ប្រទេសវៀតណាម៖ កាលពីមុនហ្វីលីពីនគឺជាអ្នកនាំចេញចេកទៅកាន់ប្រទេសចិនច្រើនជាងគេ ប៉ុន្តែឥឡូវនេះការនាំចេញចេកពីហ្វីលីពីនទៅកាន់ប្រទេសចិនបានធ្លាក់ចុះ ៤៩% ខណៈវៀតណាមបានវ៉ាដាច់ហ្វីលីពីនក្លាយជាអ្នកផ្គត់ផ្គង់ចេកលេខ ១ នៅប្រទេសចិន។

យោងតាមទិន្នន័យពីមជ្ឈមណ្ឌលពាណិជ្ជកម្មអន្តរជាតិ (ITC) គិតត្រឹមដំណាច់ខែកក្កដា ឆ្នាំ ២០២៤ បរិមាណចេកដែលហ្វីលីពីននាំចេញទៅកាន់ប្រទេសចិនបានថយចុះ ៤៩% ធៀបនឹងរយៈពេលដូចគ្នាកាលពីឆ្នាំមុនមកត្រឹម ២៥៥,៦៣៦ តោន។

ការធ្លាក់ចុះនេះមានន័យថាចំណែកទីផ្សារចេករបស់ហ្វីលីពីននៅក្នុងប្រទេសចិនបានថយចុះមកត្រឹម ២៤.៥៣% បើធៀបនឹង ៣៧.៤៩% ក្នុងរយៈពេលដូចគ្នានៃឆ្នាំ ២០២៣។ ដូច្នេះហើយនេះជាលើកដំបូងដែលវៀតណាមបានវ៉ាហ្វីលីពីនក្លាយជាប្រទេសផ្គត់ផ្គង់ចេកលេខ ១ នៅប្រទេសចិន។ យោងតាម ITC ការនាំចេញចេករបស់វៀតណាមទៅកាន់ប្រទេសចិនបានកើនឡើង ១៩% ធៀបនឹងរយៈពេលដូចគ្នាកាលពីឆ្នាំមុនដល់ ៤៣៨.៥៧៣ តោន ហើយបច្ចុប្បន្នវៀតណាមកាន់កាប់ចំណែកទីផ្សារ ៤២% កើនឡើងពី ៣៣% ក្នុងរយៈពេលដូចគ្នានៃ ២០២៣។

មូលហេតុដែលការនាំចេញហ្វីលីពីនធ្លាក់ចុះគឺដោយសារភាពតានតឹងនៅសមុទ្រចិនខាងត្បូងជាមួយប្រទេសចិន ដែលជាកត្តាសំខាន់កាត់បន្ថយការនាំចេញចេករបស់ប្រទេស។ នាយកប្រតិបត្តិ PBGEA លោក Stephen Antig បាននិយាយថា “គោលនយោបាយភូមិសាស្ត្រពិតជាដើរតួយ៉ាងសំខាន់ក្នុងគោលនយោបាយសេដ្ឋកិច្ច” ។ លើសពីនេះទំនាក់ទំនងនយោបាយក៏ប៉ះពាល់ដល់ទំនាក់ទំនងពាណិជ្ជកម្មផងដែរ ដោយផ្អែកលើបទពិសោធន៍របស់ Antig ឧស្សាហកម្មនេះតែងតែទទួលរងការខូចខាតវត្ថុបញ្ចាំគ្រប់ពេលដែលមានភាពតានតឹងនៅក្នុងសមុទ្រចិនខាងត្បូង។

