ហភាពធំៗពី -១៩០ អង្សាសេទៅ ១៨០ អង្សាសេ ក៏ដូចជាទប់ទល់នឹងវិទ្យុសកម្មលោហធាតុដ៏ខ្លាំង និងមីក្រូម៉េតេអ័រធ្លាក់ កង្វះបរិយាកាសក្រាស់ដើម្បីការពារអាកាសយានិក។ សាស្ត្រាចារ្យ Zhou Cheng នៅសកលវិទ្យាល័យវិទ្យាសាស្ត្រ និងបច្ចេកវិទ្យា Huazhong និងសហការីរបស់លោក បាននិយាយថា យើងនឹងដំឡើងក្បឿងជាចម្បងនៅក្នុងលំហ បន្ទាប់មកយើងនឹងដាក់វានៅខាងក្រៅស្ថានីយអវកាស ហើយទុកវានៅទីនោះ ដោយឱ្យវាប្រឈមនឹងកត្តាបរិស្ថាន ដើម្បីមើលថាតើគុណភាពឥដ្ឋទៅជាយ៉ាងណា។

គំរូឥដ្ឋត្រូវបានផលិតចេញពីគ្រឿងផ្សំដែលយកពីឋានព្រះច័ន្ទដូចជា basalt និង anorthosite ដែលវាគឺជាវត្ថុធាតុដើមមានច្រើននៅលើព្រះច័ន្ទ។ យោងតាមការសិក្សា ឥដ្ឋមានសមត្ថភាពផ្ទុកលើសពីមួយតោនក្នុងមួយសង់ទីម៉ែត្រការ៉េ ហើយលក្ខណៈពិសេសគួរឱ្យកត់សម្គាល់មួយនៃពួកវាគឺសមត្ថភាពក្នុងការភ្ជាប់របស់ពួកវាដោយមិនចាំបាច់មានសារធាតុស្អិត។ ដូច្នេះហើយ ពួកវាជួយពង្រឹងភាពជាប់ល្អនៃរចនាសម្ព័ន្ធ និងសម្រួលដល់ដំណើរការសាងសង់។

គំនិតផ្តួចផ្តើមនេះគឺជាផ្នែកមួយនៃមហិច្ឆិតារបស់ប្រទេសចិនក្នុងការកសាងស្ថានីយ៍ស្រាវជ្រាវព្រះច័ន្ទអន្តរជាតិ (ILRS) នៅឆ្នាំ ២០៣០។ នេះក៏ជាគម្រោងរួមគ្នាជាមួយប្រទេសរុស្ស៊ី និងមានការចូលរួមពីប្រទេសជាច្រើនទៀត រួមទាំងប្រទេសវេណេហ្ស៊ុយអេឡា ថៃ ប៉ាគីស្ថាន សេណេហ្គាល់ រួមជាមួយនឹងអង្គការបរទេសប្រហែល ៤០ ផងដែរ។ ប្រទេសចិនក៏មានគោលបំណងបញ្ជូនអវកាសយានិកទៅកាន់ឋានព្រះច័ន្ទនៅឆ្នាំ ២០៣០ ដែលជាព្រឹត្តិការណ៍ដ៏សំខាន់មួយនៅក្នុងកិច្ចខិតខំប្រឹងប្រែងរុករកអវកាសរបស់ខ្លួន៕

សហរដ្ឋអាមេរិក ៖ អាមេរិកបានប្រមូលការ៉ុតពីផ្សារទំនើប និងហាងលក់ទំនិញនៅទូទាំងប្រទេស ក្រោយរកឃើញមេរោគ E. coli ឆ្លងរាតត្បាតបណ្តាលឱ្យពលរដ្ឋស្លា.ប់ ម្នាក់ និងពលរដ្ឋជាច្រើននាក់ទៀតត្រូវបញ្ជូនទៅសង្គ្រោះនៅមន្ទីរពេទ្យ ។

តាមទិន្នន័យរបស់មជ្ឈមណ្ឌលគ្រប់គ្រង និងបង្ការជំងឺអាមេរិកបញ្ជាក់ថា រហូតមកដល់ថ្ងៃទី១៨ ខែវិច្ឆិកា ឆ្នាំ២០២៤ មេរោគ E. coli បានឆ្លងពីការ៉ុតបណ្តាលឱ្យមនុស្សស្លាប់ម្នាក់ និងមនុស្ស១៥នាក់ទៀតត្រូវទៅបញ្ជូនទៅមន្ទីរពេទ្យ ។ ក្រៅពីនេះ មានអ្នកឆ្លងជំងឺនេះ៣៩នាក់ ក្នុងរដ្ឋចំនួន១៨ ។

ការ៉ុតដែលអាជ្ញាធរអាមេរិកប្រមូលមកវិញនេះ មានប្រភពពី Grimmway Farms ដែលបានលក់ឱ្យផ្សារទំនើបជាច្រើនកន្លែង ហើយអាជ្ញាធរជឿថា បច្ចុប្បន្ន ការ៉ុតផ្ទុកមេរោគទាំងអស់ត្រូវបានយកចេញពីផ្សារទំនើបអស់ហើយ ប៉ុន្តែអាចនៅសេសសល់ខ្លះក្នុងលំនៅឋានពលរដ្ឋដែលទិញមុនពេលប្រមូល ។ អាជ្ញាធរបានណែនាំឱ្យពលរដ្ឋបោះចោលការ៉ុត ឬយកវាទៅឱ្យផ្សារទំនើបវិញដើម្បីសុំប្រាក់វិញ ។

អ្នកឆ្លងមេរោគ E. coli ភាគច្រើនរស់នៅរដ្ឋញូវយ៉ក, រដ្ឋមិនិសូតា, រដ្ឋវ៉ាស៊ីនតោន, រដ្ឋកាលីហ្វ័រញ៉ា និងរដ្ឋអូរ៉េហ្គន ។ មជ្ឈមណ្ឌលគ្រប់គ្រង និងបង្ការជំងឺអាមេរិកឱ្យដឹងថា ការ៉ុតប្រមូលមកវិញគ្មានស្លាកបិទបញ្ជាក់ច្បាស់លាស់ទេ ដែលគេបានដាក់លក់ចាប់ពីថ្ងៃទី១៤ ខែសីហា ដល់ថ្ងៃទី២៣ ខែតុលា កន្លងមក ។ រីឯការ៉ុតតូចៗមានបិទស្លាកថា គួរតែបរិភោគចាប់ពីថ្ងៃទី១១ ខែកញ្ញា ដល់ថ្ងៃទី១២ ខែវិច្ឆិកា ។

ការឆ្លងមេរោគ E. coli នឹងមានរោគសញ្ញាជាច្រើន ដូចជា ៖ ចុកពោះខ្លាំង, រាគរូស និងក្អួតចង្អោរ ហើយរោគសញ្ញាទាំងនេះនឹងកើតឡើងក្រោយបរិភោគការ៉ុត ចាប់ពី៣ថ្ងៃ ទៅ៤ថ្ងៃ ។ អ្នកឆ្លងមេរោគនេះភាគច្រើនអាចជាសះស្បើយដោយខ្លួនឯង ប៉ុន្តែអ្នកខ្លះទៀតមានបញ្ហាតម្រងនោមធ្ងន់ធ្ងរ និងព្យាបាលនៅមន្ទីរពេទ្យ ។

កន្លងមក ពលរដ្ឋអាមេរិកចំនួន១០៤នាក់ ទើបតែឆ្លងមេរោគនេះពីខ្ទឹមបារាំងក្នុងហាង McDonald’s ហើយអ្នកឆ្លងម្នាក់ក្នុងចំណោមនេះ បានស្លាប់កាលពីខែតុលា ឆ្នាំ២០២៤ ។ រីឯអ្នកឆ្លង៣៤នាក់ផ្សេងទៀតត្រូវបានបញ្ជូនទៅកាន់មន្ទីរពេទ្យ ៕

សមុទ្រមេឌីទែរ៉ានេ គឺជាផ្នែកមួយនៃ “មហាសមុទ្រអាត្លង់ទិក” ដែលខាងជើងជាប់នឹងទ្វីបអឺរ៉ុប ខាងត្បូងជាប់នឹងទ្វីបអាហ្វ្រិក និងខាងកើតជាប់នឹងទ្វីបអាស៊ី។ សមុទ្រនេះត្រូវបានអ្នកវិទ្យាសាស្ត្រព្យាករណ៍ថា អាចនឹងរលាយបាត់ពីផែនដីនាពេលអនាគតដោយសារមូលហេតុធំៗទាំងនេះ។

ជាការពិតណាស់ ទ្វីបនានានៅលើផែនដីបច្ចុប្បន្នបានកំពុងស្ថិតនៅក្នុងស្ថានភាពនៃការផ្លាស់ប្តូរឥតឈប់ឈរ ដោយសារការប្រែប្រួលអាកាសធាតុ ហើយសំបកផែនដីត្រូវបានបែងចែកទៅជាបន្ទះ tectonic ដែលនាំទៅដល់ការរៀបចំឡើងវិញបន្តិចម្តងៗនៃទ្វីប និងការបង្កើតលក្ខណៈភូគព្ភសាស្ត្រចម្រុះនៅលើផែនដី។