ការធ្លាក់ចុះនៃការនាំចេញធ្វើឱ្យបញ្ហាប្រឈមក្នុងការផលិតកាន់តែធ្ងន់ធ្ងរដែលអ្នកដាំចេកហ្វីលីពីនជួបប្រទះ រួមមានតម្លៃផលិតខ្ពស់ សត្វល្អិត បញ្ហាភស្តុភារ និងអាកាសធាតុមិនប្រក្រតី។ យោងតាមកាសែត Philippine Star បច្ចុប្បន្នហ្វីលីពីនកំពុងប្រឈមមុខនឹងការប្រកួតប្រជែងកាន់តែខ្លាំងពីបណ្តាប្រទេសនាំចេញចេកជិតខាងដូចជាកម្ពុជា វៀតណាម និងឡាវ។ ប្រទេសទាំងនេះបានបង្កើនសមត្ថភាពផលិតរបស់ពួកគេ ហើយអាចផ្តល់តម្លៃទាប ដែលធ្វើឱ្យចេករបស់ពួកគេកាន់តែមានភាពទាក់ទាញនៅក្នុងទីផ្សារសំខាន់ៗដូចជាប្រទេសចិន និងជប៉ុន៕

ប្រទេសថៃ ៖ កាលពីថ្ងៃទី១៩ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា រដ្ឋាភិបាលថៃនឹងចែកប្រាក់ឱ្យពលរដ្ឋ ចំនួន៤លាននាក់ដែលមានអាយុចាប់ពី៦០ឆ្នាំឡើងទៅ ។ ពលរដ្ឋនឹងទទួលបានប្រាក់១ម៉ឺនបាតក្នុងម្នាក់ (ឬស្មើនឹង២៩៤ដុល្លារអាមេរិក) មុនពិធីបុណ្យចូលឆ្នាំចិន ឆ្នាំ២០២៥ ។

លោក Pichai Chunhavajira ឧបនាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុនិយាយថា គណៈកម្មការគោលនយោបាយជំរុញសេដ្ឋកិច្ច ដែលមាននាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ធ្វើជាប្រធាន បានឯកភាពចែកប្រាក់ឱ្យពលរដ្ឋ ក្នុងដំណាក់កាលទី២ ។ ពលរដ្ឋអាយុចាប់ពី៦០ឆ្នាំឡើងដែលបានចុះឈ្មោះក្នុងប្រព័ន្ធអ៊ីនធើរណេតរបស់រដ្ឋាភិបាល និងបញ្ជាក់អត្តសញ្ញាណរួចរាល់ នឹងទទួលបានប្រាក់ម្នាក់១ម៉ឺនបាត ។

ហេតុនេះ ពលរដ្ឋដែលមានសិទ្ធទទួលប្រាក់ក្នុងដំណាក់កាលទី២ គឺស្មើនឹង៤លាននាក់ ហើយរដ្ឋាភិបាលនឹងចំណាយប្រាក់សរុបចំនួន៤ម៉ឺនលានបាត ។ ពលរដ្ឋនឹងទទួលបានប្រាក់នេះ មុនពិធីបុណ្យចូលឆ្នាំចិន ឆ្នាំ២០២៥ ឬមុនថ្ងៃទី២៩ ខែមករា ឆ្នាំ២០២៥ ។

ចំណែកការចែកប្រាក់ពលរដ្ឋនៅដំណាក់កាលទី៣ រដ្ឋាភិបាលនឹងចាប់ផ្តើមចែកចាប់ពីខែមេសា រហូតដល់ខែមិថុនា ឆ្នាំ២០២៥ ។ រីឯការចុះឈ្មោះក្នុងកម្មវិធីអ៊ីនធើរណេតរបស់រដ្ឋាភិបាល គឺពលរដ្ឋអាចប្រើប្រាស់បាន នៅត្រីមាសទី២ ឆ្នាំ២០២៥ ។ ក្រៅពីនេះ រដ្ឋាភិបាលក៏មានគម្រោងដោះស្រាយបញ្ហាការជំពាក់បំណុលធនាគាររបស់ពលរដ្ឋផងដែរ ដោយពលរដ្ឋនឹងអាចផ្អាកបង់ការប្រាក់ឱ្យធនាគារ រយៈពេល៣ឆ្នាំ ។