ប្លង់ទ្វីបបច្ចុប្បន្នដូចជា អាហ្រ្វិក អឺរ៉ុប អាស៊ី និងទ្វីបអាមេរិក… គ្រាន់តែជាបណ្ដោះអាសន្នប៉ុណ្ណោះ។ ការកំណត់រចនាសម្ព័ន្ធទ្វីបបានផ្លាស់ប្តូរយ៉ាងខ្លាំងកាលពីអតីតកាល ហើយនឹងបន្តវិវឌ្ឍទៅថ្ងៃអនាគត អាស្រ័យលើចលនានៃចាន tectonic នេះបើយោងតាមការចុះផ្សាយរបស់សារព័ត៌មានបរទេស IFL Science ទ្វីបនៅលើពិភពលោករបស់យើងទំនងនឹងរួមបញ្ជូលគ្នានាពេលអនាគត ឬក៏អាចមានទ្វីបថ្មីបន្ថែមទៀត។

ដូច្នេះសមុទ្រមេឌីទែរ៉ាណេអាចនឹងត្រូវរងការគំរាមកំហែងខ្លាំងជាងគេដោយសារបន្ទះ tectonic ដ៏ធំពីររបស់ផែនដីបានបុកគ្នា បណ្តាលឱ្យមានការប្រែប្រួលនៃកម្រិតទឹកសមុទ្រ រារាំងមហាសមុទ្រអាត្លង់ទិកពីការហូរចូលទៅក្នុងសមុទ្រមេឌីទែរ៉ាណេតាមរយៈច្រកសមុទ្រ Gibraltar ដែលរំខានដល់ការផ្គត់ផ្គង់ទឹកសំខាន់ៗ។ https://blogger.googleusercontent.com/img/b/R29vZ2xl/AVvXsEgL-PxiWNytxVhf-UdAzNRlsvxyjwggXD8U-CJf0t_xtJKc0JU4Cw-Vk0KOjQidArnHB3g6mMb0bVSdXsZYLdLtoPHMuMLhrOnXz4HYqnVrHZP7JtcDc_UnWEkoNqEH07mwz5IqfO7UnQjyBP7G_S-VU_joC5gcjB8WsTP-WHZWpogxCOk4JuCloH0D4xjH/s1080/image_2024-11-19_10-23-18.png

តំបន់មេឌីទែរ៉ាណេ ងាយនឹងផ្លាស់ប្តូរ ដោយសារវាជាតំបន់ក្តៅ និងស្ងួតជាងគេ ដូច្នេះទឹកសមុទ្រហួតយ៉ាងលឿន ធ្វើឱ្យវាងាយនឹងរលាយបាត់ពីផែនដីនាពេលអនាគត។ ទោះជាយ៉ាងណា នេះគ្រាន់តែជាការទស្សន៍ទាយមួយដែលអាចធ្វើទៅបាននៃរបៀបដែលបន្ទះ tectonic របស់ផែនដីផ្លាស់ទីប៉ុណ្ណោះ ប៉ុន្តែយើងមិនដឹងថាពេលណាបន្ទះ tectonic របស់ផែនដីផ្លាស់ទីនោះទេ ប៉ុន្តែតាមការសិក្សាវានឹងត្រូវផ្លាស់ទីនាពេលអនាគត ហើយនៅពេលវាផ្លាស់ទី សមុទ្រមេឌីទែរ៉ាណេនឹងរលាយមុនគេ។

ជាការពិតណាស់ ការទស្សន៍ទាយការកំណត់រចនាសម្ព័ន្ធនៃមហាទ្វីបនាពេលអនាគតគឺពិបាកដោយសារតែធម្មជាតិដ៏ស្មុគស្មាញ និងថាមវន្តនៃប្លាកែត ក៏ដូចជាពេលវេលាដែលពាក់ព័ន្ធ។ ទោះជាយ៉ាងណាក៏ដោយ ទិន្នន័យប្រវត្តិសាស្ត្របានបង្ហាញថា សមុទ្រមេឌីទែរ៉ាណេស្ថិតក្នុងស្ថានភាពមិនស្ថិតស្ថេរតាំងពីយូរលង់ណាស់មកហើយ។ ប្រហែល ៥.៩៧ លានឆ្នាំមុន ព្រឹត្តិការណ៍មួយហៅថាវិបត្តិអំបិល Messinian បានកើតឡើងដែលប្រែក្លាយសមុទ្រមេឌីទែរ៉ាណេទៅជាអាងអំបិលដ៏ធំសម្បើមមួយអស់រយៈពេលកន្លះលានឆ្នាំ។ ដូច្នេះប្រសិនផែនដីប្រែប្រួល សមុទ្រមេឌីទែរ៉ាណេទំនងនឹងត្រូវបានគេលុបចោលពីផែនទីពិភពលោកនាពេលអនាគត៕