វាជាវិធានការសហការគ្នារវាងសមាគមធនាគារថៃ, ក្រសួងហិរញ្ញវត្ថុ និងធនាគារជាតិថៃ ។ រីឯសាច់ប្រាក់ដើមដែលពលរដ្ឋបានខ្ចីពីធនាគារ គឺអាស្រ័យលើលក្ខខណ្ឌការសងប្រាក់ ប៉ុន្តែរដ្ឋាភិបាលនឹងមានវិធានការពន្យារពេលសងប្រាក់រយៈពេលយូរ ។

ដោយឡែក ស្ថាប័នពាក់ព័ន្ធក៏បានពិភាក្សាជាមួយផ្នែកកសិកម្មពាក់ព័ន្ធនឹងគម្រោងជួយកសិកររយៈពេលខ្លី ដើម្បីដោះស្រាយបន្ទុកចំណាយលើជីវភាពប្រចាំថ្ងៃរបស់កសិករ ។ រដ្ឋាភិបាលនឹងផ្តល់ប្រាក់ឱ្យកសិករ ចំនួន១,០០០បាតក្នុង១គ្រួសារ (សម្រាប់គ្រួសារណាមានផ្ទៃដីកសិកម្ម មិនលើស១ហិកតា) ហើយក្រសួងហិរញ្ញវត្ថុនឹងទំនាក់ទំនងជាមួយស្ថាប័នពាក់ព័ន្ធដើម្បីអនុវត្តគម្រោងនេះ ព្រមទាំងពិភាក្សាគ្នាម្តងទៀត ដែលនេះជារង្វាន់ឆ្នាំថ្មីសម្រាប់កសិករថៃ ៕

ជារៀងរាល់ឆ្នាំ Fodor ដែលជាគេហទំព័រស្តីពីទេសចរណ៍ពិភពលោក បានណែនាំ និងរាយបញ្ជីគោលដៅល្បីៗជាច្រើនដែលលោកអ្នកមិនគួរទៅទស្សនា ដោយសារគោលដៅទាំងនេះផ្ទុកភ្ញៀវទេសចរណ៍លើសទម្ងន់ នាំឱ្យមានផលវិបាកអវិជ្ជមានដល់បរិស្ថាន និងការកើនឡើងតម្លៃ។ ដូច្នេះខាងក្រោមនេះគឺជាបញ្ជីកន្លែងល្បីៗដែលអ្នកមិនគួរទៅលេងក្នុងឆ្នាំ ២០២៥។

១.ក្យូតូ ប្រទេសជប៉ុន៖ យោងតាមទីភ្នាក់ងារផ្សព្វផ្សាយទេសចរណ៍ជប៉ុន (JNTO) ភ្ញៀវទេសចរអន្តរជាតិទៅកាន់ទីក្រុងក្យូតូ បានឈានដល់កម្រិតខ្ពស់បំផុតចំនួនជាង ៣.២ លាននាក់នៅក្នុងខែកក្កដា។ ហើយការចូលទស្សនាលើសពី ៣ លានដងក្នុងខែ មីនា មេសា ឧសភា និងមិថុនា ប្រាក់យ៉េនបានធ្លាក់ចុះ ដោយឈានដល់កម្រិតទាបបំផុតចាប់តាំងពីដើមទសវត្សរ៍ឆ្នាំ ១៩៩០ ដែលធ្វើឱ្យការចំណាយលើការធ្វើដំណើរទៅកាន់ប្រទេសជប៉ុនកាន់តែថ្លៃឡើងៗ។

បច្ចុប្បន្នតម្លៃសេវាកម្មទេសចរណ៍ក្នុងស្រុកបានកើនឡើងយ៉ាងខ្លាំង ពោលគឺតម្លៃបន្ទប់មួយខ្ពស់ជាងមុនការរាតត្បាត ២៥%។ លោកស្រី Wanping Aw នាយកក្រុមហ៊ុនទេសចរណ៍ TokudAw Inc. បានអត្ថាធិប្បាយថា ការឡើងថ្លៃសណ្ឋាគារធ្វើឱ្យប្រជាជនជប៉ុន និងភ្ញៀវទេសចរពិបាកកក់បន្ទប់។ នៅក្យូតូ កន្លែងទាក់ទាញដូចជា Arashiyama, Kiyomizudera និង Fushimi Inari ច្រើនតែមានមនុស្សចង្អៀតណែនណាប់ លើសពីនេះតម្លៃអាហារក៏ខ្ពស់ខ្លាំងផងដែរ ជាហេតុដែលគេហទំព័រ Fodor ចាត់ទុកថាជាគោលដៅដែលមិនគួរទៅទស្សនានៅឆ្នាំ ២០២៥។

២.កោះបាលី ប្រទេសឥណ្ឌូនេស៊ី៖ ការិយាល័យស្ថិតិខេត្តបាលីបាននិយាយថាកោះនេះបានស្វាគមន៍ភ្ញៀវអន្តរជាតិប្រហែល ៣.៥ លាននាក់ កើនឡើង ២២% ធៀបនឹងរយៈពេលដូចគ្នាក្នុងឆ្នាំ ២០២៣។ ការងើបឡើងវិញនៃវិស័យទេសចរណ៍ជួយជំរុញសេដ្ឋកិច្ច ប៉ុន្តែក៏ដាក់សម្ពាធយ៉ាងខ្លាំងលើហេដ្ឋារចនាសម្ព័ន្ធរបស់កោះបាលីផងដែរ។ ដោយសារមនុស្សណែនណាប់ពេក ឆ្នេរស្អាតៗដូចជា Kuta និង Seminyak ឥឡូវនេះគឺពោរពេញទៅដោយសំរាម។

យោងតាមក្រុមហ៊ុន Bali Partnership ដែលជាសម្ព័ន្ធស្រាវជ្រាវគ្រប់គ្រងកាកសំណល់ បាននិយាយថា កោះនេះកំពុងបង្កើតសំរាម ១.៦ លានតោនក្នុងមួយឆ្នាំៗ ហើយកាកសំណល់ប្លាស្ទិកចំនួន ៣៣,០០០ តោនបានហូរចូលទៅក្នុងបរិស្ថានជារៀងរាល់ឆ្នាំ។ បច្ចុប្បន្នគុណភាពទឹកតាមឆ្នេរសមុទ្រឥណ្ឌូនេស៊ី ស្ថិតនៅក្រោមសម្ពាធពីការបំពុលនៃសារធាតុសរីរាង្គ និងលោហធាតុធ្ងន់ធ្ងរ។ លើសពីនេះការកើនឡើងតម្លៃនៃការរស់នៅ ការកកស្ទះចរាចរណ៍ និងជម្លោះរវាងអ្នកទេសចរ និងអ្នកស្រុកក៏កំពុងកើនឡើងខ្លាំងនៅក្នុងកោះបាលីផងដែរ។

៣.កោះសាមុយ ប្រទេសថៃ៖ កោះ Samui បានទាក់ទាញអ្នកទេសចរជាយូរមកហើយ ដោយសាររមណីយដ្ឋាន និងវីឡាប្រណីតៗ។ កាលពីឆ្នាំមុន កោះនេះបានស្វាគមន៍អ្នកទស្សនាចំនួន ៣.៤ លាននាក់ ដែលជាការកើនឡើងយ៉ាងខ្លាំង ទោះជាយ៉ាងណាអ្នកជំនាញបានព្រមានថាការកើនឡើងនេះអាចធ្វើឱ្យបញ្ហាបច្ចុប្បន្នកាន់តែអាក្រក់ទៅៗ។

បច្ចុប្បន្នកោះនេះមានផ្ទុកសំរាមចំនួន ២០០,០០០ តោន ដោយសំណល់ភាគច្រើនត្រូវបានបង្ហូរដោយផ្ទាល់ទៅក្នុងសមុទ្រ ធ្វើឱ្យប៉ះពាល់យ៉ាងខ្លាំងដល់បរិស្ថាន។ លើសពីនេះការបង្កើតវីឡា និងរមណីយដ្ឋានដែលសាងសង់ដោយខុសច្បាប់ ក៏បង្កហានិភ័យពីការបាក់ដីភ្នំ និងប៉ះពាល់យ៉ាងធ្ងន់ធ្ងរដល់បរិស្ថានសមុទ្រផងដែរ៕

កាំជ្រួចបា.ញ់ក្នុងកម្មវិធីផ្សេងៗបានជួយបង្កើនបរិយាកាសឱ្យកាន់តែរីករាយ និងអធិកអធមជាមួយពន្លឺភ្លើងពណ៌យ៉ាងស្រស់ស្អាតនៅលើមេឃ ហើយធ្វើឱ្យអ្នកចូលរួមមានអារម្មណ៍រំភើបជានិច្ច ។ បើទោះជាមានមតិខ្លះនិយាយថា ការដុតកាំជ្រួច គឺជាការដុតលុយចោល ប៉ុន្តែម្ចាស់កម្មវិធីពេញចិត្តនឹងការចំណាយប្រាក់ទិញកាំជ្រួចដើម្បីឱ្យមនុស្សម្នាសប្បាយ ។

ប៉ុន្តែយើងតែងតែឮសំឡេងខ្លាំងៗពេលបាញ់កាំជ្រួច និងប៉ះពាល់ដល់អ្នកចូលចិត្តរស់នៅស្ងប់ស្ងាត់ ឬធ្វើឱ្យសត្វចិញ្ចឹមមួយចំនួនភ័យខ្លាចរត់បាត់ស្រមោល ពេលឮសំឡេងកាំជ្រួចម្តងៗ ។ ក្រៅពីនេះ មនុស្សមួយចំនួនធ្លាប់ឈរក្បែរបរិវេណបាញ់កាំជ្រួច ពួកគេតែងតែទទួលសារធាតុពុលចេញពីកាំជ្រួចបណ្តាលឱ្យប៉ះពាល់ស្បែក ។

ហេតុនេះ កាំជ្រួច Organic Firework ត្រូវបានផលិតឡើងដើម្បីដោះស្រាយបញ្ហាទាំងអស់ ដែលកាំជ្រួចថ្មីនេះមិនឮសំឡេងខ្លាំង, គ្មានសារធាតុពុលគ្រោះថ្នាក់ ហើយវាស័ក្តិសមសម្រាប់ប្រើប្រាស់ក្នុងកម្មវិធីឱ្យកាន់តែអធិកអធម នាថ្ងៃអនាគត ។

លោក Daan Roosegaarde អ្នកផលិត «SPARK» គឺជាកាំជ្រួចពុំប៉ះពាល់បរិស្ថាន (Organic Firework) នៅប្រទេសហូឡង់ និយាយថា កាំជ្រួចថ្មីនេះ នឹងគ្មានសារធាតុពុល ឬសំឡេងខ្លាំងដូចកាំជ្រួចធម្មតាទេ ។ លោកបានបង្ហោះកាំជ្រួចរបស់ខ្លួនទៅលើមេឃ ហើយវាបានបញ្ចេញពន្លឺយ៉ាងស្រស់ស្អាតតាមកម្លាំងខ្យល់ ។

ការបាញ់កាំជ្រួច Organic Firework នាពេលរាត្រីនឹងបញ្ចេញពន្លឺតូចៗយ៉ាងច្រើនមហាសាលពាសពេញមេឃ ហើយវាក៏បង្កើតជាទស្សនីយភាពដ៏ស្រស់ស្អាតបំផុតពុំធ្លាប់មាន ។ ពន្លឺតូចៗទាំងនេះនឹងស្រស់ស្អាតជាងពន្លឺកាំជ្រួចធម្មតា ដែលមើលទៅ ហាក់ដូចជាពន្លឺផ្កាយលើមេឃ ។

នេះជាការបង្កើតកាំជ្រួចថ្មីតាមបច្ចេកវិទ្យាទំនើបនាពេលបច្ចុប្បន្ន ហើយវាគ្មានសំឡេងខ្លាំងរំខានដល់មនុស្ស ឬសត្វ និងពុំបង្កគ្រោះថ្នាក់អ្វីឡើយ ។ ចុងក្រោយ លោក Daan សង្ឃឹមថា កម្មវិធីសប្បាយៗនាថ្ងៃអនាគត នឹងជ្រើសរើសកាំជ្រួចថ្មីនេះមកបង្ហាញភាពស្រស់ស្អាតដល់អ្នកចូលរួម ៕

សហរដ្ឋអាមេរិក ៖ កាលពីថ្ងៃទី១៨ ខែវិច្ឆិកា ឆ្នាំ២០២៤ សារព័ត៌មានបរទេសបានផ្សព្វផ្សាយពីរូបភាពត្រី Oarfish យក្ស ងា.ប់ នៅឆ្នេរសមុទ្រអាមេរិក ដែលធ្វើឱ្យពលរដ្ឋបារម្ភពីគ្រោះធម្មជាតិធ្ងន់ធ្ងរអាចកើតឡើង ពីព្រោះវាជាប្រផ្នូលប្រាប់ពីហេតុការណ៍មិនល្អ ។ ត្រីនេះត្រូវបានគេស្គាល់ជាទូទៅថា «ត្រីនាគ» ឬ «ត្រីអវ.សានពិភពលោក» ។

វិទ្យាស្ថានស្រាវជ្រាវ និងសិក្សាផ្នែកមហាសមុទ្រលំដាប់ពិភពលោក (Scripps Institution of Oceanography) បានបង្ហោះរូបភាពត្រី Oarfish ប្រវែង៣ម៉ែត្រ ងាប់នៅលើឆ្នេរសមុទ្រ Grandview ក្នុងទីក្រុង Encinitas រដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃទី១៤ ខែវិច្ឆិកា កន្លងមក ។ ប៉ុន្តែវាធ្វើឱ្យពលរដ្ឋអាមេរិកភ័យខ្លាចថា អាចនឹងមានហេតុការណ៍មិនល្អកើតឡើង ។

វិទ្យាស្ថានស្រាវជ្រាវបញ្ជាក់ថា ត្រីនេះមានព្រុយវែងពណ៌ក្រហម នៅលើក្បាល និងមានរូបរាងប្លែកខុសពីត្រីធម្មតា ហើយនេះជាការប្រទះឃើញត្រីលើឆ្នេរសមុទ្រអាមេរិកក្នុងរយៈពេល៣ខែ ។ បន្ទាប់មក ផ្នែកជំនាញផ្នែកសត្វបានយកត្រីនេះទៅក្លាហ្សេដើម្បីស្រាវជ្រាវបន្ថែមពាក់ព័ន្ធនឹងសត្វសមុទ្រមានឆ្អឹងកង ដោយសារវាជាពូជត្រីកម្រ ។

អ្នកជំនាញនិយាយថា ត្រី Oarfish ងាប់នៅលើឆ្នេរសមុទ្រក្រោយពីបម្រែបម្រួលអាកាសធាតុមហាសមុទ្រ ហើយចំនួនត្រីប្រភេទនេះកើនឡើងនៅតំបន់ឆ្នេរសមុទ្រ ។ អ្នកជំនាញជាច្រើនបានបញ្ជាក់ពីមូលហេតុធ្វើឱ្យត្រីនេះអណ្តែតមកលើឆ្នេរខ្សាច់ គឺដោយសារការផ្លាស់ប្តូរទ្រង់ទ្រាយធំ ដូចជា ៖ បាតុភូត El Nino និង La Nina បានកើតឡើងកាលពីដើមឆ្នាំ២០២៤ ប៉ុន្តែពេលខ្លះ វាក៏មិនបណ្តាលមកពីបាតុភូតទាំងពីរទេ ។

ក្រៅពីនេះ វាអាចបណ្តាលមកពីទឹកសមុទ្រពណ៌ក្រហម និងខ្យល់បក់ខ្លាំងកាលពីសប្តាហ៍ទី២ ខែវិច្ឆិកា ឆ្នាំ២០២៤ ហើយនៅមានកត្តាជាច្រើនទៀតដែលធ្វើឱ្យត្រីអណ្តែតមកលើឆ្នេរសមុទ្រ ។

កាលពីចុងខែកញ្ញា កន្លងមក អ្នកនេសាទត្រីនៅប្រទេសអូស្ត្រាលី ធ្លាប់បានចាប់ត្រី Oarfish យក្ស ឬត្រីអវសានពិភពលោក ដែលមានរូបរាងដូចគ្នានេះ ។ ពលរដ្ឋអឺរ៉ុបមានជំនឿថា វាអាចជាប្រផ្នូលប្រាប់ពីគ្រោះមហន្តរាយធ្ងន់ធ្ងរ រហូតដល់មានការជជែកគ្នាយ៉ាងច្រើនក្នុងបណ្តាញសង្គមពីជំនឿ ។

គួរបញ្ជាក់ថា Oarfish គឺជាត្រីរស់នៅក្នុងមហាសមុទ្រទឹកជ្រៅ និងស្ថិតក្នុងចំណោមត្រីមានទំហំខ្លួនធំបំផុតលើពិភពលោក ។ បើតាមជំនឿបុរាណរបស់ពលរដ្ឋជប៉ុន គឺការបង្ហាញខ្លួនរបស់វាជាប្រផ្នូលប្រាប់ពីហេតុការណ៍មិនល្អ ឬមានគ្រោះរញ្ជួយដីកើតឡើង ហើយពលរដ្ឋជប៉ុនហៅត្រីនេះថា «ត្រីគ្រោះរញ្ជួយដី» ៕

ក្រុមភ្នាក់ងារ FBI អាមេរិក បានធ្វើការឃាត់ខ្លួនទីភ្នាក់ងារ CIA ម្នាក់នៅប្រទេសកម្ពុជា ពីបទធ្វើឱ្យបែកធ្លាយឯកសារសម្ងាត់ ស្តីពីផែនការយោធាអ៊ីស្រាអែល សងសឹកអ៊ីរ៉ង។

ភ្នាក់ងារCIA ម្នាក់នោះមានឈ្មោះថា Asif Rahman ដែលត្រូវបានប៉ូលិសសហព័ន្ធFBI បានចាប់ខ្លួននៅកម្ពុជានោះ កាលថ្ងៃទី១៣ វិច្ឆិកា ឆ្នាំ២០២៤។

Asif Rahman ត្រូវបានក្រសួងយុត្តិធម៌អាមេរិកចោទប្រកាន់ពីបទរក្សាទុក និងធ្វើឱ្យបែកធ្លាយព័ត៌មានការពារជាតិអាមេរិកដោយចេតនា។

បច្ចុប្បន្ន ភ្នាក់ងារ CIAរូបនេះ ត្រូវបានក្រុមភ្នាក់ងារ FBI អាមេរិក បញ្ជូនៅកោះហ្គាំ (Guam) ដើម្បីរងចាំការកាត់ទោស។

គួរបញ្ជាក់ផងដែរ កណ្តាលខែតុលាកន្លងទៅ គេឃើញមានឯកសារសម្ងាត់ស្តីពីគម្រោងការវាយប្រហាររបស់អ៊ីស្រាអែលទៅលើអ៊ីរ៉ង់ ដែលត្រូវបានចែកចាយលើបណ្ដាញតេឡេក្រាម ដិយឯកសារសម្ងាត់នោះត្រូវបានបង្ហោះផ្សាយចេញពីប្រទេសកម្ពុជា៕